ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
အောက်တိုဘာ ၁-၇
ကျမ်းစာထဲက အဖိုးတန်ဘဏ္ဍာများ | ယောဟန် ၉-၁၀
“သိုးတွေကို ယေရှု ဂရုစိုက်”
(ယောဟန် ၁၀:၁-၃) “ကျွန်တော် မှန်တာကို ပြောမယ်၊ အမှန်အတိုင်း ပြောမယ်။ သိုးခြံထဲကို တံခါးပေါက်ကနေ မဝင်ဘဲ တခြားနေရာကနေ ကျော်ဝင်တဲ့သူဟာ သူခိုးဓားပြပဲ။ ၂ သိုးထိန်းမှန်ရင် တံခါးပေါက်ကနေပဲ ဝင်တယ်။ ၃ သူ့ကို တံခါးစောင့်က တံခါးဖွင့်ပေးတယ်။ သိုးတွေလည်း သူ့အသံကို နားထောင်တယ်။ သူက သိုးတစ်ကောင်စီကို နာမည်နဲ့ခေါ်ပြီး ခြံပြင် ခေါ်ထုတ်တတ်တယ်။
(ယောဟန် ၁၀:၁၁) ကျွန်တော်ဟာ သိုးထိန်းကောင်းပါ။ သိုးထိန်းကောင်းဆိုတာ သိုးတွေအတွက် အသက်စွန့်တယ်။
(ယောဟန် ၁၀:၁၄) ကျွန်တော်ကတော့ သိုးထိန်းကောင်းဖြစ်တဲ့အတွက် ကျွန်တော့်သိုးတွေကို သိတယ်။ သိုးတွေကလည်း ကျွန်တော့်ကို သိတယ်။
nwtsty မီဒီယာ
သိုးခြံ
သိုးခြံဆိုတာ သူခိုးဓားပြတွေ၊ သားရဲတွေ ရန်ကနေ သိုးတွေကို ကာကွယ်ပေးဖို့ ခြံခတ်ထားတဲ့ ဝင်းဖြစ်တယ်။ ညအချိန်မှာ သိုးထိန်းတွေက သိုးအုပ်ကို သိုးခြံထဲ လုံလုံခြုံခြုံ လှောင်ထားတတ်တယ်။ ကျမ်းစာခေတ်က သိုးခြံတွေဟာ အများအားဖြင့် ဝင်ပေါက်တစ်ပေါက်တည်းရှိပြီး ပုံစံနဲ့ အရွယ်အစား အမျိုးမျိုးရှိတဲ့ အမိုးမပါ ကျောက်နံရံကာ အဆောက်အအုံတွေ ဖြစ်တယ်။ (တလ ၃၂:၁၆။ ၁ရှ ၂၄:၃။ ဇေ ၂:၆) ယောဟန်က “တံခါးစောင့်” ရှိတဲ့ သိုးခြံထဲကို “တံခါးပေါက်” ကနေ ဝင်တဲ့အကြောင်း ပြောတယ်။ (ယဟ ၁၀:၁၊ ၃) ညအချိန်မှာ ရပ်ကွက်ပိုင် သိုးခြံထဲမှာ သိုးအုပ်တစ်အုပ်ထက်မက ရှိနိုင်တယ်။ အဲဒီသိုးတွေကို တံခါးစောင့်က သတိရှိရှိ ကာကွယ်ပေးတယ်။ မနက်ကျရင် တံခါးစောင့်က သိုးထိန်းတွေအတွက် တံခါးကို ဖွင့်ပေးတယ်။ သိုးထိန်းတွေက ကိုယ့်သိုးအုပ်ကို အသံပေးပြီး ခေါ်ထုတ်တဲ့အခါ သိုးတွေဟာ ကိုယ့်သိုးထိန်းရဲ့ အသံကို ကြားပြီး လိုက်ထွက်သွားကြတယ်။ (ယဟ ၁၀:၃-၅) ယေရှုက မိမိတပည့်တွေကို ဂရုစိုက်တယ်ဆိုတာ ပြောဖို့ ဒီအလေ့အထကို ဥပမာအဖြစ် သုံးခဲ့တယ်။—ယဟ ၁၀:၇-၁၄။
ခရစ်ယာန်မိသားစုများ “နိုးကြား” နေကြပါ
၅ သိုးထိန်းတစ်ဦးနဲ့ သူ့သိုးတွေရဲ့ဆက်ဆံရေးက သိကျွမ်းမှုနဲ့ ယုံကြည်စိတ်ချမှုအပေါ် အခြေခံတယ်။ သိုးထိန်းက သူ့သိုးတွေအကြောင်း အားလုံးသိသလို သိုးတွေကလည်း သိုးထိန်းကို ကောင်းကောင်းသိပြီး ယုံကြည်စိတ်ချတယ်။ သိုးတွေက သိုးထိန်းရဲ့ အသံကိုသိပြီး နာခံတယ်။ ယေရှုက “ငါ၏သိုးများကို ငါသိ၏။ ငါ့သိုးများသည်လည်း ငါ့ကိုသိကြ၏” လို့ပြောခဲ့တယ်။ ယေရှုက အသင်းတော်အကြောင်း အပေါ်ယံလောက်ပဲသိတာ မဟုတ်ဘူး။ “သိ၏” လို့ပြန်ဆိုတဲ့ ဂရိစကားလုံးက “တစ်ဦးချင်း၊ အတွင်းကျကျသိတယ်” ဆိုတဲ့အဓိပ္ပာယ်ရှိတယ်။ ဒါကြောင့် သိုးထိန်းကောင်းက သိုးတစ်ကောင်ချင်းစီကို သိတယ်။ တစ်ကောင်ချင်းစီရဲ့ လိုအပ်ရာ၊ အားနည်းချက်နဲ့ အားသာချက်တွေကို သိတယ်။ ကျွန်ုပ်တို့ရဲ့ စံနမူနာရှင်က သူ့သိုးတွေနဲ့ပတ်သက်လို့ မသိတဲ့အချက် မရှိဘူး။ သိုးတွေကလည်း သိုးထိန်းအကြောင်း ကောင်းကောင်းသိပြီး သူ့ဦးဆောင်မှုကို ယုံကြည်စိတ်ချတယ်။
(ယောဟန် ၁၀:၄၊ ၅) ရှေ့ကနေ ဦးဆောင်ပြီး ခေါ်ထုတ်သွားတဲ့အခါ သိုးတွေဟာ သူ့အသံကို သိတဲ့အတွက် နောက်ကနေ လိုက်တတ်တယ်။ ၅ သူစိမ်းတွေရဲ့ အသံကိုတော့ သူတို့ မသိတဲ့အတွက် သူစိမ်းနောက်ကို လုံးဝမလိုက်ဘဲ ထွက်ပြေးတတ်တယ်။”
“ပုံဥပမာကင်း၍ ဟောတော်မမူ”
၁၇ ဂျော့ဂ်ျ အေ. စမစ်သ်သည် သူကိုယ်တိုင်လေ့လာတွေ့ရှိချက်ကို သန့်ရှင်းရာမြေမှ သမိုင်းဝင်ပထဝီ ဟူသည့် စာအုပ်တွင် ဤသို့ရေးသားခဲ့သည်– “တစ်ခါတစ်ရံ ယုဒနယ်ရှိ ရေတွင်းတစ်ခုခုအနီးတွင် ကျွန်ုပ်တို့ နေ့လယ်အနားယူလေ့ရှိသည်။ ထိုရေတွင်းသို့ သိုးထိန်းသုံးလေးဦးသည် ၎င်းတို့၏သိုးများနှင့်အတူ ရောက်လာလေ့ရှိ၏။ ထိုအခါ သိုးအုပ်များ ရောထွေးသွားကြရာ သိုးထိန်းတစ်ဦးစီသည် မိမိတို့သိုးများကို မည်သို့ခွဲခြားသိရှိနိုင်မည်နည်းဟု ကျွန်ုပ်တို့ တွေးပူမိခဲ့ကြ၏။ သို့သော် သိုးများ ရေသောက်၍ ကစားပြီးသောအခါ သိုးထိန်းများက ချိုင့်ဝှမ်းတစ်ဖက်တစ်ချက်စီသို့ အသီးသီးထွက်ခွာသွားပြီး မိမိတို့၏သိုးများကို မတူညီသောခေါ်သံများဖြင့် ခေါ်လိုက်ကြ၏။ ထိုအခါ သိုးများသည် အုပ်စုခွဲပြီး တစ်ကောင်ချင်းစီ မိမိတို့၏သိုးထိန်းရှိရာနောက် လိုက်သွားကာ မိမိတို့လာရာလမ်းအတိုင်း စနစ်တကျ ပြန်ထွက်သွားကြသည်။” ယေရှုသည် အကောင်းဆုံးပုံဥပမာကို ရွေးချယ်ပြီး မိမိ၏ဆိုလိုရင်းကို ပေါ်လွင်စေခဲ့သည်။ ၎င်းမှာ ကိုယ်တော့်သွန်သင်ချက်များကို ကျွန်ုပ်တို့အသိအမှတ်ပြု နာခံပြီး ကိုယ်တော့်ဦးဆောင်မှုနောက် လိုက်မည်ဆိုလျှင် “သိုးထိန်းကောင်း” ၏ စောင့်ရှောက်မှုအောက် ရှိနိုင်ကြမည်ဖြစ်သည်။
(ယောဟန် ၁၀:၁၆) “ဒီသိုးခြံထဲကမဟုတ်တဲ့ တခြားသိုးတွေကို ကျွန်တော်ပိုင်သေးတယ်။ အဲဒီသိုးတွေကိုလည်း ဦးဆောင်ရမယ်။ သူတို့က ကျွန်တော့်အသံကို နားထောင်တယ်။ ဒါကြောင့် သိုးတစ်အုပ်တည်း၊ သိုးထိန်းတစ်ယောက်တည်း ဖြစ်လိမ့်မယ်။
nwtsty ယဟ ၁၀:၁၆ လေ့လာမှု မှတ်စု
ဦးဆောင်ရ– ဒီမှာအသုံးပြုထားတဲ့ ဂရိကြိယာ အဲဂို ဟာ ကျမ်းချက်ရဲ့ ရှေ့နောက်စကားအရ “ဆောင်ခဲ့ရ” ဒါမှမဟုတ် “ဦးဆောင်ရ” အဓိပ္ပာယ်ရှိတယ်။ အေဒီ ၂၀၀ ခန့်က ဂရိလက်ရေးစာမူတစ်ခုမှာ “စုသိမ်း” လို့ပြန်ဆိုကြတဲ့ ခပ်ဆင်ဆင် ဂရိစကားလုံး (စိုင်နေဂို) ကို အသုံးပြုထားတယ်။ ကောင်းတဲ့သိုးထိန်း ယေရှုဟာ ဒီသိုးခြံ (“သိုးစုငယ်” လို့ လု ၁၂:၃၂ မှာခေါ်ထား) ထဲက သိုးတွေနဲ့ တခြားသိုးတွေကို စုသိမ်းတယ်၊ လမ်းပြတယ်၊ ကာကွယ်ပေးတယ်၊ ကျွေးမွေးတယ်။ အဲဒီသိုးအားလုံးဟာ သိုးထိန်းတစ်ယောက်တည်းရဲ့ လက်အောက်မှာရှိတဲ့ သိုးအုပ်တစ်အုပ်ဖြစ်လာတယ်။
ရှာဖွေလေ့လာ ဘုရားရေးရာရတနာ
(ယောဟန် ၉:၃၈) အဲဒီအခါ သူက “သခင်၊ ကျွန်တော် ယုံကြည်ပါတယ်” ဆိုပြီး ယေရှုကို ဦးညွှတ်တယ်။
nwtsty ယဟ ၉:၃၈ လေ့လာမှု မှတ်စု
ယေရှုကို ဦးညွှတ်တယ်– ဒါမှမဟုတ် “ညွတ်ပြပ်”၊ “ပျပ်ဝပ်” “ဂါရဝပြု။” ဘုရားတစ်ဆူ ဒါမှမဟုတ် နတ်ဘုရားတစ်ပါးကို ဝတ်ပြုတာကို ရည်ညွှန်းဖို့ ဂရိကြိယာ ပရိုစကီနီအို ကိုအသုံးပြုတဲ့အခါ “ဝတ်ပြု” ဆိုပြီး ပြန်ဆိုတယ်။ (မ ၄:၁၀။ လု ၄:၈) ဒါပေမဲ့ ဒီမွေးရာပါ မျက်မမြင်ဟာ မျက်စိမြင်လာတဲ့အခါ ယေရှုကို ဘုရားရဲ့ကိုယ်စားလှယ်အဖြစ် အသိအမှတ်ပြုပြီး ဦးညွှတ်တာဖြစ်မှန်း ကျမ်းချက်ရဲ့ ရှေ့နောက်စကားအရ သိရတယ်။ အဲဒီလူက ယေရှုကို ဘုရား၊ နတ်ဘုရားအဖြစ် မဟုတ်ဘဲ ကြိုတင်ဟောထားတဲ့ “လူသား၊” ဘုရားပေးအခွင့်အာဏာနဲ့လာတဲ့ မေရှိယအဖြစ် ရှုမြင်တယ်။ (ယဟ ၉:၃၅) ယေရှုကို သူဦးညွှတ်တဲ့အခါ ဟီဘရူးကျမ်းစောင်တွေမှာ ပါတဲ့ လူတွေ ဦးညွှတ်သလို ဦးညွှတ်တာ ထင်ရှားတယ်။ သူတို့ဟာ ပရောဖက်တွေ၊ ဘုရင်တွေ၊ ဘုရားရဲ့ကိုယ်စားလှယ်တွေနဲ့ တွေ့တဲ့အခါ ဦးညွှတ်ပျပ်ဝပ်ကြတယ်။ (၁ရှ ၂၅:၂၃၊ ၂၄။ ၂ရှ ၁၄:၄-၇။ ၁ဘု ၁:၁၆။ ၂ဘု ၄:၃၆၊ ၃၇) အများအားဖြင့် ယေရှုကို လူတွေ ဦးညွှတ်ကြတာက ဘုရားရဲ့ ဖွင့်ဟဖော်ပြချက်အတွက်၊ ဘုရားရဲ့မျက်နှာသာရကြောင်း သက်သေအတွက် ကျေးဇူးတင်လို့ ဖြစ်တယ်။—မ ၂:၂။ ၈:၂။ ၁၄:၃၃။ ၁၅:၂၅ တို့ရဲ့ လေ့လာမှု မှတ်စုတွေကို ကြည့်ပါ။
(ယောဟန် ၁၀:၂၂) အဲဒီအချိန်ဟာ ဂျေရုဆလင်မြို့မှာ ဆက်ကပ်အပ်နှံပွဲ ကျင်းပချိန်ပဲ။ ဆောင်းတွင်းလည်း ဖြစ်နေတယ်။
nwtsty ယဟ ၁၀:၂၂ လေ့လာမှု မှတ်စု
ဆက်ကပ်အပ်နှံပွဲ– ဒီပွဲကို ဟေဗြဲလို ဟနုကာပွဲ (ချာနုကာပွဲ) လို့ ခေါ်တယ်။ အဓိပ္ပာယ်ကတော့ “အပ်နှင်းခြင်း၊ ဆက်ကပ်ခြင်း” ဖြစ်တယ်။ ဘီစီ ၁၆၅ မှာ ဂျေရုဆလင်ရှိ ဗိမာန်တော်ကို ပြန်ဆက်ကပ်အပ်နှံတဲ့ အထိမ်းအမှတ်အနေနဲ့ ခိသလုလ ၂၅ ရက်ကစပြီး ဆောင်းယဉ်စွန်းချိန် ရောက်ခါနားအထိ ရှစ်ရက်တိုင် ဒီပွဲကို ကျင်းပကြတယ်။ (ဒီအခန်းငယ်ပါ ဆောင်းတွင်း ရဲ့ လေ့လာမှု မှတ်စုနဲ့ နောက်ဆက်တွဲ ခ၁၅ ကိုကြည့်ပါ) ဆီးရီးယားဘုရင် အန်တီအုတ်ကပ် ၄ အီပီဖာနစ်က ဗိမာန်တော်ကို မတော်မလျော်ပြုမူပြီး ဂျူးတွေရဲ့ ဘုရား ယေဟောဝါကို မထီမဲ့မြင်ပြုခဲ့တယ်။ သူက နေ့စဉ်မီးရှို့ရာအလှူတွေ ပူဇော်တဲ့ ယဇ်ပလ္လင်ကြီးပေါ်မှာ ယဇ်ပလ္လင်တစ်ခု ဆောက်လိုက်တယ်။ အန်တီအုတ်ကပ်ဟာ ယေဟောဝါရဲ့ ဗိမာန်တော်ကို ဖျက်ဆီးတဲ့အနေနဲ့ ဘီစီ ၁၆၈၊ ခိသလုလ ၂၅ ရက်မှာ ဝက်တွေကို ယဇ်ပလ္လင်ပေါ်မှာ ပူဇော်ပြီး အသားပြုတ်ရည်ကို ဗိမာန်တော်မှာ လိုက်ဖြန်းတယ်။ ဗိမာန်တော် တံခါးတွေကို မီးရှို့တယ်၊ ပုရောဟိတ်တွေရဲ့ အခန်းတွေကို ဖျက်ဆီးပစ်တယ်။ ရွှေယဇ်ပလ္လင်၊ ရှေ့တော်မုန့်စားပွဲ၊ ရွှေဆီမီးတိုင်ကို ယူသွားတယ်။ ပြီးတော့ ယေဟောဝါရဲ့ ဗိမာန်တော်ကို အိုလံပါစ်တောင်ရဲ့ ဇုသနတ်ဘုရားဆီ ဆက်ကပ်အပ်နှံခဲ့တယ်။ နောက်နှစ်နှစ်ကြာတော့ ဂျူဒက်စ် မက္ကဘီးလို့ခေါ်တဲ့ ဂျူးခေါင်းဆောင်က ဂျေရုဆလင်မြို့နဲ့ ဗိမာန်တော်ကို ပြန်သိမ်းပိုက်လိုက်တယ်။ အဲဒီဗိမာန်တော်ကို သန့်စင်ပြီးနောက် ဘီစီ ၁၆၅၊ ခိသလုလ ၂၅ ရက်မှာ ဆက်ကပ်အပ်နှံပွဲ ပြန်ကျင်းပခဲ့တယ်။ အဲဒီအချိန်ဟာ ဇုသနတ်ဘုရားအတွက် ယဇ်ပလ္လင်ပေါ်မှာ ရွံရှာစရာကို အန်တီအုတ်ကပ် ပူဇော်ပြီးနောက် သုံးနှစ်တိတိပဲ။ အဲဒီနောက် ယေဟောဝါကို ပူဇော်ကြတဲ့ နေ့စဉ်မီးရှို့ရာအလှူတွေကို ပြန်ပူဇော်ကြတယ်။ ယေဟောဝါက ဂျူဒက်စ် မက္ကဘီးကို စစ်နိုင်စေပြီး ဗိမာန်တော်ကို ပြန်သန့်ရှင်းစေရမယ်လို့ ညွှန်ကြားတဲ့အကြောင်း ကျမ်းစာထဲမှာ တိုက်ရိုက်ဖော်ပြထားတာ မရှိဘူး။ ဒါပေမဲ့ ယေဟောဝါက မိမိရဲ့ ဝတ်ပြုရေးနဲ့ဆိုင်တဲ့ ရည်ရွယ်ချက်တွေကို အကောင်အထည်ဖော်ဖို့ ပါးရှားဘုရင် ဆိုင်းရပ်တို့လို တိုင်းတစ်ပါးသားတွေကို အသုံးပြုခဲ့ဖူးတယ်။ (ရှာ ၄၅:၁) အဲဒါကြောင့် အလိုတော်ကို ပြည့်စုံစေဖို့ မိမိလူမျိုးထဲက လူတစ်ယောက်ကို ယေဟောဝါ အသုံးပြုနိုင်တယ်လို့ ယူဆရတယ်။ မေရှိယအကြောင်း၊ သူ့ရဲ့ အမှုဆောင်လုပ်ငန်း၊ သူ့ရဲ့ ပူဇော်သက္ကာအကြောင်းနဲ့ ပတ်သက်တဲ့ ပရောဖက်ပြုချက်တွေ ပြည့်စုံနိုင်ဖို့ ဗိမာန်တော်တည်ရှိနေရမှာဖြစ်ကြောင်း သမ္မာကျမ်းစာမှာ ဖော်ပြထားတယ်။ အဲဒီအပြင် အကြီးမြတ်ဆုံး ပူဇော်သက္ကာအဖြစ် မေရှိယက သူ့အသက်ကို လူသားတွေအတွက် ဆက်သမယ့် အချိန်အထိ လေဝိသားတွေဟာ ပူဇော်သက္ကာတွေ ဆက်သနေရမှာ ဖြစ်တယ်။ (ဒံ ၉:၂၇။ ယဟ ၂:၁၇။ ဟီ ၉:၁၁-၁၄) ဆက်ကပ်အပ်နှံပွဲကို ကျင်းပရမယ်လို့ ခရစ်တော်ရဲ့ နောက်လိုက်တွေကို မိန့်မှာမထားဘူး။ (ကော ၂:၁၆၊ ၁၇) ဒါပေမဲ့ ဒီပွဲ ကျင်းပတာကို ယေရှုနဲ့ တပည့်တွေ အပြစ်တင်တယ်ဆိုတဲ့ မှတ်တမ်းမရှိဘူး။
ကျမ်းစာဖတ်ရှုခြင်း
(ယောဟန် ၉:၁-၁၇) ယေရှု ဖြတ်လျှောက်သွားချိန်မှာ မွေးရာပါ မျက်မမြင်တစ်ယောက်ကို တွေ့တယ်။ ၂ အဲဒီအခါ တပည့်တွေက “ရဗ္ဗိ၊ သူ မျက်စိမမြင်ဘဲ မွေးလာတာ သူ့အပြစ်ကြောင့်လား။ မိဘရဲ့အပြစ်ကြောင့်လား” လို့မေးတော့၊ ၃ ယေရှုက “သူ့အပြစ်ကြောင့် မဟုတ်ဘူး။ မိဘရဲ့အပြစ်ကြောင့်လည်း မဟုတ်ဘူး။ သူအဲဒီလိုဖြစ်နေတာဟာ ဘုရားသခင်ရဲ့ လုပ်ဆောင်မှုကို လူတွေ မြင်ခွင့်ရစေဖို့ပဲ။ ၄ ကျွန်တော့်ကို စေလွှတ်တဲ့အရှင်ရဲ့ အလုပ်ကို နေ့အချိန်မှာ ကျွန်တော်တို့ လုပ်ရမယ်။ ဘယ်သူမှ အလုပ်လုပ်လို့မရတဲ့ ညအချိန် ရောက်လာလိမ့်မယ်။ ၅ ကျွန်တော်ဟာ ဒီလောကမှာ ရှိနေသရွေ့ လောကရဲ့အလင်းပဲ” လို့ဖြေတယ်။ ၆ အဲဒီနောက် မြေပေါ် တံတွေးထွေးပြီး တံတွေးနဲ့ ရွှံ့ဖြစ်အောင် လုပ်တယ်။ ရွှံ့ကို အဲဒီလူရဲ့မျက်စိမှာ လိမ်းပေးပြီး၊ ၇ “ရှိလောင်ရေကန်မှာ သွားဆေးလိုက်ပါ” လို့ပြောတယ်။ (ရှိလောင်ဆိုတာ “ဒလဟောစီးဆင်းတယ်” လို့ အဓိပ္ပာယ်ရတယ်။) သူ သွားဆေးလိုက်တော့ မျက်စိမြင်ပြီး ပြန်လာတယ်။ ၈ အဲဒီလူဟာ သူတောင်းစားဖြစ်မှန်း အိမ်နီးချင်းတွေ၊ သူ့ကိုမြင်ဖူးတဲ့သူတွေ သိနေတော့ “ဒီလူက ထိုင်ပြီးတောင်းစားနေတဲ့သူ မဟုတ်လား” ဆိုပြီး ပြောကြတယ်။ ၉ တချို့က “ဟုတ်တယ်။ အဲဒီလူပဲ၊” တချို့က “မဟုတ်ဘူး။ သူနဲ့တူတာ” လို့ တစ်ယောက်တစ်မျိုး ပြောကြတယ်။ သူကိုယ်တိုင်ကတော့ “ဟုတ်တယ်။ ကျွန်တော်ဟာ အဲဒီတစ်ယောက်ပါ” လို့ ဝန်ခံတယ်။ ၁၀ ဒါနဲ့ “မင်း ဘယ်လိုလုပ် မျက်စိမြင်လာတာလဲ” လို့မေးတော့၊ ၁၁ သူက “ယေရှုလို့ခေါ်တဲ့လူက ရွှံ့လုပ်ပြီး ကျွန်တော့်မျက်စိကို လိမ်းပေးတယ်။ ပြီးတော့ ‘ရှိလောင်ရေကန်မှာ သွားဆေးပါ’ ပြောလို့ သွားဆေးလိုက်တာ ကျွန်တော် မျက်စိမြင်လာတယ်” လို့ဖြေတယ်။ ၁၂ “အဲဒီလူ ဘယ်မှာလဲ” လို့မေးတော့ “ကျွန်တော် မသိဘူး” လို့ဖြေတယ်။ ၁၃ အဲဒီအခါ သူတို့က မျက်မမြင်ဖြစ်ခဲ့ဖူးသူကို ဖာရိရှဲတွေဆီ ခေါ်သွားတယ်။ ၁၄ ရွှံ့လုပ်ပြီး သူ့မျက်စိပြန်မြင်အောင် ယေရှုလုပ်ပေးတဲ့နေ့ဟာ ဥပုသ်နေ့ ဖြစ်နေတယ်။ ၁၅ ဖာရိရှဲတွေက မျက်စိ ဘယ်လိုပြန်မြင်လာတာလဲလို့ မေးတော့ သူက “ကျွန်တော့်မျက်စိကို ရွှံ့နဲ့လိမ်းပေးတယ်။ ရေဆေးလိုက်တဲ့အခါ မျက်စိမြင်လာတယ်” လို့ဖြေတယ်။ ၁၆ ဒါနဲ့ ဖာရိရှဲတချို့က “ဒီလူ ဥပုသ်ပညတ် ချိုးဖောက်တယ်ဆိုတော့ ဘုရားသခင်ဆီက လာတဲ့သူ မဖြစ်နိုင်ဘူး၊” တချို့ကျတော့လည်း “အပြစ်သားဆိုရင် ဒီလိုအံ့ဖွယ်အမှုကို ဘယ်လုပ်နိုင်ပါ့မလဲ” လို့ပြောကြတယ်။ ဒီလိုနဲ့ သူတို့ အချင်းချင်း စိတ်ဝမ်းကွဲသွားကြတယ်။ ၁၇ မျက်မမြင်ဖြစ်ခဲ့ဖူးသူကို “မင်းကို မျက်စိမြင်အောင် သူလုပ်ပေးခဲ့တာဆိုတော့ မင်းပဲ ပြောကြည့်စမ်း။ သူ ဘယ်သူဖြစ်မလဲ” လို့ထပ်မေးတဲ့အခါ “သူဟာ ပရောဖက်ပဲ” လို့ဖြေတယ်။
အောက်တိုဘာ ၈-၁၄
ကျမ်းစာထဲက အဖိုးတန်ဘဏ္ဍာများ | ယောဟန် ၁၁-၁၂
“ယေရှုရဲ့ သနားစာနာမှုကို အတုယူပါ”
(ယောဟန် ၁၁:၂၃-၂၆) ယေရှုက “ခင်ဗျားရဲ့မောင် အသက်ပြန်ရှင်လာမယ်” လို့ပြောတော့၊ ၂၄ မာသက “နောက်ဆုံးသောနေ့၊ ရှင်ပြန်ထမြောက်ရာကာလမှာ သူ အသက်ပြန်ရှင်လာမယ်ဆိုတာ ကျွန်မသိပါတယ်” လို့ဖြေတယ်။ ၂၅ ယေရှုက “ကျွန်တော်ဟာ လူသေတွေကို ရှင်ပြန်ထမြောက်စေသူ၊ အသက်ရစေတဲ့သူပဲ။ ကျွန်တော့်ကို ယုံကြည်သက်ဝင်မယ်ဆိုရင် သေဆုံးသွားရင်တောင် အသက်ပြန်ရှင်လိမ့်မယ်။ ၂၆ ကျွန်တော့်ကို ယုံကြည်သက်ဝင်ပြီး အသက်ရှင်တဲ့သူဟာ ဘယ်တော့မှ သေရမှာမဟုတ်ဘူး။ ဒါကို ယုံသလား” လို့မေးတယ်။
nwtsty ယဟ ၁၁:၂၄၊ ၂၅ လေ့လာမှု မှတ်စု
သူ အသက်ပြန်ရှင်လာမယ်ဆိုတာ ကျွန်မသိပါတယ်– နောက်ဆုံးသောနေ့မှာ ထမြောက်လာမယ့် အနာဂတ်ရှင်ပြန်ထမြောက်ခြင်းအကြောင်း ယေရှု ပြောနေတာလို့ မာသထင်နေတယ်။ (ယဟ ၆:၃၉ လေ့လာမှု မှတ်စုကို ကြည့်ပါ။) အဲဒီသွန်သင်ချက်ကို သူသက်ဝင်ယုံကြည်တာက ချီးကျူးစရာကောင်းတယ်။ သူ့ခေတ်က ဇဒ္ဒုကဲလို့ခေါ်တဲ့ ဘာသာရေးခေါင်းဆောင်တွေဟာ သမ္မာကျမ်းစာထဲမှာ ရှင်းရှင်းလင်းလင်း ဖော်ပြထားတဲ့ အဲဒီသွန်သင်ချက်ကို လက်မခံကြဘူး။ (ဒံ ၁၂:၁၃။ မာ ၁၂:၁၈) ဖာရိရှဲတွေကျတော့ ဝိညာဉ်မသေနိုင်ဘူးလို့ ယုံကြည်ကြတယ်။ ဒါပေမဲ့ ယေရှုက ရှင်ပြန်ထမြောက်ခြင်း မျှော်လင့်ချက်အကြောင်း သွန်သင်တယ်၊ လူသေတွေကို အသက်ပြန်ရှင်စေခဲ့တယ်ဆိုတာ မာသသိတယ်။ ဒါပေမဲ့ လာဇရုလို ရက်အကြာကြီး သေနေသူတွေတော့ မဟုတ်ဘူး။
ကျွန်တော်ဟာ ရှင်ပြန်ထမြောက်စေသူ၊ အသက်ရစေတဲ့သူပဲ– ယေရှုကိုယ်တိုင် သေပြီး ရှင်ပြန်ထမြောက်လာခြင်းက သေနေသူတွေ ပြန်အသက်ရှင်လာဖို့ လမ်းဖွင့်ပေးခဲ့တယ်။ ယေဟောဝါက ပြန်ရှင်လာတဲ့ယေရှုကို လူသေတွေကို ပြန်အသက်ရှင်စေနိုင်တဲ့၊ ထာဝရအသက်ပေးနိုင်တဲ့ တန်ခိုး ပေးတယ်။ (ယဟ ၅:၂၆ လေ့လာမှု မှတ်စုကို ကြည့်ပါ။) ဗ ၁:၁၈ မှာ ယေရှုက မိမိကိုယ်ကို “သေခြင်းရဲ့သော့နဲ့ သင်္ချိုင်းရဲ့သော့တွေကို ပိုင်” တဲ့ “အသက်ရှင်တဲ့သူ” လို့ခေါ်တယ်။ အဲဒါကြောင့် အသက်ရှင်သူ၊ သေဆုံးသူတွေဟာ ယေရှုကို မျှော်လင့်အားကိုးနိုင်တယ်။ ယေရှုက သင်္ချိုင်းဂူတွေကို ဖွင့်ပြီး လူသေတွေကို အသက်ပေးမယ်လို့ ကတိပေးခဲ့တယ်။ သူတို့ အသက်ပြန်ရှင်လာတဲ့အခါ တချို့က ကောင်းကင်မှာ ယေရှုနှင့်အတူ တွဲဖက်အုပ်ချုပ်ကြမယ်၊ တခြားသူတွေကတော့ ကောင်းကင်အစိုးရ အုပ်ချုပ်တဲ့ မြေကြီးပေါ်မှာ နေထိုင်ကြမယ်။—ယဟ ၅:၂၈၊ ၂၉။ ၂ပ ၃:၁၃။
(ယောဟန် ၁၁:၃၃-၃၅) ယေရှုက မာရိရော လိုက်လာတဲ့ ဂျူးတွေပါ ငိုနေတာကို မြင်တဲ့အခါ ဝမ်းနည်းပြီး စိတ်ထိခိုက်သွားတယ်။ ၃၄ “အလောင်းကို ဘယ်မှာထားသလဲ” လို့မေးတော့ “သခင်၊ လာကြည့်လို့ရပါတယ်” လို့ဖြေတယ်။ ၃၅ ယေရှု မျက်ရည်ကျတယ်။
nwtsty ယဟ ၁၁:၃၃-၃၅ လေ့လာမှု မှတ်စု
ငိုနေတာ– “ငိုနေတာ” လို့ပြန်ဆိုတဲ့ ဂရိစကားလုံးက အသံထွက်ငိုတာကို အများအားဖြင့် ဆိုလိုတယ်။ ဂျေရုဆလင်မြို့ ဖျက်ဆီးခံရတော့မယ့်အကြောင်း ကြိုဟောတဲ့အခါ ယေရှုနဲ့ပတ်သက်ပြီး အဲဒီကြိယာကို အသုံးပြုခဲ့တယ်။—လု ၁၉:၄၁။
ဝမ်းနည်းပြီး စိတ်ထိခိုက်သွား– ဒီအချိန်မှာ ယေရှု အကြီးအကျယ် စိတ်လှုပ်ရှားကြောင်း မူရင်းဘာသာစကားရဲ့ ဒီစကားလုံးနှစ်လုံးကို ပေါင်းသုံးပြီး ဖော်ပြထားတယ်။ “ဝမ်းနည်း” လို့ ပြန်ဆိုတဲ့ ဂရိကြိယာ (အမ်ဘရီမေအိုမိုင်) က များသောအားဖြင့် ပြင်းထန်တဲ့ခံစားချက်ကို ဆိုလိုတယ်။ ဒါပေမဲ့ ဒီနေရာမှာ ယေရှုက စိတ်လှုပ်ရှားလွန်းလို့ ဝမ်းနည်းမိတာ။ “စိတ်ထိခိုက်သွား” ဆိုတဲ့ ဂရိစကားလုံး (တာရာ့စ်စို) က စိတ်လှုပ်ရှားတာကို ဆိုလိုတယ်။ ပညာရှင်တစ်ဦးပြောတဲ့အရဆိုရင် ဒီနေရာမှာ “စိတ်ထဲမှာ ဗလောင်ဆူနေ၊ အလွန် စိတ်နာကျင် ဝမ်းနည်းနေ” လို့အဓိပ္ပာယ်ရှိတယ်။ ယုဒသစ္စာဖောက်တဲ့အခါ ယေရှုရဲ့ တုံ့ပြန်ပုံကို ဖော်ပြဖို့ ဒီကြိယာကို ယဟ ၁၃:၂၁ မှာ အသုံးပြုထားတယ်။—ယဟ ၁၁:၃၅ လေ့လာမှု မှတ်စုကို ကြည့်ပါ။
မျက်ရည်ကျတယ်– ဒီမှာအသုံးပြုထားတဲ့ (ဒါကရီအို) ဆိုတဲ့စကားလုံးက “မျက်ရည်” ဆိုတဲ့ ဂရိနာမ်ရဲ့ ကြိယာပုံစံဖြစ်တယ်။ ဒီစကားလုံးကို လု ၇:၃၈။ တ ၂၀:၁၉၊ ၃၁။ ဟီ ၅:၇။ ဗ ၇:၁၇။ ၂၁:၄ တို့မှာ အသုံးပြုထားတယ်။ အသံထွက် ငိုတာထက် မျက်ရည်ကျတာကို ပိုအာရုံစိုက်စေတဲ့ စကားလုံးဖြစ်တယ်။ ခရစ်ယာန်ဂရိကျမ်းစောင်တွေထဲမှာ ဒီဂရိကြိယာကို ဒီတစ်နေရာမှာပဲ အသုံးပြုတယ်။ ယဟ ၁၁:၃၃ (လေ့လာမှု မှတ်စုကို ကြည့်ပါ) မှာ မာရိနဲ့ ဂျူးတွေ ငိုနေတာကို ဖော်ပြတဲ့ ဂရိစကားလုံးနဲ့ မတူဘူး။ ယေရှုဟာ လာဇရုကို အသက်ပြန်ရှင်အောင် လုပ်ပေးတော့မှာဖြစ်ပေမဲ့ မိတ်ဆွေတွေ ဝမ်းနည်းကြေကွဲနေတဲ့အခါ အကြီးအကျယ်စိတ်မကောင်း ဖြစ်နေတယ်။ သူ့မိတ်ဆွေတွေကို တကယ်ချစ်ခင်ပြီး သနားစာနာတဲ့အတွက် မျက်ရည်ကျခဲ့တယ်။ အာဒံကြောင့် ချစ်ရသူ ဆုံးရှုံးသွားရသူတွေကို ယေရှု စာနာစိတ်ရှိမှန်း ဒီမှတ်တမ်းက ဖော်ပြတယ်။
(ယောဟန် ၁၁:၄၃၊ ၄၄) “လာဇရု၊ ထွက်လာခဲ့” ဆိုပြီး အကျယ်ကြီး အော်ခေါ်လိုက်တယ်။ ၄၄ အဲဒီအခါ ကွယ်လွန်သူဟာ ခြေလက်တွေရော မျက်နှာမှာပါ အဝတ်တွေ ပတ်စည်းလျက်သား ထွက်လာတယ်။ ယေရှုက “သူသွားလို့ရအောင် အဝတ်တွေ ဖြေပေးလိုက်ပါ” လို့ပြောတယ်။
ရှာဖွေလေ့လာ ဘုရားရေးရာရတနာ
(ယောဟန် ၁၁:၄၉) အဲဒီနှစ်မှာ ပုရောဟိတ်မင်းဖြစ်နေတဲ့ ကယာဖက “ခင်ဗျားတို့ မသိကြဘူးလား။
nwtsty ယဟ ၁၁:၄၉ လေ့လာမှု မှတ်စု
ပုရောဟိတ်မင်း– အစ္စရေးပြည်ဟာ လွတ်လပ်တဲ့နိုင်ငံ ဖြစ်နေသမျှကာလပတ်လုံး ပုရောဟိတ်မင်းက သေတဲ့အထိ သူ့ရာထူးကို ဆက်ခံသွားတယ်။ (တလ ၃၅:၂၅) ဒါပေမဲ့ အစ္စရေးပြည်ဟာ ရောမလက်အောက်ခံ ဖြစ်နေလို့ ရောမဘုရင်ခံတွေက ပုရောဟိတ်မင်းကို အချိန်မရွေး တင်နိုင်၊ ဖြုတ်နိုင်တယ်။ (ခက်ဆစ်မှာပါတဲ့ “ပုရောဟိတ်မင်း” ကို ကြည့်ပါ။) ရောမတွေ ခန့်ထားတဲ့ ကယာဖဟာ လူမှုဆက်ဆံရေး ကျွမ်းကျင်တဲ့အတွက် သူ့ရဲ့ရာထူးကို အရင်က ပုရောဟိတ်မင်းတွေထက် ပိုကြာကြာ ခံယူထားနိုင်ခဲ့တယ်။ အေဒီ ၁၈ လောက်မှာ သူခန့်အပ်ခံရပြီး အေဒီ ၃၆ အထိ ရာထူးရခဲ့တယ်။ အဲဒီနှစ် ဖြစ်တဲ့ အေဒီ ၃၃ မှာ ကယာဖ ပုရောဟိတ်မင်းဖြစ်နေတယ်လို့ ယောဟန်ပြောရတာက ကယာဖရဲ့ ပုရောဟိတ်မင်းသက်တမ်းအတွင်းမှာ ယေရှုအသတ်ခံရတဲ့ နှစ် ပါဝင်နေမှန်း ဆိုလိုတယ်။—ကယာဖရဲ့ စံအိမ် ရှိနိုင်တဲ့နေရာကို နောက်ဆက်တွဲ ခ၁၂ မှာကြည့်ပါ။
(ယောဟန် ၁၂:၄၂) အဲဒီအခါ မင်းအရာရှိ အတော်များများ ယုံကြည်သက်ဝင်လာပေမဲ့ ဖာရိရှဲတွေကိုကြောက်လို့ ယေရှုကို အသိအမှတ် မပြုကြဘူး။ တရားဇရပ်ကနေ နှင်ထုတ်ခံရမှာကို စိုးရိမ်ကြတယ်။
nwtsty ယဟ ၁၂:၄၂ လေ့လာမှု မှတ်စု
မင်းအရာရှိများ– ဒီမှာ ‘မင်းအရာရှိများ’ လို့ပြန်ဆိုတဲ့ ဂရိစကားလုံးက ဂျူးတရားရုံးချုပ်ရဲ့ အဖွဲ့ဝင်တွေကို ဆိုလိုတာ ဖြစ်နိုင်တယ်။ အဖွဲ့ဝင်တစ်ဦးဖြစ်တဲ့ နိကောဒင်နဲ့ပတ်သက်ပြီး ဒီအသုံးအနှုန်းကို ယဟ ၃:၁ မှာ အသုံးပြုထားတယ်။—ယဟ ၃:၁ လေ့လာမှု မှတ်စုကို ကြည့်ပါ။
တရားဇရပ်ကနေ နှင်ထုတ်ခံရ– ဒါမှမဟုတ် “ကြဉ်ခံရ၊ တရားဇရပ်ကို မလာဖို့ တားမြစ်ခံရ။” ဒီကျမ်းချက်နဲ့ ယဟ ၁၂:၄၂။ ၁၆:၂ မှာပဲ ဂရိနာမဝိသေသန အပိုစိုင်နေဂိုဂိုစ် ကို အသုံးပြုထားတယ်။ နှင်ထုတ်ထားသူကို လူ့အသိုင်းအဝိုင်းက ရှောင်ဖယ်ကြ၊ အထင်သေးကြတယ်။ ဂျူးအသိုင်းအဝိုင်းကနေ အပယ်ခံရမယ်ဆိုရင် မိသားစုရဲ့ စီးပွားရေး အများကြီး ထိခိုက်နစ်နာနိုင်တယ်။ ပညာသင်ပေးဖို့ အဓိကအသုံးပြုတဲ့ တရားဇရပ်တွေကို ရိုက်နှက် ပြစ်ဒဏ်ပေးတာ၊ နှင်ထုတ်တာတွေ လုပ်ပိုင်ခွင့်ရှိတဲ့ တရားရုံးတွေအနေနဲ့လည်း အသုံးပြုကြတယ်။—မ ၁၀:၁၇ လေ့လာမှု မှတ်စုကို ကြည့်ပါ။
ကျမ်းစာဖတ်ရှုခြင်း
(ယောဟန် ၁၂:၃၅-၅၀) ဒါကြောင့် ယေရှုက “အလင်းဟာ ခင်ဗျားတို့နဲ့အတူ ခဏပဲ ရှိတော့မှာဖြစ်လို့ အမှောင်မလွှမ်းရလေအောင် အလင်းရှိတုန်းမှာ သွားလာကြပါ။ အမှောင်ထဲမှာ သွားလာရင် ကိုယ်ဘယ်ကို ဦးတည်နေမှန်း မသိဘူး။ ၃၅ ဒါကြောင့် အလင်းရှိနေတုန်း အလင်းရဲ့သားတွေဖြစ်ဖို့ အလင်းကို ယုံကြည်သက်ဝင်ကြပါ” လို့ပြောတယ်။ ယေရှုက အဲဒီလိုပြောပြီး ရှောင်ထွက်သွားတယ်။ ၃၇ သူတို့ရှေ့မှာ ယေရှု အံ့ဖွယ်အမှုတွေ အများကြီး လုပ်ပြပေမဲ့ မယုံကြည်ကြဘူး။ ၃၈ ဒါကြောင့် “ယေဟောဝါ၊ ကျွန်တော်တို့ပြောတဲ့ သတင်းကို ဘယ်သူယုံလို့လဲ။ ယေဟောဝါရဲ့ လက်ရုံးတော် ဘယ်သူ့ကို ထင်ရှားပြခဲ့ပြီလဲ” ဆိုပြီး ပရောဖက်ဟေရှာယ ပြောခဲ့တဲ့ စကားအတိုင်း ဖြစ်လာတယ်။ ၃၉ သူတို့ မယုံကြည်တဲ့ အကြောင်းရင်းကို ဟေရှာယက၊ ၄၀ “သူတို့မျက်စိ မမြင်တာ၊ ခေါင်းမာတာကို ငါခွင့်ပြုလိုက်တယ်။ ဒါကြောင့် သူတို့ မမြင်ဘူး၊ ဆိုလိုရင်းကို နားမလည်ဘူး။ ငါ့ဆီ ပြန်မလှည့်လာတော့ သူတို့ပြန်ကောင်းလာအောင် ကုသပေးလို့မရဘူး” လို့လည်း ရေးခဲ့တယ်။ ၄၁ အဲဒီလိုရေးပြီး ခရစ်တော်အကြောင်း ပြောခဲ့တာက ခရစ်တော်ရဲ့ဘုန်းအသရေကို သူ မြင်ခဲ့ရလို့ပဲ။ ၄၂ အဲဒီအခါ မင်းအရာရှိ အတော်များများ ယုံကြည်သက်ဝင်လာပေမဲ့ နှင်ထုတ်ခံရမှာကို စိုးရိမ်ကြတယ်။ ၄၃ သူတို့က ဘုရားသခင့်မျက်နှာသာရဖို့ထက် လူတွေရဲ့ မျက်နှာသာရဖို့ ပိုလိုလားကြတယ်။ ၄၄ ယေရှုက “ကျွန်တော့်ကို ယုံကြည်တဲ့သူဟာ ကျွန်တော့်ကိုသာမက ကျွန်တော့်ကိုစေလွှတ်တဲ့အရှင်ကိုလည်း ယုံကြည်တယ်။ ၄၅ ကျွန်တော့်ကို မြင်တဲ့သူဟာ ကျွန်တော့်ကိုစေလွှတ်တဲ့အရှင်ကိုလည်း မြင်တယ်။ ၄၆ ကျွန်တော့်ကို ယုံကြည်တဲ့သူတိုင်း အမှောင်ထဲမှာ မရှိရလေအောင် ဒီလောကဆီ အလင်းအဖြစ် ကျွန်တော်ရောက်လာပြီ။ ၄၇ ကျွန်တော့်စကားတွေကို ကြားလျက်နဲ့ မလိုက်နာတဲ့သူကို ကျွန်တော် ပြစ်ဒဏ်မစီရင်ဘူး။ ကျွန်တော်က လောကကို ပြစ်ဒဏ်စီရင်ဖို့ လာတာမဟုတ်ဘူး။ လောကကိုကယ်တင်ဖို့ လာတာ။ ၄၈ ကျွန်တော့်ကို အလေးမထားတဲ့သူ၊ ကျွန်တော့်စကားတွေကို လက်မခံတဲ့သူကို ပြစ်ဒဏ်စီရင်မယ့်အရာ ရှိတယ်။ နောက်ဆုံးသောနေ့မှာ သူ့ကို ပြစ်ဒဏ်စီရင်မယ့်အရာဟာ ကျွန်တော်ပြောခဲ့တဲ့ စကားတွေပဲ။ ၄၉ ကျွန်တော်က ကိုယ့်သဘောနဲ့ကိုယ် ပြောတာမဟုတ်ဘူး။ စေလွှတ်လိုက်တဲ့ အဖဘုရားက ကျွန်တော် ဘာတွေပြောရမယ်၊ ဘာတွေသင်ပေးရမယ်ဆိုတာကို မိန့်မှာထားတယ်။ ၅၀ အဖဘုရားရဲ့ မိန့်မှာချက်တွေဟာ ထာဝရအသက်ရစေမယ်ဆိုတာ ကျွန်တော်သိတယ်။ ကျွန်တော် ပြောသမျှစကားတွေဟာ အဖဘုရား မိန့်မှာထားတာတွေချည်းပဲ” လို့ပြောတယ်။
အောက်တိုဘာ ၁၅-၂၁
ကျမ်းစာထဲက အဖိုးတန်ဘဏ္ဍာများ | ယောဟန် ၁၃-၁၄
“ဒါဟာ ခင်ဗျားတို့အတွက် ကျွန်တော်ပြတဲ့ စံနမူနာပဲ”
(ယောဟန် ၁၃:၅) အင်တုံထဲ ရေထည့်ပြီး တပည့်တွေရဲ့ခြေကို ဆေးပေးတယ်။ အဲဒီနောက် ခါးမှာစည်းထားတဲ့ ပဝါနဲ့ သုတ်ပေးတယ်။
nwtsty ယဟ ၁၃:၅ လေ့လာမှု မှတ်စု
တပည့်တွေရဲ့ခြေကို ဆေးပေးတယ်– ရှေးခေတ် အစ္စရေးပြည်မှာ ကြိုးသိုင်းဖိနပ်တွေ စီးလေ့ရှိတယ်။ ခြေချင်းဝတ်အထိ ကြိုးသိုင်းပြီး စီးရတဲ့ ဖိနပ်မျိုးဖြစ်တဲ့အတွက် ဗွက်ထူ၊ ဖုန်ထူတဲ့လမ်းတွေ၊ လယ်ကွင်းတွေထဲ လမ်းလျှောက်ကြသူတွေရဲ့ ခြေထောက်တွေ ညစ်ပေနေမှာ သေချာတယ်။ ဒါကြောင့် အိမ်ထဲမဝင်ခင် ဖိနပ်ချွတ်လေ့ရှိတယ်။ ဧည့်ဝတ်ကျေပွန်တဲ့ အိမ်ရှင်က ဧည့်သည်တွေကို ခြေဆေးပေးလေ့ရှိတယ်။ ဒီအလေ့အထအကြောင်း ကျမ်းစာမှာ အကြိမ်ကြိမ်ဖော်ပြတယ်။ (က ၁၈:၄၊ ၅။ ၂၄:၃၂။ ၁ရှ ၂၅:၄၁။ လု ၇:၃၇၊ ၃၈၊ ၄၄) နှိမ့်ချမှုရှိရမယ်၊ အချင်းချင်းအစေကို ခံရမယ်ဆိုတဲ့ သင်ခန်းစာပေးဖို့ ယေရှုက အဲဒီထုံးစံကို အသုံးပြုပြီး တပည့်တွေရဲ့ ခြေကို ဆေးပေးတယ်။
(ယောဟန် ၁၃:၁၂-၁၄) ယေရှုက တပည့်တွေရဲ့ခြေကို ဆေးပြီးတဲ့နောက် အပေါ်ဝတ်ရုံကို ဝတ်ပြီး စားပွဲမှာ ပြန်ထိုင်တယ်။ ပြီးတော့ “ကျွန်တော် ဘာလို့ ဒီလိုလုပ်တယ်ဆိုတာ နားလည်ကြသလား။ ၁၃ ကျွန်တော့်ကို ‘ဆရာ၊’ ‘သခင်’ ဆိုပြီး ခင်ဗျားတို့ ခေါ်တယ်။ ခေါ်တဲ့အတိုင်း ဟုတ်နေတော့ ခင်ဗျားတို့ အဲဒီလိုခေါ်တာ မမှားပါဘူး။ ၁၄ သခင်လည်းဖြစ်၊ ဆရာလည်းဖြစ်တဲ့ ကျွန်တော်တောင်မှ ခင်ဗျားတို့ရဲ့ခြေကို ဆေးပေးတယ်ဆိုရင် ခင်ဗျားတို့လည်း အချင်းချင်းရဲ့ခြေကို ဆေးပေးရမယ်။
nwtsty ယဟ ၁၃:၁၂-၁၄ လေ့လာမှု မှတ်စု
ရမယ်– ဒါမှမဟုတ် “တာဝန်ရှိတယ်။” ဒီမှာသုံးထားတဲ့ ဂရိကြိယာကို အများအားဖြင့် ငွေကြေးနဲ့ ပတ်သက်ပြီး သုံးလေ့ရှိတယ်။ “တစ်ဦးတစ်ယောက်ဆီမှာ အကြွေးတင်တာ၊” “တစ်ဦးတစ်ယောက်ကို ပေးစရာရှိတာ” ဆိုတဲ့ သဘောမျိုးရှိတယ်။ (မ ၁၈:၂၈၊ ၃၀၊ ၃၄။ လု ၁၆:၅၊ ၇) ဒီကျမ်းချက်တွေအပြင် တခြားနေရာတွေမှာ ဒီစကားလုံးကို တစ်ခုခုလုပ်ဖို့ တာဝန်ရှိတဲ့ သဘောမျိုးနဲ့ သုံးထားတယ်။—၁ယ ၃:၁၆။ ၄:၁၁။ ၃ယ ၈။
(ယောဟန် ၁၃:၁၅) ဒါဟာ ခင်ဗျားတို့အတွက် ကျွန်တော်ပြတဲ့ စံနမူနာပဲ။ ကျွန်တော်လုပ်သလို ခင်ဗျားတို့ လိုက်လုပ်ကြပါ။
အကြီးမြတ်ဆုံးလူသားသည် နှိမ့်ချသောအမှုကို ဆောင်ရွက်ခဲ့
ယေရှုသည် တပည့်တော်များ၏ခြေကို ဆေးပေးခြင်းအားဖြင့် နှိမ့်ချမှုနှင့်ပတ်သက်၍ အလွန်ထိရောက်သော သင်ခန်းစာတစ်ရပ်ကို ပြသခဲ့သည်။ အမှန်မှာ ခရစ်ယာန်များအနေနှင့် မိမိတို့သည် အလွန်အရေးပါသူများ ဖြစ်သည့်အတွက် အခြားသူများသည် အမြဲပင် သူတို့ကို ပြုစုသင့်သည်ဟု မယူဆသင့်ပါ။ ဂုဏ်အသရေရှိသော အဆင့်ရာထူးများ ရရှိဖို့အတွက်လည်း မကြိုးစားသင့်ချေ။ သို့အစား ‘စေစားရန်မဟုတ်၊ အစေခံ၍ လူများအတွက် ရွေးနုတ်ရာအဖြစ်နှင့် အသက်ကို စွန့်ဖို့ရန်ကြွလာ’ သော ယေရှုချမှတ်ခဲ့သည့် ပုံစံကို လိုက်လျှောက်သင့်၏။ (မဿဲ ၂၀:၂၈၊ ကဘ) မှန်ပါသည်၊ ယေရှု၏နောက်တော်လိုက်များသည် အချင်းချင်းအတွက် အနှိမ့်ချဆုံးအမှုများကို လုပ်ဆောင်ရန် လိုလိုလားလားရှိသင့်သည်။
ရှာဖွေလေ့လာ ဘုရားရေးရာရတနာ
(ယောဟန် ၁၄:၆) ယေရှုက “ကျွန်တော်ဟာ လမ်းခရီးဖြစ်တယ်။ အမှန်တရားလည်း ဖြစ်တယ်။ အသက်လည်း ဖြစ်တယ်။ ကျွန်တော့်ကို မဖြတ်သန်းဘဲ ဘယ်သူမှ အဖဘုရားဆီ မရောက်နိုင်ဘူး။
nwtsty ယဟ ၁၄:၆ လေ့လာမှု မှတ်စု
ကျွန်တော်ဟာ လမ်းခရီး ဖြစ်တယ်။ အမှန်တရားလည်း ဖြစ်တယ်။ အသက်လည်း ဖြစ်တယ်– ယေရှုကနေတစ်ဆင့် ဘုရားဆီချဉ်းကပ် ဆုတောင်းနိုင်တဲ့အတွက် ယေရှုဟာ လမ်းခရီး ဖြစ်တယ်။ သူဟာ လူတွေကို ဘုရားသခင်နဲ့ ပြန်လည်သင့်မြတ်စေနိုင်တဲ့ “လမ်းခရီး” လည်းဖြစ်တယ်။ (ယဟ ၁၆:၂၃။ ရ ၅:၈) ယေရှုဟာ အမှန်တရားနဲ့ ကိုက်ညီအောင် ပြောဆိုနေထိုင်တဲ့အတွက်လည်း အမှန်တရား ဖြစ်တယ်။ အဲဒီအပြင် ယေရှုဟာ ဘုရားရည်ရွယ်ချက် ပြည့်စုံရေးမှာ မိမိရဲ့ အဓိကအခန်းကဏ္ဍကို ဖော်ပြတဲ့ ပရောဖက်ပြုချက် အတော်များများကိုလည်း ပြည့်စုံစေခဲ့တယ်။ (ယဟ ၁:၁၄။ ဗ ၁၉:၁၀) အဲဒီပရောဖက်ပြုချက်တွေက “ခရစ်တော်အားဖြင့် ဟုတ်မှန်ရာဖြစ် [ပြည့်စုံ] လာတယ်။” (၂က ၁:၂၀) ရွေးဖိုးအားဖြင့် လူသားတွေ “ထာဝရအသက်” ဖြစ်တဲ့ “စစ်မှန်တဲ့အသက်” ရအောင် လုပ်ပေးလို့ ယေရှုဟာ အသက်လည်းဖြစ်တယ်။ (၁တိ ၆:၁၂၊ ၁၉။ ဧ ၁:၇။ ၁ယ ၁:၇) ယေရှုဟာ ပရဒိသုမှာ ထာဝစဉ်အသက်ရှင်ဖို့ မျှော်လင့်ချက်နဲ့ ထမြောက်လာမယ့် သန်းနဲ့ချီရှိတဲ့ သူတွေအတွက်လည်း “အသက်” ဖြစ်ပါလိမ့်မယ်။—ယဟ ၅:၂၈၊ ၂၉။
(ယောဟန် ၁၄:၁၂) ကျွန်တော် မှန်တာကို ပြောမယ်၊ အမှန်အတိုင်း ပြောမယ်။ ကျွန်တော့်ကို ယုံကြည်သက်ဝင်တဲ့သူဟာ ကျွန်တော်လုပ်တဲ့ အလုပ်တွေကို လုပ်လိမ့်မယ်။ အဲဒါထက် ကြီးမားတာတွေကို လုပ်လိမ့်မယ်။ ဘာကြောင့်လဲဆိုတော့ ကျွန်တော်က အဖဘုရားဆီ သွားရတော့မှာ။
nwtsty ယဟ ၁၄:၁၂ လေ့လာမှု မှတ်စု
အဲဒါထက် ကြီးမားတာတွေ– တပည့်တွေပြတဲ့ အံ့ဖွယ်အမှုတွေက မိမိပြတဲ့ အံ့ဖွယ်အမှုတွေထက် ပိုကြီးမားမယ်လို့ ယေရှု ပြောနေတာ မဟုတ်ဘူး။ တပည့်တွေလုပ်မယ့် ဟောပြောသွန်သင်ခြင်းက မိမိလုပ်တာထက် ပိုကျယ်ပြန့်လိမ့်မယ်လို့ နှိမ့်ချစွာ အသိအမှတ်ပြုတာ ဖြစ်တယ်။ မိမိနောက်လိုက်တွေရဲ့ လုပ်ငန်းက နယ်မြေ ပိုကျယ်ပြန့်မယ်၊ လူ ပိုများများဆီ ရောက်မယ်၊ ပိုအချိန်ကြာမယ်လို့ ပြောနေတာ။ မိမိလုပ်တဲ့အလုပ်ကို နောက်လိုက်တွေ ဆက်လုပ်ဖို့ မျှော်လင့်တယ်ဆိုတာ ယေရှုရဲ့ စကားတွေကနေ သိရတယ်။
ကျမ်းစာဖတ်ရှုခြင်း
(ယောဟန် ၁၃:၁-၁၇) ယေရှုက ဒီလောကကနေ ထွက်ခွာပြီး အဖဘုရားဆီ ပြန်ရမယ့်အချိန် ရောက်ပြီဆိုတာကို ပသခါပွဲမတိုင်ခင်ကတည်းက သိနေတယ်။ ဒီလောကမှာရှိနေတဲ့ နောက်လိုက်တွေကို သူ ချစ်တယ်။ သူတို့ကို သက်ဆုံးတိုင်အောင် ချစ်ခဲ့တယ်။ ၂ သူတို့ ညစာစားနေချိန်မှာ မာရ်နတ်က ရှိမုန်ရဲ့သား ယုဒရှကာရုတ်စိတ်ထဲ ယေရှုကို သစ္စာဖောက်ချင်တဲ့ဆန္ဒ ပေါ်လာအောင် လုပ်ပြီးနေပြီ။ ၃ ယေရှုက အရာခပ်သိမ်းကို မိမိလက်ထဲ အဖဘုရား အပ်ထားတယ်၊ ဘုရားသခင်ဆီကနေ သူရောက်လာပြီးနောက် ဘုရားသခင်ဆီ ပြန်သွားရမယ်ဆိုတာတွေကို သိနေတယ်။ ၄ ဒါကြောင့် စားပွဲကနေ ထပြီး အပေါ်ဝတ်ရုံကို ချွတ်၊ ပဝါကိုယူပြီး ခါးမှာစည်းလိုက်တယ်။ ၅ အင်တုံထဲ ရေထည့်ပြီး တပည့်တွေရဲ့ခြေကို ဆေးပေးတယ်။ အဲဒီနောက် ခါးမှာစည်းထားတဲ့ ပဝါနဲ့ သုတ်ပေးတယ်။ ၆ ရှိမုန်ပေတရုက သူ့အလှည့်ရောက်တဲ့အခါ “သခင်၊ ကျွန်တော့်ခြေကို ဆေးမလို့လား” လို့ မေးတော့၊ ၇ ယေရှုက “ကျွန်တော်လုပ်နေတာကို ခင်ဗျား အခု နားလည်မှာ မဟုတ်ဘူး။ နောက်မှ နားလည်လိမ့်မယ်” လို့ဖြေတယ်။ ၈ ဒါနဲ့ ပေတရုက “ကျွန်တော့်ခြေကို သခင် လုံးဝ မဆေးရဘူး” လို့ပြောတော့ ယေရှုက “ခင်ဗျားခြေကို မဆေးရရင် ခင်ဗျားနဲ့ကျွန်တော် ဘာမှမသက်ဆိုင်တော့ဘူး” လို့ပြောတယ်။ ၉ အဲဒီအခါ ရှိမုန်ပေတရုက “သခင်၊ ခြေကိုဆေးမယ်ဆိုရင် လက်ကိုရော ခေါင်းကိုပါ ဆေးပေးပါ” လို့ပြောတယ်။ ၁၀ ယေရှုက “ရေချိုးပြီးသားလူဟာ တစ်ကိုယ်လုံး သန့်ရှင်းနေပြီဖြစ်လို့ ခြေဆေးဖို့ပဲ လိုတာ။ ခင်ဗျားတို့ဟာ သန့်ရှင်းပြီးသားပဲ။ ဒါပေမဲ့ အားလုံးတော့ မဟုတ်ဘူး” လို့ပြောတယ်။ ၁၁ ဘယ်သူ သစ္စာဖောက်မယ်ဆိုတာ သိနေတဲ့အတွက် ယေရှုက “အားလုံးတော့ မသန့်ရှင်းဘူး” လို့ပြောလိုက်တာပဲ။ ၁၂ ယေရှုက တပည့်တွေရဲ့ခြေကို ဆေးပြီးတဲ့နောက် အပေါ်ဝတ်ရုံကို ဝတ်ပြီး စားပွဲမှာ ပြန်ထိုင်တယ်။ ပြီးတော့ “ကျွန်တော် ဘာလို့ ဒီလိုလုပ်တယ်ဆိုတာ နားလည်ကြသလား။ ၁၃ ကျွန်တော့်ကို ‘ဆရာ၊’ ‘သခင်’ ဆိုပြီး ခင်ဗျားတို့ ခေါ်တယ်။ ခေါ်တဲ့အတိုင်း ဟုတ်နေတော့ ခင်ဗျားတို့ အဲဒီလိုခေါ်တာ မမှားပါဘူး။ ၁၄ သခင်လည်းဖြစ်၊ ဆရာလည်းဖြစ်တဲ့ ကျွန်တော်တောင်မှ ခင်ဗျားတို့ရဲ့ခြေကို ဆေးပေးတယ်ဆိုရင် ခင်ဗျားတို့လည်း အချင်းချင်းရဲ့ခြေကို ဆေးပေးရမယ်။ ၁၅ ဒါဟာ ခင်ဗျားတို့အတွက် ကျွန်တော်ပြတဲ့ စံနမူနာပဲ။ ကျွန်တော်လုပ်သလို ခင်ဗျားတို့ လိုက်လုပ်ကြပါ။ ၁၆ ကျွန်တော် မှန်တာကို ပြောမယ်။ အမှန်အတိုင်း ပြောမယ်။ ကျွန်ဟာ သခင်ထက် ကြီးမြတ်တာ မဟုတ်ဘူး။ စေလွှတ်ခံရသူဟာ စေလွှတ်သူထက် ကြီးမြတ်တာ မဟုတ်ဘူး။ ၁၇ ဒါတွေကို ခင်ဗျားတို့ သိထားပြီဆိုတော့ သိတဲ့အတိုင်း လုပ်မယ်ဆိုရင် ပျော်ရွှင်ချမ်းမြေ့ရလိမ့်မယ်။
အောက်တိုဘာ ၂၂-၂၈
ကျမ်းစာထဲက အဖိုးတန်ဘဏ္ဍာများ | ယောဟန် ၁၅-၁၇
‘ခင်ဗျားတို့က ဒီလောကနဲ့ ဘာမှ မပတ်သက်ကြ’
(ယောဟန် ၁၅:၁၉) ခင်ဗျားတို့ဟာ ဒီလောကနဲ့ပတ်သက်နေရင် လောကက သူ့လူတွေဖြစ်နေတဲ့ ခင်ဗျားတို့ကို ချစ်လိမ့်မယ်။ အခုတော့ ခင်ဗျားတို့က ဒီလောကနဲ့ ဘာမှ မပတ်သက်တဲ့အပြင် ဒီလောကထဲက ကျွန်တော် ရွေးချယ်ထားသူတွေ ဖြစ်နေတဲ့အတွက် လောကက ခင်ဗျားတို့ကို မုန်းတယ်။
nwtsty ယဟ ၁၅:၁၉ လေ့လာမှု မှတ်စု
လောက– ဒီကျမ်းချက်ရဲ့ ရှေ့နောက်စကားအရ ကော့စမော့စ်ဆိုတဲ့ ဂရိစကားလုံးဟာ ဘုရားကျေးကျွန်တွေ မပါတဲ့ လူ့လောကကို ဆိုလိုတယ်။ ဒီလောကဟာ ဘုရားသခင်နဲ့ ကင်းကွာနေတဲ့၊ မဖြောင့်မတ်တဲ့ လူ့အဖွဲ့အစည်းဖြစ်တယ်။ ယေရှုရဲ့ နောက်လိုက်တွေဟာ ဒီလောကနဲ့ ဘာမှ မပတ်သက်ဘူး၊ မဆိုင်ဘူးဆိုတဲ့ ယေရှုရဲ့စကားကို ခရစ်ဝင်ကျမ်းရေးသူ ယောဟန် တစ်ယောက်တည်းပဲ ကိုးကားဖော်ပြတယ်။ သစ္စာရှိ တမန်တော်တွေနဲ့အတူ ယေရှု နောက်ဆုံးအကြိမ် ဆုတောင်းတဲ့အချိန်မှာ ဒီအချက်ကို နှစ်ကြိမ် ဖော်ပြခဲ့တယ်။—ယဟ ၁၇:၁၄၊ ၁၆။
(ယောဟန် ၁၅:၂၁) သူတို့က ကျွန်တော့်ကို စေလွှတ်တဲ့အရှင်ကို မသိတဲ့အတွက် ကျွန်တော့်တပည့်ဖြစ်နေတဲ့ ခင်ဗျားတို့ကို အဲဒီလို လုပ်ကြလိမ့်မယ်။
nwtsty ယဟ ၁၅:၂၁ လေ့လာမှု မှတ်စု
ကျွန်တော့်တပည့်ဖြစ်နေတဲ့– ဒါမှမဟုတ် “ကျွန်တော့်နာမည်ကြောင့်။” ကျမ်းစာထဲမှာ “နာမည်” ဆိုတဲ့ အသုံးအနှုန်းက တစ်ခါတလေ နာမည်ရှင်အပြင် သူ့ဂုဏ်သတင်းနဲ့ သူကိုယ်စားပြုတာအားလုံးကို ဆိုလိုတယ်။ ယေရှုနဲ့ပတ်သက်လာရင် နာမည်ဆိုတာက သူ့ဖခင်ပေးထားတဲ့ အခွင့်အာဏာ၊ ရာထူးကိုလည်း ကိုယ်စားပြုတယ်။ (မ ၂၈:၁၈။ ဖိ ၂:၉၊ ၁၀။ ဟီ ၁:၃၊ ၄) ဒီကျမ်းချက်မှာ ယေရှုက သူ့နောက်လိုက်တွေကို လောကသားတွေ ဘာကြောင့် နှောင့်ယှက်တယ်ဆိုတာ ရှင်းပြတယ်။ အကြောင်းက သူ့ကိုစေလွှတ်တဲ့အရှင်ကို မသိကြလို့ပဲ။ သူတို့သာ ဘုရားကို သိမယ်ဆိုရင် ယေရှုရဲ့ နာမည်က ဘာကိုကိုယ်စားပြုတယ်ဆိုတာ အသိအမှတ်ပြုလိမ့်မယ်။ (တ ၄:၁၂) အဲဒီထဲမှာ လူအားလုံး အသက်ရဖို့ လက်အောက်ခံရမယ့် ဘုရားခန့်အပ်ခံ အုပ်စိုးရှင်၊ ဘုရင်တကာတို့ရဲ့ ဘုရင် ဆိုတဲ့ ယေရှုရဲ့ ရာထူး ပါဝင်တယ်။—ယဟ ၁၇:၃။ ဗ ၁၉:၁၁-၁၆။ ဆ ၂:၇-၁၂ နဲ့နှိုင်းယှဉ်ပါ။
(ယောဟန် ၁၆:၃၃) ကျွန်တော့်ကြောင့် ခင်ဗျားတို့ ငြိမ်သက်ခြင်း ခံစားရအောင် ဒါတွေကို ပြောပြနေတာ။ ဒီလောကမှာ ခင်ဗျားတို့ ဆင်းရဲဒုက္ခခံရလိမ့်မယ်။ ဒါပေမဲ့ သတ္တိရှိကြပါ။ ဒီလောကကို ကျွန်တော် အောင်နိုင်ပြီ” လို့ပြောတယ်။
it-1 ၅၁၆
ရဲစွမ်းသတ္တိ
ခရစ်ယာန်တစ်ယောက်ဟာ ယေဟောဝါဘုရားကို ရန်ဘက်ပြုနေတဲ့ ဒီလောကရဲ့ သဘောထားနဲ့ လုပ်ရပ်တွေကြောင့် ကိုယ့်ကိုယ်ကိုယ် မညစ်ညူးစေဖို့၊ လောကရဲ့ မုန်းတီးမှုကို ခံနေရပေမဲ့ ဆက်သစ္စာရှိနိုင်ဖို့ ရဲစွမ်းသတ္တိရှိရမယ်။ တပည့်တွေကို ယေရှုခရစ်က “ဒီလောကမှာ ခင်ဗျားတို့ ဆင်းရဲဒုက္ခခံရလိမ့်မယ်။ ဒါပေမဲ့ သတ္တိရှိကြပါ။ ဒီလောကကို ကျွန်တော် အောင်နိုင်ပြီ” လို့ပြောတယ်။ (ယဟ ၁၆:၃၃) ဘုရားသခင့်သားတော်ဟာ လောကရဲ့ ဩဇာလွှမ်းမိုးမှုကို တစ်ခါမှ မခံခဲ့ဘူး။ အဲဒီအစား လောကနဲ့ ဘယ်နည်းနဲ့မှ မတူခြင်းအားဖြင့် ဒီလောကကို အောင်နိုင်ခဲ့တယ်။ အောင်နိုင်သူတစ်ဦးအဖြစ် ယေရှုခရစ်ရဲ့ အကောင်းဆုံးစံနမူနာနဲ့ အပြစ်ဆိုစရာမရှိတဲ့လမ်းစဉ်ရဲ့ အကျိုးရလဒ်က ယေရှုလို ဒီလောကနဲ့ သီးခြားနေရုံမက လောကရဲ့ ညစ်ညမ်းမှုကို မခံယူဖို့ လိုအပ်တဲ့ ရဲစွမ်းသတ္တိရှိစေနိုင်တယ်။—ယဟ ၁၇:၁၆။
ရှာဖွေလေ့လာ ဘုရားရေးရာရတနာ
(ယောဟန် ၁၇:၂၁-၂၃) သူတို့အားလုံး တစ်စိတ်တစ်ဝမ်းတည်း ဖြစ်လာအောင်လို့ပါ။ အဖက ကျွန်တော်နဲ့ တစ်စိတ်တစ်ဝမ်းတည်းဖြစ်ပြီး ကျွန်တော်က အဖနဲ့ တစ်စိတ်တစ်ဝမ်းတည်း ဖြစ်သလိုမျိုးပေါ့။ ဒါဆိုရင် သူတို့အားလုံး ကျွန်တော်တို့နဲ့ တစ်စိတ်တစ်ဝမ်းတည်း ဖြစ်လာလိမ့်မယ်။ ဒီလောကကလည်း ကျွန်တော့်ကို အဖစေလွှတ်လိုက်မှန်း ယုံပါလိမ့်မယ်။ ၂၂ ကျွန်တော်တို့ တစ်စိတ်တစ်ဝမ်းတည်းဖြစ်သလို သူတို့ကို တစ်စိတ်တစ်ဝမ်းတည်းဖြစ်စေဖို့ အဖပေးအပ်ထားတဲ့ ဘုန်းအသရေကို သူတို့ကို ပေးအပ်လိုက်ပါပြီ။ ၂၃ ကျွန်တော်က သူတို့နဲ့ တစ်စိတ်တစ်ဝမ်းတည်းဖြစ်ပြီး အဖက ကျွန်တော်နဲ့ တစ်စိတ်တစ်ဝမ်းတည်း ဖြစ်တဲ့အတွက် သူတို့လည်း အပြည့်အဝ စည်းလုံးလာကြမှာ။ အဲဒီအခါ ကျွန်တော့်ကို အဖစေလွှတ်လိုက်မှန်း၊ အဖက ကျွန်တော့်ကို ချစ်သလို သူတို့ကိုလည်း ချစ်မှန်း ဒီလောက သိလာမှာပါ။
nwtsty ယဟ ၁၇:၂၁-၂၃ လေ့လာမှု မှတ်စု
တစ်စိတ်တစ်ဝမ်းတည်း– ဒါမှမဟုတ် “တစ်စည်းတစ်လုံးတည်း။” ယေရှုက သူ့ရဲ့ နောက်လိုက်စစ်တွေ “တစ်စိတ်တစ်ဝမ်းတည်း” ရှိဖို့ ဆုတောင်းခဲ့တယ်။ သူတို့ဟာ ရည်ရွယ်ချက်တစ်ခုတည်းရှိပြီး စည်းစည်းလုံးလုံး အမှုဆောင်ကြဖို့၊ သူနဲ့ သူ့အဖေ တစ်စိတ်တစ်ဝမ်းတည်း ရှိသလို ရှိကြဖို့၊ ညီညွတ်ပြီး ဝိုင်းဝန်းကူညီကြဖို့ ဆုတောင်းတယ်။ (ယဟ ၁၇:၂၂) ခရစ်ယာန်အမှုဆောင်တွေ အချင်းချင်းနဲ့သာမက ဘုရားသခင်နဲ့ပါ အတူတကွ လုပ်ဆောင်တဲ့အခါ ဒီလိုစည်းလုံးမှုရှိတဲ့အကြောင်း ၁က ၃:၆-၉ မှာ ပေါလု ဖော်ပြတယ်။—၁က ၃:၈ နဲ့ ယဟ ၁၀:၃၀။ ၁၇:၁၁ လေ့လာမှု မှတ်စုတွေကို ကြည့်ပါ။
သူတို့လည်း အပြည့်အဝ စည်းလုံးလာ– ဒါမှမဟုတ် “လုံးလုံးလျားလျား စည်းလုံးလာ။” ဒီအခန်းငယ်မှာ ယေရှုက အပြည့်အဝ စည်းလုံးမှုနဲ့ အဖရဲ့မေတ္တာကို ဆက်စပ်ထားတယ်။ ဒါက “မေတ္တာဟာ စည်းလုံးခြင်းအတွက် ခိုင်မြဲတဲ့ နှောင်ကြိုးပဲ” လို့ဆိုတဲ့ ကော ၃:၁၄ နဲ့ ညီညွတ်တယ်။ ဒီအပြည့်အဝ စည်းလုံးမှုဟာ အကန့်အသတ်ရှိတယ်။ အပြည့်အဝ စည်းလုံးတယ်ဆိုတာ တစ်ဦးစီရဲ့ အရည်အချင်းတွေ၊ အကျင့်တွေနဲ့ မှားမှန်သိစိတ် စတဲ့ ပင်ကိုစရိုက်တွေ တူညီရမယ်လို့ မဆိုလိုဘူး။ ယေရှုရဲ့ နောက်လိုက်တွေဟာ အပြုအမူ၊ ယုံကြည်ချက်နဲ့ သွန်သင်ချက်တွေမှာ စည်းလုံးညီညွတ်ကြတာကို ဆိုလိုတယ်။—ရ ၁၅:၅၊ ၆။ ၁က ၁:၁၀။ ဧ ၄:၃။ ဖိ ၁:၂၇။
(ယောဟန် ၁၇:၂၄) အဖ၊ အဖပေးအပ်ထားသူတွေကို ကျွန်တော်ရှိတဲ့နေရာမှာ ရှိစေချင်လိုက်တာ။ ဒါမှ လူ့လောကအစပြုချိန် မတိုင်ခင်ကတည်းက ကျွန်တော့်ကိုချစ်လို့ အဖပေးထားတဲ့ ဘုန်းအသရေကို သူတို့မြင်နိုင်မှာပါ။
nwtsty ယဟ ၁၇:၂၄ လေ့လာမှု မှတ်စု
လူ့လောကအစပြုချိန်– “အစပြုချိန်” ဆိုတဲ့ ဂရိစကားလုံးကို ဟီ ၁၁:၁၁ မှာ “မျိုးနွယ်” ဆိုတဲ့စကားလုံးနဲ့ တွဲသုံးပြီး “ကိုယ်ဝန်ဆောင်” လို့ပြန်ဆိုတယ်။ ဒီနေရာမှာ “လူ့လောကအစပြုချိန်” ဆိုတဲ့ အသုံးအနှုန်းက အာဒံနဲ့ ဧဝ ကလေးမွေးတာကို ရည်ညွှန်းမှန်း ထင်ရှားတယ်။ ယေရှုက “လူ့လောကအစပြုချိန်” ကို အာဗေလနဲ့ ဆက်စပ်ဖော်ပြတယ်။ အာဗေလဟာ ရွေးနုတ်ရမယ့်ပထမလူသား၊ “လူ့လောကအစပြုချိန်ကတည်းက အသက်စာလိပ်မှာ” ဦးဆုံး ‘နာမည်စာရင်းဝင်သူ’ ဖြစ်မှန်း ထင်ရှားတယ်။ (လု ၁၁:၅၀၊ ၅၁။ ဗ ၁၇:၈) ယေရှုက သူ့အဖကို ဆုတောင်းရာမှာ ပြောခဲ့တဲ့ ဒီစကားတွေကို ကြည့်ရင် အာဒံနဲ့ဧဝတို့ ကလေးမမွေးခင် ရှေးအချိန်ကတည်းက ဘုရားသခင်ဟာ မိမိရဲ့တစ်ပါးတည်းသောသားကို ချစ်မှန်း ထင်ရှားတယ်။
ကျမ်းစာဖတ်ရှုခြင်း
(ယောဟန် ၁၇:၁-၁၄) အဲဒီလို ပြောပြီးတဲ့နောက် ယေရှုက ကောင်းကင်ကို မော့ကြည့်ပြီး အခုလို ဆုတောင်းတယ်– “အို အဖ၊ အချိန်ရောက်လာပါပြီ။ သားက အဖကို ဘုန်းထင်ရှားစေဖို့ သားရဲ့ဘုန်းကိုလည်း ထင်ရှားစေပါ။ ၂ လူသားအားလုံးကို အုပ်ချုပ်ရမယ့် အခွင့်အာဏာကို သားဆီ အဖ အပ်နှင်းထားပါပြီ။ သားကို ဒီလိုအပ်နှင်းတာက အဖပေးအပ်ထားသူတွေကို ထာဝရအသက် ပေးနိုင်ဖို့ပါ။ ၃ ထာဝရအသက် ရနိုင်ဖို့ဆိုရင် တစ်ဆူတည်းသော စစ်မှန်တဲ့ဘုရားသခင် အဖကိုရော အဖ စေလွှတ်လိုက်တဲ့ ယေရှုခရစ်ကိုပါ သိကျွမ်းကြရမယ်။ ၄ ကမ္ဘာပေါ်မှာ အဖရဲ့ဘုန်းကို ကျွန်တော် ထင်ရှားစေခဲ့ပါပြီ။ အဖခိုင်းထားတဲ့ အလုပ်ကို လုပ်ပြီးပါပြီ။ ၅ အဖ၊ ဒီလောက မတည်ရှိခင် အဖရဲ့ဘေးနားမှာ ကျွန်တော်ခံစားခဲ့ရတဲ့ ဘုန်းအသရေမျိုးကို အခုလည်း အဖရဲ့ဘေးနားမှာ ပြန်ခံစားခွင့်ပေးပါ။ ၆ “ဒီလောကထဲက အဖ ပေးအပ်ထားသူတွေကို အဖရဲ့နာမည် သိအောင် ကျွန်တော် ဖော်ပြပါပြီ။ သူတို့ကို အဖပိုင်ဆိုင်လို့ ကျွန်တော့်ဆီ ပေးအပ်ခဲ့တာပါ။ အဖရဲ့တရားစကားကို သူတို့ လိုက်နာပါတယ်။ ၇ ကျွန်တော် ရရှိထားသမျှဟာ အဖဆီကဖြစ်မှန်း အခု သူတို့သိသွားပါပြီ။ ၈ ဘာလို့လဲဆိုတော့ ကျွန်တော့်ကို အဖပြောသမျှ သူတို့ကို ပြန်ပြောပြခဲ့လို့ပါ။ သူတို့က အဲဒီစကားတွေကို လက်ခံတယ်။ အဖရဲ့ကိုယ်စားလှယ်အဖြစ် ကျွန်တော်ရောက်လာမှန်း ကောင်းကောင်းသိတယ်။ အဖစေလွှတ်လိုက်တဲ့သူ ဖြစ်မှန်းလည်း ယုံတယ်။ ၉ သူတို့အတွက် ကျွန်တော် ဆုတောင်းပေးပါတယ်။ ဒီလောကအတွက်မဟုတ်ဘဲ အဖပေးအပ်ထားသူတွေအတွက် ဆုတောင်းနေတာပါ။ သူတို့ဟာ အဖရဲ့လူတွေဖြစ်လို့ပါ။ ၁၀ ကျွန်တော်ပိုင်ဆိုင်သမျှ အဖပိုင်တယ်။ အဖပိုင်ဆိုင်သမျှ ကျွန်တော်ပိုင်တယ်။ သူတို့ကြောင့် ကျွန်တော် ဘုန်းထင်ရှားပါပြီ။ ၁၁ “ကျွန်တော်က အဖဆီ ပြန်လာတော့မှာမို့လို့ ဒီလောကမှာ ရှိတော့မှာ မဟုတ်ဘူး။ သူတို့ကတော့ ဒီလောကမှာ ကျန်ရစ်ခဲ့မှာပါ။ သန့်ရှင်းမြင့်မြတ်တဲ့ အဖ၊ ကျွန်တော့်ကို ခံယူခွင့်ပေးထားတဲ့ နာမတော်ကို ထောက်ပြီး သူတို့ကို ကာကွယ်စောင့်ရှောက်ပေးပါ။ ဒါဆိုရင် အဖနဲ့ကျွန်တော် တစ်စိတ်တစ်ဝမ်းတည်းဖြစ်သလို သူတို့လည်း တစ်စိတ်တစ်ဝမ်းတည်း ဖြစ်နေမှာပါ။ ၁၂ ကျွန်တော်ဟာ ခံယူခွင့်ရထားတဲ့ အဖရဲ့နာမည်ကို ထောက်ပြီး သူတို့နဲ့အတူရှိနေတုန်းမှာ သူတို့ကို စောင့်ရှောက်ခဲ့တယ်၊ ကာကွယ်ခဲ့တယ်။ ပျက်စီးခြင်းရဲ့သားကလွဲလို့ တစ်ယောက်မှ မဆုံးရှုံးပါဘူး။ ဒါဟာ ကျမ်းစကားပြည့်စုံတာပါပဲ။ ၁၃ အခု အဖဆီ ကျွန်တော်လာတော့မယ်။ ကျွန်တော်ခံစားရတဲ့ ပျော်ရွှင်မှုမျိုး သူတို့လည်း အပြည့်အဝ ခံစားနိုင်အောင် ဒီလောကမှာ ကျွန်တော်ရှိနေတုန်း ဒီစကားတွေကို ပြောရတာပါ။ ၁၄ အဖရဲ့ တရားစကားကို သူတို့ကို ကျွန်တော်ပြောပြပါပြီ။ ဒီလောကနဲ့ ကျွန်တော် မပတ်သက်ခဲ့သလို သူတို့လည်း မပတ်သက်တဲ့အတွက် လောကက သူတို့ကို မုန်းပါတယ်။
အောက်တိုဘာ ၂၉–နိုဝင်ဘာ ၄
ကျမ်းစာထဲက အဖိုးတန်ဘဏ္ဍာများ | ယောဟန် ၁၈-၁၉
“ယေရှု အမှန်တရားကို သက်သေခံခဲ့”
(ယောဟန် ၁၈:၃၆) ယေရှုက “ကျွန်တော့်နိုင်ငံဟာ ဒီလောကနဲ့ မပတ်သက်ဘူး။ ဒီလောကနဲ့ ပတ်သက်တယ်ဆိုရင် ကျွန်တော့်ရဲ့ နောက်လိုက်တွေက ဂျူးတွေလက်ထဲ ကျွန်တော် မရောက်သွားရအောင် တိုက်ခိုက်မှာပဲ။ ကျွန်တော့်နိုင်ငံဟာ ဒီလောကနဲ့ မသက်ဆိုင်ဘူး” လို့ဖြေတယ်။
(ယောဟန် ၁၈:၃၇) အဲဒီအခါ ပိလတ်မင်းက “ဒါဆိုရင် မင်းက ဘုရင်လား” လို့မေးတော့ ယေရှုက “မင်းကြီးပြောတာ အမှန်ပဲ။ ကျွန်တော်ဟာ ဘုရင်တစ်ပါးပါ။ ကျွန်တော်မွေးဖွားပြီး ဒီလောကကို ရောက်လာတာ အမှန်တရားကို သက်သေခံဖို့ပဲ။ အမှန်တရားဘက် ရပ်တည်သူတိုင်း ကျွန်တော်ပြောတာကို နားထောင်ကြတယ်” လို့ဖြေတယ်။
nwtsty ယဟ ၁၈:၃၇ လေ့လာမှု မှတ်စု
သက်သေခံဖို့– ခရစ်ယာန် ဂရိကျမ်းစောင်တွေမှာ အသုံးပြုထားတဲ့အတိုင်း “သက်သေခံဖို့” (မာတရီအို) နဲ့ “သက်သေခံ” (မာတရိုင်အာ။ မာတီစ်) လို့ပြန်ဆိုတဲ့ ဂရိစကားလုံးတွေဟာ အဓိပ္ပာယ်ကျယ်ပြန့်တယ်။ ဒီအသုံးအနှုန်း နှစ်ခုစလုံးကို ကိုယ်တွေ့၊ ဒါမှမဟုတ် ကိုယ်သိထားတာကို သက်သေခံတဲ့ အခြေခံသဘောနဲ့ သုံးထားတယ်။ ဒါပေမဲ့ “ကြေညာခြင်း၊ အတည်ပြုခြင်း၊ ချီးမွမ်းပြောဆိုခြင်း” သဘောမျိုးလည်း ပါဝင်တယ်။ ယေရှုဟာ သူယုံကြည်တဲ့ အမှန်တရားကို သက်သေခံ ကြေညာတဲ့အပြင် သူ့အဖေ ပရောဖက်ပြုထားတဲ့ စကားနဲ့ ကတိတော်တွေ မှန်ကန်တာကို အသက်ရှင် နေထိုင်ပုံနဲ့ ဖော်ပြခဲ့တယ်။ (၂က ၁:၂၀) ဘုရားနိုင်ငံတော်၊ မေရှိယအုပ်စိုးရှင်နဲ့ပတ်သက်တဲ့ ဘုရားရည်ရွယ်ချက်ကို အသေးစိတ် ကြိုဟောထားတယ်။ ပညတ်ပဋိညာဉ်မှာပါတဲ့ ပုံရိပ်တွေ၊ ပုံဆောင်ချက်တွေအပါအဝင် မေရှိယနဲ့ဆိုင်တဲ့ ပရောဖက်ပြုချက်အားလုံးဟာ ပူဇော်သက္ကာအဖြစ် ယေရှုသေဆုံးချိန်အထိ သူ့ရဲ့မြေကြီးအသက်တာတစ်ခုလုံးမှာ ပြည့်စုံခဲ့တယ်။ (ကော ၂:၁၆၊ ၁၇။ ဟီ ၁၀:၁) ဒါကြောင့် ယေရှုဟာ စကားနဲ့ရော အလုပ်နဲ့ပါ ‘အမှန်တရားကို သက်သေခံတယ်’ လို့ ပြောနိုင်ပါတယ်။
အမှန်တရား– ယေရှုက ယေဘုယျအမှန်တရားကို မဟုတ်ဘဲ ဘုရားရည်ရွယ်ချက်နဲ့ သက်ဆိုင်တဲ့ အမှန်တရားကို ရည်ညွှန်းနေတာ ဖြစ်တယ်။ ဘုရားရည်ရွယ်ချက်ထဲမှာ အဓိကကျတဲ့ အချက်တစ်ချက်က “ဒါဝိဒ်ရဲ့သား” ယေရှုဟာ ပုရောဟိတ်မင်းနဲ့ ဘုရားနိုင်ငံတော်ဘုရင်အဖြစ် လုပ်ဆောင်မယ်ဆိုတဲ့ အချက်ပဲ။ (မ ၁:၁) ယေရှုက လူ့လောကကို သူလာရတာ၊ မြေကြီးပေါ်အသက်ရှင်ရတာ၊ ဘုရားအမှုဆောင်ရတာရဲ့ အဓိကအကြောင်းရင်းဟာ နိုင်ငံတော် အမှန်တရားကို ကြေညာဖို့ပဲလို့ ရှင်းပြတယ်။ ယေရှု မမွေးဖွားခင်နဲ့ ဒါဝိဒ်မွေးခဲ့တဲ့ ယုဒပြည်၊ ဘက်သလီဟင်မြို့မှာ ယေရှုမွေးဖွားပြီးနောက် ကောင်းကင်တမန်တွေက အဲဒီသတင်းကိုပဲ ကြေညာခဲ့တယ်။—လု ၁:၃၂၊ ၃၃။ ၂:၁၀-၁၄။
(ယောဟန် ၁၈:၃၈က) အဲဒီအခါ ပိလတ်မင်းက “အမှန်တရားဆိုတာ ဘာလဲ” လို့ပြောတယ်။
nwtsty ယဟ ၁၈:၃၈က လေ့လာမှု မှတ်စု
အမှန်တရားဆိုတာ ဘာလဲ– ပိလတ်မင်းက ယေဘုယျအမှန်တရားအကြောင်း မေးတာဖြစ်ပုံရတယ်။ ယေရှု ခုလေးတင်ပြောခဲ့တဲ့ “အမှန်တရား” အကြောင်းမေးတာ မဟုတ်ဘူး။ (ယဟ ၁၈:၃၇) ပိလတ်မင်းက တကယ်သိချင်လို့ မေးတာဆိုရင် ယေရှု ဖြေပေးမှာပါ။ ပိလတ်မင်းက အဖြေရချင်လို့ မဟုတ်ဘဲ အယုံအကြည်မရှိ အပြစ်ရှာချင်တဲ့ သဘောမျိုးနဲ့ “အမှန်တရားတဲ့လား၊ အဲဒါက ဘာလဲ၊ မဖြစ်နိုင်တာ” ဆိုပြီး သံသယနဲ့မေးတာ ဖြစ်နိုင်တယ်။ ပိလတ်ဟာ အဖြေရဖို့ စောင့်မနေဘဲ ခြံဝင်းထဲမှာရှိတဲ့ ဂျူးတွေဆီ ထွက်သွားတယ်။
ရှာဖွေလေ့လာ ဘုရားရေးရာရတနာ
(ယောဟန် ၁၉:၃၀) ဝိုင်သောက်ပြီးတဲ့အခါ ယေရှုက “အဖခိုင်းသမျှ ကျွန်တော်လုပ်ပြီးပါပြီ” လို့ပြောတယ်။ အဲဒီနောက် ခေါင်းငိုက်စိုက်ကျပြီး အသက်ထွက်သွားတယ်။
nwtsty ယောဟန် ၁၉:၃၀ လေ့လာမှု မှတ်စု
အသက်ထွက်သွားတယ်– ဒါမှမဟုတ် “အသက်ချုပ်သွားတယ်၊ အသက်မရှူတော့ဘူး။” “အသက်ထွက်” လို့ပြန်ဆိုတဲ့ ဂရိအသုံးအနှုန်းက ယေရှုဟာ အဖ ခိုင်းသမျှ လုပ်ပြီးသွားလို့ အသက်ရှင်ဖို့ ဆက်မကြိုးစားတော့တာကို ဆိုလိုတယ်လို့ တချို့က ဆိုတယ်။ သူဟာ လိုလိုလားလား “အသက်စွန့်ပြီး ပေးဆက်ခဲ့တယ်။”—ရှာ ၅၃:၁၂။ ယဟ ၁၀:၁၁။
(ယောဟန် ၁၉:၃၁) အဲဒီနေ့က အဖိတ်နေ့၊ နောက်တစ်နေ့ ကလည်း အထူးဥပုသ်နေ့ဖြစ်နေတယ်။ ဒါကြောင့် ဂျူးတွေက အလောင်းတွေကို သစ်တိုင်ပေါ်မှာ ဥပုသ်နေ့အထိ မရှိစေချင်တဲ့အတွက် ခြေထောက်ချိုးပြီး သယ်သွားပါရစေလို့ ပိလတ်မင်းဆီ ခွင့်တောင်းကြတယ်။
nwtsty ယဟ ၁၉:၃၁ လေ့လာမှု မှတ်စု
နောက်တစ်နေ့ ကလည်း အထူးဥပုသ်နေ့ဖြစ်နေတယ်– ပသခါပွဲပြီး နောက်နေ့၊ နိသန်လ ၁၅ ရက်ဟာ ဘယ်နေ့မှာပဲကျကျ အမြဲပဲ ဥပုသ်နေ့ ဖြစ်တယ်။ (ဝ ၂၃:၅-၇) ဒီအထူးဥပုသ်က ပုံမှန်ဥပုသ် (သောကြာ နေဝင်ချိန်ကနေ စနေ နေဝင်ချိန်အထိ ဂျူးသီတင်းပတ်တစ်ပတ်ရဲ့ ခုနစ်ရက်မြောက်နေ့) နဲ့ ရက်ထပ်မယ်ဆိုရင် အဲဒီဥပုသ်က “အထူးဥပုသ်” ဖြစ်တယ်။ ယေရှုက သောကြာနေ့မှာ သေတယ်။ နောက်တစ်နေ့က အထူးဥပုသ်နေ့ ဖြစ်တယ်။ အေဒီ ၂၉ ကနေ ၃၅ အတွင်းမှာ နိသန် ၁၄ ရက်က သောကြာနေ့ ကျတာဆိုလို့ အေဒီ ၃၃ တစ်နှစ်ပဲရှိတယ်။ ဒါကြောင့် ယေရှုသေဆုံးတဲ့နေ့ဟာ အေဒီ ၃၃၊ နိသန်လ ၁၄ ရက်နေ့ ဖြစ်မယ်ဆိုတာ ဒီအထောက်အထားက သက်သေထူတယ်။
ကျမ်းစာဖတ်ရှုခြင်း
(ယောဟန် ၁၈:၁-၁၄) အဲဒီလို ဆုတောင်းပြီးတဲ့နောက် ယေရှုက တပည့်တွေနဲ့အတူ ကိဒြုန်ချိုင့်ဝှမ်း တစ်ဖက်ကို ဖြတ်ပြီး ဥယျာဉ်ထဲ ဝင်သွားတယ်။ ၂ တပည့်တွေနဲ့အတူ အဲဒီကို အကြိမ်ကြိမ် သွားဖူးတဲ့အတွက် သစ္စာဖောက်ယုဒက အဲဒီနေရာကို သိနေတယ်။ ၃ ယုဒက စစ်သည်တစ်စုအပြင် ပုရောဟိတ်ကြီးတွေနဲ့ ဖာရိရှဲတွေရဲ့ အစောင့်ရဲမက်တွေကိုပါ ခေါ်ပြီး အဲဒီကို ရောက်လာတယ်။ မီးတုတ်၊ မီးအိမ်၊ လက်နက်တွေ ကိုင်ထားကြတယ်။ ၄ ဘာတွေကြုံရတော့မယ်ဆိုတာ သိနေတဲ့အတွက် ယေရှုက ရှေ့ကိုထွက်လာပြီး “ဘယ်သူ့ကို ရှာနေတာလဲ” လို့မေးတယ်။ ၅ “နာဇရက်မြို့သား ယေရှုကို ရှာနေတာ” လို့ သူတို့ဖြေတော့ ယေရှုက “ကျွန်တော်ဟာ ယေရှုပဲ” လို့ပြောလိုက်တယ်။ သစ္စာဖောက် ယုဒလည်း သူတို့နဲ့အတူ ရပ်နေတယ်။ ၆ “ကျွန်တော်ဟာ ယေရှုပဲ” လို့ပြောတော့ သူတို့ နောက်ဆုတ်သွားပြီး လဲကျကုန်တယ်။ ၇ “ဘယ်သူ့ကို ရှာနေတာလဲ” လို့ ယေရှု ထပ်မေးတဲ့အခါ “နာဇရက်မြို့သား ယေရှုကို ရှာနေတာ” လို့ဖြေကြတယ်။ ၈ ယေရှုက “ကျွန်တော်ဟာ ယေရှုပါလို့ ပြောပြီးပြီပဲ။ ကျွန်တော့်ကို ရှာနေတာဆိုရင် သူတို့တွေ သွားပါစေ” လို့ပြောတယ်။ ၉ ဒါဟာ “အဖပေးအပ်ထားသူ တစ်ယောက်ကိုမှ ကျွန်တော် မဆုံးရှုံးဘူး” ဆိုတဲ့ သူ့ရဲ့စကားတွေ ပြည့်စုံလာတာပဲ။ ၁၀ အဲဒီအခါ ရှိမုန်ပေတရုက ပါလာတဲ့ဓားကို ဆွဲထုတ်ပြီး ပုရောဟိတ်မင်းရဲ့ ကျွန်ကို ခုတ်လိုက်တာ ညာဘက်နားရွက် ပြတ်သွားတယ်။ အဲဒီကျွန်က မာလခုလို့ ခေါ်တယ်။ ၁၁ ယေရှုက “ဓားကို ဓားအိမ်ထဲ ပြန်ထည့်လိုက်ပါ။ အဖဘုရားပေးတဲ့ ခွက်ကို ကျွန်တော် မသောက်ဘဲ နေရမှာလား” ဆိုပြီး ပေတရုကိုပြောတယ်။ ၁၂ တပ်မှူးနဲ့ တပ်သားတွေ၊ ဂျူးတွေရဲ့ အစောင့်ရဲမက်တွေက ယေရှုကို ဖမ်းဆီးချည်နှောင်ပြီး၊ ၁၃ အန္နတ်ဆီ အရင်ခေါ်သွားတယ်။ အန္နတ်ဟာ အဲဒီနှစ်မှာ ပုရောဟိတ်မင်းဖြစ်နေတဲ့ ကယာဖရဲ့ ယောက္ခမပဲ။ ၁၄ ကယာဖဆိုတာ လူအများအတွက် လူတစ်ယောက်သေတာ ပိုအကျိုးရှိတယ်ဆိုပြီး ဂျူးတွေကို အကြံပေးခဲ့ဖူးသူဖြစ်တယ်။