ခရစ်ယာန်အသက်တာနဲ့ အမှုဆောင်လုပ်ငန်း လေ့ကျင့်ခန်းစာစောင် မှာပါတဲ့ အညွှန်းများ
နိုဝင်ဘာ ၅-၁၁
ကျမ်းစာထဲက အဖိုးတန်ဘဏ္ဍာများ | ယောဟန် ၂၀-၂၁
“ဒီဟာတွေထက် ကျွန်တော့်ကို ပိုချစ်သလား”
(ယောဟန် ၂၁:၁-၃) အဲဒီနောက် ယေရှုက တိဗေရိအိုင်နားမှာ တပည့်တွေကို ကိုယ်ထင်ပြတယ်။ ကိုယ်ထင်ပြပုံကတော့ ဒီလိုပါ၊ ၂ ရှိမုန်ပေတရု၊ အမြွှာလို့ခေါ်တဲ့ သောမ၊ ဂါလိလဲနယ် ကာနမြို့သား နာသနေလ၊ ဇေဗေဒဲရဲ့သားတွေနဲ့ တခြားတပည့်နှစ်ယောက်တို့ အတူရှိနေချိန်မှာ၊ ၃ ရှိမုန်ပေတရုက “ငါးဖမ်းထွက်မယ်” ဆိုတော့ “ငါတို့လည်း လိုက်မယ်” လို့ပြောကြတယ်။ သူတို့ လှေနဲ့ငါးဖမ်းထွက်ပေမဲ့ အဲဒီညမှာ ငါးတစ်ကောင်မှ မရဘူး။
(ယောဟန် ၂၁:၄-၁၄) မိုးလင်းခါနီးတော့ ကမ်းစပ်မှာ ယေရှု ရပ်နေတယ်။ ဒါပေမဲ့ ယေရှုမှန်း တပည့်တွေ မသိကြဘူး။ ၅ ယေရှုက “ချစ်သားတို့၊ စားစရာတစ်ခုခု ရှိသလား” ဆိုပြီး မေးတဲ့အခါ “မရှိဘူး” လို့ဖြေကြတယ်။ ၆ ဒါနဲ့ “လှေရဲ့ညာဘက်မှာ ပိုက်ကွန်ချလိုက်ပါ။ ငါးတွေရလိမ့်မယ်” လို့ ယေရှုပြောတဲ့အတွက် ပိုက်ကွန်ချလိုက်တဲ့အခါ ပိုက်ကိုတောင် မဆွဲတင်နိုင်လောက်အောင် ငါးတွေအများကြီး ဖမ်းမိတယ်။ ၇ အဲဒီအခါ ယေရှုချစ်တဲ့တပည့်က “ဒါ သခင်ပဲ” လို့ပေတရုကို ပြောတယ်။ ဒါကိုလည်း ကြားရော ရှိမုန်ပေတရုက အပေါ်အင်္ကျီကို ကောက်ဝတ်ပြီး ရေထဲ ခုန်ဆင်းသွားတယ်။ ၈ ကျန်တဲ့တပည့်တွေဟာ ကမ်းစပ်နဲ့သိပ်မဝေးဘဲ ပေ ၃၀၀ လောက်မှာ ရှိနေတဲ့အတွက် ငါးတွေအပြည့်ပါတဲ့ ပိုက်ကွန်ကို ဆွဲရင်း လှေနဲ့ ကမ်းကပ်လာတယ်။ ၉ ကမ်းပေါ်ရောက်တဲ့အခါ မီးသွေးမီးပုံပေါ် ကင်ထားတဲ့ ငါးတွေနဲ့ မုန့်ကို တွေ့တယ်။ ၁၀ ယေရှုက “ဖမ်းလာတဲ့ငါးတချို့ ယူလာခဲ့” လို့ပြောတဲ့အတွက်၊ ၁၁ ရှိမုန်ပေတရုလည်း လှေပေါ်တက်ပြီး ပိုက်ကွန်ကို ကုန်းပေါ်ဆွဲတင်တယ်။ ငါးကြီး ၁၅၃ ကောင် ပါလာတယ်။ ငါးတွေ ဒီလောက်များတာတောင် ပိုက်ကွန်မပေါက်ပြဲဘူး။ ၁၂ ယေရှုက “မနက်စာ လာစားကြ” လို့ခေါ်တယ်။ သခင်မှန်း သိနေတဲ့အတွက် “ခင်ဗျား ဘယ်သူလဲ” ဆိုပြီး တပည့်တစ်ယောက်မှ မမေးရဲဘူး။ ၁၃ ယေရှုက မုန့်ကိုယူပြီး တပည့်တွေကို ပေးတယ်။ ငါးကိုလည်း ပေးတယ်။ ၁၄ ယေရှု သေရာကနေ အသက်ပြန်ရှင်လာပြီးနောက် တပည့်တွေကို ကိုယ်ထင်ပြတာ ဒါဟာ တတိယအကြိမ်ပဲ။
(ယောဟန် ၂၁:၁၅-၁၉) မနက်စာ စားပြီးတဲ့နောက် ယေရှုက “ယောဟန်ရဲ့သား ရှိမုန်၊ ဒီဟာတွေထက် ကျွန်တော့်ကို ပိုချစ်သလား” လို့မေးတယ်။ “ချစ်တာပေါ့။ ကျွန်တော်ချစ်မှန်း သခင်သိပါတယ်” လို့ ရှိမုန် ပေတရုဖြေတဲ့အခါ “ကျွန်တော့်သိုးသငယ်တွေကို ကျွေးမွေးပါ” လို့မှာတယ်။ ၁၆ ယေရှုက “ယောဟန်ရဲ့သား ရှိမုန်၊ ကျွန်တော့်ကို ချစ်သလား” လို့ ဒုတိယအကြိမ် မေးတယ်။ “ချစ်တာပေါ့။ ကျွန်တော်ချစ်မှန်း သခင်သိပါတယ်” လို့ဖြေတော့ “ကျွန်တော့် သိုးကလေးတွေကို ထိန်းပါ” လို့မှာတယ်။ ၁၇ အဲဒီနောက် ယေရှုက “ယောဟန်ရဲ့သား ရှိမုန်၊ ကျွန်တော့်ကို ချစ်သလား” လို့ တတိယအကြိမ် မေးတယ်။ “ကျွန်တော့်ကို ချစ်သလား” လို့ သုံးကြိမ်တောင် မေးတဲ့အတွက် ပေတရုလည်း ဝမ်းနည်းသွားပြီး “သခင်၊ သခင်ဟာ အရာခပ်သိမ်းကို သိပါတယ်။ သခင့်ကို ကျွန်တော်ချစ်မှန်းလည်း သိပါတယ်” လို့ဖြေတယ်။ အဲဒီအခါ ယေရှုက “ကျွန်တော့်ရဲ့ သိုးကလေးတွေကို ကျွေးမွေးပါ။ ၁၈ ကျွန်တော် မှန်တာကိုပြောမယ်၊ အမှန်အတိုင်း ပြောမယ်။ ခင်ဗျားဟာ ငယ်တုန်းမှာ ကိုယ့်ဘာသာကိုယ် အဝတ်ဝတ်ပြီး သွားချင်တဲ့နေရာကို သွားတတ်တယ်။ အသက်ကြီးလာရင်တော့ ကိုယ့်လက်နှစ်ဖက်ကို ဆန့်ပြီး တခြားသူက ဝတ်ပေးလိမ့်မယ်၊ ကိုယ်မသွားချင်တဲ့နေရာကို ခေါ်သွားလိမ့်မယ်” လို့ပြောတယ်။ ၁၉ ဒါဟာ ပေတရု ဘယ်လိုသေဆုံးပြီး ဘုရားသခင်ရဲ့ ဘုန်းတော်ကို ထင်ရှားစေမလဲဆိုတာ ပြောနေတာ။ အဲဒီနောက် ပေတရုကို “ကျွန်တော့်နောက် ဆက်ပြီးလိုက်ပါ” လို့ပြောတယ်။
nwtsty ယဟ ၂၁:၁၅၊ ၁၇ လေ့လာမှု မှတ်စု
ယေရှုက . . . မေးတယ်– ယေရှုကို ပေတရု သုံးကြိမ် ငြင်းပယ်ပြီးနောက် ယေရှုက ရှိမုန်ပေတရုကို မေးခဲ့တာဖြစ်တယ်။ ပေတရုရဲ့ စိတ်သဘောထားကို သိချင်လို့ ယေရှုက သုံးကြိမ်တောင် မေးတဲ့အတွက် ‘ပေတရု ဝမ်းနည်း’ သွားတယ်။ (ယဟ ၂၁:၁၇) ယဟ ၂၁:၁၅-၁၇ မှာ ချစ် လို့ ပြန်ဆိုတဲ့ ဂရိကြိယာ အဂေပေအို နဲ့ ချစ်ခင်လို့ အဓိပ္ပာယ်ရှိတဲ့ ဖီလီအို ကို ယောဟန် အသုံးပြုတယ်။ ယေရှုက ပေတရုကို “ကျွန်တော့်ကို ချစ်သလား” လို့ နှစ်ကြိမ်တိုင်တိုင် မေးတော့ ပေတရုက “ချစ်တာပေါ့” လို့ စိတ်ရင်းမှန်နဲ့ ဖြေတယ်။ ယေရှုက “ကျွန်တော့်ကို ချစ်သလား” လို့ နောက်ဆုံးအကြိမ် မေးတဲ့အခါ ပေတရုက ချစ်တယ်လို့ အခိုင်အမာဖြေတယ်။ ချစ်တယ်လို့ ပေတရု အခိုင်အမာဖြေဆိုတိုင်း ချစ်တယ်ဆိုရင် သူ့ရဲ့တပည့်တွေကို ကျွေးမွေးပါ၊ “ထိန်းပါ” လို့ ယေရှု မှာတယ်။ ဒီကျမ်းပိုဒ်မှာ တပည့်တွေကို “သိုးကလေးတွေ” လို့ ရည်ညွှန်းပြောဆိုတယ်။ (ယဟ ၂၁:၁၆၊ ၁၇။ ၁ပ ၅:၁-၃) ယေရှုက မိမိကို ပေတရု ချစ်ကြောင်း သုံးကြိမ်တိုင် အခိုင်အမာပြောစေတယ်။ ပြီးတော့မှ သိုးကလေးတွေကို ကြည့်ရှုစောင့်ရှောက်ဖို့ တာဝန်အပ်နှင်းတယ်။ သူ့ကို သုံးကြိမ်တိုင် ငြင်းပယ်ခဲ့တာကို ယေရှု ခွင့်လွှတ်လိုက်မှန်း ဒီလိုနည်းနဲ့ သိရှိစေတယ်။
ဒီဟာတွေထက်ကျွန်တော့်ကို ပိုချစ်သလား– သဒ္ဒါနည်းအရ “ဒီဟာတွေထက်” ဆိုတဲ့အသုံးအနှုန်းကို တစ်နည်းထက်မက နားလည်နိုင်တယ်။ ပညာရှင်တချို့က “ဒီတပည့်တွေကို ချစ်တာထက် ကျွန်တော့်ကို ပိုချစ်သလား” ဒါမှမဟုတ် “ဒီတပည့်တွေ ကျွန်တော့်ကို ချစ်တာထက် ပိုချစ်သလား” ဆိုတဲ့အဓိပ္ပာယ်ကို ပိုနှစ်သက်ကြတယ်။ ဒါပေမဲ့ “ဒီဟာတွေထက် ကျွန်တော့်ကို ပိုချစ်သလား” ဆိုတဲ့ အဓိပ္ပာယ်နဲ့မေးတာ ဖြစ်နိုင်တယ်။ ဒီဟာတွေဆိုတာ သူတို့ဖမ်းမိတဲ့ ငါးတွေ ဒါမှမဟုတ် တံငါလုပ်ငန်းနဲ့ဆိုင်တဲ့ အရာတွေ ဖြစ်တယ်။ ဒါကြောင့် ဒီကျမ်းပိုဒ်ရဲ့ ခြုံငုံအဓိပ္ပာယ်ဟာ ‘စည်းစိမ်ထက် ဒါမှမဟုတ် စည်းစိမ်နောက်လိုက်တာထက် ကျွန်တော့်ကို ပိုချစ်သလား၊ ချစ်တယ်ဆိုရင် ကျွန်တော့်ရဲ့ သိုးကလေးတွေကို ကျွေးမွေးပါ’ ဖြစ်ပုံရတယ်။ ပေတရုရဲ့ နောက်ခံကိုကြည့်ရင် အဲဒီလိုမေးတာ သင့်တော်ပါတယ်။ ပေတရုဟာ ယေရှုရဲ့ ဦးဆုံးတပည့်တစ်ယောက် (ယဟ ၁:၃၅-၄၂) ဖြစ်ပေမဲ့ ယေရှုနောက် ချက်ချင်းပဲ အချိန်ပြည့် လိုက်ခဲ့တာ မဟုတ်ဘူး။ သူ့တံငါလုပ်ငန်းကို ပြန်လုပ်ခဲ့တယ်။ လအတော်ကြာတော့ စီးပွားရေးကောင်းတဲ့ လုပ်ငန်းကို ပစ်ထားပြီး “လူဖမ်းတဲ့ တံငါသည်” ဖြစ်ဖို့ ပေတရုကို ယေရှု ဖိတ်ခေါ်ခဲ့တယ်။ (မ ၄:၁၈-၂၀။ လု ၅:၁-၁၁) နောက်တစ်ခါ၊ ယေရှု သေပြီး မကြာခင်မှာ ပေတရုက ငါးဖမ်းသွားမယ်လို့ ပြောတော့ တခြားတမန်တော်တွေလည်း လိုက်သွားတယ်။ (ယဟ ၂၁:၂၊ ၃) အဲဒါကြောင့် ပြတ်ပြတ်သားသား ရွေးချယ်ဖို့ လိုနေမှန်း ပေတရု သဘောပေါက်အောင် ယေရှု ဒီလိုပြောနေပုံရတယ်– သူတို့ရှေ့ ပုံထားတဲ့ ငါးတွေကို ကိုယ်စားပြုတဲ့ တံငါလုပ်ငန်းကို ရှေ့ဦးထားမလား၊ ယေရှုရဲ့ သိုးကလေးတွေနဲ့တူတဲ့ နောက်လိုက်တွေကို ကျွေးမွေးမယ့်လုပ်ငန်းကို ရှေ့ဦးထားမလား။—ယဟ ၂၁:၄-၈။
တတိယအကြိမ်– ပေတရုက သူ့သခင်ကို သုံးကြိမ် ငြင်းပယ်တယ်။ အခု သူ့ခံစားချက်ကို သုံးကြိမ် ဖော်ပြဖို့ ယေရှု အခွင့်အရေးပေးတယ်။ ပေတရုက ချစ်ပါတယ်လို့ အခိုင်အမာ ပြောတဲ့အခါ ယေရှုက မြင့်မြတ်တဲ့ လုပ်ငန်းကို တခြားအလုပ်တွေထက် ဦးစားထားခြင်းအားဖြင့် အဲဒီမေတ္တာကို ပြသပါလို့ ပြောတယ်။ တာဝန်ရှိတဲ့ တခြားညီအစ်ကိုတွေနဲ့အတူ ပေတရုဟာ ခရစ်တော်ရဲ့ သစ္စာရှိနောက်လိုက်တွေကို ကျွေးမွေး၊ အားပေးထောက်မ၊ ထိန်းကျောင်းပေးရမှာ ဖြစ်တယ်။ သူတို့တွေဟာ ဘိသိက်ခံတွေ ဖြစ်ပေမဲ့ ဘုရားကျွေးတဲ့အစာကို စားဖို့လိုနေတုန်းပဲ။—လု ၂၂:၃၂။
ရှာဖွေလေ့လာ ဘုရားရေးရာရတနာ
(ယောဟန် ၂၀:၁၇) ယေရှုက “ကျွန်တော့်ကို မဆွဲထားနဲ့။ အဖဘုရားဆီ ကျွန်တော် မသွားသေးဘူး။ အခု၊ ညီအစ်ကိုတွေဆီ သွားပြီး ‘ကျွန်တော့်အဖဖြစ်တဲ့ ခင်ဗျားတို့ရဲ့အဖ၊ ကျွန်တော့်ဘုရားသခင်ဖြစ်တဲ့ ခင်ဗျားတို့ရဲ့ ဘုရားသခင်ဆီ ကျွန်တော် သွားရတော့မယ်’ လို့ပြောပေးပါ” ဆိုပြီး မှာတယ်။
nwtsty ယဟ ၂၀:၁၇ လေ့လာမှု မှတ်စု
ကျွန်တော့်ကို မဆွဲထားနဲ့– ဟေပတိုမိုင် ဆိုတဲ့ ဂရိကြိယာဟာ “တို့ထိတာ၊” “ဖက်ထားတာ၊ ဖမ်းဆွဲထားတာ” လို့ အဓိပ္ပာယ်ရှိနိုင်တယ်။ ဘာသာပြန်ကျမ်းတချို့က ယေရှုရဲ့ စကားကို “ကျွန်တော့်ကို မထိနဲ့” လို့ပြန်ဆိုတယ်။ ဒါပေမဲ့ ယေရှုဟာ ရှင်ပြန်ထမြောက်ပြီးနောက် သူ့ကို တွေ့တဲ့ တခြားအမျိုးသမီးတွေက “ခြေထောက်ကို ဖက်ပြီး ဦးညွှတ်ကြ” တာကို မကန့်ကွက်ခဲ့ဘူး။ ဒါကြောင့် မာဂဒလမာရိ တို့ထိရုံတို့ထိတာကို ယေရှု ကန့်ကွက်နေတာ မဖြစ်နိုင်ဘူး။ (မ ၂၈:၉) ယေရှု ကောင်းကင် တက်သွားတော့မှာကို မာဂဒလမာရိ စိုးရိမ်နေပုံပေါက်တယ်။ သခင်နဲ့အတူ ရှိချင်တဲ့ဆန္ဒ ပြင်းပြတဲ့အတွက် ယေရှုကို မလွှတ်ဘဲ ဆွဲထားတာဖြစ်မယ်။ သူ့ကို မဆွဲထားဖို့၊ သူထမြောက်ပြီဆိုတဲ့ သတင်းကို တပည့်တွေဆီ သွားပြောပေးဖို့ မာရိကို မှာကြားတယ်။ ဒီနည်းအားဖြင့် ယေရှုက သူ ကောင်းကင်မတက်သေးဘူးဆိုတာ စိတ်ချစေတယ်။
(ယောဟန် ၂၀:၂၈) သောမက “ကျွန်တော့်သခင်၊ ကျွန်တော့်ဘုရားပါလား” လို့ပြောတယ်။
nwtsty ယဟ ၂၀:၂၈ လေ့လာမှု မှတ်စု
ကျွန်တော့်သခင်၊ ကျွန်တော့်ဘုရား– ယေရှုကို အံ့ဩတကြီး ပြောတာဖြစ်ပေမဲ့ တကယ်တော့ ယေရှုရဲ့ အဖဘုရားသခင်ကို ရည်ညွှန်းတာဖြစ်တယ်လို့ ပညာရှင်တချို့ ယူမှတ်ကြတယ်။ တခြားသူတွေကျတော့ မူရင်းဂရိအရ ယေရှုကို ရည်ညွှန်းနေတာလို့ ဆိုတယ်။ အဲဒီအတိုင်းပဲ ဖြစ်ရင်တောင်မှ “ကျွန်တော့်သခင်၊ ကျွန်တော့်ဘုရား” ဆိုတဲ့ အသုံးအနှုန်းဟာ ဘယ်သူ့ကို ရည်စူးပြောဆိုမှန်း တခြားကျမ်းစာစောင်တွေရဲ့ ရှေ့နောက်စကားကနေ သိနိုင်ပါတယ်။ ယေရှုက တပည့်တွေကို “ကျွန်တော့်အဖဖြစ်တဲ့ ခင်ဗျားတို့ရဲ့အဖ၊ ကျွန်တော့်ဘုရားသခင် ဖြစ်တဲ့ ခင်ဗျားတို့ရဲ့ ဘုရားသခင်ဆီ ကျွန်တော် သွားရတော့မယ်” လို့ အရင်က အသိပေးပြီးဖြစ်ကြောင်း မှတ်တမ်းမှာ ဖော်ပြထားတယ်။ ဒါကြောင့် ယေရှုဟာ အနန္တတန်ခိုးရှင်ဘုရားသခင် ဖြစ်တယ်လို့ သောမ ထင်စရာအကြောင်း မရှိဘူး။ (ယဟ ၂၀:၁၇ လေ့လာမှု မှတ်စုကို ကြည့်။) ယေရှုက သူ့ “အဖ” ကို “တစ်ဆူတည်းသော စစ်မှန်တဲ့ဘုရားသခင်” လို့ခေါ်ပြီး ဆုတောင်းခဲ့တာ သောမ ကြားဖူးတယ်။ (ယဟ ၁၇:၁-၃) ဒါကြောင့် ယေရှုကို သောမက “ကျွန်တော့်ဘုရား” လို့ ခေါ်တာဟာ ဒီလိုသဘောမျိုးနဲ့ ခေါ်တာ ဖြစ်နိုင်တယ်– သူက ယေရှုကို အနန္တတန်ခိုးရှင်ဘုရားသခင်အနေနဲ့ မဟုတ်ဘဲ “ဘုရားတစ်ပါး” အနေနဲ့ ယူမှတ်လို့ ဖြစ်နိုင်တယ်။ (ယဟ ၁:၁ လေ့လာမှု မှတ်စုကို ကြည့်။) ဒါမှမဟုတ် ဟီဘရူးကျမ်းစောင်တွေမှာ မှတ်တမ်းတင်ထားတဲ့ ဘုရားကျေးကျွန်တွေ ယေဟောဝါရဲ့ကောင်းကင်တမန်တွေကို ခေါ်ဆိုခဲ့သလို ယေရှုကို ခေါ်ဆိုတာ ဖြစ်နိုင်တယ်။ ကျမ်းမှတ်တမ်းတချို့မှာ လူတွေ ဒါမှမဟုတ် ကျမ်းရေးသူက ကောင်းကင်တမန်တစ်ပါးကို ယေဟောဝါဘုရားလို့ သဘောထားပြီး တုံ့ပြန်ခဲ့တာ၊ စကားပြောခဲ့တာကို သောမ ကောင်းကောင်းသိခဲ့မယ်။ (က ၁၆:၇-၁၁၊ ၁၃။ ၁၈:၁-၅၊ ၂၂-၃၃။ ၃၂:၂၄-၃၀။ သူ ၆:၁၁-၁၅။ ၁၃:၂၀-၂၂ နဲ့နှိုင်းယှဉ်။) ဒါကြောင့် သောမက ယေရှုကို စစ်မှန်တဲ့ဘုရားရဲ့ ကိုယ်စားလှယ်၊ ပြောရေးဆိုခွင့်ရှိသူအဖြစ် အသိအမှတ်ပြုပြီး “ကျွန်တော့်ဘုရား” လို့ ခေါ်တာ ဖြစ်နိုင်တယ်။
ကျမ်းစာဖတ်ရှုခြင်း
(ယောဟန် ၂၀:၁-၁၈) သီတင်းပတ်ရဲ့ပထမနေ့ မိုးလင်းခါစမှာ မာဂဒလမာရိဟာ သင်္ချိုင်းဂူကို ရောက်လာတဲ့အခါ ဂူဝမှာပိတ်ထားတဲ့ ကျောက်တုံးကို လှိမ့်ဖယ်ထားမှန်း တွေ့လိုက်ရတယ်။ ၂ ဒါကြောင့် ရှိမုန်ပေတရုနဲ့ ယေရှုချစ်တဲ့ တပည့်ဆီ ပြေးသွားပြီး “သခင့်ကို သင်္ချိုင်းဂူထဲကနေ ယူသွားကြပြီ။ ဘယ်မှာထားလိုက်မှန်း မသိဘူး” လို့ပြောတယ်။ ၃ ပေတရုနဲ့ အဲဒီတပည့်လည်း သင်္ချိုင်းဂူရှိရာကို သွားတယ်။ ၄ နှစ်ယောက်သား အတူပြေးသွားပေမဲ့ အဲဒီတပည့်က ပိုအပြေးမြန်လို့ သင်္ချိုင်းဂူကို ပေတရုထက် အရင်ရောက်သွားတယ်။ ၅ ဂူထဲကို ကိုယ်ကိုကိုင်းပြီး ကြည့်လိုက်တဲ့အခါ ပိတ်ထည်တွေကိုပဲ တွေ့တယ်။ အထဲကိုတော့ မဝင်ဘူး။ ၆ အဲဒီနောက် ရှိမုန်ပေတရု ရောက်လာပြီး သင်္ချိုင်းဂူထဲ ဝင်ကြည့်တဲ့အခါ ပိတ်ထည်တွေကို တွေ့တယ်။ ၇ ယေရှုရဲ့ခေါင်းကိုပတ်တဲ့ ပိတ်စနဲ့ ကိုယ်ကိုပတ်တဲ့ ပိတ်ထည်တွေက တစ်နေရာစီမှာ အလိပ်လိုက်ရှိနေတယ်။ ၈ အရင်ရောက်တဲ့ တပည့်လည်း ဂူထဲကို ဝင်ကြည့်လိုက်တော့မှ ယုံသွားတယ်။ ၉ ဒါပေမဲ့ ယေရှုဟာ သေရာကနေ အသက်ပြန်ရှင်လာမယ်ဆိုတဲ့ ကျမ်းစကားကို သူတို့ နားမလည်သေးဘူး။ ၁၀ ဒါကြောင့် အိမ်ကို ပြန်သွားကြတယ်။ ၁၁ မာရိကတော့ ဂူအပြင်မှာ ငိုပြီးကျန်ရစ်ခဲ့တယ်။ ငိုနေရင်းနဲ့ ဂူထဲကို ကိုယ်ကိုကိုင်းပြီး ကြည့်လိုက်တဲ့အခါ၊ ၁၂ ဝတ်လုံဖြူ ဝတ်ဆင်ထားတဲ့ ကောင်းကင်တမန်နှစ်ပါးက အလောင်းထားတဲ့နေရာမှာ ခေါင်းရင်း တစ်ယောက်၊ ခြေရင်း တစ်ယောက် ထိုင်နေတာကို တွေ့ရတယ်။ ၁၃ သူတို့က “ဘာလို့ ငိုနေတာလဲ” ဆိုပြီးမေးတော့ မာရိက “ကျွန်မရဲ့သခင်ကို တစ်ယောက်ယောက် ယူသွားလိုက်ပြီ။ ဘယ်မှာထားမှန်း မသိဘူး” လို့ဖြေတယ်။ ၁၄ အဲဒီလိုဖြေပြီး နောက်လှည့်ကြည့်တဲ့အခါ ယေရှုရပ်နေတာကို မြင်တယ်။ ဒါပေမဲ့ ယေရှုမှန်း မသိဘူး။ ၁၅ ယေရှုက “ဘာလို့ ငိုနေတာလဲ။ ဘယ်သူ့ကို ရှာနေတာလဲ” လို့မေးတော့ မာရိက သူ့ကို ဥယျာဉ်စောင့်အထင်နဲ့ “ဆရာ၊ အလောင်းကို ယူသွားတယ်ဆိုရင် ဘယ်မှာထားသလဲ ပြောပြပါ။ ကျွန်မ ယူသွားမယ်” လို့ပြောတယ်။ ၁၆ ယေရှုက “မာရိ” လို့လည်း ခေါ်လိုက်ရော မာရိ လှည့်ကြည့်ပြီး ဟီဘရူးစကားနဲ့ “ရဗ္ဗုနိ” လို့ထူးလိုက်တယ်။ (ရဗ္ဗုနိဆိုတာ “ဆရာ” လို့ အဓိပ္ပာယ်ရတယ်။) ၁၇ ယေရှုက “ကျွန်တော့်ကို မဆွဲထားနဲ့။ အဖဘုရားဆီ ကျွန်တော် မသွားသေးဘူး။ အခု၊ ညီအစ်ကိုတွေဆီ သွားပြီး ‘ကျွန်တော့်အဖဖြစ်တဲ့ ခင်ဗျားတို့ရဲ့အဖ၊ ကျွန်တော့်ဘုရားသခင်ဖြစ်တဲ့ ခင်ဗျားတို့ရဲ့ ဘုရားသခင်ဆီ ကျွန်တော် သွားရတော့မယ်’ လို့ပြောပေးပါ’ ဆိုပြီး မှာတယ်။ ၁၈ မာဂဒလမာရိက တပည့်တွေဆီ သွားပြီး “သခင့်ကို ကျွန်မ တွေ့လိုက်တယ်” လို့ပြောတယ်။ ယေရှု မှာသမျှကိုလည်း ပြန်ပြောပြတယ်။
နိုဝင်ဘာ ၁၂-၁၈
ကျမ်းစာထဲက အဖိုးတန်ဘဏ္ဍာများ | တမန်တော် ၁-၃
“ခရစ်ယာန်အသင်းတော်အပေါ် သန့်ရှင်းသောစွမ်းအားတော် သွန်းလောင်း”
(တမန်တော် ၂:၁-၈) ပင်တေကုတ္တေပွဲနေ့ ရောက်တဲ့အခါ တပည့်တွေ တစ်နေရာတည်းမှာ စုဝေးနေကြတယ်။ ၂ အဲဒီအချိန်မှာ လေပြင်းတိုက်သလို အသံတစ်သံ ကောင်းကင်ကနေ ရုတ်တရက်ပေါ်လာပြီး သူတို့ထိုင်နေတဲ့ အိမ်တစ်အိမ်လုံး ပျံ့သွားတယ်။ ၃ လျှာသဏ္ဌာန် မီးလျှံတွေလည်း ပေါ်လာတယ်။ မီးလျှံတွေ အဖြာဖြာကွဲပြီး တစ်ယောက်စီရဲ့ခေါင်းပေါ် ရောက်သွားတယ်။ ၄ သူတို့အားလုံး သန့်ရှင်းသော စွမ်းအားတော်နဲ့ပြည့်ပြီး စွမ်းအားတော်က ပြောဆိုနိုင်စွမ်းပေးတဲ့အတိုင်း ဘာသာစကားမျိုးစုံနဲ့ ပြောဆိုကြတော့တယ်။ ၅ အဲဒီအချိန်မှာ ကမ္ဘာ့တိုင်းနိုင်ငံအသီးသီးက ဘုရားတရားကြည်ညိုတဲ့ ဂျူးတွေဟာ ဂျေရုဆလင်မြို့မှာ ရောက်နေကြတယ်။ ၆ အဲဒီအသံကို ကြားတဲ့အခါ လူတွေစုရုံးလာကြတယ်။ ကိုယ့်ဘာသာစကားနဲ့ ပြောဆိုနေတာကို ကြားရလို့ လူအားလုံး အံ့သြကုန်တယ်။ ၇ သူတို့ တအံ့တသြဖြစ်ပြီး “အခုဟောနေကြတာ ဂါလိလဲနယ်သားတွေပဲ။ ၈ ဒါဆို ကျွန်တော်တို့က ဘယ်လိုလုပ်ပြီး ကိုယ့်မိခင်ဘာသာစကားနဲ့ ကြားနေရတာလဲ။
(တမန်တော် ၂:၁၄) အဲဒီအခါ ပေတရုက တမန်တော် ၁၁ ယောက်နဲ့အတူ ရပ်ပြီး အသံကျယ်ကျယ်နဲ့ စဟောတော့တယ်– “ယုဒပြည်သားနဲ့ ဂျေရုဆလင်မြို့သားတို့၊ ကျွန်တော်ပြောတာကို အာရုံစိုက်နားထောင်ကြပါ။
(တမန်တော် ၂:၃၇၊ ၃၈) ဒါကိုကြားတဲ့အခါ လူတွေ စိတ်ပူပန်ပြီး “ညီအစ်ကိုတို့၊ ဒါဆို ကျွန်တော်တို့ ဘာလုပ်ရမလဲ” လို့ ပေတရုနဲ့ ကျန်တဲ့တမန်တော်တွေကို မေးကြတယ်။ ၃၈ ပေတရုက “နောင်တရကြပါ။ ယေရှုခရစ်ရဲ့ နာမည်နဲ့ နှစ်ခြင်းခံကြပါ။ ဒါဆိုရင် အပြစ်တွေ ခွင့်လွှတ်ခံရပြီး သန့်ရှင်းသောစွမ်းအားတော်ဆိုတဲ့ ဆုလက်ဆောင်ကို ရကြလိမ့်မယ်။
(တမန်တော် ၂:၄၁) ပေတရုရဲ့စကားကို ဝမ်းသာအားရ လက်ခံသူတွေ နှစ်ခြင်းခံကြတဲ့အတွက် အဲဒီနေ့မှာ လူ ၃,၀၀၀ လောက် တိုးများလာတယ်။
(တမန်တော် ၂:၄၂-၄၇) သူတို့က တမန်တော်တွေဆီကနေ သင်ယူတာ၊ ရှိတာတွေကို ဝေမျှသုံးစွဲတာ၊ ဝေမျှစားသောက်တာ၊ ဆုတောင်းတာတွေ ဆက်လုပ်ဆောင်နေကြတယ်။ ၄၃ လူတွေက တမန်တော်တွေပြတဲ့ ထူးဆန်းတဲ့အရာတွေ၊ အံ့ဖွယ်အမှုတွေကို မြင်တဲ့အခါ ကြောက်ရွံ့လာကြတယ်။ ၄၄ ယုံကြည်လာသူတွေက အတူစုဝေးပြီး ရှိတာတွေကို ဝေမျှသုံးစွဲကြတယ်။ ၄၅ သူတို့ရဲ့ ပစ္စည်းဥစ္စာတွေ၊ ပိုင်ဆိုင်ရာတွေကို ရောင်းပြီ တစ်ယောက်စီကို လိုအပ်သလို ဝေမျှပေးကြတယ်။ ၄၆ နေ့စဉ်ရက်ဆက် ဗိမာန်တော်မှာ စည်းစည်းလုံးလုံး စုဝေးပြီး သူတို့ရဲ့အိမ်တွေမှာလည်း စိတ်ရင်းစေတနာနဲ့ ဝမ်းသာအားရ ဝေမျှစားသောက်ကြတယ်။ ၄၇ ဘုရားသခင်ကို ချီးမွမ်းကြတယ်။ လူတွေကလည်း သူတို့ကို သဘောကျနှစ်သက်ကြတယ်။ အဲဒီအပြင် ယေဟောဝါက ကယ်တင်ခံရမယ့်သူ အရေအတွက်ကို နေ့တိုင်း တိုးများစေတယ်။
က၈၆-E ၁၂/၁ ၂၉ ပိုဒ်. ၄-၅၊ ၇
စိတ်နှလုံးကို ရွှင်လန်းစေတဲ့ အလှူငွေ
အေဒီ ၃၃၊ ခရစ်ယာန်အသင်းတော် တည်ထောင်တဲ့ ပထမနေ့ရက်မှာ နှစ်ခြင်းခံပြီးခါစ လူ ၃,၀၀၀ ဟာ “ရှိတာတွေကိုဝေမျှသုံးစွဲတာ၊ ဝေမျှစားသောက်တာ၊ဆုတောင်းတာတွေ” လုပ်နေကြတယ်။ ဘာအတွက် အဲဒီလိုလုပ်တာလဲ။ ‘တမန်တော်တွေဆီကနေ ဆက်သင်ယူ’ ပြီး သူတို့ရဲ့ ယုံကြည်ချက်အသစ်ကို ပိုခိုင်မာလာစေဖို့ဖြစ်တယ်။—တမန်တော် ၂:၄၁၊ ၄၂။
ဂျူးတွေနဲ့ ဂျူးဘာသာ ပြောင်းဝင်လာသူတွေဟာ ပင်တေကုတ္တေပွဲ ကျင်းပဖို့အတွက်ပဲ ဂျေရုဆလင်မြို့မှာ ရောက်နေကြတယ်။ ဒါပေမဲ့ ခရစ်ယာန်ဖြစ်လာသူတွေက အဲဒီမှာဆက်နေပြီး သူတို့ရဲ့ ယုံကြည်ချက်အသစ်အကြောင်း ဆက်သင်ယူချင်ကြတယ်။ အဲဒါကြောင့် သူတို့အတွက် နေစရာ၊ စားစရာ အရေးတကြီး လိုအပ်လာတယ်။ ရောက်လာကြတဲ့ ဧည့်သည်တချို့မှာ ငွေ အလုံအလောက် မရှိပေမဲ့ ပိုလျှံသူတွေလည်း ရှိတယ်။ ဒါနဲ့ သူတို့ အတူစုဝေးပြီး ရှိတာတွေကို ဝေမျှသုံးစွဲကြတယ်။—တမန်တော် ၂:၄၃-၄၇။
အိမ်ခြံမြေတွေ၊ ပိုင်ဆိုင်ရာတွေကို ကိုယ့်သဘောနဲ့ကိုယ် ရောင်းချပြီး ဝေမျှသုံးစွဲကြတယ်။ ရောင်းဖို့၊ လှူဖို့ ဘယ်သူ့မှာမှ တာဝန် မရှိဘူး။ ဆင်းဆင်းရဲရဲနေဖို့ အားပေးနေတာမျိုးလည်း မဟုတ်ဘူး။ ပိုချမ်းသာသူတွေက သူတို့ပစ္စည်းတွေ ရောင်းလိုက်လို့ ဆင်းရဲသွားရမယ်ဆိုတဲ့ သဘောမျိုးလည်း မဟုတ်ပါဘူး။ အခြေအနေတွေကြောင့် ယုံကြည်သူချင်းတွေကို စာနာလို့ ပစ္စည်းဥစ္စာတွေကို ရောင်းပြီး နိုင်ငံတော်လုပ်ငန်း တိုးတက်ဖို့ လှူဒါန်းကြတာဖြစ်တယ်။— ၂ ကောရိန္သု ၈:၁၂-၁၅ နဲ့နှိုင်းယှဉ်ပါ။
ရှာဖွေလေ့လာ ဘုရားရေးရာရတနာ
(တမန်တော် ၃:၁၅) ဒီနည်းနဲ့ အသက်ရဲ့ ကိုယ်စားလှယ်ချုပ်ကို ခင်ဗျားတို့ သတ်ပစ်ကြတယ်။ ဒါပေမဲ့ ဘုရားသခင်က သူ့ကို သေရာကနေ အသက်ပြန်ရှင်အောင် လုပ်ပေးလိုက်တာ ကျွန်တော်တို့ မျက်မြင်သက်သေပဲ။
it-2 ၆၁ ပိုဒ်. ၁
ယေရှုခရစ်
“အသက်ရဲ့ ကိုယ်စားလှယ်ချုပ်။” ခရစ်တော်ယေရှုဟာ သူ့အဖရဲ့ မဟာကရုဏာကို ဖော်ပြတဲ့အနေနဲ့ မိမိရဲ့ စုံလင်တဲ့ လူ့အသက်ကို ပူဇော်သက္ကာအဖြစ် ပေးဆက်ခဲ့တယ်။ ယေရှုရဲ့ ပူဇော်သက္ကာကြောင့် ရွေးချယ်ခံထားရတဲ့ နောက်လိုက်တွေဟာ ကောင်းကင်မှာ ခရစ်တော်နဲ့အတူ အုပ်စိုးခွင့်ရကြမယ်။ အဲဒီအပြင် ခရစ်တော်ရဲ့ နိုင်ငံတော်အုပ်ချုပ်မှုအောက် မြေကြီးပေါ်မှာ လူသားတွေ နေထိုင်ခွင့် ရကြမယ်။ (မ ၆:၁၀။ ယဟ ၃:၁၆။ ဧ ၁:၇။ ဟီ ၂:၅။ ရွေးဖိုး ကိုကြည့်ပါ။) ဒီလိုနည်းနဲ့ ယေရှုဟာ လူအားလုံးအတွက် “အသက်ရဲ့ ကိုယ်စားလှယ်ချုပ်” ဖြစ်လာတယ်။ (တ ၃:၁၅) ဒီနေရာမှာ သုံးထားတဲ့ ဂရိအသုံးအနှုန်းက အစ္စရေးရဲ့ “ခေါင်းဆောင်” မောရှေနဲ့ သက်ဆိုင်ပြီး (တ ၇:၂၇၊ ၃၅) “ခေါင်းဆောင်ချုပ်” လို့ အဓိပ္ပာယ်ရတယ်။
(တမန်တော် ၃:၁၉) “ဒါကြောင့် ခင်ဗျားတို့ရဲ့အပြစ်တွေကို ပယ်ဖျက်စေချင်တယ်ဆိုရင် နောင်တရကြပါ။ ဘုရားသခင်ဆီ ပြန်လှည့်လာကြပါ။ ဒါဆိုရင် ယေဟောဝါ ဘုရားဆီက လန်းဆန်းစေတဲ့အချိန်ကာလ ရောက်လာမယ်။
“ခွင့်လွှတ်ရန် အသင့်ရှိ” တော်မူသောဘုရားသခင်
၁၄ တမန်တော် ၃:၁၉ (သမ) တွင် ယေဟောဝါ၏ခွင့်လွှတ်မှုကို ဤသို့ထပ်၍ဖော်ပြသည်– “သင်တို့အပြစ်ဒုစရိုက်များပပျောက်စေရန် နောင်တရ၍ ပြောင်းလဲကြလော့။” ဂရိကြိယာမှပြန်ဆိုထားသော ထိုစကားစုမှာ “သုတ်ပစ်ရန် ... ပယ်ဖျက် သို့မဟုတ် ဖျက်ဆီး” ဟု အဓိပ္ပာယ်သက်ရောက်နိုင်သည်။ ကျမ်းပညာရှင်အချို့က ထိုဥပစာစကားသည် လက်ရေးစာကို ဖျက်လိုက်ခြင်းအား စိတ်ကူးတွင် မြင်ယောင်စေသည်ဟု ဆို၏။ မည်သို့ဖြစ်နိုင်မည်နည်း။ ရှေးအချိန်က အများအားဖြင့် အသုံးပြုကြသော မင်ကို ကာဗွန်၊ သစ်စေးနှင့် ရေတို့ဖြင့် ဖော်စပ်ထားလေ့ရှိသည်။ ထိုမင်ဖြင့်ရေးသားပြီး မကြာမီပင် စိုနေသောရေမြှုပ်ဖြင့် စာကို ဖျက်ပစ်နိုင်သည်။ ယင်းသည် ယေဟောဝါ၏ကရုဏာဆိုင်ရာ လှပသောပုံဖော်ချက်ပင်။ ကိုယ်တော်ခွင့်လွှတ်တော်မူသောအခါ ရေမြှုပ်ကိုယူ၍ ကျွန်ုပ်တို့၏အပြစ်များကို ဖျက်ပစ်လိုက်ဘိသကဲ့သို့ ဖြစ်သည်။
it-1 ၁၂၉ ပိုဒ်. ၂-၃
ဆယ့်နှစ်ယောက်မြောက် တမန်တော်အဖြစ် ယုဒရှကာရုတ်နေရာမှာ ဘယ်သူ့ကို အစားထိုးသလဲ။
ယုဒရှကာရုတ် သစ္စာဖောက်ပြီး သေသွားလို့ တမန်တော် ၁၁ ပါးပဲ ကျန်တော့တယ်။ ယေရှု ထမြောက်ပြီး ကောင်းကင်မတက်ခင် ရက်ပေါင်း ၄၀ အတွင်းမှာ အစားထိုးမယ့်သူကို မခန့်အပ်ခဲ့ဘူး။ ယေရှု ကောင်းကင်တက်သွားတဲ့နေ့ကစပြီး ပင်တေကုတ္တေပွဲနေ့ မတိုင်ခင် ဆယ်ရက်အတွင်းမှာ တစ်ယောက်ယောက်ကို ယုဒနေရာမှာ အစားထိုးဖို့လိုတယ်လို့ ယူဆခဲ့ကြတယ်။ ဒီလိုယူဆတာက ယုဒ သေသွားလို့မဟုတ်ဘဲ ပေတရု ကိုးကားခဲ့တဲ့ ကျမ်းချက်တွေအတိုင်း ယေရှုကို သစ္စာဖောက်ပြီး စွန့်ခွာခဲ့လို့ပါ။ (တ ၁:၁၅-၂၂။ ဆ ၆၉: ၂၅။ ၁၀၉: ၈။ ဗ ၃:၁၁ နဲ့နှိုင်းယှဉ်ပါ။) ဒါပေမဲ့ သစ္စာရှိတဲ့ တမန်တော်ယာကုပ် အသတ်ခံရတဲ့အခါမှာတော့ သူ့ရဲ့ တမန်တော်အရာ ဆက်ခံဖို့ တစ်ဦးတစ်ယောက်ကို ရွေးစရာအကြောင်း မရှိဘူး။—တ ၁၂:၂။
ပေတရု ပြောခဲ့တာတွေကို ကြည့်ခြင်းအားဖြင့် ယေရှုခရစ်ရဲ့ တမန်တော်အရာကို ဆက်ခံမယ့်သူဟာ ယေရှုနဲ့ ရင်းနှီးကျွမ်းဝင်ခဲ့ဖူးသူ၊ ယေရှုရဲ့ လုပ်ဆောင်မှုတွေ၊ အံ့ဖွယ်အမှုတွေနဲ့ အထူးသဖြင့် ယေရှု ရှင်ပြန်ထမြောက်တာကို မြင်တွေ့ခဲ့တဲ့ မျက်မြင်သက်သေတစ်ဦး ဖြစ်ဖို့လိုတဲ့အကြောင်း ဆွေးနွေးခဲ့ပုံရတယ်။ အဲဒီအချက်အရ နောက်ပိုင်းမှာ တမန်တော်အရာကို ဆက်ခံနိုင်မယ့်သူ ရှိမှာ မဟုတ်ဘူးဆိုတာ သိရတယ်။ အဖြစ်အပျက်တစ်ခုစီအတွက် လိုအပ်တဲ့ အရည်အချင်းတွေကို ဘုရားဖြည့်စွက်ပေးမှသာ ဖြစ်နိုင်ပါလိမ့်မယ်။ ဒါပေမဲ့ ပင်တေကုတ္တေပွဲနေ့ မတိုင်ခင်မှာတော့ လိုအပ်တဲ့အရည်အချင်း ပြည့်မီသူတွေ ရှိတယ်။ ဒါနဲ့ သစ္စာဖောက် ယုဒနေရာမှာ အစားထိုးနိုင်သူ နှစ်ယောက်ကို အဆိုပြုကြတယ်။ အဲဒီနောက် ပညာအလိမ္မာ ၁၆:၃၃ အရ မဲချပြီး မဿိကို ရွေးလိုက်တယ်။ ဒီအခါ “သူက ကျန်တဲ့ ၁၁ ယောက်နဲ့အတူ တမန်တော်ဖြစ်ခွင့် ရသွားတယ်။” (တ ၁:၂၃-၂၆) ဒါကြောင့် ဂရိစကားပြောတဲ့ တပည့်တွေရဲ့ ပြဿနာ ဖြေရှင်းခဲ့တဲ့ တမန်တော် ၁၂ ယောက်ထဲမှာ သူလည်း ပါဝင်တယ်။ (တ ၆:၁၊ ၂) ယေရှု ထမြောက်ပြီးနောက် ကိုယ်ထင်ပြတာကို “တမန်တော် ၁၂ ယောက်” မြင်ခဲ့ရတဲ့အကြောင်း ၁ ကောရိန္သု ၁၅:၄-၈ မှာ ပေါလု ရေးခဲ့တယ်။ အဲဒီ ၁၂ ယောက်ထဲမှာ မဿိလည်း ပါတယ်။ ဒါကြောင့် ပင်တေကုတ္တေပွဲနေ့မှာ ဘုရားသခင့်အစ္စရေးလူမျိုးကို ဖွဲ့စည်းတဲ့အခါ တမန်တော် ၁၂ ပါးအပေါ် အုတ်မြစ်ချနိုင်ခဲ့တယ်။
နိုဝင်ဘာ ၁၉-၂၅
ကျမ်းစာထဲက အဖိုးတန်ဘဏ္ဍာများ | တမန်တော် ၄-၅
“ဘုရားသခင်ရဲ့ စကားတော်ကို သူတို့ ရဲရဲရင့်ရင့် ဆက်ဟောပြောကြ”
(တမန်တော် ၄:၅-၁၃) နောက်တစ်နေ့ ရောက်တော့ ဂျေရုဆလင်မြို့မှာ ခေါင်းဆောင်တွေ၊ အကြီးအကဲတွေ၊ ကျမ်းတတ်တွေ စုဝေးကြတယ်။ ၆ ပုရောဟိတ်မင်း အန္နတ်၊ ကယာဖ၊ ယောဟန်၊ အလက်ဇန္ဒားနဲ့ ပုရောဟိတ်မင်းရဲ့ ဆွေမျိုးတွေလည်း ပါတယ်။ ၇ ပေတရုနဲ့ ယောဟန်ကို အလယ်မှာ ရပ်ခိုင်းပြီး “မင်းတို့က ဘယ်သူ့အခွင့်အာဏာနဲ့၊ ဘယ်သူ့နာမည်နဲ့ အခုလိုလုပ်တာလဲ” လို့ စစ်ဆေးမေးမြန်းကြတယ်။ ၈ အဲဒီအခါ သန့်ရှင်းသောစွမ်းအားတော် ပြည့်နေတဲ့ ပေတရုက– “ခေါင်းဆောင်နဲ့ အကြီးအကဲများခင်ဗျာ၊ ၉ ခြေမသန်တဲ့သူကို ကူညီပေးလိုက်တဲ့အကြောင်း၊ သူပြန်ကောင်းသွားအောင် ဘယ်သူ လုပ်ပေးလိုက်တဲ့အကြောင်း သိချင်တယ်ဆိုရင် ကျွန်တော်တို့ အစစ်ဆေးခံပါမယ်။ ၁၀ ဒီလူ အခုလို ကျန်းကျန်းမာမာနဲ့ ရပ်နေတာဟာ နာဇရက်မြို့သား ယေရှုခရစ်ရဲ့ အခွင့်အာဏာကြောင့်၊ အဲဒီယေရှုကြောင့်ပဲဆိုတာ ခင်ဗျားတို့ကိုရော အစ္စရေးအားလုံးကိုပါ အသိပေးပါတယ်။ အဲဒီယေရှုကို ခင်ဗျားတို့ သစ်တိုင်တင်ပြီး ကွပ်မျက်လိုက်ပေမဲ့ ဘုရားသခင်က သေရာကနေ အသက်ပြန်ရှင်လာအောင် လုပ်ပေးလိုက်ပြီ။ ၁၁ ‘တိုက်ကို တည်ဆောက်တဲ့ ခင်ဗျားတို့ အရေးမလုပ်ပေမဲ့ ထိပ်ဆုံးက ထောင့်ချုပ်ကျောက်’ ဖြစ်လာတာ သူပဲ။ ၁၂ အဲဒီအပြင် သူကလွဲလို့ ဘယ်သူမှ ကျွန်တော်တို့ကို မကယ်တင်နိုင်ဘူး။ ဘာလို့လဲဆိုတော့ ကျွန်တော်တို့ကို ကယ်တင်ဖို့ ကမ္ဘာပေါ်မှာ ဘုရားသခင် ရွေးချယ်ထားတာ သူ့နာမည်ပဲရှိတယ်။ တခြားနာမည် မရှိဘူး” လို့ပြောလိုက်တယ်။ ၁၃ ပေတရုနဲ့ ယောဟန်ဟာ ပညာမတတ်သူတွေ၊ သာမန်လူတွေဖြစ်လျက်နဲ့ အဲဒီလို ဘွင်းဘွင်းရှင်းရှင်း ပြောတာကို သူတို့မြင်တဲ့အခါ အံ့သြသွားကြတယ်။ ဒီတမန်တော်နှစ်ယောက် ယေရှုနဲ့အတူ ရှိခဲ့ဖူးလို့ပဲဆိုတာ သူတို့ သဘောပေါက်သွားကြတယ်။
က၀၈ ၉/၁ ၁၅ လေးထောင့်ကွက်
နှုတ်ဖြင့်ပြောဆိုသော စကားလုံးများမှ မြင့်မြတ်သောကျမ်းစာသို့—အရေးအသားနှင့် အစောပိုင်းခရစ်ယာန်များ
တမန်တော်များသည် ပညာမတတ်သူများဖြစ်သလော
ယေရုရှလင်ရှိ မင်းအရာရှိများနှင့် လူအကြီးအကဲများသည် “ပေတရုနှင့် ယောဟန်တို့၏ ရဲရင့်ခြင်းသတ္တိကို မြင်၍ လူတတ်မဟုတ်၊ လူသာမညသာဖြစ်သည်ကို သိမှတ်သဖြင့် အံ့ဩ၍နေကြ၏။” (တမန်တော် ၄:၁၃) တမန်တော်များသည် အမှန်တကယ် ပညာမတတ်သူများလော။ ယင်း ထင်မြင်ချက်နှင့်ပတ်သက်၍ ကျမ်းစာတစ်အုပ် (The New Interpreter’s Bible) က ဤသို့မှတ်ချက်ချသည်– “ထိုအသုံးအနှုန်းများကြောင့် ပေတရု [နှင့်ယောဟန်] သည် အမှန်တကယ် ကျောင်းမနေရသူ၊ မရေးတတ်၊ မဖတ်တတ်သူများဖြစ်သည်ဟု ယူမှတ်၍မရနိုင်ပေ။ ထိုအသုံးအနှုန်းများက တမန်တော်များ၏ အခြေအနေသည် သူတို့ကိုစီရင်ရန် တရားရုံးတွင်ထိုင်နေသူများ၏ အခြေအနေနှင့် အလွန်ကွာခြားကြောင်း ဖော်ပြနေခြင်းသာဖြစ်သည်။”
တမန်တော်ကျမ်းမှ ပေါ်လွင်ချက်များ
၄:၁၃—ပေတရုနှင့် ယောဟန်သည် စာမတတ် သို့မဟုတ် ပညာမတတ်သူများလော။ မဟုတ်ပါ။ ဘာသာရေးလေ့ကျင့်မှုအတွက် ရဗ္ဗိကျောင်းများ မတက်ရောက်ခဲ့ကြသောကြောင့် သူတို့ကို “လူတတ်မဟုတ်၊ လူသာမည” ဟု ခေါ်ကြခြင်းဖြစ်သည်။
(တမန်တော် ၄:၁၈-၂၀) အဲဒီနောက် သူတို့က တမန်တော်တွေကို ပြန်ခေါ်လိုက်တယ်။ ယေရှုရဲ့နာမည်ကို အမှီပြုပြီး လုံးဝ မဟောပြောဖို့၊ မသွန်သင်ဖို့ အမိန့်ပေးတယ်။ ၁၉ အဲဒီအခါ ပေတရုနဲ့ ယောဟန်က “ဘုရားသခင့်စကားထက် ခင်ဗျားတို့ရဲ့စကားကို နားထောင်မယ်ဆိုရင် ဘုရားသခင်ရှေ့မှာ မှန်ကန်ပါ့မလားဆိုတာ ခင်ဗျားတို့ကိုယ်တိုင်ပဲ ဆုံးဖြတ်ကြပါတော့။ ၂၀ ကျွန်တော်တို့ကတော့ ကြားခဲ့မြင်ခဲ့တာတွေကို မဟောဘဲ မနေနိုင်ပါဘူး” လို့ပြန်ပြောလိုက်တယ်။”
(တမန်တော် ၄:၂၃-၃၁) ပေတရုနဲ့ယောဟန်က ပြန်လွတ်လာတဲ့အခါ ယုံကြည်သူချင်းတွေဆီ သွားပြီး ပုရောဟိတ်မင်းတွေ၊ အကြီးအကဲတွေ ပြောဆိုသမျှ ပြန်ပြောပြကြတယ်။ ၂၄ ဒီသတင်းကို ကြားတဲ့အခါ ဘုရားသခင်ဆီ သူတို့ တညီတညွတ်တည်း ဆုတောင်းကြတယ်။ “အချုပ်အခြာအာဏာပိုင်ရှင်၊ ကိုယ်တော်ဟာ ကောင်းကင်၊ မြေကြီး၊ သမုဒ္ဒရာနဲ့ အဲဒီမှာ ရှိရှိသမျှကို ဖန်ဆင်းတဲ့အရှင်ပါ။ ၂၅ ကိုယ်တော်က သန့်ရှင်းသော စွမ်းအားတော်ကိုသုံးပြီး ကိုယ်တော့်ကျွန် ဘိုးဘေးဒါဝိဒ်ကတစ်ဆင့် ‘လူမျိုးတွေ ဘာလို့ ဆူပူအုံကြွနေတာလဲ၊ လူတွေက အကျိုးမရှိတဲ့အရာကို ဘာလို့ တွေးတောကြံစည်နေတာလဲ။ ၂၆ ယေဟောဝါနဲ့ ကိုယ်တော် ဘိသိက်ပေးထားသူကို ဆန့်ကျင်ဖို့ ကမ္ဘာပေါ်က ဘုရင်တွေ၊ အုပ်စိုးရှင်တွေ စုဝေးနေတယ်’ ဆိုပြီး ပြောခဲ့ပါတယ်။ ၂၇ ကိုယ်တော် ဘိသိက်ပေးထားတဲ့ သန့်ရှင်းတဲ့ကျွန် ယေရှုကို ဆန့်ကျင်ဖို့ ဟေရုဒ်မင်း၊ ပုန္တိပိလတ်မင်းတို့က လူမျိုးခြားတွေ၊ အစ္စရေးတွေနဲ့အတူ ဒီမြို့မှာ စုဝေးကြပါပြီ။ ၂၈ ကိုယ်တော် ကြိုပြောထားတဲ့အတိုင်း လုပ်ဆောင်ဖို့ သူတို့စုဝေးနေကြတာပါ။ တန်ခိုးတော်ကြောင့်၊ အလိုတော်ကြောင့် အခုလို ဖြစ်ပျက်လာတာပါ။ ၂၉ ယေဟောဝါဘုရား၊ သူတို့ရဲ့ ခြိမ်းခြောက်စကားကို ကြားလှည့်ပါ။ တရားစကားတော်ကို ရဲရဲရင့်ရင့် ဟောပြောနိုင်ခွင့် ပေးသနားပါ။ ၃၀ အနာရောဂါတွေ ပျောက်ကင်းစေဖို့ တန်ခိုးတော်ကို ဆက်ပြီးပြပေးပါ။ သန့်ရှင်းတဲ့ကျွန်ဖြစ်သူ ယေရှုရဲ့နာမည်ကို သုံးပြီး အံ့ဖွယ်အမှုတွေ၊ ထူးဆန်းတဲ့အရာတွေကို ဆက်လုပ်ဆောင်ခွင့်ပေးပါ” လို့ ဆုတောင်းကြတယ်။ ၃၁ အဲဒီလို တိုးလျှိုးအသနားခံပြီးတဲ့အခါ သူတို့စုဝေးတဲ့နေရာ တုန်လှုပ်သွားတယ်။ သူတို့အားလုံး သန့်ရှင်းသော စွမ်းအားတော်နဲ့ပြည့်ပြီး ဘုရားသခင်ရဲ့ တရားစကားတော်ကို ရဲရဲရင့်ရင့် ဆက်ဟောပြောကြတယ်။
it-1 ၁၂၈ ပိုဒ်. ၃
တမန်တော်
ခရစ်ယာန်အသင်းတော်အတွင်း လှုပ်ရှားမှု။ ပင်တေကုတ္တေပွဲနေ့မှာ သန့်ရှင်းသောစွမ်းအားတော် သွန်းလောင်းခံရလို့ တမန်တော်တွေ အလွန်အားရှိလာတယ်။ ဘာသာရေးခေါင်းဆောင်တွေက သတ်ပစ်မယ်လို့ ခြိမ်းခြောက်၊ ထောင်ချ၊ ရိုက်နှက်ပေမဲ့ တမန်တော်တွေဟာ ယေရှုရဲ့ထမြောက်ခြင်းအကြောင်း သတင်းကောင်းကို ရဲရဲရင့်ရင့် ဟောပြောတယ်လို့ တမန်တော်ကျမ်းရဲ့ ပထမငါးကျမ်းက သက်သေထူတယ်။ ပင်တေကုတ္တေပွဲပြီးနောက် ရက်အနည်းငယ်အတွင်းမှာ တမန်တော်တွေဟာ သန့်ရှင်းသော စွမ်းအားတော်တန်ခိုး လွှမ်းမိုးခံရပြီး တက်တက်ကြွကြွ ဦးဆောင်ဟောပြောကြလို့ ခရစ်ယာန်အသင်းတော်ဟာ တိုးပွားလာတယ်။ (တ ၂:၄၁။ ၄:၄) ဦးဆုံး ဂျေရုဆလင်မြို့မှာ ဇောက်ချအမှုဆောင်ပြီးနောက် ရှမာရိမြို့ကို တိုးချဲ့သွားကြတယ်။ အတန်ကြာတော့ အဲဒီအချိန်က သိခဲ့တဲ့ တစ်လောကလုံးကို သတင်းတရား ပျံ့သွားတယ်။—တ ၅:၄၂။ ၆:၇။ ၈:၅-၁၇၊ ၂၅။ ၁:၈။
ရှာဖွေလေ့လာ ဘုရားရေးရာရတနာ
(တမန်တော် ၄:၁၁) ‘တိုက်ကို တည်ဆောက်တဲ့ ခင်ဗျားတို့ အရေးမလုပ်ပေမဲ့ ထိပ်ဆုံးက ထောင့်ချုပ်ကျောက်’ ဖြစ်လာတာ သူပဲ။
it-1 ၅၁၄ ပိုဒ်. ၄
ထောင့်ချုပ်ကျောက်
တိုက်ကို တည်ဆောက်သူတွေ ပယ်ထားတဲ့ ကျောက်ဟာ “ထိပ်ဆုံးက ထောင့်ချုပ်ကျောက်” (ဟီဘရူး၊ ရို့ရှ် ပင်နား) ဖြစ်လာပြီလို့ ဆာလံ ၁၁၈:၂၂ မှာ ဖော်ပြတယ်။ ယေရှုက ဒီပရောဖက်ပြုချက်ကို ကိုးကားပြီး သူကိုယ်တိုင် “ထိပ်ဆုံးက ထောင့်ချုပ်ကျောက်” (ဂရိ၊ ကေဖာလေဂိုနိုင်အဲစ်၊ ထိပ်ဆုံးကကျောက်) ဖြစ်တယ်လို့ ပြောတယ်။ (မ ၂၁:၄၂။ မာ ၁၂:၁၀၊ ၁၁။ လု ၂၀:၁၇) အဆောက်အဦရဲ့ ထိပ်ဆုံးကကျောက်ဟာ သိသာမြင်သာတဲ့ ကျောက်ဖြစ်သလို ယေရှုခရစ်ဟာ ပုံဆောင် ဗိမာန်တော်ကို ပုံခိုင်းတဲ့ ဘိသိက်ခံတွေရဲ့ ခရစ်ယာန်အသင်းတော် အထွတ်အဖျားကကျောက် ဖြစ်တယ်။ ဆာလံ ၁၁၈:၂၂ ဟာ ခရစ်တော်နဲ့ သက်ဆိုင်တယ်၊ သူဟာ လူတွေပယ်ထားတဲ့ “ကျောက်” ဖြစ်ပေမဲ့ ဘုရားက သူ့ကို “ထိပ်ဆုံးက ထောင့်ချုပ်ကျောက်” ဖြစ်ဖို့ ရွေးချယ်တယ်လို့လည်း ပေတရု ဖော်ပြတယ်။—တ ၄:၈-၁၂။ ၁ပ ၂:၄-၇ ကိုလည်း ကြည့်ပါ။
(တမန်တော် ၅:၁) အာနနိနဲ့ ဇနီးရှဖိရေတို့ဟာ မြေကွက်တစ်ပိုင်းကို ရောင်းလိုက်တယ်။
လိမ်ပြောခဲ့တဲ့ ပေတရုနဲ့ အာနနိဆီကနေ ဘာသင်ခန်းစာ ယူနိုင်မလဲ
အာနနိနဲ့ ရှဖိရေတို့ကလည်း နှစ်ခြင်းခံခါစသူတွေကို ကူညီပေးဖို့ သူတို့ရဲ့မြေကွက်ကို ရောင်းချခဲ့ကြတယ်။ အာနနိဟာ တမန်တော်တွေရှေ့ ငွေတွေကို ယူလာပြီး အဲဒီငွေတွေက မြေကွက်ရောင်းရတဲ့ငွေ အကုန်ပဲလို့ ပြောပြတယ်။ တကယ်တော့ မဟုတ်ပါဘူး။ သူ့အတွက် ငွေတချို့ကို သိမ်းထားတယ်ကွဲ့။ ဒီအကြောင်းကို ဘုရားသခင်က ပေတရုကို ပေးသိလိုက်တယ်။ ဒါနဲ့ ပေတရုက ‘အာနနိ၊ သင်သည် လူကို လိမ်သည်မဟုတ်၊ ဘုရားသခင်ကို လိမ်’ နေပြီလို့ ပြောလိုက်တယ်။ အဲဒီအချိန်မှာပဲ အာနနိ လဲကျသေဆုံးသွားတယ်။ နောက်သုံးနာရီလောက်မှာ သူ့ဇနီး ရှဖိရေ ရောက်လာတယ်။ အာနနိ ဘာဖြစ်သွားသလဲဆိုတာကို သူ့ခမျာ မသိရှာဘူး။ သူလည်းပဲ လိမ်ပြောတဲ့အတွက် လဲကျပြီး သေဆုံးသွားတယ်ကွဲ့။
ကျမ်းစာဖတ်ရှုခြင်း
(တမန်တော် ၅:၂၇-၄၂) သူတို့ကို ခေါ်လာပြီးနောက် ဂျူးတရားရုံးချုပ်ခန်းမမှာ မတ်တတ်ရပ်ခိုင်းကြတယ်။ အဲဒီနောက် ပုရောဟိတ်မင်းက စစ်ကြောမေးမြန်းတော့တယ်– ၂၈ “အဲဒီနာမည်ကို အမှီပြုပြီး မသွန်သင်ဖို့ မင်းတို့ကို တင်းတင်းကျပ်ကျပ် အမိန့်ထုတ်ထားလျက်နဲ့ ဂျေရုဆလင်တစ်မြို့လုံးကို မင်းတို့ရဲ့သွန်သင်ချက် ပြည့်နေအောင် လုပ်လိုက်ကြပြီ။ အဲဒီလူသေရတာ ငါတို့ကြောင့်ဆိုပြီး မင်းတို့ အပြစ်တင်ချင်နေတာလား” လို့ မေးတယ်။ ၂၉ ပေတရုနဲ့ တခြားတမန်တော်တွေက “ကျွန်တော်တို့ကတော့ လူ့စကားထက် အုပ်စိုးရှင် ဘုရားသခင်ရဲ့ စကားကို နားထောင်မှာပဲ။ ၃၀ ခင်ဗျားတို့ သစ်တိုင်ပေါ်တင်ပြီး ကွပ်မျက်ခဲ့တဲ့ ယေရှုကို ဘိုးဘေးတို့ရဲ့ ဘုရားသခင်က အသက်ပြန်ရှင်စေပြီ။ ၃၁ အစ္စရေးတွေ နောင်တရဖို့၊ အပြစ်တွေ ခွင့်လွှတ်ခံရဖို့ သူ့ကို ကိုယ်စားလှယ်ချုပ်နဲ့ ကယ်တင်ရှင်အဖြစ် လက်ယာဘက်မှာ ဘုရားသခင် ချီးမြှောက်လိုက်ပြီ။ ၃၂ ဒါတွေနဲ့ပတ်သက်ပြီး ကျွန်တော်တို့ဟာ မျက်မြင်သက်သေတွေပါ။ ဘုရားသခင်ကို အုပ်စိုးရှင်အဖြစ် နာခံသူတွေကို ပေးသနားထားတဲ့ သန့်ရှင်းသော စွမ်းအားတော်လည်း သက်သေပါပဲ” လို့ပြန်ဖြေတယ်။ ၃၃ အဲဒီစကားကို ကြားတော့ သူတို့ ဒေါသပေါက်ကွဲပြီး တမန်တော်တွေကို သတ်ပစ်ချင်ကြတယ်။ ၃၄ အဲဒီအခါ ဂါမလျေလလို့ခေါ်တဲ့ ဖာရိရှဲက ဂျူးတရားရုံးချုပ်မှာ ထရပ်ပြီး တမန်တော်တွေကို အပြင် ခဏခေါ်ထုတ်သွားဖို့ အမိန့်ပေးတယ်။ သူဟာ လူအများ ရိုသေလေးစားကြတဲ့ ပညတ်ကျမ်းဆရာ တစ်ယောက်ပဲ။ ၃၅ အဲဒီနောက် သူက “အစ္စရေးတို့၊ ဒီလူတွေနဲ့ပတ်သက်ပြီး ခင်ဗျားတို့ ကြံစည်နေတာကို သတိထားကြပါ။ ၃၆ ဥပမာ၊ အရင်တုန်းက သုဒဆိုတဲ့ လူတစ်ယောက် ပေါ်လာပြီး သူ့ကိုယ်သူ အရေးပါသူလို့ ပြောတော့ လူ ၄၀၀ လောက် သူ့နောက်ပါသွားတယ်။ ဒါပေမဲ့ သူ ကွပ်မျက်ခံရတဲ့အတွက် သူ့နောက်လိုက်တွေလည်း တကွဲတပြားဖြစ်ပြီး ပျောက်သွားကြတယ်။ ၃၇ အဲဒီနောက် နာမည်စာရင်း ကောက်ချိန်မှာ ဂါလိလဲနယ်သား ယုဒလည်း ပုန်ကန်ထကြွပြီး လူတွေကို စည်းရုံးခဲ့တယ်။ နောက်တော့ အဲဒီလူလည်း သေသွားပြီး သူ့နောက်လိုက်အားလုံး တကွဲတပြား ဖြစ်ကုန်တာပဲ။ ၃၈ ဒါကြောင့် လက်ရှိအနေအထားအရ သူတို့ကို မနှောင့်ယှက်ဘဲ ဒီအတိုင်း လွှတ်ထားလိုက်ပါလို့ ကျုပ်ပြောချင်တယ်။ ဘာလို့လဲဆိုတော့ ဒီအစီအစဉ်၊ ဒီလုပ်ဆောင်မှုဟာ လူ့အစီအစဉ်၊ လူ့လုပ်ဆောင်မှုဆိုရင် ပျက်စီးမှာပဲ။ ၃၉ ဘုရားရဲ့အစီအစဉ်၊ ဘုရားရဲ့လုပ်ဆောင်မှုဆိုရင်တော့ သူတို့ကို ခင်ဗျားတို့ ဖျက်ဆီးနိုင်မှာ မဟုတ်ဘူး။ တော်ကြာ ဘုရားသခင်ကို ဆန့်ကျင်တိုက်ခိုက်ရာ ရောက်နေဦးမယ်” လို့ သတိပေးတယ်။ ၄၀ ဒါနဲ့ သူအကြံပေးတာကို လက်ခံပြီး တမန်တော်တွေကို ပြန်ခေါ်လိုက်တယ်။ သူတို့ကို ရိုက်နှက်ပြီးနောက် ယေရှုရဲ့နာမည်ကို အမှီပြုပြီး မဟောပြောဖို့ အမိန့်ပေးတယ်။ အဲဒီနောက် သူတို့ကို လွှတ်ပေးလိုက်တယ်။ ၄၁ တမန်တော်တွေလည်း ယေရှုရဲ့နာမည်ကြောင့် အရှက်ခွဲခံရတာကို ဂုဏ်ယူစရာအဖြစ် ယူမှတ်ပြီး ဂျူးတရားရုံးချုပ်ကနေ ဝမ်းမြောက်ဝမ်းသာ ထွက်သွားကြတယ်။ ၄၂ အဲဒီနောက် ယေရှုလို့ခေါ်တဲ့ ခရစ်တော်အကြောင်း သတင်းကောင်းကို ဗိမာန်တော်မှာသာမက တစ်အိမ်ပြီးတစ်အိမ်သွားပြီး နေ့စဉ်မပြတ် သွန်သင်ဟောပြောကြတယ်။
နိုဝင်ဘာ ၂၆–ဒီဇင်ဘာ ၂
ကျမ်းစာထဲက အဖိုးတန်ဘဏ္ဍာများ | တမန်တော် ၆-၈
“ခရစ်ယာန် အသင်းတော်သစ် စမ်းသပ်ခံရ”
(တမန်တော် ၆:၁) အဲဒီအချိန်မှာ တပည့်တွေ တစ်နေ့ တခြား တိုးများလာတယ်။ တစ်ကြိမ်မှာ ဂရိစကားပြောတဲ့ ဂျူးတွေက သူတို့ထဲကမုဆိုးမတွေ နေ့စဉ်အစာခွဲတမ်း မရတဲ့အတွက် ဟီဘရူးစကားပြောတဲ့ ဂျူးတွေကို အပြစ်တင်ကြတယ်။
‘ငါတို့သည် ဘုရားသခင်၏စကားကို နားထောင်ရမည်’
၁၇ ယခု အသင်းတော်သစ်သည် ကိုင်တွယ်ရခက်သော အတွင်းပြဿနာတစ်ခုကြောင့် စိုးရိမ်ဖွယ်ဖြစ်နေ၏။ ၎င်းမှာအဘယ်နည်း။ နှစ်ခြင်းခံပြီးသော တပည့်အများစုမှာ ဂျေရုဆလင်မြို့တွင် ဧည့်သည်များဖြစ်ကြသည်။ သူတို့သည် မိမိတို့မြို့ရွာသို့မပြန်မီ ပို၍သင်ယူလိုကြသည်။ ထို့ကြောင့် ဂျေရုဆလင်မြို့တွင်နေထိုင်သော တပည့်များသည် အစားအစာနှင့် အခြားလိုအပ်ရာများကို စေတနာဖြင့် လှူဒါန်းကြ၏။ (တ. ၂:၄၄-၄၆။ ၄:၃၄-၃၇) ထိုအချိန်တွင် သတိထားပြီးကိုင်တွယ်ရမည့် အခြေအနေတစ်ခု ပေါ်ပေါက်လာ၏။ “နေ့စဉ် အစာခွဲဝေရာတွင်” ဂရိစကားပြော မုဆိုးမများသည် “လျစ်လျူရှု” ခံနေရသည်။ (တ. ၆:၁) ဟေဗြဲစကားပြော မုဆိုးမများကိုမူ လျစ်လျူမရှုကြပေ။ ထို့ကြောင့် ပေါ်ပေါက်နေသောပြဿနာမှာ ခွဲခြားဆက်ဆံခြင်း ဖြစ်ပုံရသည်။ ယင်းက စိတ်ဝမ်းကွဲပြားမှု ဖြစ်သွားစေနိုင်၏။
(တမန်တော် ၆:၂-၇) အဲဒီအခါ တမန်တော် ၁၂ ယောက်က တပည့်အားလုံးကို ခေါ်ပြီး “ကျွန်တော်တို့က ဘုရားသခင်ရဲ့ တရားစကား သွန်သင်ပေးရတဲ့ အလုပ်ကို ပစ်ထားပြီး စားပွဲမှာ လုပ်ကျွေးနေဖို့ မသင့်ဘူး။ ၃ ဒါကြောင့် ညီအစ်ကိုတို့၊ ခင်ဗျားတို့ထဲက နာမည်ကောင်းရှိသူ၊ စွမ်းအားတော်နဲ့ပြည့်ပြီး ဉာဏ်ပညာပြည့်စုံသူ အမျိုးသား ၇ ယောက်ကို ရွေးချယ်လိုက်ပါ။ လိုအပ်နေတဲ့ ဒီတာဝန်ကို လုပ်ဆောင်ဖို့ သူတို့ကို ခန့်အပ်မယ်။ ၄ ကျွန်တော်တို့ကတော့ ဆုတောင်းတာ၊ တရားစကားသွန်သင်တာကိုပဲ စိတ်ရောကိုယ်ပါ နှစ်ပြီး လုပ်တော့မယ်” လို့ပြောတယ်။ ၅ အဲဒီစကားကို တပည့်အားလုံး သဘောတူကြတယ်။ ဒါနဲ့ ယုံကြည်ခြင်းခိုင်ခံ့ပြီး သန့်ရှင်းသော စွမ်းအားတော်နဲ့ ပြည့်နေတဲ့ သတေဖန်အပါအဝင် ဖိလိပ္ပု၊ ပြောခေါ်ရု၊ နိကနော်၊ တိမုန်၊ ပါမေန၊ ဂျူးဘာသာပြောင်းဝင်လာသူ အန္တိအုတ်မြို့သား နိကောလတို့ကို ရွေးချယ်ပြီး၊ ၆ တမန်တော်တွေဆီ ခေါ်လာတယ်။ တမန်တော်တွေလည်း ဆုတောင်းပေးပြီးနောက် သူတို့အပေါ် လက်တင်ကြတယ်။ ၇ ဘုရားသခင်ရဲ့တရားစကား ပိုပျံ့နှံ့လာတဲ့အတွက် ဂျေရုဆလင်မြို့မှာ တပည့်အရေအတွက် များသည်ထက် များလာတယ်။ ပုရောဟိတ် အတော်များများလည်း ယုံကြည်သူတွေ ဖြစ်လာတယ်။
‘ငါတို့သည် ဘုရားသခင်၏စကားကို နားထောင်ရမည်’
၁၈ တိုးတက်လာသောအသင်းတော်၏ အုပ်ချုပ်ရေးအဖွဲ့အဖြစ် အမှုထမ်းသည့် တမန်တော်များသည် “ဘုရားသခင်၏တရားစကားတော် သွန်သင်ခြင်းကို ရပ်ထား၍ စားပွဲ၌ အစာဝေပေး” ခြင်းအလုပ်ကို လုပ်ရန်မသင့်ကြောင်း သိကြသည်။ (တ. ၆:၂) သို့ဖြစ်၍ ထိုကိစ္စကိုဖြေရှင်းရန် သူတို့သည် “စွမ်းအားတော်နှင့်လည်းကောင်း၊ ဉာဏ်ပညာနှင့်လည်းကောင်း ပြည့်စုံ” သော လူခုနစ်ဦးကိုရှာဖို့ တပည့်များကို ညွှန်ကြားခဲ့သည်။ သို့ဖြင့် “ဤအမှုကို ဆောင်ရွက်ရန်” ထိုသူတို့ကို တမန်တော်များ ခန့်ထားနိုင်ကြမည်။ (တ. ၆:၃) ထိုအမှုတွင် အစာဝေပေးခြင်းသာမက ငွေကိုင်ခြင်း၊ ပစ္စည်းပစ္စယများ ဝယ်ခြမ်းခြင်းနှင့် စာရင်းဇယားပြုစုခြင်းတို့ ပါဝင်ပုံရသဖြင့် အရည်အချင်းရှိသော အမျိုးသားများ လိုအပ်၏။ ရွေးချယ်ခံရသော အမျိုးသားအားလုံးတွင် ဂရိနာမည်များရှိသောကြောင့် လျစ်လျူရှုခံရသော မုဆိုးမများအတွက် သူတို့ကို ပို၍နှစ်သက်လက်ခံဖွယ် ဖြစ်ပေမည်။ တမန်တော်များသည် ထောက်ခံချက်များကို ဆုတောင်းသုံးသပ်ပြီးနောက် “ဤအမှုကို ဆောင်ရွက်ရန်” အမျိုးသားခုနစ်ဦးကို ခန့်အပ်လိုက်သည်။
(တမန်တော် ၇:၅၈–၈:၁) အဲဒီနောက် မြို့ပြင်ဆွဲထုတ်ပြီး ကျောက်ခဲနဲ့ ပေါက်ကြတယ်။ သူ့ကိုစွပ်စွဲတဲ့ သက်သေတွေက သူတို့ရဲ့အပေါ်ဝတ်ရုံကို ချွတ်ပြီး ရှောလုလို့ခေါ်တဲ့ လူငယ်ရဲ့ ခြေရင်းမှာ ထားကြတယ်။ ၅၉ သူတို့ ကျောက်ခဲနဲ့ ဝိုင်းပေါက်နေတုန်းမှာ သတေဖန်က “သခင်ယေရှု၊ ကျွန်တော့်အသက်ကို သိမ်းယူလိုက်ပါ” လို့ အသနားခံတယ်။ ၆၀ အဲဒီနောက် ဒူးထောက်ပြီး “ယေဟောဝါ ဘုရား၊ ဒီအပြစ်အတွက် သူတို့ကို ဒဏ်မခတ်ပါနဲ့” လို့ အသံကျယ်ကျယ် ကြွေးကြော်ပြီးနောက် သေခြင်းမှာ အိပ်ပျော်သွားတယ်။
၈ အဲဒီလူသတ်မှုမှာ ရှောလုလည်း အလိုတူအလိုပါပဲ။ အဲဒီနေ့ကစပြီး ဂျေရုဆလင်မြို့မှာရှိတဲ့ အသင်းတော်ဟာ အကြီးအကျယ် နှိပ်စက်ညှဉ်းဆဲခံရတဲ့အတွက် တမန်တော်တွေကလွဲလို့ တပည့်အားလုံး ယုဒပြည်၊ ရှမာရိပြည်အနှံ့ ကွဲလွင့်သွားတယ်။
ရှာဖွေလေ့လာ ဘုရားရေးရာရတနာ
(တမန်တော် ၆:၁၅) ဂျူးတရားရုံးချုပ်မှာ ထိုင်နေသူတွေ စေ့စေ့ကြည့်လိုက်တဲ့အခါ သတေဖန်ရဲ့ မျက်နှာဟာ ကောင်းကင်တမန်ရဲ့ မျက်နှာလို ဖြစ်နေတာကို တွေ့လိုက်ရတယ်။
“အလွန်ရည်မွန်သော၊ တန်ခိုးတော်နှင့် ပြည့်သော” သတေဖန်
၂ ထိုအခိုက်အတန့်တွင် သတေဖန်၏မျက်နှာသည် ထူးခြားလျက်ရှိ၏။ သတေဖန်ကို တရားသူကြီးများ စေ့စေ့ကြည့်နေစဉ် သူ၏မျက်နှာသည် “ကောင်းကင်တမန်၏မျက်နှာကဲ့သို့” ဖြစ်သည်ကို မြင်ကြရ၏။ (တ. ၆:၁၅) ကောင်းကင်တမန်များသည် ယေဟောဝါဘုရားသခင်ထံမှ သတင်းတရားကို ပို့ဆောင်ပေးသည့်အတွက် ကြောက်ရွံ့စရာအကြောင်းမရှိဘဲ တည်ငြိမ်ကြ၏။ သတေဖန်လည်း ထိုသို့ပင်ဖြစ်သည်။ သူ့အား ခါးခါးသီးသီး မုန်းတီးသော အဆိုပါတရားသူကြီးများပင် ယင်းကို မြင်တွေ့နိုင်သည်။ သတေဖန်သည် ထိုမျှလောက် မည်သို့စိတ်တည်ငြိမ်နိုင်သနည်း။
(တမန်တော် ၈:၂၆-၃၀) ယေဟောဝါရဲ့ ကောင်းကင်တမန်က ဖိလိပ္ပုကို “ဂျေရုဆလင်မြို့ကနေ ဂါဇာမြို့ကို ဆင်းသွားတဲ့ လမ်းအတိုင်း တောင်ဘက်ကို သွားပါ” လို့မှာတယ်။ (အဲဒီလမ်းဟာ သဲကန္တာရလမ်းပဲ။) ၂၇ ဖိလိပ္ပုလည်း မှာထားတဲ့အတိုင်း သွားတယ်။ အဲဒီအချိန်မှာ အီသီယိုးပီးယားဘုရင်မ ကန်ဒက်ရဲ့ ဘဏ္ဍာတော်ထိန်းလည်းဖြစ်၊ အရာရှိလည်း ဖြစ်တဲ့ အီသီယိုးပီးယား မိန်းမစိုး တစ်ယောက်က ဂျေရုဆလင်မြို့မှာ သွားဝတ်ပြုပြီးနောက်၊ ၂၈ အပြန်ခရီးမှာ မြင်းရထားပေါ်ထိုင်ပြီး ပရောဖက်ဟေရှာယကျမ်းကို အကျယ်ကြီးဖတ်နေတယ်။ ၂၉ အဲဒီအခါ စွမ်းအားတော်က ဖိလိပ္ပုကို “အဲဒီမြင်းရထားကို အမီလိုက်ပါ” လို့ ပြောတယ်။ ၃၀ ဖိလိပ္ပုလည်း မြင်းရထားဘေးကနေ အပြေးလိုက်သွားတဲ့အခါ ဟေရှာယကျမ်းကို မိန်းမစိုး ဖတ်နေတာ ကြားတော့ “ဖတ်နေတာကို နားလည်ရဲ့လား” လို့မေးလိုက်တယ်။
“ယေရှုအကြောင်း သတင်းကောင်းကို” ဟောပြောခြင်း
၁၆ ယနေ့ ခရစ်ယာန်များသည် ဖိလိပ္ပုပြုလုပ်ခဲ့သော လုပ်ငန်းတွင် ပါဝင်ခွင့်ရရှိထားကြသည်။ တစ်ခါတစ်ရံ၊ ခရီးသွားချိန်ကဲ့သို့သော အလွတ်သဘောဟောပြောခွင့်ရသည့် အခြေအနေမျိုးတွင် တွေ့ဆုံသူများအား နိုင်ငံတော်သတင်းတရားကို တင်ဆက်ကြသည်။ အခြေအနေများစွာတွင် စိတ်နှလုံးရိုးဖြောင့်သူတစ်ဦးနှင့် တွေ့ဆုံရခြင်းသည် တိုက်ဆိုင်မှုမဟုတ်ပေ။ ထိုသို့ဖြစ်မည်ကို မျှော်လင့်ထားကြသည်။ အကြောင်းမှာ “လူမျိုး၊ လူမျိုးနွယ်၊ ဘာသာစကား၊ လူစုအသီးသီးတို့” ထံသတင်းတရားရောက်ရှိရန် ဟောပြောခြင်းလုပ်ငန်းကို ကောင်းကင်တမန်များ လမ်းညွှန်နေကြောင်း သမ္မာကျမ်းစာက ဖော်ပြထား၏။ (ဗျာ. ၁၄:၆) ဟောပြောခြင်းလုပ်ငန်းကို ကောင်းကင်တမန်လမ်းညွှန်မှုအောက် လုပ်ဆောင်ကြမည်ဟု ယေရှု တိတိကျကျ ကြိုဟောထားသည်။ ရိတ်သိမ်းချိန်ဖြစ်သည့် လောကစနစ်နိဂုံးပိုင်းအတွင်း “ရိတ်သိမ်းသူများသည် ကောင်းကင်တမန်များဖြစ်” သည်ဟု ဂျုံစပါးနှင့်ပေါင်းပင် ပုံဥပမာတွင် ယေရှုမိန့်ဆိုခဲ့သည်။ အဆိုပါနာမ်ဝိညာဉ်သတ္တဝါများသည် “တိုက်မိ၍လဲစေသူတို့နှင့် မတရားမှုပြုသူ ရှိသမျှတို့ကို နိုင်ငံတော်ထဲက နုတ်ယူ” လိမ့်မည်ဟုလည်း မိန့်ဆိုပြန်သည်။ (မ. ၁၃:၃၇-၄၁) တစ်ချိန်တည်းတွင် ကောင်းကင်တမန်များသည် အဖွဲ့အစည်းထဲသို့ ယေဟောဝါဘုရား သွေးဆောင်လိုသော ကောင်းကင်နိုင်ငံတော်အမွေခံဖြစ်လာမည့်သူများကို စုသိမ်းပြီးနောက် “အခြားသိုး” အဝင် “လူအုပ်ကြီး” ကိုလည်း စုသိမ်းမည်ဖြစ်သည်။—ဗျာ. ၇:၉။ ယော. ၆:၄၄၊ ၆၅။ ၁၀:၁၆။
ကျမ်းစာဖတ်ရှုခြင်း
(တမန်တော် ၆:၁-၁၅) အဲဒီအချိန်မှာ တပည့်တွေ တစ်နေ့ တခြား တိုးများလာတယ်။ တစ်ကြိမ်မှာ ဂရိစကားပြောတဲ့ ဂျူးတွေက သူတို့ထဲကမုဆိုးမတွေ နေ့စဉ်အစာခွဲတမ်း မရတဲ့အတွက် ဟီဘရူးစကားပြောတဲ့ ဂျူးတွေကို အပြစ်တင်ကြတယ်။ ၂ အဲဒီအခါ တမန်တော် ၁၂ ယောက်က တပည့်အားလုံးကို ခေါ်ပြီး “ကျွန်တော်တို့က ဘုရားသခင်ရဲ့ တရားစကား သွန်သင်ပေးရတဲ့ အလုပ်ကို ပစ်ထားပြီး စားပွဲမှာ လုပ်ကျွေးနေဖို့ မသင့်ဘူး။ ၃ ဒါကြောင့် ညီအစ်ကိုတို့၊ ခင်ဗျားတို့ထဲက နာမည်ကောင်းရှိသူ၊ စွမ်းအားတော်နဲ့ပြည့်ပြီး ဉာဏ်ပညာပြည့်စုံသူ အမျိုးသား ၇ ယောက်ကို ရွေးချယ်လိုက်ပါ။ လိုအပ်နေတဲ့ ဒီတာဝန်ကို လုပ်ဆောင်ဖို့ သူတို့ကို ခန့်အပ်မယ်။ ၄ ကျွန်တော်တို့ကတော့ ဆုတောင်းတာ၊ တရားစကားသွန်သင်တာကိုပဲ စိတ်ရောကိုယ်ပါ နှစ်ပြီး လုပ်တော့မယ်” လို့ပြောတယ်။ ၅ အဲဒီစကားကို တပည့်အားလုံး သဘောတူကြတယ်။ ဒါနဲ့ ယုံကြည်ခြင်းခိုင်ခံ့ပြီး သန့်ရှင်းသော စွမ်းအားတော်နဲ့ ပြည့်နေတဲ့ သတေဖန်အပါအဝင် ဖိလိပ္ပု၊ ပြောခေါ်ရု၊ နိကနော်၊ တိမုန်၊ ပါမေန၊ ဂျူးဘာသာပြောင်းဝင်လာသူ အန္တိအုတ်မြို့သား နိကောလတို့ကို ရွေးချယ်ပြီး၊ ၆ တမန်တော်တွေဆီ ခေါ်လာတယ်။ တမန်တော်တွေလည်း ဆုတောင်းပေးပြီးနောက် သူတို့အပေါ် လက်တင်ကြတယ်။ ၇ ဘုရားသခင်ရဲ့တရားစကား ပိုပျံ့နှံ့လာတဲ့အတွက် ဂျေရုဆလင်မြို့မှာ တပည့်အရေအတွက် များသည်ထက် များလာတယ်။ ပုရောဟိတ် အတော်များများလည်း ယုံကြည်သူတွေ ဖြစ်လာတယ်။ ၈ ဘုရားမျက်နှာသာရသူ၊ တန်ခိုးတော်နဲ့ ပြည့်စုံသူ သတေဖန်က အံ့ဖွယ်အမှုတွေ၊ ထူးဆန်းတဲ့အရာတွေကို လူတွေရှေ့မှာ လုပ်ပြတယ်။ ၉ လွတ်မြောက်သူများရဲ့ တရားဇရပ်အဖွဲ့ထဲက အဖွဲ့ဝင်တချို့က သတေဖန်ကို ငြင်းခုံဖို့ ကုရေနေပြည်သား၊ အလက်ဇန္ဒြီးယားမြို့သား၊ ကိလိကိပြည်သား၊ အာရှနယ်သားတွေနဲ့အတူ ရှေ့ထွက်လာတယ်။ ၁၀ ဒါပေမဲ့ သတေဖန်က စွမ်းအားတော်ကို အမှီပြုပြီး ဉာဏ်ပညာရှိရှိ ဟောပြောတဲ့အတွက် သူတို့ မချေပနိုင်ကြဘူး။ ၁၁ ဒါနဲ့ သူတို့က “မောရှေနဲ့ ဘုရားသခင်ကို ဒီလူ စော်ကားပြောဆိုခဲ့တာ ကျုပ်တို့ကြားတယ်” ဆိုပြီးပြောဖို့ လူတွေကို တိတ်တဆိတ် နားချတယ်။ ၁၂ လူတွေကိုရော အကြီးအကဲတွေ၊ ကျမ်းတတ်တွေကိုပါ ဆူပူအုံကြွလာအောင် လုပ်တယ်။ အဲဒီနောက် သတေဖန်ကို ရုတ်တရက် ဝိုင်းအုံပြီး အတင်းအကျပ် ဖမ်းဆီးပြီးနောက် ဂျူးတရားရုံးချုပ်ဆီ ခေါ်သွားကြတယ်။ ၁၃ မမှန်တဲ့သက်သေတွေ ခေါ်ထုတ်လာပြီး “ဒီလူက ဗိမာန်တော်နဲ့ ပညတ်တရားကို ဆန့်ကျင်ပြီး မပြတ်တမ်း ဟောနေပါတယ်။ ၁၄ နာဇရက်မြို့သား ယေရှုက ဒီဗိမာန်တော်ကို ဖြိုဖျက်မယ်၊ မောရှေပေးခဲ့တဲ့ ထုံးတမ်းစဉ်လာကိုလည်း ပြောင်းလဲပစ်မယ်လို့ ဒီလူပြောနေတာကို ကျုပ်တို့ကြားဖူးပါတယ်” လို့ ထွက်ဆိုခိုင်းတယ်။ ၁၅ ဂျူးတရားရုံးချုပ်မှာ ထိုင်နေသူတွေ စေ့စေ့ကြည့်လိုက်တဲ့အခါ သတေဖန်ရဲ့ မျက်နှာဟာ ကောင်းကင်တမန်ရဲ့ မျက်နှာလို ဖြစ်နေတာကို တွေ့လိုက်ရတယ်။