ယေဟောဝါရဲ့ ခွင့်လွှတ်မှုကြောင့် သင် ဘာအကျိုးရသလဲ

၁။ ခွင့်လွှတ်ပါတယ်လို့ လူတွေ ပြောတဲ့အခါ တစ်ခါတလေ ဘာကြောင့် နားလည်ရခက်သလဲ။

“ခွင့်လွှတ်ပါတယ်။” သင့်အပြော၊ လုပ်ရပ်တစ်ခုခုကြောင့် စိတ်ထိခိုက်သွားသူတစ်ယောက် ဒီလိုပြောလာရင် သင် တော်တော် စိတ်ပေါ့သွားမှာပဲ။ ဒါပေမဲ့ “ခွင့်လွှတ်ပါတယ်” လို့ ပြောတဲ့အခါ ဘာကို ဆိုလိုသလဲ။ အရင်အတိုင်း ပြန်ခင်ကြမယ်လို့ ဆိုလိုသလား။ ဒါမှမဟုတ် ဖြစ်ခဲ့တာတွေ စကားထဲ ထည့်မပြောချင်တော့ဘူး၊ အရင်အတိုင်းတော့ ပြန်မခင်နိုင်ဘူးလို့ ဆိုလိုသလား။ ခွင့်လွှတ်ပါတယ်လို့ လူတွေ ပြောတဲ့အခါ တစ်ခါတလေ နားလည်ရခက်တယ်။

၂။ ကျမ်းစာမှာ ယေဟောဝါရဲ့ ခွင့်လွှတ်မှုကို ဘယ်လို ဖော်ပြထားသလဲ။ (အောက်ခြေမှတ်ချက်ကိုလည်း ကြည့်ပါ။)

^၂ မစုံလင်တဲ့ လူသားတွေကို ယေဟောဝါဘုရား ခွင့်လွှတ်ပုံဟာ ထူးခြားတယ်။ လူအချင်းချင်း ခွင့်လွှတ်ပုံနဲ့ ကွာခြားတယ်။ “ကိုယ်တော် တကယ် ခွင့်လွှတ်တဲ့အတွက် လူတွေ ကြည်ညိုလေးစားကြတာ” လို့ ဆာလံကျမ်းရေးသူ ပြောတယ်။a (ဆာ. ၁၃၀:၄) ယေဟောဝါ ခွင့်လွှတ်ပြီဆိုရင် “တကယ် ခွင့်လွှတ်” တာ။ တကယ် ခွင့်လွှတ်တယ်ဆိုတာ ဘာကို ဆိုလိုမှန်း ယေဟောဝါရဲ့ စံနမူနာက ဖော်ပြတယ်။ ဟီဘရူးကျမ်းစောင်ထဲက ကျမ်းပိုဒ်တချို့မှာ ယေဟောဝါရဲ့ ခွင့်လွှတ်ပုံကို ဖော်ပြတဲ့ စကားလုံး ရှိတယ်။ လူတွေရဲ့ ခွင့်လွှတ်ပုံကို ဖော်ပြဖို့တော့ အဲဒီစကားလုံးကို ကျမ်းရေးသူတွေ တစ်ခါမှ မသုံးဘူး။

၃။ ယေဟောဝါရဲ့ ခွင့်လွှတ်မှုနဲ့ လူတွေရဲ့ ခွင့်လွှတ်မှု ဘယ်လို ကွာခြားသလဲ။ (ဟေရှာယ ၅၅:၆၊ ၇)

^၃ လူတစ်ယောက်ကို ယေဟောဝါ ခွင့်လွှတ်ပြီဆိုရင် အပြစ်တွေကို လုံးဝ ပယ်ဖျက်လိုက်တယ်။ အရင်အတိုင်း ရင်းရင်းနှီးနှီး ပြန်ဆက်ဆံတယ်။ ကျွန်တော်တို့ကို ယေဟောဝါ အကြွင်းမဲ့ ထပ်ခါထပ်ခါ ခွင့်လွှတ်ပေးတာ သိပ်ကျေးဇူးတင်စရာပါပဲ။—ဟေရှာယ ၅၅:၆၊ ၇ ကို ဖတ်ပါ။

၄။ တကယ် ခွင့်လွှတ်တယ်ဆိုတာ ဘာကို ဆိုလိုမှန်း နားလည်ဖို့ ယေဟောဝါ ဘယ်လို ကူညီပေးသလဲ။

^၄ ယေဟောဝါရဲ့ ခွင့်လွှတ်မှုနဲ့ လူတွေရဲ့ ခွင့်လွှတ်မှု ကွာခြားလို့ တကယ် ခွင့်လွှတ်တယ်ဆိုတာ ဘာကို ဆိုလိုမှန်း မစုံလင်သူတွေ နားလည်နိုင်ပါ့မလား။ နားလည်နိုင်ပါတယ်။ မိမိရဲ့ ခွင့်လွှတ်မှုကို တင်စားချက်တွေနဲ့ ကျမ်းစာမှာ ကွက်ကွက်ကွင်းကွင်း ဖော်ပြထားလို့ပါပဲ။ တင်စားချက်တချို့ကို ဒီဆောင်းပါးမှာ လေ့လာကြမယ်။ နောင်တရတယ်ဆိုရင် အပြစ်တွေကို ယေဟောဝါ ဖယ်ရှားပေးကြောင်း၊ အရင်အတိုင်း ရင်းရင်းနှီးနှီး ပြန်ဆက်ဆံကြောင်း အဲဒီတင်စားချက်တွေက သိလာစေမယ်။ နည်းအမျိုးမျိုးနဲ့ ခွင့်လွှတ်ပေးတဲ့ ကရုဏာရှင်အဖ ယေဟောဝါကို ပိုကျေးဇူးတင်လေးမြတ်လာစေမယ်။

အပြစ်တွေကို ယေဟောဝါ ဖယ်ရှားပေး

၅။ ယေဟောဝါ ခွင့်လွှတ်ပေးတယ်လို့ ပြောတဲ့အခါ ဘာကို ဆိုလိုသလဲ။

^၅ ကျမ်းစာမှာ အပြစ်ကို သိပ်လေးတဲ့ ဝန်ထုပ်နဲ့ ခိုင်းနှိုင်းထားတယ်။ “ကိုယ့်အမှားတွေဟာ ခေါင်းကို လွှမ်းမိုးတဲ့အထိ များနေပြီ။ ဝန်ထုပ်ကြီး ထမ်းရသလို သိပ်လေးတာပဲ” လို့ ဘုရင်ဒါဝိဒ် ပြောတယ်။ (ဆာ. ၃၈:၄) အပြစ်လုပ်သူ နောင်တရတဲ့အခါ ယေဟောဝါ ခွင့်လွှတ်ပေးတယ်။ (ဆာ. ၂၅:၁၈။ ၃၂:၅) “ခွင့်လွှတ်ပေး” ဆိုတဲ့ ဟီဘရူး စကားလုံးဟာ “ချီမ” ဒါမှမဟုတ် “ယူသွား” ဆိုတဲ့ အဓိပ္ပာယ် ရှိတယ်။ ဒါကြောင့် ယေဟောဝါ ခွင့်လွှတ်ပေးတယ်လို့ ပြောတဲ့အခါ ကျွန်တော်တို့ ထမ်းထားရတဲ့ အပြစ်ဝန်ထုပ်ကြီးကို ချီမပြီး အဝေးတစ်နေရာဆီ ယူသွားတာကို မြင်ယောင်နိုင်တယ်။

၆။ အပြစ်တွေကို ကျွန်တော်တို့နဲ့ ဘယ်လောက်ဝေးဝေးအထိ ယေဟောဝါ ယူသွားသလဲ။

^၆ အပြစ်တွေကို ကျွန်တော်တို့နဲ့ ဘယ်လောက်ဝေးဝေးအထိ ယေဟောဝါ ယူသွားကြောင်း တင်စားချက် နောက်တစ်ချက်က ဖော်ပြတယ်။ “နေထွက်ရာအရပ်နဲ့ နေဝင်ရာအရပ် အလှမ်းဝေးသလို အပြစ်တွေကို ငါတို့နဲ့ အလှမ်းဝေးစေတယ်” လို့ ဆာလံ ၁၀၃:၁၂ မှာ ဆိုတယ်။ နေထွက်ရာ အရှေ့အရပ်ဟာ နေဝင်ရာ အနောက်အရပ်ရဲ့ အဝေးဆုံးမှာ ရှိတယ်။ ဘယ်တော့မှ မဆုံဘူး။ ဒါကြောင့် ဒီတင်စားချက်က အပြစ်တွေကို ကျွန်တော်တို့နဲ့ ဝေးနိုင်သမျှဝေးဝေး ယေဟောဝါ ယူသွားတာကို ဆိုလိုတယ်။ ယေဟောဝါ အကြွင်းမဲ့ ခွင့်လွှတ်ကြောင်း စိတ်ချစေတယ်။

၇။ ကျွန်တော်တို့ရဲ့ အပြစ်တွေကို ယေဟောဝါ ဘာလုပ်ပစ်မယ်လို့ ကျမ်းစာမှာ ဖော်ပြသလဲ။ (မိက္ခာ ၇:၁၈၊ ၁၉)

^၇ အပြစ်တွေကို ကျွန်တော်တို့နဲ့ ဝေးနိုင်သမျှဝေးဝေး ယူသွားပြီးနောက် ယေဟောဝါ ဆက်ဆုပ်ကိုင်ထားသလား။ ဆုပ်ကိုင်မထားဘူး။ “ကျွန်တော့်အပြစ်တွေကို ကိုယ်တော့်နောက်ကျောဘက် ပစ်လိုက်တယ်” လို့ ဘုရင်ဟေဇကိ ပြောတယ်။ (ဟေရှာ. ၃၈:၉၊ ၁၇) နောင်တရသူရဲ့ အပြစ်တွေကို ယေဟောဝါ ယူပြီး မြင်ကွင်းကနေ ပျောက်ကွယ်သွားအောင် ပစ်လိုက်တာကို ဆိုလိုနေတာပါ။ “ကျွန်တော့်အပြစ်တွေကို တစ်ခါမှ မရှိခဲ့သလို လုပ်လိုက်တယ်” လို့လည်း အဲဒီကျမ်းစကားကို ပြန်ဆိုနိုင်တယ်။ ဒီအချက်နဲ့ပတ်သက်ပြီး မိက္ခာ ၇:၁၈၊ ၁၉ မှာ တင်စားချက် နောက်တစ်ချက် တွေ့ရတယ်။ (ဖတ်ပါ။) အပြစ်တွေကို နက်ရှိုင်းတဲ့ ပင်လယ်ထဲ ပစ်ချလိုက်တယ်လို့ ယေဟောဝါ ပြောထားတယ်။ ရှေးခေတ်တုန်းက နက်ရှိုင်းတဲ့ ပင်လယ်ထဲ ကျသွားတာ ဘာမဆို ဘယ်တော့မှ ပြန်မတွေ့နိုင်တော့ဘူး။

၈။ ဘာတွေ သိခဲ့ရပြီလဲ။

^၈ တင်စားချက်တွေအရ ယေဟောဝါ ခွင့်လွှတ်တယ်လို့ ပြောတဲ့အခါ အပြစ်ရှိတယ်လို့ တနုံ့နုံ့ မခံစားရအောင် အပြစ်ဝန် ပေါ့စေတာကို ဆိုလိုကြောင်း သိခဲ့ရပြီ။ “ကျူးလွန်ခဲ့တဲ့ တရားမဲ့လုပ်ရပ်တွေ ခွင့်လွှတ်ခံရသူ၊ အပြစ်တွေ ဖုံးအုပ်ခံရသူတွေဟာ ပျော်ရွှင်ချမ်းမြေ့တယ်။ အပြစ်ရှိတယ်လို့ ယေဟောဝါ လုံးဝ မယူမှတ်တဲ့သူဟာ ပျော်ရွှင်ချမ်းမြေ့တယ်” လို့ ဒါဝိဒ် ပြောတာ တကယ် မှန်တယ်။ (ရော. ၄:၆-၈) တကယ် ခွင့်လွှတ်တယ်ဆိုတာ ဒါပဲ။

အပြစ်တွေကို ယေဟောဝါ ချေဖျက်ပေး

၉။ ဘယ်လောက်အထိ ခွင့်လွှတ်တယ်ဆိုတာ ဖော်ပြဖို့ ဘယ်တင်စားချက်ကို ယေဟောဝါ သုံးသလဲ။

^၉ နောင်တယူသူရဲ့ အပြစ်တွေကို ရွေးဖိုးအားဖြင့် ယေဟောဝါ ချေဖျက်ပေးကြောင်း တင်စားချက် နောက်တစ်ချက်နဲ့ ကျမ်းစာမှာ ဖော်ပြထားတယ်။ အပြစ်တွေကို ဆေးကြောတယ်ဆိုတဲ့ တင်စားချက်ပါ။ ရလဒ်အနေနဲ့ အပြစ်သား သန့်စင်သွားတယ်။ (ဆာ. ၅၁:၇။ ဟေရှာ. ၄:၄။ ယေ. ၃၃:၈) “မင်းတို့ရဲ့ အပြစ်တွေဟာ ကြက်သွေးရောင် ထနေရင်တောင် နှင်းပွင့်လို ဖြူဖွေးသွားမယ်။ ကတ္တီပါလို နီရဲနေရင်တောင် သိုးမွေးလို ဖြူဖွေးသွားမယ်” လို့ ယေဟောဝါကိုယ်တိုင် ပြောထားတယ်။ (ဟေရှာ. ၁:၁၈) ပိတ်စမှာ ကြက်သွေးရောင်၊ ကတ္တီပါရောင် စွန်းသွားရင် အစွန်းချွတ်ရ တော်တော် ခက်တယ်။ ဒါပေမဲ့ ဘယ်လောက် စွန်းထင်းနေတဲ့ အပြစ်ပဲ ဖြစ်ပါစေ ပြောင်သွားတဲ့အထိ ယေဟောဝါ သန့်စင်ပေးနိုင်ကြောင်း ဒီတင်စားချက်က ဖော်ပြတယ်။

၁၀။ မိမိရဲ့ ခွင့်လွှတ်မှု အတိုင်းအတာကို ဖော်ပြဖို့ နောက်ထပ် ဘယ်တင်စားချက်ကို ယေဟောဝါ သုံးသလဲ။

^၁၀ ရှေ့ဆောင်းပါးမှာ ဆွေးနွေးခဲ့တဲ့အတိုင်း အပြစ်ဟာ အကြွေးနဲ့ တူတယ်။ (မ. ၆:၁၂။ လု. ၁၁:၄) အပြစ်လုပ်မိတိုင်း အကြွေးနစ်သည်ထက် နစ်သွားသလိုပဲ။ ယေဟောဝါဆီမှာ ကျွန်တော်တို့ အကြွေးအများကြီး တင်နေတယ်။ ဒါပေမဲ့ ယေဟောဝါ ခွင့်လွှတ်တဲ့အခါ အကြွေးလျှော်ပေးလိုက်တာနဲ့ တူတယ်။ ခွင့်လွှတ်ပြီးသား အပြစ်ကြွေးတွေကို ပြန်မဆပ်ခိုင်းတော့ဘူး။ အကြွေးလျှော်ခံရတဲ့အခါ ပေါ့ပါးလန်းဆန်းသွားသလို ခွင့်လွှတ်ခံရတဲ့အခါ ကျွန်တော်တို့ ပေါ့ပါးလန်းဆန်းသွားကြတယ်။

၁၁။ အပြစ်တွေ “ပယ်ဖျက်” တယ်ဆိုတာ ဘာကို ဆိုလိုသလဲ။ (တမန်တော် ၃:၁၉)

^၁၁ ယေဟောဝါက အပြစ်ကြွေးတွေကို လျှော်ပေးရုံ လျှော်ပေးတာ မဟုတ်ဘူး၊ ပယ်ဖျက်လိုက်တာ။ (တမန်တော် ၃:၁၉ ကို ဖတ်ပါ။) အကြွေးလျှော်ပေးတာက အကြွေးစာရင်းမှာ ကြက်ခြေခတ် အကြီးကြီး ခြစ်လိုက်တာနဲ့ တူတယ်။ ခြစ်လိုက်ပေမဲ့ ကြက်ခြေခတ်အောက်က ကိန်းဂဏန်းကို မြင်နေရတုန်းပဲ။ ပယ်ဖျက်တာကျတော့ အဲဒီလို မဟုတ်ဘူး။ ရှေးအချိန်တုန်းက သုံးတဲ့ မင်အမျိုးအစားဟာ ကာဗွန်၊ သစ်စေး၊ ရေနဲ့ ရောစပ်ထားတာ။ ရေးထားတာကို စိုနေတဲ့ ရေမြှုပ်နဲ့ ဖျက်ပစ်နိုင်တယ်။ ဒါကြောင့် “ပယ်ဖျက်” လို့ ပြောတဲ့အခါ လုံးဝ ပျက်သွားတာကို ဆိုလိုတယ်။ စာလုံးရာတောင် ထင်မကျန်ခဲ့ဘူး။ အကြွေးမတင်ဖူးသလို ဖြစ်သွားတယ်။ အပြစ်ကြွေးတွေကို လျှော်ပေးရုံ လျှော်ပေးတာ မဟုတ်ဘဲ ကျွန်တော်တို့ တစ်ခါမှ အပြစ်မလုပ်ဖူးသလို ယေဟောဝါ သတ်မှတ်ပေးတာ ကျေးဇူးတင်စရာပါပဲ။—ဆာ. ၅၁:၉။

၁၂။ တိမ်ထုကြီးနဲ့ ဖုံးအုပ်တယ်ဆိုတဲ့ တင်စားချက်ကနေ ဘာသိရသလဲ။

^၁၂ ယေဟောဝါရဲ့ ခွင့်လွှတ်မှုနဲ့ပတ်သက်ပြီး တင်စားချက် နောက်တစ်ချက် ရှိတယ်။ “မိုးတိမ်နဲ့ ဖုံးအုပ်သလို မင်းရဲ့ အမှားတွေကို ငါဖုံးအုပ်ပေးမယ်။ တိမ်ထုကြီးနဲ့ ဖုံးအုပ်သလို မင်းရဲ့ အပြစ်တွေကို ဖုံးအုပ်ပေးမယ်” လို့ ယေဟောဝါ ပြောတယ်။ (ဟေရှာ. ၄၄:၂၂) ယေဟောဝါကိုယ်တိုင်ကော ကျွန်တော်တို့ပါ မမြင်ရတော့အောင် အပြစ်တွေကို တိမ်ထုကြီးနဲ့ ဖုံးအုပ်ပေးလိုက်တယ်လို့ တင်စားထားတာ။

၁၃။ ယေဟောဝါ ခွင့်လွှတ်တဲ့အခါ ကျွန်တော်တို့ ဘယ်လို ခံစားရသလဲ။

^၁၃ တင်စားချက်တွေကနေ ဘာသင်ယူနိုင်သလဲ။ ယေဟောဝါ ခွင့်လွှတ်တဲ့အခါ ကျွန်တော်တို့ အပြစ်မလုပ်ဖူးသလို ဖြစ်သွားတယ်။ ယေရှုခရစ်ရဲ့ အသွေးအားဖြင့် အပြစ်ကြွေး အားလုံး ကျေသွားပြီ။ အပြစ်စွန်းထင်းနေဦးမလားဆိုပြီး မခံစားသင့်ဘူး။ နောင်တရသူကို ယေဟောဝါ တကယ် ခွင့်လွှတ်တယ်ဆိုတာ ဒါပဲ။

ပြန်လည်သင့်မြတ်ခွင့် ယေဟောဝါ ပေး

၁၄။ ယေဟောဝါ ခွင့်လွှတ်တယ်လို့ ပြောရင် တကယ် ခွင့်လွှတ်ကြောင်း ဘာကြောင့် စိတ်ချနိုင်သလဲ။ (ရုပ်ပုံကိုလည်း ကြည့်ပါ။)

^၁၄ ကျွန်တော်တို့ တကယ် ခွင့်လွှတ်ခံရလို့ ဘုရားနဲ့ ဆက်ဆံရေးကောင်း ပြန်ရှိနိုင်တယ်။ အပြစ်ရှိတယ်လို့ တနုံ့နုံ့ ခံစားနေစရာ မလိုဘူး။ ယေဟောဝါ တေးထားမှာ၊ အပြစ်ပေးဖို့ အခွင့်အရေး ရှာနေမှာကို စိုးရိမ်စရာ မလိုဘူး။ ယေဟောဝါ ဘယ်တော့မှ အဲဒီလို မလုပ်ဘူး။ ယေဟောဝါ ခွင့်လွှတ်တယ်လို့ ပြောရင် တကယ် ခွင့်လွှတ်ကြောင်း ဘာကြောင့် စိတ်ချနိုင်သလဲ။ “သူတို့အမှားကို ငါခွင့်လွှတ်မယ်။ သူတို့အပြစ်ကို သတိရမှာ မဟုတ်ဘူး” လို့ ပရောဖက် ယေရမိကို ယေဟောဝါ ပြောတယ်။ (ယေ. ၃၁:၃၄) ဒီစကားတွေကို ကိုးကားပြီး “သူတို့ရဲ့ အပြစ်တွေအကြောင်း [ယေဟောဝါ] ပြန်မစဉ်းစားတော့ဘူး” လို့ တမန်တော် ပေါလု ပြောတယ်။ (ဟီ. ၈:၁၂) ဘာကို ဆိုလိုသလဲ။

၁၅။ ကျွန်တော်တို့ရဲ့ အပြစ်တွေကို ယေဟောဝါ သတိရမှာ မဟုတ်ဘူးဆိုတာ ဘာကို ဆိုလိုသလဲ။

^၁၅ ကျမ်းစာမှာ ပါတဲ့ “သတိရ” ဆိုတဲ့ စကားလုံးက ပြန်တွေးတာလောက်ကိုပဲ အမြဲ မရည်ညွှန်းဘူး။ တစ်ခုခု လုပ်တာကိုလည်း ရည်ညွှန်းနိုင်တယ်။ “သခင်ယေရှု၊ ဘုရင်ဖြစ်တဲ့အခါ ကျွန်တော့်ကို သတိရပါ” ဆိုပြီး ယေရှုဘေးမှာ သစ်တိုင်တင်ခံရတဲ့ ရာဇဝတ်သား ပြောတယ်။ (လု. ၂၃:၄၂၊ ၄၃) မိမိအကြောင်း ပြန်တွေးဖို့လောက် မဟုတ်ဘဲ တစ်ခုခု လုပ်ပေးဖို့ ယေရှုကို တောင်းဆိုနေတာ။ ရှင်ပြန်ထမြောက်ပေးမယ်လို့ ရာဇဝတ်သားကို ယေရှု ပြောတယ်။ ဒါကြောင့် ကျွန်တော်တို့ရဲ့ အပြစ်တွေကို ယေဟောဝါ သတိရမှာ မဟုတ်ဘူးလို့ ပြောတဲ့အခါ ခွင့်လွှတ်ပြီးသား အပြစ်တွေအတွက် နောင်တစ်ချိန်ချိန် ပြစ်ဒဏ်ပေးတာမျိုး မလုပ်မှာကို ဆိုလိုတယ်။

၁၆။ တကယ် ခွင့်လွှတ်ခံရတဲ့အခါ ခံစားရတဲ့ လွတ်မြောက်မှုကို ကျမ်းစာမှာ ဘယ်လို တင်စားထားသလဲ။

^၁၆ တကယ် ခွင့်လွှတ်ခံရတဲ့အခါ ခံစားရတဲ့ လွတ်မြောက်မှုကို ကျမ်းစာမှာ တင်စားချက် နောက်တစ်ချက်နဲ့ ဖော်ပြထားတယ်။ အမွေရထားတဲ့ မစုံလင်မှု၊ ဉာဉ်ဆိုးကြောင့် ကျွန်တော်တို့ဟာ “အပြစ်ရဲ့ ကျွန်” ဖြစ်နေကြတယ်။ ဒါပေမဲ့ ယေဟောဝါ ခွင့်လွှတ်ပေးတဲ့အခါ “အပြစ်ရဲ့ လက်ကနေ လွတ်မြောက်” သွားတဲ့ ကျွန်နဲ့ တူတယ်။ (ရော. ၆:၁၇၊ ၁၈။ ဗျာ. ၁:၅) လွတ်မြောက်သွားတဲ့ ကျွန်တစ်ယောက်လို ပျော်ရွှင်နိုင်ကြတယ်။

၁၇။ ယေဟောဝါရဲ့ ခွင့်လွှတ်မှုက ကျွန်တော်တို့ကို ပုံဆောင်သဘောအရ ဘယ်လိုနည်းနဲ့ အနာရောဂါ ပျောက်ကင်းစေသလဲ။ (ဟေရှာယ ၅၃:၅)

^၁၇ ဟေရှာယ ၅၃:၅ ကို ဖတ်ပါ။ အပြစ်သားတွေဟာ သေစေနိုင်တဲ့ရောဂါ စွဲနေသူနဲ့ တူတယ်လို့ ကျမ်းစာမှာ တင်စားထားတယ်။ သားတော်ကတစ်ဆင့် ယေဟောဝါ ပြင်ဆင်ပေးတဲ့ ရွေးဖိုး ပူဇော်သက္ကာကြောင့် ပုံဆောင်သဘောအရ ကျွန်တော်တို့ အနာရောဂါ ပျောက်ကင်းသွားတယ်။ (၁ ပေ. ၂:၂၄) ကျွန်တော်တို့ အပြစ်လုပ်တဲ့အခါ ယေဟောဝါနဲ့ ဆက်ဆံရေး ထိခိုက်သွားတယ်။ ဒါပေမဲ့ ရွေးဖိုးကို အခြေခံပြီး ယေဟောဝါ ခွင့်လွှတ်ပေးလို့ ဆက်ဆံရေးကောင်း ပြန်ရှိနိုင်ကြတယ်။ ရောဂါဆိုး ပျောက်ကင်းသွားသူတစ်ယောက် အကြီးအကျယ် ဝမ်းသာသွားသလို ကျွန်တော်တို့လည်း ဘုရားနဲ့ ဆက်ဆံရေးကောင်း ပြန်ရှိလို့၊ ဘုရားမျက်နှာသာ ပြန်ရလို့ ဝမ်းသာနိုင်ကြတယ်။

ယေဟောဝါ ခွင့်လွှတ်ပေးလို့ အကျိုးရ

၁၈။ ယေဟောဝါရဲ့ ခွင့်လွှတ်မှုနဲ့ပတ်သက်တဲ့ တင်စားချက်အမျိုးမျိုးကနေ ဘာတွေ သိခဲ့ကြပြီလဲ။ (“ယေဟောဝါ ခွင့်လွှတ်ပေးပုံ” လေးထောင့်ကွက်ကိုလည်း ကြည့်ပါ။)

^၁၈ ယေဟောဝါရဲ့ ခွင့်လွှတ်မှုနဲ့ပတ်သက်တဲ့ တင်စားချက်အမျိုးမျိုးကနေ ဘာတွေ သိခဲ့ကြပြီလဲ။ ကျွန်တော်တို့ကို ယေဟောဝါ ခွင့်လွှတ်တဲ့အခါ တစ်ခါမှ အပြစ်မလုပ်ဖူးသလို သဘောထားပေးတယ်။ နောင်တစ်ချိန်ချိန်မှ ပြစ်ဒဏ်ပေးတာမျိုး မလုပ်ဘူး။ အရင်အတိုင်း ရင်းရင်းနှီးနှီး ပြန်ဆက်ဆံတယ်။ ယေဟောဝါရဲ့ စစ်မှန်တဲ့ ခွင့်လွှတ်ပေးမှုဟာ လက်ဆောင်ပါပဲ။ ကျွန်တော်တို့ ရထိုက်လို့ မဟုတ်ဘဲ ကျွန်တော်တို့ကို ချစ်လို့၊ မဟာကရုဏာရှိလို့ ယေဟောဝါ ပေးတဲ့ လက်ဆောင်ပါ။—ရော. ၃:၂၄။

၁၉။ (က) ဘာကို ကျေးဇူးတင်လေးမြတ်သင့်သလဲ။ (ရောမ ၄:၈) (ခ) နောက်ဆောင်းပါးမှာ ဘာအကြောင်း ဆွေးနွေးကြမလဲ။

^၁၉ ရောမ ၄:၈ ကို ဖတ်ပါ။ ယေဟောဝါ “တကယ် ခွင့်လွှတ်” လို့ ကျွန်တော်တို့ယောက်တိုင်း သိပ်ကျေးဇူးတင် လေးမြတ်ကြမှာပါ။ (ဆာ. ၁၃၀:၄) ဒါပေမဲ့ ယေဟောဝါရဲ့ ခွင့်လွှတ်မှု ရချင်ရင် ကျွန်တော်တို့ လုပ်ရမှာ ရှိတယ်။ “သူတစ်ပါးရဲ့ အပြစ်ကို ခွင့်မလွှတ်ရင်တော့ အဖဘုရားက ခင်ဗျားတို့ရဲ့ အပြစ်ကို ခွင့်လွှတ်မှာ မဟုတ်ဘူး” လို့ ယေရှု ပြောတယ်။ (မ. ၆:၁၄၊ ၁၅) ဒါကြောင့် ယေဟောဝါကို အတုယူပြီး တခြားသူတွေကို ခွင့်လွှတ်ရမယ်။ ယေဟောဝါရဲ့ ခွင့်လွှတ်မှုကို ဘယ်လို အတုယူနိုင်မလဲ။ ဒီအကြောင်း နောက်ဆောင်းပါးမှာ ဆွေးနွေးကြမယ်။