နောင်တရဝမ်းနည်းခြင်းမရှိဘဲ အားလပ်ခွင့်၌ ပျော်မွေ့လော့!

အားလပ်ခွင့်ယူ၍သွားကြသော ကျော်ကြားသည့်ဒေသတစ်ခုသို့ သူမ၏လည်ပတ်ခြင်းမှ ပျော်မွေ့မှုအကြောင်း မေးခံရသောအခါ ယခု ဥရောပ၌နေထိုင်လျက်ရှိသည့် အမေရိကန်သူတစ်ဦးက “လူတွေ မရောက်လာခင်တုန်းက တော်တော်သာယာမှာပဲ” ဟုပြန်ဖြေခဲ့သည်။ သူမ၏ခံစားချက်မျိုး သင်ခံစားရဖူးသလော။ တစ်ဆက်တည်းဖြစ်သော ဟိုတယ်နှင့် ဒစ္စကိုများ၊ ညစ်ညမ်း၍လူပြွတ်သိပ်နေသော ကမ်းခြေနှင့် ကျယ်လောင်သော ရေဒီယိုအသံများတို့သည် နှစ်သက်ဖွယ်ကောင်းသော အားလပ်ခွင့်ယူ၍သွားကြသည့်ဒေသတစ်ခုအဖြစ် မည်သူမျှယူမှတ်ကြမည်မဟုတ်ပါ။

ဝမ်းနည်းဖွယ်မှာ အားလပ်ခွင့်တွင် ကျွန်ုပ်တို့မျှော်မှန်းထားသည်နှင့်အညီ ဖြစ်မလာခြင်းပင်ဖြစ်သည်။ ယင်းသည် ကျွန်ုပ်တို့ကို ခွန်အားပြည့်စေမည့်အစား မောဟိုက်စေသည်; ကျွန်ုပ်တို့ကို မတ်မတ်ရပ်စေမည့်အစား တစ်ခါတစ်ရံ အိပ်ရာထဲလဲစေသည်။ ထို့ကြောင့် နောင်တရဝမ်းနည်းခြင်းမရှိဘဲ အားလပ်ခွင့်ကို မည်သို့ပျော်မွေ့နိုင်မည်နည်းဟူသည့် မေးခွန်းသည် သင့်လျော်ပေသည်။

မျှတမှုရှိပါ

ကျွန်ုပ်တို့၏အစားအသောက်များထဲတွင်ပါသော အမွှေးအကြိုင်များနည်းတူ ချွေတာစွာအသုံးပြုသောအခါ အားလပ်ခွင့်မှ အကောင်းဆုံးအကျိုးများဖြစ်ထွန်းလေသည်။ ကျော်ကြားသောအပျော်တမ်းခရီးထွက်သူများ၏အသက်တာက မြှူဆွယ်နေမည်ဖြစ်သော်လည်း ၎င်းသည် မျှတမှုကင်းမဲ့ပြီး စစ်မှန်သောပျော်ရွှင်မှုကို မဖြစ်စေပါ။

အထူးသဖြင့် အားလပ်ခွင့်နှင့်ပတ်သက်၍ ငွေသုံးရာတွင် မျှတမှုရှိခြင်းသည် အရေးကြီး၏။ မထွက်ခွာမီ သေချာစွာစီစဉ်မှုပြုပြီး သင့်ဘတ်ဂျက်အတွင်းသုံးရန်ကြိုးစားပါ။ “အခုပျော်၊ နောက်မှပေး” ရန်သင့်ကိုအားပေးသော ခရီးသွားလုပ်ငန်းကိုယ်စားလှယ်များ၏ အထူးကမ်းလှမ်းချက်များအတွင်း ကျော့မိခြင်းကိုရှောင်ပါ။

ထို့အပြင် အားလပ်ခွင့်ကို အလွန်ရယူလိုသည့် ပင်ကိုသဘာဝစိတ်နှင့် နားနားနေနေနေလိုစိတ်တို့သည် နင်းချေခံရသည်အထိ ဖြစ်နိုင်ချေရှိသည့်အန္တရာယ်ကို အလွန်အမင်းစွဲလမ်းခြင်းမျိုး မဖြစ်ပါနှင့်။ ထပ်ဆင့်၍၊ သင့်လျော်သောမျှတမှု၌ ကျွန်ုပ်တို့၏အားလပ်ခွင့်ကို နောင်တရဝမ်းနည်းမှုဖြင့် ပြန်ကြည့်မိစေနိုင်သည့် အကြီးမားဆုံးသောအန္တရာယ်ကို အသိအမှတ်ပြုခြင်းပါဝင်သည်။ ၎င်းမှာ မတော်တဆမှု၊ ဖျားနာမှု သို့မဟုတ် ရာဇဝတ်မှုတို့နှင့်မသက်ဆိုင်ဘဲ ပုဂ္ဂိုလ်ရေးဆက်ဆံမှုနှင့်သက်ဆိုင်လေသည်။

ကောင်းသောဆက်ဆံရေးကို ထိန်းသိမ်းခြင်း

မိသားစုနှင့်အတူ သို့မဟုတ် မိတ်ဆွေများနှင့်အတူ အားလပ်ခွင့်ယူ၍သွားခြင်းသည် မေတ္တာနှောင်ကြိုးကို သန်မာစေနိုင်၏။ အခြားတစ်ဖက်တွင်မူ အားလပ်ခွင့်သည် ဆက်ဆံရေး၌ နောက်ပိုင်းပြန်ပြုပြင်ရခက်လှသော အက်ကြောင်းကို ဖြစ်စေနိုင်သည်။ သတင်းစာဆရာ လဲန် မောရိုးက ဤသို့ဆိုသည်– “အားလပ်ခွင့်၏အန္တရာယ်အစစ်အမှန်သည် မိသားစုပဋိပက္ခမှန်သမျှကို အာရုံစူးစိုက်ဖွယ်ကောင်းသောပြဇာတ်တွင် ပုံဖော်နိုင်စွမ်းရှိခြင်း၌ မှီတည်နေသည်။ . . . လူတို့သည် မိမိတို့၏ပုံမှန်လုပ်ဆောင်မှုအသက်တာ၌ စိတ်ခံစားမှုကို ဝေမျှရန်နှင့် ခံယူရန် အလုပ်များ၊ အငန်းအတာများ၊ မိတ်ဆွေများနှင့် လုပ်ငန်းဆောင်တာများရှိကြသည်။ နွေရာသီနေအိမ်၏ပြဇာတ်ရုံတွင် နှစ်ပေါင်း ၂၀ ကြာ ထိမ်ဝှက်ထားခဲ့သော မိသားစုပြဿနာများသည် ကျောက်ပုဇွန်ကဲ့သို့ လှိမ့်ကာလှိမ့်ကာပေါ်လာတတ်သည်။

ထို့ကြောင့် အားလပ်ခွင့်ဖြင့်မသွားမီ ယင်းကို ကြည်နူးဖွယ်ကောင်းသော တွေ့ ကြုံမှုတစ်ခုဖြစ်စေရန် သတိရှိရှိဖြင့် ဆုံးဖြတ်ချက်ချပါ။ စိတ်ဝင်စားမှု၌ ကွာခြားမှုရှိတတ်ကြောင်း သတိရပါ။ ကလေးများက စွန့်စားလိုကြမည်ဖြစ်ပြီး မိဘများက အပန်းဖြေလိုကြမည်။ အဘယ်အရာကိုလုပ်မည်၊ အဘယ်သို့သွားမည်နှင့်ပတ်သက်၍ ကိုယ့်အကြိုက်ကို လက်လွှတ်ရန်အသင့်ရှိပါ။ လျော်ကန်၍ လက်တွေ့ကျပါက တစ်ဦးစီ၏ အထူးစိတ်ဝင်စားရာကို အခါအားလျော်စွာ လုပ်ဆောင်ဖို့ ခွင့်ပြုပါ။ နှစ်တစ်လျှောက်လုံး ဘုရားသခင့်ဝိညာဉ်တော်၏အရည်အသွေးများကို နေ့စဉ်လိုက်လျောက်ရန် သင်ယူပါ၊ သို့ဖြင့် သင့်အားလပ်ခွင့်ယူချိန်အတောအတွင်း၌ ယင်းကို ဆက်လက်လုပ်ဆောင်ရန် ခက်ခဲမည်မဟုတ်ချေ။—ဂလာတိ ၅:၂၂၊ ၂၃။

မိသားစု၊ မိတ်ဆွေများနှင့် ကောင်းသောဆက်ဆံရေးကို ထိန်းသိမ်းထားရန် အရေးကြီးသော်လည်း ဘုရားသခင်နှင့် ကျွန်ုပ်တို့၏ ကောင်းသောဆက်ဆံရေးသည် ပို၍ပင်အရေးကြီးသည်။ အားလပ်ခွင့်ဖြင့်သွားချိန်များ၌ ဘုရားသခင်နှင့် ကိုယ်တော်၏တောင်းဆိုချက်များနှင့်ပတ်သက်သော ကျွန်ုပ်တို့၏ခရစ်ယာန်အမြင်မျိုးမရှိသည့် လူများနှင့် တွေ့ဆုံတတ်လေ့ရှိသည်။ သူတို့နှင့် ရင်းရင်းနှီးနှီးပေါင်းသင်းခြင်း—ဒွိဟဖြစ်ဖွယ် ဖျော်ဖြေမှုနေရာများသို့ပင် မကြာခဏသွားရောက်ခြင်း—သည် နောင်တရဝမ်းနည်းဖွယ်အကျိုးဆက်များသို့ ဦးတည်သွားစေနိုင်သည်။ သမ္မာကျမ်းစာက “အလွဲမယူကြနှင့်။ မကောင်းသောသူတို့နှင့်ပေါင်းဖော်ခြင်းအားဖြင့် ကောင်းသောအကျင့်ဓလေ့ယိုယွင်းတတ်၏” ဟုသတိပေးထားခြင်းကို အမှတ်ရပါ။—၁ ကောရိန္သု ၁၅:၃၃။

အားလပ်ခွင့်ဖြင့်သွားချိန်များ၌ ခရစ်ယာန်စံနှုန်းများနှင့် အကျင့်အကြံများမှ လွတ်မြောက်လိုသောဆန္ဒကို သင့်အထဲ၌ သတိပြုမိပါက အဆိုပါအားနည်းမှုကို ပညာရှိစွာရင်ဆိုင်ပြီး ထိုဆန္ဒကို တိုက်လှန်ရန် ဘုရားသခင်၏အကူအညီကို တောင်းခံပါလေ!

အဘယ်အရာကို မြှင့်တင်ပေးသနည်း

ခရစ်ယာန်စံနှုန်းများနှင့်အညီ မိမိတို့၏အသက်တာကို ပုံသွင်းမထားသူတို့သည် အားလပ်ခွင့်ဖြင့်သွားချိန်၌ အရာရာကိုလုပ်နိုင်သည်ဟု ယူမှတ်ပေမည်။ ဥရောပနိုင်ငံအချို့၌ လိင်ဆိုင်ရာကမ္ဘာလှည့်ခရီးသည်လုပ်ငန်းသည် စီးပွားကြီးတစ်ရပ်ဖြစ်လာပြီး အချို့ခရီးသွားကိုယ်စားလှယ်များက ယင်းကိုပင် လှုံ့ဆော်ပေးကြသည်။ ‘အာရှတိုက်သားများနေရာ အချို့မြို့များတွင် ဥရောပတိုက်သားများကလုပ်သော မနှစ်မြို့ဖွယ်ရာအမှုကို သိရှိသည်မှာ ကြာမြင့်လှပြီဖြစ်သည်’ ဟု သည်ယူရိုပီယံက ရေးသားသည်။ အာရှနိုင်ငံတစ်နိုင်ငံကို ရည်ညွှန်းလျက် ဂျာမန်သတင်းစာ ဒါ စပီဂဲလ်က လာရောက်လည်ပတ်သူအမျိုးသားအားလုံးအနက် ၇၀ ရာခိုင်နှုန်းမှာ “လိင်ဆိုင်ရာကမ္ဘာလှည့်ခရီးသည်များ” ဖြစ်ကြသည်ဟု ခန့်မှန်းထားလေသည်။

အမျိုးသမီးကမ္ဘာလှည့်ခရီးသည်များသည် သူတို့၏အမျိုးသားအဖော်အဖက်များလမ်းညွှန်မှုနောက်သို့ ယခု လိုက်နေကြပြီဖြစ်သည်။ ကရစ်ပီယံလေယာဉ်ခရီးစဉ်တွင် အထူးလိုင်းဖြစ်သော ဂျာမန်စင်းလုံးငှားလေကြောင်းက ယင်း၏အမျိုးသမီးခရီးသည်များအနက် ၃၀ ရာခိုင်နှုန်းသည် တရားမဝင်လိင်ဆက်ဆံရန်အတွက် အားလပ်ခွင့်ဖြင့် ထိုသို့သွားကြခြင်းဖြစ်သည်ဟု ခန့်မှန်းသည်။ ဂျာမန်သတင်းစာဆရာတစ်ဦးမှ အကိုးအကားပြုလျက် သည်ယူရိုပီယံက “သူတို့သည် ယင်းကို လွယ်ကူ၍ ရှုပ်ထွေးမှုမရှိသော ပျော်ရွှင်စရာ—တိုင်းတစ်ပါးဖြစ် ကစားစရာ—အဖြစ် ယူမှတ်ကြသည်။”

သို့ရာတွင် စစ်မှန်သောခရစ်ယာန်များသည် တရားမဝင်လိင်ဆက်ဆံခြင်းကို လက်ခံဖွယ်ရှိသောပျော်ရွှင်စရာအဖြစ် မရှုမြင်ကြချေ။ ၎င်းသည် ခရစ်ယာန်စံနှုန်းများကို ဖောက်ဖျက်ရာကျပြီး အန္တရာယ်ဖြင့် ပြည့်နှက်လျက်ရှိသည်။ အန္တရာယ်ရှိကြောင်း အများအားဖြင့်အသိအမှတ်ပြုကြသော်လည်း လူများတို့သည် ထိုအကျင့်အကြံကို ငြင်းဆန်မည့်အစား အကျိုးဆက်များကိုသာ ရှောင်ရှားဖို့ကြိုးစားကြသည်။ ဂျာမန်သတင်းစာတွင်တွေ့ရသော သရုပ်ဖော်ကြော်ငြာတစ်ခုက ထီးတစ်ချောင်းနှင့် ပင်လယ်ကမ်းခြေခုံလွတ်နှစ်လုံးကို ပြသထားသည်။ရုပ်ပုံစာက ဤသို့ဖော်ပြသည်– “အန္တရာယ်ကင်းသော ခရီးစဉ်ဖြစ်ပါစေ၊ အေအိုင်ဒီအက်စ်မပါဘဲ ပြန်လာပါ။”

လိင်ဆိုင်ရာကမ္ဘာလှည့်ခရီးသည်လုပ်ငန်း၏ ဘေးထွက်တစ်ခုမှာ ကလေးကို လိင်ဆိုင်ရာမတော်မတရားကျင့်ခြင်းဖြစ်သည်။ သိသာထင်ရှားစွာပင် ၁၉၉၃ ခုနှစ်၌ ဂျာမန်အစိုးရသည် ဂျာမန်လူမျိုးများအား တိုင်းတစ်ပါး၌ အားလပ်ခွင့်ဖြင့်သွားနေစဉ်တွင်ပင် ကလေးများနှင့်လိင်ဆက်ဆံသည့်အပြစ်ရှိကြောင်း ထင်ရှားပါက ပြစ်ဒဏ်ပေးရန် ဥပဒေတစ်ရပ် ထုတ်ဆင့်ခဲ့သည်။ သို့ရာတွင် ယခုအချိန်အထိ ထိရောက်သည့်ရလဒ်များမှာ အနည်းငယ်သာရှိသည်။ ကလေးပြည့်တန်ဆာများသည် လူ့ဘောင်အသိုင်းအဝန်း၏မျက်နှာပြင်ပေါ်မှ ရင်းနေသောအနာတစ်ခုဖြစ်လာပြီး ဆက်လက်တည်ရှိနေလေပြီ။

အားလပ်ခွင့်ကို အကျိုးဖြစ်ထွန်းသောအချိန် ဖြစ်စေခြင်း

စာဖတ်ခြင်း၊ ကျမ်းစာလေ့လာခြင်းနှင့် ခရစ်ယာန်ဓမ္မအမှု၌ပါဝင်ခြင်းသည် စစ်မှန်သောခရစ်ယာန်များအတွက် နှစ်သက်ဖွယ်ဖြစ်ပြီး အကျိုးဖြစ်ထွန်းသောလုပ်ဆောင်မှုများဖြစ်လေသည်။ သို့သော် အများသောသူတို့သည် ဤအရာများကို သူတို့နှစ်သက်သောအတိုင်းအတာအထိလုပ်ဆောင်ရန် အချိန်အလုံအလောက်ရရှိဖို့ ရုန်းကန်ကြရသည်။ အချိန်လု၍လုပ်ဆောင်ရသော ကန့်သတ်မှုအချို့မှကင်းဝေးခွင့်ရသည့် အားလပ်ခွင့်ယူထားချိန်ထက် အဘယ်ချိန်ကများ ယင်းကိုပြီးမြောက်အောင်လုပ်ဆောင်ရန် အကောင်းဆုံးအချိန်ရှိပါမည်နည်း။

မှန်ပေသည်၊ အလုပ်များ၍ ကျေနပ်ဖွယ်ဖြစ်သော အားလပ်ခွင့်သည် သင်ပုံမှန်လုပ်ဆောင်နေကျအတိုင်းအတာအထိ ခရစ်ယာန်မှုရေးရာကို လုပ်ဆောင်ဖို့ ခွင့်ပြုချင်မှ ခွင့်ပြုမည်။ သို့သော် တည်ဆောက်မှုဖြစ်စေသော ဝိညာဉ်ရေးလှုပ်ရှားမှုများအတွက် အချိန်အနည်းငယ်မျှ ကြိုးစား၍ဖယ်ထားလျှင်မကောင်းပေလော။ ယင်းက အပန်းဖြေရန်အတွက်လည်း အချိန်ကျန်ဦးမည်ဖြစ်သည်။ မှန်ပေသည်၊ အချို့တို့သည် သူတို့၏ဓမ္မအမှုကိုတိုးချဲ့ရန်အတွက် အားလပ်ခွင့်ယူချိန်များ၌ ရရှိနိုင်မည့်အချိန်ပိုများကိုပင် အခွင့်အရေးယူကြသည်။ ယေရှုမိန့်တော်မူသကဲ့သို့ “ဝိညာဉ်ရေးတွင် မိမိတို့လိုလျက်နေကြောင်း သတိပြုသူများသည် ဝမ်းမြောက်စရာရှိကြ၏။”—မဿဲ ၅:၃၊ ကဘ။

မကြာမီ အသင်သည်လည်း အားလပ်ခွင့်ယူပေမည်။ သို့ဖြစ်လျှင် ယင်း၌ ပျော်မွေ့ရန် သေချာစေပါ! ဖြစ်နိုင်စရာအကြောင်းရှိသည့်အန္တရာယ်များနှင့်ပတ်သက်၌ အလွန်အမင်းပူပင်သောကမရောက်ပါနှင့်၊ သို့သော် သင့်လျော်သောကြိုတင်ကာကွယ်မှုကိုပြုပါ။ ဤစာမျက်နှာမှ လေးထောင့်ကွက်တွင်တွေ့ရသော အကြံပြုချက်များကို စိတ်တွင်ထားပါ။ ပြီးနောက် လန်းဆန်း၍ စိတ်လက်အေးချမ်းကာ အရေးအကြီးဆုံးဖြစ်သော ဘဝအသက်တာ၏လှုပ်ရှားဆောင်ရွက်မှုတို့၌ လုပ်ဆောင်လိုဇောနှင့် ပြန်လာပါ။ မကြာမီပင် အားလပ်ခွင့်ရက်ကုန်ဆုံးသွားမည်ဖြစ်သော်လည်း မြတ်နိုးစရာ အမှတ်ရဖွယ်ရာအချို့သည် ထာဝရကျန်ရစ်နေမည်ဖြစ်သည်။ နောင်တရဝမ်းနည်းခြင်းမရှိဘဲ အားလပ်ခွင့်၌ ပျော်မွေ့ခွင့်ရခြင်းသည် တန်ဖိုးရှိလှပါသည်တကား!

[စာမျက်နှာ ၁၀ ပါ လေးထောင့်ကွက်]

အားလပ်ခွင့်အတွက် အသုံးဝင်မည့်အချက်အလက်အချို့

ရာဇဝတ်မှုကို တိုက်လှန်ခြင်း

၁။ အိမ်တွင်ကျန်ခဲ့သောအရာများကို တစ်ဦးတစ်ယောက်က ကြည့် ရှုစောင့်ရှောက်ထားပေးဖို့ စီစဉ်ပါ။

၂။ အန္တရာယ်ရှိသည်ဟု ရှုမြင်ခံရလေ့ရှိသော နယ်မြေများမှ ဝေးဝေးနေပါ။

၃။ ခါးပိုက်နှိုက်များကို သတိထားပါ၊ ပိုက်ဆံများကို သင့်ကိုယ်ပေါ်တွင် လုံခြုံသည့်နေရာ၌ထားပါ၊ အပိုပိုက်ဆံများကို သင်နေထိုင်သည့်နေရာရှိ စိတ်ချရသောနေရာတွင် ချန်ထားပါ။

၄။ မတောင်းဆိုဘဲ အကူအညီပေးလာသည့် သူစိမ်းဖြစ်သူများကို သတိထားပါ။

မတော်တဆမှုများကို ရှောင်ရှားခြင်း

၁။ ကားမောင်းနေရပါက သတိရှိပါ၊ မကြာခဏရပ်နားပါ။

၂။ ဟိုတယ်တွင်နေထိုင်စဉ် သို့မဟုတ် လေယာဉ်စီးနင်းစဉ် အရေးပေါ်ကိစ္စရပ်များအတွက်ပြင်ဆင်ပေးရာများကို သတိရှိရှိဖြင့် မှတ်သားပါ။

၃။ ရောက်ရှိပြီးနောက် ပြင်းထန်သည့်လှုပ်ရှားမှုများ မလုပ်ဆောင်မီ ကိုယ်ကာယပြုပြင်ပြောင်းလဲမှုအတွက် အချိန်အလုံအလောက်ပေးပါ။

၄။ သင့်လှုပ်ရှားဆောင်ရွက်မှုများအတွက် သင့်တော်သော အဝတ်အစား၊ ရှူးဖိနပ်များနှင့် ကိရိယာတန်ဆာပလာများရှိထားပါ။

ကျန်းမာမှု ရှိအောင်နေခြင်း

၁။ လိုအပ်ကောင်းလိုအပ်မည့် ကာကွယ်ဆေးထိုးခြင်း သို့မဟုတ် ဆေးဝါးများနှင့်ပတ်သက်၍ သင့်ဆရာဝန်ထံမှ အကြံဉာဏ်တောင်းခံပါ။

၂။ လိုအပ်သောဆေးဝါးများပါသည့် ခရီးသွားဆေးအိတ်ကို ယူဆောင်သွားပါ။

၃။ အလုံအလောက်အနားယူပါ၊ ထိုပြင် သင်စားသည့်၊ သောက်သည့်အရာများကို သတိထားပါ။

၄။ ဆေးဝါးနှင့်ပတ်သက်သည့် သင့်လိုအပ်မှု သို့မဟုတ် သင့်ဆန္ဒနှင့်စပ်လျဉ်းသော လိုအပ်သည့်စာရွက်စာတမ်းများကို သင့်ကိုယ်ပေါ်တွင် အမြဲဆောင်ထားပါ။

ဆက်ဆံရေးတွင် ပျော်ရွှင်မှု ရှိစေခြင်း

၁။ သင်နှင့်အတူရှိသောသူများကို မေတ္တာနှင့် ထောက်ထားစာနာမှု တင်ပြပါ။

၂။ ပုဂ္ဂိုလ်ရေးပေါင်းသင်းမှု၌ စံနှုန်းကို မြင့်မြင့်ထားပါ။

၃။ ဒွိဟဖြစ်ဖွယ်ဟု သင်ယူမှတ်သော လှုပ်ရှားဆောင်ရွက်မှုများအတွင်းသို့ အခြားအားလပ်ခွင့်ဖြင့်လာသူများက သင့်ကို သွေးဆောင်သွားခွင့် မပြုလိုက်ပါနှင့်။

၄။ ဝိညာဉ်ရေးလိုအပ်မှုကို ဖြည့်ဆည်းရန် အချိန်အချို့ကို ဖယ်ချန်ထားပါ။

[စာမျက်နှာ ၉ ပါ ရုပ်ပုံ]

အားလပ်ခွင့်ယူချိန်၌ အကျိုးရှိသောလှုပ်ရှားဆောင်ရွက်မှုများကို ရွေးချယ်ပါ