ပင်ပန်းနွမ်းနယ်မှု ကုန်တင်ကားမောင်းသူများအတွက် မမြင်ရသော ထောင်ချောက်

ဂျာမနီနိုင်ငံမှ နိုးလော့! သတင်းထောက်ပေးပို့သည်

လမ်းမပေါ်တွင် နာရီပေါင်းများစွာ မောင်းနှင်လာသည်နှင့်အမျှ စက်အားကောင်းသောအင်ဂျင်စက်၏ ငြီးငွေ့ဖွယ်အသံနှင့် ဘီး ၁၄ ခု၏တစီစီမြည်သံတို့က ကုန်တင်ယာဉ်မောင်း၏ ပင်ပန်းနွမ်းနယ်မှုအား တိုက်လှန်ခြင်းကို အခက်အခဲဖြစ်စေပါသည်။ ကားရှေ့မီးရောင်အောက်တွင် ယာဉ်ကြောသတ်မှတ်သည့်မျဉ်းကြောင်းသည် နောက်တွင်တရိပ်ရိပ်ကျန်ခဲ့သည်။ ရုတ်တရက်ပင် နောက်တွဲယာဉ်သည် ဟိုဘက်သည်ဘက် ယိမ်းထိုးနေပါသည်; ယာဉ်သည် လမ်းပေါ်မှ စတင်လွဲချော်သွားတော့သည်။

ယာဉ်မောင်းသည် စတီယာရင်ကိုပြန်ထိန်းလိုက်ကာ တန်-၄၀ လေးသော မိမိ၏ယာဉ်ကို လမ်းမပေါ်သို့ ပြန်ရောက်စေသည်။ လုံးလုံးသတိပြန်ဝင်လာပြီး ကုန်လွန်သွားသော စက္ကန့်အနည်းငယ်ကို မမှတ်မိတော့ကြောင်း သူအသိအမှတ်ပြုရတော့သည်။ ပင်ပန်းနွမ်းနယ်မှုဒဏ်ကို သူခံစားနေရခြင်းဖြစ်သည်။a

မောင်းနှင်နေစဉ် ပင်ပန်းနွမ်းနယ်မှုကို တိုက်လှန်နေသူတိုင်းသည် အခိုက်အတန့်အားဖြင့် အလွယ်တကူ မှေးကနဲဖြစ်သွားနိုင်ပါသည်။ ယနေ့ ကျပ်သိပ်နေသောလမ်းမများနှင့်ဆိုလျှင် ယင်းသို့ဖြစ်ခြင်းသည်—လမ်းကိုအသုံးပြုသော အခြားသူများအတွက်ပင်—အလွန်အန္တရာယ်ရှိနိုင်ပါသည်။ သာဓကအနေဖြင့်၊ တောင်အာဖရိကနိုင်ငံတွင် ၁၉၈၉၊ ဇန်နဝါရီနှင့် ၁၉၉၄ မတ်လစပ်ကြားတွင်ဖြစ်ပွားခဲ့သော ကုန်ပစ္စည်းများတင်ဆောင်သည့်ယာဉ်များ ပါဝင်ပတ်သက်သော မတော်တဆထိခိုက်မှုအားလုံး၏ ၃၅ ရာခိုင်နှုန်းကျော်သည် ယာဉ်မောင်းများ မောင်းနှင်နေစဉ် အိပ်ငိုက်သွားကြခြင်းကြောင့်ဖြစ်သည်။

ယာဉ်မောင်းအမူအကျင့်ကို သုတေသနပြုသူတစ်ဦးဖြစ်သူ ဂျီ.စတော့ကာက ဂျာမန်မဂ္ဂဇင်း ဖဲဆွလ်တွင် ပင်ပန်းနွမ်းနယ်မှုတိုးများလာခြင်းက အိပ်ချင်မူးတူးဖြစ်စေပြီး ၎င်းတွင်ရှိသောအကျိုးဆက်သည် အရက်ကြောင့်ဖြစ်ပေါ်သည့်အရာနှင့် ထပ်တူဖြစ်သည်ဟုဆိုသည်။ မှန်ပါသည်၊ သူ၏ပြောဆိုချက်များသည် ကုန်တင်ယာဉ်မောင်းများအတွက်သာမဟုတ်ဘဲ ယာဉ်မောင်းအားလုံးအတွက် သက်ဆိုင်မှုရှိပါသည်။

ပင်ပန်းနွမ်းနယ်ရသည့်အကြောင်းရင်းများ

နိုင်ငံများစွာတွင် ကုန်တင်ယာဉ်မောင်းများအတွက် အကြာဆုံးမောင်းနှင်နိုင်သောအချိန်နှင့်ပတ်သက်၍ အကြံပြုခြင်း သို့မဟုတ် စည်းကမ်းပင်ထုတ်ဆင့်ခြင်းပြုကြပါလျက်နှင့် ပင်ပန်းနွမ်းနယ်မှုနှင့်ဆက်စပ်သော မတော်တဆဖြစ်မှုများ အဘယ်ကြောင့် မကြာခဏဖြစ်ပျက်နေပါသနည်း။ အစပျိုးရသော် ယာဉ်မောင်းနှင်သည့်အချိန်သာမဟုတ်ဘဲ အခြားအလုပ်လုပ်သောအချိန်ပါဝင်သည့် ကုန်တင်ယာဉ်မောင်းများ၏ အလုပ်လုပ်ချိန်စုစုပေါင်းကို ကြည့်ရမည်ဖြစ်သည်။ ဤအလုပ်ချိန်များသည် ကြာရှည်ပြီး ပုံမှန်မဟုတ်ဘဲဖြစ်လေ့ရှိသည်။

ကုန်တင်ယာဉ်မောင်းအများစုသည် တာဝန်အစမှအဆုံးအထိ ပြီးမြောက်အောင်လုပ်ဆောင်ရခြင်းကို ပျော်မွေ့ ကြသည်၊ ဆိုလိုသည်မှာ စားသုံးသူထံ ကုန်ပစ္စည်းများ ရာသီမရွေး သယ်ယူပို့ဆောင်ပေးခြင်းဖြစ်သည်။ လုပ်ငန်းစွမ်းဆောင်နိုင်မှုကို ခရီးအကွာအဝေးနှင့် ကုန်စည်ပမာဏတို့ဖြင့် တိုင်းတာသည်။ အလုပ်ချိန်သည် ပျမ်းမျှအလုပ်ချိန်ထက် အလွန်ပိုများနေပေမည်။ ဂျာမနီနိုင်ငံရှိ လူအများစုသည် တစ်ပတ်လျှင် နာရီ ၄၀ အောက်လျော့၍ လုပ်ဆောင်ကြသော်လည်း၊ များစွာသော ကုန်တင်ယာဉ်မောင်းများမူ ယင်းအချိန်၏နှစ်ဆအလုပ်လုပ်ကြသည်။

အခြားနိုင်ငံများတွင်လည်း အခြေအနေမှာ ထူးမခြားနားပင်ဖြစ်သည်။ တောင်အာဖရိကနိုင်ငံတွင် လုပ်ခနည်းသည့်အတွက် ယာဉ်မောင်းများသည် အချိန်ကြာကြာမောင်းနှင်ခြင်းဖြင့် ဝင်ငွေကိုထပ်ဖြည့်စွက်ရန် ကြိုးစားကြသည်။ သယ်ယူပို့ဆောင်ရေးအသင်းများက ယာဉ်မောင်းများအား ခရီးစဉ်ပြီးဆုံးသည်အထိ အချိန်အလုံအလောက်ပေးထားသော်လည်း များစွာသောကုန်တင်ယာဉ်မောင်းများသည် ခရီးစဉ်တွင်မပါသောနေရာများအတွက် အပိုကုန်များတင်ဆောင်၍ပို့ပေးခြင်းဖြင့် အပိုဝင်ငွေရှာကြကြောင်း၊ သို့ပြုခြင်းဖြင့် ယာဉ်မောင်းချိန်ပိုများရကြောင်း အိန္ဒိယနိုင်ငံမှ သတင်းမှတ်တမ်းများက ဖော်ပြသည်။ သို့ဖြင့် သူတို့သည် အလုပ်သို့အချိန်မီပြန်ရောက်ရန် အိပ်ချိန်ကို လျှော့ပစ်ကြရသည်။

ဥရောပသမဂ္ဂအဖွဲ့အတွင်းတွင် ဥပဒေကခွင့်ပြုသော အကြာဆုံးနာရီကိုအသုံးပြုခြင်းဖြင့် ကုန်တင်ယာဉ်မောင်းတစ်ဦးသည် တစ်ပတ်လျှင် ၅၆ နာရီကြာမောင်းနှင်နိုင်သည်။ သို့သော် နောက်တစ်ပတ်တွင် သူ၏အကြာဆုံးမောင်းနှင်သည့်အချိန်သည် ၃၄ နာရီသို့လျော့ကျသွားသည်။ ကုန်တင်ကုန်ချချိန်အပါအဝင် သူ၏အလုပ်ချိန်ကို စောင့်ကြပ်စစ်ဆေးသည့်ကိရိယာဖြင့် မှတ်တမ်းတင်ထားသည်။ ယင်းမှတ်တမ်းဖြင့် ယာဉ်မောင်းတစ်ဦးစီအား စည်းကမ်းသတ်မှတ်ချက်များနှင့်ညီမညီ စစ်ဆေးနိုင်ပါသည်။

ယာဉ်မောင်းချိန်ကို အကျိုးသက်ရောက်စေသည့် အခြားအချက်တစ်ခုမှာ ပိုင်ရှင်ဖြစ်သူ၏အမြင်ရှုထောင့်ဖြစ်သည်။ သူ၏ကုန်တင်ကားကို တန်ဖိုးကြီးကြီးဖြင့် ရင်းနှီးမြှုပ်နှံထားသောကြောင့် ဖြစ်နိုင်ပါက အကျိုးအမြတ်ကောင်းကောင်းရရှိရန်အတွက် ကုန်စည်များကို ၂၄ နာရီလုံးလုံးသယ်ယူပို့ဆောင်စေလိုကြသည်။ ပြိုင်ဆိုင်ခြင်းသည် သယ်ယူပို့ဆောင်ရေးအသင်းများ၏အလယ်တွင် ကြီးထွားလျက်ရှိသည့်အပြင် မန်နေဂျာများသည် ယာဉ်မောင်းများအား စေတနာဖြင့် အချိန်ပိုလုပ်ဆောင်ကြရန် ဖိအားပေးကြသည်။

ပင်ပန်းနွမ်းနယ်ရခြင်းသည် အလုပ်ချိန်ကြာရှည်ခြင်းကြောင့်သာမက သာမန်မဟုတ်သောအချိန်တွင် အလုပ်စရခြင်းတို့ကြောင့်ဖြစ်သည်။ သာဓကအနေဖြင့် နံနက်ပိုင်းတွင် တစ်နာရီနှင့် လေးနာရီစပ်ကြားလုပ်ငန်းစတင်ခြင်းသည် လုပ်နေကျဖြစ်သည်။ ထိုအချိန်သည် ယာဉ်မောင်းများအတွက် အားအင်အယုတ်လျော့ဆုံးနှင့် အာရုံစူးစိုက်နိုင်မှုအနည်းဆုံးအချိန်ဖြစ်သည်။ သိုလှောင်ရုံတွင် ကုန်ပစ္စည်းများများမထားသော ပို့ဆောင်ရေးအသင်းများတွင် ‘အချိန်မီ’ ပို့ပေးရန်လိုအပ်သောကြောင့် ဖိစီးမှုတိုးများလာသည်။ ယင်းက ယာဉ်မောင်းများသည် စားသုံးသူတို့ထံ သဘောတူညီထားသည့်အချိန်တွင် ကုန်စည်ဖြင့်အတိအကျရောက်လာရမည်ကို ဆိုလိုပါသည်။ ယာဉ်သွားယာဉ်လာထူထပ်ခြင်း၊ ရာသီဥတုဆိုးရွားခြင်းနှင့် လမ်းပြုပြင်မှုများက ယာဉ်မောင်းကို တစ်နည်းနည်းဖြင့် လျော်ကြေးပေးရသည့် နှောင့်နှေးကြန့်ကြာမှုကို ဖြစ်စေနိုင်ပါသည်။

ယာဉ်မောင်းချိန်ခွင့်ပြုနာရီကန့်သတ်ထားသည့်ကြားမှ ရဲတို့၏ရှောင်တခင်စစ်ဆေးမှုများက ဥပဒေချိုးဖောက်မှုများကို ဖော်ထုတ်တွေ့ရှိစမြဲဖြစ်သည်။ ပိုလက်တ်စီးဖဲရ်ကားအန့်တက္ကနစ်ခ် မဂ္ဂဇင်း၏အဆိုအရ “ကုန်တင်ယာဉ်များ၊ ဘတ်စကားများနှင့် အဝေးပြေးကုန်တင်ယာဉ်ကြီးများမောင်းနှင်သည့် ယာဉ်မောင်းအားလုံးတွင် ၈ ယောက်လျှင် ၁ ယောက်ခန့်သည် ယာဉ်မောင်းချိန်နှင့်အနားယူချိန်နာရီလမ်းညွှန်ချက်များကို မလိုက်နာကြချေ။” ဟမ်းဘတ်မြို့ရှိ မီးပွိုင့်တစ်ခုတွင် စစ်ဆေးမှုပြုလုပ်စဉ် ကုန်တင်ယာဉ်မောင်းတစ်ဦးသည် မိမိ၏ယာဉ်ကို ရပ်နားခြင်းမရှိဘဲ ၃၂ နာရီကြာမောင်းနှင်လာခဲ့ကြောင်း ရှာဖွေတွေ့ ရှိခဲ့ကြသည်။

အန္တရာယ်ကိုအသိအမှတ်ပြုခြင်း

အပြည်ပြည်ဆိုင်ရာကုန်စည်တို့ကို နှစ်ပေါင်း ၃၀ ကြာပို့ဆောင်ပေးခဲ့သူ အဝေးပြေးယာဉ်မောင်းအား ပင်ပန်းနွမ်းနယ်မှုပြဿနာအကြောင်းကို မေးမြန်းခဲ့ပါသည်။ သူဤသို့သတိပြုမိခဲ့သည်– “ဝါကြွားခြင်းနှင့် ယုံကြည်စိတ်ချလွန်းခြင်းက ယာဉ်မောင်းတစ်ဦးအား ပင်ပန်းမှုကိုလျစ်လျူရှုစေနိုင်ပါသည်။ ယင်းသည် မတော်တဆဖြစ်ပျက်သည့်နည်းဖြစ်သည်။” ပင်ပန်းနွမ်းနယ်မှုလက္ခဏာများကို စာမျက်နှာ ၁၉ ရှိလေးထောင့်ကွက်တွင် စာရင်းတင်ပြထားပါသည်။

ကြိုတင်သတိပေးလက္ခဏာများကို အသိအမှတ်ပြုခြင်းက အသက်အန္တရာယ်ကင်းစေနိုင်ပါသည်။ အမေရိကန်ပြည်ထောင်စုတွင် အမျိုးသားသယ်ယူပို့ဆောင်ရေး ဘေးအန္တရာယ်ကင်းရှင်းရေးဘုတ်အဖွဲ့မှပြုလုပ်သော လေ့လာမှုတစ်ရပ်က သတိပြုဖွယ်ကောင်းသည့်အချက်တစ်ရပ်ကို ဤသို့ဖော်ပြခဲ့သည်– ကုန်တင်ကားတစ်မျိုးတည်း မတော်တဆဖြစ်မှု ၁၀၇ ခုတွင် ၆၂ ခုသည် ပင်ပန်းနွမ်းနယ်မှုနှင့်ဆက်နွှယ်သည်။ ထို့ကြောင့် ကုန်စည်ပို့ဆောင်ရေးလုပ်ငန်းက ယာဉ်မောင်း ငိုက်မြည်းသွားသည့်အခါတိုင်း သတိပေးသည့် ကိရိယာပေါ်ပေါက်လာရေးသည် လွန်စွာအရေးကြီးကြောင်း ယူမှတ်ကြသည်။

ဂျပန်ကုန်စည်လုပ်ငန်းတစ်ခုသည် ယာဉ်မောင်းဖြစ်သူက မည်မျှမျက်တောင်ခတ်သည်ကို သတိပြုစောင့်ကြည့်သည့် ဗီဒီယိုကင်မရာကိုအသုံးပြုသော အီလက်ထရွန်းနစ်စနစ်ကိရိယာတစ်ခုပေါ်ပေါက်ရန် ကြိုးစားနေသည်။ လေးလံနှေးကွေးစွာမျက်တောင်ခတ်သည့်အကြိမ်များလာလျှင် ကြိုတင်အသံသွင်းထားသည့်အသံတစ်ခုက အန္တရာယ်ရှိသည့်အခြေအနေတွင်ရောက်နေကြောင်း ယာဉ်မောင်းကို သတိပေးသည်။ ဥရောပကုမ္ပဏီတစ်ခုကမူ ယာဉ်ကို မည်မျှညင်သာစွာမောင်းသည်မမောင်းသည်ကို တိုင်းတာသည့်ကိရိယာကို တီထွင်စမ်းသပ်နေသည်။ ကုန်တင်ယာဉ်သည် ယိမ်းထိုးခဲ့သည်ရှိသော် ယာဉ်မောင်းခန်းတွင် သတိပေးချက်အသံထွက်လာသည်။ သို့ရာတွင် ထိရောက်မှုရှိသော အထောက်အကူပြုကိရိယာများကိုမထုတ်လုပ်နိုင်မီ အချိန်အတန်ကြာပေဦးမည်။

အန္တရာယ်ကိုတန်ပြန်တိုက်လှန်ခြင်း

ပင်ပန်းနွမ်းနယ်မှုသည် ယာဉ်တိုင်းလိုလိုအတွက် မဖိတ်ခေါ်မလိုလားသည့်ခရီးသည်ကဲ့သို့ဖြစ်သည်။ မေးခွန်းမှာ ယင်းကို မည်သို့မည်ပုံဖယ်ထုတ်ရမည် ဟူ၍ဖြစ်သည်။ အချို့တို့သည် ကဖိန်းဓာတ်ပါသောအရည်များကို အမြောက်အမြားသောက်သုံးကြသော်လည်း ပင်ပန်းနွမ်းနယ်မှုသည် သနားကြင်နာခြင်းကင်းစွာ အကျိုးသက်ရောက်ဆဲဖြစ်သည်။ အခြားသူများမူ တခြားစိတ်နိုးကြွစေသည့်အရာများကိုသုံးစွဲကြသည်။ ယင်းတို့တွင် ကျန်းမာရေးထိခိုက်စေသည့်အရာများပါဝင်ကြောင်းကို ပြောစရာပင်မလိုပါ။ မက္ကစီကိုရှိ အချို့ယာဉ်မောင်းများသည် နိုးကြားနေရန်အတွက် ငရုတ်သီးထောင့် (အလွန်စပ်သော ငရုတ်ကောင်း) ကိုကိုက်စားကြသည်။

စောစောမစတင်မီ အိပ်ရေးဝအောင်အိပ်စက်ခြင်းသည် ကောင်းပါသည်။ ထို့ပြင် စည်းမျဉ်းမူအရ တစ်ဦးတစ်ယောက်သည် မောင်းနှင်သည့်အချိန်ပမာဏညွှန်ကြားချက်ကို လိုက်နာသင့်သည်။ တောင်အာဖရိကနိုင်ငံရှိ ကျွမ်းကျင်သူများက ငါးနာရီကြာမောင်းနှင်ပြီးနောက် ခေတ္တရပ်နားရန်အကြံပြုကြသည်။ ငြီးငွေ့ဖွယ်ကောင်း၍တစ်ဖြောင့်တည်းဖြစ်နေသောလမ်းတွင် ယာဉ်မောင်းသည် မိမိ၏စိတ်ကို တက်ကြွနေစေသင့်ပြီး အာရုံကိုစုစည်းထားသင့်သည်။ အချို့ယာဉ်မောင်းများသည် ရေဒီယိုနားထောင်ကြသည် သို့မဟုတ် စီဘီရေဒီယိုဖြင့်အခြားယာဉ်မောင်းများနှင့် ​စကားပြောဆိုကြသည်။ ယေဟောဝါသက်သေတစ်ဦးဖြစ်သူ ယာဉ်မောင်းတစ်ဦးသည် ကင်းမျှော်စင်၊ နိုးလော့!နှင့် သမ္မာကျမ်းစာမှ စကားတော်များကဲ့သို့သော ကျမ်းစာဆိုင်ရာ အကြောင်းအရာများပါ ကက်ဆက်ခွေများကို နားထောင်သည်။ အခြားအကြံပြုချက်များကို ဤစာမျက်နှာ၏လေးထောင့်ကွက်တွင် တွေ့နိုင်ပါသည်။

အသက်ရှင်နေထိုင်ရေးစရိတ်ကိုပြည့်မီစေသည့် ဝင်ငွေအလုံအလောက်ရရှိရေးသည် တိုး၍တိုး၍ခက်ခဲလာသည်ဖြစ်ရာ ဟန်ချက်ညီရန်မှာ မလွယ်ကူချေ။ အချို့လုပ်ငန်းကုမ္ပဏီများနှင့် မန်နေဂျာများသည် ယာဉ်မောင်းများအတွက် ပင်ပန်းနွမ်းနယ်မှုထောင်ချောက်က ဖြစ်ပေါ်စေသည့် အန္တရာယ်ကို လျှော့တွက်ကြသည်။ သယ်ယူပို့ဆောင်ရေးလုပ်ငန်းနှင့် ပတ်သက်ဆက်နွှယ်သူတိုင်းသည် ယခုအထိသိရှိခဲ့ရသည့် ပင်ပန်းနွမ်းနယ်မှုအကြောင်းကို စိတ်တွင်စွဲမှတ်ထားသင့်သည်။ ထို့အပြင် ယာဉ်မောင်းများသည် မိမိတို့ကိုယ်တိုင်၏တွေ့ကြုံမှုမှ အသုံးဝင်သောအချက်အလက်များကို ရရှိလေ့ရှိပြီး ယင်းက ငိုက်မြည်းခြင်းကိုတိုက်လှန်ရာတွင် အခြားသူများကို ကူညီပေးနိုင်ပါသည်။

နိုးကြားနေရန် အကောင်းဆုံးနည်းကား ခန္ဓာကိုယ်၏တောင်းဆိုချက်ကို ဖြည့်စွက်ပေးခြင်းဖြစ်သည်– မည်သည့်သတိပေးချက်လက္ခဏာကိုမဆို သင်သတိပြုမိပါက အနီးဆုံးအနားယူနိုင်မည့်နေရာတွင်ရပ်ကာ အိပ်စက်အနားယူပါ။ ထို့နောက်မှ နောက်တစ်ဖန်မောင်းနှင်ရမည့် စိန်ခေါ်ချက်ကိုလုပ်ဆောင်ပါ။ မမြင်ရသော ပင်ပန်းနွမ်းနယ်မှုထောင်ချောက်ထဲသို့ အကျမခံပါနှင့်!

[အောက်ခြေမှတ်ချက်]

[စာမျက်နှာ ၁၉ ပါ လေးထောင့်ကွက်]

ချက်ချင်းလုပ်ဆောင်ရန်လိုအပ်သောသတိပေးချက်လက္ခဏာများ

• သင်သည် မျက်စိစပ်ခြင်း သို့မဟုတ် မျက်ခွံလေးခြင်းဖြစ်နေပါသလော

• သင် စဉ်းစားတွေးတောနေသလော သို့မဟုတ် စိတ်ကူးယဉ်နေသလော

• အလယ်မျဉ်းကို ခွမောင်းနေရသည့်အထိ လမ်းသည် ကျဉ်းမြောင်းလာပုံရသလော

• ခရီးစဉ်၏တစ်စုံတစ်ရာသောအပိုင်းများကို သင်မေ့နေသလော

• စတီယာရင်ဘီးနှင့် ဘရိတ်ကိုအသုံးပြုခြင်းသည် သာမန်ထက်ပို၍ ဆတ်ကနဲဖြစ်သလော

အထက်ပါမေးခွန်းများမှတစ်ခုမျှကိုသာ ဟုတ်ပါသည်ဟုဖြေဆိုခြင်းသည် သင်ချက်ချင်းအနားယူရန်လိုအပ်ကြောင်းပြသည်

[စာမျက်နှာ ၂၀ ပါ လေးထောင့်ကွက်]

ဝေးလံရှည်လျားသောခရီးစဉ်များအတွက်

• အိပ်ရေးဝဝအိပ်ပါ

• စိတ်တက်ကြွစေသည့်ဆေးများကို အားမထားပါနှင့်

• အနားယူချိန်ပုံမှန်ယူပါ၊ သွက်လက်ပေါ့ပါးအောင် ကိုယ်လက်လှုပ်ရှားမှုလုပ်ပါ

• ငြီးငွေ့ ဖွယ်ကောင်း၍ တစ်ဖြောင့်တည်းဖြစ်နေသောလမ်းသည် အထူးသဖြင့် အန္တရာယ်ရှိကြောင်း စိတ်ထဲတွင်မှတ်ထားပါ

• ဆာလောင်နေလျက်နှင့် ခရီးစဉ်တစ်ခုကို မစတင်ပါနှင့်။ ကောင်းစွာစားသောက်သည့်အလေ့အထရှိရန် သင့်ကိုယ်ကို လေ့ကျင့်ပေးပါ– တော်သင့်ကာ ကျန်းမာရေးနှင့်ညီညွတ်သည့်အစာ

• အရည်များများသောက်ပါ၊ သို့သော် အရက်ကိုရှောင်ပါ