ဟာလာဟင်းလင်းဖြစ်နေသော အသိုက် အမြုံတွင် ပျော်ရွှင်စွာနေထိုင်ခြင်း

“ကျွန်မတို့အများစုအနေနဲ့ ဘယ်လောက်ပဲကောင်းကောင်း ကြိုတင်ပြင်ဆင်ထားပါစေ နောက်ဆုံးခွဲခွာသွားချိန်ဟာ နှလုံးသည်းပွတ်နာကျင်စရာပါပဲ” ဟုမိခင်တစ်ဦး ဝန်ခံသည်။ မှန်ပါသည်၊ သားသမီးများခွဲခွာသွားခြင်းကို မလွဲမသွေရင်ဆိုင်ရမည်ဖြစ်သော်လည်း အမှန်တကယ်ခွဲခွာချိန်တွင် ကိုင်တွယ်ဖြေရှင်းရသည်မှာ မသက်သာလှပေ။ သားဖြစ်သူနှုတ်ဆက်ခွဲခွာသွားပြီးနောက် တုံ့ပြန်ခံစားရပုံနှင့်ပတ်သက်ပြီး ဖခင်တစ်ဦး ဤသို့ပြောပြသည်– “ကျွန်တော့်ဘဝမှာ ပထမဆုံးအကြိမ် . . . ငိုချလိုက်ပါတော့တယ်။”

မိဘအများအတွက် သားသမီးများ ခွဲခွာသွားခြင်းသည် သူတို့၏ဘဝတွင် အကြီးအကျယ်ဟာတာတာဖြစ်ကျန်ခဲ့သည်—ဒဏ်ရာဟောင်းလောင်းနှင့်ကျန်ခဲ့သည်။ သားသမီးနှင့်အဆက်အသွယ် တစ်ရက်ပြီးတစ်ရက် ပြတ်လာရာ အချို့မိဘများသည် အထီးကျန်မှု၊ ကြေကွဲမှုနှင့် ဆုံးရှုံးမှုတို့ကို အပြင်းအထန်ခံစားကြရရှာသည်။ နေသားတကျဖြစ်ဖို့အခက်တွေ့နေသူများမှာ မိဘများသာမကပါ။ မောင်နှံစုံဖြစ်သော အက်ဒွက်နှင့် အယ်ဗရလ်တို့က ဤသို့သတိပေးသည်– “အိမ်မှာ တခြားသားသမီးတွေ ကျန်နေသေးရင် သူတို့ပါ ဆုံးရှုံးမှုကို ခံစားကြရတယ်။” ဤမောင်နှံစုံပေးသည့်အကြံဉာဏ်ကား “ကျန်သားသမီးများအတွက် အချိန်ပေးပါ၊ နားလည်ပေးပါ။ အဲ့လိုလုပ်ရင် သူတို့နေသားကျသွားပါလိမ့်မယ်။”

မှန်ပါသည်၊ ဘဝဟူသည် ရှေ့ဆက်ရမည့်ခရီးတစ်ခုဖြစ်သည်။ သင့်အလုပ် သို့မဟုတ် အိမ်မှုကိစ္စများကိုလုပ်ရမည့်အပြင် ကျန်ရှိနေသေးသည့် သင့်သားသမီးများကိုကြည့်ရှုစောင့်ရှောက်ရဦးမည်ဆိုလျှင် သင့်ကိုယ်ကို ပူဆွေးမှုထဲတွင် နစ်မနေစေသင့်ပါ။ ထို့ကြောင့် သင့်သားသမီးများ အိမ်မှခွဲခွာသွားသည့်အခါ ပျော်ရွှင်မှုရနိုင်သည့် နည်းလမ်းအချို့ကို ကြည့်ကြစို့။

အကောင်းမြင်ဖို့ ကြိုးစားပါ

သင်သည် ဝမ်းနည်းနေမည် သို့မဟုတ် အထီးကျန်ဖြစ်နေမည်၊ ငိုချလိုက်ဖို့ သို့မဟုတ် ကိုယ်ချင်းစာတတ်သော မိတ်ဆွေတစ်ဦးထံ ခံစားချက်များကို ဖွင့်ချလိုက်ဖို့ လိုသည်ဟုခံစားနေရလျှင် ဤအတိုင်းလုပ်သာလုပ်ပါ။ “ဝမ်းနည်းခြင်းအကြောင်းသည် ညှိုးငယ်စေတတ်၏။ ကောင်းသောစကားမူကား၊ ရွှင်လန်းစေတတ်၏” ဟုကျမ်းစာကဆိုသည်။ (သု. ၁၂:၂၅) တစ်ခါတစ်ရံ ကိစ္စရပ်များနှင့်ပတ်သက်ပြီး အခြားသူများထံမှ ဆန်းသစ်သောအမြင်များ ရနိုင်သည်။ နမူနာတစ်ရပ်အနေဖြင့် မောင်နှံစုံဖြစ်သော ဗယ်လ်ဒီမာနှင့် မာရီယန်တို့က ဤသို့အကြံပြုသည်– “အဲ့ဒီကိစ္စကို ဆုံးရှုံးမှုအဖြစ်သဘောမထားဘဲ ရည်မှန်းချက်တစ်ခုအောင်မြင်စွာ အထမြောက်သွားပြီလို့ သဘောထားလိုက်ပါ။” ကိစ္စရပ်များအပေါ် အကောင်းမြင်နည်းပင်တည်း! “သားလေးတွေကို ယုံကြည်စိတ်ချလောက်တဲ့ လူကြီးတွေဖြစ်လာအောင် မွေးမြူလိုက်နိုင်လို့ ပျော်ရွှင်မိကြတယ်” ဟု ရူဒေါ့ဖ်နှင့် ဟေးလ်ဒီတို့ မောင်နှံကဆိုသည်။

သင်သည် မိမိရင်သွေးကို “ယေဟောဝါ၏ ပဲ့ပြင်ဆုံးမခြင်းနှင့် စိတ်ပိုင်းဆိုင်ရာ ထိန်းကျောင်းခြင်းတို့နှင့်အညီ” ကြီးပြင်းလာစေရန် ကြိုးစားခဲ့သလော။ (ဧဖက် ၆:၄၊ ကဘ) ကြိုးစားခဲ့လျှင်ပင် ရင်သွေးဖြစ်သူ အိမ်မှခွဲခွာသွားရေးနှင့်ပတ်သက်ပြီး စိုးရိမ်နေမိဆဲဖြစ်နိုင်သည်။ သို့သော် မိမိတို့သားသမီးကို ဤသို့လေ့ကျင့်ပေးသူများအား “သို့ပြုလျှင် သူသည်အိုသောအခါ ထိုလမ်းမှမလွှဲ၊ လိုက်သွားလိမ့်မည်” ဟုကျမ်းစာက အာမခံထားသည်။ (သု. ၂၂:၆) သင့်သားသမီးက သင့်လေ့ကျင့်ပေးမှုအား တုံ့ပြန်ခံယူခဲ့သည်ကိုတွေ့ရခြင်းသည် အကျေနပ်ကြီးကျေနပ်စရာမဟုတ်ပေလော။ မိမိ၏ဝိညာဉ်ရေးမိသားစုနှင့်ပတ်သက်ပြီး တမန်တော်ယောဟန်က ဤသို့ဆိုသည်– “ငါ၏သားသမီးတို့သည် သမ္မာတရား၌ကျင်လည်သည်ကို ငါကြား၍ဝမ်းမြောက်ခြင်းထက် သာ၍ဝမ်းမြောက်ခြင်းမရှိ။” (၃ ယောဟန် ၄) သင်သည် သင့်ရင်သွေးနှင့်ပတ်သက်၍လည်း အလားတူခံစားချက်ပြင်းပြမှုမျိုးရှိနိုင်သည်။

ခရစ်ယာန်လေ့ကျင့်ပေးမှုကို သားသမီးတိုင်း ခံယူမည်မဟုတ်သည်တော့ မှန်ပါသည်။ သင့်သားသမီးဖြစ်သူသည် အမှန်ပင် အရွယ်ရောက်နေပြီဆိုလျှင် မိဘတာဝန် မကျေဟုမဆိုနိုင်ပေ။ သင်သည် သင့်သားသမီးအား ဘုရားရေးရာနည်းလမ်းဖြင့် အတတ်နိုင်ဆုံးပြုစုမွေးမြူပေးခဲ့သည်ဆိုလျှင် မဆီမဆိုင် သင့်ကိုယ်ကို အပြစ်မတင်ပါနှင့်။ အရွယ်ရောက်နေပြီဖြစ်သော သင့်သားသမီးတစ်ယောက်အနေဖြင့် ဘုရားသခင်ရှေ့တွင် ကိုယ့်တာဝန်ကိုယ်ထမ်းရကြောင်း သိရှိပါလေ။ (ဂလာတိ ၆:၅) အချိန်တန်လျှင် သူသည် မိမိ၏ရွေးချယ်မှုများကို ပြန်သုံးသပ်ကာ ဤ “မြား” သည် ချိန်ရွယ်ခဲ့သည့်နေရာကို နောက်ဆုံး၌ ထိမှန်မည်ဟူ၍ ဆက်ပြီးမျှော်လင့်ပါလေ။—ဆာလံ ၁၂၇:၄။

မိဘဖြစ်နေဆဲပင်!

သင့်သားသမီးအိမ်မှခွဲခွာသွားမှုကြောင့် ထူးထူးခြားခြားအပြောင်းအလဲဖြစ်သွားနိုင်သော်လည်း မိဘအနေဖြင့် သင့်တာဝန်ပြီးဆုံးသွားပြီဟု မဆိုလိုပါ။ စိတ်ပိုင်းကျန်းမာရေးအထူးကု ဟောရဒ် ဟယ်ပ်ရယ်က ဤသို့ဆိုသည်– “သင်သည် သေဆုံးသည့်နေ့အထိ မိဘသာဖြစ်သည်၊ သို့သော် ပေးပုံနှင့် ပြုစုပျိုးထောင်ပုံကို ပြုပြင်ပြောင်းလဲပေးရမည်။”

သားသမီးကြီးပြင်းသွားကာမျှနှင့် မိဘ၏အဖြစ်အနေသည် ရပ်စဲသွားခြင်းမရှိကြောင်း ကျမ်းစာက ရှေးကတည်းက အသိအမှတ်ပြုခဲ့သည်။ နယပုံပြင် ၂၃:၂၂ က “သင့်ကိုဖြစ်ဖွားစေသောအဘ၏စကားကို နားထောင်လော့။ အသက်ကြီးသောအမိကို မထီမဲ့မြင်မပြုနှင့်” ဟုဆိုသည်။ မှန်ပါသည်၊ မိဘတို့ “အသက်ကြီး” သွားပြီး သူတို့၏သားသမီးများမှာလည်း လူကြီးဖြစ်သွားသည့်အချိန်၌ပင် မိဘတို့သည် သားသမီးတို့၏အသက်တာအပေါ် သိသိသာသာသြဇာသက်ရောက်နေဆဲရှိနိုင်သည်။ ပြုပြင်ပြောင်းလဲမှုအချို့လုပ်ဖို့လိုသည်မှာ အမှန်ပင်။ သို့သော် ဆက်ဆံမှုအားလုံးသည် ဆန်းသစ်ပြီး ကျေနပ်စရာဖြစ်ဖို့အတွက် အခါအားလျော်စွာ ပြန်လည်ပြုပြင်ဖို့လိုပါသည်။ ယခု သင့်သားသမီးများ ကြီးပြင်းနေပြီဖြစ်ရာ ပို၍လူကြီးဆန်သော ဆက်ဆံရေးမျိုးဖြစ်ရန် ကြိုးစားပါ။ စိတ်ဝင်စားစရာမှာ လေ့လာမှုများအရ သားသမီးများ အိမ်မှခွဲခွာသွားသည်နှင့် မိဘ-သားသမီးဆက်ဆံရေးမှာ တိုးတက်လာလေ့ရှိကြောင်းဖော်ပြသည်! သားသမီးများအနေဖြင့် တကယ့်လောက၏ဖိစီးမှုများကို နဖူးတွေ့ဒူးတွေ့တွေ့လာသည့်အခါ မိဘများအပေါ် အမြင်သစ်ဖြင့် မြင်လာတတ်လေ့ရှိသည်။ ဂျာမန်လူမျိုးတစ်ဦးဖြစ်သူ ဟာ့မတ်က ဤသို့ဆိုသည်– “မိဘတွေအပေါ်မှာ အခုမှ ပိုပြီးနားလည်လာတယ်၊ သူတို့ဘာကြောင့် ဒီလိုလုပ်ရတာလည်းဆိုတာကို သဘောပေါက်လာတယ်။”

ဝင်မစွက်နှင့်

သင်သည် အရွယ်ရောက်နေပြီဖြစ်သော သင့်သားသမီး၏ကိုယ်ပိုင်အသက်တာတွင် ဝင်စွက်နေပါက ထိခိုက်ပျက်စီးမှုများစွာရှိနိုင်သည်။ (၁ တိမောသေ ၅:၁၃ နှိုင်းယှဉ်။) ယောက္ခမဖြစ်သူများနှင့် အကြီးအကျယ်တင်းမာနေသော အိမ်ရှင်မတစ်ဦးက ဤသို့ညည်းညူသည်– “ကျွန်မတို့ သူတို့ကိုချစ်ပါတယ်၊ ဒါပေမဲ့ ကိုယ့်ဘဝကို ကိုယ်ဖန်တီးချင်တယ်၊ ကိုယ့်ဘာသာကိုယ်ဆုံးဖြတ်ချင်တယ်။” အရွယ်ရောက်သားသမီးတစ်ဦး ဒုက္ခရောက်နေချိန်တွင် မေတ္တာရှိသောအဘယ်မိဘမျှ ရပ်ကြည့်နေနိုင်မည်မဟုတ်ပေ။ သို့သော် မိဘများ၏အကြံဉာဏ်သည် မည်မျှပင်ပညာရှိရာကျကျ၊ မည်မျှပင် စိတ်ရင်းမှန်မှန် အကြံမတောင်းလျှင် မပေးဘဲနေခြင်းသည် အကောင်းဆုံးဖြစ်သည်။ အထူးသဖြင့် သားသမီးဖြစ်သူ အိမ်ထောင်ပြုသွားပြီးနောက်တွင်ဖြစ်သည်။

နိုးလော့!က ဤအကြံဉာဏ်ကို ၁၉၈၃ ကပေးခဲ့သည်– “သင့် တာဝန်ပြောင်းသွားသည်ကို လက်ခံပါ။ ကလေးငယ်သည် လမ်းလျှောက်တတ်စပြုလာသည့်အခါ နို့တိုက်သည့်အလုပ်ကို သင်စွန့်လွှတ်လိုက်ရမည်ဖြစ်သည်။ အလားတူစွာ ယခုသင်သည် ပြုစုစောင့်ရှောက်ရသူတာဝန်မှ အကြံပေးသူတာဝန်ကို ပခုံးပြောင်းယူရမည်။ ဤအသက်အရွယ်တွင် သင့်သားသမီးအတွက် ဆုံးဖြတ်ချက်ချပေးခြင်းသည် ကျောကို ပွတ်သပ်ပေးခြင်း သို့မဟုတ် နို့တိုက်ခြင်းကဲ့သို့ပင် သင့်တော်မည်မဟုတ်ပေ။ အကြံပေးသူအနေဖြင့် သင့်တွင် တိကျသော အကန့်အသတ်ဘောင်များရှိသည်။ မိဘအနေနှင့် သင့်အခွင့်အာဏာကို ထိထိရောက်ရောက်မသုံးနိုင်တော့ပေ။ (‘လုပ်လို့ ငါပြောတယ်လေ’ ဟုမရတော့ပါ) သင့်သားသမီး၏လူကြီးအဆင့်ကို လေးစားမှုပြရမည်။”a

သင့်သားသမီးနှင့် သူ့အိမ်ထောင်ဖက်တို့၏ ဆုံးဖြတ်ချက်အားလုံးသည် သင်နှင့် သဘောထားချင်း တိုက်ဆိုင်ချင်မှ တိုက်ဆိုင်မည်။ အိမ်ထောင်ရေးတာဝန်ကို လေးစားခြင်းက သင့်စိုးရိမ်ပူပန်မှုကို အလွန်အကျွံမဖြစ်စေရန်နှင့် မဆီမဆိုင်ဝင်မစွက်မိရန် အထောက်အပြုနိုင်သည်။ အမှန်မှာ ငယ်ရွယ်သောမောင်နှံများဖြစ်သည့်ပြဿနာကို သူတို့ချင်းသာဖြေရှင်းစေခြင်းသည် အကောင်းဆုံးဖြစ်သည်။ သို့မဟုတ်ပါက အိမ်ထောင်ကွဲလုလုအခြေအနေတွင် သူတစ်ပါးအပြော နည်းနည်းလေးမျှမခံသည့် သမက် သို့မဟုတ် ချွေးမကို မလိုချင်သော အကြံဉာဏ်သွားပေးမိသည့်အတွက် မလိုအပ်ဘဲ ထိပ်တိုက်ရင်ဆိုင်မိတတ်သည်။ အထက်ပါနိုးလော့! ဆောင်းပါးက ဤသို့ ထပ်၍အကြံပြုသည်– “ရှည်လျားသော၊ မတောင်းဆိုသော အကြံဉာဏ်ပေးချင်သည့်စိတ်ကို ချိုးနှိမ်ပစ်ပါ၊ မတောင်းဘဲပေးခြင်းသည် သမက် သို့မဟုတ် ချွေးမနှင့် ရန်သူဖြစ်နိုင်သည်။” ထောက်မကူပံ့ပေးပါ၊ ကြိုးကိုင်ခြင်းမပြုပါနှင့်။ ဆက်ဆံရေးကောင်း ဆက်ရှိနေစေခြင်းဖြင့် အကြံဉာဏ်အမှန်တကယ်လိုအပ်လျှင် သင့်သားသမီး သင့်ထံချဉ်းကပ်အကူအညီတောင်းရန် သာ၍လွယ်ကူစေပါ။

အိမ်ထောင်ရေးနှောင်ကြိုးကို ပြန်လည်ဆန်းသစ်စေပါ

မောင်နှံစုံများစွာအတွက် အသိုက်အမြုံဟာလာဟင်းလင်းဖြစ်သွားခြင်းသည် အိမ်ထောင်ရေးပျော်ရွှင်မှုကို တိုးစေနိုင်သည့်လမ်းပွင့်သွားနိုင်ပေသည်။ မိဘတာဝန်ကျေဖို့ မိမိတို့ချင်းဆက်ဆံရေးကို လှည့်မကြည့်အားသည့်အထိ အချိန်ပေးကာ အားထုတ်ခဲ့ရပေမည်။ ဇနီးသည်တစ်ဦးက ဤသို့ဆိုသည်– “အခု သားသမီးတွေလည်း အတောင်စုံလို့ပျံသွားကြပြီဆိုတော့ ခွန်ရက်နဲ့ ကျွန်မတို့ဟာ တစ်ယောက်နဲ့တစ်ယောက် အကျွမ်းတဝင်ရှိဖို့ တစ်ကနေပြန်စဖို့ ကြိုးစားနေကြပါတယ်။”

မိဘတို့၏နေ့စဉ်တာဝန်ဝတ္တရားများမှ ကင်းလွတ်လာရာ ယခု တစ်ယောက်ကို တစ်ယောက်အချိန်ပို၍ပေးနိုင်တော့မည်။ မိခင်တစ်ဦး ဤသို့သတိပြုမိသည်– “အခု အသစ်ရလိုက်တဲ့ လွတ်လပ်ချိန်က . . . ကျွန်မတို့ဘယ်သူဘယ်ဝါလည်းဆိုတဲ့အပေါ် ပိုပြီးအာရုံစိုက်မိလာနိုင်တယ်၊ ကျွန်မတို့ချင်းဆက်ဆံရေးကို ပိုပြီးသင်ယူဖို့ အာရုံစိုက်လာနိုင်တဲ့အပြင် ကျွန်မတို့မှာ လိုနေတဲ့အရာကို ဖြည့်ပေးတဲ့ လုပ်ဆောင်မှုတွေမှာ စတင်ပါဝင်လာနိုင်ပါတယ်။” သူမက ထပ်၍ဤသို့ဆိုသည်– “အသစ်သောအရာတွေ သင်ယူနိုင်ပြီး မယုံနိုင်လောက်အောင် တိုးတက်တဲ့အချိန်ပါပဲ၊ ခွဲခွာချိန်မှာ စိတ်ထဲဆောက်တည်ရာမရဖြစ်တတ်ပေမဲ့လည်း ပျော်ရွှင်လန်းဆန်းစရာတွေလည်းရှိပါတယ်။”

အချို့ မောင်နှံစုံများတွင် ငွေကြေးဆိုင်ရာလွတ်လပ်မှု ပို၍ရှိသည်။ ရပ်ဆိုင်းထားရသည့် ဝါသနာပါရာများ၊ လုပ်ငန်းကိုင်ငန်းများကို ယခု လုပ်ဆောင်နိုင်လေပြီ။ ယေဟောဝါသက်သေ မောင်နှံစုံများမှာ သူတို့အသစ်ရရှိလိုက်သော လွတ်လပ်မှုကို ဝိညာဉ်ရေးရာများလိုက်စားရန် အသုံးပြုကြသည်။ သားသမီးများ အိမ်မှ ခွဲခွာသွားကြပြီးနောက် သူနှင့် ဇနီးဖြစ်သူတို့ အချိန်ပြည့်ဓမ္မအမှုကို ပြန်စရန် ချက်ချင်းလုပ်ဆောင်ခဲ့ကြကြောင်း ဟာမန်အမည်ရှိ ဖခင်တစ်ဦးက ရှင်းပြသည်။

သားသမီးများကို လက်လွှတ်လိုက်ရသည့် ကြင်ဖော်မဲ့မိဘများ

ဟာလာဟင်းလင်း အသိုက်အမြုံနှင့် နေသားတကျဖြစ်ဖို့ ကြင်ဖော်မဲ့မိဘများအတွက် အထူးခက်ခဲနိုင်သည်။ သားနှစ်ယောက်ရှိ ကြင်ဖော်မဲ့မိခင် ရေဘက်ခါက ဤသို့ရှင်းပြသည်– “ကလေးတွေ ထွက်သွားကြတော့ အဖော်လုပ်ပေးပြီး မေတ္တာပြပေးမယ့် လင်သားမရှိဘူးလေ။” သူ့သားသမီးများသည် စိတ်ပိုင်းအရ အဓိက အထောက်အမပေးသူများဖြစ်ကြောင်း ကြင်ဖော်မဲ့မိဘဖြစ်သူတစ်ဦးသည် တွေ့ရပေမည်။ သူတို့သည် အိမ်အသုံးစရိတ်ကို ထောက်ပံ့ခဲ့သူများဖြစ်ပါမူ သူတို့ခွဲခွာသွားခြင်းကြောင့် ငွေကြေးအခက်တွေ့နိုင်သည်။

အချို့ကြင်ဖော်မဲ့မိဘများက အလုပ်အကိုင်လေ့ကျင့်ရေးအစီအစဉ်များ သို့မဟုတ် အချိန်တို ကျောင်းသင်တန်းများကို တက်ရောက်ကာ မိမိတို့၏စီးပွားရေးအခြေအနေ တိုးတက်ရန်စီစဉ်ကြသည်။ သို့သော် အထီးကျန်အဖြစ်ဟာနေသည့်ကွက်လပ်ကို မည်သို့ဖြည့်ပေးနိုင်သနည်း။ ကြင်ဖော်မဲ့မိခင်တစ်ဦးက ဤသို့ဆိုသည်– “ကျွန်မအတွက် အလုပ်ဖြစ်တဲ့အရာကတော့ ကိုယ့်ကိုယ်ကို လုပ်စရာတွေနဲ့ပြည့်နေစေခြင်းပါပဲ။ ကျမ်းစာဖတ်နေနိုင်တယ်၊ အိမ်သန့်ရှင်းရေးလုပ်နေနိုင်တယ်၊ ဒါမှမဟုတ် အမြန်လမ်းလျှောက် ဒါမှမဟုတ် ပြေးစသဖြင့် လုပ်နေနိုင်ပါတယ်။ ဒါပေမဲ့လည်း အထီးကျန်မှုကို ကျော်လွှားဖို့ အထိရောက်ဆုံးနည်းကတော့ ဝိညာဉ်ရေးမိတ်ဆွေများနဲ့ စကားပြောခြင်းဖြစ်ပါတယ်။” မှန်ပါသည်၊ “ကျယ်ဝန်းသောစိတ်ရှိ” ပါ၊ ကျေနပ်မှုပေးသော မိတ်သစ်ဆွေသစ်များဖွဲ့ပါ။ (၂ ကောရိန္သု ၆:၁၃) သင်သည် အကြီးအကျယ်စိတ်ဖိစီးမှုဖြစ်နေချိန်တွင် ‘ဆုတောင်းခြင်းကို နေ့ညဉ့်မပြတ်ပြုပါ။’ (၁ တိမောသေ ၅:၅) နေသားတကျဖြစ်ဖို့ အခက်တွေ့သည့်အချိန်တာတစ်လျှောက် ယေဟောဝါသည် သင့်အား ခွန်အားပေးကာ ထောက်မပေးမည်ဖြစ်ကြောင်း စိတ်ချပါလေ။

ပျော်ရွှင်စွာ လက်လွှတ်လိုက်ခြင်း

သင့်အခြေအနေမည်သို့ပင်ရှိပါစေ သားသမီးများ အိမ်မှခွဲခွာခြင်းသည် ဘဝ၏အဆုံးမဟုတ်သေးကြောင်း သိမှတ်ပါလေ။ မိသားစုသံယောဇဉ်လည်း ပြတ်မသွားပါ။ ကျမ်းစာတွင်ဖော်ပြထားသည့် ကြံ့ခိုင်သောမေတ္တာသည် တစ်ယောက်နှင့်တစ်ယောက် မည်မျှပင်ဝေးနေပါစေ ရစ်ပတ်စည်းနှောင်ထားနိုင်သည့်အထိ ခိုင်မြဲသည်။ တမန်တော်ပေါလုက မေတ္တာသည် “ခပ်သိမ်းသောအရာကိုသည်းခံတတ်၏။ မေတ္တာသည် ဖောက်ပြန်ခြင်းသဘောနှင့် အစဉ်ကင်းလွတ်၏” ဟုကျွန်ုပ်တို့အား သတိရစေသည်။ (၁ ကောရိန္သု ၁၃:၇၊ ၈) သင့်မိသားစုတွင် သင်ပျိုးထောင်ထားခဲ့သည့် တစ်ကိုယ်ကောင်းမဆန်သောမေတ္တာသည် သားသမီးများ အိမ်မှခွဲခွာသွားသောကြောင့်နှင့် ဖောက်ပြန်ပျက်စီးသွားမည်မဟုတ်ပေ။

စိတ်ဝင်စားစရာမှာ သားသမီးဖြစ်သူများသည် ခွဲခွာခြင်း၏ဝမ်းနည်းမှုဒဏ်နှင့် အိမ်ကိုလွမ်းခြင်းတို့ကို စတင်ခံစားချိန်တွင် သို့မဟုတ် စီးပွားရေးဖိစီးမှုဒဏ်ကို စတင်ခံရချိန်တွင် အဆက်အသွယ်ပြန်စလုပ်လေ့ရှိသည်။ ဟန်းစ်နှင့် အီဂရက်တို့၏အကြံဉာဏ်ကားဤသို့– “သူတို့အတွက် အမြဲတံခါးဖွင့်ထားပေးကြောင်း သားသမီးများ သိစေပါ။” မှန်မှန်လည်ပတ်ခြင်း၊ စာမှန်မှန်ရေးခြင်းနှင့် အခါအားလျော်စွာ ဖုန်းဆက်ခြင်းတို့ဖြင့် အဆက်အသွယ်လုပ်နိုင်သည်။ “သူတို့၏အရေးကိစ္စထဲဝင်မစွက်ဘဲ သူတို့လုပ်နေသည့်အလုပ်ကို စိတ်ဝင်စားပါ” ဟု ဂျက်နှင့် နိုရာတို့က ဖော်ပြသည်။

သားသမီးများ အိမ်မှ ခွဲခွာသွားကြသည့်အခါ သင့်ဘဝလည်း ပြောင်းလဲသွား၏။ သို့သော် အသိုက်အမြုံဟာလာဟင်းလင်းဘဝတွင် အလုပ်များနေနိုင်ပြီး တက်တက်ကြွကြွရှိကာ ကျေနပ်နေနိုင်သည်။ သင်နှင့်သင့်သားသမီးတို့၏ဆက်ဆံရေးသည်လည်း ပြောင်းလဲသွားသည်။ သို့တိုင် ပျော်ရွှင်နှစ်သက်ကျေနပ်ဖွယ်ဆက်ဆံရေးဖြစ်နေနိုင်သေးသည်။ “မိဘလက်အောက်မှထွက်ကာ ဘဝကိုတည်ဆောက်ခြင်းသည် မိဘများအပေါ်ထားသည့် မေတ္တာ၊ သစ္စာစောင့်သိမှု သို့မဟုတ် လေးစားမှု ပျောက်သွားသည့်သဘောမဟုတ်ပေ။ . . .။ အမှန်မှာ ခိုင်မာသော မိသားစုသံယောဇဉ်သည် အသက်ရှင်နေသရွေ့ တည်မြဲနေလေ့ရှိသည်” ဟု ပါမောက္ခ ဂျက်ဖရီ လီနှင့် ဂယ်ရီ ပီတာစင်တို့က ဆိုသည်။ မှန်သည်၊ သင်သည် သင့်သားသမီးများအပေါ် မည်သည့်အခါမျှ မေတ္တာပျက်မည်မဟုတ်၊ သူတို့၏မိဘအဖြစ်မှ မည်သည့်အခါမျှ ရပ်စဲသွားမည်မဟုတ်။ ထို့အပြင် သင့်သားသမီးများကို လက်လွှတ်ရက်နိုင်သည့်အထိ သူတို့ကိုချစ်ခဲ့ခြင်းကြောင့် သူတို့အား သင်အမှန်တကယ်ပင်မဆုံးရှုံးခဲ့ချေ။

[အောက်ခြေမှတ်ချက်]

[စာမျက်နှာ ၁၂ ပါ အကျဉ်းဖော်ပြချက်]

“ကျွန်တော့်ဘဝမှာ ပထမဆုံးအကြိမ် . . . ငိုချလိုက်ပါတော့တယ်”

[စာမျက်နှာ ၁၀ ပါ လေးထောင့်ကွက်/ရုပ်ပုံ]

အရွယ်ရောက်သားသမီးများအတွက် စကားတစ်ခွန်း—မိဘများ လက်လွှတ်လိုက်နိုင်ရန် ထောက်ကူ

ခွဲခွာသွားခြင်းသည် သာမန်အားဖြင့် ကျောခိုင်းစွန့် ခွာသွားခြင်းထက် ကိုင်တွယ်ဖြေရှင်းရပို၍လွယ်ကူသည်။ သင်သည် မိဘလက်အောက်မှထွက်ပြီး လူကြီးဘဝကို ပျော်မွေ့နေစဉ် သင့်မိဘများအနေဖြင့် နေသားတကျဖြစ်ဖို့ အခက်တွေ့နေလျှင် သူတို့အပေါ် ကြင်နာမှုပြပါ၊ နားလည်ပေးပါ။ သင်သည် သူတို့အပေါ် ဆက်၍ချစ်နေကြောင်း၊ ဆက်၍တွယ်တာနေကြောင်း အသေအချာသိစေပါ။ စာတိုလေးတစ်စောင်၊ မမျှော်လင့်ထားသော လက်ဆောင်လေးတစ်ခု၊ ရင်းနှီးသော တယ်လီဖုန်းဆက်ခြင်းတို့သည် စိတ်ဓာတ်ကျနေသော မိဘဖြစ်သူအတွက် များစွာစိတ်ရွှင်လန်းစေနိုင်သည်! သင့်ဘဝတွင်ကြုံခဲ့ရဖူးသည့် ထူးခြားသောအဖြစ်အပျက်လေးများကို သူတို့အား သိကြားနေစေပါ။ ယင်းက မိသားစုနှောင်ကြိုးဆက်လက်ခိုင်မြဲနေကြောင်း သူတို့ကိုသိရှိသွားစေသည်။

လူကြီးဘဝတွင် ဖိစီးမှုများကို သင်တွေ့ ကြုံရသည့်အခါ သင့်မိဘများ သင့်အား ပြုစုစောင့်ရှောက်ပေးခဲ့စဉ်က ကြုံတွေ့ရသည့်အရာများကို ယခင်ကထက် သင်ပို၍သဘောပေါက်လေးမြတ်လာမည်။ ယင်းက သင့်မိဘများအား “ကျွန်တော့်အတွက် အဖေတို့အမေတို့လုပ်ပေးခဲ့တာတွေအားလုံးကို ကျေးဇူးတင်ပါတယ်” ဟုပြောရန် လှုံ့ဆော်ပေးပေမည်။