စည်းဝေးပွဲကြီးများ၌ဝမ်းမြောက်၍ ဘုရားသခင်ကိုချီးမွမ်း

၁၈၈၀ ပြည့်နှစ်များမှစ၍ ဒေသန္တရစည်းဝေးပွဲများအပြင် အခြားဒေသမှ ယုံကြည်သူချင်းတို့နှင့် အကျွမ်းတဝင်ဖြစ်လျှင်အကျိုးရှိကြောင်း ကျမ်းစာကျောင်းသားများ မြင်လာခဲ့ကြသည်။ ထိုကြောင့် အမေရိကန်တစ်နိုင်ငံလုံးရှိကျမ်းစာကျောင်းသားများစုဝေး၍ နှစ်စဉ်စည်းဝေးပွဲကြီးများ ကျင်းပရန်စီစဉ်လာကြသည်။ နောက်ပိုင်းတွင် ကနေဒါလည်းပါဝင်လာသည်။ ဤစည်းဝေးပွဲများသည် ဝိညာဏလန်းဆန်းမှုပေးသည့်အခါသမယဖြစ်သည်။ အကြောင်းမှာ သတ်မှတ်ရက်များတစ်လျှောက် အားပါသည့်ကျမ်းစာလမ်းညွှန်ချက်များကိုကြားရမည့်အပြင် တစ်ယောက်နှင့်တစ်ယောက်အပြန်အလှန်အားပေးနှိုးဆော်နိုင်ကြသောကြောင့်ဖြစ်သည်။ ယုံကြည်သူလူသစ်များနှစ်ခြင်းခံခြင်းသည် စည်းဝေးပွဲကြီးများတွင် ပါနေကြအစီအစဉ်ဖြစ်လာသည်။ စည်းဝေးပွဲကြီးအားဖြင့် ပိုမိုများပြားသောလူထုကို သက်သေခံရာလည်းရောက်သည်။—ရောမ ၁:၁၁၊ ၁၂။

ယနေ့ယေဟောဝါသက်သေတို့သည် ပုံမှန်စည်းဝေးပွဲများ၌ မွေ့ပျော်ကြသည်။ အသင်းတော် ၁၈ ခုမှ ၂၅ ခုထိတိုက်နယ်ဟုခေါ်သောအုပ်စုအဖြစ်ဖွဲ့စည်းထားလေ့ရှိသည်။ နယ်လှည့်ကြီးကြပ်ရေးမှူးတို့က တိုက်နယ်များကိုလှည့်ပတ်ကြည့်ရှုအမှုဆောင်ကြသည်။ တိုက်နယ်စည်းဝေးပွဲများကို စနေ၊ တနင်္ဂနွေနှစ်ရက် တိုက်နယ်တွင်းရှိအသင်းတော်တစ်ခုခု သို့မဟုတ် တစ်နေရာရာ၌တစ်နှစ်လျှင် နှစ်ကြိမ်ကျင်းပရန်စီစဉ်ထားသည်။

နိုင်ငံအသီးသီးတွင် တစ်နေရာတည်း၌ ထောင်ပေါင်းများစွာစုဝေးနိုင်သောခရိုင်စည်းဝေးပွဲခေါ် သုံးရက် သို့မဟုတ် လေးရက်ကြာသည့်အစည်းအဝေးပွဲကြီးများသည် ယေဟောဝါသက်သေများနှင့် သူတို့၏လုပ်ဆောင်မှုကိုစိတ်ဝင်စားသူများအတွက် ဝိညာဏတည်ဆောက်မှုဖြစ်စေသည်။ လူအများရှေ့သက်သေခံခြင်းကိုလည်းဖြစ်မြောက်စေသည်။

ဤကဲ့သို့အစည်းအဝေးများအတွက် အစီအစဉ်ကို ကမ္ဘာတစ်ဝန်းရှိယေဟောဝါသက်သေတို့၏ လိုအပ်ချက်အပေါ်အခြေပြု၍ အုပ်ချုပ်ရေးအဖွဲ့ကရေးဆွဲပေးသည်။ အစီအစဉ်တွင် တိုက်နယ်ကြီးကြပ်ရေးမှူးများနှင့် အသင်းတော်ရှိအရည်အချင်းရှိသူများ တင်ပြသည့်ဟောပြောချက်များ၊ ဆွေးနွေးခန်းများ၊ ဘဝဖြစ်ရပ်မှန်သရုပ်ပြများပါဝင်သည်။ ဤဘုရားမဲ့လောကအတွင်း ခရစ်ယာန်တစ်ဦးအနေနှင့် မည်သို့စိန်ခေါ်ခံနေရပုံ သို့မဟုတ် ဓမ္မအမှုဆောင်ခြင်း၏အကျိုးရလဒ်များစသည်တို့ကို တွေ့ကြုံမှုအဖြစ် ပြန်လည်တင်ပြသူအများလည်းပါဝင်ကြသည်။ ခရိုင်စည်းဝေးပွဲကြီးနှင့် တွဲဖက်ပါဝင်သည့်အစီအစဉ်တစ်ခုမှာ ကျမ်းစာခေတ် သို့မဟုတ် ခေတ်သစ်ဘဝသရုပ်ဖော်ပြဇာတ်များဖြစ်သည်။ ယင်းတို့သည် ခရစ်ယာန်များယနေ့ရင်ဆိုင်ရသော ပြဿနာကိုမည်သို့ဖြေရှင်းပုံအကြောင်းသရုပ်ဖော်ပြသည်။

အလှူငွေအနည်းငယ်ဖြင့် ထမင်းနှင့်ဖျော်ရည်များလည်းရရှိနိုင်ပါသည်။ အစည်းအဝေးရပ်နားနေချိန်တွင် နှစ်လိုဖွယ်မိတ်သဟာယဖွဲ့ခွင့်ရကြသည်။ ဤအစီအစဉ်အားလုံး ယေဟောဝါသက်သေများထဲမှ စေတနာ့ဝန်ထမ်းတို့၏လုပ်အားဖြင့် လှုပ်ရှားလည်ပတ်သည်။ ပစ္စည်းပစ္စယနှင့်အခြားကိစ္စများအတွက် ကုန်ကျစရိတ်ကိုစိတ်လိုကိုယ်လျှောက်ထည့်ဝင်လှူဒါန်းသည့် အလှူငွေများဖြင့်ကျခံသည်။ တက်ရောက်ခမရှိ၊ အလှူကောက်ခံခြင်းလည်းမရှိပါ။

သင့်ရပ်နယ်တွင် ဤသို့သောစည်းဝေးပွဲကြီးမျိုးမည်သည့်အချိန်၊ မည်သည့်နေရာတွင် ကျင်းပရန်စီစဉ်ထားကြောင်းကို ဒေသခံယေဟောဝါသက်သေတို့၏အသင်းတော်၌ စုံစမ်းပါ။ သွားရေး၊ လာရေး၊ တည်းခိုရေးအစီအစဉ်များကိုပါသိရှိနိုင်သည်။

ဤစည်းဝေးပွဲများသည် ယေဟောဝါသက်သေများ၊ သူတို့နှင့်ပေါင်းသင်းသူများအားလုံးအတွက် အသင်းတော်တွင်း၌သာမက ကမ္ဘာချီညီအစ်ကိုအသင်းအပင်းတစ်ခုလုံးကို လေးမြတ်တန်ဖိုးထားရန်အကူအညီဖြစ်စေသည်။—၁ ပေတရု ၂:၁၇။

• ကနဦးကျမ်းစာကျောင်းသားများသည် သူတို့၏စည်းဝေးပွဲကြီးများမှ မည်သည့်အကျိုးများရရှိခဲ့ကြသနည်း။

• တိုက်နယ်စည်းဝေးပွဲနှင့် ခရိုင်စည်းဝေးပွဲများ ပြင်ဆင်မှုနှင့်အစီအစဉ်တို့ကိုဖော်ပြပါ။

[စာမျက်နှာ ၁၈ ပါ ရုပ်ပုံများ]

ခရိုင်စည်းဝေးပွဲကြီးမှကျမ်းစာပြဇာတ်၊ ယူနိုက်တက်စတိတ်

အပြည်ပြည်ဆိုင်ရာစည်းဝေးပွဲကြီး၊ အာဂျင်တီးနား

စည်းဝေးပွဲတက်ရောက်သူများကျမ်းစာ,စာပေရယူနေကြပုံ၊ ဆွစ်ဇလန်

ကျမ်းစာ,စာပေအသစ်ထုတ်ဝေခြင်း၊ ကနေဒါ

အပြည်ပြည်ဆိုင်ရာစည်းဝေးပွဲကြီး၊ ပိုလန်

တိုက်နယ်စည်းဝေးပွဲ၊ ဂျပန်

အပြည်ပြည်ဆိုင်ရာစည်းဝေးပွဲတွင်ရေနှစ်ခြင်းခံခြင်း၊ တောင်အာဖရိက

တက်ရောက်သူများသီချင်းဆိုနေကြပုံ၊ စပိန်