ယေဟောဝါသက်သေတို့၏ အပြည်ပြည်ဆိုင်ရာစည်းဝေးကြီးများကို ကျင်းပရန်

၁၉၉၈ ခုနှစ်အတွင်း အပြည်ပြည်ဆိုင်ရာစည်းဝေးကြီးများကို ကျင်းပရန် ယေဟောဝါသက်သေတို့၏အုပ်ချုပ်ရေးအဖွဲ့က စီစဉ်လျက်ရှိသည်။ ၁၉၉၆ ခုနှစ် အောက်တိုဘာ ၅ ရက်၊ စနေနေ့၌ ဂျာစီမြို့တော်စည်းဝေးခန်းမကြီးတွင်ကျင်းပသော ပဲင်စီလ်ဘေးနီးယားနယ်၏ ကင်းမျှော်စင်သမ္မာကျမ်းစာနှင့် ဝေစာအသင်း နှစ်ပတ်လည်စည်းဝေးတွင် ဤကြေညာချက်ကို ကြားလိုက်ရသောအခါ စိတ်အားထက်သန်စွာဖြင့် တုံ့ပြန်ခဲ့ကြသည်။

မြောက်အမေရိကတွင် ၁၉၉၈ ခုနှစ် နှစ်ဝက်အတောအတွင်း နှစ်စဉ်ကျင်းပမြဲခရိုင်စည်းဝေးများနှင့်အတူ အပြည်ပြည်ဆိုင်ရာစည်းဝေးကြီးအချို့ကိုကျင်းပလိမ့်မည်။ ကမ္ဘာ့ဒေသများစွာမှ ထောင်နှင့်ချီသောသက်သေခံများသည် ဤစည်းဝေးကြီးများတွင် အတူတကွစုစည်းလာကြလိမ့်မည်ဟုမျှော်လင့်သည်။ မြောက်အမေရိကရှိ အပြည်ပြည်ဆိုင်ရာစည်းဝေးကြီးအတွက် သတ်မှတ်ထားသောမြို့သို့ ဖြစ်နိုင်မည်ဆိုလျှင် နိုင်ငံများစွာမှကိုယ်စားပြုတက်ရောက်နိုင်ရန် ကင်းမျှော်စင်အသင်း၏ ၁၀၀ ထက်မကသောဌာနခွဲရုံးတိုင်းတွင် ကိုယ်စားလှယ်များအတွက် ခွဲတမ်းထားရှိမည်ဖြစ်သည်။

ရှင်းနေသည်မှာ မြောက်အမေရိကသို့ သွားလိုသူအားလုံး သွားနိုင်ကြမည်မဟုတ်ချေ။ သို့သော်လည်း သူတို့၏နိုင်ငံအနီးရှိ အပြည်ပြည်ဆိုင်ရာစည်းဝေးသို့ ထောင်နှင့်ချီ၍တက်ရောက်နိုင်ကြပါလိမ့်မည်။ ဥရောပရှိ နိုင်ငံနှစ်နိုင်ငံ သို့မဟုတ် သုံးနိုင်ငံနှင့် အာဖရိက၊ အာရှ၊ လက်တင်အမေရိက၊ တောင်ပစိဖိတ်နှင့် ကရစ်ဘီယံတို့တွင် အပြည်ပြည်ဆိုင်ရာစည်းဝေးကြီးများ ကျင်းပရန်အတွက် စီစဉ်လျက်ရှိသည်။

သင့်လျော်သောအချိန်တွင် အဖွဲ့အစည်း၏ဌာနခွဲရုံးများက သူတို့၏နယ်မြေဒေသအသီးသီးရှိ အသင်းတော်များကို သူတို့ခေါ်ဖိတ်ခံရသောနိုင်ငံ သို့မဟုတ် နိုင်ငံများနှင့်ပတ်သက်၍ အကြံဉာဏ်ပေးပါမည်။ စည်းဝေးကြီး၏ရက်စွဲနှင့် စည်းဝေးကြီးကိုယ်စားလှယ်များရွေးချယ်ခြင်းဆိုင်ရာ အစီအစဉ်နှင့်ပတ်သက်၍လည်း အကြောင်းကြားပါလိမ့်မည်။ ကိုယ်စားလှယ်အဖြစ် ရွေးချယ်ခံရရန်အတွက် လျှောက်လွှာဖြည့်လိုသူများသည် ဤကဲ့သို့သောအထူးအစီအစဉ်များကို မျှော်မှန်းပြီး သူတို့၏ငွေကြေးအချို့ကို စတင်၍စုဆောင်းထားလိုပေမည်။

၁၉၉၈ ခုနှစ်အတွက် ဤအပြည်ပြည်ဆိုင်ရာအစည်းအဝေးကြီးများ၌ တင်ဆက်ရန်စီစဉ်ထားသောအရာများကို ကမ္ဘာတစ်ဝန်းရှိ ယေဟောဝါသက်သေအားလုံး မျှော်လင့်စောင့်စားနိုင်ကြပါသည်။ နိုင်ငံအားလုံးရှိ ခရိုင်စည်းဝေးကြီးများတွင် အလားတူအစီအစဉ်မျိုးကိုတင်ဆက်သွားမည်။