သူတော်စင်များ

အဓိပ္ပာယ်သတ်မှတ်ချက်– ရိုမင်ကက်သလစ် သွန်သင်ချက်အရ၊ သူတော်စင်များဟူသည် သေလွန်၍ ယခုကောင်းကင်၌ ခရစ်တော်နှင့်အတူစံမြန်းလျက်ရှိပြီး၊ ထူးခြားသောစင်ကြယ်မှုနှင့်သီလအတွက် အသင်း၏အသိအမှတ်ပြုခံရသူများဖြစ်သည်။ ထရင်း (Trent) ညီလာခံ ယုံကြည်ခြင်းခံယူချက်က သူတော်စင်များကို လူနှင့်ဘုရားသခင်စပ်ကြားရှိ ကြားဖျန်များအဖြစ် သဘောထား၍ သူတို့၏မစမှုကို အသနားခံသင့်ကြောင်း၊ သူတို့၏ဓာတ်တော်မွေတော် ရုပ်ပွားတော်များကို ရှိခိုးသင့်ကြောင်း ပြဋ္ဌာန်း၏။ အခြားဘာသာများလည်း သူတော်စင်တို့၏မစမှုကိုအသနားခံကြသည်။ အချို့ဘာသာများက မိမိတို့အသင်းသားအားလုံး သူတော်စင်များဖြစ်၍ အပြစ်ကင်းစင်ကြသည်ဟုဆိုသည်။ ကျမ်းစာက သူတော်စင် သို့မဟုတ် သန့်ရှင်းသူများအကြောင်း များစွာညွှန်းဆိုထားသည်။ ခရစ်တော်၏ဘိသိက်ခံ နောက်တော်လိုက် ၁၄၄,၀၀၀ ကိုရည်ညွှန်းသည်။

လူတစ်ယောက် သူတော်စင်အဖြစ် အသိအမှတ်ပြုမခံရမီ အဦးဆုံး ကောင်းကင်ဘုန်းဝင်စားရမည်ဟု ကျမ်းစာသွန်သင်သလော

ကျမ်းစာ၌ ကောင်းကင်ရှိသန့်ရှင်းသူများ သို့မဟုတ် သူတော်စင်များအကြောင်း ဆိုထားသည်မှာ သေချာပါသည်။ ယေဟောဝါကို “သန့်ရှင်းသူ” (ကဘ) (ဂရိ၊ haʹgi·on [ဟေးဂျီးအော်န်]) အဖြစ်တင်ပြ၏။ (၁ ပေ. ၁:၁၅၊ ၁၆; ဝတ်ပြုရာ ၁၁:၄၅ ကိုရှု။) ယေရှုခရစ်ကမ္ဘာပေါ်ရှိစဉ် “ဘုရားသခင်၏သန့်ရှင်းတော်မူသောသူ [haʹgi·os ဟေးဂျီးအော့စ်]” အဖြစ်လည်းကောင်း၊ ကောင်းကင်၌ “သန့်ရှင်းသောသူ [haʹgi·os]” အဖြစ်လည်းကောင်း သမုတ်ခံရသည်။ (မာ. ၁:၂၄; ဗျာ. ၃:၇) ကောင်းကင်တမန်များလည်း “သန့်ရှင်း” ကြပေသည်။ (တ. ၁၀:၂၂) ကမ္ဘာပေါ်ရှိပုဂ္ဂိုလ်အတော်များများကို အခြေခံကျသော ထိုမူရင်းဂရိဝေါဟာရဖြင့် ခေါ်ဝေါ်ထားသည်။

တ. ၉:၃၂၊ ၃၆-၄၁– “ပေတရုသည် အရပ်ရပ်တို့ကို လှည့်လည်သည်တွင် သန့်ရှင်းသူတို့ (ha·giʹous ဟေးဂျီးရပ်စ်) ရှိရာ လုဒ္ဒမြို့သို့ရောက်လေ၏။ ယုပ္ပေမြို့၌ ဒေါ်ကာဟုဆိုလိုသော တဗိသအမည်ရှိသော တပည့်တော်မ တစ်ယောက်ရှိ၏။ [သူသေသွား၏။] . . . ပေတရုသည် ထိုအလောင်းသို့မျက်နှာလှည့်၍ တဗိသ၊ ထလော့ ဟုဆိုလေ၏။ ထိုမိန်းမသည် မျက်စိကိုဖွင့်၍ ပေတရုကိုမြင်လျှင် ထ၍ထိုင်၏။ ပေတရုသည် မိမိလက်ကို သူ့အားပေး၍ ချီကြွပြီးမှ သန့်ရှင်းသူတို့ [“သူတော်စင်တို့၊” JB] နှင့် မုဆိုးမတို့ကိုခေါ်၍ အသက်ရှင်လျက်ရှိသောထိုမိန်းမကို ပြလေ၏။” (ထိုသူတော်စင်တို့သည် ကောင်းကင်သို့မတက်သေးကြောင်း၊ သူတော်စင်အဖြစ် ယူမှတ်ခံရသောပေတရုကဲ့သို့ ထင်ပေါ်သူများလည်းမဟုတ်ကြောင်း သိသာလှပေသည်။)

၂ ကော. ၁:၁; ၁၃:၁၂၊ ၁၃– “ဘုရားသခင်၏အလိုတော်အားဖြင့် ယေရှုခရစ်၏တမန်တော်ဖြစ်သော ငါပေါလုနှင့်ငါ့ညီတိမောသေသည် ကောရိန္သုမြို့၌ရှိသော ဘုရားသခင်၏အသင်းတော်မှစ၍ အခါယပြည် အရပ်ရပ်တို့၌ရှိသော သန့်ရှင်းသူအပေါင်းတို့ [“သူတော်စင်တို့၊” JB; haʹgiʹois ဟေးဂျီးအွိုက်စ်] ကို ကြားလိုက်ပါ၏။” “အချင်းချင်း တစ်ယောက်ကိုတစ်ယောက် သန့်ရှင်းသောနမ်းခြင်းနှင့် နှုတ်ဆက်ကြလော့။ သန့်ရှင်းသူအပေါင်းတို့သည် သင်တို့ကိုနှုတ်ဆက်ကြ၏။” (ခရစ်တော်၏အသွေးတော်ဖြင့် ဆေးကြောသန့်စင်၍ ခရစ်တော်နှင့်အတူ အမွေခံကြရန် သီးသန့်ရွေးချယ်ခံရသော ဤရှေးခရစ်ယာန်များအားလုံးကို သူတော်စင် သို့မဟုတ် သန့်ရှင်းသူများဟုခေါ်ဝေါ်သည်။ သူတို့အား သူတော်စင်များအဖြစ်အသိအမှတ်ပြုသည့်ကိစ္စကို သူတို့သေလွန်သည့်အချိန်အထိ ရွှေ့ဆိုင်းမထားသည်မှာ သိသာ၏။)

ဘုရားသခင်နှင့်မိမိစပ်ကြား ကြားဖျန်အဖြစ်လုပ်ဆောင်ပေးပါရန် “သူတော်စင်” များထံဆုတောင်းခြင်းသည် ကျမ်းစာနှင့်ညီညွတ်သလော

ယေရှုခရစ်က “သင်တို့ဆုတောင်းရမည်မှာ ကောင်းကင်ဘုံ၌ရှိတော်မူသော အကျွန်ုပ်တို့အဘ၊ . . . ” ထို့ကြောင့် အဘခမည်းတော်ထံဆုတောင်းရန်ဖြစ်သည်။ “ငါသည် လမ်းခရီးဖြစ်၏။ သမ္မာတရားလည်းဖြစ်၏။ အသက်လည်းဖြစ်၏။ ငါ့ကိုအမှီမပြုလျှင် အဘယ်သူမျှ ခမည်းတော်ထံသို့ မရောက်ရ။ သင်တို့သည် ငါ၏နာမကိုအမှီပြု၍ တစ်စုံတစ်ခုသောဆုကိုတောင်းလျှင် တောင်းသည်အတိုင်း ငါပြုမည်” ဟူ၍လည်း မိန့်တော်မူ၏။ (မ. ၆:၉; ယော. ၁၄:၆၊ ၁၄) ထို့ကြောင့်၊ အခြားမည်သူမဆို ကြားဖျန်အဖြစ် ဆောင်ရွက်နိုင်သည် ဟူသောအယူအဆကို ယေရှုပယ်တော်မူ၏။ ခရစ်တော်နှင့်ပတ်သက်၍ တမန်တော်ပေါလု ဤသို့ဆိုသေး၏– “အသေခံ၍ ခံသည်သာမက၊ သေခြင်းမှထမြောက်၍ ဘုရားသခင်၏လက်ယာတော်ဘက်၌နေလျက် ငါတို့အဖို့ ဆုတောင်းသောသူကား ခရစ်တော်ပေတည်း။” “ကိုယ်တော်အားဖြင့် ဘုရားသခင့်ထံချဉ်းကပ်သူတို့အတွက် အသနားတော်ခံရန် အစဉ်ရှင်နေသည့်အလျောက် ထိုသူတို့ကို အဆုံးတိုင်ကယ်တင်တော်မူနိုင်၏။” (ရော. ၈:၃၄; ဟေဗြဲ ၇:၂၅၊ သမ) ကျွန်ုပ်တို့၏ပတ္ထနာကို ဘုရားသခင် အမှန်နားညောင်းစေလိုလျှင် အထံတော်သို့ချဉ်းကပ်ရာ၌ နှုတ်ကပါဌ်တော်ညွှန်ကြားသည့်အတိုင်း ပြုသင့်သည်မဟုတ်လော။ (“မာရိ” ဟူသောခေါင်းစဉ်အောက် စာမျက်နှာ ၂၁၄ ကိုလည်းရှု။)

ဧ. ၆:၁၈၊ ၁၉– “ငါမှစ၍ သန့်ရှင်းသူအပေါင်းတို့အဖို့ ဆုတောင်းလျက် စောင့်ရှောက်ကြလော့။ ငါသည်ဧဝံဂေလိတရား . . . ၏နက်နဲသောအရာကို ဖော်ပြခြင်းငှာ . . . နှုတ်ကိုရဲရင့်စွာဖွင့်လှစ်ခြင်းအခွင့်ရှိမည်အကြောင်းကိုလည်းကောင်း၊ . . . ရဲရင့်စွာဟောပြောမည်အကြောင်းကိုလည်းကောင်း၊ ငါ့အဖို့လည်း ဆုတောင်းကြလော့။” (ဖြည့်စွက်စာလုံးစောင်း) (ဤတွင် သန့်ရှင်းသူတို့အဖို့ ဆုတောင်းရန်တိုက်တွန်း၏။ သူတို့ထံဖြစ်စေ၊ သူတို့ကိုအမှီပြု၍ ဖြစ်စေ ဆုတောင်းရန်မဟုတ်။) ကက်သလစ်စွယ်စုံကျမ်းသစ်၊ ၁၉၆၇၊ အတွဲ ၁၁၊ စ. ၆၇၀ က ဤသို့ဝန်ခံသည်– “အများအားဖြင့် ဓမ္မသစ်ကျမ်း၌ တစ်ဦးချင်းဖြစ်စေ၊ ပရိသတ်အခမ်းအနားအလိုက်ဖြစ်စေ၊ ဆုတောင်းသမျှပတ္ထနာသည် ခရစ်တော်မှတစ်ဆင့် ဘုရားသခင်ထံ တောင်းလျှောက်ခြင်းဖြစ်သည်။”)

ရော. ၁၅:၃၁– “ညီအစ်ကိုတို့၊ သင်တို့သည် . . . ငါ့အဖို့အလိုငှာ ဘုရားသခင်ကို ဆုတောင်းပတ္ထနာပြုကြလော့ဟု ငါတို့သခင်ယေရှုခရစ်နှင့်ဝိညာဉ်တော်၏မေတ္တာကရုဏာကို အကြောင်းပြု၍ သင်တို့ကို ငါတိုက်တွန်းနှိုးဆော်ပါ၏။” (ကိုယ်တိုင်သူတော်စင်ဖြစ်သူ တမန်တော်ပေါလုက မိမိအတွက် ဆုတောင်းကြပါဟု သူတော်စင် ခရစ်ယာန်ချင်းတို့အား မေတ္တာရပ်ခံပါသည်။ သို့သော် ပေါလုသည် သူတော်စင်ချင်းထံ ဆုမတောင်းကြောင်း သတိပြုပါ။ သူကိုယ်တိုင်ဘုရားသခင်ထံဆုတောင်းခြင်းဖြင့် ခံစားရသော ခမည်းတော်နှင့်ရင်းနှီးမှုကိုလည်း သူ့အဖို့ သူတို့ပြုသောပတ္ထနာက အစားမထိုးပါ။ ဧဖက် ၃:၁၁၊ ၁၂၊ ၁၄ တို့နှင့်နှိုင်း။)

“သူတော်စင်များ” ၏ဓာတ်တော်နှင့်ရုပ်တုများကိုးကွယ်သောအလေ့အထကို မည်သို့ ရှုမှတ်သင့်သနည်း

ကက်သလစ်စွယ်စုံကျမ်းသစ်က ဤသို့ဝန်ခံ၏– “ထို့ကြောင့် ဓာတ်တော်ကိုးကွယ်မှုအတွက် အကြောင်းပြချက်ကို ဓမ္မဟောင်းကျမ်း၌ ရှာလျှင် အချည်းနှီးပင်။ ဓမ္မသစ်ကျမ်း၌လည်း ဓာတ်တော်များအကြောင်းကို အရေးပေးလှသည်မဟုတ်။ . . . [အသင်းတော်၏ရှေးအာဏာပိုင်ဘာသာရေး စာရေးဆရာ] ဩရီဂျင်က ထိုအလေ့အထကို တိတ္ထိတို့၏ ရုပ်ပစ္စည်းကိုးကွယ်ခြင်းလက္ခဏာတစ်ရပ်အဖြစ် ယူမှတ်ပုံရသည်။”​—(၁၉၆၇)၊ အတွဲ ၁၂၊ စ. ၂၃၄၊ ၂၃၅။

မောရှေကို ဘုရားသခင်သင်္ဂြိုဟ်သဖြင့် သူ့သင်္ချိုင်း အဘယ်မှာရှိသည်ကို အဘယ်လူသားမျှ မသိရဟူသည့်အချက်မှာ မှတ်သားဖွယ်ဖြစ်၏။ (တရား. ၃၄:၅၊ ၆) သို့သော် ယုဒ ၉ က ကောင်းကင်တမန်မင်းမိက္ခေလသည် မောရှေ၏ခန္ဓာနှင့်ပတ်သက်၍ မာရ်နတ်နှင့်အငြင်းပွားသည်ဟု ဆို၏။ အဘယ်ကြောင့်နည်း။ လူသားများရှာ၍မတွေ့အောင် မောရှေ၏အလောင်းကိုဖျောက်ထားရန် ဘုရားသခင်ရည်ရွယ်သည်မှာ အထင်းသားပင်။ ရန်သူတော်က ထိုအလောင်းကို လူတို့တွေ့ရှိစေပြီး လူတကာမြင်အောင်ပြသကြစေကာ ကိုးကွယ်ရာဓာတ်တော်ဖြစ်စေရန် အလိုရှိ၍လော။

“သူတော်စင်များ” ၏ရုပ်ပွားများ ကိုကိုးကွယ်ခြင်းနှင့်ပတ်သက်၍ “ရုပ်တု” ဟူသော အဓိကခေါင်းစဉ်ကိုရှု။

ကက်သလစ် “သူတော်စင်များ” ၏ပုံများ၌ အဘယ်ကြောင့် ရောင်ခြည်စက်ဝန်းများပါရှိသနည်း

ကက်သလစ်စွယ်စုံကျမ်းသစ်က ဤသို့ဝန်ခံ၏– “သူတော်စင်အားလုံးကိုသိဒ္ဓိတင်သော ဂုဏ်အင်္ဂါတစ်ရပ်မှာ ရောင်လျှံတော် (မိုးသား) ဖြစ်၍၊ ၎င်းမှာ သူတော်စင်တို့ဦးခေါင်းပတ်လည်ရှိ ထွန်းတောက်သောပုံသဏ္ဌာန်ပင်ဖြစ်၏။ ၎င်း၏ဇာစ်မြစ်သည် ခရစ်ယာန်ခေတ်မတိုင်မီကဖြစ်သည်။ ဥပမာများကို တိတ္ထိသြဇာလွှမ်းမိုးသော ဂရိယဉ်ကျေးမှုအနုပညာ၌ တွေ့နိုင်သည်။ မှန်စီရွှေချအနုပညာလက်ရာများနှင့် ဒ င်္ဂါးများသက်သေထူသည့်အတိုင်း၊ ဘုရားတစ်ပိုင်း လူတစ်ပိုင်းပုဂ္ဂိုလ်များ၊ နက်ပကျွန်း၊ ဂျူပီတာ၊ ဘက်ခပ်စ်နှင့် အထူးသဖြင့် အပိုလို (နေနတ်) စသောနတ်ဘုရားများအတွက် ရောင်ခြည်စက်ဝန်းကို အသုံးပြုကြသည်။”​—(၁၉၆၇)၊ အတွဲ ၁၂၊ စ. ၉၆၃။

ဗြိတိန်စွယ်စုံကျမ်းသစ် က “ဂရိနှင့်ရောမအနုပညာတွင် နေဘုရား ဟီးလိအော့စ်နှင့် ရောမဧကရာဇ်တို့ကို ရောင်ခြည်သရဖူဆောင်းလျက် တွေ့လေ့ရှိသည်။ ၎င်း၏တိတ္ထိဇာစ်မြစ်ကြောင့် ရှေးခရစ်ယာန်အနုပညာ၌ ယင်းပုံစံကိုရှောင်ကြဉ်သည်။ သို့သော် ခရစ်ယာန်ဧကရာဇ်မင်းများက မိမိတို့၏မင်းခမ်းမင်းနားရုပ်ပုံအတွက် ရောင်ခြည်စက်ဝန်းရိုးရိုးကလေးကို လက်ခံကြသည်။ စတုတ္ထရာစုအလယ်မှစ၍ ခရစ်တော်ကိုလည်း ထိုဧကရာဇ်ကြန်အင်လက္ခဏာဖြင့် ပုံဖော်လာကြသည်။ . . . ဆဋ္ဌမရာစုရောက်ခါမှ ရောင်ခြည်စက်ဝန်းကို အပျိုစင်မာရိနှင့် အခြားသူတော်စင်များအတွက် အသုံးပြုသောအလေ့အထ ဖြစ်လာသည်။” (၁၉၇၆) ကျမ်းငယ်၊ အတွဲ ၄၊ စ. ၈၆၄။

ခရစ်ယာန်ဘာသာကို တိတ္ထိအထိမ်းအမှတ်နှင့် ရောနှောသင့်သလော

“အလင်းသည် မှောင်မိုက်နှင့် အဘယ်သို့ဆက်ဆံနိုင်မည်နည်း။ ခရစ်တော်သည် ဗေလျာလ [စာတန်] နှင့် အဘယ်သို့သင့်တင့်နိုင်မည်နည်း။ ယုံကြည်သောသူသည် မယုံကြည်သောသူနှင့်အတူ အဘယ်အကျိုးအပြစ်ကို ခံရမည်နည်း။ ဘုရားသခင်၏ဗိမာန်တော်သည် ရုပ်တုတို့နှင့် အဘယ်သို့စပ်ဆိုင်ရမည်နည်း။ . . . သင်တို့သည် အသက်ရှင်တော်မူသော ဘုရားသခင်၏ဗိမာန်တော်ဖြစ်ကြ၏။ . . . ထာဝရဘုရားမိန့်တော်မူပြန်သည်ကား သင်တို့သည် ထိုသူတို့အထဲမှထွက်၍ အသီးအခြားနေကြလော့။ မစင်ကြယ်သောအရာကို လက်နှင့်မျှမတို့ကြနှင့်။ ထိုသို့ပြုလျှင် သင်တို့ကို ငါသည် လက်ခံမည်။ သင်တို့၏အဘဖြစ်မည်။ သင်တို့သည်လည်း ငါ၏သားသမီးဖြစ်ကြလိမ့်မည်ဟု အနန္တတန်ခိုးနှင့်ပြည့်စုံသော ထာဝရဘုရားမိန့်တော်မူ၏။”​—၂ ကော. ၆:၁၄-၁၈။

ဘာသာရေးအုပ်စုတစ်စု၏ အသင်းသားအားလုံး သူတော်စင်ချည်းဖြစ်သည့်အလျောက် အပြစ်ကင်းသူများဖြစ်နိုင်သလော

ပထမရာစုခရစ်ယာန်အသင်းတော်သားအားလုံး သူတော်စင်များဖြစ်ကြသည်မှာ မှန်၏။ (၁ ကော. ၁၄:၃၃၊ ၃၄; ၂ ကော. ၁:၁; ၁၃:၁၃၊ RS,KJ) သူတို့သည် “အပြစ်လွှတ်ခြင်းကျေးဇူး” ကိုခံရ၍ ဘုရားသခင်အားဖြင့် “အပြစ်နှင့်ကင်းစင်” သူဖြစ်သည်ဟု ဖော်ပြထားပါသည်။ (တ. ၂၆:၁၈; ၁ ကော. ၁:၂) သို့သော် မိမိတို့သည် အပြစ်ရှိသမျှနှင့်ကင်းစင်သည်ဟူ၍ သူတို့မဆိုကြပါ။ အပြစ်သားအာဒံမှဆင်းသက်သူများဖြစ်ကြသည်။ တမန်တော်ပေါလုဝန်ခံသည့်အတိုင်း ထိုအပြစ်အမွေကြောင့် သူတို့သည် မှန်ရာလုပ်ဖို့ မနည်းရုန်းကန်ရကြသည်။ (ရော. ၇:၂၁-၂၅) တမန်တော်ယောဟန်ကလည်း “ကိုယ်အပြစ်မရှိဟု ငါတို့သည်ဆိုလျှင် ကိုယ်ကိုကိုယ်လှည့်ဖြားကြ၏။ ငါတို့၌ သစ္စာတရားမရှိ” ဟု ပြတ်သားစွာဆို၏။ (၁ ယော. ၁:၈) ထို့ကြောင့် ခရစ်တော်၏နောက်လိုက်စစ်များအတွက်သုံးသော အဓိပ္ပာယ်မျိုးဖြင့် သူတော်စင်ဖြစ်ခြင်းသည် အသွေးအသား၌ အပြစ်ရှိသမျှနှင့်ကင်းလွတ်သည်ကိုမဆိုလို။

ခရစ်ယာန်စစ်အားလုံး ကောင်းကင်အသက်တာရကြမည့်သူတော်စင်များ ဟုတ်မဟုတ် စာမျက်နှာ ၄၀-၄၅ ကိုရှု။

တစ်စုံတစ်ယောက်က ဤသို့ပြောလျှင်​—

‘ခင်ဗျား သူတော်စင်တွေကိုယုံကြည်သလား’

ဤသို့ ပြန်ပြောနိုင်သည်– ‘ဘယ်သူ့ကိုပြောတာလဲ။’ သူက မာရိနှင့်/သို့မဟုတ် တမန်တော်များအကြောင်းပြောလျှင် ဤသို့ထပ်၍ပြောနိုင်သည်– (၁) ကျမ်းစာထဲမှာ သူတို့ကို အဲဒီလိုခေါ်ထားတာ မှန်ပါတယ်။ အဲဒီမှာရေးထားတာကိုလည်း ကျွန်တော်ယုံကြည်ပါတယ်။ ဒါပေမဲ့ ကျွန်တော်အထူးစိတ်ဝင်စားတာက ဒီကနေ့ သူတို့ဘာလုပ်နေကြတယ်၊ ကျွန်တော်တို့နဲ့ဘယ်လိုပတ်သက်တယ် ဆိုတဲ့အချက်ပါပဲ။ မိတ်ဆွေကော။ . . . သူတို့နဲ့ပတ်သက်လို့ ကျမ်းစာထဲမှာ အင်မတန်စိတ်ဝင်စားဖို့ကောင်းတဲ့အချက်တစ်ချက်ကို ကျွန်တော်တွေ့ရတယ်။ မိတ်ဆွေကိုပြချင်တယ်။ (ဗျာ. ၅:၉၊ ၁၀)’ [ကျမ်းချက်စာသားနှင့်ပတ်သက်၍ မေးခွန်းထုတ်လျှင် မှတ်သားရန်။ JB က “လောကကိုအုပ်ချုပ်” ဟုပြန်ဆိုသည်။ CC က “ကမ္ဘာအပေါ်စိုးစံ” ဟုဆို၏။ Kx က “ကမ္ဘာအပေါ် ဘုရင်များအဖြစ်စိုးစံ” ဟုဆိုသည်။ သို့သော် NAB နှင့် Dy တို့က “ကမ္ဘာပေါ်မှာအုပ်စိုး” ဟု ပြန်ဆိုကြသည်။ (သမ၊ သမ္မာ၊ သက တို့ကိုလည်းရှု။) ဂရိသဒ္ဒါနှင့်ပတ်သက်၍ “ကောင်းကင်” အောက် စာမျက်နှာ ၄၄ ကိုရှု။] (၂) ‘ဒီလိုအစိုးရအုပ်ချုပ်မှုအောက်မှာ ဘဝဟာ ဘယ်လိုနေမယ်ထင်သလဲ။’ (ဗျာ. ၂၁:၂-၄)’

သို့မဟုတ် ဤသို့ဆိုနိုင်သည်– (သင်ကိုယ်တိုင် ကက်သလစ်တစ်ဦးဖြစ်ဖူးလျှင်) ‘ကျွန်တော်ဟာ နှစ်ပေါင်းတော်တော်ကြာ သူတော်စင်တွေအတွက် ကျင်းပတဲ့ပွဲတွေကို ဆင်နွှဲတယ်။ သူတို့ထံမှာလည်း မှန်မှန်ဆုတောင်းပါတယ်။ ဒါပေမဲ့ ကျမ်းစာထဲက အချက်တစ်ချက်ကိုဖတ်မိတဲ့အခါ စဉ်းစားစရာဖြစ်လာပါတယ်။ ဘာလဲဆိုတာ မိတ်ဆွေသိအောင် တင်ပြပါရစေ။ (စာမျက်နှာ ၃၂၅ ကိုရှု။)’