ဘာသာစကားအမျိုးမျိုးပြောခြင်း
အဓိပ္ပာယ်သတ်မှတ်ချက်– ၎င်းမှာ ရှေးခရစ်ယာန်အသင်းတော်ရှိ တပည့်တော်အချို့ သန့်ရှင်းသောဝိညာဉ်တော်အားဖြင့်ရသော အစွမ်းထူးဖြစ်၍ မိမိဘာသာမဟုတ်သည့်စကားဖြင့် ဟောပြောခြင်း၊ သို့မဟုတ် အခြားနည်းဖြင့် ဘုရားသခင့်ဂုဏ်တော်ချီးမွမ်းခြင်းကိုပြုစေနိုင်သည်။
သန့်ရှင်းသောဝိညာဉ်တော်ရသူအားလုံး “အမျိုးမျိုးသောဘာသာစကားကိုပြော” ကြမည်ဟု ကျမ်းစာဆိုသလော
၁ ကော. ၁၂:၁၃၊ ၃၀– “ငါတို့ရှိသမျှသည် ဝိညာဉ်တော်တစ်ပါးတည်းအားဖြင့် တစ်ကိုယ်တည်းထဲသို့ ဗတ္တိဇံကိုခံကြ၏။ . . . ရှိသမျှတို့သည် အနာရောဂါကို ငြိမ်းစေနိုင်သောအခွင့်ရှိကြသလော။ ရှိသမျှတို့သည် အမျိုးမျိုးသောဘာသာစကားကို ပြောနိုင်ကြသလော။” (၁ ကောရိန္သု ၁၄:၂၆ ကိုလည်းရှု။)
၁ ကော. ၁၄:၅– “သင်တို့ရှိသမျှသည် အခြားသောဘာသာစကားဖြင့် ပြောစေခြင်းငှာ ငါအလိုရှိ၏။ ပရောဖက်ပြုစေခြင်းငှာ သာ၍အလိုရှိ၏။ အကြောင်းမူကား၊ အခြားသောဘာသာစကားဖြင့် ပြောသောသူသည် အသင်းတော်ကို တည်ဆောက်ခြင်းငှာ အနက်ကိုမဖော်မပြလျှင် သူ့ထက် ပရောဖက်ပြုသောသူသည် သာ၍မြတ်သတည်း။”
တစ်ခါကမျှမသင်ဖူးသောဘာသာစကားဖြင့် စိတ်လှုပ်ရှားစွာပြောဆိုခြင်းက သန့် ရှင်းသောဝိညာဉ်တော်ရကြောင်း သက်သေပြသလော
“အမျိုးမျိုးသောဘာသာစကားကိုပြော” နိုင်စွမ်းသည် ဘုရားမှန်မှတစ်ပါး အခြားသောဌာနမှ လာနိုင်သလော
၁ ယော. ၄:၁– “ချစ်သူတို့၊ ခပ်သိမ်းသောစိတ်ဝိညာဉ်တို့ကိုမယုံကြနှင့်။ စိတ်ဝိညာဉ်တို့သည် ဘုရားသခင်နှင့်စပ်ဆိုင်သည် မစပ်ဆိုင်သည်ကို စုံစမ်းကြလော့။” (မဿဲ ၇:၂၁-၂၃ နှင့် ၂ ကောရိန္သု ၁၁:၁၄၊ ၁၅ တို့ကိုလည်းရှု။)
ယနေ့ ‘ဘာသာစကားအမျိုးမျိုးပြော’ သူတို့အထဲတွင် ပဲင်တီကော်စဲလ်နှင့်နှစ်ခြင်းအပြင်၊ ကက်သလစ်၊ အက်ပစ်စကော့ပေးလျံ၊ မက်သဒစ်စ်၊ လူသရင်နှင့် ပရက်စပစ်တေးရီးယန်း အသင်းဝင်များ ပါဝင်သည်။ ယေရှုက သန့်ရှင်းသောဝိညာဉ်တော်သည် ‘သမ္မာတရားကို တပည့်တော်တို့အား အကြွင်းမဲ့ သွန်သင်ပြသလိမ့်မည်’ ဟု မိန့်တော်မူ၏။ (ယော. ၁၆:၁၃) အထက်ပါအသင်းတစ်ခုစီ၏အသင်းသားတို့က “အမျိုးမျိုးသောဘာသာစကားကိုပြော” သော အခြားအသင်းများ၏အသင်းသားများသည် ‘သမ္မာတရား အကြွင်းမဲ့ပြသခြင်းခံရသည်’ ဟု ယုံသလော။ သူတို့ချင်း ညီညွတ်မှုမရှိရကား မည်သို့ဖြစ်နိုင်မည်နည်း။ အဘယ်ဝိညာဉ်က သူတို့အား ‘ဘာသာစကားအမျိုးမျိုးပြော’ နိုင်စွမ်းကို ပေးခြင်းဖြစ်သနည်း။
ဖောင်းတိန်းထရပ်စ်နှင့် အင်္ဂလီကန်အသင်း ဧဝံဂေလိကောင်စီတို့၏ပူးတွဲကြေညာချက်က ဤသို့ဝန်ခံ၏– “အလားတူဖြစ်ရပ်များသည် မှော်/နတ်ဆိုးဩဇာအောက်၌ ဖြစ်ပျက်နိုင်ကြောင်းကိုလည်း ကျွန်ုပ်တို့သတိပြုမိသည်။” (Gospel and Spirit [ဧဝံဂေလိနှင့်ဝိညာဉ်တော်] ၁၉၇၇၊ ဧပြီလ၊ ဖောင်းတိန်းထရပ်စ်နှင့် အင်္ဂလီကန်အသင်း ဧဝံဂေလိကောင်စီ ထုတ်ဝေသည်။ စ. ၁၂) Religious Movements in Contemporary America (ခေတ်ပြိုင်အမေရိကမှ ဘာသာရေးလှုပ်ရှားမှုများ။ အယ်လ်. ပီ. ဂယ်လပ်ကိုကိုးကား၍ အီဗင် အိုင်. ဇေရက်စကီနှင့် မာ့ ပီ. လီယွန်တို့က တည်းဖြတ်သည်။) ဟူသောစာအုပ်က ဟေတီနိုင်ငံတွင် ‘ဘာသာစကားအမျိုးမျိုးပြောခြင်း’ သည် ပဲင်တီကောစဲလ်အသင်းနှင့် ဗူးဒူးဘာသာနှစ်ခုစလုံး၏ ကြန်အင်လက္ခဏာဖြစ်ကြောင်း တင်ပြသည်။—(ပရင်းစတန်၊ နယူးဂျယ်စီ; ၁၉၇၄ ခု)၊ စ. ၆၉၃; ၂ သက်သာလောနိတ် ၂:၉၊ ၁၀ ကိုလည်းရှု။
ယနေ့ ‘ဘာသာစကားအမျိုးမျိုးပြောခြင်း’ သည် ပထမရာစုခရစ်ယာန်တို့၏ပြောခြင်းနှင့်တူသလော
ပထမရာစု၌ “အမျိုးမျိုးသောဘာသာစကားကိုပြော” ခြင်းပါဝင်သော အံ့ဖွယ်ဝိညာဉ်ဆုများက ဘုရားသခင့်မျက်နှာသာတော်သည် ဂျူးဝတ်ပြုမှုစနစ်အပေါ်မှာမရှိတော့ဘဲ ထူထောင်စ ခရစ်ယာန်အသင်းတော်အပေါ် သက်ရောက်ပြီဖြစ်ကြောင်းကို သက်သေထူ၏။ (ဟေဗြဲ ၂:၂-၄) ပထမရာစု၌ ထိုသို့သက်သေထူခဲ့ပြီဖြစ်ရာ ယခုခေတ်၌ ထိုအချက်ကိုအဖန်တလဲလဲ သက်သေထူရန်လိုသေးသလော။
ပထမရာစု၌ “အမျိုးမျိုးသောဘာသာစကားကိုပြော” ခြင်းအစွမ်းက နောက်တော်လိုက်တို့အား ယေရှုစေခန့်သော နိုင်ငံတကာလုပ်ငန်းကို အရှိန်အဟုန်မြှင့်တင်ပေးခဲ့သည်။ (တ. ၁:၈; ၂:၁-၁၁; မ. ၂၈:၁၉) ယနေ့ “အမျိုးမျိုးသောဘာသာစကားကိုပြော” သူတို့သည် ထိုအစွမ်းကို ထိုနည်းတူ အသုံးချကြသလော။
ပထမရာစု၌၊ ခရစ်ယာန်များ “အမျိုးမျိုးသောဘာသာစကားကိုပြော” စဉ် ထိုဘာသာများကိုနားလည်သူများအဖို့ အဓိပ္ပာယ်ရှိ၏။ (တ. ၂:၄၊ ၈) ယနေ့ “အမျိုးမျိုးသောဘာသာစကားကိုပြော” ကြစဉ် စိတ်လှုပ်ရှားမှုပေါက်ကွဲပြီး လူတို့နားမလည်နိုင်သောအသံဗလံများသာ ထွက်လာကြသည်မဟုတ်လော။
ကျမ်းစာက ပထမရာစု၌ အသင်းတော်သည် စည်းဝေးတစ်ခု၌ “အမျိုးမျိုးသောဘာသာစကားကိုပြော” သူ နှစ်ဦးသုံးဦးအားသာ ‘အလှည့်ကျ’ ပြောခွင့်ပြုရန်၊ အနက်ပြန်သူမရှိလျှင် တိတ်ဆိတ်စွာနေရန်ဖြစ်ကြောင်း ဆိုထားသည်။ (၁ ကော. ၁၄:၂၇၊ ၂၈) ယနေ့ ထိုအတိုင်းပြုကြသလော။
“ဝိညာဉ်” ခေါင်းစဉ်အောက် စာမျက်နှာ ၃၁၃၊ ၃၁၄ တို့ကိုလည်းရှု။
သန့်ရှင်းသောဝိညာဉ်တော်က ကဲရစ်စမက်တစ် (ဝိညာဉ်ဆုရသည်ဆိုသော) အသင်းသားများအား ကျမ်းစာမဖော်ပြသောအမှုများကိုပြုရန် ညွှန်ကြားနေခြင်းမဖြစ်နိုင်ပေလော
၂ တိ. ၃:၁၆၊ ၁၇– “ထိုကျမ်းစာရှိသမျှသည် ဘုရားသခင် မှုတ်သွင်းတော်မူသောအားဖြင့်ဖြစ်၍ ဘုရားသခင်၏လူသည် စုံလင်သောသူ၊ ကောင်းသောအမှုအမျိုးမျိုးတို့ကို ပြုစုခြင်းအလိုငှာ ပြင်ဆင်သောသူဖြစ်မည်အကြောင်း၊ ဩဝါဒပေးခြင်း၊ အပြစ်ကိုဖော်ပြခြင်း၊ ဖြောင့်မတ်စွာပြုပြင်ခြင်း၊ တရားကိုသွန်သင်ခြင်း ကျေးဇူးများကိုပြုတတ်၏။” (လူတစ်ယောက်ကမှုတ်သွင်းခံဗျာဒိတ်ရသည်ဆိုသော်လည်း ၎င်းသည်ယေရှုနှင့်တမန်တော်များမှတစ်ဆင့် ဘုရားသခင့်ဝိညာဉ်တော်ပေးသောဗျာဒိတ်တော်နှင့် ဆန့်ကျင်လျှင် ထိုဌာနမှလာသောသတင်း ဖြစ်နိုင်မည်လော။)
ဂလ. ၁:၈၊ သမ– “အကယ်၍ ငါတို့ဖြစ်စေ၊ ကောင်းကင်ကစေတမန်တော်ဖြစ်စေ၊ ငါတို့ကြားပြောရင်းသတင်းတော်မြတ်နှင့် ဆန့်ကျင်သော သတင်းကို ကြားပြောလျှင် အမင်္ဂလာခံစေ။”
“အမျိုးမျိုးသောဘာသာစကားပြော” ခြင်းကို အထင်ကြီးသော အသင်းအဖွဲ့များ၏ အသင်းဝင်တို့နေထိုင်ပုံသည် မိမိတို့အပေါ် သန့် ရှင်းသောဝိညာဉ်တော်ကျိန်းဝပ်ကြောင်း သက်သေထူသလော
သူတို့သည် အုပ်စုတစ်ခုအနေနှင့် နူးညံ့သိမ်မွေ့ခြင်း၊ စိတ်ချုပ်တည်းခြင်းစသော ဝိညာဉ်အသီးများကို ထင်ရှားစွာသီးပွင့်ကြသလော။ သူတို့၏ဝတ်ပြုစည်းဝေးများသို့ တက်ရောက်သောလူတို့ရှေ့ ၌ ထိုအရည်အချင်းများ ပေါ်လွင်နေသလော။—ဂလ. ၅:၂၂၊ ၂၃။
သူတို့သည် တကယ်ပင် ‘ဤလောကနှင့်မစပ်ဆိုင်’ ဘဲနေသလော။ ယင်းကြောင့် သူတို့သည် ဘုရားသခင့်နိုင်ငံတော်အတွက် အကြွင်းမဲ့အပ်နှံသလော။ သို့မဟုတ်၊ လောကီနိုင်ငံရေး၌ ပါဝင်သလော။ စစ်ကာလအတွင်း သွေးပြစ်ကင်းအောင်နေခဲ့ကြသလော။ အုပ်စုတစ်ခုအနေနှင့် လောကီစာရိတ္တယိုယွင်းမှုကိုရှောင်သဖြင့် နာမည်ကောင်းရသလော။—ယော. ၁၇:၁၆; ဟေရှာ. ၂:၄; ၁ သက်. ၄:၃-၈။
“အမျိုးမျိုးသောဘာသာစကားကိုပြော” ခြင်းအစွမ်းရှိမရှိ ဟူသောအချက်ဖြင့် ယနေ့ခရစ်ယာန်စစ်တို့ကို ဝေခွဲရန်လော
ယော. ၁၃:၃၅– “သင်တို့သည် အချင်းချင်းချစ်ကြလျှင် လူအပေါင်းတို့သည် ထိုမေတ္တာကိုထောက်၍ သင်တို့သည် ငါ၏တပည့်ဖြစ်သည်ကို သိရကြလိမ့်မည်။”
၁ ကော. ၁၃:၁၊ ၈၊ သမ– “ငါသည် လူတို့နှင့်စေတမန်တို့ဘာသာစကားထူး ပြောဆိုသော်လည်း မေတ္တာမရှိလျှင် ပဲ့တင်ခတ်သောကြေးစည်၊ အသံမြည်သောလင်းကွင်းမျှ ဖြစ်လေပြီ။ မေတ္တာသည် ကြွေကျတော့မည်မဟုတ်။ ဟောပြောဉာဏ်ဖြစ်လျှင် ပပျောက်ခြင်း၊ ဘာသာစကားထူးဖြစ်လျှင် ရပ်စဲခြင်း . . . ကိုခံရတော့မည်။”
ယေရှုက နောက်တော်လိုက်များအပေါ် သန့်ရှင်းသောဝိညာဉ်တော် သက်ရောက်၍ သူတို့သည် မြေကြီးစွန်းတိုင် သူ့အဖို့သက်သေခံသောသူများဖြစ်ကြလိမ့်မည်ဟု မိန့်တော်မူသည်။ (တ. ၁:၈) “လူမျိုးတကာတို့ကို ငါ့တပည့်ဖြစ်စေ” ဟု ညွှန်ကြားတော်မူသည်။ (မ. ၂၈:၁၉၊ ၂၀) ‘လူမျိုးတကာတို့အား သက်သေဖြစ်စေရန် နိုင်ငံတော်သတင်းကောင်းကို လူနေထိုင်ရာကမ္ဘာအနှံ့ ဟောပြောရမည်’ ဟုလည်း တင်ကူးမိန့်ဆိုခဲ့သည်။ (မ. ၂၄:၁၄) ယနေ့ မည်သူများက တစ်ဦးချင်းဖြစ်စေ၊ အဖွဲ့အနေနှင့်ဖြစ်စေ ထိုအလုပ်ကိုလုပ်လျက်နေသနည်း။ အဘယ်အဖွဲ့ ဝိညာဉ်တော်ရသည်ကိုဝေခွဲရာ၌ ယေရှုစကားနှင့်အညီ အဆိုပါသာဓကကို မရှာသင့်ပေလော။
“အမျိုးမျိုးသောဘာသာစကားကိုပြော” ခြင်းသည် “စုံလင်သည့်အရာ” လာချိန်တိုင်ဆက်၍တည်ရှိရန်လော
၁ ကောရိန္သု ၁၃:၈ ၌ ပရောဖက်ဉာဏ်၊ အမျိုးမျိုးသောဘာသာစကားကိုပြောနိုင်ခွင့်၊ အသိပညာစသော အံ့ဖွယ်ဆုများအကြောင်း ဆိုထားသည်။ အခန်းငယ် ၉ (သက) ၌ ထိုဆုကျေးဇူးများအနက်၊ အသိပညာနှင့်ပရောဖက်ဉာဏ်ကို ထပ်မံဖော်ပြ၍ ဤသို့ဆို၏။ “ငါတို့၏အသိပညာသည် မစုံလင်။ ဗျာဒိတ်တော်အားဖြင့်ဟောပြောနိုင်သောစွမ်းရည် [“ပရောဖက်ဉာဏ်၊” ယဒ] သည်လည်း မစုံလင်။” ထို့နောက် အခန်းငယ် ၁၀ က “စုံလင်ခြင်းသို့ရောက် [“စုံလင်သည့်အရာ ရောက်ရှိလာ၊” သက] သောအခါ၌မူကား မစုံလင်သမျှတို့သည် ကွယ်ပျောက်ကြလိမ့်မည်” ဟုဆို၏။ “စုံလင်” ဟူသောစကားလုံးကို ဂရိ teʹlei·on (တဲလေးယွန်) မှပြန်ဆို၍ အရွယ်ရောက်၊ ပြည့်စုံ သို့မဟုတ်၊ စုံလင်ဟု အဓိပ္ပာယ်ရသည်။ Ro, By နှင့် ကဘ တို့က “ပြည့်စုံ” ဟုပြန်ဆိုသည်။ “မစုံလင်” သောအရာမှာ “အမျိုးမျိုးသောဘာသာစကားကိုပြော” သောဆု မဟုတ်ကြောင်း သတိပြုပါ။ “ပရောဖက်ဉာဏ်” နှင့် “အသိပညာ” (သက) ကိုဆိုနေခြင်းဖြစ်သည်။ တစ်နည်းအားဖြင့် ရှေးခရစ်ယာန်တို့ ထိုအံ့ဖွယ်ဆုများရပင်ငြား ဘုရားသခင့်ရည်ရွယ်ချက်ကို မစုံမလင်၊ တစ်ပိုင်းတစ်စမျှသာသိကြသည်။ သို့သော် ပရောဖက်ပြုချက်များ ပြည့်စုံလာ၍ ရည်ရွယ်တော်မူချက်ပြီးမြောက်လာသောအခါ ပြည့်ဝ “စုံလင်သည့်အရာ” ရောက်လာမည်။ သို့ဖြစ်၍ “အမျိုးမျိုးသောဘာသာစကားကိုပြော” ခြင်းဆုကျေးဇူး မည်မျှကြာမြင့်စွာတည်ရှိမည်ကို ဆွေးနွေးနေခြင်းမဟုတ်သည်မှာ သိသာသည်။
သို့တစေ၊ ခရစ်ယာန်များ “အမျိုးမျိုးသောဘာသာစကားကိုပြော” နိုင်စွမ်းမည်မျှကြာမြင့်စွာရကြမည်အကြောင်း ကျမ်းစာက အရိပ်အမြွက်တင်ပြ၏။ မှတ်တမ်းအရ၊ ယေရှုခရစ်၏တမန်တော်များ လူတို့အပေါ်လက်တင်စဉ်ဖြစ်စေ၊ ရောက်ရှိစဉ်ဖြစ်စေ၊ အခြားသူများ ဤဆုနှင့်အခြားသောဝိညာဉ်ဆုတို့ကိုရကြသည်။ (တ. ၂:၄၊ ၁၄၊ ၁၇; ၁၀:၄၄-၄၆; ၁၉:၆; တမန်တော် ၈:၁၄-၁၈ ကိုလည်းရှု။) သို့နှင့် တမန်တော်များနှင့် ထိုနည်းဖြင့် ဝိညာဉ်ဆုရကြသူများ သေလွန်သည့်နောက် ဘုရားသခင့်ဝိညာဉ်တော် လုပ်ဆောင်ချက်ကြောင့် ဖြစ်ပေါ်သောအံ့ဖွယ်ဆုများလည်း အဆုံးတိုင်ရပေမည်။ ဤအမြင်သည် ဟေဗြဲ ၂:၂-၄ ပါ ထိုဆုများပေးရခြင်းရည်ရွယ်ချက်နှင့်ညီညွတ်၏။
မာကု ၁၆:၁၇၊ ၁၈ က ယုံကြည်သူတို့၏လက္ခဏာတစ်ရပ်ကား “ထူးခြားသောဘာသာစကားမျိုးတို့ကိုပြော” နိုင်စွမ်းဖြစ်မည်ဟု မဆိုပေလော
ထိုကျမ်းချက်များက “အမျိုးမျိုးသောဘာသာစကားကိုပြော” ခြင်းမက မြွေကိုင်ခြင်း၊ အဆိပ်သောက်ခြင်းအကြောင်းကိုပါ ဆိုထားကြောင်း သတိပြုသင့်သည်။ “အမျိုးမျိုးသောဘာသာစကားပြော” သူတို့အားလုံးက ထိုအရာများကိုပါပြုရန် လူတို့ကို အားပေးကြ၏လော။
အထက်ကျမ်းချက်များကို ကျမ်းပညာရှင်များအားလုံးက လက်ခံကြသည်မဟုတ်။ အကြောင်းရင်းကို “ကုသခြင်း” ခေါင်းစဉ်အောက်၊ စာမျက်နှာ ၂၆၊ ၂၇ တို့တွင်ရှု။
တစ်စုံတစ်ယောက်က ဤသို့ပြောလျှင်—
‘ဘာသာစကားအမျိုးမျိုးပြောတာကို ခင်ဗျားယုံသလား
ဤသို့ပြန်ပြောနိုင်သည်– ‘ယေဟောဝါသက်သေတွေ ဘာသာစကားအမျိုးမျိုးပြောကြပါတယ်။ ဒါပေမဲ့ စိတ်လှုပ်ရှားပြီး “မသိတဲ့ဘာသာစကားတွေ” ကိုတော့ မပြောကြပါဘူး။ ဒါပေမဲ့၊ မေးပါရစေ။ ခုခေတ် “အမျိုးမျိုးသောဘာသာစကားကိုပြော” ခြင်းဟာ ပထမရာစုခရစ်ယာန်တွေပြောပုံနဲ့အတူတူပဲလား။ ထို့နောက် ဤသို့ထပ်၍ဆိုနိုင်သည်– ‘အင်မတန် စိတ်ဝင်စားစရာကောင်းတဲ့ နှိုင်းယှဉ်ချက်တချို့ကို တင်ပြချင်ပါတယ်။ (စာမျက်နှာ ၁၈၁ ပါ၊ အကြောင်းများကိုသုံးနိုင်သည်။)’
သို့မဟုတ် ဤသို့ဆိုနိုင်သည်– ‘ပထမရာစုခရစ်ယာန်တွေ ‘ဘာသာစကားအမျိုးမျိုး ပြော’ ကြတာကို ကျွန်တော်တို့ယုံပါတယ်။ ဒါဟာ ဟိုအချိန်အတွက် တကယ်ပဲအသုံးဝင်တယ်။ ဘာအတွက်လည်း သိသလား။’ ထို့နောက် ဤသို့ထပ်၍ဆိုနိုင်သည်– (၁) ‘ဘုရားသခင်ရဲ့ မျက်နှာသာတော်ဟာ ဂျူးစနစ်ပေါ်မှာမရှိတော့ဘဲ ထူထောင်စ ခရစ်ယာန်အသင်းတော်ပေါ် သက်ရောက်ပြီဆိုတာကို သာဓကပြဖို့အတွက်ဖြစ်တယ်။ (ဟေဗြဲ ၂:၂-၄)’ (၂) ‘ဒါဟာ အချိန်တိုတိုကလေးအတွင်း သတင်းကောင်းကို နိုင်ငံတကာပျံ့နှံ့သွားစေတဲ့ လက်တွေ့ကျနည်းတစ်နည်းဖြစ်တယ်။ (တ. ၁:၈)’