ရှေ့ဆောင်တွေအတွက် ဘာသင်တန်းတွေ ရှိသလဲ

ယေဟောဝါသက်သေတွေဟာ သင်တန်းတွေ ကျင်းပပေးလာတာ နှစ်များစွာ ရှိနေပါပြီ။ နိုင်ငံတော်ဟောပြောခြင်းလုပ်ငန်းမှာ အချိန်ပြည့်ပါဝင်ဖို့ ကိုယ့်ကိုယ်ကိုယ် ပေးဆက်ထားသူတွေအတွက် အထူးသင်တန်းတွေ ပြင်ဆင်ပေးထားပါတယ်၊ အဲဒါမှ သူတို့တစ်တွေ “ဘုရားပေး တာဝန်ကို ကျေပွန်အောင် ဆောင်ရွက်” နိုင်မယ်။—၂ တိမောသေ ၄:၅။

ရှေ့ဆောင်လုပ်ငန်းသင်တန်း။ မှန်မှန်ရှေ့ဆောင်လုပ်တာ တစ်နှစ်ပြည့်ပြီဆိုရင် အနီးအနားက ဝတ်ပြုရာခန်းမတစ်ခုမှာ ခြောက်ရက်ကြာ ပို့ချတဲ့သင်တန်းကို တက်ရောက်နိုင်မယ်။ သင်တန်းရဲ့ ရည်ရွယ်ချက်က ရှေ့ဆောင်ကို ယေဟောဝါနဲ့ ပိုရင်းနှီးစေဖို့၊ အမှုဆောင်လုပ်ငန်း ကဏ္ဍတိုင်းမှာ ပိုထိရောက်စေဖို့နဲ့ အမှုဆောင်လုပ်ငန်းမှာ ဆက်ပါဝင်နိုင်ဖို့ ဖြစ်တယ်။

နိုင်ငံတော်သတင်းကောင်း ဟောပြောသူများအတွက် သင်တန်း။ နှစ်လကြာတဲ့ ဒီသင်တန်းဟာ အိမ်ကနေ ထွက်ခွာပြီး လိုအပ်တဲ့ ဘယ်နေရာမှာမဆို အမှုဆောင်ဖို့ လိုလိုလားလားရှိတဲ့ အတွေ့အကြုံရှိပြီးသား ရှေ့ဆောင်တွေကို လေ့ကျင့်ပေးတဲ့သင်တန်း ဖြစ်တယ်။ တကယ်တော့ သူတို့ဟာ အကြီးမြတ်ဆုံး သတင်းကောင်းဟောပြောသူ ယေရှုခရစ်ကို တုပပြီး “ကျွန်တော် ရှိပါတယ်။ ကျွန်တော့်ကို စေလွှတ်ပါ” လို့ ပြောနေကြတာ ဖြစ်တယ်။ (ဟေရှာယ ၆:၈။ ယောဟန် ၇:၂၉) အိမ်နဲ့ ဝေးတဲ့နေရာကို သွားရတဲ့အတွက် ရိုးရိုးရှင်းရှင်း နေထိုင်ဖို့ လိုပါမယ်။ နေသားကျနေတဲ့ ယဉ်ကျေးမှု၊ ရာသီဥတု၊ အစားအသောက်တွေနဲ့ လုံးဝ မတူတော့တာ ဖြစ်နိုင်တယ်။ ဘာသာစကားအသစ်တစ်ခုကိုတောင် သင်ယူဖို့ လိုအပ်နိုင်တယ်။ ဒီသင်တန်းက အသက် ၂၃ နှစ်ကနေ ၆၅ နှစ်အထိရှိတဲ့ တစ်ကိုယ်ရေ ညီအစ်ကို၊ ညီအစ်မတွေ၊ အိမ်ထောင်သည် မောင်နှံတွေကို တာဝန်အတွက် လိုအပ်တဲ့ အရည်အသွေးတွေ ပျိုးထောင်ဖို့နဲ့ ယေဟောဝါနဲ့ ကိုယ်တော့် အဖွဲ့အစည်းအတွက် ပိုအသုံးဝင်တဲ့သူတွေ ဖြစ်ဖို့ ကူညီပေးတယ်။

ဂိလဒ် ကင်းမျှော်စင် သမ္မာကျမ်းစာ သင်တန်း။ “ဂိလဒ်” ဆိုတဲ့ ဟီဘရူး စကားလုံးက “သက်သေအစုအပုံ” လို့ အဓိပ္ပာယ်ရတယ်။ ၁၉၄၃ ခုနှစ်ကစပြီး ဂိလဒ်သင်တန်းက ခရစ်ယာန်သာသနာပြု ၈,၀၀၀ ကျော်ကို လေ့ကျင့်ပေးခဲ့ပြီ။ သာသနာပြုတွေဟာ “ကမ္ဘာမြေအစွန်အဖျားအထိ” သက်သေခံပြီး အကြီးအကျယ် အောင်မြင်ခဲ့ကြတယ်။ (တမန်တော် ၁၃:၄၇) ပီရူးနိုင်ငံမှာ သာသနာပြုတွေ စရောက်တုန်းက အသင်းတော်တစ်ခုမှ မရှိဘူး။ အခုဆိုရင် အသင်းတော် ၁,၀၀၀ ကျော် ရှိနေပြီ။ ဂျပန်နိုင်ငံကို သာသနာပြုတွေ စရောက်တုန်းက သက်သေခံ ဆယ်ယောက်တောင် မပြည့်ဘူး၊ အခုဆိုရင် ၂၀၀,၀၀၀ ကျော် ရှိနေပြီ။ ငါးလကြာတဲ့ ဒီသင်တန်းမှာ သမ္မာကျမ်းစာကို အသေးစိတ် လေ့လာရတယ်။ အထူးရှေ့ဆောင်၊ သာသနာပြုအဖြစ် အမှုဆောင်နေသူတွေ၊ ဌာနခွဲရုံးမှာ အမှုဆောင်နေသူ၊ တိုက်နယ်လုပ်ငန်းမှာ ပါဝင်နေသူတွေဟာ ဒီသင်တန်း တက်ဖို့ ဖိတ်ခေါ် ခံရတယ်။ သူတို့ဟာ ကမ္ဘာချီလုပ်ငန်းကို ကူညီထောက်ပံ့ဖို့ ထိရောက်တဲ့ လေ့ကျင့်မှုကို ခံယူကြရတယ်။

• ရှေ့ဆောင်လုပ်ငန်းသင်တန်းရဲ့ ရည်ရွယ်ချက်က ဘာလဲ။

• နိုင်ငံတော်သတင်းကောင်း ဟောပြောသူများအတွက် သင်တန်းကို ဘယ်သူတွေအတွက် ပြင်ဆင်ပေးထားသလဲ။