သမ္မာကျမ်းစာ မှားကြောင်း သူတို့သက်သေထူခဲ့သလော

သိပ္ပံပညာရှင်နှင့်ကျမ်းစာဝေဖန်သူတို့သည် သမ္မာကျမ်းစာတွင် အမှားများနှင့်လုပ်ကြံမှုများပါဝင်ကြောင်း အမှန်သက်သေထူခဲ့သလော။ ယင်းကိုသင်လက်မခံမီ မိမိတို့၏ထင်မြင်ယူဆချက်ကို အပြုသဘောနှင့်အကျိုးအကြောင်းခိုင်လုံသည့်နည်းဖြင့်တင်ပြသည့် ကျမ်းပညာရှင်တို့ပင် အမြဲတမ်းမမှန်ကန်ကြောင်း သင်သတိရသင့်သည်။ သူတို့၏အယူအဆများသည် အများအားဖြင့်အခြေအမြစ်မခိုင်လုံကြပါ။

အခြေမခိုင်သောမှန်းဆချက်များ

ကျမ်းစာဝေဖန်သူတစ်ဦး၏ အကျိုးအကြောင်းခိုင်လုံညီညွတ်သောအဆိုကို ဥပမာကြည့်မည်ဆိုလျှင် ဒံယေလကျမ်းနှင့်ပတ်သက်၍ ဒရိုက်ဗာ (S.R. Driver) ၏အပြောကိုဆင်ခြင်ကြည့်နိုင်သည်။ ဤကျမ်းစာစောင်သည် ဒံယေလကိုယ်တိုင်ဗာဗုလုန်တွင် ဘီစီအီး ၆ ရာစုနှစ်၌ရေးသားခဲ့ကြောင်းအစဉ်အဆက် ယူမှတ်ခံခဲ့ရသည်။ (ဒံယေလ ၁၂:၈ ၉) သို့သော်ဒရိုက်ဗာက ထိုအချိန်ထက်အလွန်နောက်ကျပြီးမှသာ ရေးကြောင်းဆိုသည်။ အဘယ်ကြောင့်နည်း။ “သက်သေပြချက်” တစ်ခုမှာ ယင်းကျမ်းစာစောင်တွင် ဂရိစကားလုံးများပါရှိခြင်းဖြစ်သည်။ ဒရိုက်ဗာက “ဤစကားလုံးများသည် မဟာအလက်ဇန္ဒား၏အောင်မြင်မှုအားဖြင့် အာရှတစ်ခွင်ဂရိသြဇာလွှမ်းမိုးမှုပျံ့နှံ့ပြီးနောက်ပိုင်း တွင်ဒံယေလကျမ်းစာစောင်ကိုရေးမှသာ ဤစကားလုံးများကိုထည့်သွင်းရေးသားနိုင်ကြောင်း စိတ်ချလက်ချအတည်ပြုနိုင်သည်” ဟုအခိုင်အမာပြောဆိုသည်။ အလက်ဇန္ဒား၏အောင်မြင်မှုမှာ ဘီစီအီး ၃၃၀ ခန့်ကဖြစ်သည်။

ဒရိုက်ဗာ၏ဖော်ပြချက်သည် ဤထက်ပို၍မတိကျနိုင်တော့ချေ။ သို့သော် သူ့ဖော်ပြချက်ကိုကျောထောက်နောက်ခံပြုရန် ဂရိစကားလုံးသုံးလုံးသာရည်ညွှန်းထားပြီး ယင်းစကားလုံးများမှာ ဂီတတူရိယာများ၏အမည်ဖြစ်သည်။ (ဒံယေလ ၃:၅) အနောက်အာရှနှင့်ဂရိတို့သည် သမိုင်းမှတ်တမ်းတင်စကတည်းက လက်ပွန်းတတီးကူးလူးဆက်ဆံမှုရှိခဲ့ရာ ဘီစီအီး ခြောက်ရာစုက ဗာဗုလုန်တွင် ဂီတတူရိယာများကို ဂရိအမည်နာမနှင့်ခေါ်ဝေါ်သုံးစွဲခြင်းမရှိကြောင်း မည်သူတစ်ဦးတစ်ယောက်က အခိုင်အမာပြောနိုင်မည်နည်း။ ဒံယေလကျမ်းစာစောင်ရေးသားချိန်နှင့် ရေးသူတို့ကိုအခြေအမြစ်မဲ့စွာစောဒကတက်ခြင်းပါတကား။

အခြားဥပမာတစ်ခုမှာ ကျမ်းစာ၏ပထမကျမ်းငါးစောင်ကို ယူမှတ်ပုံဖြစ်သည်။ အစဉ်အလာအရ ယင်းစာစောင်များ၏အများစုအပိုင်းများကို ဘီစီအီး ၁၅၀၀ လောက်တွင်မောရှေရေးသားခဲ့သည်ဟုဆိုသည်။ သို့သော် ဝေဖန်သူများက စာစောင်များသည် အရေးအသားပုံစံချင်းမတူကြဟုဆိုကြသည်။ ဘုရားသခင်သည် မိမိနာမတော်ကို တစ်ခါတစ်ရံယေဟောဝါ [ JEHOVAH ] ဟုဖော်ပြပြီး တစ်ခါတစ်ရံ “ဘုရား” ဟူသောဟေဗြဲစကားလုံးဖြင့်ဖော်ပြသည်ဟုဆိုကြသည်။ ယင်းသို့သိရှိရသည့်အချက်မှနေ၍ ဤကျမ်းစာစောင်များသည် မတူညီသောအချိန်များတွင် ရေးသားထားသည့်အပိုင်းအစများကို ပြန်လည်စုစည်းထားရာများဖြစ်ပြီး ဘီစီအီး ၅၃၇ ခုနှစ်နောက်ပိုင်းတွင်ပြန်လည်စုပေါင်း၍ အချောသပ်သည်ဟုသူတို့ဆက်စပ်ယူကြသည်။

ဤသီအိုရီသည်အများယုံကြည်လက်ခံထားရာဖြစ်သော်လည်း မောရှေသည် ဖန်ဆင်းရှင်ကိုရည်ညွှန်းရာတွင် ဘုရားသခင်နှင့်ယေဟောဝါနှစ်မျိုးစလုံးအနေနှင့် အဘယ်ကြောင့်မဖော်ပြနိုင်ခဲ့ကြောင်းကိုမည်သူမျှမရှင်းပြခဲ့ချေ။ မောရှေသည် မတူညီသောအကြောင်းအရာများကို မိမိအသက်တာအတွင်း မတူညီသောအချိန်များတွင် ရေးသားဖော်ပြသည်ဆိုလျှင် ကွဲပြားသော သို့မဟုတ် သာ၍ရှေးကျသောပုံစံဖြင့် အဘယ်ကြောင့်မရေးနိုင်ကြောင်းကို အဘယ်သူမျှမရှင်းပြနိုင်ပေ။ ထို့ပြင် ဂျွန်ရိုးမားက သူရေးသည့် Testament—The Bible and History စာအုပ်တွင် ဤသို့ဆိုထားသည်။ “ယင်းအပေါ်အခြေခံကန့်ကွက်ချက်မှာ မျက်မှောက်ခေတ်ကျမ်းတတ်များ မြတ်နိုးလှသည့်ကွဲပြားသောကျမ်းပိုဒ်များရှိသည်ဟူသောအဆိုကို သက်သေပြရန်ရှေးကျမ်းပိုဒ်တစ်ခုကိုမျှ ယနေ့အထိရှာ၍မတွေ့ချေ။”

သမ္မာကျမ်းစာကို ဝေဖန်ရေးဝါဒီများစွာတို့၏အခြေခံတွေးဆချက်နှင့်ပတ်သက်၍ McClintock and Strong’s Cyclopedia စွယ်စုံကျမ်းက ဤသို့ရှင်းပြထားသည်။ “စူးစမ်းရှာဖွေသူတို့က . . . ရှင်းလင်းတင်ပြချက်နောက်တွင်ရှိ သမိုင်းဖြစ်ရပ်မှန်သည် သဘာဝဖြစ်ရပ်မှန်အစစ်ဖြစ်သည်ဟူသည့်မှန်းဆချက်ဖြင့်အစပြုသည်။ ကျွန်ုပ်တို့သိထားသည့် သဘာဝတရား၏ဖြစ်ရပ်မှန်များကဲ့သို့ပင်ဖြစ်သည်။ . . . စာရေးသူတစ်ယောက်သည် ကျွန်ုပ်တို့သိထားသည့်သဘာဝနိယာမ၏အတိုင်းအတာထက်ကျော်လွန်သောအဖြစ်အပျက်တစ်ခုကို အဖြစ်မှန်အဖြစ်ရေးသားဖော်ပြအံ့။ အဆိုပါဖော်ပြချက်သည် အမှန်တကယ်မဖြစ်ပျက်ခဲ့ပါ။”

ထို့ကြောင့်အံ့သြဖွယ်ဖြစ်ရပ်တို့သည် သဘာဝနိယာမတရားအပြင်ဘက်ရောက်နေသောကြောင့် ယင်းတို့မဖြစ်နိုင်ခဲ့ပါဟု လူအများဆိုကြသည်။ အလားတူပင် လူသားသည်ဝေးလံသည့်အနာဂတ်ကို မမြင်နိုင်သည့်အတွက် ရှည်လျားသောပရောဖက်ပြုချက်များသည်လည်း မဖြစ်နိုင်ပါဟုဆိုကြသည်။ တိကျမှန်ကန်စွာပြည့်စုံခဲ့သည့် ပရောဖက်ပြုချက်ကိုပြည့်စုံပြီးမှသာရေးခြင်းဖြစ်ရမည်။aထို့ကြောင့်အချို့က ဒံယေလကျမ်းပါပရောဖက်ပြုချက်များသည် ဘီစီအီးဒုတိယရာစုမှသာပြည့်စုံသဖြင့် ဒံယေလကျမ်းကိုထိုအချိန်တွင် စတင်ရေးသားခြင်းဖြစ်ရမည်ဟုငြင်းကြသည်။

သို့သော်ဤကဲ့သို့သောမှန်းဆချက်မျိုးသည် ဘုရားသခင်မရှိ ရှိလျှင်လည်းလူ့ရေးရာကိုမဝင်စွက်ဟူသော ယုံကြည်ချက်အပေါ်အမှီပြုထားသည်။ ကျမ်းစာတစ်ခုလုံး၏ဆိုလိုရင်းမှာ ဘုရားသခင်တည်ရှိပြီး လူ့ရေးရာများကို စိတ်အားထက်သန်စွာ စွက်ဖက်နေကြောင်းဖြစ်သည်။ ယင်းသည် မှန်ကန်ပါက—သာဓကများက မှန်ကြောင်းသက်သေပြ—မျက်မှောက်ခေတ်ကျမ်းစာဝေဖန်ချက်တို့သည် ယိုင်နဲ့သောအခြေပေါ်ရှိနေကြသည်။

ခေတ်သိပ္ပံပညာသည်သမ္မာကျမ်းစာမှားကြောင်းဖော်ပြခဲ့ပြီလော

သိပ္ပံပညာက ကျမ်းစာကိုကျွန်ုပ်တို့ယုံ၍မရကြောင်းဖော်ပြခဲ့ပြီဟူသောအဆိုကား မည်သို့နည်း။ အမှန်မှာ သိပ္ပံပညာနှင့်ပတ်သက်၍ သမ္မာကျမ်းစာဖော်ပြသည့် အချက်အများစုသည် ခေတ်သိပ္ပံပညာရှင်များ သင်ကြားသည့်အချက်များနှင့်ကိုက်ညီသည်။

ဥပမာကျန်းမာမှုနည်းပညာနှင့် ကူးစက်ရောဂါများဆိုင်ရာ အလွန်လက်တွေ့ကျသောပညတ်များကို သမ္မာကျမ်းစာပေးထားသည်။ Manual of Tropical Medicine စာအုပ်က ဤသို့မှတ်ချက်ပြုသည်။ “မောရှေအချိန်က ကြပ်မတ်သောကျန်းမာရေးဆိုင်ရာကြိုတင်ကာကွယ်မှုများကို မည်သူမျှမအံ့သြဘဲမနေနိုင်ခဲ့ချေ။ . . . ရောဂါအမျိုးအစားများမှာ (တစ်နည်းဆိုသော်) ‘ပလိပ်’ ခေါ်ပြင်းထန်သည့်ရောဂါနှင့် ကိုယ်တွင်အဖုအပိန့်တစ်မျိုးထွက်တတ်သည့် ‘နူနာ’ ခေါ်နာတာရှည်ရောဂါများဖြစ်သည့် သာမန်များဖြစ်သော်လည်း ရောဂါမကူးစက်ရန်သီးသန့်နေရသည့် အလွန်တင်းကြပ်သောစည်းမျဉ်းဥပဒေများက အတိုင်းမသိ ကောင်းကျိုးဖြစ်ထွန်းစေခဲ့ပုံရသည်။”

ဤသို့ကျမ်းစာဖော်ပြသည့်အချက်ကိုလည်း ဆင်ခြင်ကြည့်ပါ။ “ခပ်သိမ်းသောမြစ်တို့သည် ပင်လယ်ထဲသို့ရောက်ကြ၏။ သို့သော်လည်း ပင်လယ်သည်မပြည့်တတ်။ မြစ်ရေသည်စီးထွက်ရာအရပ်သို့ တစ်ဖန်ပြန်သွားတတ်၏။” (ဒေသနာ ၁:၇) ယင်းကား ယနေ့ဖတ်စာအုပ်များ၌တွေ့ရသော ရေသံသရာနှင့်တူသည်။ မြစ်ရေတို့သည် ပင်လယ်ထဲသို့စီးဝင်ကြပြီးပင်လယ်မှအခိုးအငွေ့ပျံ၍တိမ်များအဖြစ်ဖွဲ့စည်းခြင်းဖြင့် ကုန်းမြေပေါ်ပြန်ရောက်လာသည်။ ယင်းမှမိုး သို့မဟုတ် နှင်းရည်အဖြစ်ရွာချပြီး မြစ်များသို့ပြန်စီးဆင်းကြသည်။

အလားတူပင်တောင်များဖြစ်ပေါ်ခြင်း ပြိုပျက်ခြင်းနှင့် တစ်ချိန်က ယနေ့တောင်များသည် ပင်လယ်အောက်ရောက်နေခဲ့သည်ဟူသော သိပ္ပံပညာရှင်တို့၏မှတ်ချက်သည် ဆာလံဆရာ၏လင်္ကာစကားများနှင့်ကိုက်ညီသည်။ “ကိုယ်တော်သည်မြေကြီးကို အဝတ်နှင့်ဖုံးသကဲ့သို့ ပင်လယ်နှင့်ဖုံးတော်မူ၍ ရေတို့သည်တောင်များအပေါ်မှာရပ်နေကြပါ၏။ တောင်တို့သည် တက်လျက် ချိုင့်တို့သည်ဆင်းလျက် သူတို့ဖို့ခွဲခန့်တော်မူသောအရပ်သို့ရောက်ကြပါ၏။”—ဆာလံ ၁၀၄:၆၊ ၈။

စာရေးဆရာတစ်ယောက်က “ဓမ္မဟောင်းကျမ်းရေးသူတို့သည် မြေကြီးကိုအချပ်ပြားတစ်ခုကဲ့သို့ယူမှတ်ပြီး တစ်ခါတစ်ရံယင်းကိုထောက်မထားသည်ဆိုသောအခုအခံများကိုရည်ညွှန်းပြောဆိုကြသည်” ဟုစွပ်စွဲသည်။ ယင်းအချက်မမှန်မကန်ပါ။ ဟေရှာယက “မြေကြီးစက် [လုံး] အပေါ်မှာ ထိုင်တော်မူသောသူ” အကြောင်းပြောခဲ့သည်။ (ဟေရှာယ ၄၀:၂၂) ယောဘက ထိုသူအကြောင်းဤသို့ဆိုခဲ့သည်။ “ကောင်းကင်ကိုလွတ်လပ်လဟာ၌ကြက်တော်မူ၏။ မြေကြီးကိုအခုအခံမရှိဆွဲထားတော်မူ၏။” (ယောဘ ၂၆:၇) လုံးဝန်းနေသည့်မြေကြီးကို မြင်နိုင်သည့်အထောက်အကန်တစ်ခုမျှမရှိဘဲ လဟာပြင်၌ဆွဲထားသည့်ဖော်ပြချက်သည် ခေတ်နှင့်အညီဖြစ်ကြောင်းထင်ရှားသည်။

သူတို့မည်မျှသိနိုင်ကြမည်နည်း

ဆင့်ကဲဖြစ်စဉ်၏အထောက်အထားများကို ရှေးဟောင်းကမ္ဘာလေ့လာသည့် သိပ္ပံပညာရှင်များဖြစ်သော ဘူမိဗေဒနှင့်ကျောက်ဖြစ်ရုပ်ကြွင်းပညာရှင်များက တင်ပြကြသည်။ ဤပညာရှင်များနှင့်နက္ခတ္တပညာရှင်များ ရင်ဆိုင်ကြရသည့်ပြဿနာများမှာမတူကြချေ။ နက္ခတ္တပညာရှင်တို့သည် ပစ္စည်းကိရိယာအမျိုးမျိုးတို့၏အကူအညီဖြင့် အတိုင်းမသိဝေးလံသောကြယ်များ ဂြိုဟ်များ နဂါးငွေ့များ အာကာသပြင်ပ တစ်နေရာရာတို့မှ လွှင့်လှိုင်းထုတ်လွှတ်ခြင်းကို ရှာဖွေနေကြသည်။ အကြောင်းအချက်ပိုမိုရရှိရန် ကြယ်များ၏သဘာဝ စကြဝဠာ၏အစမူလတို့ကဲ့သို့သော ရှုပ်ထွေးနက်နဲသည့်အရာများနှင့်ဆိုင်သော သီအိုရီထုတ်ကြသည်။ သူတို့၏သီအိုရီများကိုပြန်လည်စစ်ဆေးခွင့် အလွန်နည်းပါးပြီး ပြန်လည်စစ်ဆေးဖြစ်ပါကလည်း ချို့ယွင်းမှုကိုတွေ့ရသည်။

ရေဒီယိုနက္ခတ္တပညာရှင်ဗာရှာ(Gerrit Verschuur) ကဤသို့ရေးသည်။ “မကြာသေးမီက ယူ အက်စ်တွင်ဂြိုဟ်များစူးစမ်းလေ့လာမှုက စကြဝဠာအတွင်းမည်သည့်အရာများရှိနေသည်ကို အမှန်သိရှိသည့်အသိပညာမှာ အလွန့်အလွန်ခေါင်းပါးနေကြောင်းတင်ပြသည်။ အနီးကပ်လေ့လာသောအခါ အင်္ဂါဂြိုဟ်သည် ကျွန်ုပ်တို့ကမ္ဘာမှလှမ်း၍ဖမ်းယူရရှိသည့်ပုံနှင့် အလွန့်အလွန်ကွာခြားပြီး . . . ကြာသပတေးဂြိုဟ်၏မျက်နှာပြင်ဝန်းကျင်အရပ်သည် ဤမျှဆန်းကြယ်နက်နဲစွာဖွဲ့စည်းတည်ရှိနေကြောင်းကို မည်သည့်နက္ခတ္တပညာရှင်မျှမတွေးထင်ခဲ့ဘူးချေ။ ဗွိုင်အေဂျာအာကာသယာဉ်က စနေဂြိုဟ်၏ဓာတ်ပုံကို ရိုက်ပို့ပေးသောအခါ အကြီးအကျယ်အံ့သြရသည်မှာ ယင်းဂြိုဟ်တွင်ကျစ်ဆံမြီးပုံရှိလှိုင်းကွင်းများ ပြေးလွှားလှုပ်ရှားနေသည့်လများနှင့် လှိုင်းကွင်းငယ် ၁,၀၀၀ ကျော်ရှိသည်။ . . . ယင်းသည်သိပ္ပံစမ်းသပ်ခန်းများရှိ ဓာတ်ပုံရိုက်ယူထားသည့်ပုံစံများကို အနီးကပ်ပုံကြီးချဲ့ကြည့်လျှင် ပို၍တွေ့မြင်သိရှိရသကဲ့သို့ပင်ဖြစ်မည်။ ဤသို့ပိုမိုအနီးကပ်လေ့လာခြင်းသည် ကျွန်ုပ်တို့ယခင်ယုံကြည်ထားရာများကို ပြောင်းလဲစေပြီး ကျွန်ုပ်တို့အားရှုပ်ထွေးတွေဝေစေသည့် လုံးဝမမျှော်လင့်သောအကြောင်းအချက်တို့ကိုဖော်ပြသည်။”

ဘူမိဗေဒပညာရှင်များ ကျောက်ဖြစ်ရုပ်ကြွင်းပညာရှင်များနှင့် ဆင့်ကဲဖြစ်စဉ်အထောက်အထားများစွာကို တင်ပြသောအခြားသူတို့သည် နက္ခတ္တဗေဒပညာရှင်များကဲ့သို့ပင် အလွန့်အလွန်ကွာလှမ်းသည့်အဖြစ်အပျက်များ အရာဝတ္ထုများကို အာရုံစိုက်ကြသည်။ အကွာအဝေးလှမ်းခြင်းမဟုတ်ဘဲ အချိန်ကွာလှမ်းခြင်းဖြစ်သည်။ နက္ခတ္တပညာရှင်တို့က အတိုင်းမသိဝေးကွာသည့်အရပ်က သေးငယ်သောလွှင့်လှိုင်းကလေးမှ အကြောင်းအချက်ရရှိရန်အားထားကြသည်။ အခြားသိပ္ပံပညာရှင်တို့မူ ကျွန်ုပ်တို့ဂြိုဟ်၏အလွန်ဝေးကွာသည့် အတိတ်ကာလက မတော်တဆကျန်ခဲ့သည့်သဲလွန်စများကို အားထားရန်ဖိအားပေးခံရကြသည်။

သမ္မာကျမ်းစာကိုသင်ယုံကြည်နိုင်သလော

ထို့ကြောင့်စဉ်းစားဆင်ခြင်တတ်သူအနေနှင့် သင်သည်ကျမ်းစာကိုမယုံကြည်နိုင်တော့အောင် အကျိုးသက်ရောက်သည့်ကျမ်းပညာရှင်တို့၏ထင်မြင်ယူဆပုံကို အလွန်အမင်းမအံ့သြသင့်ပေ။ သို့သော်ယင်းကိုယ်၌က သင်ကျမ်းစာကိုယုံကြည် နိုင် သည့်သက်သေပြချက်လည်းမဟုတ်ပေ။ ယင်းအတွက် ကျမ်းစာဝေဖန်သူများစွာမပြုလုပ်သည့်အရာကို သင်ပြုရမည်။—သင်ကိုယ်တိုင်သမ္မာကျမ်းစာကိုဖွင့်၍ အမြင်ကျယ်ကျယ်နှင့်ဖတ်ပါ။ (တမန်တော် ၁၇:၁၁) လွန်ခဲ့သည့်နှစ်အနည်းငယ်ခန့်က ကျမ်းစာဝေဖန်ရေးသမားဖြစ်ခဲ့ဖူးသော ဩစတြေးလျန်းကျမ်းစာ စာပေရေးသားသူတစ်ဦး ဤသို့ဝန်ခံသည်။ “ကျွန်တော့်ဘဝမှာ ပထမဆုံးအကြိမ်အနေနဲ့ သတင်းထောက်တစ်ဦးပုံမှန်လုပ်ဆောင်မှုရဲ့ပထမအဆင့်ကို ကျွန်တော်လုပ်ခဲ့တယ်။ ကျွန်တော်ရဲ့အချက်အလက်တွေကို ပြန်စစ်ဆေးကြည့်တဲ့အခါ . . . အရမ်းထိတ်လန့်တကြားဖြစ်သွားတယ်။ ဘာဖြစ်လဲဆိုတော့ ကျွန်တော်ဖတ်နေတာတွေ (ခရစ်ဝင်ကျမ်းမှတ်တမ်းများ) ဟာဒဏ္ဍရီပုံပြင်မဟုတ်သလို သဘာဝလေ့လာမှုပညာရှင်တွေရဲ့လုပ်ကြံဖန်တီးမှုလည်းမဟုတ်ဘူး။ ဖြစ်ရပ်မှတ်တမ်းတွေပဲ။ ထူးခြားတဲ့ဖြစ်ရပ်တွေရဲ့မူရင်းနဲ့ တစ်ဆင့်ခံမှတ်တမ်းတွေကိုဖတ်ရရင် အရသာတွေ့တယ်။ . . . အဲဒီအရသာကိုခရစ်ဝင်ကျမ်းတွေမှာတွေ့နိုင်တယ်။”

သူ့နမူနာကိုလိုက်ရန် ကျွန်ုပ်တို့သင့်ကိုအားပေးပါသည်။ ကျမ်းစာကိုသင်ကိုယ်တိုင်ဖတ်ပါ။ ကျမ်းစာပါနက်နဲသောဉာဏ်ပညာများ ပရောဖက်ပြုချက်ပြည့်စုံပုံများ အံ့သြဖွယ်သဟဇာတဖြစ်မှုများကို သင်ဆင်ခြင်မိသောအခါသမ္မာကျမ်းစာသည် လက်တွေ့မကျသောပုံပြင်ဒဏ္ဍရီများစုစည်းထားသည့် စာအုပ်မဟုတ်ကြောင်းသင်သဘောပေါက်လာမည်။ (ယောရှု ၂၃:၁၄) သမ္မာကျမ်းစာပါဉာဏ်ပညာက သင့်ဘဝကိုပိုမိုကောင်းမွန်အောင်ပြောင်းလဲနိုင်သည်ကို သင်တွေ့ပါကသမ္မာကျမ်းစာသည် ဘုရားသခင့်နှုတ်ကပါဌ်တော်ဖြစ်ကြောင်းမည်သည့်နည်းနှင့်မျှ သင်သံသယမဖြစ်တော့ချေ။ (၂ တိမောသေ ၃:၁၆ ၁၇) မှန်ပါသည် သမ္မာကျမ်းစာကို သင်ယုံကြည်စိတ်ချနိုင်ပါသည်။—ယောဟန် ၁၇:၁၇။

[အောက်ခြေမှတ်ချက်များ]

[စာမျက်နှာ ၇ ပါ ရုပ်ပုံ]

ကျောက်ဖြစ်ရုပ်ကြွင်းပညာရှင်များအတွက် အတိုင်းမသိကြာညောင်းခဲ့သည့် အတိတ်ကာလတွင်ဘာဖြစ်ခဲ့သည်ကို တွေးတောနိုင်ရန်ခက်ခဲသကဲ့သို့ပင် နက္ခတ္တပညာရှင်များလည်း အာကာသရှိအတိုင်းမသိဝေးကွာသည့်နေရာတွင်ရှိသောအရာဝတ္ထုတို့၏သဘာဝကိုစဉ်းစားနိုင်ရန်ခက်ခဲလှသည်