ဘုရားသခင့်နိုင်ငံတော်ကြွေးကြော်သူများမှတ်တမ်း
ကျောင်းတွင်—ဝိညာဉ်ရေးဆာလောင်မှုကိုဖြည့်စွက်ပေးခြင်း
“ဝိညာဉ်ရေးတွင်မိမိတို့လိုလျက်နေကြောင်း သတိပြုသူများသည် ဝမ်းမြောက်စရာရှိကြ၏” ဟု တောင်ပေါ်ဒေသနာတော်တွင် ယေရှုမိန့်တော်မူခဲ့သည်။ (မဿဲ ၅:၃၊ ကဘ) ကျောင်းသားကလေးများစွာတို့သည် ဘုရားသခင်၏အသိပညာနှင့် ကိုယ်တော်၏ထူးမြတ်လှသည့်ရည်ရွယ်တော်မူချက်များကို ဆာငတ်နေကြသည်။ ဘဝနှင့်ပတ်သက်သောမေးခွန်းများ၏အဖြေကိုသိလိုကြပြီး ဘုရားသခင်၏နှစ်သက်မှုရရှိ၍ ပျော်ရွှင်နိုင်သည့်နည်းလမ်းကို သူတို့သိလိုကြသည်။ ဗြိတိသျှဗာဂျင်ကျွန်းစုမှ ကျောင်းတစ်ကျောင်းက ယင်းအချက်ကိုသက်သေခံသည်။ ထိုတွင်ရှိယေဟောဝါသက်သေတစ်ဦး ဤသို့ပြန်ပြောပြသည်။
◻ “ဒေသခံကျောင်းမှာ မိဘဆရာအသင်းအစည်းအဝေးတစ်ခုကိုကျွန်မတက်ခဲ့တယ်။ အဲဒီမှာ မူးယစ်ဆေးဝါး၊ အရက်သေစာသောက်စားခြင်း၊ ချိန်းတွေ့ခြင်း၊ ရုပ်မြင်သံကြားကြည့်ခြင်း၊ ပညာရည်အဆင့်နဲ့ တခြားအကြောင်းတွေကို ကျွန်မကြားခဲ့ရတယ်။ ဒါနဲ့ Questions Young People Ask—Answers That Work စာအုပ်ကိုယူသွားပြီး ကျောင်းအုပ်ဆရာမကြီးကို လက်ဆောင်ပေးဖို့ ကျွန်မဆုံးဖြတ်လိုက်တယ်။ စာအုပ်ကိုသူမစစ်ဆေးကြည့်ပြီးတဲ့နောက် ဒါသူတို့လိုအပ်နေတဲ့အရာဖြစ်ပြီး ကျောင်းသား ၁၂၀ အတွက် တစ်အုပ်စီရနိုင်မလားလို့မေးပါတယ်။ ဒီအကြောင်း အသင်းတော်အကြီးအကဲတွေနဲ့ဆွေးနွေးတဲ့အခါ ကျောင်းကို စာအုပ်တွေလှူဒါန်းဖို့ သူတို့ဆုံးဖြတ်လိုက်တယ်။ အဲဒီအကြောင်းကျွန်မတို့ပြောပြတဲ့အခါ ကျောင်းသားအဖွဲ့အစည်းကိုလက်ဆောင်ပေးဖို့ ဆရာမတွေကပြောကြတယ်။ သက်သေခံနှစ်ယောက်သွားတော့ အခန်းက စောင့်နေတဲ့ကျောင်းသားတွေနဲ့ ပြည့်နေတယ်။ ညီအစ်ကိုတွေက နာရီဝက်လောက်စကားပြောပြီး ဒီစာအုပ်က လူကြီးလူငယ်မရွေးဘယ်လိုအကူအညီဖြစ်စေတယ်ဆိုတာကို ကင်းမျှော်စင်အသင်းရဲ့ မဂ္ဂဇင်းတွေထဲမှာဖတ်ရတဲ့အကြောင်း တွေ့ကြုံမှုပြောပြကြတယ်။ ဒါနဲ့ စိတ်ထက်သန်တဲ့ကျောင်းသားတွေကို စာအုပ်တွေ ဝေပေးလိုက်တယ်။”
ထိုစာအုပ်ကို စတုတ္ထတန်းနှင့်ပဉ္စမတန်းပုံမှန်သင်ရိုးအဖြစ် အသုံးပြုသွားမည်ကိုသိရခြင်းက ဝမ်းသာစရာဖြစ်သည်။ ဤကျောင်းသားများအတွက် ဘဝနှင့် အနာဂတ်နှင့်ပတ်သက်သောမေးခွန်းမြောက်မြားစွာကို ဤစာအုပ်က အမှန်ဖြေဆိုပေးပါလိမ့်မည်။
ပါပူအာနယူးဂီနီ၌— ဝိညာဉ်ရေးဆာလောင်မှုကိုဖြည့်စွက်ပေးခြင်း
အောက်ပါတွေ့ကြုံမှုကို နယ်လှည့်ကြီးကြပ်မှူးတစ်ဦးထံမှ လက်ခံရရှိခြင်းဖြစ်သည်။ ယင်းက ထိုနိုင်ငံရှိ လူများသည် ဝိညာဉ်ရေးဆာလောင်မှုကိုမည်မျှခံစားနေရကြောင်းနှင့် ကျွန်ုပ်တို့၏ကျမ်းစာအခြေခံသောစာပေများက သူတို့၏ဆာလောင်မှုကို မည်သို့ဖြည့်စွက်ပေးကြောင်းတို့ကို ရှင်းပြသည်။
◻ “ကန်ဘယ်ရာတိုရိုကျေးရွာကို ကျွန်တော်မလည်ပတ်နိုင်ခဲ့တဲ့အတွက် ဗန်နီမိုအသင်းတော်ငယ်လေးနဲ့ပေါင်းပြီးအမှုဆောင်ခဲ့တယ်။ အဲဒီမှာ စိတ်ဝင်စားသူတွေအများကြီးပဲ။ ဘေဝါးနီးမှာရှိတဲ့လူအတော်များများဟာ ကျွန်တော်တို့ရဲ့စာပေတွေကို လက်ခံကြတယ်။ လူတစ်ယောက်က အဲဒီရွာကို လာလည်ပတ်ဖို့ ကျွန်တော့်ကိုခေါ်ဖိတ်တယ်။ နေဖို့ထိုင်ဖို့လည်း သူလုပ်ပေးမယ်။ လူများစွာဟာ ကျွန်တော်တို့စာအုပ်တွေကို အတော်လေးသိနေကြပြီ။ ဗန်နီမိုမြို့ကိုပြန်သွားတိုင်းပဲ ယူသွားတဲ့စာအုပ်သုံးသေတ္တာလုံး တစ်အုပ်မှပြန်မပါတော့ဘူး။ ကျွန်ုပ်၏ ကျမ်းစာပုံပြင်များ စာအုပ်ကို ရွှေလောက်တန်ဖိုးရှိတယ်လို့သတ်မှတ်ကြတယ်။ အဲဒီစာအုပ်ကို လူတွေလိုက်ရှာကြတယ်။ ကျွန်တော်ယူသွားတဲ့စာအုပ်တွေက ခဏလေးနဲ့ဝေလို့ကုန်သွားတယ်။ လူတွေကို ကျွန်တော်တို့စာအုပ်တွေကိုပြတိုင်း ‘စာအုပ်အဝါမပါဘူးလား’ လို့မေးကြတယ်။ လူတစ်ယောက်ဆိုရင် ခြောက်အုပ်မှာထားတယ်။ သူ့နာမည်နဲ့လိပ်စာကိုထည့်ပေးလိုက်ပြီး ရရင် ရေဒီယိုကကြေညာပေးဖို့ သူပြောတယ်။ အဲဒီအခါ သူရွာကနေတက်ပြီးလာယူမယ်လေ။” နယ်လှည့်ကြီးကြပ်မှူးဆက်ပြောသေးသည်။ “ဗန်နီမိုမှာရှိတဲ့လူအတော်များများဟာ Mankind’s Search for God စာအုပ်နဲ့ Questions Young People Ask—Answers That Work စာအုပ်တွေကိုလက်ခံတာတွေ့ရတယ်။”
ကျမ်းစာတွင်တွေ့နိုင်သော ဝိညာဏအစာနှင့် ‘သစ္စာနှင့်သတိပညာရှိသောကျွန်’ မှတစ်ဆင့် ယေဟောဝါပေးသောစာပေများကို စိတ်ထားရိုးသားသူများ မည်မျှဆာလောင်နေကြကြောင်း ယင်းအဖြစ်အပျက်ကဖော်ပြသည်။ (မဿဲ ၂၄:၄၅-၄၇) ထိုသမ္မာတရားဆာလောင်နေသူများကို ကူညီနိုင်ခြင်းအတွက် ယေဟောဝါသက်သေများမည်မျှပျော်ရွှင်လိုက်မည်ပါတကား။
[စာမျက်နှာ ၁၉ ပါ ရုပ်ပုံ]
ပါပူအာနယူးဂီနီ၌ သက်သေခံခြင်း