ဘာသာရေးရုပ်ပုံများကို မှန်ကန်စွာသုံးခြင်းနှင့်အလွဲသုံးခြင်း

မြင်ကွင်းကား ရုရှားနိုင်ငံ၊ စိန့်ပီတာစဘာ့ဂ်မြို့တွင်ဖြစ်သည်။ အချိန်ကား ၁၉၁၄ ခုနှစ်၊ ဩဂုတ်လ ၂ ရက်နေ့ဖြစ်သည်။ သန့်ရှင်းသူများ၏ရုပ်ပုံများကို စိတ်လှုပ်ရှားစွာဝှေ့ရမ်းနေသောလူများသည် ဇာဘုရင်၏နန်းတော်တွင်စုရုံးရောက်ရှိနေကြသည်။ ခန်းမကျယ်ကြီးတစ်ခု၏အလယ်တွင် ပလ္လင်တစ်ခုကိုတည်ဆောက်ထားသည်။ ပလ္လင်ပေါ်တွင် ကလေးချီထားသောအမျိုးသမီးတစ်ဦးရပ်နေသည့်ရုပ်ပုံကို ထောင်ထားသည်။ ထိုရုပ်ပုံကို “ဗလာဒီမာဘုရားမယ်တော်” ဟုခေါ်သည်။ ရုရှားတွင် ၎င်းကို အသန့်ရှင်းအမြင့်မြတ်ဆုံးသောရတနာအဖြစ် လူထုကယူမှတ်သည်။

ထိုရုပ်ပုံသည် အံ့ဖွယ်အမှုများကိုပြုလုပ်နိုင်သည်ဟု ယုံကြည်ကြသည်။ ၁၈၁၂ ခုနှစ်၊ ရုရှားတပ်မတော်က နပိုလီယံကိုချီတက်တိုက်ခိုက်သည့်အချိန်တွင် ဗိုလ်ချုပ်ကြီးကူတူဇော့ဗ်သည် ယင်းရှေ့တွင် ဆုတောင်းခဲ့သည်။ မိမိနိုင်ငံကို စစ်ထဲဆွဲထည့်ပြီးနောက် ဒုတိယဇာဘုရင်နိကောလပ်စ်သည် ယင်းရုပ်ပုံရှေ့တွင်ရပ်ခဲ့သည်။ ညာဖက်လက်ကိုမြှောက်ပြီး ကျိန်ဆိုမှုတစ်ခုကိုပြုသည်မှာ “ဟုတ်တိုင်းမှန်ရာကျွန်ုပ်ကျိန်ဆိုသည်ကား ရုရှားမြေပေါ်တွင် ရန်သူတစ်ယောက်ကျန်သေးသရွေ့ ငြိမ်းချမ်းရေးကို ကျွန်ုပ်လုပ်ဆောင်မည်မဟုတ်ပါ” ဟူ၍ဖြစ်သည်။

နှစ်ပတ်ကြာသောအခါ ဇာဘုရင်သည် မိမိ၏စစ်တပ်များအပေါ် ဘုရားသခင်၏ကောင်းချီးများသွန်းလောင်းပေးရန် မော်စကိုသို့ဘုရားဖူးခရီးစဉ်ကို စီစဉ်လိုက်သည်။ အစမ်းပ်ရှင်းဘုရားကျောင်းထဲရှိ ယေရှု၊ မာရိ၊ ကောင်းကင်တမန်များနှင့် “စိန့်များ” ၏ရုပ်ပုံကို ကျောက်မျက်ရတနာများဖြင့်ဖော်ထားသော ကန့်လန့်ကာရှေ့တွင် သူဒူးထောက်၍ဆုတောင်းခဲ့သည်။

ယနေ့ထိ နိုင်ငံအများတွင် လူသန်းပေါင်းများစွာတို့သည် ရုပ်ပုံများကို ဆက်၍အလေးအမြတ်ထားလာခဲ့ကြသည်။ ယင်းက အရေးကြီးသောမေးစရာပေါ်ပေါက်စေသည်။ ယင်းကိုဘုရားသခင်မည်သို့ရှုမြင်သနည်း။ အိမ်နံရံများတွင်ချိတ်ဆွဲသော ထုံးတမ်းဓလေ့များကားမည်သို့နည်း။

သမ္မာကျမ်းစာမည်သို့ပြောသနည်း

ယေရှုမြေကြီးပေါ်ရှိခဲ့စဉ် မောရှေအားဖြင့်ပေးသည့်ဘုရားပညတ်ကို သူနာခံခဲ့သည်။ ပညတ်တော်ဆယ်ပါး၏ဒုတိယပညတ်လည်းပါဝင်ခဲ့သည်။ (ထွက်မြောက်ရာ ၂၀:၄၊ ၅) ထိုပညတ်နှင့်အညီ ယေရှုသည် ဘုရားသခင်အားဝတ်ပြုခဲ့သည်။ ကိုယ်တော်၏ဝတ်ပြုမှုသည် ဟေရှာယ ၄၂:၈ ပါ ခမည်းတော်ကြေညာထားသည့်အချက်နှင့်အညီဖြစ်သည်။

ထို့အပြင် ဘုရားသခင်အား ရုပ်ပိုင်းဆိုင်ရာအကူအညီမပါဘဲကိုးကွယ်သင့်ကြောင်းကို ယေရှုဤသို့ရှင်းပြတော်မူခဲ့သည်။ ‘စစ်မှန်စွာဝတ်ပြုသူတို့သည် ခမည်းတော်ကို စိတ်ဖြင့်လည်းကောင်း၊ သမ္မာတရားဖြင့်လည်းကောင်း ဝတ်ပြုကြမည့်အချိန်လာမည်။ ယခုပင်ဖြစ်၏။ အကြောင်းမှာခမည်းတော်သည် မိမိအားဝတ်ပြုစေရန် ထိုသို့သောပုဂ္ဂိုလ်များကိုရှာလျက်ရှိတော်မူ၏။ ဘုရားသခင်သည် နာမ်ဝိညာဉ်တစ်ပါးဖြစ်တော်မူသဖြင့် ကိုယ်တော်ကိုဝတ်ပြုသောသူတို့သည် စိတ်ဖြင့်လည်းကောင်း၊ သမ္မာတရားဖြင့်လည်းကောင်း ဝတ်ပြုရမည်။’—ယောဟန် ၄:၂၃၊ ၂၄။

ယေရှုနည်းတူ ကိုယ်တော့်တပည့်တော်စစ်များလည်း အခြားသူများအား မှန်သောဝတ်ပြုရေးနည်းလမ်းကို သွန်သင်ပေးခဲ့သည်။ ဥပမာ၊ တမန်တော်ပေါလုသည် မိမိတို့၏မမြင်နိုင်သောဘုရားများကိုကိုးကွယ်ရန် ပုံတူများသုံးသော ဂရိအတွေးအခေါ်ပညာရှင်အုပ်စုသို့ စကားပြောခဲ့သည်။ လူသားများ၏ဖန်ဆင်းရှင်အကြောင်းသူပြောပြပြီး ‘ထို့ကြောင့် ဘုရားသခင်၏အနွယ်တော်ဖြစ်ကြသည့်အတိုင်း ဘုရားသခင်သည် လူတို့ကြံဖန်ထုလုပ်သော ရွှေ၊ ငွေ၊ ကျောက်. . .နှင့်တူသည်ဟု ငါတို့မထင်မမှတ်သင့်’ ဟုပြောခဲ့သည်။ နောက်ပိုင်းတွင် ထိုတမန်တော်ကပင် ခရစ်ယာန်များသည် ‘အမြင်အားဖြင့်မဟုတ်ဘဲ ယုံကြည်ခြင်းအားဖြင့်လျှောက်လှမ်းနေကြ’ ကြောင်းဆက်၍ရှင်းပြသည်။—တမန်တော် ၁၇:၁၆-၃၁။ ၂ ကောရိန္သု ၅:၇။ ၁ ကောရိန္သု ၁၀:၁၄။

မှားယွင်းသည့်ကိုးကွယ်မှုသို့ပို့ဆောင်သည့်လုပ်ရပ်ကို အလျင်အမြန်ပြုပြင်ပေးခဲ့ကြောင်း တမန်တော်ပေတရု၏ဘဝတွေ့ကြုံမှုကတင်ပြသည်။ ရောမစစ်တပ်အရာရှိကော်နေလိက သူ့ခြေရင်းတွင်ပျပ်ဝပ်သောအခါ ပေတရုကန့်ကွက်ခဲ့သည်။ ကော်နေလိကိုထူမပြီး “ထလော့။ ငါကိုယ်တိုင်လူဖြစ်သည်” ဟုပြောခဲ့သည်။—တမန်တော် ၁၀:၂၆။

တမန်တော်ယောဟန်မူ ဘုရားသခင်ဖော်ပြသည့်ရူပါရုံကို အလွန်မိန်းမောအံ့သြလွန်းသဖြင့် ကောင်းကင်တမန်တစ်ပါး၏ခြေရင်းတွင် ပျပ်ဝပ်ခဲ့သည်။ ကောင်းကင်တမန်က “မပြုပါနှင့်။ ငါကား သင်၏လုပ်ဖော်ဆောင်ဖက်ဖြစ်၏။ သင်၏အစ်ကိုပရောဖက်တို့နှင့် ဤစာစောင်၏စကားကိုစောင့်ရှောက်သောသူတို့၏ လုပ်ဖော်ဆောင်ဖက်လည်းဖြစ်၏။ ဘုရားသခင်ကိုကိုးကွယ်လော့” ဟုဆုံးမခဲ့သည်။ (ဗျာဒိတ် ၂၂:၈၊ ၉) ထိုသြဝါဒကို တမန်တော်လေးမြတ်ခဲ့သည်။ မေတ္တာရှိစွာဖြင့် ထိုအဖြစ်အပျက်ကို ကျွန်ုပ်တို့အကျိုးအတွက် သူမှတ်တမ်းတင်ခဲ့သည်။

သို့သော် အထက်ပါတွေ့ကြုံမှုသည် ရုပ်ပုံအသုံးပြုခြင်းနှင့်မည်သို့သက်ဆိုင်သနည်း။ ခရစ်တော်၏တမန်တော်တစ်ပါးအား ဦးညွှတ်ခြင်းသည် ကော်နေလိအတွက်မှားသည်ဆိုလျှင် သက်မဲ့ “သန့်ရှင်းသူများ” ၏ရုပ်ပုံကိုကိုးကွယ်ခြင်းကားမည်သို့နည်း။ သက်ရှိကောင်းကင်တမန်တစ်ပါးရှေ့တွင် ခရစ်တော်၏တမန်တော်တစ်ပါးက မိမိကိုယ်ကိုပျပ်ဝပ်လိုက်ခြင်းသည် မှားသည်ဆိုလျှင် သက်မဲ့ကောင်းကင်တမန်ရုပ်ပုံများကိုကိုးကွယ်ခြင်းကော မည်သို့နည်း။ ယင်းတို့သည် ယောဟန်သတိပေးချက်များနှင့်ဆန့်ကျင်သည်မှာ သေချာပါသည်။—၁ ယောဟန် ၅:၂၁။

အလှဆင်ထားသောသင်ကြားမှုအထောက်အကူများအဖြစ်

ယင်းက ကျမ်းစာနှင့်ဆိုင်သောရုပ်ပုံအချို့ လက်ဝယ်ရှိခြင်းသက်သက်သည် မှားသည်ဟုမဆိုလိုပါ။ ဤမဂ္ဂဇင်းသည် ကျမ်းစာအဖြစ်အပျက်များဆိုင်ရာရုပ်ပုံများကို သင်ကြားမှုအထောက်အကူအဖြစ် ကောင်းစွာအသုံးပြုထားသည်။ ကျမ်းစာဆိုင်ရာရုပ်ပုံများကို အိမ်များ၊ အဆောက်အအုံများ၏နံရံများတွင် အလှတန်ဆာဆင်ရန်လည်း အသုံးပြုနိုင်သည်။ သို့သော် ခရစ်ယာန်စစ်တစ်ဦးသည် အခြားသူများကိုးကွယ်သည်ဟုထင်ရှားသည့်ရုပ်ပုံများ သို့မဟုတ် သမ္မာကျမ်းစာကိုတလွဲယူမှတ်စေသည့်ရုပ်ပုံများကို ချိတ်ဆွဲထားလိုမည်မဟုတ်ပါ။—ရောမ ၁၄:၁၃။

ခရစ်ယာန်ဘောင်ရုပ်ပုံအများစုသည် ယေရှု၊ မာရိ၊ ကောင်းကင်တမန်များနှင့် သန့်ရှင်းသူများ၏ဦးခေါင်းပတ်လည်တွင် အလင်းစက်ဝိုင်းတစ်ခုကို ဖော်ပြထားသည်။ ယင်းကို ရောင်ခြည်တော်စက်ဝန်းဟုခေါ်သည်။ ရောင်ခြည်တော်စက်ဝန်းသည် မည်သည့်အခြေအမြစ်မှဆင်းသက်လာသနည်း။ “ယင်း၏ပင်ရင်းအမြစ်သည် ခရစ်ယာန်မဟုတ်ပါ။ အကြောင်းမှာ နတ်ဘုရားအမျိုးမျိုးတို့၏ ကြီးမားသောဂုဏ်ကျက်သရေနှင့်အစွမ်းတန်ခိုးကို ကိုယ်စားပြုရန် ထိုဘာသာဝင်ပန်းချီ၊ ပန်းပုပညာရှင်များအသုံးပြုသည့်အရာဖြစ်ခဲ့သည်” ဟု The Catholic Encyclopedia (၁၉၈၇ ထုတ်) ကဝန်ခံထားသည်။ ထို့အပြင် ဘန်ဘာဂက်စ်ကွိုင်ရေးသည့် The Christians အမည်ရှိစာအုပ်တွင် ရောမနိုင်ငံရှိ ကက်ပီတိုလင်းပြတိုက်မှရယူထားသော ရောင်ခြည်တော်စက်ဝန်းပါသည့် နေဘုရား၏ဓာတ်ပုံပါရှိသည်။ ဤဘုရားကို ရောမလူမျိုးများကိုးကွယ်ခဲ့သည်။ နောက်ပိုင်းတွင် ဂက်စ်ကွိုင်ဤသို့ရှင်းပြခဲ့သည်။ “နေ၏ရောင်ခြည်တော်စက်ဝန်းကို ခရစ်ယာန်များငှားရမ်းအသုံးပြုခဲ့သည်။” မှန်ပါသည်။ ရောင်ခြည်တော်စက်ဝန်းသည် နေဝတ်ပြုရေးနှင့်ဆက်စပ်နေသည်။

ကျမ်းစာအဖြစ်အပျက်များနှင့် ဘာသာခြားဝတ်ပြုရေးရောနှောနေသောရုပ်ပုံများကို ခရစ်ယာန်တစ်ဦး၏အိမ်တွင် ချိတ်ဆွဲထားသင့်ပါသလော။ မသင့်ပါ။ ကျမ်းစာဤသို့သြဝါဒပေးထားသည်။ “ထာဝရဘုရားမိန့်တော်မူပြန်သည်ကား သင်တို့သည် သူတို့အထဲမှထွက်၍ အသီးအခြားနေကြလော့။ မစင်ကြယ်သောအရာကို လက်နှင့်မျှမတို့ကြနှင့်။ သို့ပြုလျှင် သင်တို့ကို ငါသည်လက်ခံမည်။”—၂ ကောရိန္သု ၆:၁၆၊ ၁၇။

အချိန်များကုန်လွန်လာသည်နှင့်အမျှ အမည်ခံခရစ်ယာန်များသည် ထိုသြဝါဒကိုဥပေက္ခာပြုစပြုလာကြသည်။ ယေရှုနှင့်တမန်တော်များကြိုပြောထားသည့်အတိုင်း အယူဖောက်ပြန်မှုများတိုးပွားလာခဲ့သည်။ (မဿဲ ၂၄:၂၄။ တမန်တော် ၂၀:၂၉၊ ၃၀။ ၂ ပေတရု ၂:၁) စီ၊ အီး လေးရာစုအစောပိုင်းက ရောမဧကရာဇ်ကွန်စတင်တိုင်းသည် အယူဖောက်ပြန်သောခရစ်ယာန်ဝါဒကို နိုင်ငံတော်ဘာသာဖြစ်စေခဲ့သည်။ ထိုအခါ ဘာသာခြားများစွာတို့သည် မိမိတို့ကိုယ်ကို “ခရစ်ယာန်များ” ဟုစတင်ကြေညာလာခဲ့သည်။ သူတို့လုပ်လေ့လုပ်ထရှိသည့်အရာတစ်ခုမှာ မင်းဧကရာဇ်၏ရုပ်ပုံကိုဝတ်ပြုခြင်းဖြစ်သည်။ သူတို့၏ဘိုးဘေးများနှင့် အခြားနာမည်ကြီးသူများကိုလည်း ချိတ်ဆွဲထားလေ့ရှိသည်။ ဂျွန်တေလာက သူ၏ Icon Painting စာအုပ်တွင် “မင်းဧကရာဇ်ကို လူများအထူးကြည်ညိုလေးစားသည်နှင့်အညီ ပိတ်နှင့်သစ်သားများပေါ်တွင် ရေးဆွဲထားသောသူ၏ပုံကို လူများကိုးကွယ်ကြသည်။ ယင်းအဆင့်မှ သန့်ရှင်းသူများ၏ရုပ်ပုံကိုဝတ်ပြုရန်မဝေးတော့ပါ” ဟုရှင်းပြထားသည်။ ထို့ကြောင့် ဘာသာခြားဝတ်ပြုရေးများသည် ယေရှု၊ မာရိ၊ ကောင်းကင်တမန်များနှင့် “သန့်ရှင်းသူများ” ၏ရုပ်ပုံများကိုကြည်ညိုလေးမြတ်ခြင်းဖြင့် အစားထိုးခံခဲ့ရသည်။

ယင်းကို ချာ့ချ်ခေါင်းဆောင်များ မည်သို့အကြောင်းပြသနည်း

The Encyclopedia of Religion စွယ်စုံကျမ်းအရ ချာ့ချ်ခေါင်းဆောင်များသည် လောကအတွေးအခေါ်ပညာရှင်များ၏အဆိုကိုပင် အသုံးပြုကြသည်။ ပလူးတာ့ခ်၊ ဒိုင်အိုခရစ္စပ်စ်တမ်၊ တုရုမြို့မှမဂ္ဂဇမ်း၊ စဲလ်စပ်စ်၊ ပေါ်ရ်ဖရီ၊ ဂျူလီယန်တို့ကဲ့သို့သောသူများက ရုပ်ပုံသည် သက်မဲ့ဖြစ်သည်ကိုဝန်ခံကြသည်။ သို့သော် ထိုသူတို့က မမြင်နိုင်သောမိမိတို့ဘုရားများကိုဝတ်ပြုရာတွင် အကူအညီဖြစ်စေရန် အသုံးပြုခြင်းဖြစ်ကြောင်း ဆင်ခြေပေးခြင်းအားဖြင့် ထိုအချက်ကိုအတည်ပြုကြသည်။ ရုရှားရုပ်ပုံအတတ်ပညာရှင် လီယိုညစ်အုဇ်ပဲန်းစကီး က The Meaning of Icons အမည်ရှိသောစာအုပ်တွင် “ချာ့ချ်ဖခင်များသည် ဂရိအတွေးအခေါ်ပညာရှင်များ၏ကိရိယာကို အသုံးပြုခဲ့ကြသည်။ ယင်း၏နားလည်မှုနှင့်ဘာသာစကားကို ခရစ်ယာန်ဓမ္မပညာအဖြစ်ပြုပြင်ယူခဲ့သည်” ဟုဝန်ခံထားသည်။—ကောလောသဲ ၂:၈ နှိုင်းယှဉ်။

ရုပ်ပုံများကိုအလေးအမြတ်ထားခြင်းနှင့်ပတ်သက်၍ ဓမ္မပညာဆိုင်ရာအကြောင်းပြချက်ကို လူများစွာနားလည်ရခက်ကြသည်။ “ရုပ်ပုံများကို ယင်းတို့ကိုယ်စားပြုသည့်အရာအားရည်စူး၍ဝတ်ပြုခြင်းနှင့် ရုပ်ပုံများကိုယ်နှိုက်အတွက် ယင်းတို့ကိုဝတ်ပြုခြင်းတို့စပ်ကြားခြားနားမှုသည် မည်မျှလေးနက်သိမ်မွေ့သနည်းဟူမူ . . . အဆင့်မြင့်ပညာရှိသူများသာလျှင်ခွဲခြားသိမြင်နိုင်သည်” ဟု Icon Painting စာအုပ်တွင် ဂျွန်တေလာကဖော်ပြထားသည်။

တစ်ဖက်ကကြည့်လျှင်မူ ဝတ်ပြုရေးနှင့်ဆိုင်သောရုပ်ပုံများနှင့်ပတ်သက်၍ ကျမ်းစာအဆိုသည် နားလည်ရန်လွယ်ကူသည်။ တောင်အာဖရိကနိုင်ငံ၊ ဂျိုဟန်နက်စဘာ့ဂ်မြို့တွင်နေသော အယ်မလီယာအကြောင်းကိုစဉ်းစားကြည့်ပါ။ သူမသည် ဘာသာရေးကိုင်းရှိုင်းသည့် ခရစ်ယာန်ဘောင်ဘာသာဝင်တစ်ဦးဖြစ်ပြီး ရုပ်ပုံများရှေ့ဒူးထောက်ဆုတောင်းလေ့ရှိသည်။ တစ်ချိန်တွင် ယေဟောဝါသက်သေတစ်ဦးလာ၍ အိမ်တံခါးခေါက်ခဲ့သည်။ ပေါ်တူဂီကျမ်းစာအုပ်တွင် ဘုရားသခင်သည် နာမတော်ရှိပြီး ယေဟောဝါဖြစ်ကြောင်းကို စိတ်လှုပ်ရှားစွာသူမသိရှိခဲ့ရသည်။ (ဆာလံ ၈၃:၁၈၊ Almeida) သူမကျမ်းစာသင်နေစဉ်အချိန်အတွင်း “ယေဟောဝါသဘောမကျတာတွေကို ရှောင်နိုင်ဖို့ ဘာလုပ်ရမလဲ” ဟုမေးခဲ့သည်။ သက်သေခံက ဆာလံ ၁၁၅:၄-၈ ကိုဖတ်ပြပြီး သူမအိမ်ကိုလှည့်ပတ်ကြည့်ခိုင်းလိုက်သည်။ ထိုည ခင်ပွန်းသည်ပြန်လာသောအချိန်တွင် သူမက ရုပ်ပုံများကိုဖယ်ပစ်လိုကြောင်းပြောရာ ခင်ပွန်းသည်သဘောတူခဲ့သည်။ နောက်တစ်နေ့တွင် သူမ၏သားများဖြစ်သော တိုနီနှင့်မယ်နျူဝယ်လ်တို့ကိုခေါ်ပြီး ကျမ်းစာမူအတိုင်းပြုလုပ်ခဲ့ကြသည်။ ယခုအခါ ၂၅ နှစ်ခန့်ကြာခဲ့ပြီဖြစ်သော်လည်း ယင်းနှင့်ပတ်သက်၍ အယ်မလီယာ တစ်စုံတစ်ရာသံဝေဂရခဲ့ပါသလော။ မရခဲ့ပါ။ သူမ၏မိသားစုနှင့်အတူ သူမ၏အိမ်နီးချင်းများအား ပျော်ရွှင်သောယေဟောဝါဝတ်ပြုသူများဖြစ်လာရန် ကူညီပေးလျက်ရှိသည်။

အလားတူတွေ့ကြုံမှုမျိုးမကြာခဏတွေ့ကြုံရသည်။ ယေဟောဝါသက်သေများ၏ ကမ္ဘာချီတပည့်ဖြစ်စေခြင်းလုပ်ငန်းကြောင့် သန်းနှင့်ချီသောလူများသည် ဘုရားသခင်အား “စိတ်နှင့်လည်းကောင်း၊ သမ္မာတရားနှင့်လည်းကောင်း” [ကဘ] ဝတ်ပြုရန်သင်ယူနေကြသည်။ သင်လည်း ဤအထူးသာလွန်မြင့်မြတ်သည့်ဝတ်ပြုရေးနည်းလမ်းအားဖြင့် ကောင်းချီးများခံစားရနိုင်သည်။ အကြောင်းမှာ ယေရှုပြောခဲ့သည့်စကားကြောင့်ဖြစ်သည်။ “ထိုသို့ကိုးကွယ်သောသူတို့ကို ခမည်းတော်သည်အလိုရှိတော်မူ၏။”—ယောဟန် ၄:၂၃၊ ၂၄။

[စာမျက်နှာ ၂၆ ပါ ရုပ်ပုံ]

ဇာဘုရင်နိကောလပ်စ် ၂ သည် သန့်ရှင်းသူရုပ်ပုံတစ်ခုဖြင့် မိမိတပ်များကို ကောင်းချီးပေးနေစဉ်

[Credit Line]

Photo by C.N.