ယုံကြည်စိတ်ချနိုင်လောက်သော တင်ကူးဟောကြားချက်များကို ရှာပုံတော်ဖွင့်ခြင်း

“ဖြစ်ရပ်များကို သုံးရက်ကြိုမြင်နိုင်သူသည် နှစ်ပေါင်းထောင်ချီ ကြွယ်ဝချမ်းသာလိမ့်မည်” ဟုတရုတ်စကားပုံတစ်ခုရှိသည်။

လူတို့သည် နောက်နေ့အဖြစ်အပျက်ကို ကြိုသိချင်သူချည်းသာဖြစ်၍ ယင်းနှင့်စပ်လျဉ်းသည့် စိတ်ချနိုင်လောက်သောသတင်းကို ငွေပုံအပ်ပေးလိုသူ များစွာရှိပါသည်။ ဤသူတို့သည် ယုံကြည်စိတ်ချနိုင်လောက်သော တင်ကူးဟောကြားချက်များကို ရှာပုံတော်ဖွင့်ကြ၏။ မိုးလေဝသခန့်မှန်းချက်နှင့် စီးပွားရေးအခြေပြချက်များက ရှေ့ရေးကို စိတ်ဝင်စားကြကြောင်း ထင်ရှားစေသည်။ ထို့ပြင် အနာဂတ်နှင့်စပ်လျဉ်းသည့် ယုံကြည်စိတ်ချနိုင်လောက်သော သတင်းကို ကြိုရရှိထားခြင်းအားဖြင့် မိမိအသက်တာကိုစီစဉ်ပေးနိုင်ပါသည်။

အနာဂတ်ရေးကို ကြိုသိလိုစိတ်ကြောင့် ဗေဒင်ဆရာများ၊ ဂုရုများ၊ နက္ခတ်ဆရာများ၊ ပယောဂဆရာများထံ သွားကြပါသည်။ စာအုပ်ဆိုင်များတွင်လည်း အနာဂတ်ကို ကြိုတင်သိရှိစေသည်ဟုဆိုသော ရှေးဟောင်းနှင့်ခေတ်စာပေစာတမ်း ဒုနှင့်ဒေးရှိပါသည်။ သို့သော် ဤတက်ကူးဟောကြားချက်များအပေါ် သံသယဝင်စရာရှိသည်။ ရောမအတွေးအခေါ်ပညာရှင် စစ္စရို ဤသို့ဆိုကြောင်းပြောသည်။ ‘ဗေဒင်ဆရာများသည် သူတို့အချင်းချင်းတွေ့ရှိတိုင်း မရယ်မောကြသည်ကို ကျွန်ုပ်အံ့အားသင့်ပါသည်။’

တင်ကူးဟောကြားချက်မျိုးစုံရှိသည်ကား အမှန်ပင်။ ၁၉၇၂ ခုနှစ်တွင် ရောမအဖွဲ့အမည်ရှိ အပြည်ပြည်မှပညာရည်ချွန်များနှင့် စီးပွားရေးအဖွဲ့ဝင်တို့က မပွားနိုင်သည့် ကမ္ဘာ့သယံဇာတပစ္စည်းများ မကြာမီလျော့ပါးလိမ့်မည်ဟု တင်ကူးဟောကြားချက်တစ်ခုကို ကြေညာခဲ့သည်။ ၁၉၈၁ ခုနှစ်တိုင်လျှင် ရွှေရှိတော့မည်မဟုတ်၊ ၁၉၈၅ တွင်ပြဒါး၊ ၁၉၉၀ တွင်သွပ်၊ ၁၉၉၂ တွင်ရေနံ အစရှိသည်တို့ ကုန်ခန်းလိမ့်မည်ဟုဆိုသည်။ ထိုတင်ကူးဟောကြားချက်များအတိုင်း မဖြစ်ပျက်ခဲ့ကြောင်း ယခုကျွန်ုပ်တို့တွေ့ရှိကြပြီ။

တင်ကူးဟောကြားချက်များစွာတို့သည် ဘာသာရေးရှုထောင့်အရဖြစ်ခဲ့သည်။ ဥပမာ၊ စက္ခစန်ဘိရှော့ ဝပ်လ်စတန်က ၁၁ ရာစုအစောပိုင်းက အင်္ဂလန်နိုင်ငံကို ဒိန်းမတ်နိုင်ငံက ဝင်တိုက်ခိုက်ခဲ့ခြင်းသည် ကမ္ဘာ့ဆုံးခန်းနီးခြင်း၏နိမိတ်ဖြစ်သည်ဟု အခိုင်အမာပြောခဲ့ပါသည်။ ၁၅၂၅ ခုနှစ်တွင် သောမတ်စ် မြွန်ဇာ၏ထင်ကြေးအရ ကြီးစွာသောရိတ်သိမ်းခြင်းကိုဆိုလိုသည့် ကောင်းကင်တမန်များ တံစဉ်များကို သွေးနေသော ရူပါရုံကိုမြင်ခဲ့သောကြောင့် သူသည် ဂျာမန်တောင်သူလယ်သမားများ၏ တော်လှန်ရေးကို ဦးစီးခဲ့သည်။ ဤတင်ကူးဟောကြားချက်များသည် မမှန်ကန်ကြောင်း ထင်ရှားခဲ့ပြီ။

သင်သိရှိမည့်အတိုင်းပင် သမ္မာကျမ်းစာတွင် တင်ကူးဟောကြားချက်များစွာပါရှိသည်။ ထို့ပြင် ကျမ်းရေးသူများက ဘုရားသခင်မှုတ်သွင်းခြင်းအားဖြင့်ရေးသည်ဟု အဆိုပြုကြပါသည်။ ခရစ်ယာန်တမန်တော်ပေတရု ဤသို့ဆိုသည်။ “သမ္မာကျမ်းစာ၌ ပါသောပရောဖက်ပြုချက်တစ်ခုမျှသည် လူ့အလိုအလျောက်အနက်မဖော်၊ အဘယ်ကြောင့်ဆိုလျှင်၊ ပရောဖက်စကားသည် အဘယ်အချိန်ကာလ၌မျှ လူ့အလိုအားဖြင့်မရောက်လာခဲ့သောကြောင့်တည်း။ သန့်ရှင်းသောဝိညာဉ်တော်၏တိုက်တွန်းတော်မူခြင်းကို၊ခံရ၍ လူတို့သည် ဘုရားရှင်အထံတော်မှတစ်ဆင့် ဟောပြောကြ၏။”—၂ ပေတရု ၁:၂၀၊ ၂၁၊ ကဘ။

အခြားအကြောင်းများစွာအနက် ကောင်းကင်နိုင်ငံတော်ဘုန်းဖြင့် ယေရှုခရစ်တော်ရောက်ရှိနေကြောင်း သိရှိမည့်လူမျိုးဆက်ကိုသတ်မှတ်မည့် အဖြစ်အပျက်အသီးသီးကို သမ္မာကျမ်းစာဖော်ပြပါသည်။ မဖြစ်စဖူးသောစစ်မှု၊ ငတ်ပြတ်ခြင်း၊မြေငလျင်နှင့် စာရိတ္တစံချိန်ပျက်ပြားယိုယွင်းခြင်းတို့သည် သမ္မာကျမ်းစာဖော်ပြသည့် ‘နောက်ဆုံးကာလ’ ၏အမှတ်အသားဖြစ်ပါလိမ့်မည်။ (၂ တိမောသေ ၃:၁-၅။ မဿဲ ၂၄:၃-၁၄၊ ၃၄) သမ္မာကျမ်းစာအရဆိုလျှင် လက်ရှိအစီအစဉ်စနစ်ကို ဖယ်ရှင်းလိုက်ခြင်းအားဖြင့် အတောမသတ်ကောင်းချီးများခံစားရမည့် ကမ္ဘာအသစ်တွင် ပျော်ရွှင်ချမ်းမြေ့ခြင်းလမ်းစဖြစ်ပေါ်လာမည်ဟု သိရှိရ၏။—၂ ပေတရု ၃:၁၃။ ဗျာဒိတ် ၂၁:၁-၄။

ဤကဲ့သို့သောသမ္မာကျမ်းစာတင်ကူးဟောကြားချက်များကို သင်မည်သို့ယူမှတ်သနည်း။ အခြားအခြားသော ခန့်မှန်းချက်များကဲ့သို့ပင် ယင်းတို့သည် မှန်းဆဆင်ခြင်ချက်များမျှသာလော။ ရှေးလွန်လေပြီးသော အဖြစ်အပျက်များနှင့်စပ်လျဉ်းသည့် ကျမ်းစာတင်ကူးဟောကြားချက်များကို စိတ်ချနိုင်မနိုင် သုံးသပ်ခြင်းအားဖြင့် မပြည့်စုံသေးသော ကျမ်းစာပရောဖက်ပြုချက်များကို စိတ်ချနိုင်မနိုင် စမ်းသပ်ကြည့်နိုင်ပါသည်။ နောက်ဆက်တွဲဆောင်းပါးတွင် ယင်းတို့မှ အချို့ကို သုံးသပ်ကြည့်ပါမည်။

[Picture Credit Line on page 3]

Courtesy National Weather Service