ဂိလဒ်ကျောင်းဆင်းများ “ပေးကမ်းခြင်း၌ ပျော်ရွှင်မှုသာ၍” တွေ့

၁၉၉၄ ခု၊ မတ်လ ၆ ရက်၊ တနင်္ဂနွေနေ့တွင် ယေဟောဝါသက်သေတို့၏ ကမ္ဘာ့ဌာနချုပ်ရှိ ဗေသလမိသားစုနှင့် ဧည့်သည်များသည် ပျော်မြူးဖွယ်အခါသမယဖြစ်သည့် ၉၆ ကြိမ်မြောက် ဂိလဒ်ကင်းမျှော်စင်ကျမ်းစာကျောင်းဆင်းပွဲအတွက် စုရုံးနေကြသည်။ ယေဟောဝါသက်သေတို့၏ အုပ်ချုပ်ရေးအဖွဲ့တွင် အမှုဆောင်လာခဲ့သည်မှာ အနှစ်နှစ်ဆယ်နီးပါးကြာပြီးဖြစ်သူ အစီအစဉ်သဘာပတိ ကားလ်. အက်ဖ်. ကလိန်းက ကျောင်းသား ၄၆ ယောက်တို့အား ဤသို့နိဒါန်းပျိုးခဲ့သည်– “ခံယူခြင်းထက်ပေးကမ်းခြင်း၌ ပျော်ရွှင်မှုသာ၍ရှိ၏လို့ ယေရှုပြောခဲ့တယ်။ ခင်ဗျားတို့သာသနာပြုတာဝန်မှာလည်း အဲဒီလိုပဲဖြစ်လိမ့်မယ်—ခင်ဗျားတို့ပိုပေးလေလေ၊ ပိုပြီးပျော်ရွှင်လေလေပဲ။”—တမန်တော် ၂၀:၃၅။

ဆုံးမသွန်သင်သည့် နှုတ်ဆက်စကားများ

ကျောင်းသားများအား ဟောပြောချက်များဆက်၍ပေးသွားသည်။ ဝန်ဆောင်ဌာနကော်မတီ၏ အဖွဲ့ဝင်တစ်ဦးဖြစ်သူ လီယွန်ဝီဗာက “ခံနိုင်ရည်က ယေဟောဝါအား ဘုန်းထင်ရှားစေ” ဟူသည့်အကြောင်းကို အကျယ်တဝင့်ရှင်းပြသည်။ ကျွန်ုပ်တို့အားလုံးသည် စမ်းသပ်မှုများနှင့် ရင်ဆိုင်ကြရသည်။ (၂ ကောရိန္သု ၆:၃-၅) ညီအစ်ကိုဝီဗာက “ဖိစီးမှုအောက်မှာ ကျွန်တော်တို့ဟာ ကိုယ့်ကိုယ်ကိုအမှီသဟဲပြုဖို့ သိပ်လွယ်တယ်” ဟုရှင်းပြသည်။ သို့သော် ကျောင်းသားများအား သူဤသို့သတိပေးသည်– “လူတွေတွေ့ကြုံရတတ်တဲ့နည်းနဲ့ ခင်ဗျားတို့ရင်ဆိုင်ကိုရင်ဆိုင်ရမဲ့ ဘယ်စမ်းသပ်မှုမဆို ယေဟောဝါစိတ်ဝင်စားတယ်။ ခင်ဗျားတို့မခံနိုင်တဲ့အရာနဲ့စုံစမ်းခံရဖို့ ကိုယ်တော်ဘယ်တော့မှခွင့်ပြုမှာမဟုတ်ဘူး။”—၁ ကောရိန္သု ၁၀:၁၃။

နောက်ဟောပြောချက်တစ်ခု၏ခေါင်းစဉ်မှာ “သင့်တာဝန်ကို အစဉ်အမြဲမြတ်နိုးပါ” ဖြစ်ပြီး ယင်းကို အုပ်ချုပ်ရေးအဖွဲ့မှ လိုင်မယ်န်စွင်ဂလ်က ဟောပြောသည်။ ဣသရေလလူတို့သည် မိမိတို့မည်သည့်နေရာတွင်နေထိုင်မည်၊ မိမိတို့ဘာလုပ်မည်ကို အမြဲမရွေးချယ်ခဲ့ပါ။ တစ်နွယ်စီတို့သည် နယ်မြေအစိတ်အပိုင်းတစ်ခုစီရရှိကြပြီး လေဝိသားတို့မူ ထူးခြားသည့်တာဝန်များကို ပေးအပ်ခြင်းခံခဲ့ကြရသည်။ အလားတူ ယနေ့ အထူးအချိန်ပြည့်လုပ်ငန်းတွင် ပါဝင်သူများစွာ—သာသနာပြုများနှင့် ဗေသလမိသားစုအဖွဲ့ဝင်များကဲ့သို့—တို့သည် မိမိတို့ မည်သည့်နေရာတွင် နေထိုင်ကြမည်၊ မည်သည့်အလုပ်ကိုလုပ်ကိုင်ကြမည်တို့ကို မိမိတို့ဘာသာမဆုံးဖြတ်ကြပါ။ တစ်ဦးတစ်ယောက်သည် မိမိလုပ်ဆောင်ရမည့်တာဝန်နှင့်ပတ်သက်၍ မရှင်းမလင်းဖြစ်နေသည်ဟူသော ခံစားချက်များပေါ်လာပါက မည်သို့နည်း။ “ကျွန်တော်တို့ရဲ့ ယုံကြည်ခြင်းကိုယ်စားလှယ်ချုပ်ဖြစ်တဲ့ ယေရှုခရစ်ကို စေ့စေ့ကြည့်ပြီး ကိုယ်တော့်ပုံသက်သေကို အနီးကပ်သုံးသပ်ကြည့်ရင် ခင်ဗျားတို့လက်လျှော့မှာမဟုတ်ဘူး” ဟု ညီအစ်ကိုစွင်ဂလ်ကပြောခဲ့သည်။—ဟေဗြဲ ၁၂:၂၊ ၃။

ကင်းမျှော်စင်ခြံကော်မတီမှ လီယိုနတ်ပယ်ရ်စန်က “ဆက်၍အာရုံစူးစိုက်လေ” ဟူသောအကြောင်းကို ဆက်၍ဟောပြောသည်။ သူဤသို့ပြောသည်– “ခင်ဗျားတို့ဆီမှာ အကောင်းဆုံးကင်မရာတစ်လုံးရှိမယ်၊ အလှပဆုံးရိုက်ကွင်းတစ်ခုရှိမယ်၊ အကောင်းဆုံးနောက်ခံတစ်ခုရှိမယ်၊ ဒါပေမဲ့ ချိန်သားမကိုက်ဘူးဆိုရင်တော့ ဓာတ်ပုံကကောင်းမှာမဟုတ်ဘူး။” မြင်ကွင်းကျယ်မှန်ဘီလူးကဲ့သို့အလား ကျွန်ုပ်တို့၏မြင်ကွင်းတွင် ပြီးမြောက်နေသော ကမ္ဘာချီဟောပြောခြင်းလုပ်ငန်းကို ပါဝင်စေရမည်။ ကြီးမားသည့်ရုပ်ပုံကို ကျွန်ုပ်တို့မျက်ခြည်မပြတ်သင့်ပေ။ “ကိုယ့်ကိုယ်ကိုပဲ အာရုံစိုက်တဲ့သူကတော့ သူလုပ်ငန်းမှာပျော်ရွှင်မှာမဟုတ်ဘူး” ဟု ညီအစ်ကိုပယ်ရ်စန်ကပြောသည်။ “ယေဟောဝါနဲ့ ကိုယ်တော်ပေးတဲ့အလုပ်အပေါ်မှာ အာရုံစိုက်တဲ့သူတွေဟာ အောင်မြင်မှုရကြမယ်။”

“အလွန့်အလွန်ကျေးဇူးတင်စရာရှိသည်” မှာ အုပ်ချုပ်ရေးအဖွဲ့ဝင်နောက်တစ်ဦးဖြစ်သူ ဂျွန်. အီး. ဘားရ်၏ ဟောပြောချက်ခေါင်းစဉ်ဖြစ်သည်။ “ယေဟောဝါကိုကျေးဇူးတင်တဲ့ခံစားချက်တွေကို ဘယ်တော့မှမပျောက်ပျက်စေကြပါနဲ့။ အဲဒါဟာ ခင်ဗျားတို့ဘယ်တာဝန်ကိုပဲရရ ကျေနပ်ရောင့်ရဲမှုပေးမဲ့ အကြီးမားဆုံးအခြေအမြစ်တစ်ခုပဲ” ဟု ကျောင်းသားများအား ညီအစ်ကိုဘားရ်က ဩဝါဒပေးခဲ့သည်။ ကျေးဇူးသိတတ်သည့်စိတ်က ဤကဲ့သို့ရေးသားရန် ဒါဝိဒ်အားလှုံ့ဆော်ခဲ့သည်– “တိုင်းတာကြိုးသည် ငါ့အဖို့ သာယာသောအရပ်တွင်ကျ၍ နှစ်သက်ဖွယ်သောအမွေကို ငါခံရပြီ။” (ဆာလံ ၁၆:၆၊ သမ္မာ) “ခင်ဗျားတို့ရဲ့နေ့စဉ်အသက်တာမှာ ယေဟောဝါနဲ့ နီးနီးကပ်ကပ်ရှိနေတယ်ဆိုတဲ့ ခံစားချက်အားဖြင့် အဲဒီတန်ဖိုးရှိအမွေကို ခင်ဗျားတို့ရကြတယ်။ အဲဒါကို ခင်ဗျားတို့က သိပ်ကျေးဇူးတင်ဖို့ကောင်းတဲ့ အလွန်နှစ်သက်ဖွယ်ရာအဖြစ် ယူမှတ်သရွေ့ကာလပတ်လုံး အဲဒီဆက်ဆံရေးကို ယေဟောဝါဖြတ်တောက်ပစ်မှာမဟုတ်ဘူး” ဟု ညီအစ်ကိုဘားရ်ကပြောခဲ့သည်။

ဂိလဒ်သင်တန်းပို့ချသူဂျက်ခ်ရက်ဖော့ဒ်က “သင့်လျှာကိုမည်သို့အသုံးပြုမည်နည်း” ဟူသောခေါင်းစဉ်ဖြင့် နောက်ဟောပြောချက်တစ်ခုကို ပေးခဲ့သည်။ မစဉ်းမစားပြောဆိုမှုသည် မည်မျှထိခိုက်ပျက်စီးမှုကို ဖြစ်စေသည်တကား! (သု. ၁၈:၂၁) လျှာကို မည်သို့ထိန်းချုပ်နိုင်မည်နည်း။ “ပထမဆုံး ကိုယ့်စိတ်ကိုထိန်းရမယ်။ ဘာဖြစ်လို့လဲဆိုတော့ စိတ်နဲ့နှလုံးမှာရှိတာတွေကို လျှာကထုတ်ဖော်ပြလို့ပဲ” ဟု ညီအစ်ကိုရက်ဖော့ဒ်ဖြေသည်။ (မဿဲ ၁၂:၃၄-၃၇) ယေရှုက အလွန်ကောင်းမွန်သည့်ပုံသက်သေကို ပေးခဲ့သည်; သူ၏လျှာကို ယေဟောဝါ၏နာမတော်ထင်ရှားရေးအတွက် အသုံးပြုခဲ့သည်။ “ဒီနေ့ ယေဟောဝါ့နှုတ်ကပါဌ်တော်ကို မကြားရတဲ့ ငတ်မှုခေါင်းပါးမှုတစ်ခုဖြစ်နေတယ်။ အဲဒီနှုတ်ကပါဌ်တော်ကို ခင်ဗျားတို့သိကြတယ်။ ခင်ဗျားတို့မှာ ‘လူတတ်ရဲ့နှုတ်သတ္တိ’ ရှိကြတယ်။ ဒါကြောင့် ခင်ဗျားတို့ရဲ့လျှာကို ယေဟောဝါဆီမှာအကြွင်းမဲ့ဆက်ကပ်အပ်နှံထားတဲ့ စိတ်နဲ့နှလုံးတို့ရဲ့ လမ်းညွှန်မှုကို အမြဲခံယူစေပါ” ဟု ညီအစ်ကိုရက်ဖော့ဒ်က သင်တန်းသားများအားပြောခဲ့သည်။—ဟေရှာယ ၅၀:၄။

ဆုတောင်းခြင်း၏အရေးကြီးမှုကို “ယေဟောဝါ၏ရှေ့မှောက်တွင်ကဲ့သို့ သင်လျှောက်လှမ်းနေသလော” ဟူသောဟောပြောချက်တွင် အလေးပေးဖော်ပြသွားသည်။ ကျောင်း၏မော်ကွန်းထိန်းဖြစ်သူ ယူလီစပ်စ်ဂလပ်စ်က ဤသို့အာရုံပြုစေသည်– “ဖခင်တစ်ဦးဟာ မိသားစုကိုကျွေးမွေးထောက်ပံ့ဖို့ ကောင်းကောင်းအလုပ်လုပ်တယ်။ ဒါပေမဲ့ သူတို့ကိုချစ်ခင်မြတ်နိုးကြောင်း ဘယ်တော့မျှမဖော်ပြဘူးဆိုရင် သူ့လုပ်ဆောင်မှုဟာ မေတ္တာပါလို့မဟုတ်ဘဲ မလုပ်ချင်ဘဲ လုပ်နေရတာလို့ သူ့မိသားစုက ကောက်ချက်ချနိုင်တယ်။ ကျွန်တော်တို့လည်း ဒီလိုပဲ။ ဘုရားသခင့်လုပ်ငန်းတော်မှာ ကျွန်တော်တို့အလုပ်များကောင်းများနေမယ်။ ဒါပေမဲ့ ဆုမတောင်းဘူးဆိုရင် ကျွန်တော်တို့ဟာ မေတ္တာရှင်ကောင်းကင်ခမည်းတော်ဆီမှာ မဟုတ်ဘဲနဲ့ အလုပ်ထဲမှာ ကိုယ့်ကိုယ်ကိုအပ်နှံတာသက်သက်ဖြစ်နေတယ်။”

အုပ်ချုပ်ရေးအဖွဲ့မှ သီယိုးဒိုဂျဲရက်စ်က “မြောက်မြားစွာသောလူအုပ်စုကြီးသည် အဘယ်ကြောင့် ဘုရားသခင့်လူများနှင့်ပေါင်းသင်းနေကြ” ဟူသောခေါင်းစဉ်အပေါ်မူတည်၍ ပြောဆိုသွားသည်။ လူထောင်ပေါင်းများစွာတို့သည် ယေဟောဝါ၏အဖွဲ့အစည်းသို့ နှစ်စဉ်ရောက်ရှိလာကြသည်။ (ဇာခရိ ၈:၂၃) ယေဟောဝါသက်သေများသည် ဘုရားသခင်၏လူများဖြစ်ကြောင်း မည်သည့်အရာက မှတ်သားဖော်ပြသနည်း။ ပထမအချက်အနေနှင့် သူတို့သည် သမ္မာကျမ်းစာတစ်အုပ်လုံးကို ဘုရားသခင့်နှုတ်ကပါဌ်တော်အဖြစ် လက်ခံကြသည်။ (၂ တိမောသေ ၃:၁၆) ဒုတိယအချက်မှာ သူတို့သည် နိုင်ငံရေးတွင် ကြားနေကြသည်။ (ယောဟန် ၁၇:၁၆) တတိယအချက်မှာ သူတို့သည် ဘုရားသခင်၏နာမတော်ကို သက်သေခံကြသည်။ (ယောဟန် ၁၇:၂၆) စတုတ္ထမှာ သူတို့သည် ကိုယ်ကျိုးစွန့်မေတ္တာကို တင်ပြကြသည်။ (ယောဟန် ၁၃:၃၅; ၁၅:၁၃) ဤအထောက်အထားများအားဖြင့် ကျွန်ုပ်တို့သည် ရဲရင့်စွာဖြင့် ‘မှောင်မိုက်ထဲမှ အံ့ဖွယ်အလင်းတော်သို့ ကျွန်ုပ်တို့အားခေါ်သွင်းတော်မူသောသူ၏ ဂုဏ်ကျေးဇူးများကိုဖော်ပြ’ နိုင်ကြသည်။—၁ ပေတရု ၂:၉။

ဤစိတ်အားတက်ကြွစေသည့် ဟောပြောချက်အပြီးတွင် ကျောင်းသား ၄၆ ယောက်တို့သည် ဒီပလိုမာဘွဲ့ကိုလက်ခံရရှိကြသည်။ သူတို့သည် ကမ္ဘာအရပ်ရပ်ရှိ နိုင်ငံပေါင်း ၁၆ နိုင်ငံတို့တွင် ခန့်အပ်ခံရကြသည်။

တစ်မူထူးသည့် မွန်းလွဲပိုင်းအစီအစဉ်

မွန်းလွဲပိုင်းတွင် ဗေသလကော်မတီဝင် ဒေါ်နယ်လ်ခရက်ဘ်စ်က ကင်းမျှော်စင် သင်တန်းအကျဉ်းချုပ်ကို ဦးဆောင်သွားသည်။ ထိုတွင် “ပညာသည် လမ်းခရီးတို့၌ မိမိစကားသံကိုလွှင့်တတ်၏” အမည်ရှိအစီအစဉ်ကို ကျောင်းဆင်းများအား တင်ဆက်ပေးသွားသည်။ (သု. ၁:၂၀) သူတို့က လမ်းပေါ်နှင့်ဈေးဆိုင်များတွင် သက်သေခံခြင်းမှရရှိခဲ့သော တန်ဖိုးရှိတွေ့ကြုံမှုများ ပြန်တင်ပြပြောဆိုကြသည်။ အလွတ်သဘောသက်သေခံနိုင်ရန် သတ္တိမွေးသူများကို အမှန်ပင်ယေဟောဝါကောင်းချီးပေးသည်။ “ကျွန်တော်တို့တွေဟာ ရိတ်သိမ်းသူကောင်းကင်တမန်တွေရဲ့ လက်ထဲကတံစဉ်တွေလိုပဲ ကိုယ့်ကိုယ်ကိုယူဆတယ်။ ကျွန်တော်တို့ရဲ့ကျွမ်းကျင်မှုက ပိုမိုထက်မြက်လေလေ၊ ကျွန်တော်တို့ကို ကောင်းကင်တမန်တွေအသုံးပြုနိုင်တဲ့လုပ်ငန်းက ပိုများလေလေပဲ” ဟု ကျောင်းဆင်းတစ်ဦးက ပြောသည်။ (ဗျာဒိတ် ၁၄:၆ နှိုင်းယှဉ်။) ကျောင်းသားအစီအစဉ်တွင် ဤသင်တန်းမှ ကျောင်းဆင်းများ စေလွှတ်ခံရသောနိုင်ငံများအနက် သုံးနိုင်ငံ—ဘိုလစ်ဗီးယား၊ မော်လ်တာနှင့် တိုင်ဝမ်သို့ လေ့လာရေးခရီးစဉ်ကို ပရိသတ်အား ရုပ်သေဖြင့်တင်ဆက်ပေးခြင်းလည်း ပါဝင်သည်။

ထို့နောက် ဝေါလေ့စ်နှင့်ဂျိန်းလစ်ဗရဲ့န်စ်—၁၇ နှစ်ကြာ သာသနာပြုခဲ့ကြသူ—တို့ကို ခေါ်တွေ့မေးမြန်းခဲ့သည်။ ၁၉၉၃ ခုနှစ်တွင် ကင်းမျှော်စင်ခြံသို့ သူတို့ခေါ်ဖိတ်ခံခဲ့ရပြီးထိုတွင်ယခု ညီအစ်ကိုလစ်ဗရဲ့န်စ်က ဂိလဒ်သင်တန်းပို့ချသူတစ်ဦးအဖြစ် အမှုထမ်းဆောင်နေသည်။

“ထိုက်တန်သူများကို သူတို့၏ဇရာအိုချိန်တွင်ရိုသေခြင်း” ခေါင်းစဉ်အောက်ရှိ အခန်းလေးခန်းပါဝင်သော တင်ဆက်မှုတစ်ခု ဆက်၍လိုက်ပါလာသည်။ လူတို့သည် အိုမင်းမစွမ်းဖြစ်လာကြသောအခါ အသုံးမကျဖြစ်လာခြင်းနှင့် စွန့်ပစ်ခံရခြင်းတို့ကို ကြောက်ရွံ့မှုတို့က ကိုယ့်ကိုယ်ကိုယုံကြည်စိတ်ချမှုကို အနှောင့်အယှက်ဖြစ်စေပေမည်။ (ဆာလံ ၇၁:၉) ဤစိတ်ထိမိလှုပ်ရှားဖွယ်တင်ဆက်မှုက အသင်းတော်ရှိလူအားလုံးတို့သည် ထိုသို့သော သစ္စာရှိသက်ကြီးရွယ်အိုများကို မည်သို့ကူညီထောက်ပံ့နိုင်ကြကြောင်းကို ဖော်ပြသည်။

နိဂုံးချုပ်သီချင်းနှင့် ဆုတောင်းချက်ပြီးသောအခါ ဂျာစီမြို့တော်ခန်းမကြီးနှင့် အရန်ခန်းမများထဲမှ တက်ရောက်သူ ၆,၂၂၀ ဦးတို့သည် အားသစ်လန်းခဲ့ကြရသည်။ ခန့်အပ်ခံရပ်ကွက်သစ်တွင်ရှိ ကျောင်းဆင်းများအတွက် ကျွန်ုပ်တို့ဆုတောင်းပါသည်။ ပေးကမ်းခြင်းမှ သာ၍ကြီးမားသည့်ပျော်ရွှင်မှုကို သူတို့ဆက်လက်ခံစားကြရပါစေ။

[စာမျက်နှာ ၂၆ ပါ လေးထောင့်ကွက်]

သင်တန်းဆိုင်ရာ အချက်အလက်များ

ကိုယ်စားပြုတက်ရောက်သည့်နိုင်ငံအရေအတွက်– ၉

တာဝန်ပေးအပ်ခံရသည့်နိုင်ငံအရေအတွက်– ၁၆

ကျောင်းသား/သူ အရေအတွက်– ၄၆

ပျမ်းမျှအသက်– ၃၃.၈၅

ပျမ်းမျှသမ္မာတရားတွင်းသက်တမ်း– ၁၆.၆

ပျမ်းမျှအချိန်ပြည့်ဓမ္မအမှုဆောင်သက်တမ်း– ၁၂.၂

[စာမျက်နှာ ၂၆ ပါ ရုပ်ပုံ]

ဂိလဒ် ကင်းမျှော်စင် သမ္မာကျမ်းစာကျောင်း၏ ၉၅ ကြိမ်မြောက် သင်တန်း

အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှလက်ယာဘက်သို့ စီထားသည်။

(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.: Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D..; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.