ဘုရားသခင့်နိုင်ငံတော်ကြွေးကြော်သူများမှတ်တမ်း

ဘုရားသခင့်နိုင်ငံတော်နှင့်ယှဉ်သော ဤသတင်းကောင်းကိုဟောရမည်

ဘုရားသခင်၏ မဟာရန်သူကြီးစာတန်မာရ်နတ်သည် စစ်မှန်သောခရစ်ယာန်ဘာသာ တိုးတက်ပြန့်ပွားရေးကို ဟန့်တားနှောင့်ယှက်ရန် အုပ်ချုပ်ရေးနှင့် ဗာဗုလုန်ဘာသာတို့ကို ရာစုနှစ်များစွာကြာ စဉ်းလဲစွာအသုံးပြုခဲ့သည်။ သို့သော် ဤနည်းစနစ်များသည် အောင်မြင်မည်မဟုတ်။ ယေရှုက ‘လူမျိုးအပေါင်းတို့အား သက်သေဖြစ်မည်အကြောင်း ဘုရားသခင့်နိုင်ငံတော်နှင့်ယှဉ်သော ဤသတင်းကောင်းကို မြေကြီးတစ်ခွင်လုံး၌ ဟောရလိမ့်မည် [“ဟောကောင်းဟောမည်” သို့မဟုတ် “ဟောနိုင်စရာရှိသည်” မဟုတ်]။’—မဿဲ ၂၄:၁၄၊ ကဘ။

စာတန်၏မအောင်မြင်မှုသည် ဂရိနိုင်ငံတွင်ထင်ရှားသည်။ ထိုနိုင်ငံတွင် ဂရိသြသဒေါက်စ်ချာ့ချ်က ယေဟောဝါသက်သေများ၏ ဘုရားသခင့်နိုင်ငံတော်သတင်းဟောပြောခြင်းကို ပိတ်ပင်ဟန့်တားရန် ကြိုးစားခဲ့ကြသည်။ သို့သော် အောက်ပါတွေ့ကြုံမှုက ထင်ရှားစေသကဲ့သို့ အချိန်တန်သောအခါ ကျမ်းစာသမ္မာတရားသည် ဆန့်ကျင်မှုများကြားမှ စိတ်နှလုံးရိုးဖြောင့်သူများထံသို့ ရောက်ရှိသွားသည်။

လွန်ခဲ့သည့်အနှစ် ၃၀ ခန့်က ဂရိသြသဒေါက်စ်ဓမ္မဆရာတစ်ဦးသည် သတင်းကောင်းကိုလက်ခံပြီး ယေဟောဝါသက်သေတစ်ဦး ဖြစ်လိုသည့်ဆန္ဒကိုပင် တင်ပြခဲ့သည်။ သို့သော် သူ့ဆွေမျိုးသားချင်းများက ဤလုပ်ဆောင်မှုကို ပြင်းပြင်းထန်ထန်ဆန့်ကျင်ကန့်ကွက်ပြီး ယေဟောဝါသက်သေများနှင့် ပေါင်းသင်းခြင်းကို စွန့်လွှတ်ရန် သူ့ကိုဖိအားပေးကြသည်။ မိသားစုသဘောလိုက်၍ ဓမ္မဆရာအဖြစ်ဆက်လက်လုပ်ဆောင်ခဲ့သည်; သို့သော် ယေဟောဝါသက်သေများက မိမိအား သမ္မာတရားသိနားလည်အောင် ကူညီပေးခဲ့ကြောင်း၊ ယင်းကို ဗာဗုလုန်ဝတ်ပြုရေးတွင် ထင်ပေါ်သည့်ရာထူးတစ်နေရာနှင့် လဲလှယ်ခဲ့သောအားဖြင့် စွန့်လွှတ်ခဲ့ကြောင်းကိုမူ သူအမြဲအသိအမှတ်ပြုသည်။

မည်သို့ဆိုစေ သူသည် အခွင့်အရေးရလျှင်ရသလို ယေဟောဝါသက်သေများဘက်မှ ထောက်ခံပြောဆိုသည်။ ကျမ်းစာသမ္မာတရားကို သင်ယူလိုပါက ယေဟောဝါသက်သေများနှင့် လေ့လာမှုပြုသင့်ကြောင်း လူများကို မကြာခဏသွန်သင်ဆုံးမလေ့ရှိသည်။ နှစ်များကြာလာသောအခါ သူ၏ထောက်ခံပြောဆိုမှုကို လူအချို့လိုက်လျှောက်ခဲ့သည်။

မကြာမီ ထိုဓမ္မဆရာသည် အပြင်းအထန်ဖျားပြီး အသက်ဆုံးတော့မည်ကိုသိသည်။ ဆေးရုံတွင် သူ၏ကလေးများကို မှာလိုက်ပြီးနောက် သူ၏အနားတွင် အားလုံးဝိုင်းနေကြသည်။a မိမိကွယ်လွန်လျှင် သူ့ကို တစ်ဖန်ပြန်တွေ့နိုင်ကြောင်း သူတို့ကိုပြောပြသည်။ လူသားများသည် မြေကြီးပရဒိသုတွင်အသက်ရှင်ရန် ယေဟောဝါအားဖြင့် ရှင်ပြန်ထမြောက်ခြင်းခံရမည့်အကြောင်း၊ သို့သော် ယင်းအဖြစ်အပျက်ကို အမှန်တွေ့မြင်လိုပါက သူတို့သည် သမ္မာကျမ်းစာမှအမှန်တရားများကို လေ့လာပြီး ဗာဗုလုန်ဝတ်ပြုရေးနှင့် အဆက်ဖြတ်ရမည်ဖြစ်ကြောင်း ကျမ်းစာသွန်သင်ချက်များကို သူပြောပြသည်။ ယေဟောဝါသက်သေများနှင့် ပေါင်းသင်းပြီး ခရစ်ယာန်စစ်များမည်သို့ဖြစ်လာနိုင်သည်ကို သင်ယူရန် သူတို့အား အနူးအညွတ်မေတ္တာရပ်ခံခဲ့သည်။

မကြာမီ ထိုဓမ္မဆရာကွယ်လွန်သွားသည်။ သို့သော် သူ၏ကလေးများအား ပေးခဲ့သော နောက်ဆုံးသြဝါဒက ကောင်းကျိုးဖြစ်ထွန်းခဲ့သည်။ သူ၏သမီးဖြစ်သူသည် အခြားဆွေမျိုးများနည်းတူ ယေဟောဝါသက်သေများနှင့် သူတို့၏လုပ်ငန်းကို ပြင်းပြင်းထန်ထန်ဆန့်ကျင်ခဲ့သူဖြစ်သည်။ သို့ရာတွင် ဖခင်ဆုံးခါနီး စိတ်ရင်းမှန်ဖြင့်မေတ္တာရပ်ခံချက်ကို သူမဥပေက္ခာမပြုနိုင်သောကြောင့် မကြာမီ ယေဟောဝါသက်သေများနှင့်ဆက်သွယ်ပြီး ကျမ်းစာကို စတင်လေ့လာသည်။ မကြာသေးမီက သူမလည်း သက်သေခံတစ်ဦးဖြစ်လာပြီး မိမိ၏အသက်တာကို ယေဟောဝါဘုရားသခင်ထံ ဆက်ကပ်အပ်နှံကာ ယင်းကို ရေတွင်နှစ်ခြင်းခံခြင်းအားဖြင့် တင်ပြခဲ့သည်။

ဂရိနှင့် အခြားနိုင်ငံ ၂၃၀ ကျော်တို့တွင် ယေဟောဝါသက်သေများသည် ဘုရားသခင်၏ သန့်ရှင်းသောဝိညာဉ်တော်ကို မှီခိုအားထားကြသည်။ သန့်ရှင်းသောဝိညာဉ်တော်၏ အပြည့်အဝထောက်ပံ့မှုအားဖြင့် သူတို့သည် ယေရှု၏အောက်ပါပရောဖက်ပြုချက်ကို ပါဝင်ပြည့်စုံစေကြသည်– “သင်တို့အပေါ်သို့ သန့်ရှင်းသောဝိညာဉ်တော်ဆင်းသက်သောအခါ သင်တို့သည် တန်ခိုးကိုခံရ၍ ယေရုရှလင်မြို့မှစသော ယုဒပြည်၊ ရှမာရိပြည်၊ မြေကြီးစွန်းတိုင်အောင် ငါ၏သက်သေဖြစ်ကြလိမ့်မည်။”—တမန်တော် ၁:၈။

[အောက်ခြေမှတ်ချက်များ]