ဂိလဒ်ကျောင်းမှ အကြိမ် ၁၀၀ မြောက်သင်တန်းသားများကို စေလွှတ်

ဂိလဒ်ကင်းမျှော်စင်ကျမ်းစာကျောင်းသည် ခေတ်သစ်အချိန်၌ ဘုရားသခင်၏နိုင်ငံတော်ကို ကမ္ဘာချီကြွေးကြော်ရာတွင် အရေးကြီးသောကဏ္ဍတစ်ခုအဖြစ် ပါဝင်လေသည်။ ဂိလဒ်ကျောင်းသည် ၁၉၄၃ ခုနှစ်မှစ၍ သာသနာပြုများကို လေ့ကျင့်ပေးခဲ့သော်လည်း ၎င်းမှ ကျောင်းဆင်းခဲ့သူများသည် တိုင်းနိုင်ငံပေါင်း ၂၀၀ ကျော်တို့တွင် အမှုထမ်းလျက်ရှိသည်။ ၁၉၉၆၊ မတ် ၂ ရက်တွင် အကြိမ် ၁၀၀ မြောက်သင်တန်း ကျောင်းဆင်းပွဲကျင်းပခဲ့သည်။

ကျောင်းသားများသည် နယူးယောက်မြို့၊ ပက်တာစင်နယ်တွင်ရှိသော ကင်းမျှော်စင်ပညာပေးဌာန၏ဒေသအတွင်း၌ ခြောက်ပေကျော်ထူသော နှင်းထုများကျနေစဉ်အတောအတွင်း ကျောင်းတက်ခဲ့ကြရသည်။ သူတို့ကျောင်းဆင်းချိန်၌လည်း နှင်းများကျနေသည်မှာ အံ့ဩစရာမဟုတ်ပေ။ သို့သော်လည်း ခန်းမဆောင်ကြီး ပြည့်သွားပြီး ပက်တာစင်၊ ဝေါလ်ကီးလ်နှင့် ဘရွတ်ကလင်တွင် နားထောင်နေကြသော ပရိသတ်များမှာလည်း အလျှံပယ်ပင်ဖြစ်သည်။ စုစုပေါင်း ၂,၈၇၈ ယောက်တက်ရောက်ခဲ့သည်။

အုပ်ချုပ်ရေးအဖွဲ့မှ သင်ကြားရေးကော်မတီဝင်တစ်ဦးဖြစ်သော သီယိုးဒို ဂျဲရက်စ်က သဘာပတိအဖြစ် လုပ်ဆောင်ပေးသည်။ နိုင်ငံအသီးသီးမှ ရောက်ရှိလာသော ဧည့်သည်များကို နွေးထွေးစွာကြိုဆိုပြီးနောက် အားလုံးမတ်တတ်ရပ်၍ သီချင်းနံပါတ် ၅၂ ကို သီဆိုကြရန် ဖိတ်ခေါ်လိုက်သည်။ ယေဟောဝါအား ချီးမွမ်းကျူးဧခြင်း စာအုပ်မှ “တို့ဖခင်နာမတော်” သီချင်းကို သူတို့သီဆိုကြရာ ခန်းမဆောင်တစ်ခုလုံး ယေဟောဝါကိုချီးမွမ်းသံများဖြင့် ပဲ့တင်ထပ်သွားလေသည်။ ပညာရေးကို ယေဟောဝါအားချီးမွမ်းရန်အတွက် အသုံးပြုခြင်းအကြောင်း သဘာပတိ၏မှတ်ချက်များနှင့်အတူ ထိုသီချင်းသည် နောက်ဆက်လိုက်လာမည့် အစီအစဉ်ကို ဖော်ပြသည်။

အသက်ကြီးသူများထံမှ ကျမ်းစာဆိုင်ရာ ဩဝါဒ

အစီအစဉ်၏ပထမအပိုင်း၌ သက်တမ်းရင့် ယေဟောဝါ၏ကျေးကျွန် အတော်များများက သင်တန်းဆင်းကျောင်းသားများကိုပေးသော ဟောပြောချက်တိုလေးများ ပါဝင်သည်။ ၁၉၄၀ ပြည့်နှစ်၌ အချိန်ပြည့်လုပ်ငန်းကို ထမ်းဆောင်ခဲ့သော ဌာနချုပ်ရှိ အမှုထမ်းအဖွဲဝင်တစ်ဦးဖြစ်သူ ရစ်ချပ် အာပရံဟန်စန်က “ဆက်လက်၍ ပြောင်းလဲပြုပြင်နေကြလော့” ဟု သင်တန်းကို တိုက်တွန်းသည်။ သူတို့၏ငါးလတာ ဂိလဒ်ကျောင်းတက်ရောက်ခြင်းအပါအဝင် ခရစ်ယာန်များအဖြစ် သူတို့၏ဘဝအသက်တာ၌ ပြောင်းလဲခဲ့ရသောအချိန်ကာလ မျိုးပေါင်းစုံနှင့်ကြုံတွေ့ခဲ့ပြီးဖြစ်ကြောင်း သူတို့ကို ပြန်အမှတ်ရစေသည်။ သို့ဖြစ်၍ သူတို့အဘယ်ကြောင့် ဆက်လက်၍ ပြုပြင်ပြောင်းလဲမှု ပြုသင့်ကြသနည်း။

၂ ကောရိန္သု ၁၃:၁၁ တွင် တမန်တော်ပေါလုအသုံးပြုထားသော အသုံးအနှုန်းက “လူတစ်ဦးသည် ယေဟောဝါ၏ ပိုမိုတိကျသောစံညွှန်းတော်များကို လိုက်လျှောက်ပြည့်မီနိုင်ရေးအတွက် ကိုယ်တော်၏ပုံသွင်းမှု သို့မဟုတ် အသေးစိတ်ချိန်ညှိခြင်းဖြစ်သော တိုးတက်ကောင်းမွန်အောင်ပြုပြင်မှုကို ဆက်တိုက်ခံယူခြင်းတည်းဟူသော တိုးတက်ပြောင်းလဲသည့် ဖြစ်စဉ်တစ်ခုကိုဆိုလိုသည်” ဟု ဟောပြောသူက ရှင်းပြသည်။ နိုင်ငံရပ်ခြားသို့ တာဝန်ခန့်အပ်ခံရမှုများအတွက် သင်တန်းဆင်းကျောင်းသားများသည် သူတို့၏ယုံကြည်ခြင်းနှင့်စပ်လျဉ်းသော စိန်ခေါ်ချက်အသစ်များနှင့် ရင်ဆိုင်ရလိမ့်မည်ဖြစ်သည်။ သူတို့သည် ဘာသာစကားသစ်များ သင်ယူရမည်၊ ခြားနားသောဓလေ့ထုံးတမ်းနှင့် အသက်ရှင်နေထိုင်မှုတို့ကို ချိန်ညှိရမည်၊ ရပ်ကွက်ပုံစံအမျိုးမျိုးအတွက် ပြုပြင်ရမည်ဖြစ်သည်။ သာသနာပြုအိမ်များနှင့် အသင်းတော်သစ်များတွင် ကွဲပြားသောစရိုက်များနှင့်လည်း သူတို့ဆက်ဆံရလိမ့်မည်ဖြစ်သည်။ လိုလိုလားလား ပြုပြင်ပြောင်းလဲလိုသော စိတ်သဘောနှင့် ထိုအခြေအနေအားလုံးနှင့်စပ်လျဉ်း၍ ကျမ်းစာမူများကို ဂရုတစိုက်လိုက်လျှောက်ကြမည်ဆိုလျှင် တမန်တော်ပေါလု ရေးသားခဲ့သကဲ့သို့ “အစဉ်မပြတ်သက်သာဝမ်းမြောက်ခြင်း” (ကဘ) လည်း ရှိနိုင်ပါလိမ့်မည်။

အစီအစဉ်တွင်ပါသော အုပ်ချုပ်ရေးအဖွဲ့ဝင် ငါးဦးအနက်တစ်ဦးဖြစ်သည့် ဂျွန် ဘားရ်က သူ၏ခေါင်းစဉ်အတွက် ၁ ကောရိန္သု ၄:၉ မှ ထုတ်နုတ်ထားသည်။ ခရစ်ယာန်များသည် ကောင်းကင်တမန်များနှင့် လူများတို့၏ ကြည့်ရှုခြင်းကို ခံနေကြရကြောင်း ပရိသတ်ကို သူသတိပေးသည်။ “ဒါကိုသိထားတာကြောင့် ခရစ်ယာန်အသက်တာလမ်းစဉ်ဟာ ပိုပြီးအရေးကြီးလာတယ်။ အထူးသဖြင့် သူပြောတဲ့အရာ၊ လုပ်တဲ့အလုပ်ဟာ မျက်မြင်ရ ကြည့်ရှုနေသူတွေကော၊ မျက်မြင်မရ ကြည့်ရှုနေသူတွေကိုပါ အမှတ်အရာထင်စေနိုင်တယ်ဆိုတာ သိထားတဲ့အခါ ပိုအရေးကြီးလာတယ်။ အကြိမ် ၁၀၀ မြောက်ဂိလဒ်သင်တန်းကျောင်းက ညီအစ်ကို၊ ညီအစ်မတွေအားလုံးအတွက် ကမ္ဘာ့အစွန်းဆုံးအပိုင်းတွေကိုသွားရတဲ့အခါ ဒီအချက်ကိုမှတ်ထားခြင်းဟာ အလွန်ကောင်းတဲ့အရာဖြစ်ပါလိမ့်မယ်လို့ ကျွန်တော်ထင်ပါတယ်” ဟု သူပြောသည်။

သိုးကဲ့သို့သောသူများကို သမ္မာတရားသင်ယူရန် ကူညီပေးရာတွင် “ဘုရားသခင်၏ကောင်းကင်တမန်တို့သည် နောင်တရသောလူဆိုးတစ်ယောက်၌ ဝမ်းမြောက်ခြင်းရှိကြသည်” ကို အမှတ်ရနေရန် ၄၈ ယောက်သော ကျောင်းသားများကို ညီအစ်ကို ဘားရ် တိုက်တွန်းသွားသည်။ (လုကာ ၁၅:၁၀) ၁ ကောရိန္သု ၁၁:၁၀ ကို ကိုးကား၍ သူက သီအိုကရက်တစ်အစီအစဉ်များနှင့်ပတ်သက်၍ လူတစ်ဦး၏သဘောထားသည် မြင်ရသော ကျွန်ုပ်တို့၏ညီအစ်ကို၊ ညီအစ်မများကိုသာ ထိခိုက်သည်မဟုတ်ဘဲ မမြင်ရသော ကောင်းကင်တမန်များကိုလည်း ထိခိုက်ကြောင်း ရှင်းပြသည်။ ဤကျယ်ပြန့်သော ရှုမြင်ပုံကို စိတ်စွဲမှတ်ထားခြင်းသည် မည်မျှကောင်းလိုက်လေခြင်း!

ကိုယ်တိုင် ဂိလဒ်ကျောင်းဆင်းတစ်ဦးဖြစ်ပြီး အုပ်ချုပ်ရေးအဖွဲ့ဝင်တစ်ဦးလည်းဖြစ်သော ဂဲရစ် လွယ့်ရှ်က ယေဟောဝါသည် ‘မိမိလူတို့ကို ဝန်းရံထား’ တော်မူကြောင်းကိုပြရန် ဆာလံ ၁၂၅:၁၊ ၂; ဇာခရိ ၂:၄၊ ၅; ဆာလံ ၇၁:၂၁ ကဲ့သို့သော ကျမ်းချက်များကို ဆွေးနွေးသုံးသပ်သွားခဲ့သည်။ ကိုယ်တော်သည် သူတို့အတွက် ကာကွယ်မှုကို အဘက်ဘက်မှပြင်ဆင်ပေးထား၏။ ထိုကဲ့သို့သောကာကွယ်မှုကို ကြီးစွာသောဒုက္ခကာလအချိန်အတောအတွင်း၌သာ ဘုရားသခင်ပြင်ဆင်ပေးထားပါသလော။ “မဟုတ်ပါဘူး။ ဘာဖြစ်လို့လဲဆိုရင် ယေဟောဝါဟာ မိမိရဲ့လူမျိုးတော်ကို ကာကွယ်ပေးတဲ့ ‘မီးမြို့ရိုး’ ဖြစ်နေနှင့်ပြီးဖြစ်တာကြောင့်ပါပဲ။ စစ်ပြီးကာလဖြစ်တဲ့ ၁၉၁၉ ခုနှစ်မှာ ဝိညာဏဣသရေလ အကြွင်းအကျန်အတန်းအစားဟာ လူမျိုးအသီးအသီးကို သက်သေဖြစ်စေဖို့အလိုငှာ ကမ္ဘာတစ်ဝန်းလုံးမှာ ဘုရားသခင်၏နိုင်ငံတော်သတင်းကောင်းကို ဟောပြောဖို့ တကယ်ပဲစိတ်အားထက်သန်နေကြတာကို တွေ့ကြရတယ်။ သူတို့ဟာ ကောင်းကင်မှာရှိတဲ့ ပုံဆောင်ယေရုရှလင်ရဲ့ကိုယ်စားလှယ်တော်တွေဖြစ်တယ်။ ဆုံးခန်းကာလအတွင်းမှာ ဒီကိုယ်စားလှယ်တော်တွေကို ကာကွယ်ပေးမယ်လို့ ယေဟောဝါ အာမခံထားပါတယ်။ ဒါကြောင့် သူတို့ကို ဘယ်သူတွေကများ ထိထိရောက်ရောက်တားဆီးနိုင်ကြမှာလဲ။ ဘယ်သူမှ မတားနိုင်ပါဘူး” ဟု ဟောပြောသူက ဖြေကြားပေးခဲ့သည်။ ဘုရားသခင်၏အလိုတော်ကို ထမ်းရွက်ရာတွင် သူတို့အတွက်ကော၊ သူတို့နှင့် ရင်းနှီးစွာပေါင်းသင်းသူများအတွက်ပါ မည်မျှအားရှိဖွယ်စကားများပါတကား!

ကျောင်းသင်တန်းပို့ချသူ ဝါရင့်ဆရာများအဝင်ဖြစ်သော ယူလီစက်စ် ဂလပ်စ်က ‘ယေဟောဝါ၏ကမ္ဘာချီအဖွဲ့အစည်း၌ သင့်တော်မည့် သူတို့၏အလုပ်ကို ပြီးမြောက်အောင်လုပ်ဆောင်ကြ’ ရန် အတန်းသားများကို အားပေးတိုက်တွန်းခဲ့သည်။ သင့်တော်မည့်အလုပ်ဆိုသည်မှာ လူတစ်ဦး၏အရည်အချင်းများ သို့မဟုတ် စရိုက်များနှင့် အထူးလိုက်ဖက်မည့် အခြေအနေတစ်ရပ် သို့မဟုတ် လုပ်ဆောင်မှုတစ်ခုကို ဆိုလိုခြင်းဖြစ်သည်။ “အသင် သာသနာပြုလောင်းများအတွက် သင်တို့နဲ့သင့်တော်မယ့်အလုပ်ကို ယေဟောဝါသက်သေများရဲ့ ကမ္ဘာချီအဖွဲ့အစည်းမှ တွေ့ရှိရပါတယ်” ဟု သူဆိုသည်။ “ဒါပေမဲ့ ဒီအချိန်မှ အရေးကြီးတာက သင်တို့ဟာ သာသနာပြုအသက်တာရဲ့ အစသာရှိသေးတယ် ဆိုတဲ့အရာပါပဲ။” သူတို့သည် သူတို့၏အရည်အသွေးများကို ကောင်းစွာအသုံးချရန်၊ ယေဟောဝါနှင့် ကိုယ်တော့်အဖွဲ့အစည်းက သူတို့ကိုပေးမည့် အထူးခန့်အပ်ချက်များနှင့် ကိုက်ညီစေရန် ကြိုးစားအားထုတ်ဖို့လိုပေလိမ့်မည်။

ဤအစီအစဉ်ပိုင်း၌ နောက်ဆုံးဟောပြောချက်ကို ဂိလဒ်ကျောင်းဆရာများအဝင်တစ်ဦးဖြစ်ပြီး ဘိုလီးဗီးယားနိုင်ငံတွင် ၁၇ နှစ်ကြာ အမှုထမ်းခဲ့သူတစ်ဦးဖြစ်သော ဝေါလ်လင်စ် လစ်ဗာရိန်စ်က ဟောပြောသည်။ ကျောင်းသားအုပ်စုများကို သူက “ဘုရားသခင်ကို သင်တို့အစမ်းအသပ်ပြုကြမှာလား” ဟု မေးခဲ့သည်။ သူတို့ မည်သို့ပြုလုပ်သင့်သနည်း။ ဣသရေလလူမျိုးများသည် လွဲမှားသောနည်းလမ်းဖြင့် ဘုရားသခင်ကို အစုံအစမ်းပြုခဲ့ကြသည်။ (တရားဟောရာ ၆:၁၆) “အပြစ်တင်ခြင်း၊ ညည်းညူခြင်း ဒါမှမဟုတ် ကိစ္စရပ်တွေကို ကိုယ်တော်ကိုင်တွယ်တဲ့နည်းလမ်းနဲ့ပတ်သက်ပြီး အယုံအကြည်ကင်းမဲ့ကြောင်းတင်ပြခြင်း ဖြစ်ကောင်းဖြစ်မယ့်နည်းအားဖြင့် ဘုရားသခင်ကို အစုံအစမ်းပြုခြင်းဟာ မှားတယ်ဆိုတာ ရှင်းပါတယ်” ဟု ဟောပြောသူက ဖော်ပြသည်။ “သင်၏ခန့်အပ်ရာနေရာသစ်သို့ရောက်သောအခါ ထိုစိတ်ဓာတ်ကို ရှောင်ကြဉ်ပါ” ဟု သူတိုက်တွန်းသည်။ သို့ဖြစ်ပါက မှန်ကန်သောနည်းလမ်းဖြင့် ဘုရားသခင်ကို မည်သို့အစုံအစမ်းပြုနိုင်မည်နည်း။ “ကိုယ်တော်ရဲ့နှုတ်တော်ထွက်တွေကို ယုံကြည်ပြီး ကိုယ်တော်မိန့်တော်မူတဲ့အရာတွေအတိုင်း အတိအကျလိုက်လျှောက်ပြီး အကျိုးရလဒ်ကို ကိုယ်တော့်လက်ထဲမှာ အပ်ထားခြင်းအားဖြင့်ဖြစ်ပါတယ်” ဟု ညီအစ်ကို လစ်ဗာရိန်စ်က ရှင်းလင်းပြသည်။ မာလခိ ၃:၁၀ တွင် တွေ့ရသကဲ့သို့ ‘ငါ့ကို စုံစမ်းကြလော့’ ဟု မိမိ၏လူမျိုးတော်ကို ယေဟောဝါဖိတ်ခေါ်ထားသည်။ သူတို့၏ဆယ်ဖို့တစ်ဖို့ကို ဗိမာန်တော်ဘဏ္ဍာတိုက်ထဲသို့ သစ္စာရှိစွာဖြင့် ယူဆောင်လာပါက သူတို့ကို ကိုယ်တော်ကောင်းချီးပေးမည်ဟု ကတိပြုထားသည်။ “သင်တို့ရဲ့သာသနာပြုခန့်အပ်ချက်ကို ဒီနည်းအတိုင်းပဲ ရှုမြင်ကြပါ။ အဲဒီနေရာမှာ ယေဟောဝါက သင်တို့ကိုအောင်မြင်စေလိုတယ်။ ဒါကြောင့် ကိုယ်တော့်ကို အစုံအစမ်းပြုကြပါ။ အသင်တို့ရဲ့ခန့်အပ်ချက်မှာ စွဲမြဲနေကြပါ။ ကိုယ်တော်ပြုစေလိုတဲ့ ပြုပြင်ပြောင်းလဲမှုကို ပြုကြပါ။ ခံနိုင်ရည်ရှိကြပါ။ သင်တို့ကို ကိုယ်တော်ကောင်းချီးပေးမပေး ကြည့်ရှုကြပါ” ဟု ဟောပြောသူက အားပေးတိုက်တွန်းသွားခဲ့သည်။ ယေဟောဝါကို ဝတ်ပြုကိုးကွယ်နေကြသူများအတွက် အဘယ်မျှကောင်းသည့် အကြံပြုချက်ပါတကား!

သီချင်းတစ်ပုဒ် သီဆိုပြီးနောက် အစီအစဉ်သည် ဟောပြောချက်များမှနေ၍ နှစ်သက်ဖွယ်ကောင်းသော ဆက်တိုက်လူတွေ့မေးမြန်းခြင်းများသို့ ပြောင်းသွားလေသည်။

လယ်ကွင်းမှ လက်တွေ့ကျသော ထုတ်ဖော်ချက်များ

ဂိလဒ်ကျောင်း ဆရာများအဝင်အသစ်ဖြစ်သော မာ့ခ် နူမားက ကျောင်းသားများကို ဖိတ်ခေါ်၍ သင်တန်းကျောင်းတက်စဉ်ကာလက လယ်ကွင်းဓမ္မအမှု၌ သူတို့တွေ့ ကြုံခဲ့သော တွေ့ ကြုံမှုများကို ဖော်ပြစေသည်။ ၎င်းက ဓမ္မအမှုတွင် အဦးလုပ်ဆောင်ခြင်း၏တန်ဖိုးကို အလေးပေးဖော်ပြပြီး ပရိသတ်များအား သူတို့အသုံးပြုနိုင်သည့် လက်တွေ့ကျအကြံဉာဏ်များကို ပေးပါသည်။

သင်တန်းကျောင်းတက်စဉ်ကာလအတွင်း ဤဂိလဒ်အတန်းမှ ကျောင်းသားများသည် အထူးလေ့ကျင့်မှုအတွက် ပက်တာစင်ပညာပေးဌာန၌ ရောက်ရှိနေကြသော ၄၂ နိုင်ငံမှ ဌာနခွဲကော်မတီဝင်များနှင့် ပေါင်းသင်းနိုင်ခဲ့ခြင်းအားဖြင့် အထူးပင်အကျိုးဖြစ်ထွန်းခဲ့သည်။ သူတို့ထဲမှ များစွာသောသူတို့သည် လွန်ခဲ့သောနှစ်များက ဂိလဒ်ကျောင်းမှ ဘွဲ့ရရှိခဲ့ပြီးသူများဖြစ်သည်။ အစီအစဉ်၌ ၃ ကြိမ်မြောက်၊ ၅ ကြိမ်မြောက်၊ ၅၁ ကြိမ်မြောက်နှင့် ၉၂ ကြိမ်မြောက်အတန်းများအပြင် ဂျာမနီတွင်ရှိသော တိုးချဲ့ဂိလဒ်သင်တန်းကျောင်းမှ ကိုယ်စားလှယ်တော်များနှင့်လည်း လူတွေ့မေးမြန်းခြင်းများ ပြုလုပ်ပေးလေသည်။ သူတို့၏မှတ်ချက်များသည် မည်မျှအကျိုးပြုလိုက်မည်ဖြစ်ခြင်း!

သူတို့ခန့်အပ်ခံရသောဒေသ၌ ယေဟောဝါကိုချီးမွမ်းသူများ၏အရေအတွက်သည် လက်တစ်ဆုပ်စာလေးမှ ထောင်ပေါင်းများစွာအထိ တိုးပွားလာခြင်းကိုတွေ့ မြင်ရသောအခါ သာသနာပြုများ မည်သို့ခံစားရကြောင်း သူတို့ပြောပြကြသည်။ အဲတီတောင်များတွင်ရှိသော ပြန့်ကျဲနေသည့်လူနေအိမ်များနှင့် အာမဇုန်မြစ်ဖျားမှ ရွာများသို့ သတင်းကောင်းသယ်ဆောင်သွားခြင်း၌ ပါဝင်ခဲ့ရသည့်အကြောင်းများကို သူတို့ပြောပြကြသည်။ စာမတတ်သူများကို သက်သေခံရကြောင်း သူတို့ဆွေးနွေးကြသည်။ ဘာသာစကားအသစ်များကို သင်ယူရန်အတွက် မိမိတို့ဘာသာကြိုးစားရခြင်းအကြောင်းနှင့် တရုတ်ကဲ့သို့သော ဘာသာစကားတစ်ခုဖြင့် မည်မျှကြာသောအချိန်ကျမှ သူတို့သက်သေခံနိုင်မည်၊ ဟောပြောချက်ပေးနိုင်မည်နှင့်စပ်လျဉ်း၍ ကျောင်းဆင်းများ အမှန်တကယ်မျှော်လင့်နိုင်သည့်အရာများအကြောင်းကို သူတို့ပြောပြသည်။ စပိန်နှင် တရုတ်ဘာသာစကားဖြင့် ရိုးရှင်းသောတင်ဆက်ပုံကိုပင် သူတို့သရုပ်ပြသွားခဲ့သည်။ သာသနာပြုများသည် ထိုလူမျိုး၏ဘာသာစကားကိုသာမကဘဲ သူတို့၏ယူဆချက်များကိုပါ သိရှိသောအခါ အကျိုးမှာ ပိုကြီးမားကြောင်း သူတို့အလေးအနက်ဖော်ပြကြသည်။ ဆင်းရဲသောနိုင်ငံများတွင်ရှိသော အမြဲပင် ကြမ်းတမ်းသည့်အသက်ရှင်နေထိုင်မှုအခြေအနေများအကြောင်းကို ပြောပြပြီး “ဒီအခြေအနေဟာ ခေါင်းပုံဖြတ်ခံရမှုကြောင့်ဖြစ်လေ့ရှိတယ်ဆိုတာ သာသနာပြုတွေ အသိအမှတ်ပြုသင့်တယ်။ သိုးထိန်းမရှိတဲ့ သိုးလိုလူများကို သနားခဲ့တဲ့ ယေရှုလိုပဲ သူတို့ခံစားရမယ်ဆိုရင် သာသနာပြုတစ်ဦးဟာ အကောင်းဆုံးပြုရာကျပေလိမ့်မယ်” ဟု ပြောပြကြသည်။

သီချင်းတစ်ပုဒ် သီဆိုပြီးနောက် အုပ်ချုပ်ရေးအဖွဲ့ဝင်တစ်ဦးဖြစ်သော အေ. ဒီ. ရှရိုးဒါ၏ဟောပြောချက်ဖြင့် အစီအစဉ်ကိုဆက်သည်။ သူသည် ၁၉၄၃ ခုနှစ်၌ ဂိလဒ်ကျောင်းကို ဖွင့်လစ်ခဲ့ချိန်က ၎င်းကျောင်း၏မူလဆရာများအဝင်တစ်ယောက်ဖြစ်ခွင့်ရရှိခဲ့သည်။ အစီအစဉ်၏လျော်ညီလှသော နိဂုံးတစ်ခုအဖြစ် သူက “ပိုင်သအုပ်စိုးရှင်အဖြစ် ယေဟောဝါအား ချီးမွမ်းကြလော့” ဟူသည့်အကြောင်းကို ဆွေးနွေးသွားခဲ့သည်။ ညီအစ်ကို ရှရိုးဒါ၏ ၂၄ ခန်းမြောက် ဆာလံကျမ်းကို ဆွဲ၍ဆွေးနွေးသွားခြင်းက ယေဟောဝါအား ပိုင်သအုပ်စိုးရှင်အဖြစ် ချီးမွမ်းခြင်းသည် မည်မျှကြီးကျယ်မြင့်မြတ်လှသည့်အခွင့်အရေးတစ်ရပ်ဖြစ်ကြောင်း ပရိသတ်အားလုံး၏စိတ်ထဲတွင် စွဲမှတ်သွားစေခဲ့သည်။

ဒီပလိုမာဘွဲ့များပေးအပ်ခြင်းနှင့် နိဂုံးချုပ်သီချင်း သီဆိုခြင်းပြီးနောက် အုပ်ချုပ်ရေးအဖွဲ့ဝင် ကားလ် ကလိန်းက လှိုက်လှဲနွေးထွေးသော ဆုတောင်းချက်ဖြင့် နိဂုံးချုပ်လိုက်သည်။ လက်တွေ့ကျ၍ ဝိညာဏလန်းဆန်းမှုရှိစေလှသော အစီအစဉ်ပါတကား!

ကျောင်းဆင်းပွဲပြီး၍ နောက်နေ့ရက်များတွင် အကြိမ် ၁၀၀ မြောက်သင်တန်းမှ ၄၈ ယောက်သောအဖွဲ့ဝင်တို့သည် ၁၇ နိုင်ငံသော သာသနာပြုခန့်အပ်ရာနေရာများသို့ စတင်ထွက်ခွာသွားကြသည်။ သို့သော် သူတို့၏ဓမ္မအမှုကို ယခုမှ သူတို့စတင်လိုက်ကြခြင်းမဟုတ်ပါ။ သူတို့၌ အချိန်ပြည့်ခရစ်ယာန်ဓမ္မအမှု၏မှတ်တမ်းမှတ်ရာများဖြင့် ပြည့်နေနှင့်ပြီးသားဖြစ်သည်။ ဂိလဒ်၌ သူတို့နာမည်စာရင်းပေးသွင်းခဲ့စဉ်က သူတို့သည် ပျမ်းမျှအားဖြင့် အသက် ၃၃ နှစ်နှင့် အချိန်ပြည့်ဓမ္မအမှု၌ ၁၂ နှစ်ကျော် အပ်နှံထမ်းဆောင်ခဲ့ပြီးဖြစ်သည်။ သူတို့ထဲမှ အချို့တို့သည် ကင်းမျှော်စင်အသင်း၏ ကမ္ဘာချီဗေသလမိသားစုဝင်များဖြစ်ကြသည်။ အခြားသူများမူ နယ်လှည့်ကြီးကြပ်မှူးများအဖြစ် ထမ်းဆောင်ခဲ့ကြသည်။ ကျောင်းသားအတော်များများမှာ အချို့သော နိုင်ငံခြားလုပ်ငန်းပုံစံများဖြင့်—အာဖရိက၊ ဥရောပ၊ တောင်အမေရိက၊ ပင်လယ်၌ရှိသော ကျွန်းများနှင့် သူတို့၏အမိနိုင်ငံရှိ နိုင်ငံခြားဘာသာစကားပြောအုပ်စုများအကြားတွင်—အမှုထမ်းခဲ့နှင့်ပြီးဖြစ်သည်။ သို့သော် ယခုသူတို့သည် ‘ကျွန်တော်တို့လိုအပ်မယ့် ကမ္ဘာ့ဒေသအဘယ်အရပ်မှာမဆို အမှုထမ်းပါ့မယ်’ ဟု ပြောဆိုနိုင်ကြခြင်းကို နှစ်သက်လှသော အခြားသာသနာပြု များစွာတို့နှင့် ပူးပေါင်းကြမည်ဖြစ်သည်။ သူတို့၏တလိုတလားရှိသော အလိုဆန္ဒသည် ယေဟောဝါအား ဂုဏ်တင်ရာ၌ သူတို့၏ဘဝအသက်တာကို အသုံးပြုရန်ဖြစ်လေပေသည်။

[စာမျက်နှာ ၂၇ ပါ လေးထောင့်ကွက်]

သင်တန်းဆိုင်ရာအချက်အလက်များ–

ကိုယ်စားပြု နိုင်ငံအရေအတွက်–၈

တာဝန်ပေးအပ်ခံရသည့် နိုင်ငံအရေအတွက်–၁၇

ကျောင်းသား/သူအရေအတွက်–၄၈

ပျမ်းမျှအသက်–၃၃.၇၅

ပျမ်းမျှသမ္မာတရားတွင်းသက်တမ်း–၁၇.၃၁

ပျမ်းမျှအချိန်ပြည့် ဓမ္မအမှုဆောင်သက်တမ်း–၁၂.၀၆

ဂိလဒ်ကင်းမျှော်စင်သမ္မာကျမ်းစာကျောင်း၏ အကြိမ် ၁၀၀ မြောက်သင်တန်း

အောက်ပါစာရင်းတွင် အတန်းများကို ရှေ့တန်းမှနောက်တန်းသို့ရေတွက်ပြီး အမည်များကို လက်ဝဲမှလက်ယာဘက်သို့ စီထားသည်။

(1) Shirley, M. [Maribel] [Pron: märēbelʹ] [female]; Grundström, M. [Marie] [Pron: mȧrēʹ] [female]; Genardini, D. [Debra] [Pron: debʹrä] [female]; Giaimo, J. [Julie] [Pron: jüʹlē] [female]; Shood, W. [Wendy] [Pron: wenʹdē] [female]; Phair, P. [Penny] [Pron: penʹē] [female]; Buchanan, C. [Carol] [Pron: karʹəl] [female]; Robinson, D. [Darbi] [Pron: därʹbē] [female] (2) Pine, C. [Chris] [Pron: kris] [female]; Kraus, B. [Birgit] [Pron: bērʹgit] [female]; Racicot, T. [Terri] [Pron: terʹē] [female]; Hansen, A. [Aurelia] [Pron: au̇relʹyä] [female]; Beets, T. [Tannis] [Pron: tanʹis] [female]; Berg, J. [Jessica] [Pron: jesʹikə] [female]; Garcia, N. [Nidia] [Pron: nēdʹyä] [female]; Fleming, K. [Karen] [Pron: karʹən] [female] (3) Whinery [Pron: winʹərē], L. [Lewis] [male]; Whinery, L. [Lisa] [Pron: lēʹsə] [female]; Harps, C. [Connie] [Pron: känʹē] [female]; Giaimo [Pron: jīʹmō], C. [Carmelo] [Pron: kärmālʹō] [male]; Berg, T. [Thomas] [male]; Mann, C. [Carol] [Pron: karʹəl] [female]; Berrios [Pron: berʹēəs], V. [Valerie] [Pron: valʹərē] [female]; Pfeifer, C. [Caroline] [Pron: kärōlēnʹ] [female] (4) Randall [Pron: ranʹdəl], L. [Laurence] [Pron: lȯrʹəns] [female]; Genardini [Pron: jānärdēʹnē], S. [Stephen] [male]; Kraus [Pron: krau̇s], H. [Heinz] [Pron: hīnts] [male]; Fleming, R. [Robert] [Pron: räbʹərt] [male]; D’Abadie, S. [Suzon] [Pron: suezȯnʹ] [female]; Shirley, T. [Timothy] [male]; Stevenson, G. [Gloria] [Pron: glōrʹēə] [female]; Buchanan, B. [Bob] [Pron: bäb] [male] (5) Robinson, T. [Thomas] [male]; Garcia [Pron: gärsēʹä], J. [Javier] [Pron: kävyerʹ] [male]; Harps [Pron: härpʹs], P. [Philip] [male]; Racicot [Pron: rȧsʹicȯt], D. [Del] [Pron: del] [male]; D’Abadie [Pron: däbädēʹ], F. [Fred] [Pron: fred] [male]; Phair [Pron: faər], M. [Marvin] [Pron: märʹvən] [male]; Stevenson, G. [Gregory] [male]; Shood [Pron: shädʹ], D. [Daniel] [male] (6) Beets [Pron: bēts], L. [Larry] [Pron: larʹē] [male]; Pfeifer [Pron: pfīʹfər], A. [Andreas] [Pron: ändrāʹäs] [male]; Berrios [Pron: berʹyos], M. [Milton] [male]; Pine [Pron: pīn], J. [Javan] [Pron: jāʹvən] [male]; Mann, L. [Lewis] [male]; Randall, P. [Patrick] [male]; Grundström [Pron: gru̇ndʹstrœm], J. [Jari] [Pron: yäʹrē] [male]; Hansen [Pron: hänʹsən], G. [Gordon] [male]