ဘုရားသခင့်နိုင်ငံတော် ကြွေးကြော်သူများ မှတ်တမ်း

ကျောင်းတွင် မားမားမတ်မတ်ရပ်တည်ခြင်းက အကျိုးဖြစ်ထွန်း

သမ္မာကျမ်းစာက ဤသို့ကြိုတင်ဟောထားသည်– “သင်၏သားသမီးအပေါင်းတို့သည် ယေဟောဝါ၏သွန်သင်တော်မူခြင်းခံရသူများဖြစ်၍ များစွာသောစည်းစိမ်ချမ်းသာနှင့် ပြည့်စုံကြလိမ့်မည်။” (ဟေရှာ ၅၄:၁၃၊ ကဘ) “သင်၏သားသမီးအပေါင်းတို့” ဟူသောစကားကို အကျယ်တဝင့်အားဖြင့် အလွန်ငယ်ရွယ်သူများပါအပါအဝင် မြေကြီးပေါ်ရှိ ဘုရားသခင်၏ကျေးကျွန်အပေါင်းနှင့် သက်ဆိုင်စေနိုင်ပါသည်။ ယနေ့ခရစ်ယာန်မိဘများသည် အိမ်တွင်လည်းကောင်း၊ ခရစ်ယာန်အစည်းအဝေးများတွင်လည်းကောင်း မိမိတို့၏သားသမီးများ “ယေဟောဝါ၏သွန်သင်တော်မူခြင်းခံရ” ရန်ကြပ်မတ်ပေးကြသည်။

သို့ရာတွင် ငယ်ရွယ်သောခရစ်ယာန်များသည် ကျောင်းနေကြစဉ် ခဲယဉ်းသောစိန်ခေါ်မှုများကို ရင်ဆိုင်ကြရ၏။ များသောအားဖြင့် သူတို့သည် သမ္မာကျမ်းစာမှ တတ်သိထားရာတို့ကိုအခြေခံပြီး မားမားမတ်မတ်ရပ်တည်ရန်လိုကြောင်း တွေ့ ရှိခဲ့ကြပြီ။ ဤသို့ပြုကြသည့်အခါ ကျောင်းသားများကော ဆရာများအတွက်ပါ အကျိုးရှိကြောင်း မိုက်ခရိုနီးရှားမှ အောက်ပါတွေ့ကြုံမှုက တင်ပြပါသည်။

ပစိဖိတ်ပင်လယ်အနောက်ပိုင်း၊ ချွတ်ခ်ကျွန်းစုရှိ တိုးလ်ကျွန်းငယ်ကလေးပေါ်တွင် ဒေသခံကျောင်းမှ ဆရာဆရာမများသည် ကျောင်းဟယ်လိုဝီးန်ပွဲအတွက် အသင့်ပြင်ဆင်ပြီး ပါဝင်ကြရမည်ဟု ကလေးအားလုံးကို မှာကြားခဲ့သည်။ ထိုပွဲခံရာတွင် နတ်ဝိဇ္ဇာထုံးတမ်းများနှင့်သက်ဆိုင်သော သရဲတစ္ဆေ၊ မကောင်းဆိုးဝါးများနှင့် စုန်းကဝေများပုံစံဖော်သည့် အပြင်အဆင်နှင့် အဝတ်အစားများ ပါဝင်ပတ်သက်လိမ့်မည်ကို သက်သေခံတပည့်များက သိရှိထားကြသည်။ ယင်းပွဲ၌ ဤကလေးများသည် . . . စိတ်ကြည်လင်စွာ ပါဝင်နိုင်ကြမည်မဟုတ်ပါ။a

ဤကဲ့သို့သောအကျင့်များကို အပျော်အပါးအတွက်သာပြုဦးတော့ ဘုရားသခင်နှစ်သက်တော်မူမည်မဟုတ်ကြောင်း အိမ်၌လည်းကောင်း၊ ခရစ်ယာန်အသင်းတော်၌လည်းကောင်း သူတို့ရရှိခဲ့သော ကျမ်းစာအခြေခံလေ့ကျင့်မှုမှ သိရှိနားလည်ထားကြသည်။ ကလေးများသည် မိမိတို့၏ရပ်တည်မှုကို ဆရာဆရာမများအား ပိုမိုရှင်းလင်းပြတ်သားစွာ ရှင်းပြပေးရန် ကျွန်းပေါ်ရှိ သက်သေခံသာသနာပြုများအနက် တစ်ဦးဖြစ်သူ ဗာရက်၏အကူအညီကိုတောင်းဆိုခဲ့ကြသည်။

ရှင်းလင်းချက်ကို ကြားနာကြပြီးနောက် ကျောင်းအမှုထမ်းအားလုံးရှေ့ ဗာရက်စကားပြောဆိုနိုင်ရန် ဆရာဆရာမများက ဒုတိယအစည်းအဝေးတစ်ခုကို စီစဉ်လေသည်။ ဗာရက်သည် ဤအစည်းအဝေးတွင် ဟယ်လိုဝီးန်ပွဲ၏ သဘောသကာယမှန်ကိုတင်ပြရန် အချက်အလက်များစွာကို တင်ဆက်ခဲ့သည်။ ထိုအချက်အလက်များကို ကင်းမျှော်စင်စာပေအသီးသီးနှင့် အခြားစာပေများမှ သူထုတ်နုတ်ထားပါသည်။ ၎င်းပွဲ၏ ဇာစ်မြစ်၊ ယင်း၏သမိုင်းနှင့် ဘာသာရေးသဘောသကာယအကြောင်းကို ဆရာဆရာမများနှင့် စီမံခန့်ခွဲသူများ ကြားသိကြရသော် အလွန်အံ့သြကြသည်။ အခြေအနေကို မည်သို့ဆုံးဖြတ်စီရင်မည်အကြောင်း ဆွေးနွေးဖို့ရန် အမှုထမ်းများအစည်းအဝေးတစ်ခုကျင်းပရန် ရွေးချယ်လေသည်။

ရက်အနည်းငယ်အကြာတွင် မထင်မမှတ်သောဆုံးဖြတ်ချက်တစ်ခုကို ကြေညာလေသည်။ ဟယ်လိုဝီးန်ပွဲကျင်းပရန်အစီအစဉ်အားလုံးကို ဖျက်သိမ်းနေပါသည်။ ထိုနှစ်တွင် ကျောင်း၌ဟယ်လိုဝီးန်ပွဲကျင်းပကြတော့မည်မဟုတ်ပါ။ ကျောင်းတွင်ဟုတ်မှန်ရာကိုပြုလုပ်ဖို့ ဤငယ်ရွယ်သူ သက်သေခံများ၏သန္နိဋ္ဌာန်မှ နှစ်လိုဖွယ်ရလဒ်ဖြစ်ပေါ်လာပါသည်တကား! ငယ်ရွယ်သူများသည် ကျမ်းစာသမ္မာတရားဘက် မားမားမတ်မတ်ရပ်တည်ရန် ဘယ်သောအခါမျှ ကြောက်ရွံ့စရာ၊ သို့မဟုတ် ရှက်စရာမလိုပါ။

တစ်ကမ္ဘာလုံးတွင်ရှိ ယေဟောဝါသက်သေများသည် မိမိတို့၏သားသမီးများကို ကျောင်း၌ဝီရိယရှိရှိကြိုးစားကြရန် သွန်သင်ပေးနေပါသည်။ သမ္မာကျမ်းစာမူများနှင့်အညီ အသက်ရှင်နေထိုင်ရန်နှင့် အခွင့်အရေးရတိုင်း အခြားကျောင်းသူကျောင်းသားများအား မိမိတို့၏ မျှော်လင့်ချက်ကိုလည်းကောင်း၊ ယုံကြည်ချက်ကိုလည်းကောင်း တင်ပြပြောဆိုရန်လည်း ငယ်ရွယ်သူသက်သေခံများအား လေ့ကျင့်ပေးပါသည်။ ဖြစ်ပေါ်လာသောရလဒ်တို့သည် ဤအဖြစ်အပျက်၌ကဲ့သို့ အခွင့်မသာ၊ သို့မဟုတ် ချက်ချင်းမပေါ်လာသည့်တိုင် လူငယ်များသည် မှန်ကန်ရာကို လုပ်ကိုင်ခြင်းမှ ယုံကြည်စိတ်ချမှုနှင့် ကျေနပ်မှုရရှိနိုင်ပါသည်။ ထိုထက်မက သူတို့၏ကောင်းကင်ခမည်းတော်သည် သူတို့၏သစ္စာရှိနာခံမှုကို နှစ်သက်တော်မူ၍ ကောင်းချီးပေးတော်မူမည်ဖြစ်ကြောင်း ယုံကြည်စိတ်ချနိုင်ကြပါသည်။

[အောက်ခြေမှတ်ချက်များ]