ဟယ်လိုဝိန်းပွဲ ဘယ်လို အစပြုခဲ့သလဲ

ကျမ်းစာအဆို

နှစ်စဉ် အောက်တိုဘာ ၃၁ ရက်မှာ လူအများက ဟယ်လိုဝိန်းပွဲကို ကျင်းပကြတယ်။ အဲဒီနေ့အကြောင်း သမ္မာကျမ်းစာမှာ မဖော်ပြထားပါဘူး။ ဟယ်လိုဝိန်းပွဲရဲ့ မူလအစနဲ့ ဓလေ့ထုံးတမ်းတွေဟာ ကျမ်းစာသွန်သင်ချက်နဲ့ မကိုက်ညီဘူး။

ဒီဆောင်းပါးမှာ

• ဟယ်လိုဝိန်းပွဲရဲ့သမိုင်းနဲ့ ထုံးတမ်းစဉ်လာများ

• ဟယ်လိုဝိန်းပွဲ ဆင်းသက်လာပုံ ဇာစ်မြစ်က အရေးကြီးသလား

• ဘာကြောင့် ဟယ်လိုဝိန်းလို့ ခေါ်တာလဲ

ဟယ်လိုဝိန်းပွဲရဲ့သမိုင်းနဲ့ ထုံးတမ်းစဉ်လာများ

• ဆန်းဟိန်ပွဲ။ “ဟယ်လိုဝိန်းရဲ့ မူလအစဟာ လွန်ခဲ့တဲ့ နှစ်ပေါင်း ၂,၀၀၀ ကျော်၊ ကက်လူမျိုးတွေ ကျင်းပခဲ့တဲ့ ရှေးအယူမှားပွဲကနေ အရင်းခံတယ်” လို့ ကမ္ဘာ့စွယ်စုံကျမ်း မှာ ဖော်ပြတယ်။ “ဆန်းဟိန်ပွဲအတွင်း လူသေတွေဟာ အသက်ရှင်နေသူတွေကြားထဲမှာ လျှောက်သွားနိုင်တယ်လို့ ကက်လူမျိုးတွေ ယုံကြည်ကြတယ်။ အသက်ရှင်နေသူတွေလည်း လူသေတွေနဲ့အတူ လည်ပတ်နိုင်ကြတယ်။”—“ဘာကြောင့် ဟယ်လိုဝိန်းလို့ ခေါ်တာလဲ” ကိုကြည့်ပါ။

• ဟယ်လိုဝိန်း ဝတ်စုံ၊ သကြားလုံး၊ ‘အချိုကျွေးမလား၊ ခြောက်ရမလား’။ တချို့ ကက်လူမျိုးတွေက မကောင်းဆိုးဝါးပုံစံ မျက်နှာဖုံးတွေ တပ်ကြတယ်၊ နတ်ဆိုးတွေက အဲဒီလိုဝတ်ထားတဲ့သူတွေကို “ဝိညာဉ်တွေလို့ အထင်မှား” ပြီး ဘာအန္တရာယ်မှ မပြုစေဖို့ဖြစ်တယ်လို့ စာအုပ်တစ်အုပ်က ဆိုတယ်။ တချို့ကျတော့ ဝိညာဉ်တွေ စိတ်မဆိုးအောင်၊ အန္တရာယ်မပေးအောင် ချိုတဲ့အစားအစာတွေ ပေးကြတယ်။a

  

  ဥရောပအလယ်ခေတ် (အေဒီ ၅၀၀ ကနေ ၁၅၀၀) မှာ ကက်သလစ်ဘုန်းကြီးတွေက သူတို့ဝန်းကျင်က အယူမှားထုံးစံတွေကို စလုပ်လာကြတယ်။ သူတို့ရဲ့ အသင်းသားတွေကို ဝတ်စုံတွေဝတ်ပြီး တစ်အိမ်ပြီးတစ်အိမ် သွားခိုင်းတယ်၊ လက်ဆောင်လေးတွေ တောင်းခိုင်းတယ်။

• တစ္ဆေ၊ သွေးစုပ်ဖုတ်ကောင်၊ ဝံပုလွေလူသား၊ စုန်း၊ ဇွန်ဘီ။ အဲဒါတွေဟာ နတ်ဆိုးလောကနဲ့ ဆက်နွယ်နေတာ ကြာပါပြီ။ အဲဒါတွေကို “သဘာဝလွန် သတ္တဝါကြီးတွေ” လို့ခေါ်ပြီး “သေခြင်း၊ လူသေ၊ သေရမှာ ကြောက်ရွံ့ခြင်းနဲ့ အတော့်ကို ဆက်စပ်နေတယ်” လို့ စာအုပ်တစ်အုပ် (Halloween Trivia) က ဖော်ပြထားတယ်။

• ဟယ်လိုဝိန်း ဖရုံသီး။ ဗြိတိန် အလယ်ခေတ်မှာ လူတွေဟာ “တစ်အိမ်မှတစ်အိမ်သွားကြပြီး အစားအစာပေးရင် လူသေတွေအတွက် ဆုတောင်းပေးမယ်လို့ ပြောကြတယ်၊” သူတို့မှာ “ထွင်းထားတဲ့ မုန်လာဥမီးအိမ်တွေ” ပါလာကြတယ်၊ “မီးအိမ်ထဲက ဖယောင်းတိုင်က ငရဲကလေးမှာ ပိတ်မိနေတဲ့ဝိညာဉ်ကို” ဆိုလိုတယ်လို့ စာအုပ်တစ်အုပ် (Halloween—From Pagan Ritual to Party Night) က ဆိုတယ်။ နတ်ဆိုးဝိညာဉ်တွေ မလာအောင် မီးအိမ်တွေကို သုံးကြတယ်လို့ သမိုင်းပညာရှင်တချို့ ပြောကြတယ်။ အေဒီ ၁၈၀၀ နောက်ပိုင်းမှာ မြောက်အမေရိကဒေသမှာ နေထိုင်သူတွေက မုန်လာဥတွေကို ဖရုံသီးတွေနဲ့ အစားထိုးလိုက်ကြတယ်။ ဖရုံသီးပေါများပြီး ထွင်းဖောက်၊ ပုံဖော်ရတာ လွယ်ကူလို့ပါ။

ဟယ်လိုဝိန်းပွဲ ဆင်းသက်လာပုံ ဇာစ်မြစ်က အရေးကြီးသလား

အရေးကြီးပါတယ်။ တချို့သူတွေက ဟယ်လိုဝိန်းပွဲဟာ အပျော်သက်သက်ပါ၊ ဘယ်သူ့ကိုမှ မထိခိုက်ဘူးလို့ ယူဆကြတယ်။ ဒါပေမဲ့ ပွဲမှာ လုပ်နေတာတွေက ကျမ်းစာသွန်သင်ချက်နဲ့ ဆန့်ကျင်နေတယ်။ ဟယ်လိုဝိန်းပွဲဟာ လူသေတွေ၊ ဝိညာဉ်တွေ၊ နတ်ဆိုးတွေနဲ့ပတ်သက်တဲ့ အယူအဆမှားတွေအပေါ် အခြေခံတယ်။

ဟယ်လိုဝိန်းပွဲနဲ့ပတ်သက်တဲ့ အယူအဆတွေကို ဘုရား ဘယ်လိုရှုမြင်သလဲဆိုတာ အောက်ပါကျမ်းချက်တွေမှာ သတိပြုကြည့်ပါ-

• “သင်တို့တွင် . . . နတ်ဆိုးနှင့်ပေါင်းသောသူ၊ ဝိဇ္ဇာအတတ်ကိုပြုစုသောသူ၊ လူသေကိုမေးမြန်းသောသူ တစ်စုံတစ်ယောက်မျှမရှိရ။”—တရားဟောရာ ၁၈:၁၀-၁၂၊ ယုဒသန်ကျမ်း။

  အဓိပ္ပာယ်။ လူသေနဲ့ ဆက်သွယ်ဖို့ ကြိုးပမ်းတာ ဒါမှမဟုတ် လူသေနဲ့ ဆက်သွယ်သယောင် ကြိုးစားတာကို ဘုရား မကြိုက်ဘူး။

• “သေလွန်သူကတော့ ဘာမှမသိဘူး။”—ဒေသနာ ၉:၅။

  အဓိပ္ပာယ်။ လူသေတွေက ဘာမှမသိကြလို့ အသက်ရှင်နေသူတွေနဲ့ မဆက်သွယ်နိုင်ဘူး။

• “သင်တို့သည် နတ်ဆိုးတို့နှင့် ဆက်ဆံစေခြင်းငှါ ငါအလိုမရှိ။ သခင်ဘုရား၏ခွက်ဖလား၊ နတ်ဆိုးတို့၏ခွက်ဖလားနှစ်ပါးကို သင်တို့ မသောက်နိုင်ကြ။”—၁ ကောရိန္သု ၁၀:၂၀၊ ၂၁၊ ယုဒသန်ကျမ်း။

  အဓိပ္ပာယ်။ ဘုရားရဲ့မျက်နှာသာရချင်သူတွေက နတ်ဆိုးတွေနဲ့ မပတ်သက်သင့်ဘူး။

• “မာရ်နတ်ရဲ့ ဉာဏ်နီဉာဏ်နက်များတဲ့ လုပ်ရပ်တွေကို ခုခံပြီး အခိုင်အမာရပ်တည် ... ကြပါ။ ဘာလို့လဲဆိုတော့ ကျွန်တော်တို့ဟာ ... နတ်ဆိုးများစွာနဲ့ တိုက်ခိုက်နေရတာပါ။”—ဧဖက် ၆:၁၁၊ ၁၂။

  အဓိပ္ပာယ်။ နတ်ဆိုးတွေကို တိုက်ထုတ်သင့်တဲ့ ခရစ်ယာန်တွေဟာ နတ်ဆိုးတွေနဲ့ ပွဲခံနေသလို မလုပ်သင့်ဘူး။