ဟယ်လိုဝိန်း ဒီပွဲအကြောင်း သင်ဘာသိထားသလဲ

သင်ဟာ ဝိညာဉ်လောကကို ယုံချင်မှယုံပါလိမ့်မယ်။ ဟယ်လိုဝိန်းပွဲနဲ့ အလားတူပွဲတွေဟာ ပျော်စရာသက်သက်ပါ၊ ကလေးတွေ စိတ်ကူးစိတ်သန်း ဆန်းသစ်စေတယ် ဆိုပြီး ရှုမြင်မိနိုင်တယ်။ ဒါပေမဲ့ လူအတော်များများကတော့ အကြောင်းရင်းတချို့ကြောင့် ဒီလိုမျိုးပွဲတွေမှာပါဝင်ခြင်းဟာ အကျိုးယုတ်စေတယ်လို့ ရှုမြင်ကြတယ်။ အဲဒီအကြောင်းရင်းတွေကတော့-

1. ၁။ စွယ်စုံကျမ်းတစ်ခု (Encyclopedia of American Folklore) မှာ ဒီလိုပြောထားတယ်– “ဟယ်လိုဝိန်းပွဲဟာ ဝိညာဉ်လောကနဲ့ အဆက်အသွယ်လုပ်ခြင်းဖြစ်တဲ့အတွက် အခြောက်ခံရတာ၊ ထိတ်လန့်စရာတွေ ကြုံရနိုင်ချေရှိတယ်။” (“ဟယ်လိုဝိန်းပွဲ ဖြစ်တည်လာပုံ” လေးထောင့်ကွက်ကိုကြည့်ပါ) ဟယ်လိုဝိန်းပွဲလို ပွဲနေ့များစွာဟာ အယူမှားမှုတွေကနေ မြစ်ဖျားခံပြီး ဘိုးဘေးကိုးကွယ်မှုနဲ့ ဆက်စပ်နေတယ်။ ဒီနေ့ခေတ်မှာတောင် ကမ္ဘာတစ်ဝန်းကလူတွေဟာ အဲဒီပွဲနေ့တွေမှာ လူသေတွေရဲ့ဝိညာဉ်တွေနဲ့ အဆက်အသွယ်လုပ်ကြတယ်။

2. ၂။ ဟယ်လိုဝိန်းပွဲကို အမေရိကန်တွေရဲ့ပွဲလို့ ရှုမြင်ကြပေမဲ့လည်း နိုင်ငံများစွာမှာ အဲဒီပွဲကို တစ်စတစ်စကျင်းပလာကြပါပြီ။ ဟယ်လိုဝိန်းပွဲထုံးစံတွေ၊ အဆင်အယင်တွေနဲ့ အထိမ်းအမှတ်တွေဟာ အယူမှားမှုကနေ မြစ်ဖျားခံတယ်၊ အများစုက ဝိညာဉ်လောကနဲ့ ဆက်စပ်မှုရှိတယ်ဆိုတာကို ပွဲမှာ စပြီးပါဝင်လာကြသူများစွာဟာ မသိကြဘူး။—“ဒါတွေ ဘယ်ကနေ မြစ်ဖျားခံသလဲ” လေးထောင့်ကွက်ကိုကြည့်ပါ။

3. ၃။ ရှေးခေတ် ကက်လူမျိုးတွေ (Celtic) ရဲ့ ထုံးစံကို လိုက်ကြတဲ့ စုန်းအတတ်လိုက်စားသူ ထောင်နဲ့ချီတဲ့သူတွေဟာ ဟယ်လိုဝိန်းပွဲကို ရှေးခေတ်အခေါ် ဆန်းဟိန်ပွဲတော်လို့ ခေါ်ဆိုနေဆဲဖြစ်ပြီး အဲဒီညကို တစ်နှစ်တာအတွင်း အထူးမြတ်ဆုံးညအဖြစ် သတ်မှတ်ကြတယ်။ “ဒါကို ခရစ်ယာန်တွေ မသိကြဘူး၊ ကျွန်တော်တို့လိုပဲ ဒီပွဲကို ကျင်းပနေကြတယ်။ . . . ဘာပဲဖြစ်ဖြစ် ကောင်းပါတယ်” ဆိုပြီး မှော်ဆရာတစ်ဦးရဲ့စကားကို သတင်းစာတစ်စောင် (USA Today) မှာ ဖော်ပြထားတယ်။

4. ၄။ ဟယ်လိုဝိန်းပွဲလိုမျိုး ပွဲတွေဟာ သမ္မာကျမ်းစာသွန်သင်ချက်နဲ့ လုံးလုံးမကိုက်ညီပါဘူး။ သမ္မာကျမ်းစာမှာ ဒီလိုသတိပေးထားတယ်– “သင်တို့တွင် . . . ဖြစ်လတ္တံ့သောအမှုကို ကိုယ်ဉာဏ်နှင့်ဟောပြောသောသူ၊ ကာလဗေဒင်ကိုကြည့်သောသူ၊ မကောင်းသောအတတ်ကိုပြုစုသောသူ၊ ပြုစားတတ်သောသူ၊ နတ်ဆိုးနှင့်ပေါင်းသောသူ၊ ဝိဇ္ဇာအတတ်ကိုပြုစုသောသူ၊ လူသေကိုမေးမြန်းသောသူ တစ်စုံတစ်ယောက်မျှမရှိရ။”—တရားဟောရာ ၁၈:၁၀၊ ၁၁; ဝတ်ပြုရာ ၁၉:၃၁; ဂလာတိ ၅:၁၉-၂၁ တို့ကိုလည်း ကြည့်ပါ။

ဖော်ပြပါအချက်တွေကို ကြည့်ရင် ဟယ်လိုဝိန်းပွဲနဲ့ အဲဒီပွဲနဲ့ဆင်တူတဲ့ပွဲတွေရဲ့ အယူမှားဇာစ်မြစ်ကို သိထားတာ ပညာရှိရာရောက်တယ်။ ဒီပွဲအကြောင်း ကောင်းကောင်းနားလည်ထားတဲ့အတွက် ဒီပွဲမှာမပါဝင်တဲ့သူတွေရှိသလို သင်ဟာ သူတို့လိုပဲ အဲဒီပွဲမှာမပါဝင်ဖို့ လှုံ့ဆော်ခံရပါလိမ့်မယ်။