ဘုရားရေးရာ ငြိမ်သက်ခြင်း၏တမန်များရွှင်လန်းကြသည်ဟု ကြေညာခံရ

“ထာဝရဘုရားကယ်နုတ်တော်မူသောသူတို့သည် ပြန်လာ၍ သီချင်းဆိုလျက် ထာဝရဝမ်းမြောက်ခြင်းသရဖူကိုဆောင်းလျက်ဇိအုန်မြို့သို့ရောက်လာကြလိမ့်မည်။”—ဟေရှာယ ၃၅:၁၀။

၁။ ဤလောကသည် အဘယ်အရာကို အရေးတကြီးလိုအပ်နေသနည်း။

တစ်ချိန်တစ်ခါနှင့်မျှမတူအောင် ယနေ့ လူ့လောကသည် သတင်းကောင်း၏တမန်တစ်ဦးကို လိုအပ်နေသည်။ ဘုရားသခင်နှင့် ကိုယ်တော်၏ရည်ရွယ်ချက်များအကြောင်း မှန်မှန်ကန်ကန်ပြောဆိုမည့်သူ၊ လူဆိုးတို့ ဖျက်ဆီးခံရတော့မည်အကြောင်း ရဲရင့်စွာပြောဆိုမည့်သူ၊ ဘုရားရေးရာငြိမ်သက်ခြင်းကို စိတ်နှလုံးမှန်ကန်သူများ တွေ့ရှိရန် ကူညီပေးမည့်သူတစ်ဦးကို အရေးတကြီးလိုအပ်နေပါသည်။

၂၊ ၃။ ယေဟောဝါသည် ဣသရေလလူမျိုးနှင့်ပတ်သက်၍ အာမုတ် ၃:၇ တွင်မှတ်တမ်းတင်ထားသော ကတိတော်ကို မည်သို့ပြည့်စုံစေတော်မူသနည်း။

^၂ ဣသရေလလူမျိုးခေတ်က ထိုသို့သောတမန်များရှိရလိမ့်မည်ဟု ယေဟောဝါကတိထားတော်မူသည်။ ဘီ.စီ.အီး. ကိုးရာစုအကုန်တွင် ပရောဖက်အာမုတ်က ဤသို့ဆိုသည်– “အကယ်စင်စစ် အရှင်ထာဝရဘုရားသည် မိမိကျွန် ပရောဖက်တို့အား မဖော်မပြဘဲ အဘယ်အမှုကိုမျှ စီရင်တော်မမူ။” (အာမုတ် ၃:၇) ဤသို့ကြွေးကြော်ပြီးနောက်ပိုင်း ရာစုနှစ်တစ်လျှောက်တွင် ယေဟောဝါသည် မြောက်မြားစွာသော အံ့ဖွယ်အမှုတို့ကို ပြုတော်မူခဲ့သည်။ ဥပမာ၊ ဘုရားသခင်၏ရွေးချယ်ခံလူမျိုးတော်သည် တော်လှန်ပုန်ကန်ပြီး သွေးပြစ်ကြီးသောကြောင့် ကိုယ်တော်သည် ဘီ.စီ.အီး. ၆၀၇ ခုနှစ်တွင် ထိုလူမျိုးကိုပြင်းထန်စွာဆုံးမတော်မူခဲ့သည်။ ဣသရေလလူမျိုး၏ ဒုက္ခကိုမြင်ပြီး ပီတိဖြစ်နေသော ပတ်ဝန်းကျင်ရှိ လူမျိုးတို့ကိုလည်း ဒဏ်ပေးတော်မူခဲ့သည်။ (ယေရမိအခန်းကြီး ၄၆–၄၉) ထို့နောက် ဘီ.စီ.အီး. ၅၃၉ ခုနှစ်တွင် ယေဟောဝါသည် တန်ခိုးကြီးမားသော ဗာဗုလုန်ကမ္ဘာ့အာဏာစက်ကို ကျရှုံးစေတော်မူပြီး ယင်းကြောင့် ဘီ.စီ.အီး. ၅၃၇ ခုနှစ်တွင် ဣသရေလလူမျိုး အကြွင်းအကျန်သည် ဗိမာန်တော်ကို ပြန်တည်ဆောက်ရန် သူတို့၏ပြည်တော်သို့ ပြန်သွားကြလေသည်။—၂ ရာဇဝင်ချုပ် ၃၆:၂၂၊ ၂၃။

^၃ ယင်းတို့သည် အလွန်အရေးပါသော ဖြစ်ရပ်များဖြစ်ပြီး ဖြစ်လတ္တံ့သောအမှုများကို ဣသရေလလူမျိုးသိရှိရန် အာမုတ်၏စကားနှင့်အညီ တမန်များအဖြစ် အမှုဆောင်သော ပရောဖက်များကို ယေဟောဝါ ကြိုတင်အကြောင်းကြား၍ သတိပေးစေတော်မူခဲ့သည်။ ဘီ.စီ.အီး. ရှစ်ရာစုအလယ်ပိုင်းတွင် ဟေရှာယကို ကိုယ်တော်ပေါ်ထွန်းစေတော်မူသည်။ ဘီ.စီ.အီး. ခုနစ်ရာစုအလယ်ပိုင်းတွင် ယေရမိကို ပေါ်ထွန်းစေသည်။ ထို့နောက် ၎င်းရာစုအကုန်ပိုင်းတွင် ယေဇကျေလကို ပေါ်ထွန်းစေသည်။ ဤသူတို့နှင့် အခြားသစ္စာရှိပရောဖက်များသည် ယေဟောဝါ၏ရည်ရွယ်ချက်များအကြောင်း နှံ့စပ်သေချာစွာ သက်သေခံခဲ့ကြသည်။

ယနေ့ ဘုရားသခင့်တမန်များကို ခွဲခြားသိမြင်ခြင်း

၄။ လူ့လောကသည် ငြိမ်သက်ခြင်းတမန်များ လိုအပ်နေကြောင်း အဘယ်အရာကတင်ပြသနည်း။

^၄ ယနေ့ကော။ လူ့အဖွဲ့အစည်း ယိုယွင်းပျက်စီးနေသည်ကို တွေ့သည့်အခါ လူအများသည် စိုးရိမ်တတ်ကြသည်။ ခရစ်ယာန်ဘောင်၏ ကြောင်သူတော်ဆန်ခြင်းနှင့် ဆိုးသွမ်းမှုကို ဖြောင့်မတ်ခြင်းတရား မြတ်နိုးသူများ တွေ့သည့်အခါ အလွန်စိတ်နာတတ်ကြသည်။ ယေဇကျေလမှတစ်ဆင့် ယေဟောဝါ ကြိုတင်ဟောသည့်အတိုင်း သူတို့သည် “မြို့ထဲ၌ ပြုသမျှသော စက်ဆုပ်ရွံရှာဖွယ်အမှုတို့ကြောင့် ညည်းတွားငိုကြွေး” နေကြသည်။ (ယေဇကျေလ ၉:၄) သို့ရာတွင် ယေဟောဝါ၏ရည်ရွယ်ချက်များကို အများသောသူတို့မသိကြပေ။ ယင်းကို သူတို့သိဖို့လိုပါသည်။

၅။ ကျွန်ုပ်တို့ခေတ်တွင် တမန်များရှိလိမ့်မည်ဟု ယေရှုမည်သို့ဖော်ပြသနည်း။

^၅ ယနေ့ ဟေရှာယ၊ ယေရမိနှင့် ယေဇကျေလတို့ကဲ့သို့ ရဲရင့်စွာဟောပြောသူများ ရှိပါသလော။ ရှိလိမ့်မည်ဟု ယေရှု တင်ပြတော်မူခဲ့သည်။ ကျွန်ုပ်တို့ခေတ်အကြောင်း ကြိုတင်ဟောပြောချိန်တွင် ကိုယ်တော်က “လူမျိုးအပေါင်းတို့အားသက်သေဖြစ်မည်အကြောင်း နိုင်ငံတော်နှင့်ယှဉ်သောဧဝံဂေလိတရား [“သတင်းကောင်း၊” ကဘ] ကိုလောကီနိုင်ငံအရပ်ရပ်ရှိသမျှတို့၌ဟောရလိမ့်မည်။ သို့ပြီးမှ အဆုံးသည် ဖြစ်လတ္တံ့” ဟုမိန့်တော်မူ၏။ (မဿဲ ၂၄:၁၄) သတင်းကောင်းကို ဟောပြောသောတမန်အဖြစ်အမှုဆောင်ခြင်းဖြင့် ထိုပရောဖက်ပြုချက်ကို ယနေ့ မည်သူ ပြည့်စုံနေစေသနည်း။ ကျွန်ုပ်တို့ခေတ်နှင့် ရှေးဣသရေလလူမျိုးခေတ်၏ ဆင်တူယိုးမှားအဖြစ်အပျက်များက ထိုမေးခွန်းကို ဖြေဆိုပေးသည်။

၆။ (က) ပထမကမ္ဘာစစ်အတွင်း “ဘုရားသခင်၏ဣသရေလ” လူများ၏ တွေ့ကြုံမှုများကို ဖော်ပြပါ။ (ခ) ယေဇကျေလ ၁၁:၁၇ သည် ရှေးဣသရေလလူမျိုးအပေါ် မည်သို့ပြည့်စုံခဲ့သနည်း။

^၆ ပထမကမ္ဘာစစ်၏ အနိဋ္ဌာရုံကာလအတွင်း ယေဟောဝါ၏ မျက်မှောက်ခေတ်လူမျိုး ဘိသိက်ခံအကြွင်းအကျန် “ဘုရားသခင်၏ဣသရေလ” သည် ဗာဗုလုန်နိုင်ငံတွင် သုံ့ပန်းဖြစ်ခဲ့သော ဣသရေလလူမျိုး၏အခြေအနေမျိုးကို ခံစားခဲ့ရကြ၏။ (ဂလာတိ ၆:၁၆) သူတို့သည် အထွန်းကားဆုံးဖြစ်ပြီး အပြစ်အကြီးလေးဆုံးဖြစ်သည့် ခရစ်ယာန်ဘောင်ပါဝင်သော ဗာဗုလုန်ဘာသာရေး ကမ္ဘာ့စုပေါင်းအဖွဲ့၊ မဟာဗာဗုလုန်တွင် ဝိညာဏပြည်နှင်ခံနေရကြသည်။ သို့ဖြစ်သော်လည်း သူတို့သည် စွန့်ပစ်ထားခြင်းမခံရကြောင်း ယေဇကျေလအား ယေဟောဝါမိန့်တော်မူသောစကားက တင်ပြသည်။ ကိုယ်တော်က “သူတို့ကိုဖြန့်ကြဲသော လူအမျိုးမျိုး နေရာအတိုင်းတိုင်းအပြည်ပြည်တို့မှ ငါသိမ်းယူ၍ စုဝေးပြီးလျှင် ဣသရေလပြည်ကို ပေးမည်” ဟုမိန့်တော်မူခဲ့သည်။ (ယေဇကျေလ ၁၁:၁၇) ရှေးဣသရေလလူမျိုးအားပေးသည့် ကတိတော်ကို ပြည့်စုံစေရန် ဗာဗုလုန်ကမ္ဘာ့အာဏာစက်ကို သိမ်းပိုက်ပြီး ဣသရေလလူမျိုး အကြွင်းအကျန်အား မိမိပြည်သို့ပြန်ရန် လမ်းဖွင့်ပေးဖို့ ပါရှန်းလူမျိုးကုရုကို ယေဟောဝါ ပေါ်ထွန်းစေတော်မူခဲ့သည်။ သို့သော် ယနေ့ကော။

၇။ မဟာဗာဗုလုန်ကို ယေရှုတရားစီရင်တော်မူကြောင်း ၁၉၁၉ ခုနှစ်မှ အဘယ်အဖြစ်အပျက်က ဖော်ပြသနည်း။ ရှင်းပြပါ။

^၇ ဤရာစု၏ အစောပိုင်းအချိန်တွင် သာ၍ကြီးမြတ်တော်မူသောကုရု အမှုဆောင်နေတော်မူကြောင်း သာဓကအထင်အရှားရှိသည်။ သူကား မည်သူနည်း။ ကောင်းကင်နိုင်ငံတော်၌ ၁၉၁၄ ခုနှစ်တွင် နန်းထိုင်တော်မူခဲ့သော ယေရှုခရစ် ကိုယ်တော်တိုင်ပင်ဖြစ်သည်။ ၁၉၁၉ ခုနှစ်တွင် ဘိသိက်ခံခရစ်ယာန်များသည် သူတို့၏ ဝိညာဉ်ရေးသုံ့ပန်းဘဝမှလွတ်မြောက်ပြီး သူတို့၏ ဝိညာဉ်ရေးအခြေအနေ၊ “ပြည်တော်” သို့ ပြန်ရောက်သောအခါ မြေကြီးပေါ်ရှိ ဘိသိက်ခံညီတော်များအပေါ် ဘုရင်မင်းမြတ်က မျက်နှာသာပြတော်မူခဲ့သည်။ (ဟေရှာယ ၆၆:၈; ဗျာဒိတ် ၁၈:၄) သို့ဖြင့် ယေဇကျေလ ၁၁:၁၇ သည် မျက်မှောက်ခေတ်ပြည့်စုံချက် ရှိလေသည်။ ရှေးခေတ်က ဣသရေလလူမျိုးသည် မိမိတို့ပြည်သို့ ပြန်သွားရန် ဗာဗုလုန်ပြိုလဲဖို့လိုအပ်ခဲ့သည်။ မျက်မှောက်ခေတ်တွင် ဘုရားသခင်၏ ဣသရေလလူမျိုး ပြန်လည်တည်ထောင်လာခြင်းက ကြီးမြတ်တော်မူသောကုရုအားဖြင့် မဟာဗာဗုလုန်ပြိုလဲခဲ့ခြင်း၏ သာဓကဖြစ်သည်။ ယင်းပြိုလဲခြင်းကို “မိမိမတရားသောမေထုန်၏ အဆိပ်အတောက်တည်းဟူသော စပျစ်ရည်ကို လူမျိုးအပေါင်းတို့အား တိုက်လေပြီးသော ဗာဗုလုန်မြို့ကြီး ပြိုလဲပြီ” ဟု ကြွေးကြော်ချိန်တွင် ဗျာဒိတ်ကျမ်း အခန်းကြီး ၁၄ ပါဒုတိယကောင်းကင်တမန်က ကြေညာခဲ့သည်။ (ဗျာဒိတ် ၁၄:၈) မဟာဗာဗုလုန်အတွက်၊ အထူးသဖြင့် ခရစ်ယာန်ဘောင်အတွက် အခြေအနေ ပြောင်းပြန်ဖြစ်သွားပါသည်တကား! စစ်မှန်သောခရစ်ယာန်များအတွက်မူကား ကောင်းချီးတစ်ရပ်ဖြစ်သတည်း!

၈။ ဘုရားသခင့်လူမျိုးတော်သည် ၁၉၁၉ ခုနှစ်တွင် လွတ်မြောက်ပြီးနောက် သူတို့၏ပျော်ရွှင်မှုကို ယေဇကျေလကျမ်းက မည်သို့ဖော်ပြသနည်း။

^၈ ယေဇကျေလ ၁၁:၁၈-၂၀ တွင် ဘုရားသခင့်လူမျိုးတော် ပြန်လည်တည်ထောင်လာပြီးနောက် ပျော်ရွှင်သောအခြေအနေကို ပရောဖက်က ဖော်ပြထားသည်။ သူ့စကားများ၏ ပထမပြည့်စုံချက်က ဧဇရနှင့် နေဟမိတို့ခေတ်တွင် ဣသရေလလူမျိုး၏ သန့်ရှင်းစင်ကြယ်မှုဖြစ်သည်။ မျက်မှောက်ခေတ် ပြည့်စုံချက်ကလည်း ထပ်တူအကြောင်းတစ်ခုကို ဆိုလို၏။ မည်သို့ဖြစ်သည်ကို ကြည့်ကြစို့။ ယေဟောဝါက “သူတို့သည် ထိုပြည်သို့ရောက်၍ စက်ဆုပ်ရွံရှာဖွယ်သောအမှုအရာရှိသမျှတို့ကို ပယ်ရှားကြလိမ့်မည်” ဟူ၍မိန့်တော်မူ၏။ ယေဟောဝါသည် ပရောဖက်ပြုထားသည့်အတိုင်းပင် ၁၉၁၉ ခုနှစ်မှစတင်၍ မိမိလူမျိုးကို သန့်ရှင်းစေတော်မူပြီး ကိုယ်တော်၏အမှုတော်ကိုထမ်းဆောင်ရန် ခွန်အားပြန်ရှိစေတော်မူခဲ့သည်။ ကိုယ်တော့်ရှေ့မှောက်တော်တွင် သူတို့အား ညစ်ညူးစေသည့် ဗာဗုလုန်အကျင့်နှင့် အယူဝါဒအားလုံးတို့ကို သူတို့၏ ဝိညာဉ်ရေးဝန်းကျင်မှ ဖယ်ရှားပစ်ကြလေသည်။

၉။ ယေဟောဝါသည် ၁၉၁၉ ခုနှစ်မှစ၍ ကိုယ်တော်၏လူမျိုးအား အဘယ်ထူးခြားသောကောင်းချီးများပေးတော်မူသနည်း။

^၉ ထို့နောက် အငယ် ၁၉ အရ ယေဟောဝါက ဤသို့ဆက်မိန့်တော်မူ၏– “ငါသည်လည်း ညီညွတ်သောစိတ်နှလုံးနှင့် အသစ်သောသဘောကို သွင်းပေးမည်။ သူတို့ကိုယ်ခန္ဓာထဲက ကျောက်နှလုံးကိုနုတ်၍ အသားနှလုံးကို ပေး” မည်။ ဤစကားများနှင့်အညီ ၁၉၁၉ ခုနှစ်တွင် ယေဟောဝါ၏ ဘိသိက်ခံကျေးကျွန်များသည် “အမှုတော်ကို တညီတညွတ်တည်း” ဆောင်ရွက်နိုင်ကြရန် သူတို့အား “ညီညွတ်သောစိတ်နှလုံး” ကို ကိုယ်တော်ပေးတော်မူခဲ့သည်။ (ဇေဖနိ ၃:၉) ထို့ပြင် သက်သေခံခြင်းလုပ်ငန်းတွင် အားရှိစေရန်နှင့် ဂလာတိ ၅:၂၂၊ ၂၃ ပါ မွန်မြတ်သောအသီးများကို သီးနိုင်ကြရန် သူတို့အား သန့်ရှင်းသောဝိညာဉ်တော်ကို ပေးတော်မူခဲ့သည်။ ထို့ပြင်နာခံမှုမရှိသော ကျောက်နှလုံးအစား အလိုတော်ကို လက်သင့်ခံမည့် ပျော့ပျောင်းသည့် နာခံမှုရှိသောနှလုံးကို ပေးသနားတော်မူခဲ့၏။

၁၀။ ၁၉၁၉ ခုနှစ်မှစ၍ ပြန်လည်တည်ထောင်လာပြီးသော မိမိ၏လူမျိုးတော်ကို ယေဟောဝါ အဘယ်ကြောင့်ကောင်းချီးပေးရသနည်း။

^၁၀ ယင်းသို့ ကိုယ်တော်အဘယ်ကြောင့် ပြုတော်မူသနည်း။ ယေဟောဝါကိုယ်တော်တိုင် ရှင်းပြတော်မူ၏။ ယေဇကျေလ ၁၁:၂၀ တွင် ဤသို့ဖတ်ရသည်– “သူတို့သည် ငါစီရင်ထုံးဖွဲ့သော ပညတ်တရားလမ်းသို့လိုက်၍ စောင့်ရှောက်သဖြင့် ငါ၏လူဖြစ်ကြလိမ့်မည်။ ငါသည်လည်း သူတို့၏ဘုရားသခင် ဖြစ်မည်။” ဘုရားသခင်၏ ဣသရေလလူမျိုးသည် မိမိစိတ်ထင်ရာလုပ်မည့်အစား ယေဟောဝါ၏ပညတ်တော်ကို နာခံလိုက်လျှောက်လာတတ်ကြသည်။ လူကိုမကြောက်ရွံ့ဘဲ ဘုရားသခင်၏အလိုတော်ကို ဆောင်ရွက်လာတတ်ကြသည်။ ထို့ကြောင့် သူတို့သည် ခရစ်ယာန်ဘောင်မှ အတုအယောင်ခရစ်ယာန်များနှင့် ထူးခြားကြောင်း ထင်ရှားလေသည်။ သူတို့သည် ယေဟောဝါ၏လူများဖြစ်ကြ၏။ ထိုသို့ဖြစ်ကြသောကြောင့် ယေဟောဝါသည် သူတို့ကို ကိုယ်တော်၏တမန်၊ “သစ္စာနှင့်သတိပညာရှိသောကျွန်” အဖြစ် အသုံးပြုရန် အသင့်ရှိတော်မူသည်။—မဿဲ ၂၄:၄၅-၄၇၊ သမ။

ဘုရားသခင့်တမန်များ၏ ပျော်ရွှင်မှု

၁၁။ ယေဟောဝါလူမျိုးတော်၏ပျော်ရွှင်မှုကို ဟေရှာယကျမ်းက မည်သို့ဖော်ပြသနည်း။

^၁၁ သူတို့သည် မည်မျှအခွင့်အရေးထူးသည်ကို သိရှိကြသောအခါ မည်မျှပျော်ရွှင်မည်အကြောင်း ပုံဖော်ကြည့်နိုင်ပါသလော။ အုပ်စုအနေနှင့် သူတို့သည် ဟေရှာယ ၆၁:၁၀ ပါစကားကို ပဲ့တင်ထပ်နိုင်ကြသည်– “ထာဝရဘုရားကြောင့် ငါသည် အလွန်ဝမ်းမြောက်၍ ငါ၏ဘုရားသခင်ကြောင့် ငါ့ဝိညာဉ်သည် ရွှင်လန်းမည်။” ဟေရှာယ ၃၅:၁၀ ပါကတိတော်သည် သူတို့အပေါ် ပြည့်စုံလေပြီ– “ထာဝရဘုရား ကယ်လွှတ်တော်မူသောသူတို့သည် ပြန်လာ၍ သီချင်းဆိုလျက် ထာဝရဝမ်းမြောက်ခြင်းသရဖူကိုဆောင်းလျက် ဇိအုန်မြို့သို့ ရောက်ကြလိမ့်မည်။ ဝမ်းမြောက်ရွှင်လန်းခြင်းအခွင့်ကိုရကြ၍ ဝမ်းနည်းခြင်းနှင့် ညည်းတွားခြင်းသည် ပြေးသွားရလိမ့်မည်။” ယေဟောဝါ၏ ဘုရားရေးရာငြိမ်သက်ခြင်း၏ တမန်များသည် လူသားအပေါင်းတို့အား သတင်းကောင်း စတင်ဟောပြောစဉ် ၁၉၁၉ ခုနှစ်က ထိုသို့ပျော်ရွှင်ခဲ့ကြရသည်။ သူတို့သည် ထိုအချိန်မှစတင်၍ ယခုထိတိုင်အောင် ယင်းလုပ်ငန်းကို မရပ်မစဲ လုပ်ကိုင်ဆောင်ရွက်နေကြရာ သူတို့၏ပျော်ရွှင်မှု တိုးပွားလျက်နေသည်။ တောင်ပေါ်ဒေသနာတော်တွင်ယေရှုက ဤသို့မိန့်တော်မူသည်– “ငြိမ်သက်စေသောသူများသည် ဝမ်းမြောက်ကြ၏။ အကြောင်းမူကား၊ ထိုသူတို့သည် ‘ဘုရားသခင်၏သားများ’ ဟု ခေါ်ဝေါ်ခြင်းခံရကြလတ္တံ့။” (မဿဲ ၅:၉၊ ကဘ၊ အောက်ခြေမှတ်ချက်) ဘိသိက်ခံအကြွင်းအကျန် “ဘုရားသခင်၏သားများ” မှ အကြွင်းအကျန်သည် ၁၉၁၉ ခုနှစ်မှစ၍ ယနေ့တိုင်အောင် ထိုကြွေးကြော်ချက်၏မှန်ကန်မှုကို ခံစားနေကြရသည်။

၁၂၊ ၁၃။ (က) ဘုရားသခင်၏ဣသရေလလူမျိုးနှင့်တွဲဖက်ပြီး အဘယ်သူများသည် ယေဟောဝါ၏အမှုတော်ကို ထမ်းဆောင်ကြသနည်း။ သူတို့သည် အဘယ်အမှုကို ပြုလုပ်ကြသနည်း။ (ခ) ယေဟောဝါ၏ဘိသိက်ခံကျေးကျွန်များသည် အဘယ်ပျော်ရွှင်မှုကို ခံစားနေကြရသနည်း။

^၁၂ ဘိသိက်ခံအကြွင်းအကျန်ကို စုသိမ်းခြင်းလုပ်ငန်း ပြီးဆုံးခါနီး ၁၉၃၀ ပြည့်လွန်နှစ်အထိ နှစ်ပေါင်းများစွာတစ်လျှောက် ဘုရားသခင့် ဣသရေလလူမျိုး၏အရေအတွက်သည် တိုးများလာပါသည်။ ထိုအခါ သတင်းကောင်းဟောပြောသူများ၏ အရေအတွက် ဆက်မတိုးတော့ဘဲ ရပ်သွားသလော။ လုံးဝမရပ်ပါ။ မြေကြီးဆိုင်ရာမျှော်လင့်ချက်ရှိသူ ခရစ်ယာန်လူအုပ်ကြီးတစ်စု ပေါ်ထွန်းလာလေသည်။ ဤသူတို့သည် ဘိသိက်ခံညီအစ်ကိုချင်းတို့နှင့်တွဲဖက်၍ ဟောပြောခြင်းလုပ်ငန်း၌ ပါဝင်လျက်ရှိကြသည်။ တမန်တော်ယောဟန်သည် ဤလူအုပ်ကြီးကို ရူပါရုံ၌ တွေ့မြင်ခဲ့သည်။ သူတို့အကြောင်း ဖော်ပြထားပုံသည် ထူးခြား၏– “ဘုရားသခင်၏ပလ္လင်တော်ရှေ့မှာနေရာကိုရ၍ ဗိမာန်တော်၌ ဘုရားဝတ်ကို နေ့ညမပြတ်ပြုရကြ၏။” (ဗျာဒိတ် ၇:၁၅) မှန်ပါသည်၊ လူအုပ်ကြီးသည် ဘုရားအမှုတော်ကို စတင်ဆောင်ရွက်လေသည်။ ယင်းကြောင့် ၁၉၃၅ ခုနှစ်နောက်ပိုင်းတွင် ဘိသိက်ခံများ၏အရေအတွက် စတင်လျော့နည်းသွားသောအခါ ဤသစ္စာရှိ အပေါင်းအဖော်များသည် သက်သေခံခြင်းလုပ်ငန်းကို တစ်ဟုန်ထိုးပါဝင် ဆောင်ရွက်ကြလေသည်။

^၁၃ ဤနည်းအားဖြင့် ဟေရှာယ ၆၀:၃၊ ၄ ပြည့်စုံလေသည်– “တစ်ပါးအမျိုးသားတို့သည် သင်၏အလင်းသို့လည်းကောင်း၊ ရှင်ဘုရင်တို့သည် သင်၌ပေါ်ထွန်းခြင်းအရောင်သို့လည်းကောင်း လာကြလိမ့်မည်။ အရပ်ရပ်သို့ မျှော်ကြည့်လော့။ ခပ်သိမ်းသောသူတို့သည် စုဝေး၍ သင့်ထံသို့ လာကြ၏။ သင်၏သားသမီးတို့သည် အဝေးကလာ၍ သင်၏အနားမှာ မွေးစားခြင်းကို ခံကြလိမ့်မည်။” ဤအဖြစ်အပျက်များကြောင့် ဘုရားသခင်၏ဣသရေလလူမျိုးခံစားရသော ပျော်ရွှင်မှုကို ဟေရှာယ ၆၀:၅ ကတင့်တယ်စွာ ဤသို့ဖော်ပြထားသည်– “ထိုအခါ သင်သည် ကြောက်ရွံ့ခြင်းနှင့် ရွှင်လန်းခြင်း ရှိလိမ့်မည်။ နှလုံးတုန်လှုပ်၍ ဝမ်းမြောက်လိမ့်မည်။ အကြောင်းမူကား သမုဒ္ဒရာ၏ကြွယ်ဝခြင်းသည် သင့်ဘက်သို့ပြောင်းလဲ၍ တစ်ပါးအမျိုးသားတို့၏စည်းစိမ်သည် သင့်လက်သို့ ရောက်လိမ့်မည်။”

ရွေ့လျားနေသော ယေဟောဝါ၏အဖွဲ့အစည်း

၁၄။ (က) ယေဇကျေလသည် အဘယ်ကောင်းကင်အရာများကို ရူပါရုံတွင် တွေ့မြင်ခဲ့သနည်း။ အဘယ်အမိန့်ကို သူရခဲ့သနည်း။ (ခ) မျက်မှောက်ခေတ်တွင် ယေဟောဝါ၏လူမျိုးသည် အဘယ်အရာကိုသိမြင်ကြပြီး အဘယ်တာဝန်ရှိသည်ဟု သူတို့ခံစားရကြသနည်း။

^၁၄ ဘီ.စီ.အီး. ၆၁၃ ခုနှစ်က ယေဇကျေလသည် ယေဟောဝါ၏ ရွေ့လျားနေသော ကောင်းကင်မြင်းရထားကဲ့သို့သော အဖွဲ့အစည်းကို ရူပါရုံတွင် တွေ့မြင်ခဲ့သည်။ (ယေဇကျေလ ၁:၄-၂၈) ထို့နောက် ယေဟောဝါက သူ့အား “အချင်းလူသား၊ ဣသရေလအမျိုးသားတို့ရှိရာသို့သွား၍ ငါ့စကားကို ဟောပြောလော့” ဟုမိန့်တော်မူ၏။ (ယေဇကျေလ ၃:၄) ဤ ၁၉၉၇ ခုနှစ်တွင် ယေဟောဝါ၏ ကောင်းကင်အဖွဲ့အစည်းသည် ဘုရားသခင်၏ရည်ရွယ်ချက်များကို ပြည့်စုံစေရန် မရပ်မနားရွေ့လျားနေဆဲရှိကြောင်းတွေ့ မြင်နေရသည်။ သို့ဖြစ်သောကြောင့် ထိုရည်ရွယ်ချက်များအကြောင်း သူတစ်ပါးအား ပြောပြရန် တိုက်တွန်းခံနေရဆဲရှိသည်။ မိမိခေတ်တွင် ယေဇကျေလသည် ယေဟောဝါ တိုက်ရိုက်မှုတ်သွင်းသောစကားများကို ပြောဆိုခဲ့၏။ ယနေ့ ယေဟောဝါမှုတ်သွင်းရေးသားထားသည့် နှုတ်ကပါဌ်တော်သမ္မာကျမ်းစာမှ စကားများကို ကျွန်ုပ်တို့ပြောဆိုနေကြသည်။ ထိုစာအုပ်တွင်ပါသော လူသားအတွက် သတင်းသည် မည်မျှထူးမြတ်လှလေခြင်း! များစွာသောသူတို့သည် အနာဂတ်အတွက် စိုးရိမ်နေကြသော်လည်း အခြေအနေသည် ထင်သည်ထက်ဆိုးရွားနေကြောင်း—တစ်ကြိမ်တည်းတွင်၊ သာ၍ကောင်းနေကြောင်း သမ္မာကျမ်းစာက ဖော်ပြသည်။

၁၅။ အခြေအနေသည် ယနေ့လူအများထင်သည်ထက် အဘယ်ကြောင့်ပိုဆိုးရွားနေရသနည်း။

^၁၅ ယခင်ဆောင်းပါးများမှသိရှိခဲ့ရသည့်အတိုင်း ခရစ်ယာန်ဘောင်နှင့် အခြားဗာဗုလုန်ဘာသာအားလုံးတို့သည် ဘီ.စီ.အီး. ၆၀၇ ခုနှစ်တွင် ယေရုရှလင်ပျက်စီးခဲ့သည့်နည်းတူ လုံးလုံးလျားလျား ပျက်စီးရတော့မည်ဖြစ်သောကြောင့် အခြေအနေပို၍ဆိုးရွားနေရခြင်းဖြစ်သည်။ ထို့ပြင်ဗျာဒိတ်ကျမ်းတွင် ခေါင်းခုနစ်လုံး၊ ချိုဆယ်ချောင်းရှိ သားရဲဖြင့်ပုံဆောင်ထားသည့် ကမ္ဘာ့နိုင်ငံရေးအဖွဲ့အစည်းတစ်ခုလုံးသည် ယေရုရှလင်မြို့အနီးရှိ တိတ္ထိများစွာနည်းတူ ရှင်းလင်းသုတ်သင်ခံရတော့မည်ဖြစ်သည်။ (ဗျာဒိတ် ၁၃:၁၊ ၂; ၁၉:၁၉-၂၁) ယေဇကျေလခေတ်၌ ယေဟောဝါသည် ယေရုရှလင်မြို့ ပျက်စီးလုနီးသောကြောင့် ဖြစ်ပေါ်လာသည့်ထိတ်လန့်မှုကို ကွင်းကွင်းကွက်ကွက်ဖော်ပြထားတော်မူသည်။ သို့သော် ဤလောက၏ပျက်စီးခြင်း ကျရောက်တော့မည်ဖြစ်ကြောင်းကို လူတို့သိရှိလာသည့်အခါ ကိုယ်တော်၏မိန့်တော်မူချက်သည် အဓိပ္ပာယ်ပိုမိုလေးနက်လာပေလိမ့်မည်။ ယေဟောဝါသည် ယေဇကျေလကို ဤသို့မိန့်တော်မူ၏– “သို့ဖြစ်၍ အချင်းလူသား၊ ညည်းတွားသံကိုပြုလော့။ ခါးကျိုးလျက်၊ နှလုံးကြေကွဲလျက်၊ သူတို့ရှေ့မှာ ညည်းတွားသံကိုပြုလော့။ သူတို့ကလည်း ‘အဘယ်ကြောင့်ညည်းတွားသနည်း’ ဟု သင့်ကိုမေးသောအခါ သင်က ‘ငါသည် သတင်းစကားကြောင့် ညည်းတွား၏။’ အမှုနီးပြီ။ လူအပေါင်းတို့သည် ကြောက်အားကြီး၍ လက်အားလျော့ကြလိမ့်မည်။ စိတ်ပျက်၍ ဒူးသည်လည်း အရည်ဖြစ်လိမ့်မည်။ ‘အမှုလာ၍ ရောက်မည်’ အကြောင်းကို အရှင်ထာဝရဘုရား ဗျာဒိတ်ပေးတော်မူ” ၏။ (ယေဇကျေလ ၂၁:၆၊ ၇; မဿဲ ၂၄:၃၀) ကြောက်မက်ဖွယ်အဖြစ်အပျက်များ ရှေ့တွင်ရှိသည်။ လူလူချင်းအတွက် ကျွန်ုပ်တို့၏ စိုးရိမ်မှုက သူတို့ကိုသတိပေးဖို့ ယေဟောဝါ၏အမျက်တော် ကျရောက်တော့မည့် ‘သတင်း’ ကို ကြားပြောရန်လှုံ့ဆော်ပေးသည်။

၁၆။ စိတ်နှိမ့်ချသူများအတွက်မှာမူ အခြေအနေသည် လူအများထင်သည်ထက် အဘယ်ကြောင့်ပိုကောင်းသနည်း။

^၁၆ တစ်ကြိမ်တည်းတွင် စိတ်နှိမ့်ချသူများအတွက် အခြေအနေသည် လူအများ ယူမှတ်သည်ထက် ပိုကောင်းပေသည်။ အဘယ်နည်းဖြင့်နည်း။ ယေရှုခရစ်တော်သည် ကျွန်ုပ်တို့အပြစ်အတွက် အသေခံခဲ့ပြီးဖြစ်၍ ယခု ဘုရားသခင်၏နိုင်ငံတော်တွင် နန်းထိုင်နေတော်မူပြီဖြစ်သောကြောင့်တည်း။ (၁ တိမောသေ ၁:၁၅; ဗျာဒိတ် ၁၁:၁၅) အမြင်အားဖြင့် ဖြေရှင်း၍မရဟုထင်ရသော လူသားလောက၏ပြဿနာများကို ထိုကောင်းကင်နိုင်ငံတော်က ဖြေရှင်းပေးတော့မည်ဖြစ်သည်။ သေခြင်း၊ ဖျားနာမှု၊ အဂတိလိုက်စားမှု၊ ငတ်ပြတ်မှုနှင့် ရာဇဝတ်မှုတို့သည် အတိတ်ကာလကအဖြစ်အပျက်များ ဖြစ်သွားတော့မည်။ ဘုရားသခင့်နိုင်ငံတော်သည် ပရဒိသုမြေကြီးပေါ် ဆန့်ကျင်ဘက်မရှိ အစိုးရတော့မည်။ (ဗျာဒိတ် ၂၁:၃၊ ၄) လူသားတို့သည် ဘုရားရေးရာငြိမ်သက်ခြင်း—ယေဟောဝါဘုရားသခင်နှင့်လည်းကောင်း၊ အချင်းချင်းနှင့်လည်းကောင်း ငြိမ်းချမ်းသာယာသောဆက်ဆံရေး ရှိတော့မည်ဖြစ်သည်။—ဆာလံ ၇၂:၇။

၁၇။ အဘယ်တိုးတက်မှုများက ဘုရားရေးရာ ငြိမ်သက်ခြင်းတမန်များ၏စိတ်ကို ရွှင်လန်းစေသနည်း။

^၁၇ ကမ္ဘာ့ဒေသအချို့တွင် စိတ်နှိမ့်ချသူ မြောက်မြားစွာတို့သည် ဤဘုရားရေးရာ ငြိမ်သက်ခြင်းသတင်းကို လက်ခံနာယူနေကြပြီ။ ဥပမာအချို့ကိုတင်ပြရမည်ဆိုလျှင် လွန်ခဲ့သောနှစ်က ယူကရိန်းနိုင်ငံမှ မှတ်တမ်းအရ ကြေညာသူ ၁၇ ရာခိုင်နှုန်းတိုးတက်ကြောင်း။ မိုဇမ်ဘစ်တွင် ၁၇ ရာခိုင်နှုန်း၊ လစ်သူရေးနီးယား တွင် ၂၉ ရာခိုင်နှုန်း တိုးတက်ခဲ့ကြကြောင်း။ ရုရှားတွင် ၃၁ ရာခိုင်နှုန်း တိုးတက်ခဲ့ပြီး အယ်လ်ဘေးနီးယားနိုင်ငံတွင်မူ ကြေညာသူ ၅၂ ရာခိုင်နှုန်း တိုးတက်ကြောင်းတည်း။ ဤတိုးတက်မှုများက ဘုရားရေးရာငြိမ်သက်မှုကိုလိုလားပြီး ဖြောင့်မတ်ခြင်းတရားဘက် ရပ်တည်သော စိတ်နှလုံးရိုးသားသူ ထောင်သောင်းများစွာကို ဖော်ပြပါသည်။ ဤအလျင်အမြန်တိုးတက်မှုက ခရစ်ယာန်ညီအစ်ကိုအသင်းအပင်းတစ်ခုလုံးကို များစွာရွှင်လန်းစေသည်။

၁၈။ လူတို့နားထောင်သည်ဖြစ်စေ၊ နားမထောင်သည်ဖြစ်စေ ကျွန်ုပ်တို့၏သဘောထားက မည်သို့ဖြစ်ရမည်နည်း။

^၁၈ သင်နေထိုင်သောနေရာတွင် ဤမျှအလျင်အမြန် တုံ့ပြန်မှုရှိသလော။ ရှိမည်ဆိုလျှင် သင်နှင့်အတူ ဝမ်းမြောက်ပါသည်။ သို့သော် အချို့ရပ်ကွက်များတွင်မူ စိတ်ဝင်စားသူတစ်ဦးကိုပင်တွေ့နိုင်ရန် နာရီပေါင်းများစွာ ကြိုးစားကြရသည်။ ဤကဲ့သို့သောရပ်ကွက်များတွင် အမှုဆောင်သူများသည် လက်လျှော့လိုက်ကြပါသလော၊ သို့မဟုတ် စိတ်ဓာတ်ကျသွားပါသလော။ ထိုသို့မဖြစ်ကြချေ။ ဂျူးအချင်းချင်းတို့ကို ဟောပြောရန် ငယ်ရွယ်သောပရောဖက် ယေဇကျေလအား ဘုရားသခင်မိန့်မှာတော်မူသောစကားများကို ယေဟောဝါသက်သေများ သတိရကြသည်– “သူတို့သည် ပုန်ကန်တတ်သောအမျိုးဖြစ်၍ နားထောင်သည်ဖြစ်စေ၊ နားမထောင်သည်ဖြစ်စေ၊ မိမိတို့တွင် ပရောဖက်ရှိသည်ကို သိရကြမည်။” (ယေဇကျေလ ၂:၅) ယေဇကျေလနည်းတူ လူတို့ တုံ့ပြန်သည်ဖြစ်စေ၊ မတုံ့ပြန်သည်ဖြစ်စေ ဘုရားရေးရာငြိမ်သက်ခြင်းအကြောင်းကို ကျွန်ုပ်တို့ပြောပြနေမည်။ နားထောင်သူတွေ့သည့်အခါ ကျွန်ုပ်တို့အလွန်ဝမ်းသာအားရကြ၏။ သို့သော် ကျွန်ုပ်တို့ကို ကျောခိုင်းမည်၊ ကဲ့ရဲ့မည်၊ နှိပ်စက်ကလူပြုမည် ဖြစ်သည့်တိုင် ဆက်သစ္စာရှိကြပါမည်။ ကျွန်ုပ်တို့သည် ယေဟောဝါကိုချစ်မြတ်နိုးကြ၏။ ကျမ်းစာက “မေတ္တာသည် . . . ခပ်သိမ်းသောအရာကို သည်းခံတတ်” သည်ဟုဆိုသည်။ (၁ ကောရိန္သု ၁၃:၄၊ ၇) ကျွန်ုပ်တို့သည်ခံနိုင်ရည်တင်ပြကြသောကြောင့် ယေဟောဝါသက်သေများသည် မည်သူမည်ဝါဖြစ်ကြောင်းကို လူတို့သိကြပါသည်။ ကျွန်ုပ်တို့၏သတင်းတရားကိုလည်း သူတို့သိလာကြ၏။ ဆုံးခန်းတိုင်သည့်အခါ ဘုရားရေးရာငြိမ်သက်ခြင်းရှိရန် ယေဟောဝါသက်သေများ ကြိုးစားကူညီပေးခဲ့ကြောင်းကို သူတို့သိကြလိမ့်မည်။

၁၉။ စစ်မှန်သောဘုရားသခင်၏ကျေးကျွန်များအနေနှင့် ကျွန်ုပ်တို့သည် အဘယ်ကြီးမားသောအခွင့်အရေးကို တန်ဖိုးထားမြတ်နိုးကြသနည်း။

^၁၉ ယေဟောဝါ၏အမှုတော်ဆောင်ခြင်းထက် ကြီးမြတ်သော အခြားအခွင့်အရေး ရှိပါသေးသလော။ မရှိပါ! ကျွန်ုပ်တို့သည် ဘုရားသခင်နှင့် ဆက်ဆံမှုကောင်းခြင်း၊ ကိုယ်တော်၏အလိုတော်ကို ဆောင်ရွက်နေကြောင်း သိရှိရခြင်းမှ ကျွန်ုပ်တို့ပျော်ရွှင်မှု အများဆုံးရရှိကြသည်။ “အိုထာဝရဘုရား၊ နှိုးဆော်တော်မူခြင်းအသံကို နားလည်သောလူမျိုးသည် မင်္ဂလာရှိပါ၏။ သူတို့သည် မျက်နှာတော်အလင်း၌ သွားလာရကြပါ၏။” (ဆာလံ ၈၉:၁၅) လူသားတို့အတွက် ဘုရားသခင့် ငြိမ်သက်ခြင်း၏တမန်များဖြစ်ရသည့် မင်္ဂလာကို အမြဲတန်ဖိုးထား မြတ်နိုးနိုင်ကြပါစေ။ ယေဟောဝါက ပြီးပြီဟု မိန့်တော်မူသည့်အချိန်တိုင်အောင် ဤလုပ်ငန်းတွင် ဝီရိယစိုက်ထုတ် ပါဝင်နိုင်ကြပါစေ။

သင်မှတ်မိသလော

◻ ယနေ့ ဘုရားသခင်၏ငြိမ်သက်ခြင်း၏တမန်များကား မည်သူတို့ဖြစ်သနည်း။

◻ ၁၉၁၉ ခုနှစ်တွင် မဟာဗာဗုလုန်ပြိုလဲကြောင်း မည်သို့သိနိုင်သနည်း။

◻ “လူအုပ်ကြီး” ၏အဓိကစိတ်စွဲလမ်းရာကား အဘယ်နည်း။

◻ အနာဂတ်သည် လူအများထင်သည်ထက် ယနေ့အဘယ်ကြောင့်ပိုဆိုးရွားနေသနည်း။

◻ စိတ်နှလုံးမှန်ကန်သူများအတွက် အနာဂတ်သည် သူတို့ထင်သည်ထက် အဘယ်ကြောင့်ပိုကောင်းနိုင်သနည်း။

[စာမျက်နှာ ၂၁ ပါ ရုပ်ပုံ]

လူ့အဖွဲ့အစည်း ယိုယွင်းပျက်စီးနေသည်ကို တွေ့သည့်အခါလူအများသည် စိုးရိမ်တတ်ကြသည်

[စာမျက်နှာ ၂၃ ပါ ရုပ်ပုံ]

ယနေ့ ကမ္ဘာပေါ် စိတ်အရွှင်လန်းဆုံးသူများသည်ဘုရားရေးရာငြိမ်သက်ခြင်း၏တမန်များဖြစ်သည်