သမ္မာကျမ်းစာ—ထူးခြားသောစာအုပ်

ယင်းကို ကမ္ဘာတွင်ရောင်းရအသွက်ဆုံးစာအုပ်ဟု ခေါ်ဆိုလာခဲ့ကြသည်။ ခေါ်လည်းခေါ်ဆိုထိုက်ပေသည်။ သမ္မာကျမ်းစာကို အခြား စာအုပ်များထက် ဖတ်ရှုကြကာအမြတ်တနိုးထားကြသည်။ ယခုအချိန်အထိ ယင်းကို ခန့်မှန်းခြေအားဖြင့် (တစ်အုပ်လုံးဖြစ် စေ၊ တစ်စိတ်တစ်ပိုင်းဖြစ်စေ) ဘာသာစကားပေါင်း ၂,၀၀၀ ကျော်နှင့် အရေအတွက်သန်းပေါင်းလေးထောင်အထိ ထုတ်ဝေဖြန့်ချိထားပြီးဖြစ်သည်။

သို့သော်လည်း သမ္မာကျမ်းစာထုတ်ဝေသည့်အရေအတွက်ထက် သာ၍စိတ်ဝင်စားစရာကောင်းသည်မှာ ယင်းကိုယ်နှိုက်က မြင့်မြတ်သောအာဘော်ရှင်ကို ဖော်ပြထားခြင်းတည်း။ ‘[သမ္မာ]ကျမ်းစာရှိသမျှသည် ဘုရားသခင်မှုတ်သွင်းတော်မူသောအားဖြင့်ဖြစ်၏’ ဟူ၍ တမန်တော်ပေါလုရေးသားခဲ့သည်။ (၂ တိမောသေ ၃:၁၆) ယင်း၏ဆိုလိုရင်းကား အဘယ်နည်း။ “ဘုရားသခင်မှုတ်သွင်း” (ဂရိ၊ သီအိုနယူစတို့စ်) ဟူသောစကားစု၏ စာသားအရအဓိပ္ပာယ်မှာ “ဘုရားသခင်မှုတ်တော်မူ၏” ဟူ၍ဖြစ်သည်။ ဆက်နွှယ်လျက်ရှိသော ဂရိစကား၊ နယူးမား၏အဓိပ္ပာယ်မှာ “ဝိညာဉ် (စပစ်ရစ်)” ဖြစ်သည်။ ထို့ကြောင့် ဘုရားသခင်၏သန့်ရှင်းသောဝိညာဉ်တော်က လူသားသမ္မာကျမ်းရေးသူများကို တိုက်တွန်းခြင်း၊ သူတို့အပေါ်မှုတ်သွင်းတော်မူခြင်းအလားဖြစ်သည်ဟု ဆိုသောကြောင့် အပြီးသတ်တွင် လူ့အာဘော်မဟုတ်ဘဲ ဘုရားသခင့်နှုတ်ကပါဌ်တော်ဟု မှန်ကန်စွာခေါ်ဆိုနိုင်ပါသည်။ အမှန်သော် သမ္မာကျမ်းစာကိုလေ့လာသူများစွာက ယင်း၏စာစောင်များအားလုံး အတွင်းသဘောညီညွတ်ခြင်း၊ သိပ္ပံပညာနှင့်ကိုက်ညီခြင်း၊ သမ္မာကျမ်းရေးသူများ၏ ရိုးသားပွင့်လင်းမှုရှိခြင်းနှင့် အရေးကြီးဆုံးကား ယင်း၏ပရောဖက်ပြုချက်များပြည့်စုံခြင်းကို အံ့အားသင့်ကြရာ ဤစာအုပ်သည် လူ့ထက်သာလွန်မြင့်မားသော အရင်းအမြစ်တစ်ခုမှဖြစ်ကြောင်း တွေးတောဆင်ခြင်တတ်သည့်စာဖတ်သူသန်းပေါင်းများစွာကို ယုံကြည်စိတ်ချစေသည်။a

သို့သော် သမ္မာကျမ်းစာကိုရေးသားရာတွင် ဘုရားသခင်သည် မည်သို့ကြပ်ကြပ်မတ်မတ် လမ်းညွှန်တော်မူခဲ့သနည်း။ သမ္မာကျမ်းစာရှိ စာလုံးတစ်လုံးချင်းဆီကို ကိုယ်တော်ကနှုတ်တိုက်ချပေးခဲ့သည်ဟု အချို့ကပြောကြသည်။ အခြားသူများက စကားလုံးတစ်လုံးချင်းဆီမဟုတ်ဘဲ သမ္မာကျမ်းစာထဲ၌တွေ့ရသော သဘောတရားကိုသာ ကိုယ်တော်မှုတ်သွင်းတော်မူသည်ဟု ဆိုကြသည်။ သို့သော်လည်း အမှန်စင်စစ် မှုတ်သွင်းခြင်းဟူသည် နည်းလမ်းတစ်ခုတည်းအားဖြင့်သာမဟုတ်ချေ၊ ဘုရားသခင်သည် “ပရောဖက်များအားဖြင့် ဘိုးဘေးတို့အား အထပ်ထပ်အနည်းနည်းဗျာဒိတ်ပေးတော်မူ . . . ပြီ။” (ဟေဗြဲ ၁:၁; ၁ ကောရိန္သု ၁၂:၆ နှိုင်းယှဉ်။) နောက်ဆောင်းပါးတွင် ကျမ်းရေးသူ ၄၀ ခန့်အား ဘုရားသခင်မိန့်ကြားတော်မူခဲ့သောနည်းလမ်းများကို ကျွန်ုပ်တို့ဆန်းစစ်ကြမည်။

[အောက်ခြေမှတ်ချက်များ]