သူတို့ ယေဟောဝါ၏အလိုတော်ကို ဆောင်ရွက်ခဲ့ကြ

ကိုယ်ကျိုးစွန့်ခြင်းနှင့် သစ္စာစောင့်သိခြင်း ပုံသက်သေတစ်ရပ်

ဧလိရှဲဟုခေါ်သော လူငယ်လယ်သမားတစ်ဦးအတွက် လုပ်ရိုးလုပ်စဉ်လယ်ထွန်ခြင်းကို စတင်လိုက်သည့်နေ့တစ်နေ့သည် သူ့ဘဝအတွက် အလွန်ထူးခြားသည့်နေ့တစ်နေ့ဖြစ်ခဲ့သည်။ လယ်ထဲတွင်သူအလုပ်လုပ်နေစဉ် မမျှော်လင့်ဘဲ ဣသရေလ၏အဦးဆုံးပရောဖက် ဧလိယရောက်လာခဲ့သည်။ ‘ဘာကြောင့် ဧလိယငါ့ဆီလာတာလဲ’ ဟုဧလိရှဲစဉ်းစားမိပေမည်။ အဖြေအတွက် သူကြာရှည်စွာမစောင့်လိုက်ရပါ။ ဧလိယသည် မိမိ၏ဝတ်လုံကို ဧလိရှဲအပေါ်သို့တင်ခြင်းဖြင့် တစ်နေ့တွင် ဧလိရှဲသည် မိမိအားဆက်ခံမည်ကို ညွှန်ပြခဲ့သည်။ ဧလိရှဲသည် ထိုဖိတ်ခေါ်ချက်ကို ပေါ့ပေါ့တန်တန်သဘောမထားခဲ့ပါ။ သူသည် ဧလိယ၏ပြုစုသူဖြစ်လာရန် လယ်ကိုချက်ချင်းစွန့်ခဲ့သည်။—၃ ဓမ္မရာဇဝင် ၁၉:၁၉-၂၁။

ခြောက်နှစ်ခန့်ကြာပြီးနောက် ဧလိယခွဲခွာသွားရန် အချိန်ကျရောက်ခဲ့သည်။ သူ၏ထွက်ခွာခြင်းမှတ်တမ်းကို ဟေဗြဲကျမ်းစောင်များ၌ “စွဲမက်ဖွယ်အကောင်းဆုံး ပြောပြချက်တစ်ခု” ဟုခေါ်ဆိုထားသည်။

ဧလိယထွက်ခွာရန်ပြင်ဆင်

ဧလိယသည် ဗေသလ၊ ယေရိခေါနှင့် ယော်ဒန်သို့ နောက်ဆုံးလည်ပတ်လိုခဲ့သည်။ ယင်းသည် မိုင်ပေါင်းများစွာ လမ်းလျှောက်ရန်လိုအပ်မည်ဖြစ်ပြီး အချို့မှာ ခရီးကြမ်းသောတောင်တန်းပေါ်၌ဖြစ်သည်။ ခရီးတစ်ထောက်စီ၌ ဧလိယက ဧလိရှဲအား ကျန်ရစ်ရန်တိုက်တွန်းခဲ့သည်။ သို့သော် ဧလိရှဲက သူ၏သခင်နှင့်အတူ အဆုံးတိုင်ရှိနေမည်ဟု ဇွတ်ပြောခဲ့သည်။—၄ ဓမ္မရာဇဝင် ၂:၁၊ ၂၊ ၄၊ ၆။

ဗေသလနှင့် ယေရိခေါ၌ရှိစဉ် “ပရောဖက်အမျိုးသားတို့” သည် ဧလိရှဲထံချဉ်းကပ်ခဲ့ကြသည်။a သူတို့က “ထာဝရဘုရားသည် ကိုယ်တော်သခင်ကို ကိုယ်တော်ခေါင်းမှ ယနေ့နုတ်သွားတော်မူမည်ကို သိတော်မူသလော” ဟုမေးကြ၏။ “ဟုတ်ကဲ့ ငါသိ၏။ တိတ်ဆိတ်စွာနေကြပါ” ဟုပြန်ပြောဆို၏။—၄ ဓမ္မရာဇဝင် ၂:၃၊ ၅။

ထို့နောက်ဧလိယနှင့် ဧလိရှဲသည် ယော်ဒန်မြစ်သို့ခရီးထွက်ခွာကြသည်။ ယော်ဒန်မြစ်သို့သူတို့ရောက်ကြသောအခါ ခပ်လှမ်းလှမ်းမှနေ၍ ၅၀ ခန့်သောပရောဖက်အမျိုးသားတို့ စောင့်ကြည့်နေကြစဉ် ဧလိယသည် အံ့ဖွယ်အမှုတစ်ခုကိုပြုလုပ်သည်။ “ဧလိယသည် မိမိဝတ်လုံကိုယူ၍ လိပ်ပြီးမှ၊ ရေကိုရိုက်သဖြင့် ရေသည်တစ်ဖက်တစ်ချက်ကွဲ၍၊ ထိုသူနှစ်ယောက်တို့သည် မြေပေါ်မှာလျှောက်သွားကြ၏။”—၄ ဓမ္မရာဇဝင် ၂:၈။

သူတို့ဖြတ်ပြီးသောအခါ ဧလိယက ဧလိရှဲအား “သင်နှင့်ငါမကွာမီ၊ ငါ၌တစ်စုံတစ်ခုသောဆုကိုတောင်းလော့” ဟုဧလိရှဲအားဆို၏။ ဧလိရှဲက ဧလိယ၏ဝိညာဉ် “နှစ်ဆသောအဖို့” ကိုတောင်းဆို၏—ယင်းသည် သာမန်အားဖြင့် သားဦးတစ်ယောက်ရသင့်ရထိုက်သော နှစ်ဆသောအဖို့ဖြစ်သည်။ သားဦးတစ်ယောက်သည် မိမိ၏ဖခင်ကိုရိုသေသကဲ့သို့ ဧလိရှဲသည် ဧလိယကို အမှန်ပင်ရိုသေခဲ့သည်။ ထို့အပြင်သူသည် ဣသရေလလူမျိုး၌ ယေဟောဝါ၏ပရောဖက်အဖြစ် ဧလိယကိုဆက်ခံသူဖြစ်လာရန် ဘိသိက်ပေးခံထားရသည်။ ထိုကြောင့် သူ၏တောင်းဆိုမှုသည် အတ္တဆန်ခြင်း သို့မဟုတ် မသင့်တော်မလျောက်ပတ်ခြင်းမဟုတ်ပါ။ သို့သော် ယေဟောဝါသာလျှင် ဤတောင်းဆိုချက်ကိုပေးနိုင်ကြောင်း သိသောကြောင့် ဧလိယက “သင်သည်ရခဲသောဆုကို တောင်း၏” ဟုဝင့်ဝါမှုကင်းလျက်ဆို၏။ သူကဆက်၍ “သင်နှင့်ငါကွာသည်ကိုမြင်လျှင်ရမည်။ သို့မဟုတ် မရဟုပြောဆို၏။”—၄ ဓမ္မရာဇဝင် ၂:၉၊ ၁၀; တရားဟောရာ ၂၁:၁၇။

ဧလိရှဲသည် ခါတိုင်းထက်ပို၍ သူ၏သခင်နှင့်နီးနီးကပ်ကပ်နေမည်ဟု စိတ်ပိုင်းဖြတ်ထားမည်မှာသေချာသည်။ ထိုနောက် “မီးရထားနှင့်မီးမြင်း” တို့ပေါ်လာသည်။ ဧလိရှဲ၏ ထိတ်ထိတ်ပျာပျာမျက်လုံးများရှေ့မှောက်တွင်ပင် ဧလိယသည် လေပွေအားဖြင့်ချီဆောင်ခံရသည်—အခြားဒေသသို့ အံ့ဖွယ်ပြောင်းရွှေ့ခံရသည်။b ဧလိရှဲသည် ဧလိယ၏ဝတ်လုံကိုကောက်ယူ၍ ယော်ဒန်မြစ်ကမ်းခြေသို့ ပြန်လျှောက်လာခဲ့သည်။ “ဧလိယကိုးကွယ်သော ဘုရားသခင်ထာဝရဘုရားသည် အဘယ်မှာရှိတော်မူသနည်း” ဟုဆိုလျက်ရေကိုရိုက်လေသည်။ ရေတစ်ဖက်တစ်ချက်ကွဲသွားခြင်းက ဧလိရှဲသည် ဧလိယကိုဆက်ခံသူအဖြစ် ဘုရားသခင့်ထောက်ပံ့မှုရရှိကြောင်း ရှင်းလင်းစွာသက်သေထူသည်။—၄ ဓမ္မရာဇဝင် ၂:၁၁-၁၄။

ကျွန်ုပ်တို့အတွက်သင်ခန်းစာ

ဧလိယနှင့်အတူ အထူးလုပ်ငန်းတော်၌ပါဝင်ရန် ဖိတ်ကြားကမ်းလှမ်းခံရသောအခါ ဣသရေလ၏အဦးဆုံးသောပရောဖက်ကိုပြုစုရန် ဧလိရှဲသည် ချက်ချင်းပင် သူ၏လယ်ကိုစွန့်ခဲ့သည်။ “ဧလိယ၏လက်ကိုရေလောင်းသောသူ”c အဖြစ်သိရှိလာကြသောကြောင့် သူ၏တာဝန်အချို့မှာ အခိုင်းအစေဖြစ်ကြောင်းထင်ရှားသည်။ (၄ ဓမ္မရာဇဝင် ၃:၁၁) သို့သော် ဧလိရှဲသည် သူ၏အလုပ်ကို အခွင့်ထူးတစ်ခုအဖြစ်ရှုမြင်ခဲ့ပြီး ဧလိယဘေး၌ သစ္စာရှိစွာစွဲမြဲခဲ့သည်။

ယနေ့တွင် ယေဟောဝါ၏ကျေးကျွန်များစွာတို့သည် ထပ်တူကိုယ်ကျိုးစွန့်စိတ်ဓာတ်ကို တင်ပြကြသည်။ အချို့တို့သည် ဝေးလံသည့်ဒေသများ၌ သတင်းကောင်းဟောရန် သို့မဟုတ် ဗေသလမိသားစုဝင်များအဖြစ်အမှုထမ်းရန် သူတို့၏ “လယ်များ” နှင့်အသက်မွေးဝမ်းကျောင်းလုပ်ငန်းများကို စွန့်လွှတ်ခဲ့ကြသည်။ အခြားသူများမှာမူ အသင်းမ၏ဆောက်လုပ်ရေးစီမံကိန်းများတွင်ပါဝင်ရန် နိုင်ငံရပ်ခြားသို့ ခရီးထွက်ခဲ့ကြသည်။ များစွာတို့သည် နိမ့်ကျသည်ဟုယူမှတ်မည့်အလုပ်များကို လက်ခံခဲ့ကြသည်။ သို့တိုင် ယေဟောဝါအတွက်လုပ်ဆောင်နေသူအားလုံးသည် အရေးမပါသည့်လုပ်ငန်းတော်ကို ဆောင်ရွက်နေကြခြင်းမဟုတ်ပါ။ ယေဟောဝါသည် မိမိအတွက် လိုလိုလားလားအမှုဆောင်သူများကို လေးမြတ်တန်ဖိုးထားပြီး သူတို့၏ကိုယ်ကျိုးစွန့်စိတ်ဓာတ်ကို ကောင်းချီးပေးတော်မူမည်။—မာကု ၁၀:၂၉၊ ၃၀။

ဧလိရှဲသည် ဧလိယ၌ အဆုံးတိုင်စွဲမြဲခဲ့သည်။ သူသည် အခွင့်အရေးကမ်းလှမ်းခံရသည့်အခါ၌ပင် အသက်ကြီးပရောဖက်အားစွန့်ပစ်ရန် ငြင်းပယ်ခဲ့သည်။ သူပြုစုပျိုးထောင်ထားသည့် ဧလိယနှင့်ရင်းနှီးသောဆက်ဆံရေးက ယင်းသို့သော နှစ်လိုဖွယ်သစ္စာစောင့်သိသည့်မေတ္တာကို ဖြစ်စေသည်မှာ ယုံမှားဖွယ်မရှိချေ။ ယနေ့တွင် ယေဟောဝါ၏ကျေးကျွန်များသည် ယေဟောဝါနှင့်သူတို့၏ဆက်ဆံရေးကို ခိုင်မြဲစေရန်၊ သူတို့၏ယုံကြည်သူချင်းတို့နှင့် ပိုမိုနီးကပ်ရန် ကြိုးစားကြသည်။ ယေဟောဝါနှင့်ပတ်သက်၍ ကျမ်းစာက “သစ္စာစောင့်သိသူနှင့် ကိုယ်တော် [ယေဟောဝါ] သည် သစ္စာစောင့်သိစွာစီရင်မည်” ဟုဆိုထားသောကြောင့် စည်းလုံးသောနှောင်ကြိုးရှိခြင်းသည် ကောင်းချီးခံစားရလိမ့်မည်။—၂ ဓမ္မရာဇဝင် ၂၂:၂၆။

[အောက်ခြေမှတ်ချက်များ]