မည်သူ့စံနှုန်းများကို သင်ယုံကြည်စိတ်ချနိုင်သနည်း

အာဖရိကသို့ ပထမအကြိမ်ရောက်လာသူတစ်ဦးသည် လမ်းဘေးတွင် မတ်မတ်ရပ်နေသော လူတစ်ယောက်ကို အာရုံစိုက်မိသည်။ ထိုသူသည် မတ်မတ်ရပ်နေစဉ်ပင် မိနစ်အနည်းငယ်တိုင်း သူ၏ခြေထောက်ကိုတဖြည်းဖြည်းရွှေ့ကာ တစ်ဖက်သို့အနည်းငယ် ရွေ့ ရှားသွားသည်ကို သတိပြုမိသည်။ အဘယ်ကြောင့် ထိုသို့ရွေ့ ရှားနေရသည်ကို ခဏကြာမှ သူသဘောပေါက်သွားသည်။ အမှန်မှာ ထိုသူသည် ကြေးနန်းတိုင်အရိပ်ကို ခိုနေခြင်းဖြစ်သည်။ မွန်းလွဲပိုင်း နေကျစဉ် ၎င်းအရိပ်သည်လည်း တဖြည်းဖြည်းရွေ့နေ၏။

ထိုနေရိပ်နည်းတူ လူမှုရေးကိစ္စများနှင့် စံနှုန်းများသည်လည်း အမြဲတစေပြောင်းလဲလျက်ရှိသည်။ “အလင်းတို့၏အဘ” ယေဟောဝါဘုရားသခင်မူကား ပြောင်းလဲခြင်းမရှိပေ။ “ထိုအဘသည် ပြောင်းလဲခြင်းမရှိ၊ လှည့်၍လည်းအရိပ်ကျစေတော်မမူတတ်” ဟုတပည့်တော်ယာကုပ် ရေးသားခဲ့သည်။ (ယာကုပ် ၁:၁၇၊ သမ္မာ) ဟေဗြဲပရောဖက်မာလခိက ဘုရားသခင်ကိုယ်တော်တိုင်၏ ဤကြေညာချက်ကို မှတ်တမ်းတင်ခဲ့သည်– “ငါသည် ထာဝရဘုရားဖြစ်၏၊ ပြောင်းလဲခြင်းမရှိ။” (မာလခိ ၃:၆) ဟေရှာယလက်ထက်တွင် ဣသရေလလူမျိုးကို ဘုရားသခင် ဤသို့မိန့်ဆိုခဲ့သည်– “သင်တို့အသက်ကြီး၍ ဆံပင်ဖြူသည်တိုင်အောင် ငါသည် ထိုသို့သောသူဖြစ်၍ သင်တို့ကိုဆောင်ရွက်မည်။ ငါပြုခဲ့ပြီးသည်အတိုင်း ထမ်းဦးမည်။” (ဟေရှာယ ၄၆:၄) ယင်းကြောင့် အချိန်ကုန်လွန်သွားခြင်းက တန်ခိုးကြီးရှင်ဘုရားသခင်၏ကတိတော်များအပေါ် ကျွန်ုပ်တို့၏ယုံကြည်စိတ်ချမှုကို မလျော့သွားစေပါ။

ပညတ်တရားမှ သင်ခန်းစာ

ယေဟောဝါ၏ကတိတော်များသည် ယုံကြည်စိတ်ချနိုင်ပြီး ပြောင်းလဲခြင်းမရှိသကဲ့သို့ ကိုယ်တော်၏အမှားအမှန်စံနှုန်းများလည်း ထို့အတူဖြစ်သည်။ တစ်ခုသာမှန်ကန်သော အလေးနှစ်စုံအသုံးပြုသည့် ကုန်သည်တစ်ဦးကို သင်ယုံကြည်စိတ်ချမည်လော။ လုံးဝယုံကြည်မည်မဟုတ်ပေ။ အလားတူ “မမှန်သောချိန်ခွင်သည် ထာဝရဘုရားစက်ဆုပ်ရွံရှာတော်မူဖွယ်၊ မှန်သောအလေးမူကား နှစ်သက်တော်မူဖွယ်ဖြစ်၏။” (သု. ၁၁:၁; ၂၀:၁၀) ဣသရေလလူမျိုးအား ယေဟောဝါပေးခဲ့သောပညတ်တွင် ဤအမိန့်တော်ပါဝင်သည်– “တရားတွေ့သောအမှု၊ တိုင်းထွာသောအမှု၊ ချိန်တွယ်သောအမှု၊ ခြင်တွယ်သောအမှု၌ မတရားစွာမပြုရကြ။ မှန်သောချိန်ခွင်၊ မှန်သောအလေး၊ မှန်သောဧဖာ၊ မှန်သောဟိန်များကိုသုံးရကြမည်။ ငါသည် သင်တို့ကို အိဂျစ်ပြည်မှနုတ်ဆောင်သော သင်တို့၏ဘုရားသခင် ထာဝရဘုရားဖြစ်၏။”—ဝတ်ပြုရာ ၁၉:၃၅၊ ၃၆၊ သမ္မာ။

ထိုအမိန့်ကိုနာခံခြင်းဖြင့် ဣသရေလလူများသည် ဘုရားသခင်၏မျက်နှာသာတော်သာမက စည်းစိမ်ဥစ္စာများစွာလည်း ရရှိခဲ့သည်။ အလားတူစွာ အလေးချိန်နှင့်အတိုင်းအတာများတွင်သာမက ဘဝကဏ္ဍအသီးသီးတွင် ယေဟောဝါ၏မပြောင်းလဲသောစံနှုန်းများကို လိုက်နာစွဲကိုင်ခြင်းက ကိုယ်တော်အားယုံကြည်ကိုးစားသော ဝတ်ပြုသူကို အကျိုးပေးသည်။ ဘုရားသခင် ဤသို့ကြေညာသည်– “ငါသည် သင်၏အကျိုးနှင့်ယှဉ်သောအရာကိုသွန်သင်၍ သင်သွားအပ်သောလမ်းဖြင့်ပို့ဆောင်သော သင်၏ဘုရားသခင် ထာဝရဘုရားဖြစ်၏။”—ဟေရှာယ ၄၈:၁၇။

ယနေ့ စံနှုန်းများ အဘယ်ကြောင့်ကျဆင်းနေသနည်း

သမ္မာကျမ်းစာက ယနေ့ စံနှုန်းများကျဆင်းနေခြင်းအကြောင်းရင်းကို ဖော်ပြသည်။ သမ္မာကျမ်းစာ၏ နောက်ဆုံးကျမ်းစောင် ဗျာဒိတ်ကျမ်းက ကောင်းကင်စစ်ပွဲတစ်ခုကိုဖော်ပြကာ ယင်း၏အကျိုးဆက်ကို ယနေ့ထိတိုင် လူသားအားလုံး ခံစားနေကြရသည်။ တမန်တော်ယောဟန် ဤသို့ရေးခဲ့သည်– “ကောင်းကင်၌စစ်ဖြစ်၏။ မိက္ခေလနှင့် သူ၏ကောင်းကင်တမန်တို့သည် နဂါးကိုစစ်တိုက်ကြ၏။ နဂါးနှင့်သူ၏တမန်တို့သည် စစ်တိုက်၍မနိုင်ကြ။ ကောင်းကင်၌လည်း သူတို့နေစရာမရှိ။ ထိုအခါ ဤလောကတစ်နိုင်ငံလုံးကိုလှည့်ဖြား၍ . . . စာတန်အမည်ရှိသော ရှေးမြွေဟောင်းတည်းဟူသော နဂါးကြီးကိုလည်းကောင်း၊ သူနှင့်အတူ သူ၏တမန်တို့ကိုလည်းကောင်း မြေကြီးသို့ချလိုက်ကြ၏။”—ဗျာဒိတ် ၁၂:၇-၉။

ထိုစစ်ပွဲ၏ နောက်ဆက်တွဲအကျိုးဆက်ကားအဘယ်နည်း။ ယောဟန် ဤသို့ဆက်ရေးခဲ့သည်– “ထိုကြောင့်၊ ကောင်းကင်နှင့်ကောင်းကင်သားတို့ ရွှင်လန်းကြလော့။ မြေကြီးနှင့်ပင်လယ်သည် အမင်္ဂလာရှိ [ဝမ်းနည်းဖွယ်ဖြစ်]၏။ အကြောင်းမူကား [စာတန်] သည် မိမိကာလတစ်ခဏသာရှိသည်ကိုသိ၍၊ ပြင်းစွာသောဒေါသအမျက်နှင့်တကွ သင်တို့ရှိရာသို့ဆင်းလေပြီ။”—ဗျာဒိတ် ၁၂:၁၂။

၁၉၁၄ ခုနှစ်၌ပထမကမ္ဘာစစ်ဖြစ်သောအခါ ‘မြေကြီးအတွက်ဆိုးကျိုး’ ကျရောက်လာပြီး ယခုခေတ်စံနှုန်းများနှင့် အလွန်ခြားနားသော စံနှုန်းများကို အဆုံးတိုင်စေခဲ့သည်။ “၁၉၁၄-၁၈ ခုနှစ်စစ်ပွဲကြီးသည် ထိုအချိန်မှ ကျွန်ုပ်တို့အချိန်ကို ခွဲခြားလိုက်သည့် မီးလောင်ပြင်ကြီးကဲ့သို့ဖြစ်သည်။ အနာဂတ်သားကောင်းများကို သေဆုံးစေခဲ့ခြင်း၊ ယုံကြည်ချက်များကိုဖျက်ဆီးပစ်ခြင်း၊ ထင်မြင်ချက်တို့ကိုပြောင်းလဲခဲ့ခြင်း၊ မကုစားနိုင်သည့် စိတ်ပျက်ခြင်းဒဏ်ရာများရစေခြင်းဖြင့် ခေတ်သမယနှစ်ခုစပ်ကြား ပကတိနှင့်စိတ်ပိုင်းဆိုင်ရာ ချောက်ကမ်းပါးကြီးတစ်ခု ဖြစ်ပေါ်စေခဲ့ပြီ” ဟုသမိုင်းပညာရှင် ဘာဘရာတပ်ခ်မင်က ပြောခဲ့သည်။ သမိုင်းပညာရှင်အခြားတစ်ဦးဖြစ်သူ အဲရစ်ခ် ဟော့စ်ဗောမ်က သဘောတူညီစွာ ဤသို့ဆိုသည်– “ဖွံ့ဖြိုးသည့်နိုင်ငံများတွင် သာမန်အဖြစ်သဘောထားခဲ့ကြသောစံနှုန်းများသည် ၁၉၁၄ ခုနှစ်ကတည်းက သိသိသာသာကျဆင်းယိုယွင်းလာခဲ့ပြီ။ . . . ဆယ့်ကိုးရာစုမှဘိုးဘေးများက အရိုင်းအစိုင်းဟုခေါ်ခဲ့ကြမည့် စံနှုန်းများအား ဤမျှအရှိန်အဟုန်နှင့် ကျင့်သုံးနေကြခြင်းကို သဘောပေါက်ရန် မလွယ်ချေ။”

လူသားချင်းစာနာမှု—နှစ်ဆယ်ရာစု၏ ကိုယ်ကျင့်တရားသမိုင်း စာအုပ်တွင် စာရေးဆရာ ဂျော်နသန် ဂလိုဗာက ဤသို့သတိပြုစေသည်– “ကျွန်ုပ်တို့ခေတ်၏ကြန်အင်လက္ခဏာတစ်ရပ်မှာ ကိုယ်ကျင့်တရားဆိုင်ရာပညတ် ပျောက်ကွယ်နေခြင်းဖြစ်သည်။” အနောက်တိုင်းတွင် ဘာသာတရားကိုင်းရှိုင်းမှု လျော့နည်းနေခြင်းကြောင့် ပြင်ပရင်းမြစ်မှ ကိုယ်ကျင့်တရားဆိုင်ရာပညတ်ကို သူလက်မခံနိုင်သော်လည်း ဤသို့သတိပေးသည်– “ဘာသာရေးဆိုင်ရာ ကိုယ်ကျင့်တရားပညတ်ကို မယုံကြည်သူ ကျွန်ုပ်တို့အနေနှင့် ၎င်းကွယ်ပျောက်သွားခြင်းကို စိုးရိမ်မကင်းဖြစ်နေသင့်သည်။”

စီးပွားရေး၊ နိုင်ငံရေး သို့မဟုတ် ဘာသာရေးတွင်ဖြစ်စေ၊ တစ်ဦးစီနှင့် မိသားစုဆက်ဆံရေးတွင်ပင်ဖြစ်စေ ယုံကြည်အားထားမှုစော်ကားခံရသည့် လက်ရှိအခြေအနေနှင့် ကြောက်မက်ဖွယ်ဆိုးကျိုးများက မြေကြီးသားများအပေါ် ဆိုးကျိုးသက်ရောက်စေရန် စာတန်၏ယုတ်မာသောအကြံအစည်တစ်ခုဖြစ်သည်။ စာတန်သည် သူ၏စစ်ပွဲကို အဆုံးတိုင်ဆင်နွှဲပြီး ဘုရားသခင့်စံနှုန်းများနှင့်အညီ နေထိုင်ရန်ကြိုးစားသူအားလုံး မိမိနှင့်အတူဖျက်ဆီးခံရရန် စိတ်ပိုင်းဖြတ်ထားသည်။—ဗျာဒိတ် ၁၂:၁၇။

အထူးထင်ရှားနေသော ယုံကြည်အားထားမှုစော်ကားခံရခြင်းမှ လွတ်မြောက်ရန် ဖြေရှင်းနည်းရှိပါသလော။ တမန်တော်ပေတရု ဤသို့ဖြေဆိုသည်– “ယခုရှိသမျှသောအရာတို့သည် ပျက်ရသော်လည်း၊ ဖြောင့်မတ်ခြင်းတရားတည်နေရာ မိုးကောင်းကင်သစ်နှင့်မြေကြီးသစ်ကို ငါတို့သည် [ဘုရားသခင်၏] ကတိတော်နှင့်အညီ မျှော်လင့်ကြ၏။” (၂ ပေတရု ၃:၁၃) ဘုရားသခင်သည် မိမိ၏ရည်ရွယ်ချက်ကို ပြီးမြောက်အောင်မြင်စေနိုင်ရုံမက ပြည့်စုံစေမည်ဟု အာမခံထားသောကြောင့် ထိုကတိတော်ကို ကျွန်ုပ်တို့ယုံကြည်စိတ်ချနိုင်ပါသည်။ ‘မိမိနှုတ်မှထွက်သော’ အဘယ် ‘စကား’ နှင့်ပတ်သတ်၍မဆို ယေဟောဝါဤသို့ကြေညာသည်– “အကျိုးမရှိဘဲ ငါ့ထံသို့မပြန်ရ။ ငါ့အလိုကို ပြည့်စုံစေမည်။ ငါစေခိုင်းသောအမှု၌ အောင်လိမ့်မည်။” အမှန်ယုံကြည်ကိုးစားထိုက်သော ကတိတော်ပင်!—ဟေရှာယ ၅၅:၁၁; ဗျာဒိတ် ၂၁:၄၊ ၅။

ဘုရားသခင့်စံနှုန်းများနှင့်အညီ နေထိုင်ခြင်း

ပြောင်းလဲကျဆင်းနေသောစံနှုန်းများရှိ ဤလောကတွင် ယေဟောဝါသက်သေများသည် ကျမ်းစာပါ အကျင့်အကြံစံနှုန်းများနှင့်အညီနေထိုင်ရန် ကြိုးစားအားထုတ်ကြသည်။ ယင်းကြောင့် သူတို့သည် အများနှင့်မတူကြောင်းထင်ရှားသဖြင့် အခြားသူများ၏အာရုံစိုက်မှုနှင့် အထင်သေးမှုကိုခံရလေ့ရှိကြသည်။

လန်ဒန်တွင် ယေဟောဝါသက်သေများ၏စည်းဝေးကြီးတစ်ခု၌ ယေဟောဝါသက်သေများသည် အမှန်တကယ်ပင် ခရစ်ယာန်များဟုတ်မဟုတ် တီဗွီသတင်းထောက်တစ်ဦးက ပြောရေးဆိုခွင့်ရှိသူတစ်ဦးအား မေးမြန်းခဲ့သည်။ သူဤသို့ဖြေကြားခဲ့သည်– “ယေရှုဟာ ကျွန်တော်တို့ရဲ့စံနမူနာရှင်ဖြစ်တဲ့အတွက် ခရစ်ယာန်အစစ်တွေပါ။ ဒီလောကမှာ တစ်ကိုယ်ကောင်းဆန်မှုတွေ အများကြီးရှိနေပေမဲ့ ယေရှုခရစ်ကိုပဲ ကျွန်တော်တို့ရဲ့လမ်းခရီး၊ ကျွန်တော်တို့ရဲ့အမှန်တရားနဲ့ ကျွန်တော်တို့ရဲ့အသက်အဖြစ် အာရုံစိုက်ကြတယ်။ ကိုယ်တော်ဟာ သုံးပါးပေါင်းတစ်ဆူအဝင်မဟုတ်ဘဲ ဘုရားသခင့်သားတော်ဖြစ်တယ်လို့ယုံကြည်တာကြောင့် သမ္မာကျမ်းစာကို ကျွန်တော်တို့နားလည်သဘောပေါက်တဲ့ပုံက လူသိများတဲ့ဘာသာတရားတွေနဲ့ ခြားနားပါတယ်။”

ဘီဘီစီ ရုပ်မြင်သံကြားပေါ် ဤလူတွေ့မေးမြန်းခန်းကို ထုတ်လွှင့်သောအခါ သတင်းထောက်က ဤသို့ပြောရင်းအစီအစဉ်ကို နိဂုံးချုပ်ခဲ့သည်– “ယေဟောဝါသက်သေတွေ ကျွန်တော်တို့ရဲ့အိမ်တံခါးကို ဘာကြောင့်လာခေါက်ကြတယ်ဆိုတာ အခုပိုပြီးသိလာတယ်။ တစ်ချိန်တည်းတစ်နေရာထဲမှာ သပ်သပ်ရပ်ရပ်ဝတ်စားထားပြီး အမူအကျင့်ကောင်းတဲ့လူ ၂၅,၀၀၀ စုဝေးနေတာကို ကျွန်တော်မတွေ့ဖူးဘူး။” ဘုရားသခင်၏ပြောင်းလဲခြင်းမရှိသောစံနှုန်းများကို လိုက်နာခြင်းသည် ဉာဏ်ပညာရှိကြောင်း အပြင်လူတစ်ဦးထံမှ အလွန်ကောင်းသောသက်သေခံချက်ပါတကား!

အချို့သူတို့သည် ကိုယ်တိုင်မချမှတ်သည့်စံနှုန်းများနှင့်အညီ နေထိုင်ခြင်းကို သဘောကျကြမည်မဟုတ်သော်လည်း သင့်ကျမ်းစာကိုလေ့လာပြီး ဘုရားသခင့်စံနှုန်းများကိုသင်ယူရန် တိုက်တွန်းပါသည်။ သို့သော် သာမန်ကာလျှံကာဆန်းစစ်ကြည့်ရုံနှင့် ကျေနပ်မနေပါနှင့်။ တမန်တော်ပေါလု၏ ဤသတိပေးချက်ကိုလိုက်နာပါ– “သင်တို့သည် လော[က]ပုံသဏ္ဌာန်ကိုမဆောင်ကြနှင့်။ ကောင်းမြတ်သောအရာ၊ နှစ်သက်ဖွယ်သောအရာ၊ စုံလင်သောအရာတည်းဟူသော ဘုရားသခင်အလိုတော်ရှိသောအရာသည် အဘယ်အရာဖြစ်သည်ကို သင်နိုင်မည်အကြောင်း၊ စိတ်နှလုံးကိုအသစ်ပြင်ဆင်၍ ပုံသဏ္ဌာန်ပြောင်းလဲခြင်းသို့ရောက်ကြလော့။” (ရောမ ၁၂:၂) သင့်ရပ်ကွက်ရှိ ဘုရားသခင့်နိုင်ငံတော်ခန်းမသို့သွားပြီး ထိုတွင်ရှိသက်သေခံများနှင့် အကျွမ်းတဝင်ရှိပါ။ သူတို့သည် သမ္မာကျမ်းစာ၏ကတိတော်များကို ယုံကြည်စိတ်ချကြ၍ ဘုရားသခင့်စံနှုန်းများနှင့်အညီ နေထိုင်ရန်ကြိုးစားခြင်းဖြင့် ကိုယ်တော်အားယုံကြည်ကိုးစားကြောင်းတင်ပြသည့် သာမန်လူတို့ဖြစ်သည်ကို သင်တွေ့ရှိရပေမည်။

ဘုရားသခင်၏ ပြောင်းလဲခြင်းမရှိ၊ ယုံကြည်စိတ်ချနိုင်သော စံနှုန်းများကို လိုက်နာစောင့်ထိန်းခြင်းအားဖြင့် သင့်အသက်တာတွင် ကောင်းချီးအမှန်ခံစားရပေလိမ့်မည်။ ဘုရားသခင်၏ ဤဖိတ်ကြားချက်ကို ဂရုပြုပါ– “သင်သည် ငါ၏ပညတ်တို့ကို စောင့်ရှောက်ပါစေသော။ သို့ပြုလျှင် သင်၏ချမ်းသာသည် မြစ်ကဲ့သို့လည်းကောင်း၊ သင်၏ဖြောင့်မတ်ခြင်း . . . သည် သမုဒ္ဒရာလှိုင်းတံပိုးကဲ့သို့လည်းကောင်း ဖြစ်ရလိမ့်မည်။”—ဟေရှာယ ၄၈:၁၈။

[စာမျက်နှာ ၅ ပါ ရုပ်ပုံ]

ယနေ့ စီးပွားရေး၊ နိုင်ငံရေး၊ ဘာသာရေးနှင့် မိသားစုဆက်ဆံရေးတွင် ယုံကြည်အားထားမှု စော်ကားခံရ