“စိန့်များ” အပေါ် မျက်မှောက်ခေတ် စိတ်ဝင်စားမှု

“သူရဲကောင်းများကို ကျွန်ုပ်တို့စိတ်ကုန်ခဲ့ချိန်ကို သတိရပါသလော။ သို့သော် စက်တင်ဘာ ၁၃ ရက်နေ့တွင် မာသာထရီဇာ၏ဈာပနာအခမ်းအနားကို ရှုစားခဲ့ကြသူ အမေရိကန်လူမျိုး ၄.၂ သန်းမူကား ထိုသို့မခံစားကြရချေ။ မာသာထရီဇာကွယ်လွန်ခဲ့သော စက်တင်ဘာ ၅ ရက်နေ့ကတည်းက သူ့အား စိန့်တစ်ဦးအဖြစ် တရားဝင်အသိအမှတ်ပြုပြီး ကြေညာပေးပါရန် ဗက်တီကန်ကို လူတို့တရစပ်တောင်းဆိုခဲ့ကြပြီ။ ထိုသို့ဖြစ်ပျက်လာမည်ဟု သံသယဖြစ်သူရှား၏။”—ဆန်း-ဆဲန်တင်နယ်လ်၊ အမေရိကန်ပြည်ထောင်စု၊ ၁၉၉၇၊ အောက်တိုဘာ ၃။

ကက်သလစ်သာသနာပြု မာသာထရီဇာ၏ လူလူချင်းစာနာထောက်ထားပြီး ပြုလုပ်ခဲ့သောစေတနာ့ဝန်ထမ်းလုပ်ငန်းကို အမှန်တကယ်ပင် စိန့်တစ်ဦး၏အလုပ်အဖြစ် လူအများယူမှတ်ကြသည်။ အခြားသာသာတရားများတွင်လည်း သူရဲကောင်းအာဇာနည်များရှိကြပေသည်။ သို့သော်၊ စိန့်အဖြစ် ရိုမန်ကက်သလစ်ချာ့ချ်က တရားဝင်အသိအမှတ်ပြုသူများကဲ့သို့ ထိုသူတို့ အသိအမှတ်ပြုခံရကြမည်မဟုတ်ပေ။

ပုပ်ဂျွန်ပေါလ် ၂ သည် သူ၏လက်ထက်တွင် လူ ၃၀၀ နီးပါးကို စိန့်အဖြစ် ချီးမြှောက်အသိအမှတ်ပြုခဲ့ပြီ၊ ယင်းသည် ၂၀ ရာစုရှိ ပုပ်ရဟန်းမင်းအားလုံး အသိအမှတ်ပြုခဲ့သော စိန့်အရေအတွက်စုစုပေါင်းထက် ပိုများသည်။a ထိုသို့အသိအမှတ်ပြုခံရသူအများစုကို ကက်သလစ်ဘာသာဝင်အများက မသိကြဘဲနှင့် ထို “စိန့်များ” ကို အဘယ်ကြောင့် ဤမျှစွဲလမ်းလေးမြတ်ကြရသနည်း။

နိုထရာဒမ်း တက္ကသိုလ်မှ ဓမ္မပညာရှင် လောရဲန့်စ် ခါနင်းဟမ်က ဤသို့ရှင်းပြသည်– “လူအများသည် ဤလောကတွင် သန့်ရှင်းမြင့်မြတ်မှုရှိခြင်းကို စိတ်ဝင်စားကြ၏။ စိန့်များက ယနေ့ပင် သူရဲကောင်းအာဇာနည်ရှိနိုင်ကြောင်း ဖော်ပြသည်။” ထို့အပြင် “စိန့်များ” သည် ဘုရားသခင်ထံ အထူးချဉ်းကပ်ခွင့်ရှိကြပြီး အသက်ရှင်သူများအတွက် ထိရောက်စွာ ကြားဖျန်ပေးနိုင်သည်ဟု ယူမှတ်ကြ၏။ “စိန့်” တစ်ပါး၏ ရုပ်ကြွင်းများကို တွေ့ရှိသောအခါ ၎င်းတို့၌ တန်ခိုးရှိသည်ဟူသောယုံကြည်ချက်ဖြင့် ထိုရုပ်ကြွင်းများကို ကိုးကွယ်ကြသည်။

ကက်သလစ်အယူဝါဒကို ပြန်လည်အတည်ပြုဖို့ ၁၆ ရာစု၌ ထုတ်ဝေခဲ့သော ထရဲန့်ကောင်စီ၏အမေးအဖြေစာက ဤသို့ပြဋ္ဌာန်းသည်– “‘သခင်ဘုရား၌အိပ်ပျော်သူ’ စိန့်များကို ရိုသေကိုင်းရှိုင်းခြင်း၊ သူတို့၏ကြားဖျန်မှုကို တောင်းခံခြင်းနှင့် သူတို့၏ရုပ်ကြွင်းများ၊ အရိုးပြာများကို ကိုးကွယ်ခြင်းတို့သည် ဘုရားသခင့်ဂုဏ်တော်ကို ဆုတ်ယုတ်စေဖို့ ဝေးလေစွ၊ ပို၍ပင်ဂုဏ်တက်စေသည်၊ ခရစ်ယာန်တစ်ဦး၏မျှော်လင့်ချက်သည် တက်ကြွလှုပ်ရှား၊ သန်စွမ်းလေ၊ ၎င်းခရစ်ယာန်သည် စိန့်များ၏မွန်မြတ်သောအကျင့်များကို အတုယူလေ ဘုရားသခင့်ဂုဏ်တော် တက်လေဖြစ်သည်ဟု ကျွန်ုပ်တို့အခိုင်အမာကောက်ချက်ချသည်။” (ထရဲန့်ကောင်စီ၏ဓမ္မပုစ္ဆာ၊ ၁၉၀၅) စစ်မှန်သောခရစ်ယာန်များသည် ဘုရားသခင်ထံ သင့်လျော်စွာချဉ်းကပ်၍ ဘုရားသခင့်အကူအညီကိုရရှိရန် သန့်ရှင်းဖြူစင်စွာ အသက်ရှင်လိုကြပါသည်။ (ယာကုပ် ၄:၇၊ ၈) ထို့ကြောင့် ဘုရားသခင့်နှုတ်မြွက်စကားတော်အရ မည်သူတို့သည် စိန့်အစစ်အမှန်များအဖြစ် အရည်အချင်းပြည့်မီကြသနည်း။ ဤသူတို့သည် အဘယ်အခန်းကဏ္ဍမှ ပါဝင်ဆောင်ရွက်ကြသနည်း။

[အောက်ခြေမှတ်ချက်]