စစ်မှန်သောနှစ်သိမ့်မှုကို အဘယ်နေရာ၌ ရှာတွေ့နိုင်သနည်း

“နှစ်သိမ့်ခြင်းရှိသမျှ၏အရှင်တည်းဟူသော ငါတို့အရှင်ယေရှုခရစ်၏ခမည်းတော် ဘုရားသခင်သည် . . . ဆင်းရဲ . . . အမျိုးမျိုးကို ခံရသော . . . ငါတို့အားနှစ်သိမ့်စေတော်မူ၏။”—၂ ကောရိန္သု ၁:၃၊ ၄၊ သမ္မာ။

၁။ အဘယ်အခြေအနေတို့က နှစ်သိမ့်မှုအလွန်လိုအပ်ကြောင်း လူတို့ကိုခံစားစေသနည်း။

မသန်မစွမ်းဖြစ်စေသောအဖျားအနာက လူနာအား ဘဝပျက်ပြီဟုခံစားစေ၏။ မြေငလျင်၊ မုန်တိုင်းနှင့် အစာခေါင်းပါးခြင်းတို့က လူတို့ကို ဆင်းရဲနွမ်းပါးစေ၏။ စစ်ကြောင့် မိသားစုဝင်အချို့ သေဆုံးသွားရ၏၊ အိုးအိမ်မဲ့ဖြစ်ကြရ၏၊ သို့မဟုတ် အိမ်ယာပိုင်ရှင်တို့သည် ပိုင်ဆိုင်ရာတို့ကို စွန့်ပစ်သွားကြရ၏။ မတရားမှုကြောင့် စိတ်သက်သာရာရယူနိုင်ရာနေရာမရှိဟု လူတို့ကို ခံစားစေပေမည်။ ဤသို့သောဝမ်းနည်းပူဆွေးမှုများကို ကြုံတွေ့ရသူတို့သည် နှစ်သိမ့်မှုအလွန်လိုအပ်နေသည်။ ယင်းကို အဘယ်နေရာတွင် တွေ့ရှိနိုင်သနည်း။

၂။ ယေဟောဝါပေးသောနှစ်သိမ့်မှုသည် အဘယ်ကြောင့် တစ်မူထူးသနည်း။

^၂ လူအချို့နှင့် အဖွဲ့အစည်းအချို့က နှစ်သိမ့်မှုကို ကြိုးစားပေးကြ၏။ ကြင်နာသောစကားကို လေးမြတ်တန်ဖိုးထားတတ်ကြသည်။ ကယ်ဆယ်ရေးအစီအစဉ်တို့က လိုအပ်ရာများကို ယာယီဖြည့်စွက်ပေးသည်။ သို့သော် စစ်မှန်သောဘုရားသခင် ယေဟောဝါတစ်ပါးတည်းသာလျှင် ပျက်စီးခြင်းရှိသမျှကို ဖြေရှင်းပေးနိုင်ပြီး ထိုသို့သောဘေးဆိုးများ နောက်ထပ်မဖြစ်စေရန် လိုအပ်သည့်အကူအညီကို ပေးနိုင်သည်။ ကိုယ်တော်နှင့်ပတ်သက်၍ သမ္မာကျမ်းစာက ဤသို့ဆိုသည်– “သနားခြင်းကရုဏာ၏အဘ၊ နှစ်သိမ့်ခြင်းရှိသမျှ၏အရှင်တည်းဟူသော ငါတို့အရှင်ယေရှုခရစ်၏ခမည်းတော် ဘုရားသခင်သည် မင်္ဂလာရှိတော်မူစေသတည်း။ ငါတို့သည် ဘုရားသခင်၏ကျေးဇူးတော်အားဖြင့် ကိုယ်တိုင်နှစ်သိမ့်ခြင်းရှိသကဲ့သို့ ဆင်းရဲ . . . အမျိုးမျိုးကိုခံရသောသူတို့အား နှစ်သိမ့်စေနိုင်မည်အကြောင်း ဆင်းရဲ . . . အမျိုးမျိုး၌ဘုရားသခင်သည် ငါတို့အားနှစ်သိမ့်စေတော်မူ၏။” (၂ ကောရိန္သု ၁:၃၊ ၄၊ သမ္မာ) ကျွန်ုပ်တို့ကို ယေဟောဝါ မည်သို့နှစ်သိမ့်ပေးသနည်း။

ပြဿနာများ၏ရင်းမြစ်မှစ ဖြေရှင်းခြင်း

၃။ လူသားအပေါင်း၏ပြဿနာရင်းမြစ်များကို ဘုရားသခင်ပေးသောနှစ်သိမ့်မှုက မည်သို့ဖြေရှင်းသနည်း။

^၃ အာဒံ၏အပြစ်ကြောင့် လူ့မိသားစုတစ်ရပ်လုံးသည် မစုံလင်မှုကို အမွေခံခဲ့ကြရာ ယင်းကြောင့် မရေမတွက်နိုင်သောပြဿနာများကြုံရပြီး အဆုံးတွင် သေရကြသည်။ (ရောမ ၅:၁၂) “ဤလောကကိုအစိုးရသောမင်း” စာတန်ကြောင့် အခြေအနေသာ၍ဆိုးရွားနေခြင်းဖြစ်သည်။ (ယောဟန် ၁၂:၃၁; ၁ ယောဟန် ၅:၁၉) လူအပေါင်းကြုံတွေ့နေရသည့် ဝမ်းနည်းကြေကွဲဖွယ်အခြေအနေကြောင့် ယေဟောဝါစိတ်မကောင်းဖြစ်ရုံထက်မက တစ်ပါးတည်းသောသားတော်ကို ရွေးနုတ်ဖိုးအဖြစ်ဖြင့် သူတို့ကိုကယ်တင်ဖို့ စေလွှတ်တော်မူခဲ့သည်။ သားတော်ကိုယုံကြည်လျှင် အာဒံအပြစ်၏အမွေဆိုးမှ လွတ်မြောက်မည်ဟု ကိုယ်တော်မိန့်တော်မူခဲ့သည်။ (ယောဟန် ၃:၁၆; ၁ ယောဟန် ၄:၁၀) ကောင်းကင်ပေါ်၊ မြေကြီးပေါ် စီရင်ပိုင်သောအခွင့်ရှိသမျှတို့ကိုခံရသော ယေရှုခရစ်သည် စာတန်နှင့် သူ၏စနစ်ဆိုးတစ်ရပ်လုံးကို ဖျက်ဆီးပစ်လိမ့်မည်ဟုလည်း ဘုရားသခင်ကြိုတင်မိန့်တော်မူခဲ့သည်။—မဿဲ ၂၈:၁၈; ၁ ယောဟန် ၃:၈; ဗျာ. ၆:၂; ၂၀:၁၀။

၄။ (က) သက်သာခြင်းကတိတော်များကို ယုံကြည်စိတ်ချစေရန် အဘယ်အရာကို ယေဟောဝါပြင်ဆင်ထားသနည်း။ (ခ) အဘယ်အချိန်တွင် ကယ်လွှတ်ခြင်းချမ်းသာရမည်ကို ယေဟောဝါ မည်သို့သိမြင်စေသနည်း။

^၄ ကိုယ်တော်၏ကတိတော်များကိုယုံကြည်စိတ်ချစေရန် ဘုရားသခင်တင်ကူးမိန့်တော်မူသမျှအရာအားလုံး ပြည့်စုံကြောင်း သက်သေသာဓကမြောက်မြားစွာကို မှတ်တမ်းတင်ထားစေခဲ့သည်။ (ယောရှု ၂၃:၁၄) လူမတတ်နိုင်သောအခြေအနေများမှ မိမိ၏ကျေးကျွန်များကို ကယ်လွှတ်ရန် ကိုယ်တော်မည်သို့ပြုတော်မူခဲ့ကြောင်း သမ္မာကျမ်းစာတွင် မှတ်တမ်းတင်စေခဲ့၏။ (ထွက်မြောက်ရာ ၁၄:၄-၃၁; ၄ ဓမ္မရာဇဝင် ၁၈:၁၃–၁၉:၃၇) ထို့အပြင် ယေရှုခရစ်မှတစ်ဆင့် ယေဟောဝါအထင်အရှားဖော်ပြခဲ့သည်မှာ ကိုယ်တော်၏ရည်ရွယ်တော်မူချက်တွင် လူသားတို့၏ “အနာရောဂါအမျိုးမျိုးတို့ကို” ငြိမ်းစေရုံမက လူသေတို့ကိုပင် ရှင်ပြန်ထမြောက်စေခြင်းပါဝင်ကြောင်းဖြစ်သည်။ (မဿဲ ၉:၃၅; ၁၁:၃-၆) ဤအရာအားလုံး အဘယ်အချိန်တွင် ဖြစ်ပျက်မည်နည်း။ ယင်းကိုဖြေဆိုရာတွင် ဘုရားသခင့်ကောင်းကင်သစ်နှင့် မြေကြီးသစ်မတိုင်မီ ဤအစီအစဉ်စနစ်ဟောင်း၏ နောက်ဆုံးနေ့ရက်များကို သမ္မာကျမ်းစာပုံဖော်ပြထားခြင်းပါဝင်သည်။ ယေရှု၏ပုံဖော်ချက်သည် ကျွန်ုပ်တို့အသက်ရှင်နေရသောဤအချိန်နှင့် ကိုက်ညီသည်။—မဿဲ ၂၄:၃-၁၄; ၂ တိမောသေ ၃:၁-၅။

ပူပင်သောကရောက်သူတို့ကို နှစ်သိမ့်ပေး

၅။ ရှေးဣသရေလလူတို့ကို နှစ်သိမ့်ပေးရာတွင် ယေဟောဝါသည် သူတို့အား အဘယ်အရာကို အာရုံစိုက်စေခဲ့သနည်း။

^၅ ရှေးဣသရေလတို့နှင့် ယေဟောဝါဆက်ဆံပုံမှ ပူပင်သောကရောက်ချိန်တွင် သူတို့ကိုမည်သို့နှစ်သိမ့်ပေးခဲ့ကြောင်း ကျွန်ုပ်တို့သိရှိရသည်။ ကိုယ်တော်သည် မည်သို့သောဘုရားသခင်မျိုးဖြစ်ကြောင်း သူတို့ကို သတိပေးတော်မူ၏။ ယင်းအချက်က ကိုယ်တော်၏ကတိတော်များ၌ သူတို့၏ယုံကြည်စိတ်ချမှုကို ခိုင်ခံ့စေသည်။ ကိုယ်ကိုယ်နှိုက်သာမက မိမိအား ကိုးကွယ်သူတို့ကို အကူအညီမပေးနိုင်သည့် ရုပ်ပုံတို့နှင့်မတူဘဲ ယေဟောဝါသည် စစ်မှန်၍ အသက်ရှင်တော်မူထသောဘုရားသခင်အဖြစ် ကွင်းကွင်းကွက်ကွက်ခြားနားချက်တို့ကို ကိုယ်တော်၏ပရောဖက်များအား ဖော်ပြပေးခဲ့သည်။ (ဟေရှာယ ၄၁:၁၀; ၄၆:၁; ယေရမိ ၁၀:၂-၁၅) ဟေရှာယအား “ငါ၏လူတို့ကို နှစ်သိမ့်စေကြလော့။ နှစ်သိမ့်စေကြလော့” ဟုမိန့်တော်မူရာတွင် တစ်ဆူတည်းသောစစ်မှန်သည့်ဘုရားသခင်တစ်ပါးအဖြစ် ယေဟောဝါ၏ကြီးမြတ်တော်မူခြင်းကို လေးနက်စေရန် ကိုယ်တော်၏ဖန်ဆင်းခြင်းလက်ရာတော်များဆိုင်ရာ သရုပ်ဖော်ချက်များနှင့် ပုံဖော်ချက်များကိုအသုံးပြုဖို့ ယေဟောဝါသည် မိမိ၏ပရောဖက်ကိုလှုံ့ဆော်ခဲ့သည်။—ဟေရှာယ ၄၀:၁-၃၁။

၆။ ဘယ်သောအခါကယ်လွှတ်လိမ့်မည်အကြောင်း ရံဖန်ရံခါ ယေဟောဝါ မည်သို့ဖော်ပြခဲ့သနည်း။

^၆ မိမိလူတို့ကို ယေဟောဝါကယ်လွှတ်ပေးမည့်အချိန် နီးသလော၊ ဝေးသလောနှင့်စပ်လျဉ်း၍ သတ်သတ်မှတ်မှတ်အချိန်ကို ပြောခြင်းဖြင့် နှစ်သိမ့်မှုပေးခဲ့သောအခါလည်းရှိသည်။ အီဂျစ်မှ ကယ်လွှတ်ခါနီးအချိန်တွင် ကိုယ်တော်သည် ဖိနှိပ်ခံရသောဣသရေလလူတို့ကို ဤသို့မိန့်တော်မူခဲ့၏– “ဖာရောဘုရင်နှင့်အဲဂုတ္တုပြည်အပေါ်မှာ ဘေးတစ်ပါးကို ငါရောက်စေဦးမည်။ ထိုနောက် သင်တို့ကိုလွှတ်လိမ့်မည်။ လွှတ်သောအခါ၌လည်း အကယ်၍ သင်တို့ကို တစ်ပြိုင်နက်နှင်လိမ့်မည်။” (ထွက်မြောက်ရာ ၁၁:၁) ဘုရင်ယောရှဖတ်အချိန်၌ သုံးနိုင်ငံတပ်ပေါင်းစုသည် ယုဒပြည်သို့ ဝင်ရောက်ကျူးကျော်သောအခါ ယေဟောဝါက “နက်ဖြန်နေ့” သူတို့အကျိုးအလို့ငှာ ကြားဝင်ဆောင်ရွက်ပေးမည်အကြောင်း မိန့်တော်မူခဲ့သည်။ (၂ ရာဇဝင်ချုပ် ၂၀:၁-၄၊ ၁၄-၁၇) အခြားတစ်ဖက်တွင်မူ ဗာဗုလုန်မှ သူတို့၏လွတ်မြောက်မှုကို ဟေရှာယအားဖြင့် နှစ်ပေါင်း ၂၀၀ နီးပါး ကြိုတင်မှတ်တမ်းတင်ထားခဲ့ပြီး နောက်ထပ်အသေးစိတ်ကို ကယ်လွှတ်ခံရချိန်မတိုင်မီ နှစ်ပေါင်းတစ်ရာနီးနီး ယေရမိမှတစ်ဆင့် ဖော်ပြပေးခဲ့သည်။ ကယ်လွှတ်ခံရချိန် နီးလာသောအခါ ဘုရားသခင့်ကျေးကျွန်များအတွက် ဤပရောဖက်ပြုချက်များသည် မည်မျှအားပေးမှုဖြစ်ခဲ့သည်တကား!—ဟေရှာယ ၄၄:၂၆–၄၅:၃; ယေရမိ ၂၅:၁၁-၁၄။

၇။ ကယ်လွှတ်ခြင်းကတိတော်တို့တွင် အဘယ်အရာပါဝင်လေ့ရှိခဲ့သနည်း၊ ယင်းက ဣသရေလနိုင်ငံရှိ တည်ကြည်သူတို့ကို မည်သို့အကျိုးပြုခဲ့သနည်း။

^၇ ဘုရားသခင့်လူတို့ကို နှစ်သိမ့်မှုဖြစ်စေသော ကတိတော်များတွင် မကြာခဏပင် မေရှိယနှင့်ပတ်သက်၍ အချက်အလက်များပါဝင်ခြင်းမှာ မှတ်သားဖွယ်ရာပင်။ (ဟေရှာယ ၅၃:၁-၁၂) လူမျိုးတစ်ဆက်ပြီးတစ်ဆက် တည်ကြည်သူတို့ ရင်ဆိုင်ကြုံတွေ့ရသောအခက်အခဲများကြား ယင်းက မျှော်လင့်ချက်ပေးခဲ့သည်။ လုကာ ၂:၂၅ တွင် ကျွန်ုပ်တို့ ဤသို့ဖတ်ရသည်– “ရှုမောင်အမည်ရှိသောသူတစ်ယောက်သည် ယေရုရှလင်မြို့၌ရှိ၏။ ထိုသူသည် ဖြောင့်မတ်သောသူ၊ တရားကိုရိုသေသောသူ၊ ဣသရေလအမျိုး၏သက်သာခြင်း [သို့မဟုတ် နှစ်သိမ့်မှု; အမှန်သော် မေရှိယကြွလာတော်မူခြင်း] အကြောင်းကို မျှော်လင့်သောသူဖြစ်၏။ သန့်ရှင်းသောဝိညာဉ်တော်သည် သူ့အပေါ်၌တည်သည်။” ကျမ်းစာတွင်ပါသော မေရှိယဆိုင်ရာမျှော်လင့်ချက်ကို ရှုမောင်သိထား၏၊ ယင်း၏ပြည့်စုံချက်ကိုမျှော်လင့်ခြင်းက သူ၏ဘဝကိုပုံသွင်းပေးခဲ့၏။ ယင်းတို့အားလုံး မည်သို့ပြည့်စုံလာမည်ကို သူနားမလည်ခဲ့၊ တင်ကူးဖော်ပြထားသည့် ကယ်တင်ခြင်းကို သူကိုယ်တိုင် မတွေ့မြင်ခဲ့သော်လည်း ဘုရားသခင် “ပြင်ဆင်တော်မူသောကယ်တင်ခြင်းလမ်းကြောင်း” သည် မည်သူမည်ဝါအားဖြင့်ဖြစ်မည်ကိုသိမြင်သောအခါ သူဝမ်းမြောက်ခဲ့သည်။—လုကာ ၂:၃၀။

ခရစ်တော်မှတစ်ဆင့်ရသောနှစ်သိမ့်မှု

၈။ ယေရှုပေးတော်မူသောအကူအညီသည် လူတို့လိုအပ်သည်ဟု ယူဆထားကြရာနှင့်နှိုင်းယှဉ်လျှင်အသို့နည်း။

^၈ ယေရှုခရစ်သည် မြေကြီးဓမ္မအမှုကိုထမ်းရွက်တော်မူစဉ် လူတို့လိုအပ်သည်ဟု ယူဆကြသည့်အကူအညီကို အမြဲတိုင်းတော့မပေးခဲ့ချေ။ အချို့သူတို့က မိမိတို့ရွံမုန်းသော ရောမတို့၏ဖိနှိပ်မှုအောက်မှ လွတ်မြောက်စေမည့် မေရှိယတစ်ပါးကို စောင့်မျှော်လျက်ရှိကြသည်။ ယေရှုမူကား တော်လှန်ပုန်ကန်မှုကို အားမပေး; ယင်းအစား “ကဲသာဘုရင်၏ဥစ္စာကို ကဲသာဘုရင်အားဆက်ပေးကြလော့” ဟု မိန့်တော်မူခဲ့၏။ (မဿဲ ၂၂:၂၁) ဘုရားသခင့်ရည်ရွယ်တော်မူချက်တွင် နိုင်ငံရေးအုပ်ချုပ်မှုတစ်ခု၏ နိုင်လိုမင်းထက်ပြုခံရခြင်းမှ လူတို့ လွတ်မြောက်ခြင်းထက်မက အကျုံးဝင်သည်။ လူတို့က ယေရှုကို မင်းမြှောက်လိုကြသည်၊ သို့သော် ကိုယ်တော်က မိမိ “အသက်ကိုစွန့်၍ လူများကိုရွေး” မည်အကြောင်းမိန့်ဆို၏။ (မဿဲ ၂၀:၂၈; ယောဟန် ၆:၁၅) မင်းရိုက်ရာကို ကိုယ်တော်ခံယူရန် အချိန်မတန်သေးချေ၊ ထို့ပြင် ကိုယ်တော်အား အုပ်စိုးခွင့်ပေးအပ်မည့်သူမှာ ဆူပူထကြွသူလူအုပ်မဟုတ် ယေဟောဝါကိုယ်တော်တိုင်ပင်ဖြစ်သည်။

၉။ (က) ယေရှုကြွေးကြော်ခဲ့သော နှစ်သိမ့်မှုသတင်းကား အဘယ်နည်း။ (ခ) လူတို့ကိုယ်တိုင်တွေ့ကြုံနေရသော အခြေအနေများနှင့် အဆိုပါသတင်း၏သက်ဆိုင်ပုံကို ယေရှု မည်သို့သရုပ်ဖော်ခဲ့သနည်း။ (ဂ) ယေရှု၏ဓမ္မအမှုက အဘယ်အရာအတွက် အခြေခံအကြောင်းရင်းဖြစ်သနည်း။

^၉ ယေရှုပေးတော်မူသောနှစ်သိမ့်မှုသည် ‘ဘုရားသခင်၏နိုင်ငံတော်နှင့်ယှဉ်သောသတင်းကောင်း’ ထဲတွင်ပါဝင်သည်။ ထိုသတင်းကို နေရာအနှံ့ ယေရှုကြွေးကြော်ခဲ့သည်။ (လုကာ ၄:၄၃) မေရှိယဘုရင်အဖြစ် ကိုယ်တော်ပြုလုပ်တော်မူမည့်အရာများကို သရုပ်ဖော်ခြင်းအားဖြင့် အဆိုပါသတင်းသည် လူတို့၏ နေ့စဉ်ပြဿနာတို့နှင့်သက်ဆိုင်ပုံကို ကိုယ်တော်အလေးပေးဖော်ပြခဲ့၏။ ကိုယ်တော်သည် မျက်စိပြန်မြင်စေ၍ စကားပြန်ပြောစေခြင်း (မဿဲ ၁၂:၂၂; မာကု ၁၀:၅၁၊ ၅၂)၊ ခြေလက်သေသူတို့ကို ကုသပေးခြင်း (မာကု ၂:၃-၁၂)၊ ဣသရေလသားချင်းတို့၏ ရွံရှာဖွယ်ရောဂါများကို ပျောက်ကင်းစေခြင်းနှင့် (လုကာ ၅:၁၂၊ ၁၃) ခံရခက်သောအခြားဖျားနာမှုတို့ကို သက်သာရာရစေခြင်း (မာကု ၅:၂၅-၂၉) အားဖြင့် ဝေဒနာခံနေရသူတို့အား အသက်ရှင်ရန်အကြောင်းကောင်းများရှိစေခဲ့သည်။ သေဆုံးသွားသောသူတို့၏ကလေးများ ပြန်ရှင်စေခြင်းအားဖြင့် ငိုကြွေးပူဆွေးနေသော ၎င်းတို့၏မိသားစုတို့ကို စိတ်သက်သာရာရစေခဲ့သည်။ (လုကာ ၇:၁၁-၁၅; ၈:၄၉-၅၆) ကိုယ်တော်သည် ဘေးပြုသောမုန်တိုင်းများကို ထိန်းချုပ်နိုင်ကြောင်း၊ လူအုပ်ကြီးကို အစာကျွေးခြင်းဖြင့် အာသာပြေစေနိုင်ကြောင်း သရုပ်ဖော်ခဲ့သည်။ (မာကု ၄:၃၇-၄၁; ၈:၂-၉) ထိုထက်ကား လက်ရှိပြဿနာများကို ထိထိရောက်ရောက် ကိုင်တွယ်ဖြေရှင်းစေ၍ မေရှိယ၏ဖြောင့်မတ်သော အုပ်ချုပ်မှုကိုမျှော်လင့်စေသည့် ကိုယ်ကျင့်တရားများကို ကိုယ်တော်သွန်သင်ပေးခဲ့၏။ သို့နှင့် ဓမ္မအမှုကိုယေရှုဆောင်ရွက်စဉ် ယုံကြည်ခြင်းဖြင့် နားထောင်သူတို့ကို နှစ်သိမ့်ပေးရုံမက နောင်လာလတ္တံ့သော နှစ်ပေါင်းထောင်ချီအချိန်အတွက် အားပေးမှုဖြစ်စေသည့် အခြေခံအကြောင်းရင်းတစ်ရပ်ကိုလည်း ချပေးခဲ့သည်။

၁၀။ ယေရှု၏ပူဇော်ရာယဇ်ကြောင့် အဘယ်အရာများရရှိသနည်း။

^၁၀ ယေရှုသည် ကိုယ်တော်၏လူ့အသက်ကို ပူဇော်ရာယဇ်အဖြစ် စွန့်လွှတ်ပြီး ကောင်းကင်သို့ ရှင်ပြန်ထမြောက်သွားပြီးနောက် နှစ်ပေါင်း ၆၀ ကျော်တွင် တမန်တော်ယောဟန်သည် ဤသို့ရေးသားရန် မှုတ်သွင်းခံခဲ့ရသည်– “ချစ်သားတို့၊ သင်တို့သည် ဒုစရိုက် [မကောင်းမှု]ကိုမပြုစေခြင်းငှာ ဤအရာများကို သင်တို့အားငါရေး၍ပေးလိုက်၏။ တစ်စုံတစ်ယောက်သောသူသည် ဒုစရိုက် [မကောင်းမှု]ကိုပြုမိလျှင်၊ ဖြောင့်မတ်တော်မူသောအရှင် ယေရှုခရစ်တည်းဟူသော ငါတို့အမှုဆောင်သခင်သည် ခမည်းတော်ထံ၌ရှိတော်မူ၏။ ထိုသခင်သည် ငါတို့၏အပြစ်မက၊ လော[က]သားအပေါင်းတို့၏ အပြစ်ဖြေစရာအကြောင်းဖြစ်တော်မူ၏။” (၁ ယောဟန် ၂:၁၊ ၂) ယေရှု၏စုံလင်သော လူ့အသက်တာ ယဇ်ပူဇော်ရာ၏အကျိုးကျေးဇူးကြောင့် ကျွန်ုပ်တို့သည် နှစ်သိမ့်မှုများစွာရရှိကြသည်။ ကျွန်ုပ်တို့အပြစ်လွှတ်ခံရခြင်း၊ ကိုယ်ကိုကိုယ်သိသောစိတ်ကြည်လင်ခြင်း၊ ဘုရားသခင်၏မျက်နှာသာရ ဆက်ဆံရေးရခြင်းနှင့် ထာဝရအသက်ရဖို့ မျှော်လင့်နိုင်၏။—ယောဟန် ၁၄:၆; ရောမ ၆:၂၃; ဟေဗြဲ ၉:၂၄-၂၈; ၁ ပေတရု ၃:၂၁။

နှစ်သိမ့်ပေးသည့် သန့်ရှင်းသောဝိညာဉ်တော်

၁၁။ နှစ်သိမ့်မှုပေးရန် အခြားအဘယ်ပြင်ဆင်ချက်ကို ယေရှုမသေဆုံးမီ ကတိပြုခဲ့သနည်း။

^၁၁ ပူဇော်ရာယဇ်အဖြစ်မသေဆုံးမီ နောက်ဆုံးညတွင် တမန်တော်များနှင့်အတူ ယေရှုရှိစဉ် သူတို့ကိုနှစ်သိမ့်ပေးရန် ကောင်းကင်ခမည်းတော်စီစဉ်ထားသည့် နောက်ထပ်ပြင်ဆင်ချက်တစ်ခုအကြောင်း ကိုယ်တော်မိန့်တော်မူခဲ့သည်။ ယေရှု ဤသို့မိန့်ဆိုခဲ့သည်– “ငါသည်ခမည်းတော်ကိုတောင်း၍ ခမည်းတော်သည်[အမှန်]တရား၏ဝိညာဉ်တည်းဟူသောအခြားသောထောက်မသူ [နှစ်သိမ့်ပေးသူ; ဂရိဘာသာစကားဖြင့် ပါရာကလဲတို့စ်] ကို သင်တို့နှင့်အတူအစဉ်မပြတ်တည်နေစေခြင်းငှာ သင်တို့အားပေးတော်မူမည်။” ဤစကားဖြင့် သူတို့ကို ယေရှုစိတ်ချလက်ချရှိစေခဲ့သည်– “ဆရာတည်းဟူသော သန့်ရှင်းသောဝိညာဉ်တော်သည် သင်တို့အား ခပ်သိမ်းသောအရာတို့ကို ပြသသွန်သင်တော်မူ၍ ငါပြောခဲ့သမျှသောစကားတို့ကိုမှတ်မိသောဉာဏ်ကို သင်တို့အားပေးတော်မူမည်။” (ယောဟန် ၁၄:၁၆၊ ၁၇၊ ၂၆) သန့်ရှင်းသောဝိညာဉ်တော်သည် သူတို့ကို မည်သို့နှစ်သိမ့်ပေးခဲ့သနည်း။

၁၂။ ယေရှုတပည့်များ၏ မှတ်ဉာဏ်ကိုအထောက်အကူပြုသည့် သန့်ရှင်းသောဝိညာဉ်တော်သည် လူများစွာကို မည်သို့နှစ်သိမ့်မှုရရှိစေခဲ့သနည်း။

^၁၂ တမန်တော်များသည် ယေရှုထံတော်မှ ကျယ်ကျယ်ပြန့်ပြန့်သွန်သင်ချက်ရရှိခဲ့သည်။ သူတို့၏အတွေ့အကြုံကို ဘယ်တော့မျှမေ့လျော့ကြမည်မဟုတ်သော်လည်း ကိုယ်တော်မိန့်တော်မူခဲ့သောစကားများကို သူတို့မှတ်မိကြပါမည်လော။ သူတို့သည်မစုံလင်၍ မှတ်ဉာဏ်မကောင်းသောကြောင့် အရေးကြီးသောညွှန်ကြားချက်များကို မေ့သွားကြမည်လော။ သန့်ရှင်းသောဝိညာဉ်တော်သည် ‘ကိုယ်တော်ပြောခဲ့သမျှသောစကားတို့ကိုမှတ်မိသောဉာဏ်ပေး’ မည်ဟု ယေရှုအာမခံခဲ့သည်။ သို့နှင့် ယေရှုသေဆုံးပြီး ရှစ်နှစ်အကြာတွင် မဿဲသည် ပထမဦးဆုံးခရစ်ဝင်ကျမ်းကို ရေးသားနိုင်ခဲ့သည်၊ ထိုတွင် ယေရှု၏စိတ်ကြည်နူးဖွယ် တောင်ပေါ်တရားတော်၊ ဘုရားသခင့်နိုင်ငံတော်နှင့်သက်ဆိုင်သည့် မြောက်မြားစွာသောပုံဥပမာများနှင့် ကိုယ်တော်ရောက်ရှိနေခြင်းနှင့်ပတ်သက်သောနိမိတ်ကို အသေးစိတ်ဆွေးနွေးဖော်ပြ ရေးသားနိုင်ခဲ့သည်။ အနှစ် ၅၀ ကျော်ကြာပြီးနောက်တွင် တမန်တော်ယောဟန်သည် ယေရှု၏မြေကြီးအသက်တာမှ နောက်ဆုံးနေ့ရက်များအကြောင်း ကျယ်ကျယ်ပြန့်ပြန့်အသေးစိတ်ဖော်ပြ ရေးသားနိုင်ခဲ့သည်။ ဤမှုတ်သွင်းခံမှတ်တမ်းများသည် ကျွန်ုပ်တို့အချိန်အထိ အလွန်အားပေးမှုဖြစ်သည်တကား!

၁၃။ အစောပိုင်းခရစ်ယာန်များ၌ သန့်ရှင်းသောဝိညာဉ်တော်သည် ဆရာအဖြစ် မည်သို့ဆောင်ရွက်ခဲ့သနည်း။

^၁၃ သန့်ရှင်းသောဝိညာဉ်တော်သည် တပည့်များအား ယေရှုမိန့်တော်မူခဲ့သောစကားများကို ပြန်မှတ်မိစေရုံမကဘဲ သူတို့ကိုသွန်သင်ပေးပြီး ဘုရားသခင့်ရည်ရွယ်တော်မူချက်ကို အပြည့်အဝနားလည်စေရန် လမ်းညွှန်ပေးခဲ့သည်။ တပည့်များနှင့် ယေရှုရှိခဲ့စဉ် သူတို့ တိတိကျကျနားမလည်ခဲ့သော အကြောင်းအရာတို့ကို ကိုယ်တော်မိန့်တော်မူခဲ့သည်။ သို့သော် နောက်ပိုင်းတွင် သန့်ရှင်းသောဝိညာဉ်တော်၏လှုံ့ဆော်မှုဖြင့် ယောဟန်၊ ပေတရု၊ ယာကုပ်၊ ယုဒနှင့် ပေါလုတို့သည် ဘုရားသခင့်ရည်ရွယ်တော်မူချက်နှင့်ပတ်သက်၍ နောက်ထပ်ပြည့်စုံချက်များကို ရှင်းပြခဲ့သည်။ သို့နှင့် သန့်ရှင်းသောဝိညာဉ်တော်သည် ဆရာအဖြစ် အကျိုးဆောင်ခြင်းဖြင့် တပည့်များကို ဘုရားသခင်ညွှန်ကြားနေကြောင်း ယုံကြည်စိတ်ချစေသည်။

၁၄။ သန့်ရှင်းသောဝိညာဉ်တော်သည် ယေဟောဝါ၏လူတို့ကို အဘယ်နည်းများဖြင့် ကူညီပေးခဲ့သနည်း။

^၁၄ ဝိညာဉ်တော်၏အံ့ဖွယ်ဆုကျေးဇူးများက ဘုရားသခင်သည် ဇာတိဣသရေလလူတို့ကို မျက်နှာသာမပေးတော့ဘဲ ခရစ်ယာန်အသင်းတော်အပေါ်သို့ မျက်နှာသာလွှဲပြောင်းခဲ့ကြောင်းကိုလည်း အထင်အရှားသက်သေထူသည်။ (ဟေဗြဲ ၂:၄) ထိုဝိညာဉ်အသီးကို သီးကြခြင်းအားဖြင့်လည်း ယေရှု၏တပည့်အစစ်အမှန်များကို ခွဲခြားသတ်မှတ်စေသည့် အရေးပါသောသက်သေတစ်ခုဖြစ်သည်။ (ယောဟန် ၁၃:၃၅; ဂလာတိ ၅:၂၂-၂၄) ထိုဝိညာဉ်တော်က အသင်းတော်သားများကို ရဲရင့်ခြင်းသတ္တိရှိသောသက်သေများဖြစ်စေသည်။—တမန်တော် ၄:၃၁။

အလွန်အမင်းဖိနှိပ်ခံရချိန်တွင် အကူအညီ

၁၅။ (က) အတိတ်နှင့် မျက်မှောက်ခေတ်တွင် ခရစ်ယာန်များသည် အဘယ်ဖိအားပေးမှုများကို တွေ့ကြုံခဲ့ကြရပြီနည်း။ (ခ) အားပေးသူကိုယ်တိုင် ရံဖန်ရံခါ အားပေးခံရဖို့ အဘယ်ကြောင့်လိုသနည်း။

^၁၅ ယေဟောဝါကိုဆည်းကပ်ဝတ်ပြုသူ၊ ကိုယ်တော်အား တည်ကြည်သူတို့သည် အမျိုးမျိုးသောနှိပ်စက်ညှဉ်းပန်းမှုခံရကြသည်။ (၂ တိမောသေ ၃:၁၂) ခရစ်ယာန်များစွာသည် အလွန့်အလွန်ပြင်းထန်သော ဖိစီးနှိပ်စက်မှုကိုခံနေကြရသည်။ မျက်မှောက်ခေတ်တွင် အချို့သူတို့သည် လူအုပ်၏နှောင့်ယှက်တိုက်ခိုက်မှုကိုခံကြရပြီး ချွေးတပ်စခန်းများ၊ အကျဉ်းထောင်များ၊ အလုပ်ကြမ်းစခန်းများတွင် လူမဆန်သောအခြေအနေမျိုး၌ နေထိုင်ခဲ့ကြရသည်။ စိုးရများစွာသည် အင်တိုက်အားတိုက် နှိပ်စက်ညှဉ်းပန်းခဲ့ကြပြီ၊ သို့မဟုတ် မတရားပြုသူတို့ကို တံခါးမရှိဓားမရှိ ရိုင်းရိုင်းစိုင်းစိုင်းပြုမူဖို့ ခွင့်ပြုခဲ့ကြပြီ။ ထိုမျှမက ခရစ်ယာန်များသည် အသက်အန္တရာယ်စိုးရိမ်ရသည့်အထိ ဖျားနာ၏၊ သို့မဟုတ် မိသားစုတွင် ရင်လေးဖွယ်အကျပ်အတည်းများကြုံခဲ့ရ၏။ ခက်ခဲသည့်အခြေအနေများကို ရင်ဆိုင်ဖြေရှင်းရန် ယုံကြည်သူချင်း တစ်ဦးပြီးတစ်ဦးကိုကူညီပေးသူ ရင့်ကျက်သည့်ခရစ်ယာန်တစ်ဦးပင်လျှင် ဖိအားပေးမှုခံရပေမည်။ ဤကိစ္စမျိုးတွင် အားပေးသူကိုယ်တိုင် အားပေးခံရဖို့ လိုအပ်ပေလိမ့်မည်။

၁၆။ ဒါဝိဒ်သည် အကြီးအကျယ်ဖိစီးခံရချိန်တွင် မည်သို့အကူအညီရခဲ့သနည်း။

^၁၆ ဘုရင်ရှောလုသည် ဒါဝိဒ်ကိုသတ်ဖို့လိုက်လံရှာဖွေချိန်တွင် ဘုရားသခင်၏အကူအညီကို ဒါဝိဒ် ဤသို့တောင်းခံခဲ့သည်– “အိုဘုရားသခင် အကျွန်ုပ် . . . နှုတ်မြွက်သောစကားကို နားညောင်းတော်မူပါ”၊ “ကိုယ်တော် . . . အတောင်တော်အရိပ်၌ ခိုလှုံပါ၏။” (ဆာလံ ၅၄:၂၊ ၄; ၅၇:၁၊ သမ္မာ) ဒါဝိဒ်သည် အကူအညီရခဲ့ပါသလော။ အမှန်ပင် ရရှိခဲ့သည်။ ထိုအချိန်အတွင်း ယေဟောဝါသည် ဒါဝိဒ်ကိုညွှန်ကြားရန် ပရောဖက်ဂဒ်နှင့် ယဇ်ပုရောဟိတ်အဗျာသာတို့ကို အသုံးပြုခဲ့၏၊ ထိုလူငယ်ကိုခွန်အားပေးရန် ရှောလု၏သားယောနသန်ကို အသုံးပြုခဲ့သည်။ (၁ ဓမ္မရာဇဝင် ၂၂:၁၊ ၅; ၂၃:၉-၁၃၊ ၁၆-၁၈) ယေဟောဝါသည် ထိုနိုင်ငံကို ဖိလိတ္တိလူမျိုးတို့ ဝင်ရောက်တိုက်ခိုက်စေခြင်းဖြင့် ဒါဝိဒ်ကို ရှောလုလိုက်ရှာရာမှ လမ်းလွှဲပြောင်းစေခဲ့သည်။—၁ ဓမ္မရာဇဝင် ၂၃:၂၇၊ ၂၈။

၁၇။ ယေရှုသည် အပြင်းအထန်ဖိစီးမှုခံရစဉ် မည်သူ့ထံသို့ အကူအညီအတွက်လှည့်ခဲ့သနည်း။

^၁၇ ယေရှုခရစ်ကိုယ်တော်တိုင်သည်လည်း မြေကြီးအသက်တာကုန်ဆုံးခါနီးတွင် အပြင်းအထန်ဖိစီးမှုခံခဲ့ရသည်။ မိမိ၏အမူအကျင့်သည် ကောင်းကင်ခမည်းတော်၏နာမတော်ကို မည်သို့ထိခိုက်နိုင်ကြောင်းနှင့် လူသားအားလုံး၏အနာဂတ်အတွက် အဘယ်အဓိပ္ပာယ်ရှိနိုင်ကြောင်းကို ကောင်းစွာသိရှိထားတော်မူသည်။ ထို့ကြောင့် ကိုယ်တော်သည် “ပြင်းစွာသောဝေဒနာကိုခံလျက်” အထူးသဖြင့်ကြိုးစားဆုတောင်းခဲ့သည်။ ထိုအကျပ်အတည်းကြုံကြိုက်ချိန်တွင် ယေရှုလိုအပ်နေသော ထောက်ပံ့ကူညီမှုကို ဘုရားသခင်ရရှိစေတော်မူခဲ့သည်။—လုကာ ၂၂:၄၁-၄၄။

၁၈။ ဘုရားသခင်သည် အပြင်းအထန်နှိပ်စက်ညှဉ်းပန်းခံခဲ့ရသော အစောပိုင်းခရစ်ယာန်များကို မည်သို့နှစ်သိမ့်ပေးခဲ့သနည်း။

^၁၈ ပထမရာစုရှိအသင်းတော်ကိုတည်ထောင်ပြီးနောက် ခရစ်ယာန်များ ကြုံတွေ့ရသောနှိပ်စက်ညှဉ်းပန်းမှုမှာ အလွန်ဆိုးရွားလွန်းသဖြင့် တမန်တော်များမှလွဲ၍ အခြားသူအားလုံး ယေရုရှလင်မြို့မှ ထွက်ပြေးတိမ်းရှောင်သွားခဲ့ကြရသည်။ အမျိုးသား၊ အမျိုးသမီးတို့ကို သူတို့အိမ်ထဲမှ အတင်းအဓမ္မဆွဲထုတ်ခဲ့ကြသည်။ ထိုအချိန်အခါတွင် သူတို့ကို ဘုရားသခင်မည်သို့နှစ်သိမ့်ပေးခဲ့သနည်း။ သူတို့သည် ကောင်းကင်ဘုံ၌ “သာ၍မြတ်သော အမြဲတည်သောဘဏ္ဍာ” ကိုခရစ်တော်နှင့်အတူအမွေရမည်ဟု စိတ်ချစေခဲ့သည်။ (ဟေဗြဲ ၁၀:၃၄; ဧဖက် ၁:၁၈-၂၀) သူတို့ဆက်ဟောပြောကြစဉ် ဘုရားသခင့်သန့်ရှင်းသောဝိညာဉ်တော်ဆုကျေးဇူးကို သူတို့ခံစားရကြောင်း သက်သေထင်ရှား၍ သူတို့၏အတွေ့အကြုံများက ဝမ်းမြောက်ရွှင်လန်းစရာအကြောင်း တိုးများလာစေခဲ့သည်။—မဿဲ ၅:၁၁၊ ၁၂; တမန်တော် ၈:၁-၄၀။

၁၉။ ပေါလုသည် အပြင်းအထန်နှိပ်စက်ညှဉ်းပန်းခံခဲ့ရသော်လည်း ဘုရားသခင်ပေးတော်မူသောနှစ်သိမ့်မှုနှင့်ပတ်သက်၍ သူမည်သို့ခံစားခဲ့ရသနည်း။

^၁၉ အတန်ကြာလေသော် အပြင်းအထန်နှိပ်စက်ညှဉ်းပန်းခဲ့သူ ရှောလု (ပေါလု) သည် နောက်ဆုံးတွင် ခရစ်ယာန်တစ်ဦးဖြစ်လာသဖြင့် ကိုယ်တိုင်နှိပ်စက်ညှဉ်းပန်းခံခဲ့ရသည်။ ကုပရုကျွန်းပေါ်တွင် နတ်ဝင်သည်တစ်ဦးသည် လိမ်လည်လှည့်ဖြား၍ လိုရာဆွဲပြီးမဟုတ်မမှန်ပြောဆိုခြင်းဖြင့် ပေါလု၏ခရစ်ယာန်ဓမ္မအမှုကို နှောင့်ယှက်ဟန့်တားရန် ကြိုးစားခဲ့သည်။ ဂလာတိပြည်တွင် ပေါလုကိုကျောက်ခဲနှင့်ပစ်၍ သေပြီဟုစိတ်ထင်နှင့် ပစ်ထားခဲ့ကြ၏။ (တမန်တော် ၁၃:၈-၁၀; ၁၄:၁၉) မာကေဒေါနိပြည်တွင် သူသည် ကြိမ်လုံးနှင့်ရိုက်ခံခဲ့ရသည်။ (တမန်တော် ၁၆:၂၂၊ ၂၃) ဧဖက်မြို့တွင် လူအုပ်၏အကြမ်းဖက်မှုခံရပြီးနောက် သူဤသို့ရေးသားခဲ့သည်– ‘ငါတို့သည် အသက်မလွတ်နိုင်ဟုထင်ရ၍၊ မခံနိုင်အောင် အတိုင်းထက်အလွန်ဆင်းရဲခံရသည်။ သေစေဟုစီရင်ခြင်းကို ကိုယ်တိုင်ခံရသကဲ့သို့ဖြစ်၏။’ (၂ ကောရိန္သု ၁:၈၊ ၉) သို့သော် ထိုစာ၌ပင် ပေါလုသည် စာပိုဒ် ၂ တွင် ကိုးကားထားသော ထိုနှစ်သိမ့်စကားများကို ရေးသားခဲ့သည်။—၂ ကောရိန္သု ၁:၃၊ ၄။

၂၀။ နောက်ဆောင်းပါးတွင် အဘယ်အကြောင်းကို ဆင်ခြင်သုံးသပ်ကြမည်နည်း။

^၂၀ အဆိုပါနှစ်သိမ့်မှုကို သင်မည်သို့ဝေမျှခံစားနိုင်သနည်း။ ကျွန်ုပ်တို့ခေတ်တွင် အများနှင့်အတူ ထောင်ချီ၍ဘေးအန္တရာယ်ကြုံရခြင်း၊ သို့မဟုတ် မိမိတို့၌သာ ကွက်၍ဆင်းရဲခက်ခဲကြုံရခြင်းကြောင့် ဝမ်းနည်းပူဆွေးနေကြသူ လူများစွာသည် နှစ်သိမ့်မှုလိုအပ်နေကြသည်။ နောက်ဆောင်းပါး၌ ထိုသို့သော ဖြစ်ရပ်မျိုးတွင် မည်သို့နှစ်သိမ့်ပေးနိုင်ကြောင်း ဆင်ခြင်သုံးသပ်သွားကြမည်။

သင်မှတ်မိသလော

• ဘုရားသခင်ထံတော်မှနှစ်သိမ့်မှုသည် အဘယ်ကြောင့် အဖိုးတန်ဆုံးဖြစ်သနည်း။

• ခရစ်တော်မှတစ်ဆင့် အဘယ်နှစ်သိမ့်မှုပေးခဲ့သနည်း။

• သန့်ရှင်းသောဝိညာဉ်တော်သည် နှစ်သိမ့်ပေးသူဖြစ်ကြောင်း မည်သို့သက်သေထူခဲ့သနည်း။

• ဘုရားသခင်၏ကျေးကျွန်တို့သည် ပြင်းထန်စွာဖိစီးခံရသောအခါ ကိုယ်တော်နှစ်သိမ့်ပေးခဲ့သော ပုံဥပမာများကိုဖော်ပြပါ။

[စာမျက်နှာ ၁၅ ပါ ရုပ်ပုံ]

ယေဟောဝါသည် မိမိလူတို့ကို ကယ်လွှတ်ခြင်းအားဖြင့် နှစ်သိမ့်မှုပေးခဲ့ကြောင်း သမ္မာကျမ်းစာဖော်ပြ

[စာမျက်နှာ ၁၆ ပါ ရုပ်ပုံ]

ယေရှုသည် သွန်သင်ခြင်း၊ ရောဂါကုသပေးခြင်းနှင့် လူသေတို့ကို ပြန်ရှင်စေခြင်းအားဖြင့် နှစ်သိမ့်မှုပေးခဲ့

[စာမျက်နှာ ၁၈ ပါ ရုပ်ပုံ]

ယေရှုသည် အထက်အရပ်မှအကူအညီကို ရရှိခဲ့