“နှစ်သိမ့်ခြင်းရှိသမျှတို့၏ဘုရားသခင်” ယေဟောဝါကို ယုံကြည်ကိုးစားပါ
“ငါတို့၏သခင် ယေရှုခရစ်၏ခမည်းတော် ဘုရားသခင်၊ သနားကြင်နာတတ်သည့်အဖ၊ နှစ်သိမ့်ခြင်းရှိသမျှတို့၏ ဘုရားသခင်သည် ချီးမွမ်းခံရပါစေ။”—၂ ကော. ၁:၃။
၁။ လူသားတွေဟာ အသက်အရွယ်မရွေး ဘာလိုအပ်ကြသလဲ။
ကျွန်ုပ်တို့ဟာ မွေးဖွားချိန်ကစပြီး နှစ်သိမ့်မှုလိုအပ်ကြတယ်။ ကလေးငယ်လေးက နှစ်သိမ့်မှုလိုနေကြောင်း ငိုသံနဲ့အချက်ပေးတယ်။ သူ ပွေ့ချီခံချင်တာ၊ နို့ဆာနေတာဖြစ်နိုင်တယ်။ ကျွန်ုပ်တို့ အသက်ကြီးလာတဲ့အခါမှာတောင် နှစ်သိမ့်မှုလိုအပ်တဲ့အခါတွေရှိတယ်။ အထူးသဖြင့် ခက်ခဲတဲ့အခြေအနေတွေနဲ့ ရင်ဆိုင်ရချိန်မှာဖြစ်တယ်။
၂။ ယေဟောဝါကို ယုံကြည်ကိုးစားသူတွေကို နှစ်သိမ့်ပေးမယ်လို့ ကိုယ်တော် ဘယ်လိုအာမခံထားသလဲ။
၂ မိသားစုဝင်တွေ၊ မိတ်ဆွေတွေက အတိုင်းအတာတစ်ခုအထိ ကျွန်ုပ်တို့ကို နှစ်သိမ့်ပေးနိုင်ပါတယ်။ ဒါပေမဲ့ တစ်ခါတလေမှာ ကျွန်ုပ်တို့ခံစားရတဲ့ အခက်အခဲတွေက လူတွေနှစ်သိမ့်မပေးနိုင်တဲ့ အခြေအနေတွေဖြစ်တယ်။ ဘယ်အခြေအနေမျိုးမှာမဆို နှစ်သိမ့်ပေးနိုင်တာက ဘုရားသခင်သာလျှင်ဖြစ်တယ်။ သမ္မာကျမ်းစာက ဒီလိုအာမခံတယ်– ‘ယေဟောဝါသည် ဆုတောင်းသောသူအပေါင်းတို့၏ အနီးအပါး၌ ရှိတော်မူ၏။ ထိုသူတို့၏အော်ဟစ်ခြင်းကိုကြား၍ ကယ်တင်တော်မူ၏။’ (ဆာ. ၁၄၅:၁၈၊ ၁၉) အမှန်ပါပဲ ‘ယေဟောဝါသည် ဖြောင့်မတ်သောသူတို့ကို ကြည့်ရှုတော်မူ၏။ သူတို့အော်ဟစ်သံကိုလည်း နားထောင်တော်မူ၏။’ (ဆာ. ၃၄:၁၅) ဒါပေမဲ့ ကျွန်ုပ်တို့က ဘုရားသခင်ရဲ့ကူညီထောက်မမှုနဲ့ နှစ်သိမ့်မှုခံစားလိုတယ်ဆိုရင် ကိုယ်တော်ကို ယုံကြည်ကိုးစားရမှာဖြစ်တယ်။ ဒါဝိဒ် ဒီလိုပြောခဲ့တယ်– ‘ယေဟောဝါသည် ညှဉ်းဆဲခြင်းကိုခံရသောသူတို့၏ ခိုလှုံရာ၊ ဘေးအန္တရာယ်ရောက်သည်ကာလ ခိုလှုံရာဖြစ်တော်မူ၏။ နာမတော်ကိုသိသောသူတို့သည် ကိုယ်တော်ကိုယုံကြည်ကြပါလိမ့်မည်။ အကြောင်းမူကား အိုယေဟောဝါ၊ ကိုယ်တော်ကိုရှာသောသူတို့ကို စွန့်ပစ်တော်မမူတတ်ပါ။’—ဆာ. ၉:၉၊ ၁၀။
၃။ မိမိလူတွေအပေါ်ထားတဲ့ ယေဟောဝါရဲ့မေတ္တာကို ယေရှု ဘယ်လိုဥပမာပေး ဖော်ပြခဲ့သလဲ။
၃ ယေဟောဝါက မိမိကိုဝတ်ပြုသူတွေကို အလွန်တန်ဖိုးထားတယ်။ ဒီအချက်ကို ယေရှု ဒီလိုရှင်းရှင်းလင်းလင်း ဖော်ပြခဲ့တယ်– “စာငှက်ငါးကောင်ကို ဒင်္ဂါးငယ်နှစ်ပြားနှင့် ရောင်းရသည် မဟုတ်လော။ သို့တိုင် ထိုစာငှက်တစ်ကောင်ကိုမျှ ဘုရားသခင် မေ့လျော့တော်မမူ။ သင်တို့၏ဆံပင်များကိုပင် အကုန်အစင် ရေတွက်လျက်ရှိ၏။ ထို့ကြောင့် မကြောက်ကြနှင့်။ သင်တို့သည် စာငှက်အများတို့ထက် သာ၍မြတ်ကြ၏။” (လု. ၁၂:၆၊ ၇) ယေဟောဝါက ပရောဖက်ယေရမိကတစ်ဆင့် ရှေးခေတ်အစ္စရေးလူတွေကို ဒီလိုမိန့်တော်မူခဲ့တယ်– ‘ထာဝရမေတ္တာနှင့် သင့်ကိုငါချစ်၏။ ထို့ကြောင့် ချစ်ခင်ကြင်နာမှုကို သင်၌ ကြာမြင့်စွာပြ၏။’—ယေ. ၃၁:၃။
၄။ ယေဟောဝါရဲ့ကတိတော်တွေကို ဘာကြောင့် ယုံကြည်စိတ်ချနိုင်သလဲ။
၄ ယေဟောဝါနဲ့ ကိုယ်တော့်ကတိတော်တွေ ပြည့်စုံလာမယ်ဆိုတာကို ယုံကြည်ကိုးစားခြင်းက အခက်အခဲဒုက္ခရောက်ချိန်တွေမှာ ကျွန်ုပ်တို့ကို နှစ်သိမ့်ပေးတယ်။ ကျွန်ုပ်တို့လည်း ယောရှုလို ဘုရားသခင်ကို ယုံကြည်ကိုးစားသင့်တယ်၊ သူဒီလိုပြောခဲ့တယ်– ‘သင်တို့၏ဘုရားသခင်ယေဟောဝါသည် သင်တို့အဖို့မိန့်တော်မူသော ကောင်းကျိုးတစ်စုံတစ်ပါးမျှ မယုတ်မလျော့၊ အကုန်အစင်ပြည့်စုံကြောင်းကို သင်တို့သည် စိတ်နှလုံးထဲမှာသိကြ၏။’ (ယောရှု ၂၃:၁၄) ဒါ့အပြင် ခက်ခဲတဲ့အခြေအနေတွေကြောင့် ကျွန်ုပ်တို့က အခုအချိန်မှာ ဝမ်းနည်းကြေကွဲနေရရင်တောင် “ဘုရားသခင်သည် သစ္စာရှိတော်မူသောကြောင့်” တည်ကြည်တဲ့ကျေးကျွန်တွေကို ဘယ်တော့မှ စွန့်ပစ်မှာမဟုတ်ဘူးဆိုတာ အကြွင်းမဲ့ယုံကြည်စိတ်ချနိုင်တယ်။—၁ ကောရိန္သု ၁၀:၁၃ ကိုဖတ်ပါ။
၅။ တခြားသူတွေကို ကျွန်ုပ်တို့ ဘယ်လိုနှစ်သိမ့်ပေးနိုင်သလဲ။
၅ တမန်တော်ပေါလုက ယေဟောဝါကို “နှစ်သိမ့်ခြင်းရှိသမျှတို့၏ ဘုရားသခင်” လို့ ခေါ်ဆိုခဲ့တယ်။ “နှစ်သိမ့်ပေး” ဆိုတာက အခက်အခဲဒုက္ခရောက်နေသူ ဒါမှမဟုတ် ဝမ်းနည်းကြေကွဲနေသူကို စိတ်သက်သာရာရအောင် လုပ်ပေးခြင်းဖြစ်တယ်။ သူ့ရဲ့ဝမ်းနည်းကြေကွဲမှု လျော့ပါးသက်သာအောင် ဖြေသိမ့်ပေးတာဖြစ်တယ်။ ယေဟောဝါက ဧကန်မုချ ဒီလိုလုပ်ပေးတယ်။ (၂ ကောရိန္သု ၁:၃၊ ၄ ကိုဖတ်ပါ။) ဘယ်အရာကမှ၊ ဘယ်သူကမှ ကျွန်ုပ်တို့ရဲ့ကောင်းကင်ခမည်းတော်ကို မချုပ်ကိုင်၊ မတားဆီးနိုင်တဲ့အတွက် ကိုယ်တော့်ကိုချစ်မြတ်နိုးတဲ့သူတွေကို နှစ်သိမ့်ပေးဖို့ ဘယ်အရာကိုမဆို ကိုယ်တော်လုပ်ဆောင်နိုင်စွမ်းရှိတယ်။ ကျွန်ုပ်တို့က “ဆင်းရဲဒုက္ခအမျိုးမျိုး” ခံစားနေရတဲ့ ကျွန်ုပ်တို့ရဲ့ယုံကြည်သူချင်းတွေကို ပြန်နှစ်သိမ့်ပေးနိုင်ကြတယ်၊ အကြောင်းကတော့ “ဘုရားသခင်၏နှစ်သိမ့်ပေးခြင်းကို ကိုယ်တိုင်ခံရ” လို့ပဲ။ ယေဟောဝါက တကယ့်နှစ်သိမ့်ပေးရှင်ဖြစ်တယ်။
စိတ်ဆင်းရဲစေတဲ့အကြောင်းရင်းများ
၆။ စိတ်ဆင်းရဲစေတဲ့ အကြောင်းအရာတွေကို ဖော်ပြပါ။
၆ ကျွန်ုပ်တို့ရဲ့ဘဝကဏ္ဍအသီးသီးမှာ နှစ်သိမ့်မှုလိုအပ်ကြတယ်။ အကြီးမားဆုံးဝမ်းနည်းကြေကွဲမှု ခံစားရစေတဲ့ အကြောင်းရင်းတစ်ခုက ချစ်မြတ်နိုးရသူ၊ အထူးသဖြင့် အိမ်ထောင်ဖက် ဒါမှမဟုတ် သားသမီးဆုံးပါးသွားခြင်းဖြစ်တယ်။ မမျှမတ ဆက်ဆံခံရတဲ့အခါမှာလည်း နှစ်သိမ့်မှုလိုအပ်နိုင်တယ်။ ကျန်းမာရေးချို့တဲ့တာ၊ အသက်အရွယ်အိုမင်းတာ၊ ဆင်းရဲမွဲတေတာ၊ အိမ်ထောင်ရေးပြဿနာ၊ ကမ္ဘာ့ပြဿနာစတာတွေကြောင့် လူတွေ နှစ်သိမ့်မှုပိုလိုအပ်နိုင်တယ်။
၇။ (က) ဝမ်းနည်းကြေကွဲနေချိန်တွေမှာ ကျွန်ုပ်တို့ ဘာလိုအပ်သလဲ။ (ခ) “ကျိုးပဲ့ကြေမွ” နေတဲ့စိတ်နှလုံးကို ယေဟောဝါ ဘယ်လိုနှစ်သိမ့်ပေးနိုင်သလဲ။
၇ အခက်အခဲဒုက္ခခံစားရချိန်မှာ ကျွန်ုပ်တို့ရဲ့စိတ်နှလုံး၊ ခံစားချက်၊ ကျန်းမာရေးနဲ့ ဘုရားသခင်အပေါ် ကျွန်ုပ်တို့ရဲ့ယုံကြည်ခြင်း ထိခိုက်တဲ့အတွက် နှစ်သိမ့်မှုလိုအပ်ကြတယ်။ ဥပမာ၊ စိတ်နှလုံးကို သုံးသပ်ကြည့်ပါ။ ကျွန်ုပ်တို့ရဲ့နှလုံးက “ကျိုးပဲ့ကြေမွ” နိုင်တယ်လို့ သမ္မာကျမ်းစာမှာ ဖော်ပြထားတယ်။ (ဆာ. ၅၁:၁၇) ယေဟောဝါက ဒီအခြေအနေကို ကျိန်းသေ ကိုင်တွယ်ဖြေရှင်းပေးနိုင်တယ်၊ အကြောင်းကတော့ ကိုယ်တော်ဟာ “နှလုံးကြေကွဲသောသူတို့ကို နှစ်သိမ့်စေ၍ သူတို့ဒဏ်ချက်များကိုပတ်စည်းတော်မူ” တဲ့အတွက်ပဲ။ (ဆာ. ၁၄၇:၃၊ သမ္မာ) အလွန်ဆိုးဝါးတဲ့အခြေအနေတွေမှာတောင် ကိုယ်တော့်ကို ယုံကြည်စိတ်ချမှုအပြည့်နဲ့ ဆုတောင်းပြီး ကိုယ်တော့်ပညတ်တွေကို လိုက်လျှောက်မယ်ဆိုရင် ကိုယ်တော်က ကျိုးပဲ့ကြေမွတဲ့စိတ်နှလုံးကို သက်သာမှုပေးနိုင်ပါတယ်။—၁ ယောဟန် ၃:၁၉-၂၂; ၅:၁၄၊ ၁၅ တို့ကိုဖတ်ပါ။
၈။ စိတ်ပူပန်လာတဲ့အခါ ယေဟောဝါ ဘယ်လိုကူညီနိုင်သလဲ။
၈ စမ်းသပ်မှုအမျိုးမျိုးကြောင့် ကျွန်ုပ်တို့ စိတ်ပူပန်လာပြီး နှစ်သိမ့်မှုလိုအပ်တဲ့ အခါတွေရှိနိုင်တယ်။ ဒီယုံကြည်ခြင်းစမ်းသပ်မှုတွေကို ကျွန်ုပ်တို့ရဲ့ကိုယ်ပိုင်ခွန်အားနဲ့ ဖြေရှင်းနိုင်မှာမဟုတ်ဘူး။ ဒါပေမဲ့ ဆာလံဆရာ ဒီလိုသီဆိုခဲ့တယ်– “အကျွန်ုပ်၏စိတ်ထဲမှာ စိုးရိမ်ကြောင့်ကြခြင်း များပြားသောအခါ နှစ်သိမ့်တော်မူခြင်းသည် အကျွန်ုပ်ကိုရွှင်လန်းစေပါ၏။” (ဆာ. ၉၄:၁၉၊ သမ္မာ) ဒါ့အပြင် ပေါလု ဒီလိုရေးခဲ့တယ်– “မည်သည့်အမှုကိုမျှ စိုးရိမ်ခြင်းမရှိဘဲ အရာရာတွင် ကျေးဇူးတော် ချီးမွမ်းခြင်းနှင့်တကွ ဆုတောင်းခြင်း၊ တိုးလျှိုးအသနားခံခြင်းအားဖြင့် သင်တို့အသနားခံလိုသောအရာများကို ဘုရားသခင်ထံ ကြားလျှောက်ကြလော့။ ထိုသို့ပြုလျှင် စဉ်းစား၍မမီနိုင်သည့် ဘုရားသခင်၏ ငြိမ်သက်ခြင်းသည် ခရစ်တော်ယေရှုအားဖြင့် သင်တို့၏စိတ်နှလုံးနှင့် ဉာဏ်တို့ကို စောင့်ရှောက်လိမ့်မည်။” (ဖိ. ၄:၆၊ ၇) သမ္မာကျမ်းစာကို ဖတ်ရှု၊ တွေးတောဆင်ခြင်တာက စိတ်ပူပန်မှုကို ရင်ဆိုင်ဖြေရှင်းရာမှာ အလွန်အထောက်အကူပြုနိုင်တယ်။—၂ တိ. ၃:၁၅-၁၇။
၉။ အပျက်သဘောခံစားချက်တွေကို ဘယ်လိုရင်ဆိုင်ဖြေရှင်းနိုင်သလဲ။
၉ တစ်ခါတလေ စိတ်ပျက်အားလျော့လာပြီး အပျက်သဘောခံစားချက်တွေ လွှမ်းမိုးနေနိုင်တယ်။ ယေဟောဝါတောင်းဆိုရာတစ်ခုခုကို မလုပ်နိုင်ဘူး ဒါမှမဟုတ် အသင်းတော်တာဝန်တစ်ခုကို မထမ်းဆောင်နိုင်ဘူးလို့ ခံစားရတာဖြစ်နိုင်တယ်။ ဒီအခြေအနေမှာလည်း ယေဟောဝါ နှစ်သိမ့်ပေးနိုင်၊ ကူညီပေးနိုင်တယ်။ ဥပမာ၊ အစ္စရေးလူမျိုးကို ဦးဆောင်ပြီး အင်အားကြီးတဲ့လူမျိုးကို တိုက်ခိုက်ဖို့ ယောရှုကို ယေဟောဝါတာဝန်ပေးချိန်မှာ မောရှေ ဒီလိုပြောခဲ့တယ်– ‘အားယူ၍ရဲရင့်ခြင်းရှိကြလော့။ မစိုးရိမ်ကြနှင့်။ သူတို့ကိုမကြောက်ကြနှင့်။ ယေဟောဝါသည် သင်တို့ဘုရားသခင်ဖြစ်၍ သင်တို့နှင့်အတူ ကိုယ်တိုင်ကြွတော်မူမည်။ သင်တို့ကိုစွန့်တော်မမူ၊ ပစ်ထားတော်မမူ။’ (တရား. ၃၁:၆) ယောရှုဟာ ယေဟောဝါရဲ့ကူညီထောက်မမှုနဲ့ ဘုရားသခင့်လူမျိုးကို ကတိထားရာပြည်ထဲ ဦးဆောင်ခေါ်သွားနိုင်ခဲ့ပြီး ရန်သူတွေကို အောင်နိုင်ခဲ့တယ်။ ပင်လယ်နီကိုဖြတ်တုန်းကလည်း မောရှေကို ဘုရားသခင် အလားတူ ကူညီထောက်မခဲ့တယ်။—ထွ. ၁၄:၁၃၊ ၁၄၊ ၂၉-၃၁။
၁၀။ စိတ်ဆင်းရဲစရာအခြေအနေတွေကြောင့် ကျန်းမာရေးထိခိုက်တဲ့အခါ ဘာက ကူညီပေးနိုင်သလဲ။
၁၀ စိတ်ဆင်းရဲစရာအခြေအနေတွေက ကျန်းမာရေးကို ထိခိုက်စေနိုင်တယ်။ သင့်တင့်မျှတစွာစားသောက်ခြင်း၊ လုံလောက်စွာအနားယူခြင်း၊ လေ့ကျင့်ခန်းလုပ်ခြင်းနဲ့ သန့်သန့်ရှင်းရှင်းနေခြင်းက ကျွန်ုပ်တို့ရဲ့ ကျန်းမာရေးကို အထောက်အကူပြုပါတယ်။ ဒါ့အပြင် ကျမ်းစာမှာဖော်ပြထားတဲ့ အနာဂတ်အကြောင်း စဉ်းစားခြင်းကလည်း ကျွန်ုပ်တို့ရဲ့ ကျန်းမာရေးကို အထောက်အကူပြုနိုင်တယ်။ ဒါကြောင့် စိတ်ပျက်စရာကြုံရတဲ့အခါ ပေါလုရဲ့အဖြစ်အပျက်နဲ့ အားပေးစကားတွေကို သတိရခြင်းက အထောက်အကူဖြစ်တယ်။ သူဒီလိုပြောခဲ့တယ်– “ငါတို့သည် အဘက်ဘက်မှ ဖိနှိပ်ခံရသော်လည်း မလှုပ်ရှားနိုင်သည့်အထိ ကျဉ်းကျပ်မနေပါ။ ငါတို့သည် ကြံရာမရဖြစ်ကြသော်လည်း ထွက်ပေါက် လုံးဝမရှိဘဲ မနေပါ။ ငါတို့သည် ညှဉ်းပန်းနှိပ်စက်ခံရသော်လည်း စွန့်ပစ်ခြင်းကို ခံရသည်မဟုတ်။ အလဲထိုးခံရသော်လည်း ဖျက်ဆီးခံရသည်မဟုတ်။”—၂ ကော. ၄:၈၊ ၉။
၁၁။ ယုံကြည်ခြင်းအားနည်းလာတယ်လို့ ခံစားရတဲ့အခါ ဘာလုပ်နိုင်သလဲ။
၁၁ တချို့စမ်းသပ်မှုတွေက ကျွန်ုပ်တို့ရဲ့ယုံကြည်ခြင်းကို ထိခိုက်နိုင်တယ်။ ဒီအချိန်မှာလည်း ယေဟောဝါက ကျွန်ုပ်တို့ရဲ့ ကယ်တင်ရှင်ပါပဲ။ သမ္မာကျမ်းစာမှာ ဒီလိုအာမခံထားတယ်– ‘ယေဟောဝါသည် လဲသောသူရှိသမျှတို့ကို ထောက်မတော်မူ၏။’ (ဆာ. ၁၄၅:၁၃ခ) ယုံကြည်ခြင်းအားနည်းလာတယ်လို့ ခံစားရတဲ့အခါ ခရစ်ယာန်အကြီးအကဲတွေထံ အကူအညီတောင်းခံသင့်တယ်။ (ယာ. ၅:၁၄၊ ၁၅) ထာဝရအသက်မျှော်လင့်ချက်ကို မပြတ်စိတ်စွဲထားမယ်ဆိုရင် ယုံကြည်ခြင်းစမ်းသပ်ခံရချိန်မှာ ခံရပ်နိုင်ဖို့ ထောက်ကူပေးနိုင်တယ်။—ယော. ၁၇:၃။
ဘုရားသခင်ထံမှ နှစ်သိမ့်မှုခံစားခဲ့ရသူများ
၁၂။ ယေဟောဝါ အာဗြဟံကို ဘယ်လိုနှစ်သိမ့်ပေးခဲ့သလဲ။
၁၂ ဆာလံဆရာက ယေဟောဝါကို ဒီလိုပြောခဲ့တယ်– “ကျွန်တော်မျိုးအား ထားတော်မူသော ကတိတော်ကို သတိရတော်မူပါ။ ယင်းကတိတော်သည် ကျွန်တော်မျိုးအား မျှော်လင့်ချက်ကိုပေးပါပြီ။ ကိုယ်တော်ရှင်၏ကတိတော်သည် ကျွန်တော်မျိုးအား အသက်ရှင်စေတော်မူပြီဖြစ်၍ ဆင်းရဲဒုက္ခရောက်စဉ်အခါ၌ပင် ကျွန်တော်မျိုးသည် စိတ်သက်သာမှုကို ရရှိပါ၏။” (ဆာ. ၁၁၉:၄၉၊ ၅၀၊ ခမ) ယနေ့ ကျွန်ုပ်တို့မှာ ယေဟောဝါရဲ့ နှစ်သိမ့်မှုခံစားခဲ့ရသူတွေအကြောင်းပါတဲ့ သမ္မာကျမ်းစာရှိထားတယ်။ ဥပမာ၊ သောဒုံနဲ့ ဂေါမောရမြို့ကို ယေဟောဝါဖျက်ဆီးတော့မယ့်အကြောင်း အာဗြဟံသိလိုက်ရတဲ့အခါ အရမ်းစိုးရိမ်ခဲ့တယ်။ ဒါကြောင့် “ဖြောင့်မတ်သောသူတို့ကို မတရားသောသူတို့နှင့်တကွ ဖျက်ဆီးတော်မူမည်လော” လို့ ဘုရားသခင်ကို မေးခဲ့တယ်။ ယေဟောဝါက သောဒုံမြို့မှာ ဖြောင့်မတ်သူ ၅၀ ရှိရင် ဖျက်ဆီးမှာမဟုတ်ဘူးလို့ မိန့်တော်မူပြီး နှစ်သိမ့်ပေးခဲ့တယ်။ ဒါပေမဲ့ အာဗြဟံက ဖြောင့်မတ်သူ ၄၅ ယောက်၊ ၄၀၊ ၃၀၊ ၂၀၊ ၁၀ ရှိရင်ကော ဖျက်ဆီးမလားဆိုပြီး နောက်ထပ် ငါးကြိမ်တိတိ ယေဟောဝါကို မေးခွန်းထုတ်ခဲ့တယ်။ အကြိမ်တိုင်းမှာ ယေဟောဝါက အဲဒီလောက်သာရှိရင် မဖျက်ဆီးဘူးဆိုပြီး အာဗြဟံကို စိတ်ရှည်စွာ၊ ကြင်နာစွာ နှစ်သိမ့်ခဲ့တယ်။ သောဒုံမြို့မှာ ဖြောင့်မတ်သူ ၁၀ ယောက်တောင်မပြည့်ပေမဲ့ လောတနဲ့ သူ့သမီးတွေကို ယေဟောဝါ ကယ်တင်ခဲ့တယ်။—က. ၁၈:၂၂-၃၂; ၁၉:၁၅၊ ၁၆၊ ၂၆။
၁၃။ ဟန္နက ယေဟောဝါကို ယုံကြည်စိတ်ချကြောင်း ဘယ်လိုတင်ပြခဲ့သလဲ။
၁၃ ဧလကာနရဲ့ဇနီးဖြစ်သူ ဟန္နဟာ ကလေးအရမ်းလိုချင်ခဲ့တယ်။ ဒါပေမဲ့ သူက မြုံနေလို့ အရမ်းဝမ်းနည်းခဲ့တယ်။ ဒီကိစ္စကို ယေဟောဝါထံဆုတောင်းခဲ့ပြီး ယဇ်ပုရောဟိတ်ဧလိက ‘အစ္စရေးအမျိုး၏ဘုရားသခင် ပေးသနားတော်မူပါစေသော’ လို့ သူ့ကိုပြောခဲ့တယ်။ ဒီကနေ သူနှစ်သိမ့်မှုခံစားခဲ့ရပြီး “နောက်တစ်ဖန် မျက်နှာညှိုးငယ်ခြင်းမရှိ” တော့ဘူး။ (၁ ရာ. ၁:၈၊ ၁၇၊ သမ္မာ၊ ၁၈) ဟန္နက ယေဟောဝါကို ယုံကြည်စိတ်ချခဲ့ပြီး ဒီကိစ္စကို ကိုယ်တော့်လက်တော်မှာ စိတ်ချလက်ချပုံအပ်ခဲ့တယ်။ ဘယ်လိုဖြစ်လာမယ်ဆိုတာ သူ,မသိပေမဲ့ စိတ်ငြိမ်သက်မှု ခံစားခဲ့ရတယ်။ အချိန်တန်တော့ ဟန္နရဲ့ဆုတောင်းချက်ကို ယေဟောဝါ ဖြေကြားခဲ့တယ်။ သူကိုယ်ဝန်ရှိလာပြီး သားယောက်ျားလေးတစ်ဦး ဖွားမြင်ခဲ့လို့ ရှမွေလလို့ အမည်ပေးခဲ့တယ်။—၁ ရာ. ၁:၂၀။
၁၄။ ဒါဝိဒ် ဘာကြောင့် နှစ်သိမ့်မှုလိုအပ်ခဲ့သလဲ၊ သူ ဘယ်သူ့ဆီကနေ နှစ်သိမ့်မှုတောင်းခံခဲ့သလဲ။
၁၄ ဘုရားသခင်ရဲ့နှစ်သိမ့်မှုခံရသူ နောက်တစ်ဦးကတော့ ရှေးအစ္စရေးဘုရင်ဒါဝိဒ် ဖြစ်တယ်။ ယေဟောဝါက “နှလုံးကိုကြည့်ရှု” နိုင်တဲ့အတွက် ဒါဝိဒ်ကို အစ္စရေးမင်းလောင်းအဖြစ် ရွေးချယ်တုန်းက သူဟာ မှန်ရာကိုပြုလုပ်လိုပြီး စစ်မှန်တဲ့ဝတ်ပြုရေးကိုချစ်မြတ်နိုးသူဖြစ်တယ်ဆိုတာ ကိုယ်တော်သိမြင်ခဲ့တယ်။ (၁ ရာ. ၁၆:၇; ၂ ရာ. ၅:၁၀) ဒါပေမဲ့ နောက်ပိုင်းမှာ ဒါဝိဒ်က ဗာသရှေဘနဲ့မှားယွင်းခဲ့ပြီး သူ့အပြစ်ကိုဖုံးဖို့အတွက် ဗာသရှေဘရဲ့ခင်ပွန်းကို လုပ်ကြံလိုက်တယ်။ သူကျူးလွန်ခဲ့တဲ့အပြစ်က ဘယ်လောက်ကြီးမားတယ်ဆိုတာ ဒါဝိဒ်သိမြင်လာတဲ့အခါ ယေဟောဝါထံ ဒီလိုဆုတောင်းခဲ့တယ်– ‘ချစ်ခင်ကြင်နာမှုများပြားသည်နှင့်အညီ အကျွန်ုပ်လွန်ကျူးခြင်းအပြစ်ကို ဖြေတော်မူပါ။ မကောင်းမှုအညစ်အကြေးကို အကုန်အစင်ဆေးကြော၍ အကျွန်ုပ်ကိုသန့်ရှင်းစေတော်မူပါ။ အကျွန်ုပ်လွန်ကျူးပါပြီဟုဝန်ချလျက် ကိုယ်အပြစ်ကို အစဉ်မပြတ်အောက်မေ့လျက်နေပါ၏။’ (ဆာ. ၅၁:၁-၃) ဒါဝိဒ် အမှန်တကယ်နောင်တရခဲ့တဲ့အတွက် သူ့ကို ယေဟောဝါခွင့်လွှတ်ခဲ့တယ်။ ဒါပေမဲ့ သူ့အမှားရဲ့နောက်ဆက်တွဲဆိုးကျိုးတွေကိုတော့ ခံစားခဲ့ရတယ်။ (၂ ရာ. ၁၂:၉-၁၂) ဘယ်လိုပဲခံစားရပါစေ ယေဟောဝါရဲ့ကြင်နာမှုက နှိမ့်ချတဲ့ကျေးကျွန်အတွက် နှစ်သိမ့်မှုဖြစ်ခဲ့တယ်။
၁၅။ ယေရှု မသေဆုံးခင်အချိန်မှာ ယေဟောဝါ ဘယ်လိုကူညီပေးခဲ့သလဲ။
၁၅ ယေရှု မြေကြီးပေါ်ရှိနေချိန်မှာ ခက်ခဲတဲ့စမ်းသပ်မှုများစွာ ကြုံတွေ့ခဲ့ရတယ်။ ဒီလိုစမ်းသပ်ခံဖို့ ဘုရားသခင်ခွင့်ပြုခဲ့တယ်၊ ယေရှုဟာ ယေဟောဝါကိုအမြဲယုံကြည်ကိုးစားပြီး ကိုယ်တော့်ပိုင်သအုပ်စိုးမှုကိုထောက်ခံသူ စုံလင်တဲ့လူသားတစ်ဦးအနေနဲ့ အဆုံးထိတည်ကြည်ခဲ့တယ်။ သစ္စာဖောက်ခံရပြီး အသတ်ခံရတော့မယ့်အချိန်မှာ ယေရှုက “ကျွန်ုပ်၏အလိုအတိုင်း မဖြစ်ပါစေနှင့်။ ကိုယ်တော်၏အလိုတော်အတိုင်း ဖြစ်ပါစေ” လို့ ယေဟောဝါထံ ဆုတောင်းခဲ့တယ်။ ဆုတောင်းပြီးတဲ့နောက် ကောင်းကင်တမန်တစ်ပါးပေါ်လာပြီး ယေရှုကိုအားပေးခဲ့တယ်။ (လု. ၂၂:၄၂၊ ၄၃) ဘုရားသခင်က အဲဒီအချိန်မှာ ယေရှုလိုအပ်တဲ့ နှစ်သိမ့်မှု၊ ခွန်အားနဲ့ ကူညီထောက်မမှုပေးခဲ့တယ်။
၁၆။ ခရစ်ယာန်ယုံကြည်ချက်ကြောင့် အသက်အန္တရာယ်ခြိမ်းခြောက်ခံရတဲ့အခါ ယေဟောဝါ ဘယ်လိုကူညီပေးနိုင်သလဲ။
၁၆ ကျွန်ုပ်တို့ရဲ့ခရစ်ယာန်ယုံကြည်ချက်ကြောင့် အသေခံရမယ်ဆိုရင်တောင် ကိုယ်တော့်အပေါ် ဆက်တည်ကြည်နိုင်ဖို့ ယေဟောဝါ ကျွန်ုပ်တို့ကို ကူညီပေးနိုင်ပြီး ကူညီပေးမှာဖြစ်တယ်။ ဒါ့အပြင် ရှင်ပြန်ထမြောက်ခြင်းမျှော်လင့်ချက်ကြောင့် နှစ်သိမ့်မှုခံစားရတယ်။ နောက်ဆုံးရန်သူဖြစ်တဲ့ သေခြင်း “ဆုံးရှုံး” မယ့်နေ့ကို ကျွန်ုပ်တို့စောင့်မျှော်နေကြတယ်။ (၁ ကော. ၁၅:၂၆) သေဆုံးသွားတဲ့ တည်ကြည်တဲ့ကျေးကျွန်တွေနဲ့ တခြားသူတွေက ယေဟောဝါရဲ့မမေ့ပျောက်နိုင်တဲ့ မှတ်ဉာဏ်မှာရှိနေပြီး ရှင်ပြန်ထမြောက်လာကြမှာဖြစ်တယ်။ (ယော. ၅:၂၈၊ ၂၉; တ. ၂၄:၁၅) ယေဟောဝါရဲ့ရှင်ပြန်ထမြောက်ခြင်းကတိတော်ကို ယုံကြည်စိတ်ချခြင်းက နှိပ်စက်ညှဉ်းပန်းခံရချိန်မှာ နှစ်သိမ့်မှုခံစားရစေပြီး ခိုင်မာတဲ့မျှော်လင့်ချက်ရှိစေတယ်။
၁၇။ ချစ်မြတ်နိုးရသူတစ်ဦး သေဆုံးသွားတဲ့အခါ ကျွန်ုပ်တို့ကို ယေဟောဝါ ဘယ်လိုနှစ်သိမ့်ပေးနိုင်သလဲ။
၁၇ သင်္ချိုင်းမှာအိပ်ပျော်နေကြတဲ့ ကျွန်ုပ်တို့ချစ်မြတ်နိုးရသူတွေဟာ လက်ရှိခံစားနေရတဲ့ ဆင်းရဲဒုက္ခနဲ့ကင်းဝေးတဲ့ ကမ္ဘာသစ်မှာ ထမြောက်လာကြမယ်ဆိုတာသိရခြင်းက တကယ့်နှစ်သိမ့်မှုပါပဲ။ ဒီဆိုးညစ်တဲ့လောကရဲ့အဆုံးကို ကပ်ကျော်လွတ်မြောက်မယ့် ယေဟောဝါကျေးကျွန် “လူအုပ်ကြီး” ဟာ မြေကြီးပေါ်ထမြောက်လာမယ့်သူတွေကို ကြိုဆိုပြီး သွန်သင်ပေးရတဲ့အခွင့်ထူး ရရှိကြပါလိမ့်မယ်။—ဗျာ. ၇:၉၊ ၁၀။
ထာဝရလက်ရုံးတော်ဖြင့်ထောက်မ
၁၈၊ ၁၉။ နှိပ်စက်ညှဉ်းပန်းခံရချိန်အတွင်းမှာ ဘုရားသခင့်ကျေးကျွန်တွေ ဘယ်လို နှစ်သိမ့်မှုရရှိခဲ့သလဲ။
၁၈ မောရှေက အစ္စရေးလူတွေကို အားတက်စေပြီး နှစ်သိမ့်မှုပေးတဲ့ ဒီသီချင်းစာသားတွေနဲ့ အာမခံခဲ့တယ်– ‘ရှေးဦးစွာသောဘုရားသခင်သည် သင့်ခိုလှုံရာဖြစ်၍ ထာဝရလက်ရုံးတော်ဖြင့် သင့်ကိုထောက်မတော်မူ၏။’ (တရား. ၃၃:၂၇) နောက်ပိုင်းမှာ ပရောဖက်ရှမွေလက အစ္စရေးလူမျိုးကို ဒီလိုပြောခဲ့တယ်– ‘ယေဟောဝါနောက်တော်သို့ လိုက်ရာမှမလွှဲကြနှင့်။ ယေဟောဝါကို စိတ်နှလုံးအကြွင်းမဲ့ ဝတ်ပြုကြလော့။ ယေဟောဝါသည် မဟာနာမတော်ကိုထောက်၍ မိမိလူတို့ကိုစွန့်တော်မမူ။’ (၁ ရာ. ၁၂:၂၀-၂၂) စစ်မှန်တဲ့ဝတ်ပြုရေးမှာ ကျွန်ုပ်တို့စွဲမြဲနေသရွေ့ ကျွန်ုပ်တို့ကို ယေဟောဝါ ဘယ်တော့မှစွန့်မှာ မဟုတ်ဘူး။ ကျွန်ုပ်တို့လိုအပ်တဲ့ ထောက်မမှုကို ကိုယ်တော်အမြဲပေးတော်မူပါလိမ့်မယ်။
၁၉ ခက်ခဲကျပ်တည်းတဲ့ ဒီနောက်ဆုံးကာလမှာ ကိုယ်တော့်လူမျိုးလိုအပ်တဲ့ အကူအညီနဲ့ထောက်မမှုပေးဖို့ ကိုယ်တော် ဘယ်တော့မှ ပျက်ကွက်မှာမဟုတ်ဘူး။ မျက်မှောက်ခေတ် ကမ္ဘာတစ်ဝန်းမှာရှိတဲ့ ကျွန်ုပ်တို့ရဲ့ညီအစ်ကိုညီအစ်မတွေဟာ ယေဟောဝါကိုဝတ်ပြုတဲ့အတွက် နှိပ်စက်ညှဉ်းပန်းမှု၊ ထောင်သွင်းအကျဉ်းချမှုတွေ ခံခဲ့ရတယ်။ ခက်ခဲတဲ့အချိန်မှာ ယေဟောဝါက မိမိရဲ့ကျေးကျွန်တွေကို အမှန်တကယ်နှစ်သိမ့်ပေးတယ်ဆိုတာ သူတို့ရဲ့အတွေ့အကြုံတွေက ဖော်ပြတယ်။ ဥပမာ၊ ယခင်ဆိုဗီယက်ပြည်ထောင်စုမှာနေထိုင်တဲ့ ညီအစ်ကိုတစ်ဦးက သူ့ရဲ့ယုံကြည်ချက်ကြောင့် ၂၃ နှစ်ကြာ ထောင်ကျခဲ့တယ်။ ဒီလိုအခြေအနေမှာတောင် ကျမ်းစာအခြေပြုစာပေရနိုင်ခဲ့ပြီး ဒီကနေ ခွန်အားနဲ့နှစ်သိမ့်မှု ရခဲ့တယ်။ “အဲဒီနှစ်တွေတစ်လျှောက်မှာ ယေဟောဝါကို ယုံကြည်ကိုးစားဖို့ သင်ယူခဲ့ရပြီး ကိုယ်တော့်ထံကနေ ခွန်အားရရှိခဲ့တယ်” လို့ သူပြောပြခဲ့တယ်။—၁ ပေတရု ၅:၆၊ ၇ ကိုဖတ်ပါ။
၂၀။ ကျွန်ုပ်တို့ကို ယေဟောဝါမစွန့်ပစ်ဘူးဆိုတာ ဘာကြောင့်စိတ်ချနိုင်သလဲ။
၂၀ အနာဂတ်မှာ ဘယ်အရာနဲ့ပဲကြုံတွေ့ရပါစေ ‘ယေဟောဝါသည် မိမိလူတို့ကိုမပယ်’ ဆိုတဲ့ ဆာလံဆရာရဲ့နှစ်သိမ့်စကားကို အမြဲသတိရနေဖို့ဖြစ်တယ်။ (ဆာ. ၉၄:၁၄) ကျွန်ုပ်တို့ကိုယ်တိုင်က နှစ်သိမ့်မှုလိုအပ်ပေမဲ့ တခြားသူတွေကိုနှစ်သိမ့်ပေးနိုင်တဲ့ အခွင့်ထူးလည်း ကျွန်ုပ်တို့မှာရှိတယ်။ ဒီဒုက္ခပင်လယ်ဝေနေတဲ့လောကမှာ ဝမ်းနည်းကြေကွဲနေသူတွေကို ကျွန်ုပ်တို့ ဘယ်လိုနှစ်သိမ့်ပေးနိုင်တယ်ဆိုတာ နောက်ဆောင်းပါးမှာ တွေ့ရပါလိမ့်မယ်။
သင် ဘယ်လိုဖြေဆိုမလဲ
• ကျွန်ုပ်တို့ကို စိတ်ဆင်းရဲစေတဲ့အရာတွေက ဘာတွေလဲ။
• ယေဟောဝါက ကိုယ်တော့်ကျေးကျွန်တွေကို ဘယ်လိုနှစ်သိမ့်ပေးသလဲ။
• ကျွန်ုပ်တို့ အသက်အန္တရာယ်နဲ့ကြုံတွေ့ရချိန်မှာ ဘာက နှစ်သိမ့်မှုပေးသလဲ။
[စာမျက်နှာ ၂၅ ပါလေးထောင့်ကွက်နှင့် ရုပ်ပုံ]
ရင်ဆိုင်ဖြေရှင်းနည်း
▪ စိတ်နှလုံးကြေကွဲတဲ့အခါ ဆာ. ၁၄၇:၃; ၁ ယော. ၃:၁၉-၂၂; ၅:၁၄၊ ၁၅
▪ စိတ်ပူပန်တဲ့အခါ ဆာ. ၉၄:၁၉; ဖိ. ၄:၆၊ ၇
▪ အပျက်သဘောခံစားချက် လွှမ်းမိုးနေတဲ့အခါ ထွ. ၁၄:၁၃၊ ၁၄; တရား. ၃၁:၆
▪ ကျန်းမာရေးထိခိုက်တဲ့အခါ ၂ ကော. ၄:၈၊ ၉
▪ ယုံကြည်ခြင်းအားနည်းတဲ့အခါ ဆာ. ၁၄၅:၁၃ခ; ယာ. ၅:၁၄၊ ၁၅