“အံ့ဖွယ်သောအမှုတို့ကို” ကြားပြောရန် ဂိလဒ်ကျောင်းဆင်းများ အားပေးခံခဲ့ရ

၂၀၀၃၊ စက်တင်ဘာ ၁၃ ရက်နေ့တွင်ကျင်းပသော ဂိလဒ်ကင်းမျှော်စင်ကျမ်းစာကျောင်း၏ ၁၁၅ ကြိမ်မြောက် ကျောင်းဆင်းပွဲအစီအစဉ်ကို ထူးခြားသောလူစုလူဝေးဖြစ်သည့် ၅၂ နိုင်ငံမှ လူပေါင်း ၆,၆၃၅ ဦးတက်ရောက်ခဲ့သည်။

ထိုသူတို့သည် သင်တန်းသား ၄၈ ဦးအားပေးသည့် ကျမ်းစာအခြေပြု အားပေးချက်များကို ကြားနာခဲ့ကြသည်၊ သင်တန်းသားများသည် ၁၇ နိုင်ငံ၌ရှိသောလူများအား “ဘုရားသခင်၏ အံ့ဖွယ်သောအမှု” ကိုကြားပြောရန်ဖြစ်သည်။ (တမန်တော် ၂:၁၁) ကျောင်းဆင်းများသည် ယခု ဘုရားသခင်၏ နှုတ်မြွက်စကားတော် သွန်သင်သူများအဖြစ် ခရစ်ယာန်သာသနာပြုလုပ်ငန်းကို ထိုနိုင်ငံများတွင် လုပ်ဆောင်ကြမည်ဖြစ်သည်။

ယေဟောဝါသက်သေများ၏ အုပ်ချုပ်ရေးအဖွဲ့ဝင်ဖြစ်ပြီး ကျောင်းဆင်းပွဲသဘာပတိအဖြစ်ဆောင်ရွက်သူ စတီဗင် လက်တ် က သူ၏အဖွင့်ဟောပြောချက်တွင် ကျောင်းသားများအား ဤသို့အမှတ်ရစေခဲ့၏– “သင်တို့တာဝန်ကျတဲ့နေရာကို သွားတဲ့အခါ ဘယ်နေရာဒေသ၊ ဘယ်လိုအခြေအနေနဲ့ ကြုံတွေ့ရပါစေ သင်တို့ဘက်မှာရှိတဲ့သူတွေဟာ သင်တို့တစ်ဖက်ဆန့်ကျင်သူတွေထက် ပိုများတယ်။” ညီအစ်ကိုလက်တ် သည် ဓမ္မရာဇဝင် စတုတ္ထစောင် အခန်းကြီး ၆ တွင်တွေ့ရသော မှတ်တမ်းကိုအသုံးပြုကာ သင်တန်းသားများသည် ယေဟောဝါဘုရားသခင်၊ “ဘုရားသခင်၏ အံ့ဖွယ်အမှုတို့ကို” ကြားသိစေသော ကောင်းကင်တမန်မြောက်မြားစွာ၏ ထောက်မကူညီမှုကို ကိုးစားနိုင်ကြောင်း သတိရစေခဲ့သည်။ (၄ ဓမ္မရာဇဝင် ၆:၁၅၊ ၁၆) ပထမရာစုခရစ်ယာန်များ၏ ဟောပြောခြင်းနှင့် သွန်သင်ခြင်းလုပ်ငန်းတွင် ဆန့်ကျင်မှုများ၊ လျစ်လျူရှုမှုများကို ကြုံတွေ့ခဲ့ရသည်၊ ယနေ့ ခရစ်ယာန်သာသနာပြုများလည်း အလားတူ အခြေအနေမျိုးနှင့် ကြုံတွေ့ကြရသည်။ သို့သော် သူတို့သည် ယေဟောဝါ၏ မြေကြီးအဖွဲ့အစည်းအပြင် ကောင်းကင်မှထောက်မမှုရရန် ကိုးစားနိုင်ပါသည်။—ဆာလံ ၃၄:၇; မဿဲ ၂၄:၄၅။

“ဘုရားသခင်၏ အံ့ဖွယ်အမှုတို့ကို” ကြားပြောလော့

သဘာပတိ၏ အဖွင့်ဟောပြောချက်ပြီးနောက် အမေရိကန်ပြည်ထောင်စု ဌာနခွဲကော်မတီဝင်ဖြစ်သော ဟယ်ရယ်လ် ကော့ကဲန်က “လက်တွေ့ကျသောမျှော်လင့်ခြင်း—ရွှင်လန်းစေပြီး အောင်မြင်မှုရှိစေသောလုပ်ငန်းအတွက် သော့ချက်” ခေါင်းစဉ်နှင့်ဟောပြောခဲ့သည်။ ညီအစ်ကို ကော့ကဲန်က နယပုံပြင် ၁၃:၁၂ တွင်ဖော်ပြထားသည့်အတိုင်း မျှော်လင့်ချက်မပြည့်ခြင်းက စိတ်ဓာတ်ကျစေနိုင်ကြောင်း ထောက်ပြခဲ့သည်။ သို့သော် စိတ်ဓာတ်ကျရခြင်းမှာ အများအားဖြင့် ဖြစ်မလာသော လက်တွေ့မကျသည့် မျှော်လင့်ချက်များကြောင့် ဖြစ်သည်။ ကျောင်းဆင်းများသည် မိမိတို့ကိုယ်တိုင်နှင့် အခြားသူများအပေါ် မျှတပြီး လက်တွေ့ကျသော ရှုမြင်ချက်ရှိဖို့လိုသည်။ သူတို့သည် အမှားတချို့ပြုလုပ်ကြမည်ကို မျှော်လင့်သင့်သည်၊ သို့သော် အခြားသူများအား “ဘုရားသခင်၏ အံ့ဖွယ်အမှုတို့ကို” နားလည်သဘောပေါက်အောင် ကူညီပေးဖို့ ကြိုးစားနေစဉ် ယင်းတို့ကြောင့် အလွန်အမင်းဝမ်းနည်းကြေကွဲခြင်း မဖြစ်သင့်ပါ။ ခရစ်ယာန်သာသနာပြုအသစ်များသည် “ရှာသောသူအား အကျိုးပေးတော်မူ” သောယေဟောဝါအား ယုံကြည်ကိုးစားရန် ညီအစ်ကို ကော့ကဲန် က အားပေးခဲ့သည်။—ဟေဗြဲ ၁၁:၆။

အစီအစဉ်၏ နောက်အပိုင်းကို အုပ်ချုပ်ရေးအဖွဲ့ဝင် ဒယ်နီယယ် ဆစ်ဒလစ်ခ် က “ခရစ်ယာန်မျှော်လင့်ချက်—ယင်းကားအဘယ်နည်း” ခေါင်းစဉ်ဖြင့် ဟောပြောခဲ့သည်။ သူဤသို့ဆိုခဲ့၏– “မျှော်လင့်ခြင်းဟာ ခရစ်ယာန်အရည်အချင်းတစ်ခုဖြစ်တယ်။ မှန်ကန်တဲ့စံနှုန်းတစ်ခုဖြစ်ပြီး ဘုရားသခင်နဲ့ လျောက်ပတ်တဲ့ဆက်ဆံရေးကို ဖြစ်စေတယ်။ ခရစ်ယာန်မဟုတ်တဲ့သူတစ်ယောက်ဟာ ကျွန်တော်တို့လိုမျှော်လင့်ချက်မျိုး ရှိနိုင်မှာမဟုတ်ဘူး။” ညီအစ်ကို ဆစ်ဒလစ်ခ် က ဘဝအခက်အခဲများကို ရင်ဆိုင်ဖြေရှင်းရာတွင် အပြုသဘောထား ဆက်ရှိရန် အထောက်အကူပြုနိုင်သော ခရစ်ယာန်မျှော်လင့်ချက်၏ အခြားအသွင်အပြင်များကိုလည်း ဖော်ပြခဲ့သည်။ “ကျွန်တော်တို့အနေနဲ့ အားသစ်မာန်သစ် အောင်မြင်တက်ကြွတဲ့စိတ်ဓာတ်နဲ့ ဘဝကို မျှော်လင့်ချက်ရှိရှိ ရင်ဆိုင်သွားနိုင်ပါတယ်။” ခရစ်ယာန်မျှော်လင့်ချက်က ယေဟောဝါအား ရည်ရွယ်ချက်ရှိသော ဘုရားသခင်အဖြစ် ရှုမြင်စေပြီး ကိုယ်တော့်အမှုတော်ဆောင်ခြင်းတွင် ရွှင်လန်းရန် အထောက်အကူပြုသည်။—ရောမ ၁၂:၁၂။

ဂိလဒ်ကျောင်းမော်ကွန်းထိန်းဖြစ်သူ ဝေါလ်လေးစ် လစ်ဗာရန်စ် က “ဝိညာဉ်ပကတိအတိုင်းကျင့်ကြ” ရန် သင်တန်းသားများအား အားပေးခဲ့သည်။ (ဂလာတိ ၅:၁၆) ယေရမိ၏စာရေးဖြစ်သူ ဗာရုတ်သည် ဝိညာဉ်ပကတိအတိုင်း လျှောက်လှမ်းရာမှ လမ်းလွဲလုနီးပါးဖြစ်ခဲ့ကြောင်းကို ဖော်ပြခဲ့သည်။ တစ်ချိန်တွင် ဗာရုတ်သည် မောပန်းနွမ်းလျလာပြီး ကြီးစွာသောအရာတို့ကို ကိုယ့်အဖို့ စတင်ရှာဖွေခဲ့သည်။ (ယေရမိ ၄၅:၂-၅) ယေရှုနောက်မလိုက်ဘဲ ကယ်တင်ခြင်းအတွက် မရှိမဖြစ်လိုအပ်သော ဝိညာဉ်ရေးအမှန်တရားကို ငြင်းပယ်ကြသူတချို့အကြောင်း ညီအစ်ကို လစ်ဗာရန်စ် ထောက်ပြခဲ့သည်။ ထိုသူတို့သည် ကိုယ်တော်၏သွန်သင်ချက်များကို နားမလည်ကြပါ၊ ထို့ပြင် ထိုအချိန်က သူတို့၏လူ့မျှော်လင့်ချက်များ မဖြစ်လာခြင်းကြောင့် စိတ်ဓာတ်ကျခဲ့ခြင်းဖြစ်သည်။ (ယောဟန် ၆:၂၆၊ ၂၇၊ ၅၁၊ ၆၆) ဖန်ဆင်းရှင်နှင့် ကိုယ်တော်၏ရည်ရွယ်ချက်များအပေါ် တိုက်ရိုက်အာရုံစိုက်ရသည့် လုပ်ငန်းကိုဆောင်ရွက်သော ခရစ်ယာန်သာသနာပြုများသည် ထိုမှတ်တမ်းမှ အဘယ်အရာ သင်ယူနိုင်သနည်း။ အဆင့်အတန်းရှိရန်၊ လူတို့၏အသိအမှတ်ပြုခံရရန်၊ သို့မဟုတ် ကိုယ်ရေးကိုယ်တာအကျိုးအတွက် သီအိုကရက်တစ်တာဝန်တစ်ခုကို အသုံးပြုခြင်း စသည်တို့ကိုမပြုလုပ်ရန် သင်တန်းသားများကို အားပေးခဲ့သည်။

“သင်သည် ပေးကမ်းစွန့်ကြဲသူဖြစ်မည်လော သို့မဟုတ် ရယူသူဖြစ်မည်လော” ဟူသည့်မေးခွန်းကို ဂိလဒ်သင်တန်းပို့ချသူ မာ့ခ် နူမဲရ် က မေးခဲ့သည်။ ဗာရက်၏စစ်တပ်တွင် ကိုယ်ကျိုးမဖက် အမှုဆောင်ကြသော ဣသရေလတစ်ဦးစီသည် ချီးမွမ်းခံရကြောင်း ဖော်ပြသည့် တရားသူကြီး ၅:၂ ပေါ်အခြေခံ၍ ဟောပြောခဲ့သည်။ ဂိလဒ်သင်တန်းသားများသည် သာ၍ကြီးမြတ်သော ဗာရက်ဖြစ်သူ ယေရှုခရစ်၏ ဝိညာဉ်ရေးစစ်ပွဲတွင် ပို၍ပါဝင်တိုက်ခိုက်ရန် ဖိတ်ခေါ်ချက်ကို တုံ့ပြန်ကြသော သူတို့၏စိတ်ဓာတ်အတွက် ချီးမွမ်းခဲ့သည်။ ခရစ်တော်၏စစ်သားများသည် မိမိတို့အားပါဝင်စေသူ၏ မျက်နှာသာရရန် ကြိုးစားသင့်သည်။ ညီအစ်ကို နူမဲရ် က သင်တန်းသားများအား ဤသို့သတိပေးခဲ့သည်– “ကျွန်တော်တို့ဟာ ကိုယ့်အလိုကျဖို့ စပြီးအာရုံစိုက်လာပြီဆိုရင် ရန်သူကိုတိုက်ခိုက်တာ ရပ်လိုက်ကြတယ်။ . . . ခရစ်ယာန်သာသနာပြုလုပ်ငန်းဟာ သင်တို့နဲ့သာသက်ဆိုင်တဲ့ လုပ်ငန်းမဟုတ်ဘူး။ ယေဟောဝါ၊ ကိုယ်တော်ရဲ့ အကြွင်းမဲ့ပိုင်သအုပ်စိုးမှု၊ ကိုယ်တော့်အလိုတော် ပြီးမြောက်အောင်မြင်မှုတွေနဲ့ သက်ဆိုင်တဲ့ လုပ်ငန်းဖြစ်တယ်။ ခရစ်ယာန်သာသနာပြုတွေအဖြစ် အမှုဆောင်နေတာဟာ ယေဟောဝါက ကျွန်တော်တို့ကို ပျော်ရွှင်မှုပေးဖို့ မဟုတ်ဘူး၊ ကိုယ်တော့်ကိုချစ်မြတ်နိုးတဲ့အတွက် ကိုယ်တော့်အမှုတော်ကို ဆောင်နေတာဖြစ်တယ်။”—၂ တိမောသေ ၂:၄။

၎င်းနောက် ဂိလဒ်သင်တန်းပို့ချသူ လောရဲန့်စ် ဘိုဝင်န်က “အမှန်တရားအားဖြင့် သူတို့ကို သန့်ရှင်းစေတော်မူပါ” အပိုင်း၏ ဦးစီးသဘာပတိအဖြစ် ဆောင်ရွက်ခဲ့သည်။ (ယောဟန် ၁၇:၁၇) သူက ၁၁၅ ကြိမ်မြောက် ဂိလဒ်သင်တန်းသားများသည် ဘုရားသခင် သီးသန့်ခွဲခြားထားသော ခရစ်ယာန်ဓမ္မအမှုဆောင်များဖြစ်သည်ဟု ပြောခဲ့သည်။ သင်တန်းတက်နေစဉ်အတွင်း သူတို့သည် အမှန်တရားကိုချစ်မြတ်နိုးသော နှလုံးရိုးဖြောင့်သူများကို ရှာဖွေခြင်းဖြစ်သည့် လယ်ကွင်းဓမ္မအမှုတွင် ပါဝင်ခဲ့ကြသည်။ ယေရှုနှင့် ကိုယ်တော်၏ အစောပိုင်းတပည့်များကဲ့သို့ သင်တန်းသားများသည် “ကိုယ်အလိုအလျောက်” မဟောပြောခဲ့ကြပါ။ (ယောဟန် ၁၂:၄၉၊ ၅၀) သူတို့သည် မှုတ်သွင်းခံ၊ အသက်ပေးသော အမှန်တရားနှုတ်မြွက်စကားတော်ကို ထက်သန်စွာ တင်ပြခဲ့ကြသည်။ သင်တန်းသားများ၏ ပြန်လည်သရုပ်ပြခန်းများနှင့် ပြန်လည်ပြောပြချက်များက သမ္မာကျမ်းစာသည် သူတို့နှင့်တွေ့ဆုံသူများအပေါ်အလွန်တန်ခိုးပါစွာ ထိမိခဲ့ကြောင်း ထင်ရှားဖော်ပြခဲ့သည်။

ကြံဉာဏ်များနှင့် တွေ့ ကြုံမှုများက အားပေးမှုဖြစ်စေ

အမေရိကန်ပြည်ထောင်စုဌာနခွဲ လုပ်ငန်းတော်ဌာနမှ အဖွဲ့ဝင်များဖြစ်သော အန်တိုနီ ပဲရက်စ် နှင့် အန်တိုနီ ကရစ်ဖ်ဖင်တို့က ကမ္ဘာတစ်ဝန်းမှ ဌာနခွဲကော်မတီဝင်များနှင့် လူတွေ့မေးမြန်းရာတွင် ဦးစီးခဲ့ကြသည်။ ထိုသူတို့ထဲမှအချို့သည် ခရစ်ယာန်သာသနာပြုများအဖြစ် အမှုဆောင်ကြသည်။ ထိုအမျိုးသားများက ခရစ်ယာန်သာသနာပြုအသစ်များ ကြုံတွေ့ရမည့် စိန်ခေါ်ချက်များအကြောင်း ဆွေးနွေးဖော်ပြခဲ့ပြီး သူတို့၏ကိုယ်ပိုင်အတွေ့အကြုံပေါ်အခြေခံ၍ လက်တွေ့ကျအကြံဉာဏ်ပေးခဲ့သည်။ စိန်ခေါ်ချက်တချို့မှာ ကျောင်းသားများ နေသားကျနေသည့်အရာများနှင့် ကွဲပြားခြားနားသည့် ယဉ်ကျေးမှုမတူ၊ တစ်နှစ်ပတ်လုံး အပူပိုင်းဒေသရာသီဥတု၊ သို့မဟုတ် ဘာသာရေးနှင့် နိုင်ငံရေးဝန်းကျင် ကွဲပြားခြားနားမှုတို့ဖြစ်သည်။ ခရစ်ယာန်သာသနာပြုအသစ်များသည် ထိုဝန်းကျင်အသစ်နှင့် နေသားတကျဖြစ်ရန် အဘယ်အရာက အထောက်အကူပြုနိုင်သနည်း။ ယေဟောဝါအားချစ်သည့်မေတ္တာ၊ လူများကိုချစ်သည့်မေတ္တာဖြစ်သည်၊ နောက်ကြောင်းပြန်ဖို့၊ အလောတကြီးနှင့် ပြုမူဆောင်ရွက်ဖို့မဟုတ်ပါ။ ဌာနခွဲကော်မတီဝင်တစ်ဦး ဤသို့ပြော၏– “ကျွန်တော်တို့တာဝန်ကျတဲ့ဒေသက လူတွေဟာ အဲ့ဒီဒေသမှာ ကျွန်တော်တို့ထက် ရာစုနှစ်နဲ့ချီပြီး နေထိုင်ခဲ့ကြတယ်။ ကျွန်တော်တို့လည်း အဲ့ဒီနေရာမှာနေနိုင်ပါတယ်၊ အလိုက်သင့် ပြုပြင်ပြောင်းလဲနိုင်ပါတယ်။ အခက်အခဲတွေနဲ့ ကြုံရတဲ့အခါတိုင်း သူတို့တွေဟာ ကျွန်တော်တို့ရဲ့ အကျင့်စရိုက်တွေကို တိုးတက်အောင် လုပ်ပေးမယ့်သူတွေအဖြစ် ရှုမြင်ခဲ့တယ်။ ဆုတောင်းပြီး ယေဟောဝါရဲ့ ဝိညာဉ်တော်ကို ယုံကြည်ကိုးစားမယ်ဆိုရင် ‘ငါသည်လည်း သင်တို့နှင့်အတူရှိမည်’ ဆိုတဲ့ယေရှုရဲ့စကား မှန်ကန်တယ်ဆိုတာကို သင်တို့ကြုံတွေ့ရမယ်။”—မဿဲ ၂၈:၂၀။

အုပ်ချုပ်ရေးအဖွဲ့ဝင် ဆယ်မြူအယ်လ် ဟာ့ဒ် က “ဘုရားသခင်၏ အံ့ဖွယ်အမှုတို့ကို ဆက်ကြားပြောနေလော့” ဟောပြောချက်ဖြင့် အစီအစဉ်ကို အထွတ်အထိပ်သို့ ပို့ပေးခဲ့သည်။ စီ.အီး. ၃၃၊ ပင်တေကုတ္တေပွဲနေ့တွင် သန့်ရှင်းသောဝိညာဉ်တော် သွန်းလောင်းပေးမှုကြောင့် ယေရှု၏တပည့်များသည် “ဘုရားသခင်၏ အံ့ဖွယ်အမှုတော်တို့ကို” ဟောပြောရန် ခွန်အားပြည့်လာခဲ့ကြသည်။ ယနေ့ ခရစ်ယာန်သာသနာပြုအသစ်များလည်း ဘုရားသခင့်နိုင်ငံတော်အကြောင်းကို အလားတူထက်သန်မှုဖြင့်ဟောပြောရန် အဘယ်အရာက ထောက်ကူနိုင်သနည်း။ သန့်ရှင်းသောဝိညာဉ်တော်သာဖြစ်သည်။ ညီအစ်ကို ဟာ့ဒ် က ကျောင်းဆင်းသင်တန်းသားများအား “ဝိညာဉ်တော်အားဖြင့် စိတ်အားထက်သန်” ရန်၊ သူတို့၏တာဝန်များနှင့်ပတ်သက်၍ တက်တက်ကြွကြွရှိရန်၊ သူတို့ရရှိခဲ့သော လေ့ကျင့်မှုကို ဘယ်တော့မျှမမေ့ရန် အားပေးခဲ့သည်။ (ရောမ ၁၂:၁၁၊ ကဘ) “သမ္မာကျမ်းစာဟာ ဘုရားသခင်ရဲ့ ကြီးကျယ်ခမ်းနားတဲ့ အံ့ဖွယ်ရာဖြစ်တယ်” ဟုညီအစ်ကို ဟာ့ဒ်ပြောခဲ့သည်။ “ကျမ်းစာရဲ့တန်ဖိုးကို ဘယ်တော့မှလျှော့မတွက်သင့်ဘူး။ ကျမ်းစာထဲမှာပါတဲ့ သတင်းစကားဟာ အသက်ရှင်စေတယ်။ ကိစ္စရပ်တွေရဲ့ အရေးအကြီးဆုံးအရာတွေကို ပိုင်းခြားသိမြင်စေတယ်။ သင်တို့ရဲ့အသက်တာကို ဖြောင့်မတ်စွာပြုပြင်ပေးဖို့ ကျမ်းစာကို အသုံးပြုပါ။ သင်တွေးတောတဲ့နည်းလမ်းတွေကို ကျမ်းစာကပြောင်းလဲစေပါ။ ကျမ်းစာလေ့လာခြင်း၊ ဖတ်ရှုခြင်း၊ ဆင်ခြင်တွေးတောခြင်းအားဖြင့် သင်တို့ရဲ့ စဉ်းစားဆင်ခြင်နိုင်စွမ်းကို ထိန်းသိမ်းစောင့်ရှောက်ပါ။ . . . ဂိလဒ်ကလေ့ကျင့်ပေးခဲ့ရာကို ‘ဘုရားသခင်ရဲ့ အံ့ဖွယ်ရာတွေ’ ဆက်ကြားပြောရာမှာ အသုံးပြုဖို့ စိတ်ဆုံးဖြတ်ရည်ရွယ်ထားပါ။”

ကမ္ဘာတစ်ဝန်းမှပေးပို့သော နှုတ်ခွန်းဆက်စာများကို ဖတ်ပြကာ သင်တန်းသားများအား ဒီပလိုမာလက်မှတ်ပေးပြီးနောက် ကျောင်းဆင်းတစ်ဦးက သင်တန်းသားများရရှိခဲ့သော လေ့ကျင့်မှုအတွက် ကျေးဇူးတင်လေးမြတ်မှုကို ဖော်ပြထားသည့် စာကိုဖတ်ပြသည်။ ထို့နောက် ညီအစ်ကို လက်တ် က ၂ ရာဇဝင်ချုပ် ၃၂:၇ နှင့် တရားဟောရာ ၂၀:၁၊ ၄ ကိုရည်ညွှန်းကိုးကားကာ ပျော်ရွှင်ဖွယ်အခါသမယနှင့် သင့်လျော်စွာ နိဂုံးချုပ်ပေးခဲ့သည်။ အဖွင့်တွင်ပြောခဲ့သော မှတ်ချက်ကို နောက်ဆုံးဟောပြောချက်တွင် ပြန်လည်ချိတ်ဆက်ကာ ဤသို့ နိဂုံးချုပ်ခဲ့၏– “ချစ်လှစွာသော ကျောင်းဆင်းများ၊ သင်တို့ရဲ့ တာဝန်အသစ်၊ ဝိညာဉ်ရေးတိုက်ပွဲကို ရှေ့ချီတက်တိုက်ခိုက်ရာမှာ ယေဟောဝါဟာ သင်တို့နဲ့အတူ ချီတက်နေတယ်ဆိုတာကို သတိရကြပါ။ သင်တို့ဘက်မှာနေတဲ့သူဟာ သင်တို့တစ်ဖက်မှာနေတဲ့သူထက် ပိုများတယ်ဆိုတာကို ဘယ်တော့မှမမေ့ကြပါနဲ့။”

[စာမျက်နှာ ၂၅ ပါ လေးထောင့်ကွက်]

သင်တန်းဆိုင်ရာ အချက်အလက်များ

ကိုယ်စားပြုနိုင်ငံအရေအတွက်– ၇

တာဝန်ပေးအပ်ခံရသည့် နိုင်ငံအရေအတွက်– ၁၇

ကျောင်းသား/သူအရေအတွက်– ၄၈

ပျမ်းမျှအသက်– ၃၃.၇

ပျမ်းမျှအမှန်တရားသက်တမ်း– ၁၇.၈

ပျမ်းမျှအချိန်ပြည့်အမှုဆောင် သက်တမ်း– ၁၃.၅

[စာမျက်နှာ ၂၆ ပါ ရုပ်ပုံ]

ဂိလဒ်ကင်းမျှော်စင်ကျမ်းစာကျောင်း၏ ၁၁၅ ကြိမ်မြောက် ဂိလဒ်သင်တန်း

အောက်ပါစာရင်းတွင် အတန်းများကို ရှေ့တန်းမှ နောက်တန်းသို့ ရေတွက်ပြီး အမည်များကို လက်ဝဲမှ လက်ယာဘက်သို့ စီထားသည်။

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.