ဘုရားသခင့်နိုင်ငံတော်ကြွေးကြော်သူများမှတ်တမ်း

ဩစတြေးလျနိုင်ငံ၏ အောက်ဗက်ခေါ် လွင်တီးခေါင်ဒေသတွင် ထိုက်တန်သူများကို ရှာဖွေခြင်း

သြစတြေးလျနိုင်ငံ၏ အပြောကျယ်ကုန်းတွင်းပိုင်းကို အောက်ဗက်ဟု ချစ်စနိုးခေါ်ကြသည်။ ဤဝေးခေါင်သောဒေသတချို့သို့ သက်သေခံများမရောက်သည်မှာ ၁၂ နှစ်ရှိလေပြီ။ ထို့ကြောင့် မြောက်ပိုင်းနယ်မြေ၏မြို့တော် ဒါဝင်ရှိ ယေဟောဝါသက်သေများသည် ထိုက်တန်သူများကိုရှာဖွေရန် ကိုးရက်ကြာဟောပြောခြင်းကင်ပိန်းကို စီစဉ်ခဲ့ကြသည်။—မဿဲ ၁၀:၁၁။

ထိုကင်ပိန်းကို ၁၂ လကြို၍ စနစ်တကျစီစဉ်ခဲ့ကြပြီး နယူးဇီလန်နိုင်ငံ၏သုံးဆမျှကျယ်ဝန်းသော စတုရန်းမိုင် ၃၀၀,၀၀၀ ကျော်နယ်မြေကို မြေပုံရေးဆွဲခဲ့ကြသည်။ ဤအပြောကျယ်သောဒေသ၏ သီးခြားရှိမှုကို နားလည်နိုင်ရန် နွားမွေးမြူရေးခြံတစ်ခြံ၏အဝင်ဝမှ အိမ်ရှေ့သို့ရောက်ရန် ပျမ်းမျှအားဖြင့် မိုင် ၂၀ ကျော်သွားရသည်ကို မြင်ယောင်ကြည့်ပါ! ထို့ပြင် မွေးမြူရေးခြံအချို့သည် တစ်ခြံနှင့်တစ်ခြံ မိုင် ၁၈၀ ကျော် ဝေးကွာသည်။

ထိုကင်ပိန်းတွင် စေတနာ့ဝန်ထမ်းသက်သေခံ ၁၄၅ ဦးပါဝင်ခဲ့ကြသည်။ အချို့ဆိုလျှင် အလှမ်းဝေးကွာသည့် တပ်စ်မေးနီးယားကျွန်းမှပင် လာကြသည်။ အချို့သူတို့သည် လေးဘီးယက်ကားများပေါ် ကိရိယာတန်ဆာပလာ၊ ကားအပိုပစ္စည်းများ၊ ဓာတ်ဆီတို့ကိုတင်ဆောင်၍ ရောက်လာကြသည်။ အခြားသူတို့မူ ပစ္စည်းကိရိယာများကို နောက်တွဲယာဉ်များဖြင့် သယ်ဆောင်လာကြသည်။ ထို့ပြင် သင့်တော်သည့် လေးဘီးယက်ကားများမရှိသူတို့အတွက် ခရီးသည် ၂၂ ဦးတင်ဘတ်စကားနှစ်စီး ငှားရမ်းခဲ့ကြသည်။ ဘတ်စကားစီးသူများက သွားရောက်ရန်ရွေးချယ်ထားသည့်ရပ်ကွက်ရှိ မြို့ရွာငယ်များတွင် သက်သေခံခဲ့ကြသည်။

ခရီးမစတင်မီ ညီအစ်ကိုများသည် ဤထူးခြားသောရပ်ကွက်တွင် သတင်းကောင်းတင်ဆက်ရမည့်ပုံကိုဖော်ပြသည့် ဟောပြောချက်နှင့် သရုပ်ပြခန်းများပြသရန် စီစဉ်ခဲ့ကြသည်။ ဥပမာ၊ အဘော်ရဂျင်နီလူမျိုးတို့ကို ထိရောက်စွာဟောပြောနိုင်ရန် လိုက်နာရမည့်လုပ်ထုံးလုပ်နည်းများကို သိရှိထားရုံမက အဘော်ရဂျင်နီဓလေ့ထုံးတမ်းများကိုလည်း သတိပြုရန်လိုသည်။ ထို့ပြင် တောရိုင်းတိရစ္ဆာန်များကိုကာကွယ်ရန် ဝန်းကျင်ဆိုင်ရာအရေးကိစ္စများကိုလည်း ဆွေးနွေးခဲ့ကြသည်။

ထူးခြားကောင်းမွန်သော တွေ့ကြုံမှုများစွာ ရရှိခဲ့သည်။ ဥပမာ၊ အဘော်ရဂျင်နီရပ်ကွက်တစ်ခုတွင် ညီအစ်ကိုများသည် ကျမ်းစာအခြေပြုလူထုဟောပြောချက်တစ်ခု တင်ဆက်ရန် စီစဉ်ခဲ့ကြ၏။ ဤအကြောင်းကို ထိုဒေသရှိ အမျိုးသမီးခေါင်းဆောင်ကိုယ်တိုင် သတင်းဖြန့်ပေးခဲ့၏။ ၎င်းနောက် တက်ရောက်သူများကို စာအုပ် ၅ အုပ်နှင့် ဘရိုရှာ ၄၁ စောင်ဝေငှခဲ့ရသည်။ အခြားလူနေရပ်ကွက်တစ်ခုတွင် အဘော်ရဂျင်နီတစ်ဦးနှင့် တွေ့ဆုံခဲ့ရ၏။ သူ့ထံတွင် ဂျိမ်းဘုရင်ဘာသာပြန်ကျမ်းစာရှိပြီး ထိုကျမ်းစာမှာ စုတ်ပြဲဟောင်းနွမ်းနေသည်။ ဘုရားသခင့်နာမတော်သိသလောဟု သူ့ကိုမေးသည့်အခါ သိသည်ဟုဖြေဆိုပြီး သူ့အင်္ကျီထဲမှ ကင်းမျှော်စင်အဟောင်းတစ်စောင် ထုတ်ပြခဲ့သည်။ မဂ္ဂဇင်းထဲမှ မာကု ၁၂:၃၀ [ကဘ] ကိုကိုးကားထားသော ဤစကားကို သူဖတ်ပြသည်– “သင်၏ဘုရားသခင်ယေဟောဝါကို စိတ်နှလုံးအကြွင်းမဲ့၊ ဉာဏ်ရှိသမျှ၊ အစွမ်းသတ္တိရှိသမျှနှင့်ချစ်လော့။” ထို့နောက် “ဒီကျမ်းချက်ကို ကျွန်တော်သိပ်ကြိုက်တယ်” ဟုပြော၏။ အတန်ကြာကျမ်းစာဆွေးနွေးပြီးနောက် ကျမ်းစာအုပ်သစ်တစ်အုပ်နှင့် အခြားကျမ်းစာအခြေပြုစာပေများကို သူလက်ခံယူခဲ့သည်။

ကာပန်တေးရီးယားပင်လယ်ကွေ့အနီးတွင် ဧကတစ်သန်းရှိသော နွားမွေးမြူရေးခြံ၏ခေါင်းဆောင်တစ်ဦးသည် ဘုရားသခင့်နိုင်ငံတော်သတင်းကို စိတ်ဝင်စားမှုပြခဲ့သည်။ ကျွန်ုပ်၏ကျမ်းစာပုံပြင်စာအုပ်နှင့် ထာဝရအသက်ကိုရစေသောအသိပညာa စာအုပ်တို့ကိုတွေ့ပြီးနောက် ကရီအိုဘာသာစကားဖြင့် စာပေများရှိသလောဟု သူမေးခဲ့သည်။ ဤသို့မေးမြန်းခဲ့ခြင်းမှာ ထူးခြား၏၊ အကြောင်းမှာ အဘော်ရဂျင်နီအများစုသည် ကရီအိုစကားပြောတတ်သော်လည်း လူနည်းစုသာ စာဖတ်တတ်သည်။ ဖြစ်ပုံမှာ ထိုမွေးမြူရေးခြံမှအလုပ်သမား ၅၀ စလုံးသည် ကရီအိုစာဖတ်တတ်သူများဖြစ်ကြသည်။ သို့ဖြစ်၍ ထိုခေါင်းဆောင်သည် ကရီအိုကျမ်းစာစာပေများရရှိလိုက်သဖြင့် အလွန်ဝမ်းသာသွားပြီး သူနှင့်ဆက်သွယ်နိုင်ရန် ဖုန်းနံပါတ်ပေးခဲ့သည်။

ထိုကိုးရက်ကြာ အကြိတ်အနယ်ဟောပြောခြင်းလုပ်ငန်းအတွင်း ကျမ်းစာ ၁၂၀၊ စာအုပ် ၇၇၀၊ မဂ္ဂဇင်း ၇၀၅ နှင့် ဘရိုရှာ ၁,၉၆၅ စောင်တို့ကို ဝေငှနိုင်ခဲ့ကြသည်။ ထို့ပြင် ပြန်လည်ပတ်မှု ၇၂၀ ခုနှင့် ကျမ်းစာသင်အံမှု ၂၁၅ ခုစတင်နိုင်ခဲ့၏။

မှန်ပါသည်၊ ထိုကျယ်ပြောလှသောဒေသရှိ ထိုက်တန်သူများစွာ၏ဝိညာဉ်ရေးဆာမွတ်မှုကို နောက်ဆုံးတွင် ဖြည့်ဆည်းပေးနိုင်ခဲ့သည်။—မဿဲ ၅:၆။

[အောက်ခြေမှတ်ချက်]

[စာမျက်နှာ ၃၀ ပါ မြေပုံ]

(ကားချပ်အပြည့်အစုံကို စာစောင်တွင်ကြည့်ပါ)

ဩစတြေးလျ

မြောက်ပိုင်းနယ်မြေ

ဒါဝင်

ကာပန်တေးရီးယားပင်လယ်ကွေ့

ဆစ်ဒနီ

တပ်စ်မေးနီးယား