ယင်းကို သင်မစုဆောင်းထားနိုင်သဖြင့် ကောင်းစွာအသုံးချပါ

အချိန်သည် ငွေ။ ဤစကားကို မကြာခဏပြောလေ့ရှိကြ၏။ အမှန်မှာ အချိန်သည် ငွေ၊ အခြားရုပ်ပစ္စည်းများနှင့် လုံးလုံးမတူချေ။ ငွေ၊ အစားအစာ၊ လောင်စာဆီနှင့် အခြားအရာများကို နောင်တွင် လိုသလိုအသုံးပြုနိုင်ရန် စုဆောင်းထားနိုင်သော်လည်း အချိန်ကိုမူ မစုဆောင်းနိုင်ပါ။ အချိန်ကိုမသုံးဘဲ စုဆောင်းထားရန်ကြိုးစားခြင်းသည် အချည်းနှီးသာဖြစ်၏။ အကယ်၍ သင်သည် တစ်နေ့လျှင် ရှစ်နာရီအိပ်ပြီး ကျန်သည့်အချိန်များကို ဘာမျှမလုပ်ဘဲ စုဆောင်းထားမည်ဆိုပါက ဘာဖြစ်မည်နည်း။ တစ်နေ့တာကုန်သွားသောအခါ အသုံးမပြုခဲ့သောအချိန်များကို ဘယ်တော့မျှ ပြန်ရနိုင်မည်မဟုတ်။

အချိန်ကို ရေစီးသန်သော မြစ်ကြီးတစ်စင်းနှင့် နှိုင်းယှဉ်နိုင်၏။ မြစ်ရေသည် အမြဲတမ်း တစ်ဖက်သို့သာစီးဆင်းနေသည်။ ယင်းကို သင်မတားဆီးနိုင်သကဲ့သို့ စီးဆင်းသွားသောရေအားလုံးကို သင်အသုံးပြုနိုင်မည်မဟုတ်။ လွန်ခဲ့သောရာစုနှစ်များက လူတို့သည် မြစ်ကမ်းပါးများပေါ်တွင် ရေရဟတ်များ ဆောက်လုပ်ခဲ့ကြသည်။ ရေရဟတ်များဖြင့် ရေစီး၏စွမ်းအင်ကို ထုတ်ယူအသုံးချကာ ဓားသွေးစက်များ၊ လွှစက်များနှင့် ရေတင်စက်များကို လည်ပတ်စေခဲ့ကြသည်။ အလားတူ သင်လည်း အချိန်ကိုမစုဆောင်းဘဲ အကျိုးရှိသည့်အလုပ်များ ပြီးမြောက်ရန် အသုံးချပါ။ ယင်းသို့ပြုလုပ်နိုင်ရန် အချိန်သူခိုးနှစ်ဦးဖြစ်သော ရွှေ့ဆိုင်းခြင်းနှင့် ပစ္စည်းရှုပ်ပွခြင်းတို့ကို သင်တွန်းလှန်ရမည်။ ရွှေ့ဆိုင်းခြင်းကို ဦးစွာသုံးသပ်ကြည့်ကြစို့။

ရွှေ့ဆိုင်းခြင်းကိုရှောင်ပါ

ယနေ့လုပ်နိုင်သည့်အရာကို မနက်ဖြန်သို့ ဘယ်တော့မျှမရွှေ့ဆိုင်းပါနှင့် ဟုပြောလေ့ရှိကြသည်။ သို့သော် အချို့သူများကမူ ယင်းကိုပြောင်းပြန်လုပ်ပြီး နောက်အပတ်အထိ ရွှေ့ဆိုင်းထားနိုင်သည့်အရာကို မနက်ဖြန်သို့ ဘယ်တော့မျှမရွှေ့ဆိုင်းပါနှင့်ဟု ပြောကြသည်။ ခက်ခဲသောတာဝန်တစ်ခု ကြုံရသောအခါ ရွှေ့ဆိုင်းခြင်းဖြင့် ဖြေရှင်းလိုက်ကြသည်။ အဘိဓာန်တစ်အုပ်အရ “ရွှေ့ဆိုင်းခြင်း” ဟူသည် “တမင်အချိန်ဆွဲသည့် အကျင့်ပါနေခြင်း၊ လုပ်သင့်ရာကို တမင်ရွှေ့ဆိုင်းခြင်း” ဖြစ်သည်။ ရွှေ့ဆိုင်းသူတစ်ဦးအတွက် ကိစ္စရပ်များကို ရွှေ့ဆိုင်းခြင်းသည် အကျင့်ဖြစ်လာသည်။ သူသည် ဖိစီးမှုများလာသောအခါ တာဝန်ကို ရွှေ့ဆိုင်းလိုက်ခြင်းဖြင့် သက်သာမှုရှာယူသည်။ ဤသို့ဖြင့် နောက်ထပ်ဖိစီးမှုများ စုပုံလာသည့်အထိ “အေးအေးဆေးဆေး” နေတော့သည်။

တစ်ခါတစ်ရံ ကျွန်ုပ်တို့၏ ကာယပိုင်းနှင့် စိတ်လှုပ်ရှားမှုပိုင်းဆိုင်ရာအခြေအနေများကြောင့် အလုပ်အချို့ သို့မဟုတ် အားလုံးကိုပင် ရွှေ့ဆိုင်းထားဖို့လိုပေမည်။ ထို့ပြင် နေ့စဉ်လုပ်ငန်းဆောင်တာများမှလည်း လူတိုင်း အခါအားလျော်စွာ အနားယူဖို့လိုသည်။ ဘုရားသခင့်သားတော်ပင် ထိုအတိုင်းလုပ်ဆောင်ခဲ့၏။ ယေရှုသည် ဓမ္မအမှုတွင် အလွန်အလုပ်များသော်လည်း မိမိကိုယ်တိုင်နှင့်တပည့်များ အနားယူရန်အချိန်ပေးခဲ့သည်။ (မာကု ၆:၃၁၊ ၃၂) ဤသို့သော အနားယူခြင်းမျိုးသည် အကျိုးရှိပါသည်။ သို့သော် ရွှေ့ဆိုင်းခြင်းမူကား အန္တရာယ်ရှိစေ၏။ သာဓကတစ်ခုကို သုံးသပ်ကြည့်ပါ။

ဆယ်ကျော်သက်အရွယ် ကျောင်းသူတစ်ဦးသည် သင်္ချာစာမေးပွဲအတွက် ကြိုပြင်ဆင်ဖို့ အချိန်သုံးပတ်ရသည်။ သူပြန်လေ့လာရမည့် မှတ်စုများစွာရှိသဖြင့် သူ့အတွက် ဖိစီးမှုဖြစ်မည်။ ထို့ကြောင့် ရွှေ့ဆိုင်းခြင်း ထောင်ချောက်အတွင်း သူကျရောက်သွား၏။ စာကြည့်မည့်အစား တီဗွီကြည့်သည်။ စာမေးပွဲအောင်ဖို့ သူလုပ်ရမည့်အရာကို တစ်နေ့ပြီးတစ်နေ့ ရွှေ့ဆိုင်းနေသည်။ အဆုံးတွင် စာမေးပွဲမဖြေဆိုမီည၌ သင်ခန်းစာအားလုံးကို တစ်ပြိုင်တည်း လေ့လာကျက်မှတ်ရတော့သည်။ စာကြည့်စားပွဲပေါ် ထိုင်လိုက်ပြီး မှတ်စုများကို စလေ့လာတော့၏။

အချိန်များကုန်လွန်လာပြီ။ အိမ်သားများ အိပ်နေချိန်တွင် သူ့ဦးနှောက်မှာမူ ညီမျှခြင်းများနှင့် နှစ်ထပ်ကိန်းရင်းများကြားတွင် လုံးချာလိုက်နေ၏။ နောက်တစ်နေ့ ကျောင်းခန်းထဲတွင် သူသည် မေးခွန်းများနှင့် နပန်းလုံးနေရကာ ဦးနှောက်ပူပြီး အဖြေများထွက်မလာတော့။ အမှတ်နည်းနည်းသာရပြီး စာမေးပွဲကျတော့သည်။ သင်ခန်းစာများကို သူပြန်လေ့လာရမည်ဖြစ်ပြီး နောက်တစ်တန်း မတက်နိုင်တော့ပေ။

ဤကျောင်းသူလေးသည် ရွှေ့ဆိုင်းခြင်းကြောင့် များစွာပေးဆပ်ခဲ့ရသည်။ သို့သော် သူ့ကဲ့သို့ မကြုံရလေအောင် ကူညီပေးသော ကျမ်းစာမူတစ်ခု ရှိပါသည်။ “ပညာမဲ့ကဲ့သို့မဟုတ်၊ ပညာရှိကဲ့သို့ စေ့စေ့မြေ့မြေ့ကျင့်ဆောင်မည်အကြောင်း သတိပြုကြလော့။ . . . ကာလအချိန်ကို ရွေးနုတ်ကြလော့” ဟုတမန်တော်ပေါလု ရေးသားခဲ့သည်။ (ဧဖက် ၅:၁၅၊ ၁၆) ပေါလုသည် ခရစ်ယာန်များအား ဝိညာဉ်ရေးအတွက် အချိန်ကိုပညာရှိစွာ အသုံးပြုဖို့ တိုက်တွန်းနေခြင်းဖြစ်သော်လည်း ဤမူသည် ဘဝတွင် အရေးပါသောကဏ္ဍများစွာအတွက် အကူအညီဖြစ်စေနိုင်သည်။ တာဝန်တစ်ခုကို အဘယ်အချိန်တွင် လုပ်ရမည်ကို ကျွန်ုပ်တို့ ဆုံးဖြတ်နိုင်လေ့ရှိသောကြောင့် “အခွင့်သာသည့်အချိန်” တွင် စတင်လုပ်ခြင်းဖြင့် အကျိုးရရှိမည်ဖြစ်ပြီး အလုပ်မြန်မြန်ဆန်ဆန်ပြီးစီးမည်ဖြစ်သည်။ ဤသို့ပြုလုပ်ခြင်းက ကျမ်းချက်တွင် ပြောသည့်အတိုင်း “ပညာရှိ” သူဖြစ်သည်။

သင်္ချာစာမေးပွဲဖြေဆိုမည့် ကျောင်းသူလေးအတွက် အဘယ်အချိန်သည် လေ့လာမှုပြုရန် “အခွင့်သာသည့်အချိန်” ဖြစ်မည်နည်း။ ညတိုင်း ၁၅ မိနစ်ခန့် သင်ခန်းစာကိုလေ့လာခြင်း ဖြစ်ပေမည်။ ဤနည်းဖြင့် ကောင်းစွာအနားယူအိပ်သင့်သည့်အချိန်တွင် အကြိတ်အနယ်လေ့လာနေရသည့် အဖြစ်မျိုးရောက်မည်မဟုတ်။ စာမေးပွဲဖြေဆိုသည့်နေ့တွင် အနားရထားပြီး ကောင်းစွာပြင်ဆင်ထားသောကြောင့် အမှတ်ကောင်းရရှိမည်။

ထို့ကြောင့် တာဝန်တစ်ခုကို သင်ရရှိပါက “အခွင့်သာသည့်အချိန်” ကိုရွေးချယ်ပြီး လုပ်ဆောင်ပါ။ သို့ပြုခြင်းဖြင့် ရွှေ့ဆိုင်းခြင်းထောင်ချောက်နှင့် ယင်း၏ဆိုးကျိုးများကို သင်ရှောင်ရှားနိုင်မည်။ အလုပ်ပြီးမြောက်သည့်အတွက် ကျေနပ်မှုကိုလည်း သင်ခံစားရမည်။ ယင်းသည် ခရစ်ယာန်အသင်းတော်တာဝန်ကဲ့သို့သော အခြားသူများကို အကျိုးသက်ရောက်စေသည့် အလုပ်မျိုး ရရှိသည့်အခါ အထူးအရေးကြီးသည်။

ပစ္စည်းရှုပ်ပွမှုကိုလျှော့ချပါ

အချိန်ကို ကောင်းစွာအသုံးပြုရာတွင် ဒုတိယအချက်မှာ အစောပိုင်းကဖော်ပြသကဲ့သို့ ပစ္စည်းရှုပ်ပွစေခြင်းကို ရှောင်ရန်ဖြစ်သည်။ ပစ္စည်းများကို ကိုင်တွယ်ရန်၊ စီမံရန်၊ အသုံးပြုရန်၊ သန့်ရှင်းစွာထားရန်၊ သိမ်းဆည်းရန်နှင့် ပြုပြင်ထိန်းသိမ်းရန် အချိန်ပေးရကြောင်း ကျွန်ုပ်တို့သိကြသည်။ ပစ္စည်းများလေ အချိန်ပိုပေးရလေဖြစ်၏။ ပစ္စည်းများလွန်းသော အခန်း သို့မဟုတ် အိမ်တွင် အလုပ်လုပ်ခြင်းသည် ရှင်းလင်းနေသောအခန်းတွင်လုပ်ရခြင်းထက် အချိန်ပိုကုန်သည့်အပြင် စိတ်ပျက်စရာကောင်းသည်။ ထို့ပြင် ပစ္စည်းများလာသည်နှင့်အမျှ လိုအပ်သောပစ္စည်းကို ရှာတွေ့ရန် အချိန်ပိုပေးရသည်။

သန့်ရှင်းရေးလုပ်သည့်အခါ ပစ္စည်းများကို “စီစဉ်နေရခြင်း၊ ရှောင်နေရခြင်း၊ နေရာတကျမရှိသောပစ္စည်းများကို ရွှေ့နေရခြင်း” ဖြင့် အချိန်တစ်ဝက် ကုန်သွားသည်ဟု အိမ်မှုပြုစုရာတွင် ကျွမ်းကျင်သူများကဆို၏။ ဘဝ၏အခြားကဏ္ဍများတွင်လည်း အလားတူပင်ဖြစ်နိုင်သည်။ ထို့ကြောင့် သင်သည် အချိန်ကိုကောင်းစွာ အသုံးချလိုပါက သင့်ပတ်ဝန်းကျင်ကို ဂရုစိုက်ကြည့်ပါလေ။ ရှုပ်ပွနေသောပစ္စည်းများ နေရာယူထား၍ ယင်းတို့ကို ရှောင်နေရသလော။ အဆိုးဆုံးမှာ ယင်းတို့က သင့်အချိန်ကို ဖြုန်းတီးနေသလော။ ထိုသို့ဖြစ်နေပါက ရှုပ်ပွနေသောပစ္စည်းများကို လျှော့ချပစ်ပါ။

ရှုပ်ပွသောပစ္စည်းများကို စွန့်ပစ်ရန် လွယ်ကူမည်မဟုတ်ပေ။ နှစ်သက်သော်လည်း မလိုအပ်သည့်ပစ္စည်းများကို ဖယ်ရှားခြင်းသည် မိတ်ဆွေကောင်းတစ်ဦး ဆုံးရှုံးသွားသည့်အလား စိတ်မကောင်းစရာဖြစ်စေနိုင်သည်။ သို့ဖြစ်၍ အဘယ်အရာကို စွန့်ပစ်မည်၊ အဘယ်အရာကိုသိမ်းထားမည်ကို သင်မည်သို့ဆုံးဖြတ်နိုင်သနည်း။ အချို့က တစ်နှစ်သတ်မှတ်ချက် ထားကြသည်။ ပစ္စည်းတစ်ခုကို သင်မသုံးသည်မှာ တစ်နှစ်ကြာပြီးပါက စွန့်ပစ်လိုက်ပါ။ တစ်နှစ်ပြည့်သည့်တိုင် မစွန့်ပစ်လိုသေးပါက အသို့နည်း။ ယင်းကို စတိုခန်းထဲတွင် နောက်ခြောက်လထားပါ။ တစ်နှစ်ခွဲကြာသည့်တိုင်  မသုံးဖြစ်ကြောင်း သိရှိလာသည့်အခါ စွန့်ပစ်ဖို့မခဲယဉ်းတော့ပေ။ မည်သို့ပင်ဖြစ်စေ ရည်ရွယ်ချက်မှာ ရှုပ်ပွနေသောပစ္စည်းများကို လျှော့ချခြင်းဖြင့် အချိန်ကို ကောင်းစွာအသုံးပြုရန်ဖြစ်သည်။

ရှုပ်ပွခြင်းသည် အိမ် သို့မဟုတ် လုပ်ငန်းခွင်တွင်သာ မဟုတ်ပါ။ ယေရှုက ‘လောကအမှု၌စိုးရိမ်ခြင်းနှင့် စည်းစိမ်ဥစ္စာ၏လှည့်စားခြင်းသည် တရားစကားကို လွှမ်းမိုးညှဉ်းဆဲ’ နိုင်သောကြောင့် လူတစ်ဦးအား သတင်းကောင်းနှင့်ပတ်သက်၍ “အသီးမသီးနိုင်” သောအခြေအနေသို့ရောက်စေသည်ဟု မိန့်ဆိုခဲ့သည်။ (မဿဲ ၁၃:၂၂) လူတစ်ဦးသည် သူ့ဘဝတွင် အရေးကြီးဆုံးဖြစ်သော ဝိညာဉ်ရေးလုပ်ရိုးလုပ်စဉ်နှင့် ဟန်ချက်ကိုထိန်းသိမ်းရန် အချိန်မပေးနိုင်တော့သည့်အထိ လုပ်ဆောင်စရာများ၊ ဝါသနာများဖြင့် ရှုပ်ထွေးလာနိုင်သည်။ ရလဒ်မှာ သူသည် ဝိညာဉ်ရေးအားနည်းလာသည်။ နောက်ဆုံးတွင် စစ်မှန်သော ကျေနပ်ပျော်ရွှင်မှုရရှိစေသည့် အလုပ်များအတွက် အချိန်အကန့်အသတ်မရှိ ရရှိနိုင်မည့် ဘုရားသခင့်ကတိထားရာကမ္ဘာသစ်ကို ဝင်ရောက်နိုင်ခွင့် လုံးလုံးဆုံးရှုံးသွားပေမည်။—ဟေရှာယ ၆၅:၁၇-၂၄; ၂ ပေတရု ၃:၁၃။

သင်သည် အလုပ်၊ အိမ်၊ ကား၊ ဝါသနာ၊ ခရီးထွက်ခြင်း၊ လုပ်ရိုးလုပ်စဉ်ကိစ္စ၊ လူမှုရေးကိစ္စနှင့် အခြားစိတ်ဝင်စားရာ အားလုံးကိုလုပ်ဆောင်ရန် အချိန်ကိုမရမက စီစဉ်နေရသလော။ သို့ဆိုပါက ဝိညာဉ်ရေးရာများအတွက် အချိန်ပိုပေးနိုင်ရန် ရှုပ်ထွေးနေသောအရာများကို မည်သို့လျှော့ချနိုင်ကြောင်း သုံးသပ်ပါလေ။

အများသိစကားပုံတစ်ခုမှာ အချိန်နှင့်ဒီရေသည် လူကိုမစောင့် ဟူ၍ဖြစ်သည်။ မှန်ပါသည်၊ အဆက်မပြတ်စီးဆင်းနေသောရေကဲ့သို့ အချိန်သည် မရပ်မနားရွေ့လျားစီးဆင်းနေသည်။ ယင်းကို နောက်ပြန်ဆုတ်၍မရသကဲ့သို့ သိမ်းထား၍လည်းမရပါ။ ကုန်လွန်သွားသောအချိန်သည် ထာဝရကုန်လွန်သွားခြင်းသာဖြစ်သည်။ သို့သော် ရိုးရှင်းသောကျမ်းစာမူအချို့ကို လိုက်လျှောက်ခြင်းနှင့် လက်တွေ့ကျလုပ်ဆောင်မှုအချို့ လုပ်ခြင်းဖြင့် သာ၍အရေးကြီးသောအရာများအတွက် အချိန်ကို အသုံးချနိုင်ကြပါသည်။ ယင်းက ကျွန်ုပ်တို့၏ ထာဝရကောင်းကျိုးကိုဖြစ်စေပြီး “ဘုရားသခင်၏ဘုန်းအသရေတော်ကို ထင်ရှားစေ” ပါသည်။—ဖိလိပ္ပိ ၁:၁၀၊ ၁၁။

[စာမျက်နှာ ၈/ ၉ ပါ ရုပ်ပုံ]

ရေစီးသန်သည့်ချောင်းကဲ့သို့ပင်အချိန်ကို အကျိုးရှိသောအလုပ်များအတွက် အသုံးချနိုင်

[စာမျက်နှာ ၉ ပါ ရုပ်ပုံ]

စာမေးပွဲအတွက်လေ့လာမှုပြုရန် အဘယ်အချိန်သည် သူ့အတွက် “အခွင့်သာသည့်အချိန်” ဖြစ်မည်နည်း

[စာမျက်နှာ ၁၀ ပါ ရုပ်ပုံ]

ရှုပ်ပွနေသောနေရာတွင် အလုပ်လုပ်ခြင်းသည် အချိန်ကုန်သည့်အပြင်စိတ်ပျက်စရာဖြစ်