အေးချမ်းသင့်မြတ်စွာ နေလိုသူများ မိမိတို့ရဲ့ နာမည်ကောင်းကို ကာကွယ်

ရုရှားနိုင်ငံရဲ့ ဗဟိုတရားရုံးနှစ်ခုဟာ ၂၀၀၉၊ ဒီဇင်ဘာလနဲ့ ၂၀၁၀၊ ဇန်နဝါရီလအကြားမှာ ယေဟောဝါသက်သေတွေရဲ့ ဘာသာရေးယုံကြည်ချက်က အစွန်းရောက်နေတယ်လို့ ကြေညာလိုက်တယ်။ သမိုင်းက နောက်ကြောင်းပြန်နေပုံ ရတယ်။ ရုရှားနိုင်ငံကို ဆိုဗီယက်တွေ အုပ်ချုပ်ခဲ့ချိန်က သက်သေခံထောင်ပေါင်းများစွာဟာ နိုင်ငံ့ရန်သူတွေအဖြစ် မှားယွင်းစွာ စွပ်စွဲခံခဲ့ရတယ်။ သူတို့ဟာ နယ်နှင်ခံရတယ်၊ ထောင်ချခံရတယ်၊ အလုပ်ကြမ်းစခန်းတွေဆီ အတင်းအကြပ် အပို့ခံခဲ့ရတယ်။ ဆိုဗီယက်အစိုးရ ပြိုကွဲသွားပြီးတဲ့နောက်မှ ယေဟောဝါသက်သေတွေမှာ အပြစ်မရှိကြောင်း ကြေညာခဲ့တယ်။ အစိုးရသစ်က သူတို့ရဲ့နာမည်ကောင်းကို တရားဝင် ဖော်ထုတ်ပေးလိုက်တယ်။a အခုတစ်ခါ သက်သေခံတွေ မကောင်းကြောင်း သားပုပ်လေလွင့်ပြောဆိုဖို့ လူတချို့က ဆုံးဖြတ်ထားကြတဲ့ပုံပဲ။

၂၀၀၉ ခုနှစ်အစောပိုင်းမှာ အခွင့်အာဏာရှိသူတွေဟာ ယေဟောဝါသက်သေတွေရဲ့ ဘာသာရေးလွတ်လပ်ခွင့်ကို စတင်တိုက်ခိုက်ခဲ့ပါတယ်။ ဖေဖော်ဝါရီလ တစ်လတည်းမှာပဲ အစိုးရရှေ့နေတွေဟာ နိုင်ငံတစ်ဝန်းလုံးမှာ စုံစမ်းစစ်ဆေးမှုပေါင်း ၅၀၀ ကျော် ပြုလုပ်ခဲ့တယ်။ စုံစမ်းစစ်ဆေးမှုလုပ်ရတဲ့ ရည်ရွယ်ချက်က ဘာလဲ။ သက်သေခံတွေကို ဥပဒေချိုးဖောက်တဲ့သူတွေလို့ ယူဆပြီး ဖော်ထုတ်ချင်လို့ပါ။ နောက်ပိုင်းလတွေမှာ ရဲတွေဟာ ဝတ်ပြုရာခန်းမတွေနဲ့ ကိုယ်ပိုင်အိမ်တွေမှာ အေးအေးဆေးဆေး ကျင်းပနေတဲ့ ဘာသာရေးစည်းဝေးပွဲတွေကို အလစ်ဝင်စီးခဲ့တယ်။ သက်သေခံတွေရဲ့ စာပေတွေနဲ့ ကိုယ်ပိုင်ပစ္စည်းတွေကို သိမ်းယူသွားကြတယ်။ အခွင့်အာဏာရှိသူတွေဟာ သက်သေခံတွေဘက်ကနေ ကာကွယ်ပြောဆိုပေးနေတဲ့ တိုင်းတစ်ပါး ရှေ့နေတွေကို မောင်းထုတ်လိုက်ပြီး သူတို့ကို နိုင်ငံထဲ ပြန်ပေးမဝင်တော့ဘူး။

၂၀၀၉၊ အောက်တိုဘာ ၅ ရက်နေ့မှာ အကောက်ခွန်အရာရှိတွေဟာ စိန့်ပီတာစဘတ်မြို့နားက နယ်စပ်မှာ သင်္ဘောနဲ့တင်ပို့လိုက်တဲ့ ကျမ်းစာအခြေပြုစာပေတွေကို သိမ်းဆည်းလိုက်ကြတယ်။ အဲဒီစာပေတွေကို ဂျာမနီနိုင်ငံမှာ ပုံနှိပ်ခဲ့ပြီး ရုရှားနိုင်ငံက အသင်းတော် အတော်များများဆီ ပို့ဖို့ ဖြစ်ပါတယ်။ အန္တရာယ်ရှိတဲ့ တရားမဝင်ကုန်ပစ္စည်းတွေကို စစ်ဆေးတဲ့ ရုရှားအကောက်ခွန်ဌာနရဲ့ အထူးကိုယ်စားလှယ် အဖွဲ့တစ်ဖွဲ့က သင်္ဘောနဲ့ ရောက်လာတဲ့ ပစ္စည်းတွေကို စစ်ဆေးခဲ့ကြတယ်။ ဘာကြောင့်လဲ။ သင်္ဘောနဲ့ပို့လိုက်တဲ့ ပစ္စည်းတွေထဲမှာ “ဘာသာရေးကွဲလွဲမှု ဖြစ်စေနိုင်တဲ့ စာပေတွေ ပါ” နိုင်တယ်လို့ တရားဝင်ထုတ်ပြန်ထားတဲ့ စာတစ်စောင်မှာ ဖော်ပြထားလို့ပါ။

ပြန်လည်အနှောင့်အယှက်ပေးမှုက မကြာခင်မှာပဲ အထွတ်အထိပ်ကို ရောက်လာတယ်။ ရုရှားဖယ်ဒရေးရှင်းနဲ့ အော်လ်တေးပြည်သူ့သမ္မတနိုင်ငံ (ရုရှားနိုင်ငံရဲ့ အစိတ်အပိုင်းတစ်ခု) ရဲ့ နိုင်ငံတော်တရားရုံးချုပ်တွေက သင် အခုဖတ်နေတဲ့ ကင်းမျှော်စင် မဂ္ဂဇင်းအပါအဝင် သက်သေခံတွေ အသုံးပြုနေတဲ့ စာပေအတော်များများကို အစွန်းရောက်နေတယ်လို့ ကြေညာလိုက်တယ်။ ယေဟောဝါသက်သေတွေက ဥပဒေနဲ့အညီ အယူခံဝင်ခဲ့ကြပြီး နိုင်ငံတကာ လူ့အဖွဲ့အစည်းကလည်း အဲဒီကိစ္စကို စိုးရိမ်ကြောင်း ဖော်ပြခဲ့ကြတယ်။ ဒါပေမဲ့ အရာမရောက်ခဲ့ပါဘူး။ တည်ဆဲဥပဒေတွေက ရုရှားနိုင်ငံထဲ ကျမ်းစာအခြေပြုစာပေတွေ တင်သွင်းတာ၊ ဖြန့်ချိတာတွေကို ခွင့်မပြုဘူး။

သက်သေခံတွေကို နာမည်ဖျက်ဖို့၊ လုပ်ဆောင်မှုတွေကို ကန့်သတ်ချုပ်ချယ်ဖို့ အဲဒီလို အားထုတ်နေတာကို သူတို့ ဘယ်လိုတုံ့ပြန်ကြမလဲ။ ရုရှားပြည်သူအားလုံးရဲ့ ဘာသာရေးလွတ်လပ်ခွင့်နဲ့ပတ်သက်ပြီး တရားရုံးကထုတ်ပြန်တဲ့ ဥပဒေတွေက ဘယ်လိုသဘောဆောင်နေသလဲ။

တဖြည်းဖြည်း တိုးများလာတဲ့ ခြိမ်းခြောက်မှုကို ချက်ချင်း တုံ့ပြန်

၂၀၁၀၊ ဖေဖော်ဝါရီ ၂၆၊ သောကြာနေ့မှာ ရုရှားနိုင်ငံတစ်ဝန်းလုံးက ယေဟောဝါသက်သေ ၁၆၀,၀၀၀ ခန့်ဟာ နောက်တစ်ခါ ပြန်ဖြစ်ဦးမှာလား၊ ရုရှားပြည်သူတွေရဲ့မေးခွန်းလို့ ခေါင်းစဉ်တပ်ထားတဲ့ အထူးဝေစာကို စောင်ရေ ၁၂ သန်း စတင်ဖြန့်ဝေခဲ့တယ်။ ဥပမာ၊ ဆိုက်ဘေးရီးယားနယ်က ယူစိုလ်ယာ စီဘိုင်စကာယာမြို့မှာ ရာနဲ့ချီရှိတဲ့ သက်သေခံတွေဟာ မနက် ၅:၃၀ မှာ လမ်းမတွေပေါ် အတူတကွ စုရုံးခဲ့ကြတယ်။ အဲဒီသက်သေခံတွေထဲက တချို့ဟာ သူတို့ရဲ့ယုံကြည်ချက်အတွက် ၁၉၅၁ ခုနှစ်မှာ ဆိုက်ဘေးရီးယားကို နယ်နှင်ခံလိုက်ရတဲ့သူတွေ ဖြစ်ကြတယ်။ သူတို့ဟာ အပူချိန် အနုတ် ၄၀ ဒီဂရီစင်တီဂရိတ်ရှိတဲ့ ရာသီဥတုကို ကြံ့ကြံ့ခံပြီး မိမိတို့ရဲ့ခွဲတမ်းဖြစ်တဲ့ ဝေစာ ၂၀,၀၀၀ ကိုဝေငှခဲ့ကြတယ်။

သုံးရက်ကြာတဲ့ လှုပ်ရှားမှုကို ကြေညာဖို့ ယေဟောဝါသက်သေတွေဟာ ရုရှားနိုင်ငံရဲ့မြို့တော် မော်စကိုမှာ သတင်းစာရှင်းလင်းပွဲတစ်ခု ပြုလုပ်ခဲ့ကြတယ်။ ဖိတ်ကြားခံခဲ့ရတဲ့သူတွေထဲမှာ လူ့အခွင့်အရေးအဖွဲ့အစည်းတစ်ခုက ပညာရှင်တစ်ဦးဖြစ်တဲ့ မစ္စတာ လဗ်လီဗင်စင်လည်းပါတယ်။ သူဟာ နာဇီဂျာမနီခေတ်နဲ့ ဆိုဗီယက်ပြည်ထောင်စုခေတ်မှာ ယေဟောဝါသက်သေတွေ ကြုံတွေ့ခဲ့ရတဲ့ အကြောင်းမဲ့ အနှောင့်အယှက်ပြုမှုနဲ့ ညှဉ်းပန်းနှိပ်စက်မှုတွေအကြောင်း အတိုချုပ် ပြန်ပြောပြပြီး သက်သေခံတွေမှာ အပြစ်မရှိကြောင်း နောက်ပိုင်းထုတ်ပြန်တဲ့ တရားဝင်ကြေညာချက်ကိုပါ ထုတ်ဖော်ပြောကြားသွားတယ်။ “ဆိုဗီယက်အုပ်ချုပ်တဲ့ကာလအတွင်းမှာ ညှဉ်းပန်းနှိပ်စက်ခံရတဲ့ ဘာသာရေးအဖွဲ့အားလုံးကို နာမည်ကောင်း ပြန်လည်ပေးအပ်လိုက်တဲ့ အမိန့်ကို သမ္မတယဲ့လ်ဆင်က ထုတ်ပြန်ကြေညာခဲ့တယ်။ သူတို့ဆုံးရှုံးသွားတဲ့ အရာတိုင်းကို ပြန်ပေးရမယ်လို့လည်း အမိန့်ချလိုက်တယ်။ ဆိုဗီယက်ပြည်ထောင်စုခေတ်က ယေဟောဝါသက်သေတွေမှာ အဖွဲ့အစည်းဆိုင်ရာ အဆောက်အအုံတွေ ဘာမှမရှိပေမဲ့ သူတို့ရဲ့နာမည်ကောင်းကိုတော့ ပြန်ပေးလိုက်ပါပြီ” လို့လည်း သူပြောကြားသွားတယ်။

ဒါပေမဲ့ ဒီနာမည်ကောင်းက ခြိမ်းခြောက်ခံနေရပြန်ပါပြီ။ “အဲဒီနိုင်ငံမှာပဲ ဒီလူတွေဟာ အကြောင်းမဲ့ ညှဉ်းပန်းနှိပ်စက်ခံနေရတာ ဝမ်းနည်းစရာပဲ” ဆိုပြီး မစ္စတာ လီဗင်စင်က ပြောကြားသွားတယ်။

လူထုရဲ့နှစ်သက်မှုကို ရရှိခဲ့တဲ့ လှုပ်ရှားမှု

ဝေစာဝေငှရတဲ့ ရည်ရွယ်ချက်က အထမြောက်ခဲ့ပါသလား။ “သတင်းစာရှင်းလင်းပွဲတက်ရောက်ဖို့ လာနေတုန်း မြေအောက်မီးရထားဘူတာရုံမှာ ရုရှားနိုင်ငံတစ်ဝန်း ဝေငှနေတဲ့ ယေဟောဝါသက်သေတွေရဲ့ ဝေစာကို ထိုင်ဖတ်နေတဲ့ လူတွေကို ကျွန်တော်တွေ့လိုက်ရတယ်။ . . . လူတွေဟာ ဝေစာကို စိတ်ဝင်တစား ထိုင်ဖတ်နေကြတယ်” လို့မစ္စတာ လီဗင်စင်က ပြောသွားပါတယ်။b ဥပမာ၊ အောက်မှာဖော်ပြထားတဲ့ တွေ့ကြုံမှုတွေကို သတိပြုကြည့်ပါ။

ရုရှားနိုင်ငံအလယ်ပိုင်း မွတ်စလင်အများစုနေထိုင်တဲ့ ဒေသတစ်ခုက သက်ကြီးရွယ်အို အမျိုးသမီးတစ်ဦးဟာ ဝေစာကိုလက်ခံပြီး ဝေစာထဲမှာ ဘာပါလဲဆိုပြီး မေးခဲ့တယ်။ ရုရှားနိုင်ငံက လူ့အခွင့်အရေးနဲ့ လွတ်လပ်ခွင့်တွေအကြောင်း ဆွေးနွေးထားတာပါလို့ ပြောပြတဲ့အခါ သူက “နောက်ဆုံးတော့ တစ်ယောက်ယောက်က ဒီကိစ္စတွေကို သတ္တိရှိရှိ ထုတ်ဖော်လိုက်ပြီကိုး။ ဒီကိစ္စနဲ့ပတ်သက်ပြီး ရုရှားနိုင်ငံက ဆိုဗီယက်ပြည်ထောင်စုခေတ်ကို နောက်ကြောင်းပြန်သွားနေတယ်။ ကျေးဇူးအများကြီးတင်ပါတယ်။ မင်းတို့လုပ်တာ ကောင်းတယ်” ဆိုပြီး တအံ့တသြပြောလိုက်တယ်။

ချယ်လ်ယာဘင့်စ်ခ်မြို့က အမျိုးသမီးတစ်ဦးကို ဝေစာကမ်းပေးလိုက်တော့ “ကျွန်မ ဒီဝေစာရလို့ ဖတ်တောင်ဖတ်ပြီးသွားပြီ။ ရှင်တို့ကို ကျွန်မ အပြည့်အဝ ထောက်ခံတယ်။ ကိုယ့်ရဲ့ယုံကြည်ချက်ကို စနစ်တကျနဲ့ ကာကွယ်တဲ့ တခြားဘယ်ဘာသာရေးအဖွဲ့ကိုမှ ကျွန်မ မသိဘူး။ ရှင်တို့ရဲ့ ဝတ်စားဆင်ယင်ပုံ၊ လိမ္မာပါးနပ်စွာ အမြဲ ပြောဆိုပုံတွေကို ကျွန်မ သဘောကျတယ်။ ရှင်တို့ရဲ့ ယုံကြည်ချက်တွေကို အခိုင်အမာစွဲကိုင်ထားတယ်ဆိုတာ ထင်ရှားတယ်။ ရှင်တို့နဲ့အတူ ဘုရားသခင်ရှိတယ်လို့ ကျွန်မထင်ပါတယ်” ဆိုပြီး ပြောခဲ့တယ်။

စိန့်ပီတာစဘတ်မြို့မှာ ဝေစာလက်ခံရရှိတဲ့အပြင် ဖတ်တောင်ဖတ်ပြီးသွားတဲ့ အမျိုးသားတစ်ဦးကို အဲဒီဝေစာ ကြိုက်မကြိုက် မေးကြည့်တဲ့အခါ သူက “ကြိုက်ပါတယ်။ ဒီဝေစာကိုဖတ်နေတုန်း ကြက်သီးတွေထလာပြီး ငိုတောင် ငိုလိုက်သေးတယ်။ ကျွန်တော့်အဘွားက [ဆိုဗီယက်ခေတ်အတွင်းမှာ] အဖမ်းခံလိုက်ရတယ်။ သူနဲ့အတူ ထောင်ချခံခဲ့ရတဲ့သူတွေအကြောင်း ကျွန်တော့်ကို ပြောပြတယ်။ ထောင်ထဲမှာ ရာဇဝတ်သားတွေအပြင် ကိုယ့်ရဲ့ယုံကြည်ချက်ကြောင့် အပြစ်မရှိဘဲ ထောင်ချခံခဲ့ရတဲ့သူတွေလည်း ရှိတယ်။ ဖြစ်ပျက်ခဲ့ရာတွေကို လူတိုင်း သိသင့်တယ်လို့ ကျွန်တော် ယူဆတယ်။ ဒါကြောင့် ခင်ဗျားတို့လုပ်တာ မှန်ပါတယ်” လို့ပြန်ဖြေတယ်။

ရုရှားနိုင်ငံမှာ ရှေ့ဆက် ဘာဖြစ်လာဦးမလဲ

လွန်ခဲ့တဲ့ အနှစ်နှစ်ဆယ်က ရုရှားနိုင်ငံမှာရှိတဲ့ယေဟောဝါသက်သေတွေဟာ အတိုင်းအတာတစ်ခုအထိ သူတို့ရရှိခဲ့တဲ့ လွတ်လပ်မှုကို တန်ဖိုးထားခဲ့ကြတယ်။ ဒါပေမဲ့ အဲဒီလွတ်လပ်မှုဟာ အလွယ်တကူ ပျောက်ဆုံးသွားနိုင်တယ်ဆိုတာကိုလည်း သူတို့ ကောင်းကောင်းသိထားပါတယ်။ မကြာသေးခင်က ယေဟောဝါသက်သေတွေကို အသရေဖျက်နေတဲ့အတွက် ရုရှားနိုင်ငံဟာ ဖိနှိပ်မှုအမှောင်ထုထဲ ပြန်ကျရောက်သွားမလားဆိုတာကိုတော့ အချိန်က ပြောပြပါလိမ့်မယ်။

ရှေ့မှာ ဘာတွေဆက်ဖြစ်လာပါစေ ယေဟောဝါသက်သေတွေကတော့ သမ္မာကျမ်းစာမှာပါတဲ့ ငြိမ်သက်ခြင်းနဲ့ မျှော်လင့်ခြင်းအကြောင်း မပြတ်တမ်း ဟောပြောသွားဖို့ အခိုင်အမာ သန္နိဋ္ဌာန်ချထားကြပါတယ်။ သူတို့ရဲ့သန္နိဋ္ဌာန်ကို အထူးဝေစာထဲမှာ အခုလိုအကျဉ်းချုံး ဖော်ပြထားတယ်– “ဖိနှိပ်မှုက ဘယ်တော့မှ အောင်မြင်မှာမဟုတ်ပါဘူး။ ယေဟောဝါဘုရားသခင်နဲ့ သမ္မာကျမ်းစာအကြောင်းကို လိမ္မာပါးနပ်စွာ၊ ရိုသေလေးစားစွာ ဆက်ပြောသွားမှာပါ။ (၁ ပေတရု ၃:၁၅) နာဇီဂျာမနီခေတ်မှာ ထိတ်လန့်တုန်လှုပ်ဖွယ်ရာတွေကို တွေ့ကြုံခံစားရတုန်းက ကျွန်တော်တို့ ဟောပြောခဲ့သလို ကျွန်တော်တို့နိုင်ငံရဲ့ အမှောင်ဆုံးကာလဖြစ်တဲ့ ဖိနှိပ်ချုပ်ချယ်ထားချိန်မှာလည်း ကျွန်တော်တို့ ဆက်ဟောပြောခဲ့ကြတယ်။ နောင်လည်း ဆက်ဟောပြောသွားမှာပါ။—တမန်တော် ၄:၁၈-၂၀။”