မိမိတို့ကိုယ်ကို တလိုတလား ပေးဆက်ကြသူများ အီကွေဒေါနိုင်ငံမှာ
အီတလီက လူငယ်ညီအစ်ကိုတစ်ဦးဖြစ်တဲ့ ဘရူးနိုဟာ အရေးကြီးတဲ့ဆုံးဖြတ်ချက်တစ်ခု ချခဲ့ရတယ်။ သူက အထက်တန်းကျောင်းစာမေးပွဲကို အမှတ်အများဆုံးနဲ့အောင်မြင်တဲ့အတွက် အခု ဆွေမျိုးတွေနဲ့ ဆရာမတွေက သူ့ကို တက္ကသိုလ်ဆက်တက်ဖို့ ပြောကြတယ်။ အစောပိုင်းနှစ်အနည်းငယ်တုန်းက သူဟာ ယေဟောဝါထံအပ်နှံပြီး ဘုရားသခင့်အလိုတော်ကို သူ့ဘဝရဲ့ ပထမနေရာမှာထားပါ့မယ်လို့ ကတိပြုခဲ့တယ်။ သူ ဘယ်လိုဆုံးဖြတ်ခဲ့သလဲ။ သူ ဒီလိုရှင်းပြတယ်– “အပ်နှံမှုနဲ့အညီ အသက်ရှင်ပြီး ကိုယ်တော့်ကို ပထမနေရာမှာထားပါ့မယ်လို့ ယေဟောဝါကို ဆုတောင်းပြောပြခဲ့တယ်။ ဒါပေမဲ့ စိတ်ဝင်စားစရာကောင်းတဲ့ ကိုယ်တော့်လုပ်ငန်းတော်ရဲ့ အသွင်အမျိုးမျိုးမှာ ပါဝင်ချင်တယ်ဆိုပြီးတော့လည်း ပွင့်ပွင့်လင်းလင်း ဆုတောင်းခဲ့တယ်။”
နှစ်အနည်းငယ်ကြာပြီးတဲ့နောက် ဘရူးနိုက တောင်အမေရိကနိုင်ငံ၊ အီကွေဒေါမှာနေထိုင်ဖို့ သွားခဲ့တယ်။ သူ ဒီလိုပြောတယ်– “ယေဟောဝါက ကျွန်တော့်ရဲ့ဆုတောင်းချက်တွေကို မျှော်လင့်တာထက်ပိုပြီး အဖြေပေးခဲ့တယ်။” အံ့ဩစရာကောင်းတာက သူ အီကွေဒေါကိုရောက်တဲ့အခါ ယေဟောဝါကို ပိုပြီးအမှုဆောင်နိုင်ဖို့ ရွှေ့ပြောင်းလာတဲ့ တခြားလူငယ်အတော်များများနဲ့ တွေ့ခဲ့ရတယ်။
‘ယေဟောဝါကို စမ်းသပ်ကြည့်ကြ’ တဲ့ လူငယ်များ
ယေဟောဝါက ကျွန်ုပ်တို့မှာရှိတဲ့ အကောင်းဆုံးကို ကိုယ်တော့်ကိုပေးဖို့နဲ့ ကိုယ်တော့်ကိုယုံကြည်စိတ်ချဖို့ ဖိတ်ခေါ်ထားပြီး အဲဒီလိုလုပ်ဆောင်မယ်ဆိုရင် ကျွန်ုပ်တို့ကို ကိုယ်တော် ကြွယ်ဝစွာကောင်းချီးပေးမှာဖြစ်တယ်။ ယေဟောဝါ ဒီလိုပြောတယ်– “ငါက မိုးကောင်းကင်တံခါးတွေကိုဖွင့်ပြီး လိုလေသေးမရှိအောင် ကောင်းချီးတွေအကုန်လုံး သွန်ချမယ်၊ မသွန်ချဘူးဆိုတာသိနိုင်ဖို့ ကျေးဇူးပြုပြီး ဒီလိုနည်းနဲ့ ငါ့ကိုစမ်းသပ်ကြည့်ကြပါ။” (မာလ. ၃:၁၀၊ ကဘ) ဘရူးနိုလိုပဲ ကမ္ဘာတစ်ဝန်းမှာရှိတဲ့ ထောင်နဲ့ချီတဲ့လူငယ်တွေဟာ ယေဟောဝါရဲ့ ဒီဖိတ်ခေါ်ချက်ကို လက်ခံခဲ့ကြတယ်။ လူငယ်တွေဟာ ဘုရားသခင်ကိုချစ်တဲ့မေတ္တာကြောင့် သတင်းကောင်းကြေညာသူ သာ၍လိုအပ်တဲ့နေရာတွေမှာ အမှုဆောင်ဖို့ သူတို့ရဲ့အချိန်၊ ခွန်အားနဲ့ ပိုင်ဆိုင်ရာတွေကို တလိုတလားအသုံးပြုခြင်းအားဖြင့် ‘ယေဟောဝါကို စမ်းသပ်ကြည့်ကြ’ ဖို့ ဆုံးဖြတ်ခဲ့တယ်။
တလိုတလားရှိတဲ့ ဒီဟောပြောသူတွေဟာ နိုင်ငံအသစ်ကိုရောက်ပြီး သိပ်မကြာခင်မှာပဲ “စပါးရိတ်စရာ များစွာရှိ၏။ လုပ်သားတို့မူကား နည်းကြ၏” ဆိုတာကို မျက်မြင်ကိုယ်တွေ့ တွေ့ခဲ့ကြတယ်။ (မ. ၉:၃၇) ဥပမာ၊ ဂျာမနီနိုင်ငံမှာနေတဲ့ ဂျက်ကလင်းက အီကွေဒေါဌာနခွဲရုံးကို စာရေးပြီး ဒီလိုပြောခဲ့တယ်– “ကျွန်မ အီကွေဒေါမှာ အမှုဆောင်နေတာ နှစ်နှစ်ကျော်ပဲရှိသေးတယ်၊ ကျွန်မမှာ ကျမ်းစာသင်အံမှု ၁၃ ခုရှိပြီ၊ အဲဒီထဲက ၄ ယောက်က အစည်းအဝေးတွေကို ပုံမှန်တက်နေတယ်။ ဒါကြောင့် ကျွန်မအရမ်းပျော်တယ်။” ကနေဒါနိုင်ငံကလာတဲ့ ရှန်တဲလ်က ဒီလိုပြောတယ်– “ကျွန်မ အီကွေဒေါနိုင်ငံရဲ့ကမ်းခြေဒေသကို ပြောင်းလာတဲ့ ၂၀၀၈ ခုနှစ်တုန်းက အဲဒီမှာ အသင်းတော်တစ်ခုပဲရှိတယ်။ အခု အဲဒီမှာ အသင်းတော်သုံးခုနဲ့အတူ ရှေ့ဆောင်အယောက် ၃၀ ကျော်ရှိနေပြီ။ လူသစ်တွေအများကြီး အမှန်တရားမှာတိုးတက်လာတာကို မြင်တွေ့ရလို့ ပြောမပြတတ်အောင် ပျော်ရွှင်မိတယ်။” သူမ ဒီလိုထပ်ပြောတယ်– “ကျွန်မ မကြာသေးခင်က အမြင့်ပေ ၉,၀၀၀ အထက်မှာရှိတဲ့ အင်ဒီးစ်တောင်တန်းတွေရဲ့ မြို့တစ်မြို့ကို ပြောင်းရွှေ့ခဲ့တယ်။ အဲဒီမြို့မှာ လူဦးရေ ၇၅,၀၀၀ ကျော်နေထိုင်ပြီး အသင်းတော်တစ်ခုပဲရှိတယ်။ လူအတော်များများက အမှန်တရားကိုလက်ခံကြလို့ အဲဒီမှာအမှုဆောင်ရတာကို ကျွန်မ အရမ်းအားရတယ်။”
အမြဲလွယ်ကူမှာတော့မဟုတ်
တိုင်းတစ်ပါးမှာ သွားရောက်အမှုဆောင်တာက အမြဲလွယ်ကူမှာမဟုတ်ဘူးဆိုတာ မှန်ပါတယ်။ လူငယ်တချို့ဆိုရင် ပြောင်းရွှေ့ပြီးအမှုဆောင်မယ့် ဆုံးဖြတ်ချက်ချဖို့တောင် အခက်ကြုံခဲ့ရတယ်။ အမေရိကန်နိုင်ငံက ခေးလာ ဒီလိုပြောတယ်– “အသင်းတော်မှာရှိတဲ့ ညီအစ်ကိုတချို့က ကျွန်မကို တိုင်းတစ်ပါးသွားပြီး အမှုမဆောင်သင့်ဘူးလို့ ပြောတယ်။ တခြားနိုင်ငံကိုသွားပြီး ကျွန်မ ရှေ့ဆောင်လုပ်ချင်ရတဲ့အကြောင်းရင်းကို သူတို့နားမလည်ကြဘူး။ သူတို့က စေတနာနဲ့ပြောနေတာမှန်ပေမဲ့ သူတို့ရဲ့တုံ့ပြန်မှုကြောင့် ကျွန်မ စိတ်မကောင်းဖြစ်ခဲ့ရတယ်။ တစ်ခါတလေ ‘ငါ့ဆုံးဖြတ်ချက်က တကယ်ရော မှန်ရဲ့လား’ ဆိုပြီး ပြန်စဉ်းစားမိတယ်။” ဒါပေမဲ့ ခေးလာက ပြောင်းရွှေ့ဖို့ဆုံးဖြတ်လိုက်ပြီး ဒီလိုပြောပြတယ်– “ယေဟောဝါဆီ ကျွန်မ မကြာခဏဆုတောင်းတယ်၊ ရင့်ကျက်တဲ့ညီအစ်ကို၊ ညီအစ်မတွေနဲ့ စကားပြောတယ်။ ဒါက ကျွန်မရဲ့တလိုတလားစိတ်ဓာတ်ကို ယေဟောဝါ ကောင်းချီးပေးတယ်ဆိုတာ သိမြင်ဖို့ ကူညီပေးခဲ့တယ်။”
ဘာသာစကားအသစ်ကို သင်ယူခြင်းက လူများစွာအတွက် အခက်အခဲတစ်ခုဖြစ်တယ်။ အိုင်ယာလန်နိုင်ငံက ရှယ်ဘွန် ဒီလိုပြန်အမှတ်ရတယ်– “ပြောမပြတတ်အောင် ခက်ပါတယ်။ စိတ်ရှည်ဖို့ သင်ယူခဲ့ရတယ်၊ ဘာသာစကားကို လုံ့လစိုက်လေ့လာပြီး အမှားတွေပြောမိတဲ့အခါတွေမှာ ကိုယ့်ဘာသာကိုယ်ရယ်မိတယ်။” အက်စတိုးနီးယားနိုင်ငံက အန်းနာ ဒီလိုပြောတယ်– “အပူပိုင်းဒေသရဲ့ ခြစ်ခြစ်တောက်အပူဒဏ်၊ ဖုန်ထူတဲ့ဒဏ်၊ ရေနွေးနဲ့ရေမချိုးနိုင်တာ စတဲ့အခြေအနေတွေနဲ့ ကျင့်သားရအောင်ကြိုးစားရတာက စပိန်ဘာသာစကားသင်ယူရတာနဲ့ယှဉ်လိုက်ရင် ဘာမှမဟုတ်တော့ဘူး။ တစ်ခါတလေ လက်လျှော့လိုက်ချင်တယ်။ ကျွန်မရဲ့အမှားတွေကိုအာရုံမစိုက်ဘဲ တိုးတက်မှုကို အာရုံစိုက်ဖို့ သင်ယူခဲ့ရတယ်။”
မိသားစု၊ မိတ်ဆွေတွေနဲ့ခွဲပြီး အဝေးမှာနေရတဲ့ အခက်အခဲကိုလည်း မမေ့ပါနဲ့။ အမေရိကန်နိုင်ငံက ဂျော်နသန် ဒီလိုပြောတယ်– “ကျွန်တော် ဒီနိုင်ငံကိုရောက်ပြီး သိပ်မကြာခင်မှာပဲ မိတ်ဆွေတွေ၊ မိသားစုတွေနဲ့ခွဲနေရတဲ့အတွက် စိတ်ဓာတ်ကျခဲ့တယ်။ ဒါပေမဲ့ ကျမ်းစာလေ့လာမှုနဲ့ ဟောပြောခြင်းလုပ်ငန်းကို အာရုံစိုက်လုပ်ဆောင်တဲ့အတွက် အဲဒီခံစားချက်တွေကို ဖြေသိမ့်နိုင်ခဲ့တယ်။ သိပ်မကြာခင်မှာပဲ လယ်ကွင်းလုပ်ငန်းကနေ စိတ်လှုပ်ရှားစရာကောင်းတဲ့ တွေ့ ကြုံမှုတွေရလာတယ်၊ အသင်းတော်မှာရှိတဲ့ မိတ်ဆွေအသစ်တွေကလည်း ကျွန်တော့်ကို ပျော်ရွှင်စေတယ်။”
နောက်အခက်အခဲတစ်ခုက လူနေမှုအဆင့်အတန်း ဖြစ်တယ်။ သင်နေခဲ့တဲ့နေရာနဲ့ တစ်ပုံစံတည်းဖြစ်နိုင်မှာ မဟုတ်ဘူး။ ကနေဒါနိုင်ငံက ဘိုရ် ဒီလိုပြောတယ်– “သင့်တိုင်းပြည်မှာတုန်းက လျှပ်စစ်နဲ့ ရေလို အခြေခံလိုအပ်ရာတွေက ပုံမှန်ရနေတဲ့အတွက် အရေးမကြီးဘူး။ ဒါပေမဲ့ ဒီမှာကျတော့ အဲဒါတွေက လာချင်တဲ့အခါလာတယ်၊ ပျက်ချင်တဲ့အခါပျက်တယ်။” ဖွံ့ဖြိုးဆဲနိုင်ငံအတော်များများမှာ ဆင်းရဲမွဲတေမှု၊ လမ်းပန်းဆက်သွယ်ရေးအခက်အခဲ၊ စာမတတ်တာတွေကို တွေ့ရတယ်။ ဩစတြီးယားနိုင်ငံက အိုင်းနက်စ်ဟာ ဒေသခံလူတွေရဲ့ အရည်အသွေးကောင်းတွေကို အာရုံစိုက်ခြင်းအားဖြင့် သူ့ရဲ့ပျော်ရွှင်မှုကို ထိန်းထားနိုင်ခဲ့တယ်။ “ဒေသခံတွေက ဧည့်ဝတ်ကျေပွန်တယ်၊ နူးညံ့သိမ်မွေ့တယ်၊ ရိုင်းပင်းကူညီတတ်ပြီး နှိမ့်ချမှုရှိတယ်” လို့ သူပြောတယ်။ “အများစုက ဘုရားသခင်အကြောင်း ပိုလေ့လာသင်ယူဖို့ အရမ်းစိတ်ဝင်စားကြတယ်။”
လိုလေသေးမရှိအောင်ရမယ့် ကောင်းချီးတွေ
အီကွေဒေါနိုင်ငံမှာ အမှုဆောင်နေတဲ့ လူငယ်အားလုံးဟာ ကိုယ်ကျိုးစွန့်လုပ်ဆောင်ရပေမဲ့ ယေဟောဝါက သူတို့မျှော်လင့်ထားတာထက် “အလွန်များပြားစွာပြုနိုင်” တယ်ဆိုတာ တွေ့ရှိခဲ့ကြတယ်။ (ဧ. ၃:၂၀) သူတို့တွေက “လိုလေသေးမရှိအောင် ကောင်းချီးတွေ” ရနေတယ်လို့ ခံစားကြရတယ်။ (မာလ. ၃:၁၀၊ ကဘ) ဟောပြောခြင်းလုပ်ငန်းနဲ့ပတ်သက်ပြီး သူတို့ ဒီလိုခံစားကြရတယ်-
ဘရူးနို– “ကျွန်တော်က စိတ်ဝင်စားစရာကောင်းတဲ့ အမေဇုန်ဒေသမှာရှိတဲ့ အီကွေဒေါမှာ စအမှုဆောင်ခဲ့တယ်။ နောက်ပိုင်း အီကွေဒေါဌာနခွဲရုံး ဆောက်လုပ်ရေးမှာ ကျွန်တော် ကူညီခဲ့တယ်။ အခု ကျွန်တော် ဗေသလမှာ အမှုဆောင်နေပါတယ်။ အီတလီမှာနေတုန်းက ယေဟောဝါကို ကျွန်တော့်ဘဝရဲ့ ပထမနေရာမှာထားဖို့ ဆုံးဖြတ်ခဲ့တယ်၊ ကိုယ်တော်က ကျွန်တော့်ကို စိတ်လှုပ်ရှားစရာကောင်းတဲ့အသက်တာကို ပေးခဲ့တယ်၊ လုပ်ငန်းတော်ရဲ့အသွင်အမျိုးမျိုးမှာ အမှုဆောင်စေခြင်းအားဖြင့် ကျွန်တော့်ရဲ့ဆန္ဒကို ဖြည့်ဆည်းပေးခဲ့တယ်။”
ဘိုရ်– “အီကွေဒေါမှာ ကျွန်တော့်ရဲ့အချိန်အားလုံးကို ဝတ်ပြုရေးနဲ့ဆိုင်တဲ့လုပ်ဆောင်မှုတွေအတွက် အသုံးပြုနိုင်လို့ ယေဟောဝါနဲ့ပိုရင်းနှီးလာတယ်။ တစ်ချိန်တည်းမှာ ကျွန်တော်အမြဲလုပ်ချင်ခဲ့တဲ့ အရာတစ်ခုဖြစ်တဲ့ စိတ်ဝင်စားစရာကောင်းတဲ့ နေရာဒေသတွေကိုလည်း ခရီးသွားခဲ့ရတယ်။”
အန်းနာ– “တစ်ကိုယ်ရေဖြစ်တဲ့ ကျွန်မအတွက် ခရစ်ယာန်သာသနာပြုတစ်ဦးလို နေထိုင်ဖို့ဆိုတာ မဖြစ်နိုင်ဘူးလို့ ကျွန်မထင်တယ်။ ဒါပေမဲ့ ဖြစ်နိုင်တယ်ဆိုတာ အခုတော့ သိသွားပြီ။ ယေဟောဝါရဲ့ကောင်းချီးကြောင့် တပည့်ဖြစ်စေခြင်းလုပ်ငန်းနဲ့ ဝတ်ပြုရာခန်းမဆောက်လုပ်ရေးမှာ ပါဝင်ရလို့၊ မိတ်ဆွေသစ်တွေရလို့ ကျွန်မအရမ်းပျော်တယ်။”
အဲလ်ခါ– “ကျွန်မနေထိုင်တဲ့ ဩစတြီးယားမှာတုန်းက ကျမ်းစာသင်အံမှုတစ်ခုရဖို့ ယေဟောဝါထံ မကြာခဏဆုတောင်းခဲ့တယ်။ အခု ကျမ်းစာသင်အံမှု ၁၅ ခုရှိနေပြီ။ တိုးတက်တဲ့သင်သားတွေရဲ့ ပြုံးရွှင်နေတဲ့မျက်နှာကို မြင်ရတာက တကယ့်ကိုကျေနပ်စရာပဲ။”
ဂျိုအဲလ်– “တခြားနိုင်ငံတစ်ခုခုကိုသွားပြီး ယေဟောဝါကို အမှုဆောင်ရတာက တကယ့်အတွေ့အကြုံကောင်းတစ်ခုပဲ။ ယေဟောဝါကို ပိုအားကိုးတတ်လာပြီး ကျွန်တော့်ရဲ့ကြိုးစားအားထုတ်မှုတွေကို ကိုယ်တော်ကောင်းချီးပေးတာကို မြင်ရတဲ့အခါ စိတ်လှုပ်ရှားမိတယ်။ အမေရိကန်နိုင်ငံကနေ ဒီကိုရောက်လာတဲ့ ဦးဆုံးနှစ်မှာပဲ ကျွန်တော်အမှုဆောင်နေတဲ့အုပ်စုမှာ ကြေညာသူ ၆ ယောက်ကနေ ၂၁ ယောက်အထိ တိုးလာတယ်။ အောက်မေ့ရာပွဲတက်ရောက်သူ ၁၁၀ ရှိခဲ့တယ်။”
သင်ကော ဘယ်လိုလဲ
လူငယ်ညီအစ်ကို ညီအစ်မတို့၊ သင်တို့ရဲ့အခြေအနေက သတင်းကောင်းဟောပြောသူ သာ၍လိုအပ်တဲ့ဒေသမှာ အမှုဆောင်ဖို့ ဖြစ်နိုင်သလား။ အဲဒီလိုကြီးမားတဲ့အပြောင်းအလဲတစ်ခုကို လုပ်ဖို့ဆိုတာ အသေအချာစီစဉ်ဖို့လိုတယ်။ အဲဒီလိုပြောင်းရွှေ့ရာမှာ အရေးကြီးဆုံးက ယေဟောဝါနဲ့ လူသားချင်းကိုချစ်တဲ့ အားကြီးတဲ့မေတ္တာပဲ။ သင့်မှာ အဲဒီမေတ္တာနဲ့ တခြားအရည်အသွေးတွေ ရှိတယ်ဆိုရင် တိုင်းတစ်ပါးမှာ အမှုဆောင်လိုကြောင်း ယေဟောဝါထံ ရိုးသားစွာဆုတောင်းပြောပြပါ။ ဒါ့အပြင် သင့်ဆန္ဒကို သင့်ရဲ့ခရစ်ယာန်မိဘတွေနဲ့ အသင်းတော်မှာရှိတဲ့ အကြီးအကဲတွေကို ပြောပြပါ။ သင်လည်း မြင့်မြတ်တဲ့လုပ်ငန်းတော်ရဲ့ စိတ်လှုပ်ရှားစရာကောင်းပြီး ကျေနပ်မှုပေးတဲ့ ဒီကဏ္ဍမှာ ပါဝင်နိုင်တယ်ဆိုတာ တွေ့ရပါလိမ့်မယ်။
[စာမျက်နှာ ၃ ပါ အကျဉ်းဖော်ပြချက်]
“ယေဟောဝါဆီ ကျွန်မ မကြာခဏဆုတောင်းတယ်၊ ရင့်ကျက်တဲ့ညီအစ်ကို၊ ညီအစ်မတွေနဲ့ စကားပြောတယ်။ ဒါက ကျွန်မရဲ့တလိုတလားစိတ်ဓာတ်ကို ယေဟောဝါ ကောင်းချီးပေးတယ်ဆိုတာ သိမြင်ဖို့ ကူညီပေးခဲ့တယ်။”—အမေရိကန်နိုင်ငံမှ ခေးလာ
[စာမျက်နှာ ၆ ပါ လေးထောင့်ကွက်/ရုပ်ပုံ]
တိုင်းတစ်ပါးမှာအမှုဆောင်ဖို့ ပြင်ဆင်နိုင်ပုံ
• ကိုယ်ပိုင်လေ့လာမှု ကောင်းကောင်းလုပ်တဲ့ အကျင့်ရှိအောင် လုပ်ဆောင်ပါ
• ၂၀၁၁၊ ဩဂုတ်လထုတ် ကျွန်ုပ်တို့၏နိုင်ငံတော်ဓမ္မအမှု၊ စာမျက်နှာ ၄-၆ မှာပါတဲ့အချက်တွေကို သုံးသပ်ပါ
• တိုင်းတစ်ပါးမှာ အမှုဆောင်ခဲ့ဖူးတဲ့၊ အမှုဆောင်နေတဲ့ တခြားသူတွေနဲ့ စကားပြောပါ
• သွားမယ့်တိုင်းပြည်ရဲ့ ယဉ်ကျေးမှုနဲ့ သမိုင်းကြောင်းကို လေ့လာပါ
• ဘာသာစကားအခြေခံသင်တန်း တက်ပါ
[စာမျက်နှာ ၆ ပါ လေးထောင့်ကွက်/ရုပ်ပုံ]
တိုင်းတစ်ပါးမှာ သွားရောက်အမှုဆောင်သူတွေ မိမိတို့ကိုယ်ကို ထောက်ပံ့နိုင်ဖို့ ဝင်ငွေရှာတဲ့နည်းများ . . .
• နှစ်စဉ် မိမိတို့ရဲ့တိုင်းပြည်ကိုပြန်ပြီး လအနည်းငယ် အလုပ်လုပ်ခြင်း
• မိမိတို့ရဲ့အိမ်၊ တိုက်ခန်း ဒါမှမဟုတ် စီးပွားရေးလုပ်ငန်းကို အငှားချထားခြင်း
• အင်တာနက်ကနေ အလုပ်လုပ်ခြင်း
[စာမျက်နှာ ၄၊ ၅ ပါ ရုပ်ပုံ]
၁ ဂျာမနီနိုင်ငံက ဂျက်ကလင်း
၂ အီတလီနိုင်ငံက ဘရူးနို
၃ ကနေဒါနိုင်ငံက ဘိုရ်
၄ အိုင်ယာလန်နိုင်ငံက ရှယ်ဘွန်
၅ အမေရိကန်နိုင်ငံက ဂျိုအဲလ်
၆ အမေရိကန်နိုင်ငံက ဂျော်နသန်
၇ အက်စတိုးနီးယားနိုင်ငံက အန်းနာ
၈ ဩစတြီးယားနိုင်ငံက အဲလ်ခါ
၉ ကနေဒါနိုင်ငံက ရှန်တဲလ်
၁၀ ဩစတြီးယားနိုင်ငံက အိုင်းနက်စ်