ခံနိုင်ရည်ဖြင့် ဆက်၍အသီးသီးခြင်း

^၁ ယေရှုခရစ်ထမြောက်ပြီးနောက် အနှစ် ၃၀ ပင်မရှိသေးချိန်တွင် ကောလောသဲမြို့ရှိအသင်းတော်ထံ စာရေးစဉ်တွင် သတင်းကောင်းနှင့်ဆိုင်သောသမ္မာတရားသည် အသီးသီးပြီး ကမ္ဘာတစ်ဝှန်းတိုးတက်နေကြောင်း တမန်တော်ပေါလုပြောနိုင်ခဲ့သည်။ (ကော၊ ၁:၅၊ ၆) ယနေ့ထိုထက် ယေဟောဝါသက်သေများ နိုင်ငံတော်သတင်းကို စာသားအတိုင်း “မြေကြီးစွန်းတိုင်အောင်” ဟောပြောလေပြီ။ (တ၊ ၁:၈။ ယော၊ ၁၄:၁၂) ၁၉၈၉ ခုလုပ်ငန်းတော်နှစ်အတွင်း ကမ္ဘာချီနိုင်ငံတော်ကြေညာသူပျမ်းမျှအရေအတွက် ၅.၆ ရာခိုင်နှုန်းအထိတိုးတက်ခဲ့သည်။ နိုင်ငံပေါင်း ၂၁၂ နိုင်ငံတွင် ကြေညာသူနှုန်းသစ် ၃၇၈၇၁၈၈ အထိတိုးတက်လာသည်။

^၂ ဘုရားသခင့်နိုင်ငံတော်သတင်းဟောပြောခြင်းလုပ်ငန်းကို ပိတ်ပင်ထားသည့် နိုင်ငံများတွင် မှတ်တမ်းများစုံစုံလင်လင်မရနိုင်ဦးတော့ ထိုထက်များသောတိုးတက်မှုဖြစ်သည့် ၇.၆ ရာခိုင်နှုန်းပင်ရကြောင်း သိရှိရသည်။ ထိုနိုင်ငံများ၌ ပြဿနာများစွာရှိသော်လည်း ကြေညာသူများသည် “မြဲမြံစွာအသီးသီး” ဆဲရှိကြသည်။ (လု၊ ၈:၁၅) အချို့နေရာများတွင် ဖိနှိပ်မှုများလျော့နည်းနေပေပြီ။ သို့သော် ခဲယဉ်းသောအခြေအနေများမူကား ရှိမြဲရှိနေသည်။

^၃ နိုင်ငံတော်သတင်းဟောပြောရန် ပိုလွတ်လပ်သောနိုင်ငံများတွင် အခြားအခက်အခဲများရှိသည်။ ဥပေက္ခာပြုမှုနှင့် အရေးမထားမှုကို အထူးသဖြင့် ကြွယ်ဝချမ်းသာသောနေရာများတွင် တွေ့မြင်ရကြသည်။ ဤကဲ့သို့သောစိတ်နေသဘောထားမျိုး ဓာတ်ကူးမသွားစေရန် သတိပြုရမည်။ စည်းစိမ်ဥစ္စာ၊ အပျော်အပါး၊ အပန်းဖြေမှုနှင့်အခြားသောဆွဲဆောင်မှုများကြောင့် ကျွန်ုပ်တို့၏သီအိုကရက်တစ်လုပ်ငန်းရပ်များကို မထိခိုက်စေလိုပါ။ ထိုသို့မဟုတ်လျှင် အရေးမထားစိတ်ဝင်လာပြီး ခံနိုင်ရည်ရှိရှိ မြဲမြံစွာအသီးသီးနေရန်လိုကြောင်းကို လေးစားသောသဘော ပျောက်လွင့်သွားနိုင်သည်။​—လု၊ ၂၁:၃၄-၃၆။

ခံနိုင်ရည်နှင့် ကြိုးစားအားထုတ်မှု လိုအပ်

^၄ သတင်းကောင်းကိုတိုက်ခံခြင်း၊ သို့မဟုတ် ကျွန်ုပ်တို့၏ခရစ်ယာန်တာဝန်များကို ဆောင်ရွက်ရန် လွတ်လပ်မှုအနည်းအကျဉ်းရရှိခြင်းကိုပင် ရင်ဆိုင်ရစေကာမူ ခံနိုင်ရည်သည် လိုအပ်ချက်တစ်ခုဖြစ်ပေသည်။ အချို့နိုင်ငံများတွင် ကျွန်ုပ်တို့ညီအစ်ကိုများသည် ဆယ်စုနှစ်များစွာ အခက်အခဲဒုက္ခနှင့် အမှုဆောင်ခဲ့ရကြပြီ။ ဤကဲ့သို့သောအခက်အခဲကြား ခံနိုင်ရည်ရှိခဲ့ကြသောကြောင့် ယခုသူတို့ကြွယ်ဝစွာကောင်းချီးများခံစားနေရကြသည်။ (ရော၊ ၅:၃-၅။ ဂလ၊ ၆:၉) ကျွန်ုပ်တို့မည်သည့်အခက်အခဲများကိုပင် ရင်ဆိုင်ရစေကာမူ ခံနိုင်ရည်ရှိလိုကြသည်။ နိုင်ငံတော်သတင်းကောင်းဟောပြောရမည်။ သမာဓိရှိကြောင်းကိုလည်း ဆက်လက်တင်ပြရကြမည်။ ခံနိုင်ရည်ရှိခြင်းအားဖြင့် ကျွန်ုပ်တို့၏စိုးလ်အသက်ဆုံးရှုံးမည်မဟုတ်။​—မာ၊ ၁၃:၁၀။ လု၊ ၂၁:၁၉။

^၅ ယေဟောဝါ၏လုပ်ငန်းတော်ကို ကြိုးစားအားထုတ်လုပ်ကိုင်ခြင်း၊ ဟောပြောခြင်းလုပ်ငန်းတွင် လက်ပန်းမကျခြင်းအားဖြင့် ဝိညာဏရေးရာများကို တန်ဖိုးထားကြောင်းတင်ပြကြသည်။ သယ်ယူပို့ဆောင်မှုခဲယဉ်းသောနိုင်ငံများ၊ ပစ္စည်းဥစ္စာရှားပါးသောနိုင်ငံများ၊ စီးပွားရေးပြဿနာမပြေလည်သောနိုင်ငံများတွင် သတင်းကောင်းကို အဆက်မပြတ်ဟောပြောနေကြပါသည်။ ဤကဲ့သို့သောနိုင်ငံအချို့တွင် အသင်းတော်ကြေညာသူများ လစဉ်မှန်မှန် လယ်ကွင်းလုပ်ငန်းတွင် ပျမ်းမျှအားဖြင့် ၁၄ မှ ၁၇ နာရီမှတ်တမ်းသွင်းကြသည်။ သူတို့၏ရှေ့ဆောင်ဦးရေသည်လည်း တိုးများလာနေသည်။ ဇိမ်ခံပစ္စည်းပေါများသူ ကျွန်ုပ်တို့စဉ်းစားစရာဖြစ်စေသည်။ အရေးတကာ့အရေးအကြီးဆုံး နိုင်ငံတော်သတင်းဟောပြော၍ တပည့်ဖြစ်စေခြင်းလုပ်ငန်းတွင် ကျွန်ုပ်တို့မှန်မှန်ပါဝင်ခြင်းကို တိုးချဲ့ပေးနိုင်ပါမည်လော။

တိုး၍လုပ်ကိုင်နိုင်မည်လော

^၆ လယ်ကွင်းလုပ်ငန်း၌ အချိန်ပိုပါဝင်နိုင်ရန် ကျွန်ုပ်တို့အစီအစဉ်ဇယားများကို အနည်းငယ်ပြုပြင်ပေးရန်လိုအပ်ပေမည်။ တနင်္ဂနွေနေ့တွင် လယ်ကွင်းလုပ်ငန်းကိုတစ်နာရီပါဝင်နေလေ့ရှိလျှင် နောက်ထပ်တစ်နာရီတိုး၍ ပြန်လည်ပတ်မှုနှင့်ကျမ်းစာသင်အံမှုပြုလုပ်ပေးနိုင်မည်လော။ သို့မဟုတ် ကျမ်းစာသင်အံမှုရှိထားလျှင် သင်အံမှုအရင် တစ်အိမ်မှတစ်အိမ်လုပ်ငန်း သို့မဟုတ် ပြန်လည်ပတ်မှုအနည်းငယ်ပြုလုပ်ရန် တစ်နာရီနှစ်နာရီတိုးပါဝင်နိုင်မည်လော။ စနေနေ့တွင် မဂ္ဂဇင်းလုပ်ငန်း၌ တစ်နာရီနှစ်နာရီပါဝင်ပြီးနောက် မဂ္ဂဇင်းလမ်းကြောင်းတွင် မဂ္ဂဇင်းများပြန်ဝေငှနိုင်မည်။ သို့မဟုတ် ပြန်လည်ပတ်မှုအနည်းအကျဉ်းပြုလုပ်နိုင်မည်။ ဤနည်းမျိုးစုံဖြင့် လယ်ကွင်းလုပ်ငန်း၌ပါဝင်ချိန်ကို ကျွန်ုပ်တို့တိုးများစေနိုင်သည်။ အချိန်တိုး၍ပေးသမျှ အကျိုးကျေးဇူးများလည်းတိုးများလာပေမည်။

^၇ လယ်ကွင်းလုပ်ငန်း၌ ပြန်လည်ပတ်မှုများပြုလုပ်ခြင်းဖြင့် အချိန်တိုး၍ပါဝင်လေ ကျမ်းစာသင်အံမှုများလာလေဖြစ်မည်။ အချိန်တန်လျှင် သမ္မာတရားသို့ဝင်လာသူ များလာလေဖြစ်မည်။ ဤသူများသည်လည်း နိုင်ငံတော်သတင်းဟောပြောခြင်းကိုပြီးမြောက်အောင်မြင်စေရန် ကျွန်ုပ်တို့ကိုဝိုင်းဝန်းကူညီပေးကြလိမ့်မည်။​—မ၊ ၂၈:၁၉၊ ၂၀။

ဆုတောင်းခြင်းအရေးကြီး

^၈ ခံနိုင်ရည်ဖြင့် ကျွန်ုပ်တို့အသီးများအမြဲသီးနေရန် ယေဟောဝါကောင်းချီးကိုတောင်းဆို၍ ကိုယ်တော့်ဝိညာဉ်တော်ညွှန်ကြားမှုကို ခံယူရမည်။ ကျွန်ုပ်တို့ဓမ္မအမှုအကြောင်း ယေဟောဝါကိုဆုတောင်းရမည်။ ကျွန်ုပ်တို့လယ်ကွင်းလုပ်ငန်းအကြောင်း ယေဟောဝါထံဆုတောင်းကြသောအခါ ကျွန်ုပ်တို့သည် ကိုယ်တော်၏လုပ်ဖက်များဖြစ်ကြောင်း သတိရစေသည်။ (၁ ကော၊ ၃:၉) ယေဟောဝါအကူအညီဖြင့် ချက်ချင်းအကျိုးမထင်ရှားသော်လည်း ဓမ္မအမှု၌ခံနိုင်ရည်ရှိနိုင်မည်။ အချို့နေရာဒေသများတွင် နိုင်ငံတော်ကြွေးကြော်သူများ နှစ်ပေါင်းများစွာ ခံနိုင်ရည်ရှိရှိကြိုးစားအားထုတ်ပြီးနောက်မှ တိုးတက်လာသည်။ အနာဂတ်သို့ ကျွန်ုပ်တို့ရှုမြော်ကြရာတွင် လက်မလျှော့ဘဲ ဓမ္မအမှုကို အပြည့်အဝပြီးစီးနိုင်ရန် မြင့်မြတ်သောလမ်းပြမှုနှင့်မစမှုကို အမြဲရှာယူနေရန်လိုသည်။ (၂ တိ၊ ၄:၅) နိုင်ငံတော်ဟောပြောခြင်းနှင့် တပည့်ဖြစ်စေခြင်းလုပ်ငန်းတွင် အသီးများစွာသီးစရာလိုနေသေးသည်။

^၉ အမြဲဆုတောင်းရန်လိုကြောင်း ယေရှုအလေးအနက်တင်ပြခဲ့သည်။ (လု၊ ၁၈:၁) ပေါလုဤသို့တိုက်တွန်းခဲ့သည်။ “မခြားမလပ်ဆုတောင်းပတ္ထနာပြုကြလော့။” (၁ သက်၊ ၅:၁၇) ယနေ့ ဇွဲရှိရှိဆုတောင်းရန်လိုသည့် အကြောင်းကောင်းများစွာရှိသည်။ နှစ်စဉ်နှစ်တိုင်း တိုးများလာနေသည့် သိုးစုကိုကျွေးမွေးပြုစုပေးရန် တာဝန်များစွာထမ်းဆောင်ရမည်။ သူတစ်ထူးလည်း ခံနိုင်ရည်နှင့်မြဲမြံစွာအသီးသီးကြရန် ကူညီပေးလိုကြသည်။ ကြေညာသူတစ်ဦးစီနှင့် အဖွဲ့အစည်းတစ်ခုလုံးအတွက် ဖြည့်စွက်ပေးစရာကိစ္စအမျိုးမျိုးကို ပြုစုပေးရမည်။ လုပ်ငန်းတော်နှင့် ကျမ်းစာအခြေခံစာပေများကို အဆက်မပြတ်ပုံနှိပ်ထုတ်ဝေရန် ထောက်ပံ့ပေးမည့် အလှူငွေလိုကြောင်းသိထားကါ ဤကိစ္စတွင် ဘုရားသခင်ကိုကြောက်ရွံ့သူများ ရက်ရောစွာပေးကမ်းကြရန် သူတို့စိတ်နှလုံးကို ယေဟောဝါတိုက်တွန်းပေးမည်အကြောင်း ဆုတောင်းလိုကြမည်။​—၂ ကော၊ ၉:၈-၁၁။

^၁၀ ယခင်ကထက်တိုး၍ သီအိုကရက်တစ်လုပ်ငန်းအတွက် ကမ္ဘာချီလယ်ကွင်းရှိဒေသအသစ်များ ထပ်တိုးလာရာ ကောလောသဲ ၄:၂ ပါကျမ်းစာသြဝါဒက ပိုအဓိပ္ပာယ်ရှိလာလေသည်။ “ဆုတောင်းပတ္ထနာပြုခြင်းအမှုကိုအမြဲပြု၍ ကျေးဇူးတော်ကို ချီးမွမ်းလျက် စောင့်ရှောက်ကြလော့။” ညီအစ်ကိုများသည် ဆက်အသီးသီးပြီး သက်သေခံရန်အခြေအနေယခင်ကထက် ပိုခဲယဉ်းလာသောနေရာဒေသများတွင် တွေ့ရှိထားသည့် သိုးကဲ့သို့သောသူများကိုကူညီပေးနိုင်ရန် ကမ္ဘာတစ်ဝှန်းမှ ညီအစ်ကိုများအတွက် ဆုတောင်းပေးသင့်သည်။

ကျေးဇူးတင်စိတ်တင်ပြ

^၁၁ ကျွန်ုပ်တို့မြတ်နိုးလှသည့် ကြွယ်ဝသောဝိညာဏပြင်ဆင်မှုများအတွက် ကျေးဇူးတော်ကြီးမားလှသည်တကား။ ယင်းတို့အတွက် ယေဟောဝါကိုကျေးဇူးတင်လိုကြသည်။ သစ္စာရှိကျေးကျွန်နှင့် ၄င်း၏အုပ်ချုပ်ရေးအဖွဲ့၏လုပ်ငန်းအပေါ် ကောင်းချီးဆက်သွန်းလောင်းတော်မူမည်အကြောင်းလည်း ဆုတောင်းပေးကြပါသည်။ စိတ်နှိမ့်ချစွာဖြင့် ကျွန်ုပ်တို့နှင့် ကမ္ဘာချီသိုးကဲ့သို့သောသူများအကျိုးအလိုငှာ မမောမပန်းကြိုးစားအားထုတ်လေသမျှကို များစွာကျေးဇူးတင်လေးစားအပ်ပေသည်။

^၁၂ နိုင်ငံတော်မျိုးစေ့ကြဲရာတွင် စာအုပ်စာတမ်းများစွာ ဝေငှထားပေပြီ။ (မ၊ ၁၃:၃-၈၊ ၁၈-၂၃) သို့ဖြစ်၍ပင် ကျမ်းစာနှင့် ကျမ်းစာစာပေများကို လယ်ကွင်း၌ ဆက်ဝေငှရန်မလောက်မငဖြစ်နေသေးသည်။ ပြန်လည်ပတ်မှုနှင့် အိမ်တွင်းကျမ်းစာသင်အံမှုများပြုခြင်းအားဖြင့် မျိုးစေ့ကြဲ၍ရေလောင်းခြင်းလုပ်ငန်းကို အကြီးအကျယ်လုပ်ကိုင်နေကြောင်း ကမ္ဘာ့မှတ်တမ်းကတင်ပြသည်။ ကျွန်ုပ်တို့ဓမ္မအမှု၏ ဤအရေးကြီးကဏ္ဍများတွင် မိမိတာဝန်ကိုဆက်ဆောင်ရွက်ရာတွင် ကြီးထွားစေရန် ယေဟောဝါဆက်ကောင်းချီးပေးသည့်အတွက် ကိုယ်တော်ကိုကျေးဇူးတင်ပါသည်။ ယင်းကောင်းချီးအတွက် ကျွန်ုပ်တို့ဆုတောင်းပါသည်။​—၁ ကော၊ ၃:၆၊ ၇။

အခြားလိုအပ်ချက်များ

^၁၃ ဤလောကနှင့်မသက်ဆိုင်သော်လည်း လောကတွင်ရှိနေသောကြောင့် ခရစ်ယာန်များသည် စမ်းသပ်မှုနှင့် စုံစမ်းခြင်းအမျိုးမျိုးကို ကြုံရကြမည်။ ဤနောက်ဆုံးကာလတွင် ပို၍ပင်ပြင်းထန်ဦးမည်။ ယခုအချို့သူများ ညှဉ်းဆဲခြင်းနှင့် အခြားအခက်အခဲများကို ခံနေရကြသည်။ အခြားသူများမူ စစ်ဆင်နွှဲနေသောနိုင်ငံများတွင် ခရစ်ယာန်လုပ်ငန်းများကို ထမ်းဆောင်နေရကြသည်။ မြေငလျင်၊ လေမုန်တိုင်းအစရှိသည့် သဘာဝဘေးဒဏ်များကို ညီအစ်ကိုများကြုံကြိုက်ခဲ့ကြပြီ။ ဤသို့ဖြစ်ပျက်သည့်အခါ ဤအရပ်ဒေသများရှိညီအစ်ကိုများအတွက် ဆုတောင်းပေးသင့်သည်။ (တ၊ ၁၂:၅။ ၂ ကော၊ ၁:၁၁) တစ်ခါတစ်ရံ ကျွန်ုပ်တို့လုပ်ငန်းနှင့်ပတ်သက်၍ ပိတ်ပင်မှုများ၊ ညီအစ်ကိုများကိုညှဉ်းဆဲနှိပ်စက်ခြင်း၊ သို့မဟုတ် နိုင်ငံတော်မှုရေးကိစ္စများနှင့်သက်ဆိုင်သော အကြောင်းကိစ္စများကို အရာရှိများနှင့်ဆွေးနွေးရန် သွားရောက်ခြင်းနှင့် စာတင်ရန်အရေးအကြောင်းများ ပေါ်တတ်ပါသည်။ ဤကဲ့သို့သောအခြေအနေမျိုးအောက်တွင် ကျွန်ုပ်တို့တတ်နိုင်သမျှကိုပြုလုပ်ပေးမည်။ ကျွန်ုပ်တို့၏အမှုဆောင်ဖက်သားများကို ဤသူများမျက်နှာသာပေးရန် ဆုတောင်းပေးပါမည်။​—၁ တိ၊ ၂:၁၊ ၂။

^၁၄ စာတန်၏စနစ်ဆိုးတွင် မိသားစုများစွာ ဖိစီးမှုအမျိုးမျိုးကြုံတွေ့နေရကြသည်။ (၂ ကော၊ ၄:၄) အိမ်ထောင်သည်များစွာ ကြီးလေးသောပြဿနာများရှိကြ၏။ ဘုရားသခင်၏လမ်းပြမှုရရန် သူတို့ဆုတောင်းကြဖို့ တိုက်တွန်းပေးပါ။ သူတို့အတွက်လည်း ဆုတောင်းပေးနိုင်ပါသည်။ (၁ ကော၊ ၇:၅။ ၁ ပေ၊ ၃:၇) မိမိတို့အိမ်ထောင်များကို ကောင်းစွာဦးစီးနိုင်ရန် လမ်းပြညွှန်ကြားပေးဖို့ အိမ်ထောင်ဦးစီးများ၏ဆုတောင်းချက်များကို ယေဟောဝါနားညောင်းတော်မူမည့်အကြောင်း စိတ်ချနိုင်သည်။ (တရား၊ ၁၃:၈။ ဖိ၊ ၄:၆၊ ၇) လူကြီးလူငယ်အားလုံး ခဲယဉ်းသောအခြေအနေများကို ရင်ဆိုင်ရကြသည်။ ကျောင်းတွင်၊ အလုပ်ခွင်တွင်၊ ခရီးသွားစဉ်၊ သို့မဟုတ်အခြားအခြေအနေများတွင် ဖြစ်နိုင်သည်။ ဤစနစ်ဆိုး၏စိတ်ဓာတ်ကို ငြင်းဆန်နိုင်ရန်၊ ယေဟောဝါမျက်နှာသာရသော အမှုများကိုဆက်ပြုလုပ်ရာတွင် အသီးများသီးနိုင်ရန် ဆုတောင်းခြင်းက များစွာအကူအညီပေးသည်။​—မ၊ ၆:၁၃။ ဧ၊ ၆:၁၃-၁၈။ ၁ ယော၊ ၃:၂၂။

^၁၅ ယေဟောဝါသည် ဆုတောင်းချက်များကို နားညောင်းတော်မူသောအရှင်သခင်ဖြစ်သည်။ (ဆာ၊ ၆၅:၂) အချိန်အခါမရွေး မိမိတို့၏ပူပန်မှုများကို ကိုယ်တော်အား ရင်ဖွင့်ပြောဆိုသင့်သည်။ (ဆာ၊ ၅၅:၂၂) နိုင်ငံတော်ရေးရာများ၊ ကမ္ဘာအနှံ့ရှိ ကျွန်ုပ်တို့ညီအစ်ကိုများအကျိုးအလိုငှာ စိုးရိမ်ပူပန်ပေးကြောင်း ဆုတောင်းပေးခြင်းဖြင့် တင်ပြနိုင်သည်။ အသင်းတော်တွင် ဦးစီးနေသူများ၏လုပ်ငန်း၊ ကမ္ဘာတစ်ဝှန်း တိုးတက်ရေးအစီအစဉ်ကိုညွှန်ကြားပေးနေသူများ၊ ဝိညာဉ်ရေးအရ အားနည်းနေသူများ၊ အခြားပြဿနာကြီးကြီးငယ်ငယ်များကို ကိုင်တွယ်သောအခါ ဤကိစ္စအသီးသီးကို ဆုတောင်းခြင်းအားဖြင့် ယေဟောဝါအားတင်ပြသင့်သည်။ (၁ သက်၊ ၅:၂၅။ ယာ၊ ၅:၁၄-၁၆) ယေဟောဝါရှေ့ ကျွန်ုပ်တို့၏စိုးရိမ်ပူပန်မှုများကို ပုံချထားပြီး အလိုတော်နှင့်အညီတောင်းလေသမျှဆုကို ကိုယ်တော်နားညောင်းတော်မူမည်အကြောင်း ကျွန်ုပ်တို့စိတ်ချသင့်သည်။ (၁ ပေ၊ ၅:၇။ ၁ ယော၊ ၅:၁၄) နိုင်ငံတော်လုပ်ငန်းတွင် ကျွန်ုပ်တို့ဇွဲရှိပြီး ခံနိုင်ရည်ဖြင့် မြဲမြံစွာအသီးသီးနိုင်ရန် ယေဟောဝါထံတော်မှကူညီမစမှုကို ဆက်မျှော်ကိုးကြစို့။