ခိုင်မြဲသောအုတ်မြစ်ပေါ် တည်ဆောက်ကြရန် သိုးကဲ့သို့သောသူများအား ကူညီပေး

^၁ အိမ်တစ်လုံးဆောက်ခြင်းငှာ အသေအချာစီမံကွပ်ကဲပြီး အချိန်ပေးလုပ်ကိုင်ရန်လိုသည်။ အိမ်ပုံစံဆွဲပြီးနောက် အကွက်ကို အသင့်ပြင်ဆင်ကာ အုတ်မြစ်ကောင်းကောင်းချရမည်။ ဤလုပ်ငန်းသည် တဖြည်းဖြည်း ပုံပေါ်လာ၍ နောက်ဆုံးပြီးဆုံးသွားပါမည်။ ထိုနည်းတူ သိုးကဲ့သို့သောသူများအား သမ္မာတရားကို တဖြည်းဖြည်း သိလာစေရမည်။ ပထမလည်ပတ်ချိန်တွင်ပင် စိတ်ဝင်စားမှုနှိုးဆွပေးရန် ကျွန်ုပ်တို့ကြိုးစားကြမည်။ ထိုနောက် ပြန်လည်ပတ်မှုများပြုလုပ်မည်။ ဤနည်းဖြင့် ဘုရားသခင်နှင့်ဆိုင်သောအခြေခံသမ္မာတရားနှင့် လူသားအတွက် ကိုယ်တော်၏ရည်ရွယ်ချက်ကို သွန်သင်ပေးရန် အုတ်မြစ်ချပါသည်။​—လု၊ ၆:၄၈။

^၂ သို့သော် အုတ်မြစ်မချမီ အိမ်ရှင်၏အခြေအနေကို ထည့်သုံးသပ်ကာ မြေကွက်ကို ပြင်ဆင်ဘိသကဲ့သို့ ပြုလုပ်စရာလိုပါသည်။ ယခင်က အဘယ်ကြောင်း ဆွေးနွေးထားသနည်း။ အဘယ်ကျမ်းချက်များကို အသုံးပြုထားသနည်း။ တုံ့ပြန်ပုံကား အဘယ်နည်း။ အဘယ်စာအုပ်ကို ဝေငှထားသနည်း။ ပြန်လည်ပတ်သွားသည့်အခါ အချက်အလက်အတိအကျကို စွဲမှတ်ထား၍ အုတ်မြစ်ကို တဖြည်းဖြည်း တည်ဆောက်ပေးပါ။ ပြန်လည်ပတ်သွားသည့်အခါတိုင်း အိမ်ရှင်၏အသိပညာ တိုးများလာ၍ ဘုရားကိုယုံကြည်အားထားမှု တိုးပွားလာပါမည်။

^၃ “ထာဝစဉ်အသက်ရှင်” စာအုပ်ကို ဝေငှထားခဲ့လျှင် သင်ပြောနိုင်မည်ကား:

▪ “အိမ်မှာတွေ့ရတာ ဝမ်းသာလိုက်တာ။ နောက်ဆုံးအခေါက်က ဘုရားကို လူတို့စိတ်ဝင်စားမှု လျော့နည်းသွားကြတဲ့အကြောင်း ဆွေးနွေးခဲ့တာ သတိရမယ်။ ဘုရားဟာ လူတို့ကိုစိတ်ဝင်စားတယ်လို့ ကျမ်းစာက အတိအလင်းဖော်ပြထားတယ်။ နိုင်ငံတော်အားဖြင့် ဖြောင့်မတ်တဲ့လူတွေ ကောင်းချီးရမယ်လို့လည်း ပြောထားတယ်။ [မဿဲ ၆:၉၊ ၁၀ ဖတ်။] ဒီနိုင်ငံတော်အားဖြင့် ဖြောင့်မတ်ခြင်းတရားနဲ့ တရားမျှတမှု ရှိလာလိမ့်မယ်။” ဟေရှာယ ၁၁:၃-၅ ကိုဖတ်ပြီး ထာဝစဉ်အသက်ရှင်စာအုပ်၏ အခန်း ၁ ပထမဆုံးအပိုဒ်နှစ်ပိုဒ်ကို အိမ်ရှင်အား အာရုံပြုစေပါ။ ယင်းအကြောင်းကို မည်သို့လေ့လာနိုင်ကြောင်း သရုပ်ပြပါ။

^၄ ကမ္ဘာသစ်တွင်ငြိမ်းချမ်းသောအသက်တာဝေစာကို ပထမအကြိမ်တွင် ဝေငှထားခဲ့လျှင် ယခင်ကဆွေးနွေးခဲ့သည့် သာ၍ကောင်းသောအခြေအနေများလိုအပ်ခြင်းနှင့် ကျမ်းစာ၏ကတိပြုချက်များအကြောင်းကို ပြန်သုံးသပ်နိုင်မည်။ ကမ္ဘာသစ်တွင်အသက်ရှင်နိုင်ရန် စစ်မှန်သောအသိပညာဆည်းပူးရန်လိုကြောင်းကို အလေးအနက်ပေါ်လွင်စေပါ။ ယောဟန် ၁၇:၃ ကိုဖတ်။ ဤအသိပညာကိုဆည်းပူးပြီးနောက် ဘုရားသခင့်အလိုတော်ကိုဆောင်ရွက်ရမည်အကြောင်း ရှင်းပြပါ။ ၁ ယောဟန် ၂:၁၇ ကိုဖတ်။ ဝေစာ၏ စာမျက်နှာ ၅ ပါအချက်အလက်အချို့ကို အိမ်ရှင်အား သတိပြုစေပါ။

^၅ ပထမအချိန်က “ထာဝစဉ်အသက်ရှင်” စာအုပ်ကို ဝေငှစဉ် မိသားစုဘဝအကြောင်း အထူးဆွေးနွေးခဲ့လျှင် သင်ပြောနိုင်မည်ကား:

▪ “နောက်ဆုံးအခေါက်က မိသားစုဘဝအကြောင်း ဆွေးနွေးခဲ့တယ်။ သာယာတဲ့အိမ်ထောင်ဖြစ်ရအောင် ကျမ်းစာမှာပါတဲ့ လမ်းညွှန်ချက်များကို လိုက်နာရမယ်လို့ သဘောတူခဲ့တယ်မဟုတ်လား။ အိမ်ထောင်ရေးအောင်မြင်ဖို့ ဘာလိုမယ်ထင်သလဲ။” ဖြေဆိုပါစေ။ ထာဝစဉ်အသက်ရှင်စာအုပ် စာမျက်နှာ ၂၄၃-၆ ပါအချက်အလက်အချို့ကို ပေါ်လွင်စေပါ။ ရုပ်ပုံများကို အိမ်ရှင်မည်သို့ယူမှတ်ကြောင်းနှင့် သင့်တော်သရွေ့ အချက်အလက်အချို့ကို ရွေးချယ်ဖော်ပြပါ။ ကျမ်းစာမူ၏ လက်တွေ့ကျတန်ဖိုးကို အလေးအနက်ဖော်ပြပါ။

^၆ မိသားစုဘဝကို မွေ့လျော်ခြင်းဝေစာကို ထားခဲ့လျှင် စာမျက်နှာ ၄ နှင့် ၅ ပါအဓိကကျမ်းစာမူများကို ပြန်သုံးသပ်ပါ။ စိတ်ဝင်စားမှုရှိလျှင် ထာဝစဉ်အသက်ရှင်စာအုပ်ရှိပါက ဝေငှလိုက်ပါ။ အခန်း ၂၉ “မိသားစုဘဝကို အောင်မြင်စေခြင်း” ကိုညွှန်ပြကာ မိသားစုနှင့် ယင်းကိုမည်သို့သုံးသပ်နိုင်ကြောင်း တင်ပြပါ။

^၇ ပြန်လည်ပတ်မှုကို ကျွန်ုပ်တို့အားလုံး မှန်မှန်ပြုလုပ်ပါဝင်သင့်သည်။ စက်တင်ဘာလအတွင်း စိတ်ဝင်စားသူများထံ ပြန်လည်ပတ်မှုများကို ထိရောက်စွာပြုလုပ်ပါ။