ဘုရားသခင့်သားတော် ယေရှုခရစ်အကြောင်းသိရှိလာရန် သူတစ်ပါးကို ကူညီလေ

^၁ ဒီဇင်ဘာလတွင် အမည်ခံခရစ်ယာန်များသည် အခြားအချိန်များထက် ယေရှုကို ပိုမိုအရေးပေးတတ်ကြသည်။ ယင်းကြောင့် ဤလတွင် အသက်ရှင်ခဲ့သမျှတွင် အကြီးမြတ်ဆုံးလူသားစာအုပ်ကို တင်ပြကြရန် အလွန်ကောင်းပေသည်။ ဤစာပေသည် တန်ဖိုးရှိသောအရာတစ်ခုဖြစ်သောကြောင့် ဘုရားသခင့်သားတော်အကြောင်း ပိုမိုသင်ယူခြင်းဖြင့်စိတ်ဝင်စားမှုရှိလာရန် အိမ်ရှင်အား တိုက်တွန်းအားပေးသင့်ပြီး ယင်းစာအုပ်ကို အားတက်သရော ဝေငှကြမည်။ ယင်းကိုမည်သို့ ပြုလုပ်နိုင်မည်နည်း။

^၂ ယေရှုကိုအာရုံပြုသည့် ကျမ်းစာအခြေခံစကားများဖြင့် ပြောဆိုရန်ကြိုးစားပေမည်။

အိမ်ရှင်ကိုနှုတ်ဆက်ပြီးနောက် ဤသို့ပြောဆိုပေမည်–

▪ “ထာဝစဉ်အသက်ရှင်ခြင်းအကြောင်းကို ကျမ်းစာထဲမှာ ဖတ်ရတဲ့အခါ ဘယ်လိုထင်မှတ်ကြသည့်အကြောင်း ဒီကနေ့ ကျွန်တော်တို့ အိမ်နီးနားချင်းတွေနဲ့ ဆွေးနွေးနေကြပါတယ်။ [တုံ့ပြန်ပါစေ။] အဲ့ဒီလိုဖြစ်နိုင်တဲ့အကြောင်းကို အကြိမ်ပေါင်း ၄၀ လောက် ကျမ်းစာကဖော်ပြထားတဲ့အတွက် အထူးစိတ်ဝင်စားစရာဖြစ်တယ်။ အဲ့ဒီအသက်တာမျိုးဟာ ကျွန်တော်တို့အတွက် ဘယ်လိုအဓိပ္ပာယ်ရှိမလဲ။ ဗျာဒိတ် ၂၁:၄ ကဘာပြောတယ်ဆိုတာကို သတိပြုပါ။ [ဖတ်။] ဘာကိုကတိပေးထားတယ်ဆိုတာ သတိပြုမိသလား။ [တုံ့ပြန်ပါစေ။] ထာဝရအသက် ဘယ်လိုရနိုင်မလဲ။” ယောဟန် ၁၇:၃ ကိုဖတ်ပြီးနောက် ဘုရားသခင်နှင့် ကိုယ်တော့်သားတော် ယေရှုခရစ်နှင့်ပတ်သက်သော အသိပညာကို ဆည်းပူးရန်လိုကြောင်း ပေါ်လွင်စေပါ။ သူ့အား အကြီးမြတ်ဆုံးလူသားစာအုပ်ကိုပြ၍ သူ၏စိတ်ဝင်စားမှုကို နှိုးဆွပေးရန် နိဒါန်းတွင်ပါသော ခေါင်းစဉ်ငယ်များကို အသုံးပြုပါ။

^၃ စာအုပ်ကို အိမ်ရှင်လက်မခံလျှင် နောက်ဆုံးထုတ် ကင်းမျှော်စင်နှင့်နိုးလော့!မဂ္ဂဇင်းများ၊ သို့မဟုတ် ဤလောက ဆက်လက်တည်ရှိမည်လောဝေစာကို ဝေငှပါ။ တင်ဆက်သည့်စာပေ၌ပါသော အချက်တစ်ချက်နှစ်ချက်ကို သတိပြုစေပါ။ ယင်းအကြောင်းကို သူနှင့်ဆက်ဆွေးနွေးရန် အဆင်ပြေသည့်အချိန်တွင် ပြန်လာလိုကြောင်း စကားကမ်းလှမ်းပါ။

^၄ အိမ်ရှင်သည် အလုပ်များနေပုံရှိမည်ဆိုလျှင် အထက်ပါတင်ဆက်နည်းကို အကျဉ်းချုပ်လျှင် ကောင်းပေမည်။ ကြေညာသူလူသစ်များသည် အောက်ပါတင်ဆက်ပုံကိုအသုံးပြုရန် လွယ်ကူကြောင်း တွေ့ရှိပေမည်။

မိမိကိုယ်ကို မိတ်ဆက်ပြီးနောက် ဤသို့ပြောဆိုနိုင်မည်–

▪ “ထာဝစဉ်အသက်ရှင်ခြင်းအကြောင်းကို ကျမ်းစာထဲမှာ ဖတ်ရတဲ့အခါ ဘယ်လိုထင်မှတ်ကြတဲ့အကြောင်း ဒီကနေ့ ကျွန်တော်တို့ အိမ်နီးနားချင်းတွေနဲ့ ဆွေးနွေးနေကြပါတယ်။ ဥပမာ ယောဟန် ၁၇:၃ မှာယေရှုက ဒီလိုဆိုတယ်။ [ဖတ်။] ယေရှုခရစ်အကြောင်းနဲ့ ကိုယ်တော်ရဲ့သွန်သင်ချက်တွေကို လူတွေပိုသိလာဖို့ ဒီစာအုပ်ကို ပုံနှိပ်ထုတ်ဝေထားတယ်။” လှပသောရုပ်ပုံအချို့ကိုဖွင့်ပြပါ။ နိဒါန်းသို့လှန်၍ “ကိုယ်တော့်အကြောင်းလေ့လာ၍ အကျိုးရယူ” ခေါင်းစဉ်ငယ်အောက်ရှိ ဒုတိယအပိုဒ်ကို ဖတ်ပြပါ။ စာအုပ်ကို သူ့အား ဝေငှလိုက်ပါ။

^၅ စာအုပ်ယူသည်ဆိုလျှင် ကျမ်းစာသင်အံမှုအတွက် လမ်းခင်းပေးသည့်အနေနှင့် ထိုအချိန်တွင်သော်လည်းကောင်း၊ ရက်အနည်းငယ်အကြာ ပြန်လည်ပတ်သည့်အခါတွင်သော်လည်းကောင်း “ကောင်းကင်မှသတင်းများ” ပထမအခန်းကို ဆွေးနွေးလိုကြောင်း ကမ်းလှမ်းပါ။ နောက်တစ်ကြိမ်လည်ပတ်လာသည့်အခါ မိနစ်အနည်းငယ်အတွင်း ဘုရားသခင့်နှုတ်ကပါဌ်တော်၊ သမ္မာကျမ်းစာမှ ယေရှုခရစ်အကြောင်း စိတ်ဝင်စားစရာများ သိရှိလာလိမ့်မည်အကြောင်း အိမ်ရှင်အား ပြောဆိုပါ။

^၆ ဤလောကအားလပ်ရာသီအတွင်း ဘုရားသခင့်သားတော် ယေရှုခရစ်အကြောင်း အာရုံပြုစေကြပြီး သူတစ်ပါးအား ထာဝရအသက်လမ်းပေါ် လျှောက်လှမ်းစေရန် ကူညီပေးကြစို့။​—မ. ၇:၁၄။