တိမ်းယိမ်းမှုကင်းလျက် လူသူရှေ့သင့်မျှော်လင့်ချက် ကြေညာခြင်းကိုခိုင်မြဲစွာစွဲကိုင်လော့

^၁ ယနေ့ ဘုရားသခင့်လူများအား “အချိန်တန် (ဝိညာဏ) အစာ” ကျွေးမွေးသည့် အဓိကနည်းမှာ ကင်းမျှော်စင်သင်တန်းအားဖြင့် ဖြစ်သည်။ (မ. ၂၄:၄၅) ဤအရေးကြီးသော အစည်းအဝေးကို အဓိကရည်ရွယ်ချက်နှစ်ခုဖြစ်သည့်—ဝိညာဉ်ရေးဘက် တည်ဆောက်မှုခံရရန်နှင့် သူတစ်ပါးအား ကျွန်ုပ်တို့၏မျှော်လင့်ခြင်းကိုလူသူရှေ့ကြေညာရန် တက်ရောက်ကြခြင်းဖြစ်သည်။—ဟေ. ၁၀:၂၃-၂၅။

^၂ ကိုယ့်ကိုယ်ကို အကျိုးသက်ရောက်စေခြင်း– အသင်းတော်အများစုတွင် ပရိသတ်သုံးပုံတစ်ပုံသာ သင်တန်း၌လေ့လာမည့်အကြောင်းကို ကြိုတင်လေ့လာထားကြောင်း ခန့်မှန်းသိရှိရသည်။ အဖြေပေးသူအရေအတွက်လည်း အလားတူပင်ဖြစ်သည်။ ကင်းမျှော်စင်ပါ ကြေခဲသော ဝိညာဏအစာကို စည်းဝေးအတောအတွင်း ကြေကြေညက်ညက် မစားသုံးနိုင်ပါ။ သင်တန်းအတွက် ကြိုတင်လေ့လာထားဖို့ အချိန်ပေးရန် လိုပါသည်။

^၃ သင်တန်းအတွက် ပြင်ဆင်သည့်အခါ ဆောင်းပါး၏အဆုံးပါ အကွက်ရှိ မေးခွန်းများကို ဦးဆုံးဖတ်ရှုစဉ်းစားလျှင် အကူအညီရပေမည်။ ယင်းမေးခွန်းများအားဖြင့် သင်တန်းအတွင်း သုံးသပ်မည့်အဓိကအချက်များကို အာရုံပြုနိုင်ရန် အကူအညီရလိမ့်မည်။

^၄ သင်တန်းအတွင်း ပြောဆိုသည့်အရာကို ဂရုစိုက်နားထောင်ပါ။ သင်တန်းကိုင်သူ၏ နိဒါန်းစကားများကို ဂရုစိုက်နားထောင်ပါ။ ဤစကားများသည် သင်တန်းဇာတ်ကြောင်းကို ခင်းကျင်းတင်ပြပါသည်။ ဖြေဆိုကြမည့် မေးခွန်းသုံးလေးခုကို သူမေးကောင်းမေးမည်။ သို့မဟုတ် ဤအပတ်သင်တန်းသည် လွန်ခဲ့သောအပတ်သင်တန်း၏ အဆက်ဖြစ်မည်ဆိုလျှင် ယင်းမှ ပေါ်လွင်ချက်အချို့ကို ပြန်တင်ပြကောင်းတင်ပြပေလိမ့်မည်။ ကျမ်းစာပရောဖက်ပြုချက်၊ သို့မဟုတ် ကျမ်းဆိုင်ရာမူတစ်ခုနှင့်စပ်လျဉ်း၍ သဘောပေါက်နားလည်ထားမှု ပြုပြင်ချက်ရှိမည်ဆိုလျှင် ယင်းကို သူသတိပြုစေပါလိမ့်မည်။ သင်တန်းကျင်းပရခြင်း ရည်ရွယ်ချက်တစ်ခုကား အသင်းတော်အား ယင်း၏မျှော်လင့်ခြင်းကို ဖော်ပြပြောဆိုခွင့်ပေးရန်ဖြစ်သောကြောင့် သင်တန်းကိုင်သူသည် လိုရင်းတိုရှင်း ပြောဆိုပါလိမ့်မည်။ အခြားသူများ နားလည်သည့်အတိုင်း ဖြေဆိုသည့်စကားများကို ဂရုစိုက်နားထောင်ပါ; ယင်းက သင့်ယုံကြည်ခြင်းကို အကူအညီပေးနိုင်ပါသည်။

^၅ သင့်မျှော်လင့်ချက်ကို ကြေညာ– သင်တန်းအတွင်း အဖြေပေးလေ့ရှိပါသလော။ လိုရင်းတိုရှင်းအဖြေများကား ပိုကောင်းပါသည်။ (လုကာ ၂၁:၁-၄ နှိုင်းယှဉ်။) နှလုံးမှ ရိုးရိုးကလေးဖြေဆိုခြင်းကို လူတိုင်းတန်ဖိုးထားသည်။ အများအားဖြင့်ဆိုလျှင် မေးခွန်းတစ်ခုအတွက် ပထမအဖြေသည် လိုရင်းတိုရှင်းဖြစ်သင့်သည်။ ယင်းသို့ပြုခြင်းအားဖြင့် အပိုဒ်ပါ ကျမ်းချက်တစ်ချက်၊ သို့မဟုတ် အသေးစိတ်ဖော်ပြချက်တစ်ချက်ကို အခြားသူများလည်း တင်ပြနိုင်ခွင့်ရရှိစေသည်။ ဤနည်းဖြင့် များစွာသောသူတို့အား သူတို့၏မျှော်လင့်ချက်ကို လူသူရှေ့ကြေညာခွင့်ရစေနိုင်သည်။ အဖြေများသည် အစဉ်အမြဲ အပြုသဘောနှင့် တည်ဆောက်မှုပေးခြင်းဖြစ်သင့်သည်။

^၆ သင်တန်းကို စတက်ခါစဖြစ်လျှင်၊ သို့မဟုတ် ဖြေဆိုရန် မဝံ့မရဲဖြစ်နေလျှင် သင်တန်းကိုင်သူအား အကူအညီတောင်းဆိုနိုင်ပါသည်။ သင်ဖြေဆိုလိုသည့်အပိုဒ်ရောက်သည့်အခါ သင့်လက်ကို ဂရုပြုရန် သူ့အား ပြောထားပါ။ ကိုးကားထားသည့် ကျမ်းချက်တစ်ချက်ကို စေတနာ့ဝန်ထမ်းဖတ်ပြပြီး ယင်း၏အဓိပ္ပာယ်ကို လိုရင်းတိုရှင်းတင်ပြနိုင်ပါသည်။ အဖြေပေးသည့်အခါ သင်ပြောဆိုလိုသည့်စကားများကို မှတ်မိနိုင်ဖို့ မှတ်ချက်အနည်းငယ် ရေးမှတ်ထားလိုပေမည်။ သင်သည် ကလေးဖြစ်သည့်တိုင် သင့်အဖြေများကို တန်ဖိုးထားကြကြောင်း သိမှတ်ပါ။—မ. ၂၁:၁၆။

^၇ မိမိယုံကြည်ခြင်းကို ဖော်ပြရန် အရေးကြီးပြီး ကင်းမျှော်စင်သင်တန်းတွင် ယင်းသို့ပြုရန် အခွင့်ကောင်းရရှိပါသည်။ အဖြေပေးရန် တွန့်ဆုတ်နေလျှင် ယင်းပြဿနာကို ကျော်လွှားနိုင်ရန် အနည်းဆုံးတစ်ခါ ဖြေပါ။ သို့ပြုခြင်းဖြင့် စည်းဝေးတွင် သင်ပါဝင်လိုက်ရသည့်အတွက် ပျော်ရွှင်လိမ့်မည်။ ယင်းကြောင့် နောက်အပတ် ကင်းမျှော်စင်သင်တန်းတွင် အနည်းဆုံး အဖြေတစ်ခုပေးဖြစ်ရန် ကြံစည်ထားပါ။—သု. ၁၅:၂၃။