အသက်ရစေသောအသိပညာကိုရရှိရန် အခြားသူများကိုကူညီပေးခြင်း

^၁ ‘လူအမျိုးမျိုးတို့သည် သမ္မာတရား၏ တိကျမှန်ကန်သောအသိပညာကိုရရှိရန် ဘုရားသခင်အလိုတော်ရှိ၏’ ဟုတမန်တော်ပေါလုက ရှင်းပြပါသည်။ (၁ တိ. ၂:၄) အခြားသူများသည် ထိုအသိပညာကိုဆည်းပူးနိုင်ရန် ကျွန်ုပ်တို့မည်သို့ကူညီပေးနိုင်မည်နည်း။ တစ်နည်းမှာ အသင်းမစာပေများကြောင့် စိတ်ဝင်စားလာသူများထံ ပြန်လည်ပတ်မှုများပြုလုပ်ခြင်းအားဖြင့်ဖြစ်သည်။ ဤစာပေများက ကျမ်းစာသမ္မာတရားကို ရိုးရှင်းလွယ်ကူစွာ တင်ပြထားသည်။ ယင်းတို့ကိုလေ့လာခြင်းအားဖြင့် လူအမျိုးမျိုးတို့သည် အသက်ရရှိနိုင်သည်။ ကျွန်ုပ်တို့နှင့်အတူ ကျမ်းစာကိုလေ့လာလိုစိတ်ရှိစေရန် ကျွန်ုပ်တို့ မည်သို့ပြောဆိုနိုင်မည်နည်း။

^၂ လက်တွေ့ကျသောလမ်းညွှန်မှုအဖြစ် သမ္မာကျမ်းစာ၌စိတ်ဝင်စားမှုပြသူတို့ထံ သင်ပြန်သွားပြီး ဤသို့ပြောဆိုကာ သင်အံမှုကမ်းလှမ်းနိုင်ပေမည်–

▪ “အရင်တစ်ခေါက်က သမ္မာကျမ်းစာဟာ လက်တွေ့ကျတဲ့ လမ်းညွှန်မှုဖြစ်တယ်ဆိုတာကို ဘာကြောင့်ယုံကြည်စိတ်ချနိုင်တဲ့အကြောင်း ဆွေးနွေးခဲ့တယ်။ ဘုရားသခင်မှုတ်သွင်းတဲ့စာအုပ်ဖြစ်တဲ့အတွက် ကျမ်းစာဟာ နှစ်သိမ့်မှုနဲ့မျှော်လင့်ချက်ပေးတဲ့စာအုပ်ဖြစ်တယ်ဆိုတာကို ခရစ်တော်ရဲ့တမန်တော်တစ်ပါးကလည်း ဒီလိုပြောတယ်။ [ရောမ ၁၅:၄ ဖတ်။] နောက်ဆုံးတစ်ခေါက်က မပြန်ခင်မှာ သမ္မာကျမ်းစာထဲမှာရှိတဲ့ အသိပညာကနေ မိမိကိုယ်တိုင် ဘယ်လိုအကျိုးရနိုင်မလဲလို့ မေးခွန်းထုတ်ခဲ့တယ်။” မိသားစုဘဝ စာအုပ် စာမျက်နှာ ၁၈၈ အပိုဒ် ၁၆-၁၈ ကိုဖတ်ပါ။ ယေဟောဝါသက်သေများသည် ကမ္ဘာတစ်ဝန်း ကျမ်းစာသင်တန်း ငါးသန်းခန့် ကျင်းပနေပြီး ထာဝရအသက်ရစေသည့် အသိပညာကို လူတို့အားဆည်းပူးကြရန် နေရာတိုင်းတွင် ကူညီပေးနေကြောင်း ညွှန်ပြပါ။ သင်တန်းကို မည်သို့ကျင်းပကြောင်း တိုတိုတုတ်တုတ်သရုပ်ပြရန် အခန်း ၁ ၏ ပထမငါးပိုဒ်ကို အသုံးပြုပါ။

^၃ ပထမအကြိမ်တွင် မိသားစုဆက်ဆံရေးအကြောင်း သင်ဆွေးနွေးခဲ့မည်ဆိုလျှင် သင်အံမှုစတင်ရန် ဤနည်းကို အသုံးပြုလိုပေမည်–

▪ “သင့်မိသားစုဘဝကိုရွှင်လန်းစေခြင်းစာအုပ်ထဲကနေ ကလေးတွေကို ကျမ်းစာသင်ပေးတဲ့အကြောင်း ဆွေးနွေးခဲ့တာကို သဘောကျမယ်လို့ မျှော်လင့်တယ်။ မိသားစုဆက်ဆံရေးကို ဘယ်လိုတိုးတက်စေနိုင်မယ့်အကြောင်း ပြန်လာဆွေးနွေးမယ်လို့ ကတိပေးခဲ့တယ်နော်။ ဒီစာအုပ် စာမျက်နှာ ၁၂၀ မှာ ပြောထားတာကိုသတိပြုပါ။ [အပိုဒ် ၁၃ ဖတ်။] ကျမ်းစာကို အတူတူလေ့လာကြည့်ရအောင်လား။” ထိုသူသည် ဆန္ဒရှိမည်ဆိုလျှင် စာအုပ်၏ပထမအခန်းကို စဖတ်ပါ။

^၄ သင်အံမှုစရန် တိုက်ရိုက်နည်းကို သင်အသုံးပြုခဲ့မည်ဆိုလျှင် ပထမအကြိမ်တွေ့ဆုံပြီးနောက်ပိုင်း ပြန်သွားချိန်တွင် ဤသို့ပြောဆိုလိုပေမည်–

▪ “အခမဲ့ကျမ်းစာသင်အံမှုအစီအစဉ်အကြောင်း ပြောပြချင်လို့ အထူးကြိုးစားပြီး ပြန်လာခဲ့တာ။ အရင်တစ်ခေါက်က ဒီစာအုပ် (စာအုပ်နာမည်ကိုဖော်ပြ) တစ်အုပ် ထားခဲ့တယ်။ အဲ့ဒီစာအုပ်နဲ့ သင်အံမှုလုပ်ကြပါတယ်။ အဲ့ဒီထဲမှာ ဘုရားသခင်ရဲ့ နှုတ်ကပါဌ်တော်ကိုလေ့လာဖို့ ဘယ်လိုအားပေးထားတယ်ဆိုတာကို သတိပြုပါ။ ယူထားတဲ့စာအုပ်ကို ကျေးဇူးပြုပြီးယူလာပါလား။ အရင်တစ်ခေါက်က ရပ်ထားတဲ့နေရာကနေ ဆက်လေ့လာကြည့်ရအောင်။” ပထမအကြိမ်တွင် သင်အံမှုမစခဲ့ပါက ဤသို့ပြောနိုင်သည်– “ကျမ်းစာကို ဘယ်လိုလေ့လာတယ်ဆိုတာကို အခုတင်ပြချင်ပါတယ်။” အပိုဒ်အနည်းငယ်ကို သုံးသပ်ပြီးနောက်သင်အံမှုအတွက် နောက်တစ်ကြိမ်ပြန်လာရန် အသေအချာစီစဉ်ပါ။

^၅ အသင်းမစာပေများကို ထိထိရောက်ရောက်အသုံးပြုခြင်းအားဖြင့် အခြားသူများအကျိုးဖြစ်ထွန်းရန် တိကျမှန်ကန်သောအသိပညာကို ဟောပြောနိုင်ပေမည်။ (သု. ၁၅:၇) ယင်းအသိပညာသည် စိတ်နှလုံးကောင်းသူများအတွက် ဝမ်းသာစရာဖြစ်လိမ့်မည်။ ထို့ ပြင် ယေဟောဝါ၏ဖြောင့်မတ်ခြင်းတရားနှင့်အညီ အသက်ရှင်နေထိုင်ကြရန် စွမ်းအားရှိသောလှုံ့ဆော်မှုဖြစ်စေပြီး နောက်ဆုံး ထာဝရအသက်ရစေပါလိမ့်မည်။