လူငယ်တို့—သင်တို့၏ကျောင်းပညာဆည်းပူးခြင်းမှ အကျိုးရယူပါ

^၁ နွေရာသီအားလပ်ချိန်ကုန်ဆုံးပြီးနောက် ကျောင်းပြန်တက်ရသည်ကို သင်မည်သို့ခံစားရသနည်း။ ကျောင်းပညာဆည်းပူးသည့်နှစ်တစ်နှစ်မှ သင် အကျိုးခံစားလိုစိတ်ပြင်းပြသလော။ အတန်းဖော်များနှင့် ဆရာဆရာမများအား သမ္မာတရားဝေမျှရန် ကျောင်းမှရရှိသောအခွင့်အရေးများကို သင်အသုံးချမည်လော။ ကျောင်းတွင် သင်အတတ်နိုင်ဆုံးလုပ်ဆောင်လိုမည်ဟု ကျွန်ုပ်တို့ယုံကြည်ပါသည်။

^၂ ကျောင်းသားကောင်းတစ်ယောက်ဖြစ်ပါ– သင်သည် ကျောင်းတက်သောအခါ ကောင်းစွာပြင်ဆင်ပြီး အသေအချာအာရုံစိုက်မည်ဆိုလျှင် တည်မြဲသောအကျိုးများကို ခံစားရမည်ဖြစ်သည်။ ပေးထားသည့်အိမ်စာများကို ဝီရိယရှိရှိလုပ်ပါ၊ သို့သော် သင့်ကျောင်းစာက သီအိုကရက်တစ်လုပ်ဆောင်မှုများကို ပျက်ကွက်ရန် ခွင့်မပြုပါနှင့်။—ဖိ. ၁:၁၀၊ ၁၁။

^၃ ယေဟောဝါသက်သေများနှင့်ပညာရေး (အင်္ဂလိပ်လိုသာရနိုင်) ဘရိုရှာကိုဖတ်ခြင်းဖြင့် ပညာသင်နှစ်သစ်ကို အစပြုပါ။ ထို့နောက် သင် သို့မဟုတ် သင်၏မိဘတို့သည် သင့်ဆရာဆရာမများအား တစ်အုပ်စီပေးသင့်သည်။ သူတို့တွင် မေးစရာမေးခွန်းရှိက ဖြေကြားပေးမည်ဖြစ်ကြောင်း သူတို့အားသိရှိစေပါ။ ယင်းက သူတို့အား သင်၏ကျင့်ဝတ်မူများနှင့် ယုံကြည်ချက်များကို ပို၍သဘောပေါက်စေပြီး သွန်သင်ခံရသည့်အရာနှင့်အညီ သင်လက်တွေ့ကျင့်သုံးစဉ် သင်နှင့်အတူပူးပေါင်းလုပ်ဆောင်ရန် ကူညီပေးမည်ဖြစ်သည်။ ယင်းက အဖိုးတန်ပညာရေးကိုရရှိဖို့ သင့်အား သူတို့ကူညီပေးစဉ် သင်နှင့် သင့်မိဘတို့သည် သူတို့နှင့်ပူးပေါင်းလုပ်ဆောင်လိုကြောင်းကိုလည်း သင်၏ဆရာဆရာမများအား စိတ်ချစေမည်ဖြစ်သည်။

^၄ သက်သေခံကောင်းတစ်ယောက်ဖြစ်ပါ– ကျောင်းကို အလွတ်သဘောသက်သေခံရန် သင်၏ကိုယ်ပိုင်ရပ်ကွက်အဖြစ် ရှုမြင်ပါလေ။ သင်သည် လာမည့်ပညာသင်နှစ်အတွင်း သက်သေခံရန်အခွင့်ထူးများကို ရရှိမည်ဖြစ်၏။ သင်သည် အံ့ချီးဖွယ်ဝိညာဏအသိပညာကို ပိုင်ဆိုင်ထားရာ ယင်းကို မျှဝေသည့်အခါ “ကိုယ်ကိုလည်းကောင်း၊ နားထောင်သောသူတို့ကိုလည်းကောင်း ကယ်တင်” နိုင်ပါသည်။ (၁ တိ. ၄:၁၆) စံထားအပ်သောခရစ်ယာန်အကျင့်အကြံကို ထိန်းသိမ်းထားပြီး သင့်လျော်သည့်အခါတိုင်း သက်သေခံခြင်းအားဖြင့် သင်ကိုယ်တိုင်ကောအခြားသူပါ အကျိုးခံစားရမည်ဖြစ်သည်။

^၅ ညီအကိုငယ်တစ်ဦးသည် သူ၏ကျောင်းတွင် ကျောင်းနေဖက်များအား အလွတ်သဘောသက်သေခံခဲ့သည်။ လိုလိုလားလားတုံ့ ပြန်သူများထဲတွင် ကက်သလစ်တစ်ဦး၊ ဘုရားကိုယုံကြည်သူတို့အား ကဲ့ရဲ့ပြောင်လှောင်လေ့ရှိသည့် ဘုရားမဲ့ဝါဒီတစ်ဦးနှင့် အဆက်မပြတ်ဆေးလိပ်သောက်ပြီး အရက်ကိုလွန်ကျွံစွာသောက်သုံးသူလူငယ်တစ်ဦးတို့ပါဝင်သည်။ ဤညီအကိုငယ်သည် သက်တူရွယ်တူစုစုပေါင်း ၁၅ ဦးအား ဆက်ကပ်အပ်နှံနှစ်ခြင်းယူနိုင်သည်အထိ ကူညီပေးခဲ့သည်!

^၆ ထို့ကြောင့် လူငယ်တို့၊ ပညာသင်ကြားရန်နှင့် သင်တို့၏ သက်သေခံရသည့် ထူးခြားသောရပ်ကွက်တွင် အမှုဆောင်ရန် သင်တို့ကိုယ်ကိုအသုံးတော်ခံပါ။ သို့ပြုလျှင် သင်တို့သည် ကျောင်းတက်ခြင်းမှ အကြီးမားဆုံးသောအကျိုးကို ခံစားရမည်ဖြစ်သည်။