ဦးဆောင်နေသောကြီးကြပ်မှူးများ—လုပ်ငန်းတော်ကြီးကြပ်မှူး

^၁ လုပ်ငန်းတော်ကြီးကြပ်မှူးသည် အသင်းတော်ခန့်အပ်ခံရသည့်ရပ်ကွက်တွင် ဧဝံဂေလိဟောပြောခြင်းလုပ်ငန်းတိုးတက်မှုနှင့်ဆိုင်သမျှအရာများကို အလွန်စိတ်ဝင်စားသည်။ ဤသို့ဖြင့် သူသည် သတင်းကောင်းဟောပြောခြင်းတာဝန်ကို ထမ်းဆောင်နိုင်ဖို့ ကျွန်ုပ်တို့အား ကူညီပေးရာတွင် အရေးပါသောအခန်းကဏ္ဍမှပါဝင်သည်။ သူသည် ဇွဲရှိသောဧဝံဂေလိဟောပြောသူတစ်ဦးအနေနှင့် လုပ်ငန်းတော်နှင့်ဆိုင်သမျှကိစ္စရပ်များကို စီစဉ်ဆောင်ရွက်ရာတွင် ဦးဆောင်သည်။ အရည်အချင်းရှိသော သွန်သင်သူတစ်ဦးအနေနှင့်လည်း ကြေညာသူတစ်ဦးစီအား ဓမ္မအမှုတွင် ပိုမိုထိရောက်စေရန် ကူညီပေးသည်။—ဧ. ၄:၁၁၊ ၁၂။

^၂ ဤအကြီးအကဲသည် စာအုပ်စာတမ်း၊ မဂ္ဂဇင်းနှင့် ရပ်ကွက်များကိုကိုင်တွယ်ရန် တာဝန်ရရှိထားသည့် ဓမ္မအမှုထမ်းများ၏လုပ်ငန်းကို တိုက်ရိုက်ကြီးကြပ်သည်။ လစဉ် ကျွန်ုပ်တို့အသုံးပြုနိုင်ရန် စာအုပ်စာတမ်း၊ မဂ္ဂဇင်းနှင့် လုပ်ငန်းတော်ပုံစံစာရွက်များ အလုံအလောက်ရှိရန်သေချာဖို့ သူ့တွင်တာဝန်ရှိသည်။ သူသည် ကျွန်ုပ်တို့အား သွားရောက်လည်ပတ်မှုမပြုရန် အသိပေးထားသောအိမ်လိပ်စာအားလုံးအတွက် ရပ်ကွက်ဖိုင်ကို တစ်နှစ်လျှင်တစ်ကြိမ်ပြန်သုံးသပ်ပြီး ထိုအိမ်များသို့သွားရောက်လည်ပတ်ရန် အရည်အချင်းရှိသောညီအကိုများကို တာဝန်ပေးသည်။

^၃ လုပ်ငန်းတော်ကြီးကြပ်မှူးသည် စီးပွားရေးရပ်ကွက်၊ လမ်းပေါ်နှင့် တယ်လီဖုန်းဖြင့်သက်သေခံခြင်းအပါအဝင် ဟောပြောခြင်းနည်းမျိုးစုံကို ကြီးကြပ်ပေးရန်တာဝန်ရှိသည်။ သူသည် အားလပ်ရက်များအပါအဝင် တစ်ပတ်တာလုံး လုပ်ငန်းတော်အတွက်တွေ့ဆုံရန် လက်တွေ့ကျအစီအစဉ်များကို စီစဉ်ဆောင်ရွက်ဖို့ နိုးနိုးကြားကြားရှိသည်။ သူသည် ကျမ်းစာသင်အံမှုလုပ်ငန်းကို အမှန်စိတ်ဝင်စားကြောင်း တင်ပြသည်။ သူသည် ဓမ္မအမှုတွင် မှန်မှန်မကြေညာသူ သို့မဟုတ် မလှုပ်မရှားဖြစ်လာသူများအား ဝိညာဏအကူအညီပေးနိုင်သည့်နည်းလမ်းများကို ရှာကြံသည်။ သူသည် ရှေ့ဆောင်များ၏လုပ်ငန်းကို တက်တက်ကြွကြွအာရုံစိုက်ကာ အခြားသူများအား ရှေ့ဆောင်များထောက်ကူပေးသည့်အစီအစဉ်ကို ကြီးကြပ်ပေးသည်။

^၄ အသင်းတော်လုပ်ငန်းတော်ကော်မတီဝင်တစ်ဦးအနေနှင့် လုပ်ငန်းတော်ကြီးကြပ်မှူးသည် အသင်းတော်စာအုပ်ကြီးသင်တန်းအုပ်စုများတွင် လိုအပ်သည့် မည်သည့်ပြုပြင်ပြောင်းလဲမှုကိုမဆို အဆိုပြုသည်။ သင့်အုပ်စုသို့ သူလည်ပတ်သည့်အခါ မပျက်မကွက်တက်ရောက်ပါ၊ လယ်ကွင်းလုပ်ငန်းတွင် သူနှင့်အတူ မပျက်မကွက်ပါဝင်ပါ။

^၅ အသင်းတော်တွင်ရှိသူအားလုံးသည် လုပ်ငန်းတော်ကြီးကြပ်မှူး၏ညွှန်ကြားချက်ကို လိုလိုလားလားပူးပေါင်းလုပ်ဆောင်သင့်၏။ ယင်းက တပည့်ဖြစ်စေခြင်းလုပ်ငန်းတွင် ပိုမိုထိရောက်စေရန်နှင့် ဓမ္မအမှုတွင် သာ၍ကြီးမားသောရွှင်လန်းမှုကိုခံစားရရန် အကူအညီဖြစ်စေပါလိမ့်မည်။