သင့်အချိန်ကို ဓမ္မအမှုလုပ်ငန်းတွင် အကျိုးရှိစွာအသုံးပြုပါ

^၁ ဓမ္မအမှုလုပ်ငန်းတွင် လုပ်စရာများစွာရှိပြီး အချိန်မှာ အနည်းငယ်သာကျန်ကြွင်းတော့သည်။ (ယော. ၄:၃၅; ၁ ကော. ၇:၂၉) ကောင်းစွာစီစဉ်ဖွဲ့စည်းခြင်းနှင့် ကြိုတင်စီစဉ်ခြင်းဖြင့် ကျွန်ုပ်တို့၏အချိန်ကို ဓမ္မအမှုတွင် အကျိုးရှိစွာအသုံးပြုရန် ဇယားဆွဲနိုင်ပါသည်။

^၂ ကြိုတင်ပြင်ဆင်ထားပါ– လယ်ကွင်းလုပ်ငန်းအတွက် စုဆုံမှုသို့မသွားမီ လိုအပ်သောစာအုပ်စာတမ်းများ သင့်တွင်ရှိပြီး ယင်းအတွက် တင်ဆက်နည်းတစ်ခု ပြင်ဆင်ထားကြောင်း သေချာစေပါ။ စုဆုံမှုကို ဆုတောင်း၍နိဂုံးချုပ်ပြီးသည်နှင့် လယ်ကွင်းသို့ တန်းသွားပါ။ ယင်းက သင်နှင့်သင့်အဖော်တို့အား လယ်ကွင်းလုပ်ငန်းအတွက် ရရှိသည့်အချိန်အတွင်း အတတ်နိုင်ဆုံးများများ လုပ်ဆောင်စေနိုင်ပါလိမ့်မည်။

^၃ လယ်ကွင်းလုပ်ငန်းအတွက် စုဆုံမှုကို ကိုင်တွယ်ရန် သင်တာဝန်ရရှိသည်ဆိုပါက အချိန်မီစတင်ပါ။ စုဆုံမှုကို ၁၀ မိနစ်၊ ၁၅ မိနစ်ထက် မရှည်စေပါနှင့်။ အုပ်စုမခွဲမီ လူတိုင်းသည် မည်သူနှင့်တွဲရမည်၊ အဘယ်နေရာတွင် အမှုဆောင်ရမည်ကို သိရှိကြောင်းသေချာစေပါ။

^၄ ဓမ္မအမှုတွင်ပါဝင်စဉ်– လယ်ကွင်းလုပ်ငန်းအတွက် စုဆုံမှုပြီးသွားသည်နှင့် မလိုအပ်ဘဲ အချိန်ဖြုန်းမနေဘဲ ရပ်ကွက်သို့ တန်းသွားပါ။ ရပ်ကွက်မှ စောစောပြန်မည်ဆိုပါက သင့်သွားရေးလာရေးကို သင့်ဘာသာစီစဉ်ခြင်းဖြင့် အခြားသူများလည်း စောစောပြန်ရန် လိုအပ်မည်မဟုတ်ပေ။ အုပ်စုလိုက်အမှုဆောင်သောအခါ သင့်ကိုစောင့်နေသော အခြားသူများကို ထောက်ထားစာနာပါ။ ယင်းတွင် သင်နှင့်ငြင်းခုံလိုသောသူကို လိမ္မာပါးနပ်စွာ စကားဖြတ်ခြင်း သို့မဟုတ် စိတ်ဝင်စားသူတစ်ဦးဖြစ်မည်ဆိုပါက ပြန်လည်ပတ်ရန် စီစဉ်ခြင်းတို့ပါဝင်ပေမည်။—မ. ၁၀:၁၁။

^၅ ပြန်လည်ပတ်မှုများ သွားသောအခါ နောက်ရပ်ကွက်တစ်ခုသို့မသွားမီ ရပ်ကွက်တစ်ခုရှိ ပြန်လည်ပတ်မှုအားလုံးကို သွားရန်စီစဉ်ခြင်းဖြင့် မလိုအပ်ဘဲ သွားလာရခြင်းကို ရှောင်နိုင်သည်။ အိမ်တွင်ရှိမရှိသိနိုင်ရန် အချို့သူတို့ထံ ဖုန်းဆက်နိုင်သည်။ (သု. ၂၁:၅) အိမ်တစ်အိမ်တွင် ကြာရှည်စွာဆွေးနွေးရမည်ဆိုပါက သင့်အုပ်စုရှိသူတို့ကို အနီးအနားတွင်ဟောရန် သို့မဟုတ် အခြားလည်ပတ်မှုများသွားရန် စီစဉ်ပေးနိုင်သည်။

^၆ ကျွန်ုပ်တို့သည် ကြီးစွာသောရိတ်သိမ်းရာကာလတွင် အသက်ရှင်နေကြသည်။ (မ. ၉:၃၇၊ ၃၈) မကြာမီ လုပ်ငန်းပြီးစီးတော့မည်။ ထို့ကြောင့် ဓမ္မအမှုတွင်ပါဝင်စဉ် ကျွန်ုပ်တို့၏အချိန်ကို အကျိုးရှိစွာအသုံးပြုလိုစိတ်ရှိသင့်သည်။