တိုက်နယ်စည်းဝေးပွဲ အစီအစဉ်သစ်
စစ်မှန်သောဝတ်ပြုရေးကို အပြင်းအထန် ဆန့်ကျင်သူတို့အား မည်သို့ ကြံ့ကြံ့ခံ တွန်းလှန်နိုင်သနည်း။ ဘုရားတရားမဲ့သည့်လောကသို့ ပြန်သွားရန် ကျွန်ုပ်တို့အား သွေးဆောင်နေသည့် စာတန်၏ အဆက်မပြတ်အားထုတ်မှုများကို ကျွန်ုပ်တို့ မည်သို့အောင်မြင်ကျော်လွှားနိုင်သနည်း။ ၂၀၀၉ လုပ်ငန်းတော်နှစ်အတွက် တိုက်နယ်စည်းဝေးပွဲအစီအစဉ်က ထိုအရေးကြီးသည့်မေးခွန်းများကို ဖြေဆိုပါလိမ့်မည်။ အဓိကအကြောင်းမှာ “အကောင်းအားဖြင့် အဆိုးကို ဆက်၍အနိုင်ယူနေလော့” ဖြစ်သည်။ (ရော. ၁၂:၂၁၊ ကဘ) အစီအစဉ်တွင်ပါဝင်သည့်အရာများကို အောက်တွင် ဖော်ပြထားပါသည်။
“အကောင်းအားဖြင့် အဆိုးကို အောင်ပွဲဆင်ရန် ခိုင်ခံ့မြဲမြံပါ၊” “ယုံကြည်စိတ်ချလွန်းခြင်းကို သတိပြုပါ!၊” “ဆိုးသွမ်းမှုအားလုံး မကြာခင်အဆုံးတိုင်တော့မည်!” နှင့် “လောကကိုအောင်ပွဲဆင်ရန် ကျွန်ုပ်တို့၏ယုံကြည်ခြင်းကို ခိုင်ခံ့နေစေပါ” ဟူသောဟောပြောချက်တို့ကို ခရိုင်ကြီးကြပ်မှူးက ဟောပြောပါလိမ့်မည်။ ရောမ ၁၃:၁၁-၁၃ အပေါ်အခြေခံထားသည့် “ယခုအချိန်သည် နိုးနိုးကြားကြား ရှိနေရမည့်အချိန်ဖြစ်!” နှင့် သုတ္တံ ၂၄:၁၀ အပေါ်အခြေခံထားသည့် “အမှုရောက်သောကာလ၌ စိတ်ပျက်အားလျော့ကြောင်း မဖော်ပြပါနှင့်” ဟူသည့် အဓိကအကြောင်းများကို တိုက်နယ်ကြီးကြပ်မှူးက ဟောပြောပါလိမ့်မည်။ “တိုက်နယ်လိုအပ်ရာများကို ဂရုပြုခြင်း” ဟူသည့် တိုက်နယ်ကြီးကြပ်မှူး၏အပိုင်းကိုလည်း ကျွန်ုပ်တို့စောင့်မျှော်ကြသည်။ နောက်ထပ်အလွန်အားရှိဖွယ်အပိုင်းတစ်ပိုင်းမှာ “ ‘ထိုအမှုကို သင်ဆောင်ရွက်နိုင်’ မည်လော—ရှေ့ဆောင်လုပ်ခြင်းဖြင့်” ဟူသောအပိုင်း ဖြစ်ပါလိမ့်မည်။ အခန်းဆက်နှစ်ခုထဲမှ တစ်ခုမှာ “စာတန်၏ပရိယာယ်များကို ကြံ့ကြံ့ခံတွန်းလှန်ပါ” ဖြစ်သည်။ ယင်းက နည်းပညာ၊ ဖျော်ဖြေမှုနှင့် ပညာရေးနယ်ပယ်တို့တွင် စာတန်၏ စဉ်းလဲသောပရိယာယ်များကို ခွဲခြားသတ်မှတ်ပြီး ငြင်းပယ်ရန် ကျွန်ုပ်တို့အား ကူညီပေးပါလိမ့်မည်။ “ခဲယဉ်းဆိုးယုတ်သောနေ့ရက်များတွင် ခံရပ်နိုင်ရန် ခွန်အားရယူပါ” ဟူသောအခန်းဆက်က ဧဖက် ၆:၁၀-၁၈ ၌တွေ့ရသော မှုတ်သွင်းခံဆုံးမစကားကို မည်ကဲ့သို့ ပို၍အပြည့်အဝကျင့်သုံးနိုင်ကြောင်း ဖော်ပြပါလိမ့်မည်။
ဆိုးသွမ်းမှု၏ပင်ရင်းကို အောင်ပွဲဆင်ခြင်းနှင့် နိုင်ငံတော်သတင်းဟောပြောခြင်းလုပ်ငန်းကြားတွင် တိုက်ရိုက်ဆက်နွှယ်မှုတစ်ခုရှိသည်။ (ဗျာ. ၁၂:၁၇) စာတန်သည် ယေဟောဝါသက်သေများအား အဆက်မပြတ်တိုက်ခိုက်နေသည်ကို အံ့အားသင့်စရာမလိုပါ။ (ဟေရှာ. ၄၃:၁၀၊ ၁၂) သို့သော် စာတန်သည် မရှုမလှရှုံးနိမ့်မည်ဖြစ်သည်၊ အကြောင်းမှာ ကျွန်ုပ်တို့သည် “အကောင်းအားဖြင့် အဆိုးကို ဆက်၍အနိုင်ယူနေ” ရန်စိတ်ပိုင်းဖြတ်ထားကြသောကြောင့် ဖြစ်သည်။ ယင်းတိုက်နယ်စည်းဝေးပွဲ၏ အပိုင်းလေးပိုင်းစလုံးမှ အပြည့်အဝအကျိုးရယူရန် အသေအချာစီစဉ်ပါလေ။