“ဉာဏ်ပညာသည် ဖြောင့်မတ်ကြောင်း မိမိ၏လုပ်ရပ်အားဖြင့် သက်သေထူ၏”

၁။ ကျွန်ုပ်တို့၏အလုပ်ကို အခြားသူများ မည်သို့ရှုမြင်ကြသနည်း။

^၁ ကျွန်ုပ်တို့ကို အထင်လွဲနေသူများ သို့မဟုတ် ယေဟောဝါသက်သေများနှင့်ပတ်သက်၍ မဟုတ်မမှန်သတင်းကြားထားသူများ၏ အပျက်သဘောဖြင့်တုံ့ပြန်မှုကို ကျွန်ုပ်တို့ မကြာခဏကြုံတွေ့ရပေမည်။ ဘက်လိုက်သော သတင်းမီဒီယာများ၏ စကားများကြောင့် ထိုသို့တုံ့ပြန်ခြင်း ဖြစ်နိုင်သည်။ အချို့သောနေရာများတွင် ကျွန်ုပ်တို့အား “အန္တရာယ်ရှိသောဂိုဏ်း” အဖြစ် သတ်မှတ်ကြသည်။ ထိုသို့ဆက်ဆံခံရပါက ကျွန်ုပ်တို့မည်သို့တုံ့ပြန်သင့်သနည်း။

၂။ ဝေဖန်ခံရသည့်အခါ စိတ်ဓာတ်မကျအောင် ကျွန်ုပ်တို့ကို အဘယ်အရာက ကူညီပေးမည်နည်း။

^၂ အပြုသဘောထားကို ထိန်းသိမ်းပါ– ပထမရာစုတွင် ယေရှုနှင့် ယေဟောဝါ၏အခြားကျေးကျွန်များသည်လည်း အထင်လွဲခံရပြီး ရှုတ်ချပြောဆိုခံခဲ့ရသည်။ (တ. ၂၈:၂၂) ခရစ်ယာန်များသည် ပြစ်တင်ဝေဖန်ခံရသော်လည်း ဓမ္မအမှုတွင် ရှက်ကြောက်ခြင်းမရှိခဲ့ပါ။ ယေရှုက “ဉာဏ်ပညာသည် ဖြောင့်မတ်ကြောင်း မိမိ၏လုပ်ရပ်အားဖြင့် သက်သေထူ၏” ဟု ပြောခဲ့သည်။ (မ. ၁၁:၁၈၊ ၁၉) အမှန်တရားကိုရှာဖွေသူများ သတင်းကောင်း၏တန်ဖိုးကို သိမြင်လာမည်ဖြစ်ကြောင်း ယုံကြည်စိတ်ချကာ ကိုယ်တော်သည် ခမည်းတော်၏အလိုတော်ကို ဇွဲထက်သန်စွာဆက်လုပ်ဆောင်ခဲ့သည်။ ဘုရားသခင့်သားတော်ပင်လျှင် ယင်းသို့ဆက်ဆံခံရကြောင်း ကျွန်ုပ်တို့သတိရမည်ဆိုလျှင် စိတ်ဓာတ်ကျမည်မဟုတ်ပေ။

၃။ မဟုတ်မမှန်သတင်းများ၊ ဆန့်ကျင်မှုများနှင့်ကြုံရသည့်အခါ ကျွန်ုပ်တို့ အဘယ်ကြောင့် မအံ့သြသင့်သနည်း။

^၃ လောကသည် မိမိကိုမုန်းတီးသကဲ့သို့ မိမိ၏နောက်လိုက်များကိုလည်း မုန်းတီးမည်ဖြစ်ကြောင်း ယေရှုပြောခဲ့သည်။ (ယော. ၁၅:၁၈-၂၀) ထို့ကြောင့် မဟုတ်မမှန်သတင်းများ၊ ဆန့်ကျင်မှုများနှင့် ကြုံရသောအခါ ကျွန်ုပ်တို့မအံ့သြသင့်ချေ။ လောက၏အဆုံးနီးလာသည်နှင့်အမျှ စာတန်၏ဒေါသပိုပြင်းထန်လာပြီး ထိုကဲ့သို့သောအရာများနှင့် ပို၍ကြုံတွေ့ရလိမ့်မည်ဟု မျှော်လင့်သင့်သည်။ (ဗျာ. ၁၂:၁၂) ယင်းတို့သည် စာတန်၏လောက မကြာမီဖျက်ဆီးခံရတော့မည်ဟူသည့် အထောက်အထားများဖြစ်သောကြောင့် ကျွန်ုပ်တို့ ဝမ်းသာနိုင်ကြသည်။

၄။ သတင်းကောင်းဟောပြောခြင်းကို အပျက်သဘောဖြင့်တုံ့ပြန်ပါက ကျွန်ုပ်တို့မည်သို့တုံ့ပြန်သင့်သနည်း။

^၄ ယဉ်ကျေးစွာတုံ့ပြန်ပါ– အပျက်သဘောတုံ့ပြန်မှုများကြုံရသည့်အခါ ကျွန်ုပ်တို့သည် ယဉ်ယဉ်ကျေးကျေးနှင့် နူးညံ့သိမ်မွေ့စွာ တုံ့ပြန်သင့်သည်။ (သု. ၁၅:၁; ကော. ၄:၅၊ ၆) အခြေအနေခွင့်ပြုမည်ဆိုလျှင် စိတ်ရိုးမှန်သည့်အိမ်ရှင်ကို ယေဟောဝါသက်သေများနှင့်ပတ်သက်၍ အထင်လွဲမှားမှုများစွာရှိကြောင်း ရှင်းပြနိုင်သည်၊ သို့မဟုတ် သူ အဘယ်ကြောင့် ထိုသို့တုံ့ပြန်ရကြောင်း မေးမြန်းနိုင်သည်။ ကျွန်ုပ်တို့၏နူးညံ့သိမ်မွေ့စွာတုံ့ပြန်ပုံကြောင့် ယေဟောဝါသက်သေများနှင့်ပတ်သက်၍ သူကြားထားသည့် အကြောင်းအရာကို မေးခွန်းထုတ်လာပေမည်။ သို့မဟုတ် သက်သေခံများ နောက်တစ်ကြိမ် လည်ပတ်သောအခါ သူနားထောင်ပေမည်။ သို့သော် အိမ်ရှင်သည် အလွန်ဒေါသထွက်နေမည်ဆိုလျှင် ယဉ်ယဉ်ကျေးကျေးထွက်ခွာသွားခြင်းက အကောင်းဆုံးဖြစ်ပေမည်။ အခြားသူများ ကျွန်ုပ်တို့အပေါ် မည်သို့ပင်ရှုမြင်ပါစေ၊ ကျွန်ုပ်တို့၏ဓမ္မအမှုကို ယေဟောဝါတန်ဖိုးထားကြောင်း စိတ်ချနိုင်သည်။—ဟေရှာ. ၅၂:၇။