လူအများရှေ့သက်သေခံခြင်း အစီအစဉ်သစ်
၁။ ပထမရာစု ခရစ်ယာန်တွေဟာ စံနမူကောင်း ဘယ်လို တင်ပြခဲ့သလဲ။
၁ ပထမရာစု ခရစ်ယာန်တွေက တစ်အိမ်တက်ဆင်းအပြင် လူအများရှေ့လည်း ဟောပြောခဲ့ကြတယ်။ (တ. ၂၀:၂၀) ဥပမာ၊ သူတို့ဟာ လူများစွာကို တွေ့ နိုင်မယ့် ဗိမာန်တော်ကိုသွားပြီး ဟောခဲ့ကြတယ်။ (တ. ၅:၄၂) တမန်တော်ပေါလု အေသင်မြို့မှာရှိတုန်းက လူအများကြီးရှိတဲ့ဈေးမှာ နေ့တိုင်း ဟောပြောခဲ့တယ်။ (တ. ၁၇:၁၇) ဒီနေ့အချိန်မှာလည်း သတင်းကောင်းဟောပြောခြင်းရဲ့ အဓိကနည်းလမ်းက တစ်အိမ်တက်ဆင်း ဖြစ်နေတုန်းပါပဲ။ ဒါပေမဲ့ ကားရပ်နားတဲ့နေရာ၊ စီးပွားရေးရပ်ကွက်၊ ပန်းခြံ၊ လူသွားလူလာများတဲ့လမ်းနဲ့ လူတွေကိုတွေ့ နိုင်မယ့် တခြားနေရာတွေမှာလည်း ကျွန်ုပ်တို့ သွားဟောပြောကြတယ်။ ဖြစ်နိုင်တဲ့နေရာတိုင်း လူအများရှေ့ သက်သေခံခြင်းမှာပါဝင်ဖို့ ကြေညာသူတိုင်းကို အားပေးလိုပါတယ်။ ညီအစ်ကိုညီအစ်မများစွာကတော့ စိတ်လှုပ်ရှားစရာကောင်းတဲ့ လူအများရှေ့သက်သေခံခြင်း အစီအစဉ်သစ်နှစ်ခုမှာ ပါဝင်ခွင့် ရကြပါလိမ့်မယ်။
၂။ ၂၀၁၁ နိုဝင်ဘာလမှာ ဘယ်အစီအစဉ်သစ်ကို စမ်းသပ်လုပ်ဆောင်ခဲ့သလဲ။
၂ မြို့ကြီးတွေမှာ လူအများရှေ့သက်သေခံခြင်း အထူးအစီအစဉ်– ၂၀၁၁၊ နိုဝင်ဘာလက အမေရိကန်နိုင်ငံ၊ နယူးယောက်မြို့မှာ လူအများရှေ့ သက်သေခံခြင်းအစီအစဉ်သစ်ကို စမ်းသပ်လုပ်ဆောင်ခဲ့တယ်ဆိုတာ ၂၀၁၃ နှစ်ချုပ်စာအုပ်ရဲ့ စာမျက်နှာ ၁၆၊ ၁၇ မှာ ဖော်ပြထားပါတယ်။ လူအများ ဖြတ်သန်းသွားလာတဲ့ နေရာတစ်ဝိုက်မှာ ဘာသာစကားအမျိုးမျိုးနဲ့ အဖွဲ့အစည်းထုတ် စာပေတွေကို စားပွဲတွေ၊ လက်တွန်းစင်တွေနဲ့ ခင်းကျင်းပြသခဲ့တယ်။ နေ့တိုင်းဖြတ်သန်းသွားလာတဲ့ လူတွေထဲမှာ အလွယ်တကူဝင်လို့မရတဲ့ အဆောက်အဦကလူတွေနဲ့ အိမ်မှာသိပ်မရှိတတ်တဲ့ လူတွေလည်းပါတယ်။ အဲဒီစမ်းသပ်မှုမှာ ရလဒ်ကောင်းတွေ ရရှိခဲ့တယ်။ သိပ်မကြာသေးခင်က လတစ်လမှာပဲ မဂ္ဂဇင်းပေါင်း ၃,၇၉၇ စောင်နဲ့ စာအုပ်ပေါင်း ၇,၉၈၆ အုပ်ကို ဝေငှနိုင်ခဲ့တယ်။ ကျမ်းစာသင်အံမှု တောင်းဆိုသူလည်း အများကြီးရှိခဲ့တယ်။ အစီအစဉ်သစ်ရဲ့ အဓိကရည်ရွယ်ချက်က ကျမ်းစာသင်အံမှု စတင်နိုင်ဖို့ ဖြစ်တဲ့အတွက် စိတ်ဝင်စားသူတွေဆီ လည်ပတ်နိုင်ဖို့ သူတို့ရဲ့လိပ်စာကို သက်ဆိုင်တဲ့အသင်းတော်တွေဆီ ချက်ချင်းပို့ပေးခဲ့တယ်။
၃။ ဒီအစီအစဉ်သစ်ကို ဘယ်လို တိုးချဲ့သွားမလဲ။
၃ ဒီအစီအစဉ်သစ် စမ်းသပ်မှု အောင်မြင်ခဲ့တဲ့အတွက် ကမ္ဘာတစ်ဝန်းက လူဦးရေများတဲ့ မြို့ကြီးတွေမှာလည်း အဲဒီအစီအစဉ်ကို တိုးချဲ့လုပ်ဆောင်နေပါပြီ။ ဘယ်မြို့ကြီးတွေမှာ လုပ်ဆောင်ရင် သင့်တော်မလဲဆိုတာ ဌာနခွဲရုံးက ဆုံးဖြတ်ပါလိမ့်မယ်။ အများအားဖြင့် သယ်ယူပို့ဆောင်ရေးအတွက် အချက်အချာကျတဲ့မြို့၊ ရုံး/ဌာနတွေ အများအပြားရှိတဲ့မြို့၊ လူနေတိုက်ခန်းတွေ အများကြီးရှိပြီး လူသွားလူလာထူထပ်တဲ့မြို့တွေမှာ လုပ်ဆောင်မှာဖြစ်တယ်။ အဲဒီအစီအစဉ်မှာ ပါဝင်ခွင့်ရမယ့် အသင်းတော်တွေကို ဌာနခွဲရုံးကနေ စာပို့မှာဖြစ်ပြီး ထပ်ဆင့်ညွှန်ကြားချက်တွေ ပေးပါလိမ့်မယ်။ တချို့နေရာတွေမှာ အရန်ရှေ့ဆောင်တွေလည်း ပါဝင်ခွင့်ရမှာဖြစ်ပေမဲ့ ပုံမှန်အားဖြင့်တော့ မှန်မှန်နဲ့ အထူးရှေ့ဆောင်တွေ လုပ်ဆောင်ကြမှာဖြစ်တယ်။
၄။ မြို့ကြီးတွေမှာ လူအများရှေ့သက်သေခံခြင်း အထူးအစီအစဉ်ကို ဘယ်လိုလုပ်ဆောင်မလဲ။
၄ ဒီအစီအစဉ်သစ်ကို ဘယ်လိုလုပ်ဆောင်မလဲ– မြို့ကြီးတွေမှာ လူအများရှေ့သက်သေခံခြင်း အထူးအစီအစဉ်မှာ ပါဝင်တဲ့သူတွေက စားပွဲ ဒါမှမဟုတ် လက်တွန်းစင်ဆီ လူတွေလာဖို့ စောင့်ဆိုင်းမှာဖြစ်တယ်။ တစ်ယောက်ယောက် ချဉ်းကပ်လာတဲ့အခါ သူစိတ်ဝင်စားတဲ့ ဘယ်စာပေကိုမဆို ယူသွားဖို့ ကမ်းလှမ်းပါမယ်။ သူသိချင်တဲ့ ဘယ်မေးခွန်းကိုမဆို ရှေ့ဆောင်ဖြစ်သူက ကျမ်းစာကနေ အဖြေပေးမှာဖြစ်တယ်။ စာအုပ်စာပေကို သူယူသွားတဲ့အခါ အလှူငွေအစီအစဉ်ကို ပြောမှာမဟုတ်ဘူး။ ဒါပေမဲ့ ကျွန်ုပ်တို့ရဲ့လုပ်ငန်း ငွေကြေးထောက်ပံ့ပုံကို သူ မေးမြန်းလာမယ်ဆိုရင် စာပေတွေမှာပါတဲ့ လိပ်စာအတိုင်း အလှူငွေ ပေးပို့နိုင်ကြောင်း ရှင်းပြပေးနိုင်တယ်။ ဖြစ်နိုင်တဲ့အခါတိုင်း ခုလိုမေးမှာဖြစ်တယ်– “မိတ်ဆွေဆီ လာလည်ပတ်လို့ ရမလား” ဒါမှမဟုတ် “ဒီစာပေတွေအပြင် အခမဲ့ ကျမ်းစာလေ့လာမှုအစီအစဉ်လည်း ရှိတယ်ဆိုတာ သိပါသလား။”
၅။ ဒီအစီအစဉ်သစ်ကနေ မောင်နှံတစ်စုံ ဘယ်လို အကျိုးကျေးဇူး ရခဲ့သလဲ။
၅ ဒီအစီအစဉ်သစ်မှာ ပါဝင်ခြင်းက အကျိုးများစွာ ရရှိစေပါတယ်။ မောင်နှံတစ်စုံ ဒီလိုရေးခဲ့တယ်– “ကျွန်တော်တို့ စားပွဲဘေးမှာရပ်ပြီး နေ့စဉ်ဖြတ်သန်းသွားလာနေတဲ့ လူပေါင်းများစွာကို မြင်ရတဲ့အခါ ကမ္ဘာတစ်ဝန်းလုံးမှာရှိတဲ့ လူတွေဆီ သတင်းကောင်းရောက်ရှိစေခြင်းဆိုတဲ့အလုပ်ဟာ ဘယ်လောက်ကြီးမားသလဲဆိုတာ စိတ်ထဲမှာ စွဲထင်သွားတယ်။ လူများစွာကို တွေ့ မြင်ရပြီး ယေဟောဝါက တစ်ဦးစီကို ဂရုစိုက်တဲ့အကြောင်း စဉ်းစားတဲ့အခါ ဘဝမှာ ဟောပြောခြင်းလုပ်ငန်းကို ဆက်ဦးစားထားမယ်ဆိုတဲ့ ကျွန်တော်တို့ရဲ့ ဆုံးဖြတ်ချက် ပိုခိုင်မာလာတယ်။ ဒီစားပွဲဘေးကနေ ဖြတ်သွားသူတွေရဲ့ စိတ်နှလုံးကို ယေဟောဝါ စစ်ဆေးနေပြီး ထိုက်တန်သူတွေကို ရှာဖွေနေတယ်လို့ ကျွန်တော်တို့ မြင်ယောင်ကြည့်တယ်။ ကျွန်တော်တို့ရဲ့ လုပ်ဖော်ဆောင်ဖက်တွေဖြစ်တဲ့ ကောင်းကင်တမန်တွေနဲ့ နီးနီးကပ်ကပ် ရှိနေတယ်လို့လည်း ခံစားရတယ်။”
၆။ (က) လူအများရှေ့ သက်သေခံခြင်းအတွက် အသင်းတော်များစွာမှာ နောက်ထပ်ဘယ်အစီအစဉ်သစ် ရှိမလဲ။ အထူးအစီအစဉ်နဲ့ ဘယ်လိုကွာခြားသလဲ။ (ခ) လူအများရှေ့ သက်သေခံခြင်းကို အသင်းတော်တွေ ဘယ်လို ပူပေါင်းလုပ်ဆောင်နိုင်မလဲ။
၆ သက်ဆိုင်ရာရပ်ကွက်မှာ လူအများရှေ့သက်သေခံခြင်းအစီအစဉ်– မြို့ကြီးတွေမှာ လူအများရှေ့သက်သေခံခြင်း အထူးအစီအစဉ်အပြင် အကြီးအကဲအဖွဲ့များစွာဟာ သက်ဆိုင်ရာရပ်ကွက်မှာ လူအများရှေ့သက်သေခံခြင်း အစီအစဉ်သစ်နောက်တစ်ခုကို ဖွဲ့စည်းလုပ်ဆောင်နေပါတယ်။ အဲဒီအစီအစဉ်မှာ ကြေညာသူတွေက အသင်းတော်ရပ်ကွက်အတွင်းရှိ လူအများဖြတ်သန်းသွားလာတဲ့ နေရာတွေမှာ စားပွဲ ဒါမှမဟုတ် လက်တွန်းစင်တွေကိုသုံးပြီး လုပ်ဆောင်ကြမှာဖြစ်တယ်။ ဒီအစီအစဉ်က မြို့ကြီးတွေမှာ လူအများရှေ့သက်သေခံခြင်း အထူးအစီအစဉ်နဲ့ မတူပါဘူး။ အထူးအစီအစဉ်ဟာ ဌာနခွဲရုံးကရွေးပေးတဲ့မြို့တွေရဲ့ လူများတဲ့နေရာတွေမှာ အသင်းတော်အသီးသီးက ညီအစ်ကိုညီအစ်မတွေကို အသုံးပြု လုပ်ဆောင်မှာဖြစ်တယ်။—“ကောင်းစွာ ပူးပေါင်းဆောင်ရွက်ဖို့ လိုအပ်” ဆိုတဲ့ လေးထောင့်ကွက်ကို ကြည့်ပါ။
၇။ အသင်းတော်အတွက် လက်တွေ့ ကျမယ်ဆိုရင် အကြီးအကဲတွေက လူအများရှေ့သက်သေခံခြင်းကို ဘယ်လို စီစဉ်ဖွဲ့စည်းနိုင်သလဲ။
၇ အကြီးအကဲတွေက အသင်းတော်ရပ်ကွက်မှာ လူများတဲ့ရပ်ကွက် ရှိမရှိဆိုတာသုံးသပ်မှာဖြစ်ပြီး လူအများရှေ့သက်သေခံခြင်းအစီအစဉ်ကို ဖွဲ့စည်းဖို့ လက်တွေ့ ကျမကျဆိုတာ ဆုံးဖြတ်မှာဖြစ်တယ်။ အသင်းတော်အတွက် လက်တွေ့ ကျမယ်ဆိုရင် စားပွဲ ဒါမှမဟုတ် လက်တွန်းစင်တွေကို သယ်ယူပို့ဆောင်ရေး အချက်အချာနေရာ၊ အများပြည်သူသွားလာတဲ့နေရာ၊ ပန်းခြံ၊ လူသွားများတဲ့လမ်း၊ ကုန်တိုက်၊ တက္ကသိုလ်နယ်မြေ၊ လေဆိပ်နဲ့ နှစ်စဉ်ပွဲကျင်းပတဲ့နေရာတွေမှာ ထားနိုင်ပါတယ်။ သတ်မှတ်ထားတဲ့ နေရာ၊ နေ့နဲ့ အချိန်မှာ စားပွဲကို ပုံမှန်ခင်းကျင်းထားတာက အကျိုးရှိပါတယ်။ လူတွေက စတိုးဆိုင်ကြီးတစ်ဆိုင်ကိုလာတဲ့အခါ ဝယ်မယ့်ပစ္စည်းကိုပဲ အာရုံစိုက်ကြပေမဲ့ ကုန်တိုက်တွေမှာတော့ ပစ္စည်းတွေကို လျှောက်ပတ်ကြည့်တတ်ကြတယ်။ ဒါကြောင့် စတိုးဆိုင်မှာထက် ကုန်တိုက်ကြီးတွေမှာ စားပွဲခင်းကျင်းပြသထားတာက ပိုအကျိုးရှိပါတယ်။ လူသွားလူလာများတဲ့လမ်းလိုမျိုး တချို့နေရာတွေမှာ လက်တွန်းစင်ငယ်လေးတွေက ပိုအဆင်ပြေနိုင်တယ်။ ကင်းမျှော်စင်၊ နိုးလော့! မဂ္ဂဇင်းတွေနဲ့ ကျမ်းစာသွန်သင်ရာ စာအုပ်ကို ခင်းကျင်းပြသဖို့ လိုအပ်တဲ့အရာတွေကို အကြီးအကဲတွေက ကျွန်ုပ်တို့ရဲ့ ဝက်ဘ်ဆိုက်ကနေ ရယူနိုင်ပါတယ်။ အဲဒါတွေက ဒီအစီအစဉ်သစ်အတွက် အထူးရည်ရွယ်ထားတာဖြစ်တယ်။ ဒီအစီအစဉ်မှာ ပါဝင်သူတွေ လုပ်ဆောင်ပုံက အထူးအစီအစဉ်မှာ ပါဝင်သူတွေ လုပ်ဆောင်ပုံနဲ့ အတော်လေးတူမှာဖြစ်ပြီး လုပ်ငန်းတော်ကြီးကြပ်မှူးရဲ့ ညွှန်ကြားချက်ကို သူတို့ အသေးစိတ် လိုက်လျှောက်ရမှာဖြစ်တယ်။ အသင်းတော်ရပ်ကွက်ပြင်ပမှာ နေထိုင်သူရဲ့လိပ်စာ ရတဲ့အခါ ကျေးဇူးပြု၍ဆက်လိုက်ပေးပါ (S-43) ပုံစံကို ချက်ချင်းဖြည့်ပြီး အတွင်းရေးမှူးကို ချက်ချင်းပေးသင့်ပါတယ်။
၈။ သင့်အသင်းတော်မှာ လူအများရှေ့သက်သေခံခြင်းအစီအစဉ် မရှိဘူးဆိုရင်တောင် လူအများရှေ့သက်သေခံနိုင်မယ့် ဘယ်လိုအခွင့်အရေးတွေ ရှိနေသလဲ။
၈ ကိုယ်ပိုင်အစီအစဉ်နဲ့ လူအများရှေ့ သက်သေခံခြင်း– အသင်းတော်တချို့မှာ စားပွဲတွေ၊ လက်တွန်းစင်တွေထားပြီး သက်သေခံနိုင်လောက်တဲ့နေရာမျိုး ရှိမှာမဟုတ်ဘူး။ အဲဒီလိုအသင်းတော်မှာ ကြေညာသူတွေဟာ ကိုယ်ပိုင်အစီအစဉ်နဲ့ အမှုဆောင်တဲ့အခါ လူအများရှေ့သက်သေခံခြင်းကိုလည်း လုပ်ဆောင်နိုင်တယ်။ သင့်ရပ်ကွက်မှာ ဈေးရုံတွေ၊ ဈေးဆိုင်တန်းတွေ၊ လူအဝင်အထွက်များတဲ့ စတိုးဆိုင်တွေ ရှိသလား။ ပန်းခြံ ဒါမှမဟုတ် လူစုဝေးတတ်တဲ့ နေရာတွေ ရှိသလား။ ပွဲကျင်းပတတ်တဲ့ နေရာတွေ ရှိသလား။ အဲဒီလိုနေရာတွေ ရှိမယ်ဆိုရင် လူအများရှေ့ သက်သေခံနိုင်ပါတယ်။
၉။ လူတွေကို တွေ့ နိုင်တဲ့နေရာတိုင်းမှာဟောဖို့ ဘာကြောင့် ကြိုးစားသင့်သလဲ။
၉ “လူအမျိုးမျိုးတို့သည် ကယ်တင်ခံရ၍ အမှန်တရားဆိုင်ရာ တိကျမှန်ကန်သောအသိပညာကို သိရှိလာ” ဖို့ ယေဟောဝါ အလိုရှိတယ်။ (၁ တိ. ၂:၄) ဒါကြောင့် ကျွန်ုပ်တို့ဟာ အဆုံးမရောက်ခင် နိုင်ငံတော်သတင်းကောင်းကို လူများနိုင်သမျှများများကိုဟောဖို့ ကြိုးစားနေကြတယ်။ (မ. ၂၄:၁၄) နေရာများစွာမှာ လူတွေကို သူတို့ရဲ့အိမ်မှာ သိပ်မတွေ့ ရပေမဲ့ လူအများရှိတဲ့နေရာမှာ သူတို့ကိုတွေ့ နိုင်တဲ့အတွက် သက်သေခံနိုင်ကြတယ်။ လူအများရှေ့ သက်သေခံခြင်းက တချို့အတွက် သတင်းကောင်းကြားရမယ့် တစ်ခုတည်းသောနည်းလမ်း ဖြစ်နိုင်တယ်။ ဒါကြောင့် လူတွေကို တွေ့ နိုင်တဲ့နေရာတိုင်းမှာ ဟောပြောခြင်းအားဖြင့် ကျွန်ုပ်တို့ရဲ့ အမှုဆောင်ခြင်းလုပ်ငန်းကို အကုန်အစင် ပြီးမြောက်နိုင်ကြပါစေ။—၂ တိ. ၄:၅။
[စာမျက်နှာ ၅ ပါ လေးထောင့်ကွက်]
ကောင်းစွာ ပူးပေါင်းဆောင်ရွက်ဖို့ လိုအပ်
တချို့နိုင်ငံတွေမှာ တစ်ခါတလေ အနီးတဝိုက်အသင်းတော်တွေက ကြေညာသူတွေဟာ လူအများရှေ့သက်သေခံပြီးသားလမ်း၊ ကားရပ်နားရာနေရာ၊ ဆိုင်ရှေ့တွေနဲ့ သယ်ယူပို့ဆောင်ရေးအချက်အချာနေရာမှာ ထပ်ပြီးသက်သေခံမိခဲ့ကြတယ်။ အသင်းတော်အသီးသီးက ညီအစ်ကိုညီအစ်မတွေဟာ ဆံပင်ညှပ်ဆိုင်၊ အလှပြင်ဆိုင်၊ ဆေးခန်းလိုမျိုး အများသူငါ စောင့်ဆိုင်းတတ်တဲ့နေရာတစ်ခုတည်းမှာပဲ မဂ္ဂဇင်းတွေကို သွားထားတတ်ကြတယ်။ စီးပွားရေးရပ်ကွက် တစ်ခုတည်းမှာပဲ ဟောပြောခဲ့ကြတယ်။ ဟောပြောတဲ့အချိန် မတူဘူးဆိုရင်တောင် အဲဒီလိုဟောပြောတာက စီးပွားရေးသမားတွေ၊ ဒေသခံတွေကို တစ်ခါတလေ စိတ်အနှောင့်အယှက် ဖြစ်စေတယ်။ ဒါကြောင့် ပုံမှန်အားဖြင့် လူအများရှေ့ သက်သေခံတဲ့အခါ ကိုယ့်အသင်းတော်နဲ့ သက်ဆိုင်တဲ့ ရပ်ကွက်မှာပဲ အမှုဆောင်ခြင်းက အကောင်းဆုံးဖြစ်တယ်။
ကြေညာသူတွေက လူအများရှေ့သက်သေခံခြင်းလုပ်ငန်းကို တခြားအသင်းတော်ရပ်ကွက်မှာ လုပ်ချင်တယ်ဆိုရင် လုပ်ငန်းတော်ကြီးကြပ်မှူးကို ပြောသင့်တယ်။ အဲဒီအစီအစဉ်မစခင် လုပ်ငန်းတော်ကြီးကြပ်မှူးက တစ်ဖက်အသင်းတော်ရဲ့ လုပ်ငန်းတော်ကြီးကြပ်မှူးကို ဆက်သွယ်ပြီး ခွင့်တောင်းနိုင်တယ်။ ဘာသာစကားမတူတဲ့ အသင်းတော်တွေဟာ ရပ်ကွက်တစ်ခုတည်းမှာပဲဟောဖို့ တာဝန်ရတယ်ဆိုရင် ရပ်ကွက်မှာရှိသူတွေအတွက် မလိုအပ်ဘဲ စိတ်အနှောင့်အယှက်မဖြစ်စေဖို့ လုပ်ငန်းတော်ကြီးကြပ်မှူးတွေ အချင်းချင်း ညှိနှိုင်းလုပ်ဆောင်သင့်တယ်။ “တင့်တယ်လျောက်ပတ်စွာ၊ စည်းစနစ်တကျ” ဖြစ်ဖို့ ကောင်းစွာ ပူးပေါင်းလုပ်ဆောင်ဖို့ လိုအပ်တယ်။—၁ ကော. ၁၄:၄၀။
[စာမျက်နှာ ၆ ပါ ရုပ်ပုံ]
[စာမျက်နှာ ၆ ပါ ရုပ်ပုံ]