စိတ်လှုပ်ရှားစရာကောင်းတဲ့ နည်းလမ်းသစ်နဲ့ လူထုရှေ့သက်သေခံခြင်း

၁။ လူသွားလူလာများတဲ့နေရာတွေရှိတဲ့ အသင်းတော်တွေကို ဘာလုပ်ဖို့ အားပေးထားသလဲ။

^၁ လူသွားလူလာများတဲ့နေရာတွေရှိတဲ့ အသင်းတော်တွေကို စားပွဲတွေ၊ လက်တွန်းစင်တွေနဲ့ လူထုရှေ့သက်သေခံခြင်း အစီအစဉ်စတင်ဖို့ အားပေးထားပါတယ်။ လက်တွန်းစင် အသုံးပြုမယ်ဆိုရင် အနည်းဆုံး ကြေညာသူတစ်ယောက်က ဘေးမှာထိုင်နိုင်တယ်၊ ဒါမှမဟုတ် မတ်တတ်ရပ်နိုင်တယ်။ တကယ်လို့ စားပွဲခင်းကျင်းမယ်ဆိုရင် ကြေညာသူနှစ်ယောက် ရှိသင့်တယ်။ တာဝန်ကျတဲ့သူတွေအနေနဲ့ လှိုက်လှဲဖော်ရွေပြီး ချဉ်းကပ်ရလွယ်ကူသူ ဖြစ်သင့်တယ်။ တစ်ယောက်ယောက် စားပွဲနားကပ်လာပြီဆိုရင် ကြေညာသူတစ်ယောက်က “ဒီအကြောင်းကို ကျမ်းစာမှာ ဘယ်လိုပြောထားသလဲဆိုတာ သိပါသလား” ဆိုပြီး အစပြု စကားပြောဆိုနိုင်တယ်။ အဲဒီလိုပြောနေတုန်း ကျန်တဲ့သူတွေက လိုအပ်လာရင် ကူညီပေးနိုင်ဖို့ အသင့်ရှိနေပါ။

၂။ လူထုရှေ့သက်သေခံခြင်းကနေ အကျိုးရရှိခဲ့တဲ့ တွေ့ကြုံမှုကို ပြောပြပါ။

^၂ ဒီနည်းလမ်းသစ်ကြောင့် ကျမ်းစာသင်အံမှုအသစ်တွေ အများကြီး စတင်နိုင်ခဲ့တယ်။ ကောလိပ်ကျောင်းသူတစ်ယောက်က ယေဟောဝါသက်သေတွေအကြောင်း စာတမ်းပြုစုဖို့ ဆုံးဖြတ်ထားတယ်။ ဒါပေမဲ့ နိုင်ငံတော်ခန်းမကို ရှာမတွေ့ခဲ့ဘူး။ နောက်တစ်ပတ်ကျတော့ ကျောင်းဝင်းထဲမှာ လူထုရှေ့သက်သေခံခြင်းစားပွဲကို တွေ့သွားတယ်။ ဒီလိုနဲ့ ကျမ်းစာသင်အံမှုကို လက်ခံခဲ့ပြီး အခုဆိုရင် နှစ်ခြင်းခံပြီးသားကြေညာသူတစ်ယောက် ဖြစ်နေပြီ။ ဒါ့အပြင် လူထုရှေ့သက်သေခံခြင်းမှာလည်း သူကိုယ်တိုင် ပါဝင်နေပါတယ်။

၃။ လူထုရှေ့သက်သေခံခြင်းရဲ့ နည်းလမ်းသစ်နဲ့ပတ်သက်ပြီး ကြေညာသူတချို့ ဘယ်လိုပြောကြသလဲ။

^၃ လူထုရှေ့သက်သေခံခြင်းမှာ ပါဝင်ခဲ့တဲ့ ညီအစ်မတစ်ယောက်က အခုလိုပြောပြတယ်– “လူတချို့က နောက်ဆုံးထုတ်မဂ္ဂဇင်းတွေကို လာယူသွားကြတယ်။ တချို့ကျတော့ ယေဟောဝါသက်သေတွေအကြောင်း တစ်ခါမှ မကြားဖူးကြဘူး။ လူထုရှေ့သက်သေခံခြင်း နည်းလမ်းသစ်ကြောင့် လူအများကြီးကို သက်သေခံနိုင်တယ်ဆိုတာ ကျွန်မ သိလိုက်ရတယ်။” နောက်ညီအစ်မတစ်ယောက်ကလည်း ဒီလိုပြောပြတယ်– “စိတ်လှုပ်ရှားစရာကောင်းတဲ့ နည်းလမ်းသစ်နဲ့ လူထုရှေ့သက်သေခံခြင်းကြောင့် လူတွေ ကိုယ့်ဆီရောက်လာကြတယ်။ သူတို့က စိတ်မဝင်စားရင်တောင် စပ်စုတဲ့သဘောနဲ့ ရောက်လာကြတယ်။”

၄။ သတ်မှတ်ထားတဲ့နေရာ၊ နေ့နဲ့ အချိန်မှာ ပုံမှန်ခင်းကျင်းတာက ဘာကြောင့် အကျိုးရှိသလဲ။

^၄ သတ်မှတ်ထားတဲ့နေရာ၊ နေ့နဲ့ အချိန်မှာ ပုံမှန်ခင်းကျင်းတာက အကျိုးရှိပါတယ်။ ရလဒ်အနေနဲ့ လူတွေဟာ ခင်းကျင်းထားတာကို မြင်ဖန်များလာပြီး နောက်ဆုံးမှာ ချဉ်းကပ်ရဲလာတယ်။ ပြီးတော့ မေးခွန်းတွေလည်း မေးလာတယ်၊ စာပေတွေလည်း ယူသွားကြတယ်။ သင့်အသင်းတော်မှာ လူထုရှေ့သက်သေခံခြင်း အစီအစဉ်ရှိသလား။ ရှိမယ်ဆိုရင် သင်လည်းပါဝင်နိုင်ပြီး “ဘုရားသခင့်နိုင်ငံတော်အကြောင်းကို ပြောကြား” ခြင်းအားဖြင့် အကျိုးအပြည့်အဝရယူနိုင်ပါတယ်။—လု. ၉:၆၀။