ကာတွန်းဗီဒီယိုတွေကို စိတ်နှလုံးရိုးဖြောင့်သူတွေ ကြိုက်ကြ

jw.org ဗီဒီယို၊ ယေဟောဝါရဲ့မိတ်ဆွေဖြစ်ပါ အပိုင်းမှာပါတဲ့ အောင်အောင်ဆိုတဲ့ကလေးကို အများစုက သိနေပြီ။ ချစ်စရာကောင်းတဲ့ ဒီကလေးအကြောင်း ဗီဒီယိုကဏ္ဍရဲ့ ပထမဦးဆုံးဗီဒီယိုကို ဘာသာစကား ၁၃၀ ကျော်နဲ့ ဘာသာပြန်ထားပြီးပြီ။ ဒီ,ဗီဒီယိုကဏ္ဍနဲ့ပတ်သက်ပြီး ထောင်နဲ့ချီတဲ့စာတွေကို လက်ခံရရှိထားတယ်။

အသက် ၁၁ နှစ်နဲ့ ၈ နှစ်အရွယ်ရှိတဲ့ ညီအစ်မနှစ်ယောက်က အခုလို စာရေးတယ်– “ကမ္ဘာချီဟောပြောခြင်းလုပ်ငန်းအတွက် ကျွန်မတို့ အလှူငွေထည့်လိုက်ပါတယ်။ ကျွန်မတို့ နွားပေါက်နှစ်ကောင်ကို မွေးပြီး ရောင်းလို့ရတဲ့ပိုက်ဆံပါ။ သူတို့ရဲ့နာမည်က ဘိခ်ရက်ခ်နဲ့ အဲလ်လို့ခေါ်တယ်။ ယေဟောဝါရဲ့မိတ်ဆွေဖြစ်ပါဆိုတဲ့ ဗီဒီယိုကို ထပ်ထုတ်ဖို့ ဒီပိုက်ဆံတွေကို ပေးချင်ပါတယ်။ အောင်အောင့်မှာ ညီမလေးတစ်ယောက်ရှိလာရင် သိပ်ကောင်းမှာပဲ။ အဲဒီအခါ အောင်အောင် အပြည့်အဝ အာရုံစိုက်မခံရတော့ရင် သူဘယ်လို လုပ်မလဲဆိုတာ သိလာရမယ်။ အောင်အောင်ဗီဒီယိုက သမီးတို့အကြိုက်ဆုံး ဗီဒီယိုပဲ။”

ကလေးအတော်များများက သီချင်းနဲ့ စကားပြောခန်းအပါအဝင် ဗီဒီယိုအစအဆုံးကို အလွတ်ရကြတယ်။ ညီအစ်မတစ်ယောက်က သူ့အသင်းတော်မှာ ကြေညာသူ ၁၀၀ ရှိတယ်၊ ၄၀ က ကလေးတွေဖြစ်ပြီး အများစုက ဆယ်နှစ်အောက်တွေလို့ စာရေးတယ်။ စည်းဝေးတစ်ခုရဲ့နိဂုံးချုပ်မှာ သီချင်းနံပါတ် ၁၂၀ ကို ဆိုကြတော့ သူက တတိယတန်းမှာ ထိုင်တယ်။ ကလေးတွေအားလုံး “သူတို့ရဲ့သီချင်း” ကို အားရပါးရဆိုတာကို ကြားရတော့ သူမျက်ရည်ဝဲလာတယ်။

အဘွားတစ်ယောက်က အဲဒီဗီဒီယိုကို သူ့မြေးမလေး နှစ်ခါကြည့်ပြီးသွားတော့ “ကစားစရာတွေကြောင့် ဘယ်သူ့မှ ချော်မလဲအောင် သမီးရဲ့အခန်းကို ရှင်းရမယ်” လို့ပြောတယ်ဆိုပြီး စာရေးတယ်။ သူက သူ့ရဲ့အခန်းကို ရှင်းလို့မပြီးမချင်း အစားမစားဘူး။

တောင်အာဖရိက တောရွာတစ်ရွာမှာ ကလေးတွေဟာ သက်သေခံတစ်ယောက်ရဲ့အိမ်ကို နေ့တိုင်း ဝင်ထွက်နေကြတယ်။ တချို့က အဲဒီအိမ်မှာ သကြားလုံးရောင်းတယ်လို့ ထင်နေတာ။ တကယ်တော့ နားထောင်၊ နာခံ၊ ကောင်းချီးစံ ဆိုတဲ့ ကာတွန်းဗီဒီယိုကို သူတို့ရဲ့ ခိုစာဘာသာစကားနဲ့ လာကြည့်ဖို့ ရွာထဲက ကလေးတွေကို တခြားကလေးတွေက ဖိတ်ခေါ်တာဖြစ်တယ်။ တစ်ကြိမ်မှာ ကလေးဆယ့်တစ်ယောက် ကြည့်ပြီး သူတို့အားလုံးက သီချင်းစာသားကို မှတ်မိကြတယ်။

အီကွေဒေါနိုင်ငံမှာ သက်သေခံမဟုတ်တဲ့ ကီချီဝါစကားပြောညီအစ်ကိုနှစ်ယောက်ရှိတယ်။ သူတို့က ရှစ်နှစ်အရွယ် အိဇက်နဲ့ ငါးနှစ်အရွယ် စောတို့ဖြစ်တယ်။ သူတို့နှစ်ယောက်က ရတဲ့မုန့်ဖိုးတွေကိုစုပြီး သေနတ်၊ ဓားနဲ့ တိုက်ခိုက်နေတဲ့အရုပ်တွေကို ဝယ်တတ်တယ်။ တစ်နေ့တော့ သူတို့ရဲ့အမေက အခန်းရှင်းဖို့၊ အရုပ်တွေကို ပုံးထဲထည့်ပြီး ခုတင်အောက်မှာထားဖို့ ပြောတယ်။ နောက်ပိုင်းမှာ အဲဒီကလေးနှစ်ယောက်က ယေဟောဝါရဲ့မိတ်ဆွေဖြစ်ပါ ဒီဗီဒီကို လက်ဆောင်ရပြီး အတူကြည့်ကြတယ်။ တစ်ပတ်ကြာပြီးနောက်မှာ အမေက အိမ်သန့်ရှင်းရေးလုပ်တော့ ခုတင်အောက်ကစက္ကူပုံးထဲမှာ ကားရုပ်တစ်ရုပ်ပဲ ရှိတော့တယ်။ အမေက ကလေးတွေကို “အရုပ်တွေကော” လို့မေးတော့ ကလေးတွေက “အဲဒီအရုပ်တွေကို ယေဟောဝါမကြိုက်လို့ အမှိုက်ပုံးထဲပစ်လိုက်ပြီ” လို့ပြန်ဖြေတယ်။ အခု အိမ်နီးချင်းကလေးတွေက တိုက်ခိုက်သတ်ဖြတ်တဲ့အရုပ်တွေနဲ့ ကစားရင် အိဇက်က “အဲဒါတွေနဲ့ မကစားနဲ့။ ယေဟောဝါမကြိုက်ဘူး” လို့ပြောတယ်။