သက်သေခံချက်ဖြစ်စေသည့် ဗီဒီယိုခွေများ၏အကျိုးသက်ရောက်မှု

^၁ “ကျွန်တော်တို့ရဲ့သားလေးဟာလမ်းမလျှောက်တတ်ခင်ကတည်းက ဗီဒီယိုကိုကြည့်တယ်။ ထပ်ခါတလဲလဲကြည့်တယ်။ ကျွန်တော်တို့ရဲ့ကလေးတွေမှာ ယေဟောဝါအပေါ်ချစ်မြတ်နိုးမှုဖြစ်ပေါ်စေတဲ့ ကိရိယာများရှိခြင်းဟာ အလွန်ဝမ်းသာစရာပဲ!” ဤခရစ်ယာန်မိဘသည် မည်သည့်ဗီဒီယိုခွေကို ပြောနေခြင်းဖြစ်သနည်း။ နောဧ—ဘုရားသခင်နှင့်အတူလျှောက်လှမ်းခဲ့သူ ဗီဒီယိုခွေဖြစ်သည်။ အိမ်တစ်အိမ်တွင် နောဧ ဗီဒီယိုခွေကို သားဖြစ်သူကြည့်ခဲ့ရသည့် သက်သေခံမဟုတ်သောမိခင်တစ်ဦးသည် ဌာနခွဲရုံးသို့ အလှူငွေဒေါ်လာ ၉၀ ပေးပို့ကာ ကလေးများအတွက် အခြားဗီဒီယိုခွေတစ်ခုခုရမလားဟူ၍မေးခဲ့သည်။ ယေဟောဝါ၏အဖွဲ့အစည်းမှထုတ်သည့် ဗီဒီယိုခွေများသည် လူငယ်များအပေါ်တွင်ရော လူကြီးများအပေါ်တွင်ပါ အလွန်ထိထိမိမိအကျိုးသက်ရောက်နေသည်။

^၂ မိသားစုတွင်– သက်သေခံမိသားစုတစ်စုသည် ယေဟောဝါသက်သေတို့ နာဇီထိုးနှက်မှုကို အခိုင်အမာရပ်တည် ဗီဒီယိုခွေကို ကြည့်ပြီးနောက် မိခင်ဖြစ်သူကဤသို့ဆိုသည်– “သာမန်ထက်လွန်ကဲတဲ့အရာတွေကို ခံရပ်နိုင်အောင် သာမန်လူသားတွေကို ယေဟောဝါခွန်အားပေးခဲ့ပုံကို ကျွန်မတစ်နေ့လုံး ဆင်ခြင်သုံးသပ်ခဲ့တယ်! အဲဒါကိုစဉ်းစားနေခြင်းက ကျွန်မရဲ့ပြဿနာတွေဟာ သိပ်ပြီးတော့အရေးမပါလှဘူးဆိုတာကို သတိရစေတယ်။ ဒီဗီဒီယိုခွေကို ကျွန်မတို့ရဲ့ကလေးတွေနဲ့ကြည့်ခြင်းက ယေဟောဝါအပေါ်မှီခိုအားထားဖို့လိုကြောင်း ပိုပြီးရှင်းရှင်းလင်းလင်းမြင်အောင် သူတို့ကိုထောက်ကူပေးတယ်။ အဲဒါကိုကြည့်ပြီးတဲ့နောက် သူတို့နဲ့အတူဆွေးနွေးခြင်းက ကြုံလာနိုင်တဲ့ ဘယ်လိုဖိစီးမှုနဲ့ နှိပ်စက်ညှဉ်းပန်းမှုကိုမဆို ကိုင်တွယ်ဖို့အသင့်ရှိအောင် ကျွန်မတို့ရဲ့သမီးတွေကို ကူညီပေးခဲ့ပါတယ်။”

^၃ ကျောင်းတွင်– ဆယ်ကျော်သက်အရွယ် သက်သေခံတစ်ဦးသည် မှတ်တမ်းတစ်စိတ်တစ်ဒေသအနေနှင့် အခိုင်အမာရပ်တည် ဗီဒီယိုခွေကို သူ၏အတန်းသားများအားပြနိုင်ခဲ့သည်။ ဆရာမသည် သက်သေခံများကိုမကြိုက်ကြောင်း ယခင်ကပြောခဲ့သည်။ ဗီဒီယိုခွေကိုကြည့်ပြီးနောက် သူဤသို့ဆိုသည်– “ဒီဗီဒီယိုခွေက ယေဟောဝါသက်သေတွေနဲ့ပတ်သက်တဲ့ ငါ့ရဲ့ရှုမြင်ပုံကို လုံးဝပြောင်းလဲစေတယ်။ နောက်တစ်ခါ ငါ့ရဲ့အိမ်ကို သူတို့လာရင် သူတို့ဟောတာကိုနားထောင်ပြီး သူတို့နဲ့ကျမ်းစာစလေ့လာမယ်လို့ ငါကတိပေးတယ်!” ဘယ်အရာက ကျွန်ုပ်တို့နှင့်ပတ်သက်သည့် သူ၏ထင်မြင်ချက်ကို ပြောင်းလဲစေခဲ့သနည်း။ သူက ကျွန်ုပ်တို့၏ “စစ်မှန်သောမေတ္တာနှင့် သစ္စာတည်ကြည်မှု” ဖြစ်သည်ဟုဆိုခဲ့သည်။

^၄ ဓမ္မအမှုတွင်– ညီအစ်မတစ်ဦးသည် ကျွန်ုပ်တို့နှင့် ကျွန်ုပ်တို့၏ယုံကြည်ချက်များနှင့်ပတ်သက်၍ မေးစရာမေးခွန်းများရှိသော်လည်း စာပေကိုလက်ခံရန်တွန့်ဆုတ်နေသည့် အမျိုးသမီးတစ်ဦးနှင့်တွေ့ဆုံခဲ့သည်။ ညီအစ်မသည် ယေဟောဝါသက်သေများ—နာမည်နောက်ဝယ်ရှိအဖွဲ့အစည်း ဗီဒီယိုခွေဖြင့် ပြန်သွားကာ ၎င်းကို အမျိုးသမီးနှင့်သူ၏ခင်ပွန်းအား ပြခဲ့သည်။ နှစ်ဦးစလုံးသည် အလွန်စိတ်စွဲမှတ်သွားကာ ကျမ်းစာသင်အံမှုကို လက်ခံခဲ့သည်။ သူတို့အား ကောင်းစွာသက်သေခံခဲ့ရသည့်ရလဒ်အနေနှင့် သူတို့သည် မိမိတို့၏အသက်တာကို ဘုရားသခင့်အလိုတော်နှင့်အညီ စတင်ညီညွတ်စေခဲ့ကြသည်။

^၅ သင်သည် ကျွန်ုပ်တို့၏ဗီဒီယိုခွေများကို အစွမ်းကုန်အသုံးပြုနေသလော။