နိုင်ငံရေး အကြမ်းဖက်မှု—ကျမ်းစာအဆိုက ဘာလဲ

အာဏာပိုင်တွေအပေါ် အကြမ်းဖက်ဆန့်ကျင်မှုတွေ တစ်နေ့တခြား ပိုမိုတိုးများလာ။

နိုင်ငံရေးအကြမ်းဖက်မှုတွေ ဘာကြောင့် ဒီလောက်များလာတာလဲ။ ဒါတွေ တစ်နေ့ အဆုံးတိုင်ပါ့မလား။ ကျမ်းစာအဆိုက ဘာလဲ။

နိုင်ငံရေးအမြင်တွေ ကွဲပြားမယ့်အကြောင်း ကျမ်းစာကြိုဟောထား

“နောက်ဆုံးကာလ” လို့ခေါ်တဲ့ ကျွန်တော်တို့ခေတ်မှာ အကြမ်းဖက်မှု လှုံ့ဆော်သူတွေ၊ စိတ်ဝမ်းကွဲပြားမှုကို အားပေးအားမြှောက်ပြုသူတွေ များလာမယ်လို့ သမ္မာကျမ်းစာ ကြိုဟောထားတယ်။

• “နောက်ဆုံးကာလဟာ အလွန် ခက်ခဲကျပ်တည်းမယ်ဆိုတာ သိထားပါ။ ဘာလို့လဲဆိုတော့ လူတွေဟာ . . . ကျေးဇူးကန်းသူ၊ သစ္စာမရှိသူ၊ . . . ညှိနှိုင်းလို့မရသူ၊ . . . ကြမ်းကြုတ်သူ၊ . . . သစ္စာဖောက်သူ၊ တဇောက်ကန်းနိုင်သူ၊ မာနထောင်လွှားသူ” တွေ ဖြစ်ကြလိမ့်မယ်။—၂ တိမောသေ ၃:၁-၄။

နိုင်ငံရေးပဋိပက္ခ၊ တော်လှန်ပုန်ကန်မှုစတဲ့ ဆူပူအုံကြွမှုတွေဟာ ဒီနေ့ခေတ်ရဲ့ အမှတ်လက္ခဏာတစ်ရပ်ဖြစ်မယ်လို့လည်း ကျမ်းစာကြိုဟောထားတယ်။ (လုကာ ၂၁:၉) ဒါပေမဲ့ နိုင်ငံရေးအကြမ်းဖက်မှုတွေ၊ ကွဲပြားမှုတွေ အမြဲတမ်းဆက်ရှိသွားမှာ မဟုတ်ဘူး။

နိုင်ငံရေးအကြမ်းဖက်မှုတွေ အဆုံးတိုင်သွားမယ်

ကောင်းကင်မှာတည်ထောင်ထားတဲ့ ဘုရားသခင့်အစိုးရက လူ့အစိုးရတွေနေရာမှာ အစားထိုးမယ်လို့ ကျမ်းစာဆိုတယ်။

• “ကောင်းကင်အုပ်စိုးရှင် ဘုရားသခင်က ဘယ်တော့မှ မပျက်စီးမယ့် နိုင်ငံတစ်ခုကို တည်ထောင်လိမ့်မယ်။ . . . [တခြား] နိုင်ငံအားလုံးကို ခြေမွှဖျက်ဆီးလိမ့်မယ်။ ပြီးတဲ့နောက် အဲဒီနိုင်ငံတစ်ခုပဲ ထာဝစဉ် တည်တံ့နေမယ်။”—ဒံယေလ ၂:၄၄။

ဘုရားသခင့်နိုင်ငံတော်က လူတွေကို စည်းလုံးစေပြီး ကမ္ဘာတစ်ဝန်း စစ်မှန်တဲ့ငြိမ်းချမ်းမှု ဆောင်ကြဉ်းပေးပါလိမ့်မယ်။

• ဘုရားနိုင်ငံတော်ရဲ့ဘုရင်ဟာ “ငြိမ်းချမ်းရေးမင်းသား” ယေရှုခရစ်ဖြစ်ပြီး “သူ့ရဲ့ အုပ်ချုပ်ခွင့်အာဏာနဲ့ ငြိမ်သက်ခြင်းဟာ အဆုံးမရှိ တိုးများမယ်။”—ဟေရှာယ ၉:၆၊ ၇။

• အခုအချိန်မှာတောင် ယေရှုခရစ်ရဲ့ အုပ်ချုပ်မှုအောက်မှာ ရှိသူတွေဟာ သင့်သင့်မြတ်မြတ် နေထိုင်နည်းတွေအကြောင်း သင်ယူနေကြပြီ။ ဒါကြောင့် ကျမ်းစာမှာ အခုလိုဆိုထားတာပါ– “ဓားကို ထယ်သွားဖြစ်အောင်၊ လှံကို တံစဉ်ဖြစ်အောင် ထုလုပ်ကြလိမ့်မယ်။ လူမျိုးအချင်းချင်း တိုက်ခိုက်ကြတော့မှာ မဟုတ်ဘူး။ စစ်အတတ်ပညာကိုလည်း မသင်ကြတော့ဘူး။”—ဟေရှာယ ၂:၃၊ ၄။

ထပ်သိချင်ရင် “ဘုရားသခင့်နိုင်ငံတော်က ဘာတွေလုပ်ပေးမလဲ” ဆောင်းပါးနဲ့ ဘုရားသခင့်နိုင်ငံတော်ဆိုတာ ဘာလဲ ဗီဒီယိုကို ကြည့်ပါ။