“လူမျိုးအားလုံးအတွက် သက်သေဖြစ်စေ” တဲ့ စာပေလက်တွန်းစင်တွေ

ဆွဲဆောင်မှုရှိတဲ့ စာပေလက်တွန်းစင်တွေဟာ ဟောပြောခြင်းလုပ်ငန်းရဲ့ တစ်စိတ်တစ်ပိုင်း ဖြစ်လာတာ ဆယ်နှစ်ကျော်ပါပြီ။ ဒီလက်တွန်းစင်တွေကို တစ်ကမ္ဘာလုံးက သိကြတယ်။ လက်တွန်းစင် ဒီဇိုင်းက ထင်သာမြင်သာရှိရုံမက သုံးရတာလည်း လွယ်တယ်။ ပိုလန်နိုင်ငံက ညီအစ်မ အစီနီတာ ပြောတာကို သဘောတူကြမှာ သေချာတယ်– “လက်တွန်းစင်ရဲ့ ဒီဇိုင်းက ရိုးရိုးလေးဆိုပေမဲ့ ကြည့်လို့ကောင်းတယ်။ ရွှေ့ပြောင်းတပ်ဆင်ရ လွယ်တယ်။”

လက်တွန်းစင်တွေကို ဘယ်လို ဒီဇိုင်းဆွဲပြီး ထုတ်လုပ်ခဲ့တယ်ဆိုတာ စဉ်းစားမိဖူးသလား။

ထိရောက်တဲ့ ဒီဇိုင်း

၂၀၀၁ မှာ ပြင်သစ်က ညီအစ်ကို/မတွေဟာ အုပ်ချုပ်ရေးအဖွဲ့ရဲ့ ခွင့်ပြုချက်နဲ့ အများရှေ့သက်သေခံခြင်း ပုံစံအမျိုးမျိုးကို စမ်းသပ်လုပ်ဆောင်ခဲ့ကြတယ်။ လက်တွန်းစင် ဒီဇိုင်းအမျိုးမျိုးသုံးပြီးလည်း သက်သေခံကြတယ်။ ဥပမာ၊ ဘီးလုံးပါ ခရီးဆောင်အိတ်တွေ၊ စျေးဝယ်တွန်းလှည်းတွေကို စာပေတွေ ပြသ၊ သိမ်းဆည်းလို့ ရအောင် မွမ်းမံခဲ့တယ်။ နောက်ဆုံးမှာ ပြင်သစ်ဌာနခွဲက သတ်သတ်မှတ်မှတ် ဒီဇိုင်းတစ်ခုကို ရွေးလိုက်ပြီး ကြေညာသူတွေ နှစ်ပေါင်းများစွာ အသုံးပြုခဲ့ကြတယ်။

အစမ်းသဘောနဲ့လုပ်ခဲ့တဲ့ အများရှေ့ သက်သေခံခြင်းရဲ့ ရလဒ်ကို ပြင်သစ်က ညီအစ်ကို/မတွေ သိပ်အားရခဲ့တယ်။ ဒါကြောင့် ၂၀၁၁ ခုနှစ်၊ အမေရိကန်နိုင်ငံ၊ နယူးယောက်မြို့မှာ အများရှေ့သက်သေခံခြင်းကို လက်တွန်းစင်တွေ၊ စားပွဲတွေနဲ့ စမ်းလုပ်ကြည့်ဖို့ အုပ်ချုပ်ရေးအဖွဲ့က ခွင့်ပြုတယ်။ ဒီအစီအစဉ်မှာ ပါဝင်တဲ့ ရှေ့ဆောင်တွေက လက်တွန်းစင်ရဲ့အားသာချက်တွေကို သတိပြုမိကြတယ်။ အားသာချက်တစ်ခုကတော့ ရွှေ့ပြောင်းရ လွယ်ကူတာပါ။ ရှေ့ဆောင်တွေက လက်တွန်းစင်ဒီဇိုင်းနဲ့ပတ်သက်ပြီး အကြံကောင်းတွေ ပေးကြတယ်။ သစ်သားလက်တွန်းစင်တွေက လေးတော့ လှေကားအတက်အဆင်း သယ်ရပြုရတာ မလွယ်ဘူး။ ဒါကြောင့် သယ်ရလည်း ပေါ့၊ လေတိုက်ရင်လည်း မလဲမယ့် လက်တွန်းစင်တွေကို ပြောင်းလဲသုံးကြတယ်။ လမ်းကြမ်းတွေကို ခံနိုင်ဖို့ ပိုကြီး၊ ပိုခိုင်တဲ့ ဘီးတွေ ပြောင်းတပ်လိုက်တယ်။ စာပေအပိုတွေထားဖို့ အကန့်လေးတစ်ခုကိုပါ ထပ်ထည့်လိုက်တယ်။

အစမ်းအစီအစဉ် အောင်မြင်သွားလို့ ၂၀၁၂ မှာ အုပ်ချုပ်ရေးအဖွဲ့က ကမ္ဘာတစ်ဝန်းမှာ စာပေလက်တွန်းစင်တွေ သုံးဖို့ ခွင့်ပြုလိုက်တယ်။ ပေါ့ပါး၊ အကြမ်းခံတဲ့ ပစ္စည်းတွေသုံးပြီး လက်တွန်းစင် အများကြီး ထုတ်လုပ်ဖို့ စက်ရုံတစ်ခုနဲ့ စီစဉ်တယ်။

နှစ်တွေတစ်လျှောက် လက်တွန်းစင်တွေကို ပိုကောင်းအောင် နည်းနည်းပါးပါး ပြောင်းလဲခဲ့တယ်။ ဥပမာ၊ ၂၀၁၅ မှာ လက်တွန်းစင်အတွက် မိုးကာလုပ်ပြီး အရှေ့ပိုင်းကို ပလပ်စတစ်အကြည်နဲ့ ကာတယ်။ “လက်တွန်းစင်မှာ ကိုယ်ပိုင်မိုးကာ ရှိထားလို့ စာပေတွေ ရေမစိုတော့တာ” ကို သဘောကျတယ်ဆိုပြီး ဂျော်ဂျီယာနိုင်ငံက ညီအစ်မဒိုင်နာ ပြောပြတယ်။ ၂၀၁၇ မှာ သံလိုက်ဘောင်နဲ့ ကြော်ငြာပိုစတာကပ်ဖို့ ဘာသာစကားတချို့အတွက် ပြင်ဆင်ပေးတယ်။ “အရင်တုန်းက ကပ်ခွာပိုစတာတွေသုံးတော့ ပြန်ခွာဖို့ တအား လက်ဝင်တယ်။ သံလိုက်ဘောင်သုံးတာဟာ သိပ်ကောင်းတဲ့ စိတ်ကူးပဲ” လို့ ပိုလန်နိုင်ငံက ညီအစ်ကိုသောမတ်ရှ် ပြောတယ်။ ၂၀၁၉ မှာ လက်တွန်းစင်တွေကို ပိုအကြမ်းခံအောင် ထုတ်လုပ်မှုပိုင်းမှာကော၊ သုံးတဲ့ပစ္စည်းတွေကိုပါ အဆင့်မြှင့်တင်ခဲ့တယ်။

စာပေလက်တွန်းစင် ထုတ်လုပ်မှု

စာပေလက်တွန်းစင်တွေကို စက်ရုံတစ်ခုတည်းကနေ ထုတ်လုပ်တာဖြစ်ပြီး တစ်ကမ္ဘာလုံးကို ဖြန့်ချိတယ်။ ပို့ခနဲ့တခြားအကုန်အကျတွေ မပါဘဲ လက်တွန်းစင်တစ်ခုတည်းအတွက် လောလောဆယ် ၄၃ အမေရိကန်ဒေါ်လာ ကုန်ကျတယ်။ အခုအချိန်ထိ လက်တွန်းစင်တွေအတွက် အမေရိကန် ဒေါ်လာ ၁၆ သန်းကျော် သုံးခဲ့ပါတယ်။ ကမ္ဘာတစ်ဝန်းက အသင်းတော်တွေဆီ လက်တွန်းစင်ပေါင်း ၄၂၀,၀၀၀ ကျော် ပို့ပြီးပါပြီ။

လှူဒါန်းထားတဲ့ငွေတွေကို အကျိုးရှိရှိ သုံးနိုင်ဖို့ စာပေလက်တွန်းစင်တွေကို လက်ကား မှာယူတယ်။ ဒါ့အပြင် လက်တွန်းစင်တွေကို ပြုပြင်စရာရှိရင် အသင်းတော်က အပိုပစ္စည်း မှာယူနိုင်ပြီဆိုတော့ တစ်ခုလုံးအသစ်လဲဖို့ မလိုတော့ဘူး။

သက်သေခံဖို့ လက်တွန်းစင်တွေ အသုံးပြုခြင်း

ကမ္ဘာတစ်ဝန်းက ကြေညာသူတွေက စာပေလက်တွန်းစင်တွေကို ကြိုက်ကြတယ်။ ဂါနာနိုင်ငံက မာတီနာ ဒီလိုပြောတယ်– “ပုံမှန်ဆိုရင် အမှုဆောင်မှာ ကျွန်မတို့က လူတွေဆီ ချဉ်းကပ်ရတာ။ လက်တွန်းစင်နဲ့ သက်သေခံတာကို သဘောကျတဲ့အချက်က လူတွေက ကျွန်မတို့ဆီ ချဉ်းကပ်လာတာ။ လမ်းသွားလမ်းလာတွေကိုတောင် သက်သေခံနိုင်တယ်လေ။”

အနောက်အာဖရိကနိုင်ငံတစ်ခုမှာ အမျိုးသားတစ်ယောက်က လက်တွန်းစင်နားလာပြီး သူ့ဘာသာစကားနဲ့ စာပေတွေ ယူခဲ့တယ်။ တစ်ပတ်ကြာပြီးနောက် ပြန်လာပြီး ဒီလိုပြောတယ်– “ကျွန်တော် စာပေအားလုံး ဖတ်ပြီးပြီ။ သိပ်အရေးကြီးတဲ့ အကြောင်းအရာတွေပါလို့ ရွာက မိသားစုကို ပြန်သွားပြောပြမယ်။” ရွာက ၃၁၁ မိုင်လောက် ဝေးတယ်။ နှစ်လကြာတော့ သူပြန်လာပြီး ဒီလိုပြောပြတယ်– “ရွာကလူတွေလည်း စာပေအားလုံး ဖတ်ပြီးကြပြီ။ တအား သဘောကျကြတယ်။ ယေဟောဝါသက်သေ ဖြစ်ချင်တယ်တဲ့။ ဒါပေမဲ့ သူတို့ မေးချင်တာလေးတွေရှိတယ်။ ဥပမာ၊ နှစ်ခြင်းခံဖို့ဆိုရင် ရေထဲ နှစ်ရမယ်လို့ သူတို့ သဘောပေါက်ထားကြတယ်။ ဒါပေမဲ့ ကျွန်တော်တို့ရဲ့ ရွာနားမှာ မြစ်မရှိဘူးဆိုတော့ ဒီကိုလာပြီး နှစ်ခြင်းခံရမှာလား။” ကြေညာသူတွေက သူနဲ့ စကားချင်းတူတဲ့ ရှေ့ဆောင်တစ်ယောက်ကို ဆက်သွယ်ပေးလိုက်တယ်။ အဲဒီအချိန်ကစပြီး သူ ပုံမှန် ကျမ်းစာလေ့လာနေပြီ။

စာပေလက်တွန်းစင်တွေကို သုံးပြီး “လူမျိုးအားလုံးအတွက် သက်သေ” ဖြစ်အောင် ဟောပြောနေတာ စိတ်လှုပ်ရှားစရာပါ။ (မဿဲ ၂၄:၁၄) လက်တွန်းစင်ထုတ်လုပ်တဲ့ ကုန်ကျစရိတ်ကို ဘယ်ကနေရလဲ။ ကမ္ဘာချီလုပ်ငန်းအတွက် ထည့်ဝင်တဲ့ အလှူငွေကနေပါ။ အများစုက donate.jw.org ကတစ်ဆင့် လှူဒါန်းကြတယ်။ သင့်ရဲ့ရက်ရောမှုအတွက် ကျေးဇူးတင်ပါတယ်။