ဘုရားသခင့် အစီအစဉ်မှာ ခရစ်တော်ရဲ့ အခန်းကဏ္ဍကို အသိအမှတ်ပြုခြင်း

“အစအဦးမှာ ဘုရားသခင်က ကောင်းကင်နဲ့ မြေကြီးကို ဖန်ဆင်း” ပြီး ဖန်ဆင်းသမျှ “သိပ်ကောင်း” တယ်။ (က. ၁:၁၊ ၃၁) ယေဟောဝါဟာ လူသားတွေကို သိပ်ကောင်းတဲ့ အနာဂတ် မျှော်လင့်ချက်တွေနဲ့ ဖန်ဆင်းခဲ့ပေမဲ့ ဧဒင်မှာ ပေါ်ပေါက်ခဲ့တဲ့ ပုန်ကန်မှုကြောင့် လူသားတွေရဲ့ ပျော်ရွှင်စရာ အခြေအနေ ခဏတစ်ဖြုတ် ပျက်ပြားသွားခဲ့တယ်။ ဒါပေမဲ့ ကမ္ဘာမြေနဲ့ရော လူသားတွေနဲ့ပါ ပတ်သက်တဲ့ ယေဟောဝါရဲ့ ရည်ရွယ်ချက်ကတော့ မပြောင်းလဲဘူး။ အာဒံရဲ့ နာခံမှု ရှိတဲ့ သားစဉ်မြေးဆက်တွေ ကယ်တင်ခံရမယ့်အကြောင်း ဘုရားသခင် ကြိုပြောခဲ့တယ်။ စစ်မှန်တဲ့ ဝတ်ပြုရေး ပြန်ပေါ်လာပြီး ဆိုးညစ်သူနဲ့အတူ သူ့ရဲ့မကောင်းမှုအားလုံးကို ဘုရားသခင် ဖျက်ဆီးပစ်ပါလိမ့်မယ်။ (က. ၃:၁၅) အဲဒီအခါ အရာအားလုံးဟာ ပြန်ပြီး “သိပ်ကောင်း” လာပါလိမ့်မယ်။ သားတော် ယေရှုခရစ်အားဖြင့် အဲဒီအရာတွေကို ယေဟောဝါ အကောင်အထည် ဖော်ပါလိမ့်မယ်။ (၁ ယော. ၃:၈) ဒါကြောင့် ဘုရားသခင့် အစီအစဉ်မှာ ခရစ်တော်ရဲ့ အခန်းကဏ္ဍကို အသိအမှတ်ပြုဖို့ သိပ်အရေးကြီးပါတယ်။—တ. ၄:၁၂။ ဖိ. ၂:၉၊ ၁၁။

ခရစ်တော်ရဲ့ အခန်းကဏ္ဍက ဘာလဲ

^၂ ဘုရားသခင့် အစီအစဉ်မှာ ပါဝင်တဲ့ ခရစ်တော်ရဲ့ အခန်းကဏ္ဍဟာ အသွင်အမျိုးမျိုး ရှိတယ်။ ယေရှုဟာ လူသားတွေရဲ့ ရွေးနုတ်ရှင်၊ ပုရောဟိတ်မင်း၊ ခရစ်ယာန် အသင်းတော်ရဲ့ ဦးခေါင်းနဲ့ အခုအချိန်မှာ ဘုရားသခင့် နိုင်ငံတော်ဘုရင်အဖြစ် အမှုဆောင်နေတယ်။ အဲဒီအခန်းကဏ္ဍတွေအကြောင်း စဉ်းစားတွေးတောတဲ့အခါ ဘုရားသခင့် အစီအစဉ်ကို ကျေးဇူးတင်လေးမြတ်စိတ်၊ ခရစ်တော်ယေရှုကို ချစ်တဲ့စိတ် တိုးများလာတယ်။ ယေရှုရဲ့ အခန်းကဏ္ဍ အမျိုးမျိုးအကြောင်း ကျမ်းစာမှာ ဖော်ပြထားတယ်။

^၃ နာခံတဲ့ လူသားတွေဟာ ယေရှုအားဖြင့် ဘုရားသခင်နဲ့ ပြန်သင့်မြတ်လာမယ်ဆိုတာ ခရစ်တော်ရဲ့ မြေကြီးပေါ် အမှုဆောင်ချိန်အတွင်း ထင်ရှားလာတယ်။ (ယော. ၁၄:၆) ယေရှုဟာ လူသားတွေရဲ့ ရွေးနုတ်ရှင်အနေနဲ့ ကိုယ့်ကိုယ်ကိုယ် လူအများအတွက် ရွေးဖိုးအဖြစ် ပေးဆက်ခဲ့တယ်။ (မ. ၂၀:၂၈) ဒါကြောင့် ယေရှုဟာ ဘုရားရေးရာ အကျင့်အကြံပိုင်းမှာ စံတင်ထိုက်သူ တစ်ယောက်လောက်ပဲ မဟုတ်ဘူး။ လူသားတွေနဲ့ပတ်သက်တဲ့ ယေဟောဝါရဲ့ ရည်ရွယ်ချက် ပြည့်စုံလာရေးမှာ အဓိကကျသူ ဖြစ်တယ်။ ယေရှုအားဖြင့်သာ ဘုရားသခင့် မျက်နှာသာ ပြန်ရနိုင်မယ်။ (တ. ၅:၃၁။ ၂ ကော. ၅:၁၈၊ ၁၉) ပူဇော်သက္ကာအဖြစ် ယေရှု သေဆုံးပြီး ထမြောက်လာတဲ့အတွက် နာခံတဲ့ လူသားတွေ ဘုရားသခင့် ကောင်းကင်နိုင်ငံတော်အောက်မှာ ထာဝရ ကောင်းချီးတွေ ခံစားရဖို့ လမ်းပွင့်လာတယ်။

^၄ ပုရောဟိတ်မင်းအနေနဲ့ ယေရှုဟာ မြေကြီးပေါ်မှာရှိတဲ့ ဆက်ကပ်အပ်နှံ နောက်လိုက်တွေရဲ့ ‘အားနည်းချက်တွေကို စာနာ’ ပေးနိုင်ပြီး အပြစ်တွေကို ခွင့်လွှတ်ပေးနိုင်တယ်။ “အဲဒီပုရောဟိတ်မင်းက ကျွန်တော်တို့ရဲ့ အားနည်းချက်တွေကို မစာနာနိုင်တဲ့သူ မဟုတ်ဘူး။ ကျွန်တော်တို့လိုပဲ အဘက်ဘက်မှာ စမ်းသပ်ခံရတဲ့သူပဲ။ ဒါပေမဲ့ အပြစ်တစ်ခုမှ မကျူးလွန်ခဲ့ဘူး” လို့ တမန်တော် ပေါလု ပြောတယ်။ အဲဒီနောက် ဘုရားသခင်နဲ့ ပြန်သင့်မြတ်စေတဲ့ အစီအစဉ်ကနေ အကျိုးအပြည့်အဝ ရယူဖို့ ယေရှုအပေါ် ယုံကြည်သူတွေကို အခုလိုအားပေးခဲ့တယ်– “ဒါကြောင့် မဟာကရုဏာပြတဲ့ ဘုရားသခင်ရဲ့ ပလ္လင်အနားကို သွားကြစို့၊ ရဲရဲဝံ့ဝံ့ ပြောဆိုခွင့်ကို သုံးပြီး ဆုတောင်းကြစို့။ အဲဒီလိုလုပ်ရင် အကူအညီ လိုအပ်ချိန်မှာ သနားကြင်နာမှုနဲ့ မဟာကရုဏာကို ခံစားရလိမ့်မယ်။”—ဟီ. ၄:၁၄-၁၆။ ၁ ယော. ၂:၂။

^၅ ယေရှုဟာ ခရစ်ယာန် အသင်းတော်ရဲ့ ဦးခေါင်းလည်း ဖြစ်တယ်။ ပထမရာစု နောက်လိုက်စစ်တွေလိုပဲ ကျွန်တော်တို့လည်း လူသားခေါင်းဆောင် မလိုဘူး။ ယေရှုဟာ သန့်ရှင်းသော စွမ်းအားတော်ကတစ်ဆင့်၊ အရည်အချင်းရှိ လက်ထောက်သိုးထိန်းတွေကတစ်ဆင့် လမ်းညွှန်ချက်တွေ ပေးနေတယ်။ သူတို့ဟာ ဘုရားသခင့် သိုးတော်စုကို ထိန်းကျောင်းပုံနဲ့ပတ်သက်ပြီး ကောင်းကင်ဖခင်ရှေ့၊ ယေရှုရှေ့ စာရင်းရှင်းရမယ့်သူတွေ ဖြစ်တယ်။ (ဟီ. ၁၃:၁၇။ ၁ ပေ. ၅:၂၊ ၃) ယေရှုနဲ့ပတ်သက်ပြီး ယေဟောဝါက “ကြည့်ပါ။ လူမျိုးတွေအတွက် သက်သေအဖြစ် သူ့ကို ငါခန့်လိုက်ပြီ။ လူမျိုးတွေအတွက် ခေါင်းဆောင်အဖြစ်၊ အမိန့်ပေးသူအဖြစ် ခန့်လိုက်ပြီ” လို့ ကြိုဟောတယ်။ (ဟေရှာ. ၅၅:၄) အဲဒီ ကြိုဟောချက် ပြည့်စုံပြီဆိုတာ အတည်ပြုတဲ့အနေနဲ့ ယေရှုက တပည့်တွေကို “ခေါင်းဆောင်လို့လည်း အခေါ်မခံကြနဲ့။ ခင်ဗျားတို့မှာ ခရစ်တော်ဆိုတဲ့ ခေါင်းဆောင်တစ်ယောက်ပဲ ရှိတယ်” လို့ ပြောခဲ့တယ်။—မ. ၂၃:၁၀။

^၆ ယေရှုဟာ ကျွန်တော်တို့ကို ကူညီပေးချင်တဲ့ စိတ်ဆန္ဒကို ဖော်ပြတဲ့အနေနဲ့ အခုလိုဖိတ်ခေါ်တယ်– “ဝန်ပိလို့ ပင်ပန်းနေသူတို့၊ ကျွန်တော့်ဆီ လာကြပါ။ ခင်ဗျားတို့ကို လန်းဆန်းစေမယ်။ ကျွန်တော့်ထမ်းပိုးကို ထမ်းပြီး ကျွန်တော့်ဆီကနေ သင်ယူကြပါ။ ကျွန်တော်ဟာ နူးညံ့သိမ်မွေ့ပြီး စိတ်နှိမ့်ချတယ်။ ခင်ဗျားတို့ လန်းဆန်းရလိမ့်မယ်။ ကျွန်တော့်ထမ်းပိုးဟာ ထမ်းလွယ်တယ်။ ဝန်လည်း ပေါ့ပါတယ်။” (မ. ၁၁:၂၈-၃၀) ခရစ်ယာန် အသင်းတော်ရဲ့ အရေးကိစ္စတွေကို ယေရှုခရစ် စီမံအုပ်ချုပ်ပုံက နူးညံ့သိမ်မွေ့ပြီး ကျွန်တော်တို့ကို လန်းဆန်းစေတယ်။ ဒီနည်းအားဖြင့် ကောင်းကင်ဖခင် ယေဟောဝါဘုရားကို တုပတဲ့ “သိုးထိန်းကောင်း” ဖြစ်ကြောင်း သက်သေပြတယ်။—ယော. ၁၀:၁၁။ ဟေရှာ. ၄၀:၁၁။

^၇ ကောရိန္သု အသင်းတော်ကို ရေးတဲ့ ပထမစာစောင်မှာ ယေရှုခရစ် ထမ်းဆောင်တဲ့ အခန်းကဏ္ဍရဲ့ နောက်အသွင်တစ်မျိုးကို ပေါလု ဖော်ပြတယ်– “ခရစ်တော်က ရန်သူအားလုံးကို မိမိရဲ့ ခြေအောက်မှာ ဘုရားသခင် ချထားမယ့်အချိန်အထိ အုပ်စိုးရလိမ့်မယ်။ အရာခပ်သိမ်းကို သားတော်ရဲ့ ခြေအောက်မှာ ချထားပြီးတဲ့အခါ အရာခပ်သိမ်းကို ချထားတဲ့ ဘုရားသခင်ကို သားတော်ကိုယ်တိုင် လက်အောက်ခံလိမ့်မယ်။ အဲဒီအခါ ဘုရားသခင်ဟာ လူအားလုံးရဲ့ တစ်ပါးတည်းသော အုပ်စိုးရှင် ဖြစ်လိမ့်မယ်။” (၁ ကော. ၁၅:၂၅၊ ၂၈) မြေကြီးပေါ် မလာခင်တုန်းက ယေရှုဟာ ဘုရားသခင်ရဲ့ “ကျွမ်းကျင်လုပ်သား” ဖြစ်ပြီး ဦးဆုံး ဖန်ဆင်းခြင်းလက်ရာ ဖြစ်တယ်။ (ပညာ. ၈:၂၂-၃၁) မြေကြီးပေါ် စေလွှတ်ခံရချိန်မှာလည်း ယေရှုဟာ ဘုရားသခင့် အလိုတော်ကို အမြဲ လုပ်ဆောင်တယ်။ အကြီးမားဆုံး စမ်းသပ်မှုကို ကြံ့ကြံ့ခံပြီး ဖခင်အပေါ် သစ္စာရှိရှိ သေဆုံးခဲ့တယ်။ (ယော. ၄:၃၄။ ၁၅:၁၀) သေတဲ့အထိ သစ္စာစောင့်သိတဲ့အတွက် ယေရှုကို ကောင်းကင်ပေါ် ဘုရားသခင် ထမြောက်ပေးပြီး ကောင်းကင်နိုင်ငံတော်ရဲ့ ဘုရင် ဖြစ်ခွင့် ပေးခဲ့တယ်။ (တ. ၂:၃၂-၃၆) တန်ခိုးရှိတဲ့ နာမ်ဝိညာဉ်ပုဂ္ဂိုလ် မြောက်မြားစွာကို ဦးဆောင်ပြီး မြေကြီးပေါ်က လူ့အုပ်ချုပ်မှုနဲ့ ဆိုးသွမ်းမှုအားလုံးကို ဖယ်ရှားဖို့ ခရစ်တော်ယေရှု တာဝန်ရရှိထားတယ်။ (ပညာ. ၂:၂၁၊ ၂၂။ ၂ သက်. ၁:၆-၉။ ဗျာ. ၁၉:၁၁-၂၁။ ၂၀:၁-၃) အဲဒီနောက် ခရစ်တော် ဦးဆောင်တဲ့ ဘုရားသခင့် ကောင်းကင် နိုင်ငံတော် တစ်ခုတည်းကသာ ကမ္ဘာမြေတစ်ခွင်ကို အုပ်စိုးပါလိမ့်မယ်။—ဗျာ. ၁၁:၁၅။

ခရစ်တော်ရဲ့ အခန်းကဏ္ဍကို အသိအမှတ်ပြုခြင်းဆိုတာ ဘာကို ဆိုလိုသလဲ

^၈ ကျွန်တော်တို့ရဲ့ စံနမူနာရှင် ယေရှုခရစ်ဟာ စုံလင်တယ်။ ကျွန်တော်တို့ကို ကြည့်ရှုစောင့်ရှောက်ဖို့ တာဝန်ရရှိထားတယ်။ ယေရှုရဲ့ မေတ္တာပါ ကြည့်ရှုစောင့်ရှောက်မှုကနေ အကျိုးရရှိဖို့ဆိုရင် ကျွန်တော်တို့ဟာ ယေဟောဝါကို ဆက်သစ္စာစောင့်သိနေဖို့၊ ယေဟောဝါရဲ့ တိုးတက်နေတဲ့ အဖွဲ့အစည်းနဲ့အတူ အမီလိုက်နေဖို့ လိုအပ်တယ်။

^၉ ပထမရာစုတုန်းက ယေရှုရဲ့ နောက်လိုက်တွေဟာ ဘုရားသခင့် အစီအစဉ်မှာ ခရစ်တော်ရဲ့ အခန်းကဏ္ဍကို အပြည့်အဝ အသိအမှတ်ပြုခဲ့ကြတယ်။ ခရစ်တော်ရဲ့ ဦးဆောင်မှုအောက် စည်းလုံးစွာ ပူးပေါင်းဆောင်ရွက်ခြင်း၊ သန့်ရှင်းသော စွမ်းအားတော်ကတစ်ဆင့်လာတဲ့ ခရစ်တော်ရဲ့ လမ်းညွှန်ချက်ကို လက်အောက်ခံခြင်းအားဖြင့် အသိအမှတ်ပြုကြောင်း ဖော်ပြကြတယ်။ (တ. ၁၅:၁၂-၂၁) ဘိသိက်ခံ ခရစ်ယာန် အသင်းတော်ရဲ့ စည်းလုံးမှုအကြောင်း တမန်တော် ပေါလု ပြောတယ်– “ကျွန်တော်တို့ဟာ အမှန်တရားကို ပြောပြီး မေတ္တာပြရမယ်။ ဒါမှ ဦးခေါင်းဖြစ်တဲ့ ခရစ်တော်လို ကျင့်ကြံပြုမူနိုင်ပြီး အရာရာမှာ ရင့်ကျက်တဲ့သူတွေ ဖြစ်လာမယ်။ ခရစ်တော်အားဖြင့် ခန္ဓာကိုယ်တစ်ခုလုံးဟာ အချိတ်အဆက်မိမိ လုပ်ဆောင်နေတယ်။ အဆစ်တွေက ဆိုင်ရာတာဝန်ကို ပူးပေါင်းလုပ်ဆောင်နေတယ်။ ကိုယ်အင်္ဂါအသီးသီးကလည်း ဆိုင်ရာတာဝန်ကို လုပ်ဆောင်တဲ့အခါ ခန္ဓာကိုယ်တစ်ခုလုံး ကြီးထွားလာပြီး ချစ်ခြင်းမေတ္တာ ခိုင်မြဲလာတယ်။”—ဧ. ၄:၁၅၊ ၁၆။

^၁၀ အသင်းတော်မှာ ယောက်တိုင်းက ခရစ်တော်ရဲ့ ဦးဆောင်မှုအောက် စည်းစည်းလုံးလုံး ပူးပေါင်းဆောင်ရွက်တဲ့အခါ အသင်းတော်မှာ တိုးတက်မှုရှိပြီး “စည်းလုံးခြင်းအတွက် ခိုင်မြဲတဲ့နှောင်ကြိုး” ဖြစ်တဲ့ မေတ္တာ လွှမ်းခြုံနေတယ်။—ယော. ၁၀:၁၆။ ကော. ၃:၁၄။ ၁ ကော. ၁၂:၁၄-၂၆။

^၁၁ ကမ္ဘာ့ဖြစ်ရပ်တွေနဲ့ပတ်သက်တဲ့ ကျမ်းစာကြိုဟောချက် ပြည့်စုံနေတာက ယေရှုခရစ်ဟာ ၁၉၁၄ ခုနှစ်ကစပြီး နိုင်ငံတော်အာဏာ အပ်နှင်းခံရပြီဆိုတာကို အထင်အရှား ဖော်ပြတယ်။ အခု၊ ရန်သူတွေအလယ်မှာ အုပ်စိုးနေတယ်။ (ဆာ. ၂:၁-၁၂။ ၁၁၀:၁၊ ၂) ဒါက မြေကြီးပေါ် လက်ရှိ အသက်ရှင်နေသူတွေအတွက် ဘယ်လို အဓိပ္ပာယ်ရှိသလဲ။ မကြာခင်မှာ ယေရှုဟာ ရန်သူတွေအပေါ် ဘုရားသခင့် တရားစီရင်ချက်အတိုင်း အကောင်အထည်ဖော် ဆောင်ရွက်တဲ့အခါ ဘုရင်တို့ရဲ့ ဘုရင်၊ သခင်တို့ရဲ့ သခင်ဆိုတဲ့ မိမိအခန်းကဏ္ဍကို ဖော်ပြပါလိမ့်မယ်။ (ဗျာ. ၁၁:၁၅။ ၁၂:၁၀။ ၁၉:၁၆) အဲဒီနောက် လူ့ပုန်ကန်မှု စတင်တုန်းက ယေဟောဝါ ပေးခဲ့တဲ့ ကယ်တင်ခြင်းကတိဟာ ခရစ်တော်ရဲ့ ညာဘက်မှာရှိတဲ့ မျက်နှာသာရသူတွေအတွက် ပြည့်စုံလာပါလိမ့်မယ်။ (မ. ၂၅:၃၄) ဘုရားသခင့် အစီအစဉ်မှာ ခရစ်တော်ရဲ့ အခန်းကဏ္ဍကို အသိအမှတ်ပြုခဲ့လို့ သိပ်ဝမ်းသာစရာပါပဲ။ ဒီနောက်ဆုံးကာလမှာ ခရစ်တော်ရဲ့ ဦးဆောင်မှုအောက် ကမ္ဘာချီ အမှုဆောင်လုပ်ငန်း ပြီးမြောက်အောင် စည်းစည်းလုံးလုံး ဆက်လုပ်ဆောင်သွားကြပါစို့။